September 17, 2021

တာလီဘန်လက်အောက် ကိုဗစ်လူနာများ ဆေးကုရန် အခက်အခဲဖြစ်မည်ကို စိုးရိမ်

တာလီဘန်တွေဟာ အာဖဂန်နစ္စတန်နိုင်ငံကို ထိန်းချုပ်ထားဆဲဖြစ်သောကြောင့် ကဘူးလ်ရှိ ဆေးရုံတာဝန်ရှိသူတွေဟာ ဆေးဝါးပစ္စည်းတွေကို အထူးသဖြင့် ကိုဗစ်-၁၉ လူနာတွေအတွက် ဆေးကုသဖို့ စိုးရိမ်နေကြပါတယ်။ 

ကဘူးလ်ရှိ အာဖဂန်-ဂျပန်ဆေးရုံဟာ ရှိရင်းစွဲ ပစ္စည်းသိုလှောင်ထားပြီးသားတွေထဲက ဆေးဝါးတွေကို သုံးနေရပြီး နောက်မကြာခင် ဆေးဘက်ဆိုင်ရာ အထောက်အပံ့အသစ်တွေရဖို့ မသေချာတော့ဘူးလို့ ဆေးရုံညွှန်ကြားရေးမှူး ဇယ်လ်မီရစ်ရှတင်က ပြောကြားခဲ့ပါတယ်။

“တာလီဘန်တွေ မသိမ်းခင်က လေးပုံတစ်ပုံစာလောက် အထောက်အပံ့တွေ ရှိထားပြီးသား၊ ဆေးဝါးတွေလည်း ယူထားတာ သိုလှောင်ပစ္စည်းက အပြည့်ပဲ၊ ခု ဒီပစ္စည်းတွေကို ထုတ်ပေးနေတာ’။

အရင်တုန်းက ဆေးတွေပြတ်လပ်သွားရင် ဝယ်လိုက်တယ်၊ ခုတော့ ဒီသိုလှောင်ထားတဲ့အထဲကပဲ ဆေးတွေယူသုံးနေရတယ်လို့ ပြောပါတယ်။

အာဖဂန်နစ္စတန်က ရာနဲ့ချီရှိနေတဲ့ ဆေးရုံတွေမှာ ငွေကြေးထောက်ပံ့တဲ့အလှူရှင်တွေကို တာလီဘန်အစိုးရသစ်နဲ့ ဆက်ဆံဖို့ ခွင့်မပြုထားတာကြောင့် ဆေးရုံတွေကို မကြာခင် ပိတ်ပစ်ရ မယ့်အန္တရာယ်ရှိနေတယ်လို့ ကမ္ဘာ့ကျန်းမာရေးအဖွဲ့ (WHO) မှ တာဝန်ရှိသူတစ်ဦးက ရိုက်တာကို စက်တင်ဘာ ၆ ရက်က ပြောပါတယ်။

မိုးခေါင်မှုနဲ့ ကိုဗစ်-၁၉ ကပ်ရောဂါကို ရင်ဆိုင်နေရတဲ့ အာဖဂန်ပြည်သူ ၃ ဒသမ ၅ သန်း ကျော်ဟာ အိုးမဲ့အိမ်မဲ့ဖြစ်နေတာပါ။ 

ခိုလှုံစခန်းတွေမှာ အိုးအိမ်မဲ့တွေ စုပြုံနေတာကြောင့် ဒီလိုလူဦးရေ ထူထပ်တဲ့ အခြေအနေတွေဟာ ကိုရိုနာဗိုင်းရပ်စ် ဖြစ်ပွားမှုအသစ်ကို မြင့်တက်များပြားစေနိုင်တယ်လို့ အကူအညီပေးရေး အေဂျင်စီတွေက သတိပေးခဲ့ပါတယ်။

အရင်တုန်းကတော့ လူတွေက နှာခေါင်းစည်းတွေကို ဝယ်သုံးခဲ့ကြပေမယ့် ခု ထပ်မဝယ်ကြတော့ဘူးလို့ မျက်နှာဖုံးနှာခေါင်းစည်းတွေရောင်းတဲ့ ဆိုင်ရှင်တစ်ဦးက ပြောပါတယ်။

တရုတ်၊ ပါကစ္စတန်နဲ့အီရန်မှာ ကိုရိုနာဗိုင်းရပ်စ် စတုတ္ထလှိုင်းအကြောင်း ကြားသိကြပေမယ့်  လူတွေက သူတို့ကိုယ်သူတို့ မကာကွယ်ကြတော့ဘူးလို့လည်း ပြောပါတယ်။ 

UNICEF ရဲ့ အဆိုအရ အာဖဂန်လူဦးရေရဲ့ လေးရာခိုင်နှုန်းအောက်သာ ကာကွယ်ဆေး ထိုးထားကြပါတယ်။  

