တရုတ်က နွေဦးတော်လှန်ရေးကို ဘာကြောင့် နှောင့်ယှက်ဟန့်တားနေသလဲ

ဒီနေ့ မြန်မာ့နွေဦးတော်လှန်ရေးကို ဦးဆောင်နေကြတဲ့ ဂျန်ဇီးလူငယ်များနဲ့တကွ တိုင်းရင်းသားအဖွဲ့အစည်း အသင်းအပင်းများ၊ ဒီမိုကရေစီဘက်တော်သားများ၊ စစ်အာဏာရှင်ဆန့်ကျင်ရေးအင်အားစုများရဲ့ ပခုံးထက်မှာ ကျရောက်လာတဲ့ နိုင်ငံရေးတာဝန်ဟာ ထင်ထားတာထက် အဆပေါင်းများစွာ ကြီးမားလှတာကို သတိပြုမိတယ်။

တကယ်တော့ အကြမ်းဖက် စစ်အာဏာရှင်အုပ်စုကို တွန်းလှန်ဖယ်ရှားရုံကိစ္စလောက်ဆိုရင် ဒီကနေ့ ပြည်သူလူထုရဲ့စွမ်းအားနဲ့ ဖယ်ရှားလို့ရနိုင်တဲ့ အနေအထားဖြစ်တယ်။ ပြည်တင်းရင် မင်းမခံနိုင်ဆိုတဲ့ စကားအတိုင်းပဲ မင်းကျင့်တရား ပျက်ပြားတဲ့ အုပ်စိုးသူတွေကို  ပြည်သူက မကြည်ဖြူတော့ရင် လွယ်လွယ်နဲ့ဖြုတ်ချနိုင်လောက်တယ်။ 

ဒါပေမဲ့ လက်ရှိအခြေအနေမှာ ပြောသလောက် မလွယ်တာ တွေ့ရတယ်။ အကြောင်းကတော့ အကြမ်းဖက် စစ်ကောင်စီကို ဖယ်ရှားရေးအတွက် ကြိုးပမ်းနေကြတဲ့ မြန်မာ့နွေဦးတော်လှန်ရေးဘက်တော်သားတွေကို ဟန့်တားနေသူတွေထဲမှာ တရုတ်နိုင်ငံက အဓိက လူကြမ်းနေရာက ပါ၀င်နေလို့ ဖြစ်တယ်။ 

၂၀၂၀ ဇန်နဝါရီလ တရုတ်သမ္မတ ရှီကျင့်ဖျင်ရဲ့ မြန်မာခရီးစဉ်အတွင်း တရုတ်လက်နက်တွေနဲ့တိုင်းရင်းသားအရေးကိစ္စ မြန်မာဘက်က စိုးရိမ်ကြောင်း ပြောခဲ့ဖူးတယ်။ သမ္မတ ရှီကျင့်ဖျင်က လက်နက်ကိစ္စမှာ တိုင်းရင်သားသူပုန်များအနေနဲ့ တခြားလမ်းကြောင်းကလည်း တရုတ်လက်နက်တွေ ရနိုင်တယ်လို့ ပြောခဲ့တယ်။ သဘောကတော့ တရုတ်လက်နက်တွေ ဖြစ်ပေမယ့် တရုတ် အစိုးရမှာ တာဝန်မရှိဘူးလို့ပြောလိုက်တာ ဖြစ်တယ်။ အခုလည်း အကြမ်းဖက်စစ်ကောင်စီကို နောက်ကွယ်ကနေ စစ်လက်နက်ပစ္စည်းတွေ ထောက်ပံ့နေပြီး၊ ပြည်တွင်းရေး ၀င်မစွက်ပါဘူးလို့ ဗြောင်လိမ်နေပြန်တယ်။

