ပဲခူးတိုင်းဒေသကြီး ပြည်မြို့ ဗုံးပေါက်ကွဲမှုမှာ မသင်္ကာလို့ စစ်ကောင်စီတပ်ဖွဲ့တွေက ဖမ်းဆီးသွားစဉ် သေဆုံးခဲ့သူကို မိသားစုဝင်တွေက အလောင်းထုတ်ယူ သင်္ဂြိုဟ်ခွင့်မရဘူးလို့ ပြည်မြို့ခံတွေထံက သိရပါတယ်။
ပြီးခဲ့တဲ့ ဧပြီ ၂၄ ရက်နေ့ခင်းပိုင်းက ပြည်မြို့က စစ်တပ်ပိုင် အင်းဝဘဏ်ဗုံးပေါက်ကွဲတာနဲ့ပတ်သက်လို့ အသက် ၃၃ နှစ်အရွယ် ကိုအောင်မြင့်ခိုင်ကို စစ်ဆေးဖို့ စစ်တပ်က ခေါ်ဆောင်သွားစဉ် သေဆုံးခဲ့တာပါ။
ဗုံးပေါက်တာနဲ့ပတ်သက်လို့ စစ်ဆေးမေးမြန်းစရာရှိတယ်ဆိုပြီး ပြည်မြို့ နဝင်းကွက်သစ် ၁၂ လမ်းနေ ကိုအောင်မြင့်ခိုင်ကို မေလ ၄ ရက်နေ့ညက ဖမ်းဆီးသွားပြီး၊ နောက်နေ့ မေလ ၅ ရက်နေ့ည ၈ နာရီမှာ မိသားစုကို အလောင်းလာကြည့်ဖို့ ခေါ်ခဲ့တယ်လို့ဆိုပါတယ်။
ဒါကြောင့်မိသားစုဝင်တွေက ပြည်မြို့ ကုတင် ၁၀၀ စစ်ဆေးရုံ ရင်ခွဲရုံမှာအလောင်းထုတ်ဖို့ သွားခဲ့ကြတယ်။ ဒါပေမဲ့ အလောင်းထုတ်ခွင့်မပေးသလို အလောင်းကို လှန်လှောကြည့်ခွင့်တောင် မရခဲ့ဘူးလို့ ဆိုပါတယ်။
မိသားစုနဲ့ နီးစပ်သူတဦးက “မိသားစုသွားကြည့်တော့ အလောင်းပြန်သယ်ခွင့်မရဘူး။ အလောင်းကိုလည်း အကုန်လုံးချွတ်ကြည့်လို့မရဘူး။ ဗိုက်ကနေ လည်ပင်းထိ ချုပ်ရိုးတွေ အပြည့်ချုပ်ထားတယ်။ မျက်နှာကလည်း ညိုမဲစွဲပြီးတော့ တော်တော်ကို ဒဏ်ရာအများကြီးတွေနဲ့ တွေ့ရတယ်။ မိသားစုဝင်တွေကို ဒါဟာ ကားပေါ်က ခုန်ချလို့ ရိုက်နှက်ပြီး ဖမ်းဆီးလို့ မတော်တဆ သေသွားတယ်လို့ ဖြေတယ်တဲ့။ ပြီးတော့ အလောင်းလည်း ပြန်မပေးဘူးပေါ့နော်၊ သူတို့ သင်္ဂြိုဟ်ပေးမယ်၊ ကြည့်ပြီး ပြန်တော့ဆိုပြီး ပြန်ခိုင်းတယ်၊ ဓာတ်ပုံတွေလည်း ရိုက်လို့မရဘူး။ ဖုန်းတွေလည်း အကုန်သိမ်းတယ်။” လို့ ပြောပါတယ်။
ကိုအောင်မြင့်ခိုင်ဟာ ဟိန္ဒူဘာသာဝင်ဖြစ်တာမို့ မိသားစုက မေလ ၈ ရက်နေ့မှာ ဟိန္ဒူဘာသာဝင်တို့ထုံးတမ်းစဉ်လာအရ နေအိမ်မှာ ကောင်းမှုကုသိုလ်လုပ်ကြမှာဖြစ်ပါတယ်။