3 mins Ago

နိုင်ငံတော်အတိုင်ပင်ခံပုဂ္ဂိုလ်အပေါ် စွဲဆိုထားသည့် အဂတိအမှုများ အောက်တိုဘာ ၁ ရက် စတင် စစ်ဆေးမည်

နိုင်ငံတော်အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက မန္တလေးတိုင်း တရားလွှတ်တော်မှာ စွဲဆိုထားတဲ့ အဂတိလိုက်စားမှုတိုက်ဖျက်ရေးဥပဒေအမှု ၄  မှုကို အောက်တိုဘာ ၁ ရက်နေ့မှာ စတင်စစ်ဆေးဖို့ စက်တင်ဘာ ၁၇ ရက် မှုခင်းစီမံခန့်ခွဲမှုအစည်းအဝေးမှာ ဆုံးဖြတ်လိုက်တယ်လို့ ရှေ့နေဦးခင်မောင်ဇော်က ပြောပါတယ်။

ဒီနေ့မှုခင်းစီမံခန့်ခွဲမှုအစည်းအဝေးကို နေပြည်တော်မှာပြုလုပ်ခဲ့တာဖြစ်ပြီး မန္တလေးတိုင်းတရားလွှတ်တော်တရားသူကြီးတစ်ယောက် ပါဝင်ခဲ့ပါတယ်။

ဒီအမှုကို အောက်တိုဘာ ၁ ရက်နေ့ သောကြာနေ့မှာ စတင်စစ်ဆေးမှာဖြစ်ပြီး တစ်ပတ်ခြားတစ်ခါ သောကြာနေ့တိုင်း ရုံးချိန်းခေါ်သွားမှာဖြစ်ပါတယ်။

မန္တလေးတိုင်းတရားလွှတ်တော်မှာ အမှုစွဲထားတာဖြစ်ပေမယ့် နေပြည်တော် ဇမ္ဗူသီရိ ခြံအမှတ် ၁ အထူးတရားရုံးမှာပဲ အမှုတွေကို စစ်ဆေးသွားမှာဖြစ်ပါတယ်။  အဂတိအမှုတွေမှာ နေပြည်တော် အန်အယ်လ်ဒီ ဥက္ကဋ္ဌ ဦးမင်းသူလည်း ပါဝင်နေတယ်လို့ စစ်ကောင်စီက စွပ်စွဲထားတာကြောင့် ဦးမင်းသူအတွက် ရှေ့နေကိုယ်စားလှယ်လွှဲစာတင်သွင်းဖို့လည်းရှိနေပါတယ်။

ရန်ကုန်တိုင်းတရားလွှတ်တော်မှာ စွဲဆိုထားတဲ့ အဂတိအမှုကိုလည်း နေပြည်တော်မှာပဲ စစ်ဆေးဖို့ဖြစ်လာနိုင်ပြီး အကျိုးအကြောင်းအတိအကျကိုတော့မသိရသေးဘူးလို့ ရှေ့နေဦးခင်မောင်ဇော်ကပြောပါတယ်။

စစ်ကောင်စီကစွဲဆိုထားတဲ့ အဂတိလိုက်စားမှုတိုက်ဖျက်ရေးဥပဒေအမှု ၅ ခုအတွက် ရှေ့နေတွေကို ပါဝါလွှဲစာမှာ ဒေါ်အောင်ဆန်းစုကြည်က စက်တင်ဘာ ၁၄ ရက်နေ့က လက်မှတ်ရေးထိုးခဲ့ပြီး ဒီကနေ့မှုခင်းစီမံခန့်ခွဲရေးအစည်းအဝေးမှာ တရားရုံးကလက်ခံရယူခဲ့ပါတယ်။ 

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက ဖေဖော်ဝါရီ ၁ ရက်နေ့ကစတင်ပြီးဖမ်းဆီးထားပြီး အစပိုင်းမှာ သဘာဝဘေးစီမံခန့်ခွဲမှု ဥပဒေ နဲ့ ပို့ကုန်သွင်းကုန် ဥပဒေတွေအပါအဝင်  ပုဒ်မ ၆ ခုနဲ့  တရားစွဲခဲ့တာပါ။

ဇွန်လ ၉ ရက်နေ့မှာ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ ထပ်မံ အမှုထပ်ဖွင့်ခဲ့ပါတယ်။ ဇူလိုင် ၁၂ ရက်နေ့ ရုံးချိန်းမှာတော့ ဒေါ်အောင်ဆန်းစုကြည်ကို စစ်ကောင်စီက မန္တလေးတိုင်းတရားလွှတ်တော်မှာ အဂတိပုဒ်မ အမှုလေးခုနဲ့ ထပ်မံစွဲဆိုခဲ့တဲ့အတွက် ဒေါ်အောင်ဆန်းစုကြည်ရင်ဆိုင်နေရတဲ့ အမှု စုစု ပေါင်း ၁၁ မှုအထိရှိနေပါတယ်။ 

