ဗြိတိန်နိုင်ငံမှာ ကိုဗစ်-၁၉ ရောဂါကြောင့် သေဆုံးသူဦးရေ ၁ သိန်းကျော်ရှိလာခဲ့ပြီး နောက်မှာတော့ ကမ္ဘာ့နိုင်ငံတွေထဲမှာ ကိုဗစ်-၁၉ ကပ်ရောဂါကြောင့် သိန်းနဲ့ချီ သေဆုံး ရတဲ့ နိုင်ငံ ၅ နိုင်ငံထိ ရှိလာခဲ့ပြီ ဖြစ်ပါတယ်။
အဲဒီနိုင်ငံ ၅ နိုင်ငံကတော့ အမေရိကန်၊ ဘရာဇီး၊ မက္ကဆီကို၊ အိန္ဒိယနဲ့ ဗြိတိန်နိုင်ငံ တွေ ဖြစ်ကြပြီး အမေရိကန်နိုင်ငံက သေဆုံးသူ ၄ သိန်းခွဲကျော်၊ ရောဂါကူးစက်ခံရသူ ၂၆ ဒသမ ၇ သန်းကျော်နဲ့ ထိပ်ဆုံးမှာ ရှိနေခဲ့တာပါ။
သူ့နောက်မှာတော့ ဘရာဇီးနိုင်ငံက သေဆုံးသူ ၂ သိန်း ၂ သောင်းကျော်၊ ရောဂါကူး စက်ခံရသူ ၉ ဒသမ ၁ သန်းကျော်၊ မက္ကဆီကိုနိုင်ငံက သေဆုံးသူ ၁ သိန်းခွဲကျော်၊ ရောဂါ ကူးစက်ခံရသူ ၁ ဒသမ ၈ သန်းကျော်နဲ့ ရပ်တည်နေပါတယ်။
အာရှနိုင်ငံတနိုင်ငံဖြစ်တဲ့ အိန္ဒိယနိုင်ငံကတော့ ကိုဗစ်-၁၉ ရောဂါကူးစက်ခံရပြီး သေဆုံးသူ ၁ သိန်းခွဲကျော်၊ ရောဂါကူးစက်ခံရသူ ၁၀ ဒသမ ၇ သန်းကျော် ရှိနေတာပါ။
အဲဒီနိုင်ငံတွေနောက်မှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၃ ဒ သမ ၈ သန်းကျော်လာခဲ့ပြီး သေဆုံးသူအရေအတွက် ၁ သိန်းကျော်လာခဲ့တဲ့ ဗြိတိန်နိုင်ငံ က ကိုဗစ်-၁၉ ကြောင့် သေဆုံးမှုအများဆုံးအဆင့် ၅ နေရာမှာ ရှိနေပါတယ်။
လက်ရှိအချိန်အထိ ကမ္ဘာတဝန်း ကိုဗစ်-၁၉ ရောဂါကူးစက်ခံရသူ အရေအတွက် ဟာ ၁၀၃ သန်းကျော်လာခဲ့ပြီဖြစ်ပြီး သန်းနဲ့ချီ ကူးစက်ခံထားရတဲ့ နိုင်ငံအရေအတွက် ဟာလည်း ၁၉ နိုင်ငံထိ ရှိလာခဲ့ပြီ ဖြစ်တယ်လို့ Worldometers ဝက်ဘ်ဆိုက်ဒ်မှာ ဖော်ပြ ထားပါတယ်။
ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အ ရေအတွက် ၈၉,၅၂၂ ယောက်နဲ့ စုစုပေါင်း သေဆုံးသူ ၄,၆၃၆ ယောက်နဲ့ ခုရက်ပိုင်း အတွင်း သေဆုံးသူထပ်တိုးမလာဘဲ နိုင်ငံအလိုက် ရောဂါကူးစက်မှုအမြင့်ဆုံး အမှတ်စဉ် ၈၃ နေရာမှာ ရှိနေပါတယ်။
ဥရောပနိုင်ငံတွေထဲမှာတော့ ရုရှား၊ ဗြိတိန်နဲ့ ပြင်သစ်နိုင်ငံတွေက ကိုဗစ်-၁၉ ရော ဂါကူးစက်ခံရသူ ၃ သန်းကျော်စီရှိနေပြီး စပိန်၊ အီတလီနဲ့ ဂျာမနီနိုင်ငံတွေက ကူးစက်ခံရ သူ ၂ သန်းကျော်စီနဲ့ ထိပ်ဆုံး ၆ နိုင်ငံအနေနဲ့ ရပ်တည်နေကြကာ သေဆုံးသူအရေအတွက်ကတော့ ၅ သောင်းကျော်ကနေ ၁ သိန်းကျော်ကြားမှာ ရှိနေတာပါ။
အာရှဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့် ဆုံး အိန္ဒိယနိုင်ငံပြီးရင် တူရကီက ရောဂါကူးစက်ခံရသူ ၂ ဒသမ ၄ သန်းကျော်၊ အီရန်နဲ့ အင်ဒိုနီးရှား နိုင်ငံတွေက ကူးစက်ခံရသူဦးရေ ၁ သန်းကျော်စီနဲ့ အသီးသီးရှိနေပြီး သေဆုံးသူအရေအ တွက်ကတော့ ၂ သောင်းကျော်ကနေ ၅ သောင်းကျော်ကြားမှာ ရှိနေပါတယ်။
အာဆီယံနိုင်ငံတနိုင်ငံဖြစ်တဲ့ ဖိလစ်ပိုင်နိုင်ငံမှာတော့ ကိုဗစ်-၁၉ ရောဂါကူးစက်ခံရ သူစုစုပေါင်း ၅ သိန်း ၂ သောင်းကျော်၊ သေဆုံးသူ ၁ သောင်းကျော် ရှိနေတာပါ။
မြန်မာနိုင်ငံကတော့ သေဆုံးသူ ၃,၁၃၈ ယောက်နဲ့ အာဆီယံနိုင်ငံတွေထဲ တတိယ မြောက် သေဆုံးမှု အမြင့်ဆုံးနိုင်ငံဖြစ်လာခဲ့ပြီး လတ်တလောအချိန်ထိ ရောဂါကူးစက်ခံရ သူအရေအတွက် ၁ သိန်း ၄ သောင်းကျော် ရှိနေပါတယ်။
တကမ္ဘာလုံးအတိုင်းအတာနဲ့ လတ်တလောအချိန်ထိ ကိုဗစ်-၁၉ ရောဂါကူးစက်ခံရ ပြီး သေဆုံးသူအရေအတွက် ၂ ဒသမ ၂ သန်းကျော်လာခဲ့ပြီဖြစ်ပြီး ရောဂါပြန်လည် ပျောက်ကင်းလာသူ အရေအတွက်ကတော့ ၇၅ သန်းကျော် ရှိနေခဲ့တာ ဖြစ်ပါတယ်။