တရုတ်နိုင်ငံက မြန်မာအပေါ်ထားတဲ့ မူဝါဒအရ ပြည်တွင်းရေးကို ဝင်ရောက်စွက်ဖက်မှုမလုပ်ကြောင်း၊ အစိုးရကို ဆန့်ကျင် တိုက်ခိုက်နေတဲ့ တိုင်းရင်းသား လက်နက်ကိုင်အဖွဲ့အစည်းတွေကို ကူညီထောက်ပံ့မှု မပြုကြောင်း ပြောကြားလေ့ရှိတယ်။  ဒါပေမဲ့ မြေပြင်ဖြစ်ရပ်တွေအရ အဲဒီလို ပြောဆိုတာတွေဟာ အပေါ်ယံပဲ ဖြစ်တာ တွေ့ရတယ်။ ဥပမာ တရုတ်ရဲ့ တရားဝင် မူဝါဒအရ တရုတ်ကွန်မြူနစ်ပါတီ(CCP) နဲ့ ဝပြည်သွေးစည်း ညီညွတ်ရေးပါတီ (UWSP) တို့အကြား တရားဝင် ဆက်ဆံရေးလမ်းကြောင်း ဖွင့်ထားတဲ့ ကိစ္စမျိုးဟာ ပြည်တွင်းရေးစွက်ဖက်ရာရောက်တယ်လို့ ဝေဖန်မှုတွေ ရှိတယ်။

တိုင်းရင်းသားလက်နက်ကိုင်အဖွဲ့တွေကို လက်နက်ရောင်းချတဲ့ ကိစ္စမှာလည်း မြန်မာအစိုးရအနေနဲ့တရုတ်ရဲ့ အခန်းကဏ္ဍကို  ခန့်ငြားလာအောင် ဆောင်ရွက်တဲ့ နည်းဗျူဟာဖြစ်တယ်။ EAOs အဖွဲ့တွေကို တစ်ဖက်တစ်လမ်းက ကူညီတဲ့သဘော ဖြစ်ပြီး၊ သူလိုတဲ့အခါ အသုံးချဖို့မွေးလိုက်တဲ့သဘော ဖြစ်တယ်။ ဒါကြောင့် တရုတ်နိုင်ငံရဲ့ မြန်မာနိုင်ငံအပေါ်ထားတဲ့ ဆက်ဆံရေးမူဝါဒဟာ ‘မီးစတစ်ဖက် ရေမှုတ်တစ်ဖက်’ဖြစ်တယ်လို့ ဝေဖန်ကြတာဖြစ်တယ်။ မြန်မာ့ပြည်တွင်းစစ် အရှိန်မြင့်လေ တရုတ်အတွက် အကျိုးအမြတ်များလေ မဟုတ်ပါလား။

ဒါကြောင့် တရုတ်ဟာ မြန်မာ့နိုင်ငံရေး စီးပွားရေးကိစ္စတွေမှာ တကယ့် အန္တရာယ်ကြီးမားတဲ့ အိမ်နီးချင်း ဖြစ်နေတာတွေ့ရ တယ်။ ဒီကနေ့ တရုတ်က မြန်မာ့ပြည်တွင်ရေးကို စွက်ဖက်နေရုံမက အချုပ်အခြာအာဏာကိုပါ ထိပါးလာနေပြီလို့ ဆိုနိုင်တယ်။ ဒီလို အခင်းအကျင်းကြောင့် မြန်မာ့နွေဦးတော်လှန်ရေးကို ဦးဆောင်နေတဲ့ ဂျန်ဇီးလူငယ်တွေနဲ့တကွ တိုင်းရင်းသားတွေ၊ ဒီမိုကရေစီဘက်တော်သားတွေအနေနဲ့ အကြမ်းဖက် စစ်အုပ်စုကို ကျောထောက်နောက်ခံပေးနေတဲ့ တရုတ်ရဲ့ နယ်ချဲ့လက်ဝါးကြီးအုပ်လိုမှု အန္တရာယ်ကိုပါ အထူးသတိပြုကြမှာ ဖြစ်တယ်။ 

