အိန္ဒိယတွင် ကိုဗစ်-၁၉ ရောဂါကူးစက်ခံရသူ ၇ သန်းကျော်နှင့် သေဆုံးသူ ၁ သိန်းကျော် ရှိလာ

မြန်မာနိုင်ငံနဲ့ အိမ်နီးချင်း အိန္ဒိယနိုင်ငံမှာ ကိုဗစ်-၁၉ ရောဂါကူးစက်ခံရသူအရေအတွက်ဟာ ၇ ဒသမ ၁ သန်းကျော်လာခဲ့ပြီဖြစ်ကာ သေဆုံးသူ ၁ သိန်းကျော် ရှိလာပြီဖြစ်ပါတယ်။ လတ်တလောမှာတော့ အိန္ဒိယနိုင်ငံဟာ ကမ္ဘာ့ ကိုဗစ်-၁၉ ရောဂါကူးစက်မှုအများဆုံး အမေရိကန်နိုင်ငံရဲ့နောက် ဒုတိယကူးစက်မှုအမြင့်ဆုံးနိုင်ငံ ဖြစ်နေခဲ့တာပါ။ တကမ္ဘာလုံးမှာတော့ ကိုဗစ်-၁၉ ရောဂါကူးစက်ခံရသူ စုစုပေါင်း ၃၇ ဒသမ ၉ သန်းကျော်နဲ့ သေဆုံးသူစုစုပေါင်း ၁ ဒသမ ၀၈ သန်းရှိနေခဲ့ပြီ ဖြစ်ပါတယ်။ အမေရိကန်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ စုစုပေါင်း ၈ သန်းကျော်နဲ့ သေဆုံးသူစုစုပေါင်း ၂ သိန်းကျော် ရှိပါတယ်။ လတ်တလော ကူးစက်မှုတွေ မြင့်တက်နေတဲ့ အိန္ဒိယနိုင်ငံမှာတော့ မဟာရာ့ချ်ထရာ၊ အန်ဒရာပရာဒေ့ရှ်နဲ့ ကာနာတာကာပြည်နယ်တွေက ကိုဗစ်-၁၉ ရောဂါကူးစက်ခံရသူ ဦးရေ အများဆုံးပြည်နယ်တွေဖြစ်ပြီး ရောဂါကူးစက်မှုအမြင့်ဆုံး မဟာရာ့ချ်ထရာ ပြည်နယ်မှာ လူဦးရေ ၁ ဒသမ ၅၃ သန်း ကူးစက်ခံထားရတာ ဖြစ်ပါတယ်။ အောက်တိုဘာ ၁၂ ရက်နေ့ တရက်တည်းမှာတင် အိန္ဒိယနိုင်ငံမှာ ကိုဗစ်-၁၉ ကူးစက်ခံရသူဦးရေ ၅၃,၇၆၉ ယောက်နဲ့ သေဆုံးသူဦးရေ ၇၀၈ ယောက်ရှိခဲ့ပြီးနောက်မှာ စံချိန်တင်ကူးစက်မှု ဖြစ်လာခဲ့တာ ဖြစ်ပါတယ်။ ပြီးခဲ့တဲ့ နှစ်ကုန်ပိုင်းလောက်က တရုတ်နိုင်ငံအလယ်ပိုင်း ဝူဟန်မြို့မှာ စတင်ခဲ့တဲ့ ကိုဗစ်-၁၉ ရောဂါကူးစက်ပျံ့နှံ့မှုဟာ ကမ္ဘာ့နိုင်ငံတွေအနှံ့ ကပ်ရောဂါအသွင် ပျံ့နှံ့ခဲ့ပြီး ကမ္ဘာ့ကျန်းမာရေးအဖွဲ့(ဒဗလျူအိပ်ပ်ချ်အို)က ဒါကို နိုင်ငံတကာ အရေးပေါ်ကျန်းမာရေးကိစ္စအနေနဲ့ မတ်လ ၁၁ ရက်က ကြေညာခဲ့ပါတယ်။ စက်တင်ဘာ ၂၅ ရက်ကတော့ ကမ္ဘာ့ကျန်းမာရေးအဖွဲ့ (ဒဗလျူအိပ်ပ်ချ်အို) ကိုဗစ်-၁၉ ကာကွယ်ဆေးကို ကျယ်ကျယ်ပြန့်ပြန့် မရခင်မှာ ရောဂါထိန်းချုပ်ရေးကို ညီညီညွတ်ညွတ် မလုပ်ဆောင်ပါက ရောဂါကြောင့် သေဆုံးသူအရေအတွက် ၂ သန်းအထိ ရှိလာနိုင်တယ်လို့ ထပ်မံပြီး သတိပေးလိုက်ပါတယ်။ ရောဂါဖြစ်ပွားမှုစတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၈၅,၅၇၈ ယောက်၊  စုစုပေါင်း သေဆုံးသူ ၄,၆၃၄ ယောက်နဲ့ နိုင်ငံအလိုက် အမှတ်စဉ် ၄၉ နေရာထိ ကျဆင်းသွားခဲ့ပြီ ဖြစ်ပါတယ်။ အာရှဒေသတွင်း နိုင်ငံတွေထဲမှာတော့ ကိုဗစ်-၁၉ ရောဂါကူးစက်ပြန့်ပွားမှု အမြင့်ဆုံး အိန္ဒိယနိုင်ငံပြီးရင် အီရန်၊ အီရတ်နဲ့ ဘင်္ဂလားဒေ့ရှ်နိုင်ငံတွေက ကူးစက်ခံရသူဦးရေ ၅၀၄,၂၈၁ ယောက်၊ ၄၀၅,၄၃၇ ယောက်၊ ၃၇၉,၇၃၈ ယောက်စီနဲ့ အသီးသီး ရှိနေပါတယ်။ မြန်မာနိုင်ငံမှာတော့ အောက်တိုဘာ ၁၂ ရက် ည ၈ နာရီအထိ ကိုဗစ်-၁၉ အတည်ပြု လူနာစုစုပေါင်း ၂၉,၃၁၄ ယောက်၊ သေဆုံးသူ ၆၆၄ ယောက်နဲ့ ဆေးရုံက ဆင်းခွင့်ရ သူပေါင်း ၁၀,၂၆၀ ယောက် ရှိပြီလို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up