Live
Home
မြန်မာသတင်း
ဟင်္သာတခရိုင်တွင် ကိုဗစ်-၁၉ ရောဂါဖြင့် သေဆုံးသူ ၄ ဦး ရှိလာ
DVB
·
December 4, 2020
ဧရာဝတီတိုင်းဒေသကြီး၊ ဟင်္သာတခရိုင်အတွင်းမှာ ဒီဇင်ဘာ ၃ ရက်နေ့အထိ ကိုဗစ်-၁၉ ရောဂါနဲ့ သေဆုံးသူ ၄  ယောက်အထိရှိသွားပြီလို့ ဟင်္သာခရိုင်ဆေးရုံကြီးကနေ  သိရပါတယ်။ ဟင်္သာတခရိုင်မှာ မနေ့ကအထိ ကိုဗစ်-၁၉ ရောဂါပိုးတွေ့ရှိသူပေါင်း ၂၃၉ ဦးအထိရှိခဲ့ပြီး သေဆုံးသူ ၄ ယောက်၊ ဆေးရုံဆင်းလူနာ ၁၉၄ ယောက်၊  ဆေးရုံလွှဲပြောင်းပေးခဲ့ရသူ ၃ ယောက်နဲ့ လက်ရှိကုသဆဲလူနာကတော့ ၃၈ ယောက် ကျန်ရှိနေတယ်လို့ ဆေးရုံအုပ်ကြီး ဒေါက်တာ ဒေါ်ဌေးဌေးလှိုင်က ပြောပါတယ်။ ဟင်္သာတမြို့နယ်မှာ ခရီးသွားရာဇဝင်လည်း မရှိ ၊ ပိုးတွေ့လူနာနဲ့ ထိစပ်မှုမရှိသူက အယောက် ၃၀ ဦးရှိပါတယ်။ ကိုဗစ်-၁၉ ပိုးတွေ့လူနာတွေကိုကုသပေးဖို့   ဟင်္သာတဆေးရုံမှာ ၂၂  ယောက်၊ သူနာပြု သင်တန်းကျောင်းမှာ ၈၆ ယောက်ထားရှိ ကုသနေပြီး မြို့တော်ခန်းမမှာ ပိုးတွေ့လူနာ အယောက် ၁၃၀ အထိထားနိုင်အောင် စီစဉ်ထားတယ်လို့ သိရပါတယ်။ လက်သမားမြောက်ရပ်ကျေးအုပ်ချုပ်မှူး ဦးမင်းဆွေက “အခုလို ကျနော်တို့ အထက(၁)မှာ ထားရှိတဲ့ သူတွေကတော့ အနံ့ပျောက်သူကို သတ်သတ်ထားပြီး ရန်ကုန်မှနေရပ်သို့ ပြန်လာသူတွေ ကိုသာ ထားရှိတာဖြစ်တဲ့အတွက် ကျနော်တို့ ရပ်ကျေးအုပ်ချုပ်ရေးမှူးက အပေါင်းအသင်းတွေနဲ့ နီးစပ်ရာတွေ အလှူခံပြီး အကောင်းဆုံး ဖြစ်အောင် စီစဉ်ဆောင်ရွက်နေပါတယ်”လို့ ပြောပါတယ်။ အခုဆို အထက(၁) ကွာရန်တင်းစင်တာမှာ လက်ရှိ ကွာရန်တင်းဝင်နေသူ အယောက်  ၁၆၀ ကျော်ရှိပြီး ဒီကနေ့ ပိုးတွေ့လူနာတွေအထဲမှာ  အသက် ၄ နှစ်အရွယ်နဲ့ ၇ နှစ်အရွယ် မိန်းကလေးငယ် ၂ ဦး ပါဝင်တယ်။ ဟင်္သာတခရိုင်မှာ စက်တင်ဘာ ၇ ရက်ကနေ  ဒီဇင်ဘာ ၃ ရက်နေ့အထိ ကိုဗစ်-၁၉ ရောဂါပိုးတွေ့ရှိသူပေါင်း ၂၃၉ ယောက်ထိရှိရာမှာ   ဟင်္သာတမြို့နယ်မှ ၂၀၆ ယောက်၊ တခြားမြို့နယ်တွေက ၃၃ ယောက်ပါဝင်ပါတယ်။ ဟင်္သာတမြို့ပေါ်မှာတော့ ကိုဗစ်-၁၉ ကူးစက်ခံရသူ  ၁၂၆  ယောက်ရှိတယ်လို့ သိရပါတယ်။ သတင်း - ကိုကြက်

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024