“မြန်မာနိုင်ငံရဲ့ ဒီမိုကရေစီ အသွင်ကူးပြောင်းရေး ပြန်လည်စတင်ဖို့ တရုတ်နိုင်ငံက လိုလားတဲ့အတွက်၊ အာဆီယံနဲ့ ပူးပေါင်း ဆောင်ရွက်ဖို့အသင့်ရှိတယ်” လို့ တရုတ်နိုင်ငံခြားရေးဝန်ကြီး ဝမ်ယိက တရုတ်နိုင်ငံ ချုံကျင်းမြို့မှာ ဇွန်လ ရ ရက်နေ့က စပြီး ၂-ရက်ကြာ ပြုလုပ်ခဲ့တဲ့ တရုတ်-အာဆီယံအထူးအစည်းအဝေးမှာ ပြောကြားခဲ့တာကို သတိပြုမိကြမယ် ထင်တယ်။ 

ပြီးခဲ့တဲ့ ဇွန်လ ၅ ရက်နေ့က အာဏာသိမ်းစစ်ကောင်စီ အကြီးအကဲ မင်းအောင်လှိုင်နဲ့ မြန်မာနိုင်ငံဆိုင်ရာ တရုတ်သံအမတ် မစ္စတာ ချန်ဟိုင်းတို့ နေပြည်တော်မှာ တွေ့ဆုံခဲ့ကြပြီး၊ မြန်မာနိုင်ငံရဲ့ ပြည်တွင်းရေး အခြေအနေကြောင့် တရုတ်-မြန်မာ ဆက်ဆံရေးကို ပျက်ယွင်းစေမှာ မဟုတ်ဘူးလို့ ပြောကြားခဲ့တာတွေ့ရတယ်။ အဲဒီတွေ့ဆုံမှုကို တရုတ်သံရုံးရဲ့ ထုတ်ပြန် ကြေညာချက်မှာ ဗိုလ်ချုပ်မှူးကြီး မင်းအောင်လှိုင်ကို မြန်မာနိုင်ငံအကြီးအကဲ နိုင်ငံ့ခေါင်းဆောင်လို့ သုံးနှုန်း ဖော်ပြခဲ့တယ်။ တရုတ်နိုင်ငံရဲ့ သဘောထားဟာ အာဏာသိမ်း စစ်ကောင်စီရဲ့ အကြမ်းဖက် လုပ်ရပ်တွေကို အားပေးထောက်ခံနေတယ်လို့ ဆိုနိုင်တယ်။ ဒီအပြင် အကြမ်းဖက် စစ်ကောင်စီကို မြန်မာနိုင်ငံရဲ့ တရားဝင် အစိုးရအဖြစ် လက်ခံတဲ့ သဘောသက်ရောက် နေတယ်။ 

ဇွန်လ ၈ ရက်နေ့က တရုတ်နိုင်ငံခြားရေးဝန်ကြီး ဝမ်ယီနဲ့ စစ်ကောင်စီ နိုင်ငံခြားရေးဝန်ကြီး ဝဏ္ဏမောင်လွင်တို့ ချုံကင်းမြို့မှာ တွေ့ဆုံခဲ့ကြတယ်။ အဲဒီမှာ ၀မ်ယီက မြန်မာ-တရုတ် နှစ်နိုင်ငံအကြား သဘောတူထားတဲ့ စီမံကိန်းတွေကို ဖျက်သိမ်းမှာ မဟုတ်ဘူးလို့ ပြောကြားခဲ့တယ်။ မြန်မာနိုင်ငံရဲ့ အခြေအနေတွေ ဘယ်လိုပဲ ဖြစ်ပေါ်နေသည်ဖြစ်စေ၊ တရုတ်နိုင်ငံက မြန်မာနဲ့ ရင်းနှီးတဲ့ ဆက်ဆံရေးကို ပြောင်းလဲမှာ မဟုတ်ဘူးလို့ဆိုတယ်။ တရုတ်နိုင်ငံအနေနဲ့ မြန်မာနိုင်ငံနဲ့ တရုတ်နိုင်ငံအတွက် အတိတ်၊ ပစ္စုပန်နဲ့ အနာဂတ် သုံးမျိုးစလုံးမှာ အသင့်တော်ဆုံးဖြစ်မယ့် လမ်းကြောင်းကို လွတ်လွတ်လပ်လပ် ရွေးချယ်ဆုံးဖြတ်ဖို့ အားပေးထောက်ခံသွားမယ်လို့ နိုင်ငံခြားရေး ဝန်ကြီး ဝမ်ယီက ပြောသွားတယ်။ (RFA သတင်း)  

