ဖမ်းဆီးခံထားရတဲ့ ကလေး PDF ဆေးတပ်ဖွဲ့ဝင်အမျိုးသမီးငယ် ၉ ယောက်ကို မော်လိုက် ကလေးအကျဉ်းထောင်သို့ စစ်ကောင်စီက ပို့ဆောင်ထားပြီး မိသားစုတွေနဲ့ ထောင်ဝင်စာတွေ့ခွင့်မရသေးဘူးလို့ ကလေး PDF တာဝန်ရှိသူက ပြောပါတယ်။
နိုဝင်ဘာ ၁၆ ရက်နေ့မှာ စစ်ကောင်စီက စစ်ကိုင်းတိုင်း၊ ကလေး PDF တပ်ရင်း ၃ လက်အောက်ခံ၊ တပ်ခွဲစခန်းတစ်ခုကို ဝင်ရောက်စီးနင်းခဲ့ပြီး ဆေးတပ်ဖွဲ့ဝင်အမျိုးသမီးငယ် ၁၀ ယောက်နဲ့ တပ်သား ၂ ယောက်တို့ကို ဖမ်းဆီးခဲ့တာပါ။
ဒီအထဲက ဆေးတပ်ဖွဲ့ဝင်အမျိုးသမီးငယ် တယောက်နဲ့ တပ်သား ၂ ယောက်တို့ကို စစ်ကောင်စီက အကြမ်းဖက်သတ်ဖြတ်ခဲ့ပြီး ကျန်တဲ့အမျိုးသမီး ၉ ယောက်ကိုတော့ ဖမ်းဆီးသွားခဲ့ကာ နိုဝင်ဘာလကုန်ပိုင်းမှာ စစ်ကိုင်းတိုင်း ကလေးမြို့ မော်လိုက်ကျေးရွာအနီးရှိ ကလေးအကျဉ်းထောင်ကို ပို့ဆောင်ခဲ့တာဖြစ်ပါတယ်။
ဆေးတပ်ဖွဲ့ဝင်အမျိုးသမီး ၉ယောက်ထဲက ၆ ယောက်ကို နိုဝင်ဘာ ၂၄ ရက်နေ့က ကလေးအ ကျဉ်းထောင်ကို စတင်ပို့ဆောင်ခဲ့တာဖြစ်ပြီး ကျန် ၃ ယောက်ကိုတော့ ကလေးမြို့မရဲစခန်းမှာ ၂ ရက်ကြာစစ်ဆေးပြီးမှ ကလေးအကျဉ်းထောင်ကိုပို့တာလို့သိရပါတယ်။
ကလေး PDF တာဝန်ရှိသူတစ်ဦး "အဖမ်းဆီးခံထားရတဲ့ ဆေးတပ်သားအမျိုးသမီးတပ်ဖွဲ့ဝင် ၉ ယောက်စလုံး လက်ရှိအချိန်မှာ မော်လိုက်ကလေးအကျဉ်းထောင်မှာရှိနေတယ်လို့သိရပါတယ်။ မိသားစုဝင်တွေ အနေနဲ့ပစ္စည်းသွားပို့လို့တော့ရတယ်။ လူချင်းထောင်ဝင်စာတွေ့ခွင့်တော့ မရသေးဘူးလို့သိရပါတယ်။"လို့ ပြောပါတယ်။
စစ်ကောင်စီဟာ နိုဝင်ဘာလကုန်ပိုင်းမှာ ကလေးမြို့နယ်တောင်ပိုင်းကို အင်အား ၇၀ စီပါဝင်တဲ့ စစ်ကြောင်းလေးခုနဲ့ ဆက်တိုက်ထိုးစစ်ဆင်ခဲ့ပါတယ်။ ကလေးမြို့နယ်တောင်ပိုင်း၊ မြစ်သာမြစ် အရှေ့ဘက်ကမ်းက ကျေးရွာတွေမှာ မီးရှို့အကြမ်းဖက်တာတွေဆက်တိုက်ပြုလုပ်ခဲ့ပြီး နိုဝင်ဘာ ၃၀ရက်နေ့က မီးရှို့အကြမ်းဖက်မှုကြောင့် လယ်ခြားကျေးရွာက နေအိမ် ၇ လုံးမီးလောင်ပျက်စီးခဲ့ပါတယ်။
ဒေသခံပြည်သူတွေကတော့ ဘေးလွတ်ရာကို ထွက်ပြေးတိမ်းရှောင်နေရပြီး သတင်းအချက်အလက်အတိအကျကို မကြာခင်အချိန်မှာ ထုတ်ပြန်မယ်လို့ ကလေး PDF တာဝန်ရှိသူကပြောပါတယ်။
“ကလေးမြို့နယ်တောင်ပိုင်း၊ မြစ်သာမြစ်အရှေ့ဘက်ကမ်းကကျေးရွာတွေ လယ်ခြားတရွာတည်း တင်မဟုတ်ပါဘူး။ အရင်ရက်တွေက တခြားရွာတွေလည်းမီးရှို့ခံရပါတယ်။ နောက်နာရီဝက်တစ်နာရီ အတွင်းမှာအသေးစိတ်အချက်အလက်တွေ သတင်းထုတ်ပြန်ပါမယ်။ ဖုန်းလိုင်းတွေကတော့ တစ်နေကုန်အပိတ်ခံထားရပါတယ်။"
ကလေးမြို့နယ်အတွင်းက ဘယ်နေရာမှာမဆို တိုက်ပွဲတွေအချိန်မရွေးဖြစ်နိုင်တဲ့အတွက် ပြည်သူတွေဟာ ဘေးလွတ်မယ့်နေရာရှောင်ရှားနေထိုင်ကြဖို့ ကလေး PDF က မေတ္တာရပ်ခံစာထုတ်ပြန်ထားပါတယ်။
စစ်ကောင်စီရဲ့သွားလာလှုပ်ရှားမှုတွေကိုလည်း အခွင့်အရေးရရင် ကလေး PDF ဆီကို သတင်းအချက်အလက်ပို့ပေးဖို့ မေတ္တာရပ်ခံစာမှာ ထည့်သွင်းတိုက်တွန်းထားပါတယ်။ စစ်ကောင်စီက စစ်ကိုင်းတိုင်းမှာ အင်တာနက်နဲ့ဖုန်းလိုင်းတွေဖြတ်တောက်ထားပြီး သတင်းအချက်အလက်တွေ အမှောင်ချဖို့လည်း ကြိုးစားနေပါတယ်။
