ကရင်ပြည်နယ်၊ ကြာအင်းဆိပ်ကြီးမြို့နယ်မှာ အကြမ်းဖက်စစ်ကောင်စီတပ်နဲ့ KNLA တပ်တို့ စက်တင်ဘာ ၃ ရက် မွန်းလွဲပိုင်းက တိုက်ပွဲဖြစ်ပွားရာမှာ စစ်ကောင်စီတပ်သား ၃ ဦးဒဏ်ရာရရှိခဲ့တယ်လို့ ကေအန်ယူက သတင်းထုတ်ပြန်ပါတယ်။
နို့တာဃော်ကျေးရွာနဲ့ လောသောမော်ကျေးရွာကြားမှာ စစ်ကောင်စီရဲ့ ခမရ ၅၄၉ တပ်ဟာ သတ်မှတ်နယ်မြေကျော်လွန်ကျူးကျော်ဝင်ရောက်လာတဲ့အတွက် KNLA တပ်ရင်း ၁၇ လက်အောက်ခံ တပ်ခွဲ ၁ တို့နဲ့ ရင်ဆိုင်တိုက်ပွဲဖြစ်ပွားခဲ့တာပါ။
နှစ်ဖက်တိုက်ပွဲအတွင်း အာဏာသိမ်းအကြမ်းဖက် စစ်အုပ်စုဘက်က ၃ ဦး ထိခိုက်ဒဏ်ရာရရှိခဲ့ပြီး KNLA ဘက်ကတော့ထိခိုက်မှု မရှိခဲ့ဘူးလို့ ထုတ်ပြန်ထားပါတယ်။
တိုက်ပွဲဖြစ်ပွားပြီးနောက် စစ်တပ်က နို့တာဃော်ကျေးရွာအတွင်းမှာ စခန်းချထားပြီး ဒီကနေ့မနက်ပိုင်းမှာပြန်လည် ထွက်ခွာသွားပြီးနောက် နို့မိုဝါးကျေးရွာအနီးမှာ စခန်းချထားတယ်လို့ ဒေသခံပြည်သူတစ်ဦးက ပြောပါတယ်
နှစ်ဖက်တိုက်ပွဲကြောင့် အနီးအနားကျေးရွာတွေက ဒေသခံ ပြည်သူတွေဟာ ထိတ်လန့်ကြောက်ရွံ့နေကြတယ်လို့ ကေအန်ယူ ဒူးပလာယာခရိုင် သတင်းဌာနက သတင်းထုတ်ပြန်ထားပါတယ်။
အဆိုပါတိုက်ပွဲနဲ့ ပတ်သက်ပြီး စစ်ကောင်စီပြန်ကြားရေးဘက်ကတော့ သတင်းထုတ်ပြန်တာ မရှိသေးပါဘူး။