တရုတ်ရဲ့သဘောထားက အကြမ်းဖက် စစ်ကောင်စီရဲ့ လူ့အခွင့်အရေးချိုးဖေါက်မှုတွေနဲ့ စစ်ရာဇဝတ်မှုကျူးလွန်မှုတွေ အပါအဝင် နိုင်ငံတကာ စစ်တပ်တွေလိုက်နာရမယ့် စစ်စည်းကမ်းကျင့်ဝတ်ချိုးဖေါက်မှုတွေကို မျက်ကွယ်ပြုပြီး စစ်ကောင်စီ ကို တရားဝင်အစိုးရသဖွယ် ဆက်ဆံနေတာ သတိပြုသင့်တယ်။ 

မြန်မာ့နိုင်ငံရေး အကျပ်အတည်းကိုဖြေရှင်းဖို့ တရုတ်နဲ့ ‘အရှေ့တောင်အာရှနိုင်ငံများအသင်း’ (ASEAN)တို့ ကြိုးပမ်းကြရာမှာ အမျိုးသားညီညွတ်ရေးအစိုးရ (NUG) ကို လုံလောက်တဲ့ ထိတွေ့ဆက်ဆံမှု မရှိတဲ့အတွက် စိုးရိမ်မိတယ်လို့ NUG အစိုးရရဲ့ နိုင်ငံခြားရေးဝန်ကြီး ဒေါ်ဇင်မာအောင်က တရုတ်နိုင်ငံခြားရေးဝန်ကြီး ဝမ်ယီထံ ဇွန်လ ၆ ရက်နေ့က အိတ်ဖွင့် ပေးစာ ပေးပို့ခဲ့တယ်။ (RFA) 

စစ်အာဏာသိမ်းခေါင်းဆောင် မင်းအောင်လှိုင်ကို မြန်မာနိုင်ငံရဲ့ ခေါင်းဆောင်အဖြစ် တရုတ်သံရုံးက ရည်ညွှန်းခဲ့တာကို NUG အစိုးရက အလေးအနက်ရှုတ်ချတယ်လို့ အိတ်ဖွင့် ပေးစာက ဆိုတယ်။ တရုတ်နိုင်ငံ ချုံချင်းမြို့မှာ ကျင်းပခဲ့တဲ့ တရုတ်-အာဆီယံ နိုင်ငံခြားရေးဝန်ကြီးတွေရဲ့ နှစ် ၃ဝ ပြည့်အခမ်းအနားမှာ NUG အစိုးရ ပါဝင်ဆွေးနွေးခွင့်ကို တရုတ်ကရော အာဆီယံဘက်ကပါ ဖိတ်ခေါ်ကမ်းလှမ်းမှု မရှိခဲ့တဲ့အပေါ် NUG က ဝေဖန် ထောက်ပြခဲ့တယ်။

အကြမ်းဖက် စစ်ကောင်စီဟာ မြန်မာပြည်သူကို ကိုယ်စားပြုတဲ့ အဖွဲ့မဟုတ်ရုံမက၊ ငြိမ်းချမ်းစွာ ဆန္ဒပြတဲ့ ပြည်သူလူထုကို ရန်သူသဖွယ် စစ်မြေပြင်သုံး လက်နက်တွေနဲ့ ပစ်ခတ်ဖြိုခွဲနေတဲ့ ကိစ္စကို တရုတ်နိုင်ငံက ပြစ်တင်ရှုတ်ချဖို့ ပျက်ကွက်နေ တယ်။ အကြမ်းဖက်အဖွဲ့ကို တရားဝင်မှုရှိသယောင် လုပ်တဲ့ကိစ္စဟာ နှစ်နိုင်ငံ ပြည်သူများအကြား ကောင်းမွန်တဲ့ ဆက်ဆံ ရေးကို ထိခိုက်ပျက်စီးစေနိုင်တာကို တရုတ်ခေါင်းဆောင်တွေ သိသင့်တယ်။ 

