မြန်မာစစ်တပ်အာဏာသိမ်းမှုကို ထိုင်းနိုင်ငံ၊ ဘန်ကောက်မြို့၊ မြန်မာသံရုံးရှေ့မှာ ဆန့် ကျင်ဆန္ဒပြသူတွေနဲ့ ထိုင်းရဲတွေအကြား အဓိကရုဏ်းဖြစ်ခဲ့လို့ ဆန္ဒပြသူ ၃ ဦး ဖမ်းဆီး ထိန်းသိမ်းခံရပြီး ရဲ ၁၄ ယောက် ထိခိုက်ဒဏ်ရာရရှိသွားခဲ့တယ်လို့ နေးရှင်းသတင်းမှာ ဒီကနေ့ ဖော်ပြပါတယ်။

ဒီလှုပ်ရှားမှုကိုတော့ ဖေဖော်ဝါရီ ၁ ရက် ညနေ ၃ နာရီခွဲလောက်မှာ We Volunteer (WeVo) အမည်နဲ့ ဒီမိုကရေစီအရေးလှုပ်ရှားသူတွေက ဦးဆောင်ခဲ့ကြတာဖြစ်ပြီး မြန်မာနိုင်ငံမှာ စစ်တပ်အာဏာသိမ်းမှုကို ရှုတ်ချကြောင်းနဲ့ ဒေါ်အောင်ဆန်းစုကြည်နဲ့ အစိုးရခေါင်းဆောင်တွေကို ပြန်လွှတ်ပေးရေးအတွက် တောင်းဆိုခဲ့ကြတာပါ။

ဆန္ဒပြသူတွေဟာ သတ်မှတ်ခွင့်ပြုချိန်ထက် ပိုမိုခဲ့ကြတဲ့အတွက် ရဲတွေက ညနေ ၅ နာရီလောက်မှာ ဒိုင်းတွေ၊ လက်ကိုင်တုတ်တွေ ကိုင်ဆောင်ပြီး လူစုခွဲဖို့ ကြိုးစားခဲ့ချိန်မှာ ရုန်းရင်းဆန်ခတ်ဖြစ်ခဲ့ရပြီး ၆ နာရီလောက်မှာ ရှင်းလင်းနိုင်ခဲ့တယ်လို့ သတင်းမှာ ဖော်ပြပါတယ်။

ဆန္ဒပြသူတွေထဲက WeVo အဖွဲ့ဝင် ၃ ယောက်ဖြစ်ကြတဲ့ အသက် ၂၁ နှစ်အရွယ် ဝီချာဖာ ဆီရိကာစီဖန်၊ အသက် ၂၀ အရွယ် ဖန်နာဖက် ချန်သနန်ကူလ်နဲ့ ခီရာထီဆက်ခ် ဖန်ရနူးတို့ကိုတော့ ရဲတွေက ဖမ်းဆီးထိန်းသိမ်းခဲ့ရပြီး ဆန္ဒပြသူတွေ အသုံးပြုခဲ့တဲ့ အသံချဲ့စက်တွေ တပ်ဆင်ထားတဲ့ ပစ်ကပ်ထရပ်ကားကိုလည်း သိမ်းဆည်းခဲ့ပါတယ်။

ဖမ်းဆီးထိန်းသိမ်းခံခဲ့ရတဲ့ ဆန္ဒပြသူတွေကိုတော့ ရန်နဝါရဲစခန်းကို ပို့ဆောင်ထားပြီး သူတို့ကို ကိုဗစ်-၁၉ ရောဂါထိန်းချုပ်ရေးအတွက် အရေးပေါ်အခြေအနေမှာ ပြီးခဲ့တဲ့ ဒီဇင်ဘာ ၂၃ ရက်ကတည်းက ထုတ်ပြန်ထားခဲ့တဲ့ ပြည်သူ့ရေးရာစီမံခန့်ခွဲမှုဆိုင်ရာ အရေးပေါ်အမိန့်ကို ဆန့်ကျင်စုဝေးမှုနဲ့ စွဲချက်တင်အရေးယူသွားမယ်လို့ ဆိုပါတယ်။

ထိခိုက်ဒဏ်ရာတွေ ရရှိသွားခဲ့ကြတဲ့ ရဲ ၁၄ ယောက်ကိုလည်း ဆေးရုံမှာ ကုသမှုခံ ယူနိုင်ဖို့ ပို့ဆောင်ထားခဲ့တယ်လို့ ထိုင်းသတင်းမှာ ဖော်ပြပါတယ်။

 ဓာတ်ပုံ- The Nation