မောင်တောတွင် ကိုဗစ်ကူးစက်မှု မြင့်လာသဖြင့် ကျန်းမာရေးညွှန်ကြားချက်လိုက်နာရန် တိုက်တွန်း

ရခိုင်ပြည်နယ် မောင်တောမြို့နယ်မှာ ကိုဗစ်-၁၉ ကူးစက်မှု မြင့်လာနေတာကြောင့် ကျန်းမာရေးညွှန်ကြားချက်နဲ့အညီ နေထိုင်ကြဖို့ ကျန်းမာရေးတာဝန်ရှိသူတဦးက တိုက်တွန်းလိုက်ပါတယ်။ ပြီးခဲ့တဲ့ နိုဝင်ဘာ ၁ ရက်နေ့က မောင်တော်မြို့မှာ ကိုဗစ်ရောဂါပိုးတွေ့ရှိသူ တစ်ဦးမှမရှိခဲ့ပေမဲ့ နိုဝင်ဘာ ၂ ရက်နေ့ ၁ ဦး၊ ၃ ရက်နေ့ ၆ ဦး၊ ၄ ရက်နေ့က ၆ ဦး၊ ၅ ရက်နေ့က ၅ ဦး၊ ၇ ရက်နေ့က ၇ ဦး၊ ၈ ရက်နေ့က ၃ ဦး၊ ၉ ရက်နေ့က ၆ ဦး၊ ၁၀ ရက်နေ့က ၇ ဦး၊ ၁၁ ရက်နေ့က ၁၂ ဦး၊ ၁၂ ရက်နေ့က ၇ ဦး၊ ၁၃ ရက်နေ့က ၉ ဦး၊ နိုဝင်ဘာ ၁၄ ရက်နေ့က ၁၀ ဦး စသဖြင့် ၁၂ ရက်အတွင်း ၇၉ ဦးအထိ ပိုးတွေ့လူနာ မြင့်လာနေတယ်လို့ သိရပါတယ်။ ဒါ့အပြင် ရခိုင်ပြည်နယ်၊ မောင်တောဆေးရုံမှာ ကိုဗစ်အတည်ပြုလူနာ သေဆုံးသူ ၂ ဦး ရှိသွားပြီလို့ ကျန်းမာရေးဌာန ထုတ်ပြန်ချက်အရ သိရပါတယ်။ ခရိုင်ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာနုကေသီစံက  “အခု သေဆုံးသူ ၁ ဦးနဲ့ ဆိုရင် မောင်တောမှာ ကိုဗစ်နဲ့ သေဆုံးတာ ၂ ဦးအထိ ရှိလာပြီ။ အခုလက်ရှိမှာ ပိုးတွေ့ရှိမှုက များလာနေတယ်။ ရောဂါပိုးက မြို့မှာ အတော်လေးပျံ့နှံ့နေတယ်လို့ ယူဆနိုင်တယ်။ ဒါကြောင့် မောင်တောဒေသခံတွေ ပေါ့ပေါ့မနေဖို့ လိုတယ်။ ကိုဗစ်စည်းကမ်းချက်တွေနဲအညီ လိုက်နာနေထိုင်ကြဖို့ အထူးလိုအပ်နေတယ်” လို့ ပြောဆိုပါတယ်။ မောင်တောဆေးရုံမှာ နိုဝင်ဘာ ၄ ရက်နေ့က ၇၆ နှစ်အရွယ် လေဖြတ်ထားတဲ့ အမျိုးသမီး ၁ ဦးနဲ့ နိုဝင်ဘာ ၁၃ ရက်နေ့က အသက် ၆၂ နှစ်အရွယ် သွေးတိုး၊ ဆီးချိုအခံရှိသူ အမျိုးသား ၁ ဦးတို့ သေဆုံးခဲ့ပါတယ်။ မောင်တောမြို့နယ်မှာ နိုဝင်ဘာ ၁၄ ရက်အထိ ကိုဗစ် အတည်ပြုလူနာ ၃၆၀ ဦးရှိတဲ့အနက် မောင်တောပြည်သူဆေးရုံမှာ ၂၆ ဦးနဲ့ သီရိမင်္ဂလာခန်းယာယိမ်ဆေးရုံမှာ ၃၈ ဦး ဆေးကုသမှု ခံယူနေပြီး ကျန် ၂၉၆ ဦးကတော့ ဆေးရုံက ဆင်းခွင့်ရရှိသွားပြီလို့ သိရပါတယ်။ မောင်တောမြို့မှာ လက်ရှိ Facility Quarantine ထားရှိသူ ၈ ဦးနဲ့ Home Quarantine ထားရှိသူ ၂၀၀ ကျော်ခန့်ရှိတယ်လို့ ခရိုင်ကျန်းမာရေးဦးစီးဌာနက သိရပါတယ်။ ရခိုင်တပြည်နယ်လုံးမှာတော့ နိုဝင်ဘာ ၁၃ ရက်နေ့အထိ အတည်ပြုလူနာ ၃၁၄၂ ဦးရှိတဲ့အနက် သေဆုံးသူ စုစုပေါင်း ၂၃ ဦး၊ လက်ရှိမှာ လူနာ ၂၆၈ ဦး ဆေးကုသမှုခံယူနေပြီး ကျန်လူတွေကတော့ ဆေးရုံက ဆင်းခွင့်ရရှိခဲ့ပြီလို့ သိရပါတယ်။ သတင်း - လင်းလက်

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up