မြန်မာနိုင်ငံမှာ တည်ငြိမ်မှုရှိလာဖို့ဆိုရင် ၂၀၂၀ ရွေးကောက်ပွဲက တင်မြှောက်ထားတဲ့ တရားဝင် ပြည်သူ့အစိုးရထံ အာဏာပြန်အပ်ဖို့လိုတယ်လို့ NUG က ဆိုတယ်။  ဒီလိုမှ မဟုတ်ရင် အရှေ့တောင်အာရှမှာ လုံခြုံရေးဆိုင်ရာ အကျပ်အတည်း ဖြစ်လာနိုင်ကြောင်းနဲ့ မြန်မာနိုင်ငံရဲ့ အခြေ အနေတွေကို မြန်မာနိုင်ငံဆိုင်ရာ တရုတ်သံအမတ်ကြီး ချန်ဟိုင်းနဲ့ NUG အစိုးရ က ဆွေးနွေးချင်တဲ့အကြောင်း နိုင်ငံခြားရေးဝန်ကြီး ဒေါ်ဇင်မာအောင်က တရုတ်နိုင်ငံခြားရေးဝန်ကြီး ဝမ်ယိဆီကို ပေးပို့တဲ့ ဇွန် ၆ အိတ်ဖွင့်ပေးစာမှာ ဖော်ပြထားတယ်။

တရုတ်နဲ့ အာဆီယံတို့ လိုလားနေတဲ့ မြန်မာနိုင်ငံရဲ့ အသွင်ကူးပြောင်းရေးဟာ၊ ၂၀၀၈ ဖွဲ့စည်းပုံအခြေခံဥပဒေ အောက်က နေသွားမယ့် အသွင်ကူးပြောင်းရေး ဖြစ်လို့၊ ဒီ အခင်းအကျင်းမျိုးနဲ့ ဆက်သွားမှာ မဟုတ်ဘူးလို့ NUG နိုင်ငံခြားရေးဝန်ကြီးက တုံ့ပြန်ထားတာ တွေ့ရတယ်။

“အာဆီယံနဲ့ တရုတ်နဲ့ ပြန်သွားနေတဲ့အနေအထားက ၂၀၀၈ အောက်ကို ပြန်သွားနေပြီးတော့ ဖေဖော်ဝါရီလ ၁ ရက် မတိုင်ခင်က အခင်းအကျင်းမျိုးကို ပြန်သွားဖို့ တိုက်တွန်းနေတဲ့ သဘောမျိုး တွေ့ရပါတယ်။ ဒါပေမဲ့ ဒီအခင်းအကျင်းက ပျက်သွားပြီလို့ ပြောချင်ပါတယ်။ ကျမတို့အနေနဲ့ ၂၀၀၈ အောက်ကနေပြီးသွားမယ့် အသွင်ကူးပြောင်းရေး မှန်သမျှကို ဆက်သွားဖို့ မရှိတော့ပါဘူး။ ဒါကတော့ ပြည်သူလူထုအနေနဲ့ရော NUG အနေနဲ့ရော ဒါကသိပ်ကို သေချာတဲ့ ကိစ္စဖြစ်ပါ တယ်။ ဘာဖြစ်လို့လဲဆိုရင် ၂၀၀၈ အောက်က ပြန်သွားနေသမျှ စစ်တပ်က ( supremacy ) ပြန်လွှမ်းမိုးနိုင်ပြီးတော့ နိုင်ငံရေးမှာ စစ်မှန်တဲ့ တကယ့် ဒီမိုကရေစီစနစ်၊ တကယ့် ဖက်ဒရယ် ဒီမိုကရေစီစနစ်ကို သွားနိုင်မှာ မဟုတ်ပါဘူး။”လို့ ဒေါ်ဇင်မာအောင်က တုံ့ပြန်ထားတယ်။