7 mins Ago

ဒီးမော့ဆို ၆ မိုင်တိုက်ပွဲအတွင်း ကရင်နီတပ်မတော် တပ်ကြပ်ကြီး ၁ ဦး ကျဆုံး

ကရင်နီ(ကယား) ပြည်နယ် ဒီးမော့ဆိုမြို့နယ် ၆ မိုင်ကျေးရွာနီး ဖြစ်ပွားခဲ့တဲ့တိုက်ပွဲအတွင်း ကရင်နီတပ်မတော် KA တပ်ကြပ်ကြီးတဦး ထိခိုက်ကျဆုံးခဲ့တယ်လို့ ကရင်နီတပ်မတော် KA က ထုတ်ပြန်ပါတယ်။

ဒီးမော့ဆိုမြို့နယ် ဒေါပိုးစီနဲ့ ၆ မိုင်ကျေးရွာ နယ်မြေအတွင်းရှိ စစ်ရှောင်စခန်းဆီကို ဦးတည်နေတဲ့ အကြမ်းဖက်စစ်ကောင်စီ အင်အား ၁၀၀ လောက်နဲ့ ကရင်နီတပ်တော် KA၊ KNDF ပူးပေါင်းတပ်တို့  စက်တင်ဘာလ ၁၆ ရက်နေ့ညက တိုက်ပွဲဖြစ်ပွားခဲ့ပါတယ်။

ည ၇ နာရီလောက်ကနေ တိုက်ပွဲစတင်ကာ ၄၅ မိနစ် ထိတွေ့တိုက်ပွဲဖြစ်ပွားခဲ့မှုအတွက် ကရင်နီတပ်မတော် တပ်ကြပ်ကြီး နားရယ် (ခေါ်) အယ်ဒီဟာ လက်နက်ကြီး ကျည်ထိမှန်ခဲ့ပြီး တော်တွင်းဆေးခန်းတနေရာမှာ ဆေးကုသမှုခံယူရင်း သေဆုံးသွားတယ်လို့ ထုတ်ပြန်ထားပါတယ်။

 ဒါ့အပြင် တိုက်ပွဲအတွင်း တခြားတပ်သား ၂ ဦးလည်း ဒဏ်ရာရရှိထားကြောင်းလည်း သိရပါတယ်။

ပြည်သူတွေအနေနဲ့ တိုက်ပွဲဖြစ်ပွားရာ ဒီးမော့ဆိုမြို့နယ်၊ ဒေါပိုးစီနဲ့ စံပြ (၆) မိုင်ကျေးရွာတို့မှ ဖရူဆိုမြို့နယ် ကဒါးလားကျေးရွာအထိ၊ လွိုင်ကော်-ဒီမော့ဆို-ဖရူဆို လမ်းတစ်လျှောက် ညနေ ၆ နာရီမှ မနက် ၆ နာရီအထိ ခရီးသွားလာခြင်းမပြုဖို့ KNDF သတင်းနှင့်ပြန်ကြားရေးဌာနက စက်တင်ဘာ ၁၆ ရက်နေ့ မှာ အသိပေးထုတ်ပြန်ထားပါတယ်။

ကရင်နီပူးပေါင်းတပ်နဲ့  စစ်ကောင်စီတပ်တို့ နေ့စဉ်တိုက်ပွဲဖြစ်ပွားနေပြီး KNDF အနေနဲ့ အကြမ်းဖက်စစ်ကောင်စီတပ်ကို ကရင်နီပြည်တစ်ဝန်းလုံးအတိုင်းအတာနဲ့ စစ်မျက်နှာဖွင့်ပြီး အမြစ်ပြတ်ခြေမှုန်းသွားမယ်လို့လည်း ထုတ်ပြန်ထားတာရှိပါတယ်။

13 mins Ago

ဂျာမနီအစိုးရက မြန်မာကို ခွဲစိတ်ခန်းသုံးနှာခေါင်းစည်း Mask ၁ သန်းကျော်လှူဒါန်း

ကိုဗစ်-၁၉ ကပ်ရောဂါ တိုက်ဖျက်ရေးအတွက် ဂျာမနီနိုင်ငံအစိုးရက မြန်မာနိုင်ငံကို ခွဲစိတ် ခန်းသုံးနှာခေါင်းစည်း Mask ၁ ဒသမ ၄ သန်း လှူဒါန်းသွားမယ်လို့ သိရပါတယ်။

ဂျာမနီသံရုံးဒုတိယအကြီးအကဲ Dr. Markus Lubawinski နဲ့ ကမ္ဘာ့ကျန်းမာရေးအဖွဲ့ မြန်မာနိုင်ငံ ဒုတိယတာဝန်ခံ Dr. Fabio Caldas de Mesquita တို့ဟာ အခုလဆန်းပိုင်းက တွေ့ဆုံခဲ့ကြပြီး ခွဲစိတ်ခန်းသုံးမျက်နှာဖုံးတွေရောက်ရှိရေးနဲ့ ဖြန့်ဝေရေးကိစ္စတွေကို ဆွေးနွေးခဲ့ကြတယ်လို့ သံရုံးက ထုတ်ပြန်ထားပါတယ်။

