ရွေးကောက်ပွဲနှင့် အစိုးရအာဏာ လွှဲပြောင်းပွဲအကြား ရှည်လျားသော ကာလကြီးကို ဖြတ်သန်း နေရသည့် အများပြည်သူတို့ သည်ကနေ့ စိတ်အ၀င်စားဆုံးအရာက ဒေါ်အောင်ဆန်းစုကြည် သမ္မတဖြစ်မည်လား ဟူသော အချက်ဖြစ်၏။ အဲဒါကို ဖြစ်စေချင်၊ သေချာချင်၊ ကြေညာစေချင်လှပြီ။ စင်စစ်၊ ဒေါ်အောင်ဆန်းစုကြည်၏ ဦးဆောင်မှုကို လိုလားတောင့်တကြသဖြင့်လည်း တစ်ပြည်လုံး အန်အယ်လ်ဒီ ပါတီကို တစ်ခဲနက် မဲပေးခဲ့ကြခြင်း ဖြစ်သည်။ သို့သော်၊ အထစ်အငေါ့ တစ်ခုက ရှိနေသည်။ အဲဒါက၊ ပြီးခဲ့သည့် ၂၇ နှစ်ကျော်လုံးလုံး လူထု ထောက်ခံမှုကို အစဉ်တစိုက် မြင့်မြင့်မားမား ရရှိသူလည်း ဖြစ်၊ ရွေးကောက်ပွဲတွင် အပြတ်အသတ် အနိုင်ရသော ပါတီ၏ အကြီးအကဲလည်း ဖြစ်သူအား သမ္မတအဖြစ် တင်မြှောက်ခွင့်မရအောင် တားဆီးထားသည့် ဖွဲ့စည်းပုံဆိုင်ရာ ပြဋ္ဌာန်းချက် ဖြစ်၏။ ဒါကို ဘယ်လို ဖြေရှင်း ကျော်လွှားနိုင်မည်လဲ ဆိုတာကို ယခု စဉ်းစားနေကြ၊ ဆွေးနွေး ညှိနှိုင်းနေကြသည်ဟု သတင်းများ ကြားသိနေရသည်။ သည်ကိစ္စသည် တပ်မတော်၏ သဘောဆန္ဒပေါ်တွင် မူတည်နေကြောင်းလည်း အားလုံး သိရှိနေကြသည်။ တပ်မတော်က ဘယ်သို့ စဉ်းစား ဆုံးဖြတ်မည်လဲ။ အကယ်၍ လိုက်လျောရန် ဆန္ဒရှိပါက လုပ်ဆောင် နိုင်သော နည်းလမ်းများ ရှိကြောင်းလည်း ရေးသား ပြောဆို နေကြတာ တွေ့ရသည်။ အဲသည်အနက်၊ အများအမြင်အရ အလွယ်ဆုံး အမြန်ဆုံး နည်းလမ်းက ဖွဲ့စည်းပုံပါ အဆိုပါ ပြဋ္ဌာန်းချက်ကို “ဆိုင်းငံ့ထားခြင်း” ဖြစ်သည်။ အဲသည်လို ဆောင်ရွက်ဖူးသော ဆင်တူယိုးမှား သာဓကလည်း ရှိသည်။ ၁၉၅၈ ခုနှစ် စက်တင်ဘာက ဖြစ်သည်။ ထိုစဉ်က နိုင်ငံတော် ၀န်ကြီးချုပ် ဦးနုက လက်ရှိ တိုင်းပြည်၏ အခြေအနေများအရ ၁၉၅၈ နိုဝင်ဘာတွင် ကျင်းပရန်ရှိသည့် အထွေထွေ ရွေးကောက်ပွဲကို လွတ်လပ်ပြီး တရားမျှတမှု ရှိစွာ ကျင်းပရန် မဖြစ်နိုင်သည့်အတွက် တပ်မတော် အကြီးအကဲ ဖြစ်သူ ဗိုလ်ချုပ်နေ၀င်းက ၀န်ကြီးချုပ်အဖြစ် အစိုးရအဖွဲ့သစ်တစ်ရပ် တာဝန်ယူ ဖွဲ့စည်းကာ ၁၉၅၉ ဧပြီလ မကုန်မီ ရွေးကောက်ပွဲကြီး ကျင်းပပေးပါဟု အပ်နှံသည်။ ဦးနု၏ လွှဲအပ်မှုကို ဗိုလ်ချုပ်နေ၀င်းက လက်ခံ၍ ၁၉၅၈ အောက်တိုဘာ ၂၈ တွင် ၎င်းင်း ဦးဆောင်သည့် အိမ်စောင့်အစိုးရကို ဖွဲ့စည်းသည်။ နောက် ၄ လ အကြာ ၁၉၅၉ ဖေဖော်ဝါရီတွင် တိုင်းပြည် အခြေအနေ တိုးတက် လာသည်။ သို့သော် ဧပြီ မကုန်မီ (နောက် ၂ လ အတွင်း) လွတ်လပ်၍ တရားမျှတသော ရွေးကောက်ပွဲ ကျင်းပနိုင်ရန်ကား မသေချာဟု ဆိုသည်။ အဲသည်အခါ အကျပ်အတည်းတစ်ရပ် ပေါ်ပေါက်သည်။ ဖွဲ့စည်းပုံဆိုင်ရာ အကျပ်အတည်း။ ထိုစဉ်က တည်ရှိသည့် ၁၉၄၇ ခုနှစ် ဖွဲ့စည်းအုပ်ချုပ်ပုံ အခြေခံဥပဒေ၏ ပုဒ်မ ၁၁၆ တွင် “အစိုးရအဖွဲ့ဝင် ၀န်ကြီး တစ်ဦးသည် ခြောက်လမျှ တစ်ဆက်တည်း ပါလီမန် အမတ် မဟုတ်လျှင် ထိုကာလ အပိုင်းအခြား ကုန်ဆုံးသောအခါ အစိုးရအဖွဲ့ဝင် ၀န်ကြီးအဖြစ်မှ ရပ်စဲရမည်” ဟူ၍ ဖော်ပြ ထားသည်။ ဗိုလ်ချုပ်နေ၀င်းသည် ပါလီမန်အမတ် မဟုတ်ချေ။ သို့နှင့် ၆ လ မပြည့်မီ ၁၉၅၉ ဖေဖော်ဝါရီ ၁၃ မှာပင် ၀န်ကြီးချုပ်ရာထူးမှ နုတ်ထွက်ပြီး သမ္မတထံသို့ လိပ်မူ၍ စာတစ်စောင်ပေးပို့သည်။ စာ၌ လိုရင်း အချက်မှာ အကယ်၍ အခြားပုဂ်္ဂိုလ်တစုံတယောက်အား ၀န်ကြီးချုပ် ခန့်အပ်ပါက အဆိုပါ ပုဂ်္ဂိုလ်အနေဖြင့် ရွေးကောက်ပွဲကို အဖြစ်နိုင်ဆုံး လွတ်လပ်၍ တရားမျှတစွာ ကျင်းပနိုင်ရန်အတွက် မိမိက တပ်မတော်ကာကွယ်ရေး ဦးစီးချုပ်အဖြစ် အစွမ်းကုန် ကူညီမည်ဖြစ်ကြောင်း၊ အကယ်၍ မိမိကိုပင် ၀န်ကြီးချုပ်အဖြစ် ဆက်လက်တာဝန်ယူစေလိုသည်ဆိုပါက ပုဒ်မ ၁၁၆ ကို သင့်တော်သလို ပြင်ဆင်ပေးရန် လိုအပ်ကြောင်း တင်ပြခြင်း ဖြစ်၏။ သည်အချက်ကို ဥပဒေပါရဂူများ၊ နိုင်ငံရေးသမားများ၊ ပါလီမန် အမတ်များ ရှုထောင့်စုံမှ အမျိုးမျိုးအဖုံဖုံ စဉ်းစား ငြင်းခုံကြပြီးနောက်၊ ပုဒ်မ ၁၁၆ ကို ရွေးကောက်ပွဲပြီး၍ အစိုးရသစ် ပေါ်ထွက်သည်အထိ ဆိုင်းငံ့ပေးသည့် “ဖွဲ့စည်းအုပ်ချုပ်ပုံ အခြေခံဥပဒေ (ပြင်ဆင်ချက်) အက်ဥပဒေ”ကို ၁၉၅၉ ခုနှစ် ဖေဖော်ဝါရီလ ၂၆ ရက်နေ့တွင် ပြဋ္ဌာန်းပေးခဲ့သည်။ ဤသည်က ဖွဲ့စည်းပုံ အခြေခံဥပဒေပါ ပြဋ္ဌာန်းချက်နှင့် ပကတိ နိုင်ငံရေး အခြေအနေအကြား ဆန့်ကျင် ကွဲလွဲ နေသောအခါ တိုင်းပြည်အတွက် လိုအပ်ချက်ကို ရှေးရှုလျက် နည်းလမ်း ရှာဖွေ ဆောင်ရွက်ခဲ့သည့် နမူနာ ဖြစ်သည်။ ယခု နှစ်ပေါင်း ၅၀ ကျော် အကြာတွင် ယင်းကဲ့သို့ ဖွဲ့စည်းပုံပါ ပြဋ္ဌာန်းချက် [၂၀၀၈ ဖွဲ့စည်းပုံ အခြေခံဥပဒေ ပုဒ်မ ၅၉(စ)]နှင့် ပကတိ နိုင်ငံရေး လိုအပ်ချက်အကြား ကွာဟသည့် ပြဿနာတစ်ရပ် ပေါ်ပေါက်လာပြန်ခြင်း ဖြစ်သည်။ အခြေအနေက ဟိုတုန်းကနှင့် တစ်ထပ်တည်းတော့ မတူ။ သို့သော် မတူပုံကပင် စိတ်ဝင်စားစရာကောင်းသည်။ ဤသည်က ၁၉၅၉ တွင် တပ်မတော် အကြီးအကဲအား အာဏာအပ်နှင်းနိုင်ရန်အတွက် ရွေးကောက်ခံ ပြည်သူ့ ကိုယ်စားလှယ်တို့က ဖွဲ့စည်းပုံ အကျပ်အတည်းကို ကြိုးစား ကျော်လွှားပေးခဲ့ခြင်းဖြစ်ပြီး၊ ယခု ၂၀၁၆ မှာက ရွေးကောက်ခံ ပြည်သူ့ကိုယ်စားလှယ်တို့၏ အကြီးအကဲကို အာဏာ အပ်နှင်းနိုင်ရန်အတွက် တပ်မတော်က ဖွဲ့စည်းပုံ အကျပ် အတည်းကို ကျော်လွှားပေးရမည့် အချက် ဖြစ်သည်။ ပြည်သူကတော့ မိမိတို့ တစ်ခဲနက် ဆန္ဒမဲပေးလိုက်သော ပြည်သူ့ခေါင်းဆောင်ကို သမ်္မတ ဖြစ်စေချင်သည်။ သည်အတွက် ပြည်သူကြားက ပေါက်ဖွားသည့် ပြည်သူ့တပ်မတော်ကလည်း အားပေး ကူညီ ဆောင်ရွက် လိမ့်မည်ဟု မျှော်လင့်ကြသည်။ ပြည်သူနှင့် တပ်မတော်အကြား စေတနာ မေတ္တာ ကရုဏာတို့ အပြန်အလှန် ပွားများ စည်ပင်သော ခေတ်ကာလသစ်တစ်ရပ် ပေါ်ထွန်းပါစေဟု ဆုမွန်ကောင်း တောင်းလိုက်ရပါသည်။ ဖေမြင့် (ပြည်သူ့အရေးဂျာနယ်၊ အတွဲ-၂၊ အမှတ်-၇၂၊ ဖေမြင့် ဆောင်းပါးကို ခွင့်ပြုချက်ဖြင့် ဖော်ပြသည်)