မြန်မာ့နိုင်ငံရေးကိစ္စ တရုတ်နိုင်ငံ ပါဝင်လာချိန်မှာ သမာသမတ်ဖြစ်ဖို့ဆိုရင် ပြည်သူတွေအနေနဲ့ စစ်အာဏာရှင်စနစ်ကို လုံးဝ လက်မခံနိုင်ဘူးဆိုတာကို အဆက်မပြတ် ပြသနေဖို့ လိုအပ်တယ်လို့ တရုတ်နိုင်ငံမှာ နှစ်ပေါင်းများစွာ နေထိုင်နေတဲ့ မြန်မာ့ နိုင်ငံရေး၊ စစ်ရေးလေ့လာသုံးသပ်သူ ဒေါက်တာ လှကျော်ဇော က တိုက်တွန်းထားတယ်။ 

“တရုတ်ပဲဖြစ်ဖြစ်၊ အာဆီယံပဲဖြစ်ဖြစ် သူတို့က သံခင်း၊ တမန်ခင်းအရပဲ လုပ်မှာပဲ။ ဒါဟာ မြန်မာပြည် အရေးအတွက် ဘယ်လောက်အရေးပါတယ်။ မပါဘူးဆိုတာ ကျမတို့က သိပ်စဉ်းစားဖို့မလိုဘူး။ ပြည်သူလူထုဘက်က အားတက်စရာကတော့ စစ်ကောင်စီပြောတိုင်း ဘယ်သူမှ မယုံဘူး။ စစ်ကောင်စီကို နည်းတစ်နည်းနဲ့ ဖိအားပေးတယ်လို့ပဲ သဘောထားရ မှာပဲ။ ကျန်တာက ကျမတို့ ပြည်သူတွေ ကိုယ့်အားကိုယ် ကိုးပြီး လုပ်စရာရှိတာ လုပ်ရမှာ။”  လို့ ဒေါက်တာ လှကျော်ဇော က ပြောတယ်။ (RFA) 

တရုတ်နိုင်ငံခြားရေးဝန်ကြီး မစ္စတာ ဝမ်ယိက ဇွန် ၇ ရက်က ၂ ရက်ကြာ ပြုလုပ်ခဲ့တဲ့ တရုတ်-အာဆီယံ အစည်းအဝေးမှာ မြန်မာပြည်သူတွေရဲ့ အကျိုးစီးပွားအတွက် အစုအဖွဲ့အားလုံးနဲ့ ပူးပေါင်းဆောင်ရွက်ရေးဟာ တရုတ်ရဲ့ ဦးစားပေး လုပ်ငန်းစဉ် တစ်ရပ်ဖြစ်သလို၊ တည်ငြိမ်မှုကို ထိန်းသိမ်းဖို့နဲ့ အကြမ်းဖက်မှု အားလုံး အဆုံးသတ်ဖို့လည်း လိုအပ်တယ်လို့ ပြောထားတယ်။ ဒါပေမဲ့  မစ္စတာ ဝမ်ယိရဲ့ တိုက်တွန်းစကားဟာ လက်တွေ့နဲ့ကင်းကွာနေတာ တွေ့ရတယ်။  