ကိုဗစ်-၁၉ တတိယလှိုင်း ကူးစက်ခံမြန်မာနိုင်ငံမှာတော့ လက်ရှိအချိန်ထိ ရောဂါ ကူးစက်ခံရသူပေါင်း ၄၄၀,၀၀၀ ကျော်နဲ့ သေဆုံးသူ ၁၇,၀၀၀ နီးပါး ရှိလာခဲ့ပြီလို့ အကြမ်း ဖက်စစ်ကောင်စီ ကျန်းမာရေးဝန်ကြီးဌာနက စက်တင်ဘာ ၁၆ ရက်ညပိုင်းမှာ ထုတ်ပြန် ထားပါတယ်။

ဒါ့အပြင် အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၇ လခွဲကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေခဲ့တာ ဖြစ်ပါတယ်။

အမျိုးသားညီညွတ်ရေးအစိုးရ (NUG)က ထုတ်ပြန်တဲ့ ကိုဗစ်-၁၉ ရောဂါဖြစ်ပွားမှု ဆိုင်ရာ စစ်တမ်းမှာတွေ့ရှိရတဲ့ အထောက်အထားတွေအရ ဆေးရုံမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက်ရောက်နိုင်တာ၊ အွန်လိုင်းကသာ ကုသမှုခံယူနေကြရတာ၊ စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာ စတဲ့အချက် တွေဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှု လုပ်ငန်းတွေမှာ မှားယွင်းညံ့ဖျင်းစွာ စီမံနေတယ်လို့ သုံးသပ်ထားပါတယ်။

ဒါ့အပြင် ကိုဗစ်-၁၉ တတိယလှိုင်းကာလမှာ သေဆုံးသူတွေရဲ့ ၇၃ ရာခိုင်နှုန်းက လိုအပ်တဲ့ ဆေးရုံတွေမှာ တက်ရောက်ကုသခွင့်မရဘဲ နေအိမ်တွေမှာ သေဆုံးခဲ့ကြတယ်လို့ ဖော်ပြပါတယ်။

22 mins Ago

လက်နက်ကြီးယူပြီး CDM ဝင်လာသည့်စစ်သားများကို ကျပ်သိန်း ၁၀၀ ချီးမြှင့်မည်

အာဏာဖီဆန်ရေးလှုပ်ရှားမှု(CDM)မှာပါဝင်ပြီး ပြည်သူ့ဘက်က ရပ်တည်လိုတဲ့ တပ်မတော်သားတွေ၊ ရဲတွေ၊ ဌာနဆိုင်ရာအကြီးအကဲတွေကို ချင်းပြည်နယ်ကာကွယ်ရေးတပ် (CDF)က ကျပ်သိန်း ရာချီ ဆုကြေးပေးမယ်လို့  ဖိတ်ခေါ်ထားပါတယ်။

CDM လုပ်ပြီး ပြည်သူတွေနဲ့ လာရောက်ပူးပေါင်းတဲ့ တပ်မတော်သား၊ ရဲသားနဲ့ ဌာနဆိုင်ရာ အကြီးအကဲတွေအပါအဝင် မိသားစုဝင်တွေအတွက် လိုအပ်တဲ့ လုံခြုံရေး၊ စားဝတ်နေရေး၊ ကျန်းမာရေး စောင့်ရှောက်မှုတွေအပြင် ဆုကြေးတွေကိုပါ လက်ငင်း ချီးမြှင့်သွားမယ်လို့ ထုတ်ပြန်ချက်က ဆိုပါတယ်။

ဆုကြေးတွေအနေနဲ့ လက်နက်ငယ်နဲ့ ကျည်ဆန်တွေတစ်ပါတည်း ယူဆောင်လာနိုင်ပါက ကျပ်သိန်း ၅၀ ၊ လက်နက်ကြီးနဲ့ ကျည်ဆန်တွေ တစ်ပါတည်းယူဆောင်လာနိုင်ပါက ကျပ်သိန်း ၁၀၀ ထိ ပေးအပ်မှာဖြစ်သလို  ပြည်သူတွေပိုင်တဲ့ ဌာနဆိုင်ရာကားတွေကိုပါ တစ်ပါတည်း ယူဆောင်လာ နိုင်ပါက ကျပ်သိန်း ၅၀ ချီးမြှင့်ပေးအပ်သွားမယ်လို့ ထုတ်ပြန်ချက်မှာ ဖော်ပြပါတယ်။

