မကွေးတိုင်း၊ နတ်မောက်မြို့ရှိ မြို့မစျေးမှာ နိုဝင်ဘာ ၁၃ ရက် ဒီနေ့ ည ၉ နာရီခွဲဝန်းကျင်ကစလို့ မီးလောင်မှုဖြစ်ပွားနေပါတယ်။
နတ်မောက် ဒေသခံတဦးက ''လောင်တုန်းပဲ။ မနိုင်သေးဘူးမီးက အရမ်းများတယ်။ စျေးကြီးတော့ကုန်ပါပြီ'' လို့ ပြောပါတယ်။
မီးငြှိမ်းဖို့သွားတဲ့ ပြည်သူလူထုကို စစ်ကောင်စီတပ်တွေက မီးငြှိမ်းခွင့်မပေးဘဲ သေနတ်နဲ့ အဆက်မပြတ် ပစ်ဖောက်နေတယ်လို့လည်း ဒေသခံတွေက ပြောပါတယ်။
နတ်မောက်မြို့နယ်မီးသတ်စခန်းမှ မီးသတ်ယာဉ် ၄ စီး၊ မြို့သစ်မြို့နယ်မီးသတ်စခန်းမှ မီးသတ်ယာဉ် ၂ စီး၊ တောင်တွင်းကြီးမြို့နယ်မီးသတ်စခန်းမှ မီးသတ်ယာဉ် ၂ စီး ထွက်ခွာငြှိမ်းသတ်နေတယ်လို့ နတ်မောက် မြို့နယ်မီးသတ်စခန်းက သိရပါတယ်။
မကွေးတိုင်း၊ နတ်မောက်မြို့၊ ဈေးရပ်ကွက်ရှိ မြို့မဈေးကြီး မီးလောင်မှုကို မီးငြှိမ်းသတ်ခဲ့ရာမှာ ဒီကနေ့ ည ၁၁ နာရီ ၁၅ မိနစ်မှာ မီထိန်းနိုင်သွားပြီလို့ မီးသတ်တပ်ဖွဲ့က သတင်းထုတ်ပါတယ်။
နတ်မောက် မြို့မဈေးကြီးမှာ ဒီကနေ့ နိုဝင်ဘာ ၁၃ ရက်ည ၉ နာရီ ၄၃ မိနစ်က စတင်မီးလောင်ခဲ့တာဖြစ်ပြီး ဆိုင်ခန်းတွေအတော်များများမီးထဲပါသွားခဲ့ပါတယ်။ မီးစတင်လောင်ရခြင်းအကြောင်းရင်းနဲ့ မီးလောင်ဆုံးရှုံးမှု တန်ဖိုးပမာဏကို တော့ လတ်တလောမသိရသေးပါဘူး။