မြန်မာပြည်ခရီးစဉ်အတွင်း အာဆီယံခေါင်းဆောင်တွေဟာ စစ်ကောင်စီ ဥက္ကဋ္ဌ မင်းအောင်လှိုင်နဲ့သာ တွေ့ဆုံခဲ့ပြီး၊ အဖမ်းခံထားရတဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ကို မတွေ့ခဲ့ဘူး။ ဒီမတိုင်ခင် နေပြည်တော်ကို လာရောက်ခဲ့တဲ့ တရုတ်သံအမတ်ကလည်း စစ်ကောင်စီဥက္ကဋ္ဌ မင်းအောင်လှိုင်နဲ့ပဲ သီးသန့်တွေ့ဆုံခဲ့တယ်။  ဒေါ်အောင်ဆန်းစုကြည်နဲ့ တွေ့ခွင့်ရဖို့ ကြိုးပမ်းတာ မရှိခဲ့ဘူး။ တရုတ်နိုင်ငံမှာ ဒီမိုကရေစီတောင်းဆိုတဲ့ ဟောင်ကောင်က ကျောင်းသားပြည်သူတွေကို အကြမ်းဖက် ဖိနှိပ်ဖမ်းဆီး ထောင်ချခဲ့ပုံကို ကြည့်ရင်  မြန်မာ့ဒီမိုကရေစီရေးကို အားပေးဖို့ရာ အကြောင်းမရှိတာကတော့ ထင်ရှားတယ်။

လက်ရှိ အခင်းအကျင်းအရ အကြမ်းဖက် စစ်ကောင်စီက ပြည်သူတွေအပေါ် စစ်လက်နက်မျိုးစုံ အသုံးပြု အကြမ်းဖက် တိုက်ခိုက်နေတာကို တရုတ်က ပြည်တွင်းရေးလို့ဆိုတယ်။ အကြမ်းဖက် စစ်ကောင်စီခေါင်းဆောင် မင်းအောင်လှိုင်ကို နိုင်ငံအကြီးအကဲလို့ ဆိုရုံမက လုပ်လက်စ ရင်းနှီးမြှုပ်နှံမှုဆိုင်ရာ စီမံကိန်းတွေကိုလည်း ဆက်လုပ်သွားမယ်လို့ဆိုတယ်။ ဒီအချက်က စစ်အာဏာသိမ်းမှု နောက်ကွယ်မှာ တရုတ်ပယောဂ ပါ၀င်နေတာကို ထင်ရှားစေတယ်။ 

ဒါဟာ မြန်မာ ပြည်သူ လူထုရဲ့သဘောဆန္ဒကို လုံးဝဆန့်ကျင်ပစ်ပယ်ခဲ့တာဖြစ်တယ်။ နိုင်ငံခြား ရင်းနှီးမြှုပ်နှံမှုဆိုင်ရာ လုပ်ငန်းကိစ္စ အရပ်ရပ်ဟာ ပြည်သူ့လွှတ်တော်ရဲ့သဘောတူညီမှု (တနည်းအားဖြင့်) ပြည်သူလူထုရဲ့သဘောတူမှု ရရှိဖို့ လိုတယ်။ ဒါပေမဲ့ တရုတ်လုပ်ရပ်က ခိုးရာပါ တိုက်ရာပါ ပစ္စည်းတွေကို သူခိုးဓါးပြလက်ကနေ အောက်ဈေးနဲ့ အမြတ်ထုတ်လိုတဲ့ သဘောဖြစ်နေတာ တွေ့ရတယ်။ ပိုင်ရှင်အစစ်ဖြစ်တဲ့ CRPH နဲ့ NUG တို့ကို လျစ်လျူပြုပြီး အကြမ်းဖက် စစ်ကောင်စီကို ရုပ်သေးအစိုးရအဖြစ် ပုံသွင်းလိုက်တဲ့ သဘောလည်းဖြစ်တယ်။ နိုင်ငံတိုင်းဟာ ကိုယ့်နိုင်ငံအကျိုးစီးပွားကို ပဓာနထားကြတာ မှန်သော်လည်း မလျော်ကန်တဲ့ အဓမ္မနည်းနဲ့ ကိုယ်ကျိုးရှာတဲ့ အစိုးရမျိုးကတော့ နိုင်ငံတကာ အလယ်မှာ အရှက်မဲ့တဲ့ သူခိုးအစိုးရအဖြစ် မှတ်တမ်းတင်ခံရမှာ မလွဲဘူးလို့ဆိုချင်တယ်။