မင်းအောင်လှိုင်နဲ့ သူ့ရဲ့စစ်ဗိုလ်တွေဟာ ကိုယ်ကျိုးစီးပွားအတွက် ပြည်သူတွေဆီက အကြမ်းဖက်အာဏာလုယူကာ အပြစ်မဲ့ပြည်သူတွေရဲ့ အသက်အိုးအိမ်စည်းစိမ်တွေကို မတရား သတ်ဖြတ်လုယက်ဖျက်ဆီးတာတွေ ကျူးလွန်နေကြကြောင်း၊ အဲဒီလို အကြမ်းဖက်မှုတွေကို နိုင်ငံသားတာဝန်သိစိတ်အပြည့်နဲ့ ဖီဆန်ကာ ပြည်သူတွေနဲ့ လာရောက်ပူးပေါင်းလိုသူတွေကို နွေးထွေးစွာ ကြိုဆိုကြောင်း ချင်း CDF စက်တင်ဘာ ၁၆ ရက်စွဲနဲ့ သဘောထားထုတ်ပြန် ထားတာပါ။

ချင်းပြည်နယ်မှာတော့ အကြမ်းဖက်အာဏာသိမ်းစစ်ကောင်စီတပ်တွေနဲ့ ဒေသခံ ပြည်သူ့ ကာကွယ်ရေးတပ်ဖွဲ့တွေကြား တိုက်ပွဲတွေစတင်ခဲ့တာ လနဲ့ချီကြာမြင့်နေခဲ့ပြီ ဖြစ်ကာ တိုက်ပွဲတွေ ကြောင့် ဒေသခံတွေ ထောင်သောင်းချီ နေရပ်စွန့်ခွာထွက်ပြေးတိမ်းရှောင်နေကြရတယ်လို့ သိရပါတယ်။

မြန်မာနိုင်ငံမှာ ဖေဖော်ဝါရီ ၁ ရက်ကစပြီး အကြမ်းဖက်စစ်အုပ်စုက မတရား အာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၇ လခွဲကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီး ထောင်ချခံရသူတွေလည်းရှိခဲ့ပြီး နိုင်ငံတဝန်း တောရောမြို့ပါမကျန် ဒေသခံပြည်သူ့ကာကွယ်ရေး တပ်တွေနဲ့ စစ်ကောင်စီတပ်တွေကြား တိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ)ရဲ့ ထုတ်ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံး ပြည်သူ ၁၁၀၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၈,၀၀၀ ကျော် ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ် စတင်ကြောင်းနဲ့ မင်းအောင်လှိုင်ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာခဲ့ပါတယ်။

1 hour Ago

ချင်းမိုင်တွင် အခြေခံလူတန်းစား ၂ ဦး ထိုင်းထီပထမဆုများ အသီးသီးဆွတ်ခူး

စက်တင်ဘာ ၁၆ ရက်က ထွက်သွားတဲ့ ထိုင်းထီပေါက်စဉ် ပထမဆု ပေါက်ဂဏန်းနံပါတ် ၀၇၀၉၃၅ မှာ ထိုင်းမြောက်ပိုင်း ချင်းမိုင်ခရိုင်မှာနေတဲ့ ဆိုင်ရောင်းအကူ အမျိုးသမီး ၁ ဦးနဲ့  ကျောင်းထိုင်ဆရာတော်ရဲ့ ယာဉ်မောင်းသမား ၁ ဦးတို့ ကံထူးစွာ ၅ စောင် ( ဘတ်သန်းပေါင်း ၃၀ ) နဲ့ ၂ စောင် ( ဘတ် ၁၂ သန်း ) စီ ဆွတ်ခူးသွားပါတယ်။ 

ပထမဆု ၅ စောင် ( ဘတ်သန်းပေါင်း ၃၀ ) ပေါက်သူမှာ ချင်းမိုင်ခရိုင်၊ ဆန်ကမ်ဖဲန်းမြို့နယ်၊ ပါဖိုင်ရပ်ကွက်က အမျိုးသမီးတစ်ဦးဖြစ်ပြီး သူဟာ မှန်ရောင်းတဲ့ဆိုင်မှာ ဈေးရောင်းကူနေသူ တစ်ဦးဖြစ်တယ်လို့ဆိုပါတယ်။

သူဟာအဆိုပါထီလက်မှတ်တွေကို ပါဖိုင်ဈေးရှေ့ ထီဆိုင်တစ်ဆိုင်ကနေ ထီပေါက်စဉ် မထွက်ခင် နာရီပိုင်းအလိုမှာမှဝယ်ယူသွားတာလို့ ထီဆိုင်ပိုင်ရှင်က ထိုင်းရတ်သတင်းထောက်ကို ပြောပါတယ်။ 

သတင်းထောက်တွေက သူ့ကို အင်တာဗျူးဖို့ ထီပေါက်သတင်းပို့မယ့် ဆန်ကမ်ဖဲန်းရဲ စခန်းရှေ့မှာ သွားစောင့်ဆိုင်းခဲ့ကြပေမယ့် ဆွေမျိုးတသိုက်နဲ့ အချိန်အတော်ကြာ ပျော်မဆုံးဖြစ်နေ ကြတာကြောင့် မဗျူးဘဲပြန်လာခဲ့ကြရတယ်လို့ ဆိုပါတယ်။ 

