သက်ငယ်မုဒိမ်း ပညာပေးဇာတ်ကားတွင် ဒေါင်းနီအဖြစ်ပါဝင်မည့် အိန္ဒြာကျော်ဇင်
DVB
·
July 11, 2018
သက်ငယ်မုဒိမ်းမှုတွေအတွက် ပညာပေး ရုပ်ရှင်ဇာတ်ကာဖြစ်တဲ့ “ဟစ်တိုင်” အမည်ရှိတဲ့ ရုပ်ရှင်ဇာတ်ကားမှာ သရုပ်ဆောင် အကယ်ဒမီ အိန္ဒြာကျော်ဇင်က ဒေါင်းနီ ဆိုတဲ့ အမျိုးသမီးနေရာကနေ ပါဝင် သရုပ်ဆောင်မှာ ဖြစ်ပါတယ်။
Stellar Seven Entertainment Group ကနေ စီစဉ်တဲ့ ဒီဇာတ်ကားက သျှင်မရဲ့ ဝတ္ထုကို ဇာတ်ညွှန်းအနေနဲ့ ကြိုးသျှင်က ပြန်လည်ရေးသားပေးထားတာ ဖြစ်ပါတယ်။
လက်ရှိ ပြည်သူလူထုတွေကြားမှာ အဖြစ်များနေတဲ့ သက်ငယ်မုဒိမ်းနဲ့ ပတ်သက်ပြီး ပညာပေးလိုတဲ့ ရုပ်ရှင်ဇာတ်ကားအဖြစ် ဒါရိုက်တာ ဟိန်းစိုးက ပုံဖော်ဖန်တီးသွားမှာ ဖြစ်ပါတယ်။
ဒီဇာတ်ကားမှာ သရုပ်ဆောင် အိန္ဒြာကျော်ဇင်က အဓိကဇာတ်ဆောင်ဖြစ်တဲ့ ဒေါင်းနီ ဆိုတဲ့ အမျိုးသမီး နေရာကနေ ပါဝင်သရုပ်ဆောင်သွားမှာဖြစ်ပါတယ်။
“အဓိကက ဒီဇာတ်ကားမှာ ဒေါင်းနီရဲ့စိတ်ဓာတ်က မဟုတ်မခံ၊ သူ့ဘဝမှာ သူ့သမီးလေးပဲ ရှိတယ်။ သမီးလေးကို ချစ်တဲ့စိတ်နဲ့ အရာအားလုံးကို စွန့်လွှတ်နိုင်တယ်။ ပြဿနာတခုဖြစ်လို့ သူ ဝင်ရှင်းပေးလို့ရတဲ့ အခြေအနေတခုဆိုရင် ကိုယ်တိုင် ဖြေရှင်းပေးတယ်။ သမီးကို အရမ်းချစ်ပြီး မတရားတဲ့အမှုကို လက်တုံ့ပြန်ချင်တဲ့ စိတ်ရှိတဲ့ အမျိုးသမီးတယောက်ပါ။ အဓိက သက်ငယ်မုဒိမ်းမှုတွေနဲ့ပတ်သက်ပြီး ပညာပေးချင်တဲ့ ဇာတ်လမ်းပါ” လို့ အိန္ဒြာကျော်ဇင်က ပြောပါတယ်။
ဒီဇာတ်ကားကို လာမယ့် ဇူလိုင် ၈ ရက်က စတင်ကာ မကွေးတိုင်းဒေသကြီး၊ ဆင်ဖြူကျွန်းမှာ သွားရောက်ရိုက်ကူးမယ့်အကြောင်းကိုလည်း အိန္ဒြာကျော်ဇင်က ပြောပါတယ်။
“ဆင်ဖြူကျွန်းမှာ သွားရောက်ရိုက်ကူးမှာပါ။ သက်ငယ်မုဒိမ်းမှု ဆိုတာ ဘယ်မိဘကိုပဲ မေးမေး မခံစားနိုင်တဲ့ ဖြစ်ရပ်ပေ့ါ။ အခုလို ဒီပညာပေးဇာတ်ကားမှာ ပါဝင်ပြီး ရိုက်ခွင့်ရတဲ့အတွက်လည်း ကျေနပ်တယ်။ အဲဒီအတွက် ရထားတဲ့ ဇာတ်ကောင်မှာ အကောင်းဆုံးဖြစ်အောင် ပုံဖော်သွားမယ်။ ဒီလို သက်ငယ်မုဒိမ်းမှုတွေ နောက်ထပ် မဖြစ်အောင်၊ နောက်ထပ်မလုပ်မိအောင် ဘယ်လိုပုံစံမျိုးနဲ့ သွားမလဲက အစ ထိထိရောက်ရောက် ဖြစ်စေချင်တယ်”
“ဟစ်တိုင်” ဆိုတဲ့ ရုပ်ရှင်ဇာတ်ကားမှာ ဝါရင့်သရုပ်ဆောင်တွေဖြစ်ကြတဲ့ မေသန်းနု၊ အိန္ဒြာကျော်ဇင်၊ လှမျိုးသဉ္ဖာနွယ်၊ သန်းသန်းစိုးတို့နဲ့အတူ သရုပ်ဆောင်သစ်တွေ ဖြစ်ကြတဲ့ စိုင်းဝဏ္ဏအောင်၊ ဂျိန်းစ်၊ ထူးပြည့်ဇော်၊ စဝ်ယွန်းဝတီဦး၊ ဖြိုးပပထူး၊ ကလေးသရုပ်ဆောင် ပြည့်ပြည့်တို့အပြင် တခြားသော အနုပညာရှင်ပေါင်း များစွာက ပါဝင်သရုပ်ဆောင်သွားကြမှာ ဖြစ်ပါတယ်။
သတင်း - ကြယ်စု