တိုင်းရင်းသားဒေသတွေမှာ တရုတ်-မြန်မာနယ်စပ် ဖြတ်ကျော် စီးပွားရေးပူးပေါင်းဆောင်ရွက်မှုတွေ စီမံကိန်း အကောင်အထည်ဖော်မှုတွေ လုပ်မယ်ရင် ဒေသခံများနဲ့ သက်ဆိုင်ရာ ပြည်နယ် လွှတ်တော်များရဲ့ သဘောထားကို ရယူပြီးမှ ဆောင်ရွက်ရတယ်။ ဗဟိုအစိုးရအနေနဲ့ လွှမ်းမိုးချုပ်ကိုင် ဆောင်ရွက်မယ်ဆိုရင် ဒေသတွင်း ပဋိပက္ခတွေ ပိုမိုများပြား လာမှာ ဖြစ်တယ်။ လက်ရှိ တရားမဝင်တဲ့ စစ်ကောင်စီအောက်မှာ တရုတ်ရဲ့ စီးပွားရေးစီမံကိန်းတွေ အကောင်အထည် ဖော်မယ်ဆိုရင် ရေရှည်အတွက် မြေယာပြဿနာ အရှုပ်အထွေးတွေ ဆိုးဆိုးရွားရွား ပေါ်ပေါက်လာနိုင်တဲ့အတွက် စိုးရိမ်စရာ အလွန် ကောင်းတယ်လို့ ဝေဖန်ထောက်ပြမှုတွေ ရှိတယ်။  

ဒါကြောင့် တရုတ်နိုင်ငံအနေနဲ့ အကြမ်းဖက်စစ်ကောင်စီရဲ့ လူသတ် ဓားပြတိုက် လုယက် မုဒိန်းကျင့် အစရှိတဲ့ စစ်ရာဇဝတ်မှုတွေ ကျူးလွန်နေတာကို သိလျှက်နဲ့ ဗီတိုအာဏာသုံးပြီး အကာအကွယ်ပေး မထားသင့်ဘူး။ မြန်မာပြည်သူတို့ရဲ့ ဆန္ဒသဘောထားကို မျက်ကွယ်ပြုပြီး မြန်မာ့ သယံဇာတတွေကို တရားမဝင်နည်းနဲ့ ခိုးယူအမြတ်ထုတ်တာမျိုး မလုပ်သင့်ဘူး။  ဥပဒေစိုးမိုးရေးကို ပျက်ရယ်ပြုပြီး စစ်ကောင်စီရဲ့ လူ့အခွင့်အရေးချိုးဖေါက်မှုတွေမှာ ကြံရာပါအဖြစ် ဆက်လက် အားပေး ထောက်ခံမှု မပြုသင့်ဘူး။ ဒီလို ကိုယ်ကျင့်တရား လက်လွတ် မြန်မာ့အရေးမှာ ၀င်ရောက်စွက်ဖက်နေခြင်းဟာ  မြန်မာ့ အချုပ်အခြာအာဏာကို ချိုးဖေါက်ရာ ရောက်တယ်။ (ရုပ်သေးစစ်ကောင်စီ)ကို နယ်ရုပ်အဖြစ် အသုံးပြုပြီး မြန်မာနိုင်ငံကို ကိုလိုနီပြုဖို့ကြံစည်နေတာကို တရုတ်နိုင်ငံအနေနဲ့ ရပ်တန်းက ရပ်သင့်ပြီဖြစ်တယ်။ နွေဦးတော်လှန်ရေးကို ဖျက်လို ဖျက်ဆီး  အဟန့်အတားလုပ်နေသူမှန်သမျှ သမိုင်းဘီးရဲ့ အောက်မှာ ပြားပြားမှောက်ကြရမှာ ဖြစ်တယ်။   

ကောင်းဇေလူ

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up