Cm.108 သတင်းကဆက်သွယ်မေးမြန်းရာမှာတော့ သူဟာ အဆိုပါ ထီကို ၂ လုံး - ၃ လုံးလောက် ပေါက်ဖို့  မျှော်လင့်ချက်နဲ့ ထိုးခဲ့တာသာဖြစ်ကြောင်း၊ မမျှော်လင့်ဘဲ ပထမဆု ၅ စောင်လုံး ပေါက်တော့ မျက်ရည်ကျအောင်ဝမ်းသာလုံးဆို့ခဲ့ကြောင်း ၊ ထီပေါက်တဲ့ငွေတွေနဲ့ ပထမဆုံး အကြွေးတွေအကုန်ဆပ်ကာ စီးပွါးရေးရင်းနှီးမြှုပ်နှံမယ်လို့ ဖြေကြားသွားပါတယ်။ 

ချင်းမိုင်က နောက်ထပ်ကံထူးသူတစ်ဦးမှာ ဖရောဝ့်မြို့နယ် မဲ့ဝဲန့်ရွာမှာနေထိုင်သူ အသက် ၃၃ နှစ်ရွယ်ရှိ နိုင်းပရကိုင်း ဆောဝ်ခမ်း ဆိုသူဖြစ်ပါတယ်။ သူကတော့ ဝပ်မဲ့ဟယ် ကျောင်းတိုက်မှ ကျောင်းထိုင်ဆရာတော်ရဲ့ ယာဉ်မောင်းသမားဖြစ်ပြီး ထီ ၄ စောင်ဝယ်တဲ့ထဲမှာ ၂ စောင်ပထမဆုပေါက်တာဖြစ်ကြောင်း ၊ ထီပေါက်ငွေတွေ မိခင်ကိုပေးမှာဖြစ်ပြီး ကျန်တာကို အမေအတွက် အိမ်ဆောက်ပေးကာ မိသားတစ်စုလုံး အဲဒီအိမ်မှာ ပျော်ရွှင်စွာနေထိုင်ပြီး ငွေကိုခြိုးခြံသုံးစွဲသွားမယ်လို့ ထိုင်းရတ်သတင်းထောက်ကို ပြောပါတယ်။ 

ကိုးကား -  ထိုင်းရတ်သတင်း

1 hour Ago

D-Day ကြေညာပြီး တပတ်အတွင်း စစ်ကောင်စီတပ်သား ၁၉၀ ကျော် သေဆုံး

D-Day ကြေညာပြီး တပတ်အတွင်း တိုက်ပွဲတွေနဲ့ ပဋိပက္ခဖြစ်စဉ်တွေကြောင့် စစ် ကောင်စီတပ်သား ၁၉၂ ယောက်သေဆုံးပြီး ထိခိုက်ဒဏ်ရာရရှိသူ ၆၈ ယောက်ထိ ရှိခဲ့တယ်လို့ အမျိုးသားညီညွတ်ရေးအစိုးရ(NUG)ရဲ့ ကာကွယ်ရေးဝန်ကြီးဌာနက ထုတ်ပြန်ပါတယ်။

ဒါ့အပြင် တိုင်းပြည်တည်ငြိမ်အေးချမ်းမှုကို အထူးလိုလားတဲ့ တပ်မတော်သားတွေနဲ့ ရဲတွေအနေနဲ့လူတစ်စုကိုသာ ကြီးပွားချမ်းသာစေပြီး လူအများစုရဲ့ ဘဝနဲ့ အနာဂတ် မရှိတဲ့ အခြေအနေတွေ ဖြစ်ပေါ်စေတဲ့ အဖွဲ့အစည်းအောက်က ရုန်းထွက်ပြီး ပြည်သူ့ရင်ခွင် အမြန်ဆုံးခိုလှုံကြဖို့လည်း ကာကွယ်ရေးဝန်ကြီးဌာနက တိုက်တွန်းထားပါတယ်။

မြန်မာနိုင်ငံမှာ ဖေဖော်ဝါရီ ၁ ရက်က စတင်ကာ အကြမ်းဖက်စစ်ကောင်စီက နိုင်ငံတော် အာဏာကို သိမ်းယူခဲ့တဲ့ ကာလဟာ ၇ လခွဲကျော် ကြာမြင့်ခဲ့ပြီ ဖြစ်ပါတယ်။

ပြီးခဲ့တဲ့ စက်တင်ဘာ ၇ ရက်မှာတော့ စစ်အာဏာရှင်ဆန့်ကျင်ရေး ခုခံ တွန်းလှန် စစ် စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက်စစ်အုပ်ချုပ်ရေးကို လှည်း နေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ အမျိုးသားညီညွတ်ရေးအစိုးရ (NUG)က ကြေညာထားပါတယ်။

PDF တပ်ဖွဲ့တွေအနေနဲ့ စစ်အာဏာရှင်နဲ့ ဒေါက်တိုင်အဖွဲ့စည်းတွေကို တိုက်ခိုက်ချေမှုန်းကြဖို့၊ ပြည်သူလူထုအနေနဲ့ မလိုအပ်ပဲ ခရီးမသွားဘဲ တစ်ဦးချင်းလုံခြုံမှုကို အထူး ဂရုစိုက်ဖို့၊ လိုအပ်မယ့် ရိက္ခာဆေးဝါးတွေကို စုဆောင်းထားကြဖို့၊ တိုင်းရင်းသား လက်နက်ကိုင် တော်လှန်ရေးတပ်ဖွဲ့ အားလုံးကလည်း အကြမ်းဖက်စစ်အုပ်စုကို ချက်ချင်း တိုက်ခိုက်သွားကြဖို့၊ စစ်အာဏာရှင်အုပ်ချုပ်ရေးကို ပြည်သူ့အားနဲ့ တိုက်ဖျက်ကြဖို့လည်း ယာယီသမ္မတ ဒူဝါလရှီးလက ပြောပါတယ်။

1 hour Ago

မော်လမြိုင်တွင် ဗုံး ၂ လုံး ဆက်ပေါက်ကွဲ

မွန်ပြည်နယ်၊ မော်လမြိုင် ကမ်းနားလမ်း Strand Walking Street အနီးမှာ စက်တင်ဘာ ၁၇ ရက် မနက်ပိုင်းမှာ ဗုံး ၂ လုံး ဆက်တိုက် ပေါက်ကွဲခဲ့တယ်လို့ ဒေသခံတွေက ပြောပါတယ်။

အဲဒီဗုံးတွေဟာ မနက် ၈ နာရီခွဲနဲ့ မနက် ၉ နာရီခွဲလောက်မှာ လူမနေတဲ့ ခြံဝင်းထဲက ညောင်ပင်အောက်မှာ ဆက်တိုက်ပေါက်ကွဲခဲ့တာ ဖြစ်ပါတယ်။

အခုဗုံးပေါက်ကွဲမှုဟာ အသံဗုံးပေါက်ကွဲခြင်းသာ ဖြစ်တယ်လို့ ရဲအရာရှိ တစ်ဦးက ပြောပါတယ်။

ဗုံးပေါက်ကွဲတာကြောင့်  လူထိခိုက်ဒဏ်ရာရတာ မရှိပေမဲ့ ဒုတိယ ဗုံးပေါက်ကွဲမှုမှာတော့ မီးခိုတွေပါ ထွက်လာတယ်လို့ ဗုံးပေါက်ကွဲမှုအနီး နေထိုင်သူတွေက ဆိုကြပါတယ်။

ဗုံးပေါက်ကွဲမှု ဖြစ်ပွားပြီးနောက် စစ်ကောင်စီရဲ့ လုံခြုံရေးတပ်ဖွဲ့ဝင်တွေ လာရောက်စစ်ဆေးသွား ပါတယ်။

မော်လမြိုင်ကမ်းနားလမ်းဟာ စစ်တပ်အာဏာသိမ်းပြီးနောက် စစ်ကောင်စီတပ်ဖွဲ့တွေ အမြဲလို လုံခြုံရေးယူနေပြီး ပိတ်ဆို့စစ်ဆေးတာတွေ ဆက်တိုက်လုပ်ဆောင်နေတဲ့ နေရာတစ်ခု ဖြစ်ပါတယ်။

1 hour Ago

မတူပီမြို့တွင် အချင်းချင်းပစ်ခတ်ပြီး ဒုတပ်ရင်းမှူးအဆင့်ရှိ ဗိုလ်မှူး ၁ ဦးသေဆုံး

ချင်းပြည်နယ်၊ မတူပီမြို့မှာတပ်စွဲထားတဲ့ အနောက်မြောက်တိုင်းစစ်ဌာနချုပ် လက်အောက်ခံ ကသာအခြေစိုက် ခြေမြန်တပ်ရင်း ခမရ (၃၀၉) က အရာရှိဗိုလ်မှူးတစ်ယောက်နဲ့ စစ်သည်တစ်ယောက်တို့  စက်တင်ဘာလ ၁၆ ရက် ည ၁၂ နာရီလောက်မှာ အချေအတင်စကားများပြီး သေနတ်ပစ်ခတ်မှုဖြစ်ပွားကာ ဒုတပ်ရင်းမှူးအဆင့်ရှိ ဗိုလ်မှူးသေဆုံးသွားခဲ့ပါတယ်။

နေရာမှာတင်သေဆုံးသွားခဲ့တဲ့ ခမရ ၃၀၉ ဒုတပ်ရင်းမှူးအလောင်းကို မတူပီမြို့နယ်ဆေးရုံမှာ ထားရှိတယ်လို့ တပ်တွင်း သတင်းအရင်းအမြစ်တွေက ဒီဗွီဘီ သတင်းဌာနကို ပြောပါတယ်။ 

ဒုတပ်ရင်းမှူးက အဲဒီမြို့နယ်က တော်လှန်ရေးအဖွဲ့တွေကို စစ်ဆင်ရေးထွက်ခိုင်းတဲ့အခါမှာ စစ်သည်က မတိုက်ခိုက်လိုကြောင်းပြောရာကနေ စကားများပြီး  အခုလို ပစ်ခတ်မှုဖြစ်ပွားခဲ့တာလို့ဆိုပါတယ်။

2 hours Ago

မိုင်ဂျာယာန်စစ်ရှောင်စခန်းသို့ ဆေး(၁)ကျောင်းသားသမဂ္ဂက ငွေကျပ်သိန်း ၂၀ လှူဒါန်း

ဆေးတက္ကသိုလ်(၁) ကျောင်းသားသမဂ္ဂက ကချင်ပြည်နယ်၊ မိုင်ဂျာယာန်မြို့ စစ်ဘေးရှောင်စခန်းကို ငွေကျပ်သိန်း ၂၀ ထောက်ပံ့လှူဒါန်းခဲ့တယ်လို့ သိရပါတယ်။

ဒီလှူဒါန်းမှုကိုတော့ Concern, Care and Contribute to the IDPs (CCC)နဲ့ ချိတ် ဆက်ပြီး မိုင်ဂျာယာန်မြို့၊ Kachin IDP Camp မှ Covid-19 response team အတွက် ထောက်ပံ့လှူဒါန်းခဲ့တာလို့ ဆိုပါတယ်။

ပြည်သူတစ်ဦးချင်းစီရဲ့ စုပေါင်းအားနဲ့သာ ခုလိုကူညီထောက်ပံ့နိုင်တာမို့ နောက် နောင် ဆောင်ရွက်ရန်ရှိတဲ့ လုပ်ငန်းတွေမှာလည်း ဆက်လက်ကူညီလှူဒါန်းပေးကြဖို့  ဆေးတက္ကသိုလ်(၁) ကျောင်းသားသမဂ္ဂက မေတ္တာရပ်ခံထားပါတယ်။

မြန်မာနိုင်ငံမှာ အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၇ လခွဲကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေခဲ့တာ ဖြစ်ပါတယ်။

အမျိုးသားညီညွတ်ရေးအစိုးရ (NUG)က ထုတ်ပြန်တဲ့ ကိုဗစ်-၁၉ ရောဂါဖြစ်ပွားမှုဆိုင်ရာ စစ်တမ်းမှာတွေ့ရှိရတဲ့ အထောက်အထားတွေအရ ဆေးရုံမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက်ရောက်နိုင်တာ၊ အွန်လိုင်းကသာ ကုသမှုခံယူနေကြရတာ၊ စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာ စတဲ့အချက်တွေဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှု လုပ်ငန်းတွေမှာ မှားယွင်းညံ့ဖျင်းစွာ စီမံနေတယ်လို့ သုံးသပ်ထားပါတယ်။

ဒါ့အပြင် ကိုဗစ်-၁၉ တတိယလှိုင်းကာလမှာ သေဆုံးသူတွေရဲ့ ၇၃ ရာခိုင်နှုန်းက လိုအပ်တဲ့ ဆေးရုံတွေမှာ တက်ရောက်ကုသခွင့်မရဘဲ နေအိမ်တွေမှာ သေဆုံးခဲ့ကြတယ်လို့ ဖော်ပြပါတယ်။

       ဒါ့အပြင် ဒီကာလတွေအတွင်း စစ်ကောင်စီတပ်တွေ အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူတွေနဲ့အတူ နိုင်ငံအဝန်း တောရော မြို့ပါမကျန် ဒေသခံပြည်သူ့ကာကွယ်ရေးတပ်တွေနဲ့ စစ်ကောင်စီတပ်တွေကြား တိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ် ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ် မှုကြောင့် အပြစ်မဲ့ကျဆုံးပြည်သူ ၁၁၀၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၈,၀၀၀ ကျော် ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားပါတယ်။

2 hours Ago

မြန်မာစစ်ခေါင်းဆောင်တွေရဲ့ မိသားစုတွေ ငွေရပေါက် ဘယ်လိုဖန်တီးနေသလဲ (အပိုင်း- ၂ )

တပ်မိသားစုအကြောင်း

တိုင်းပြည်ရဲ့စီးပွားရေးမှာ ကြီးမားတဲ့အစိတ်အပိုင်းတွေကို မြန်မာစစ်တပ်က ကာလကြာရှည်စွာ ထိမ်းချုပ်ထားခဲ့တာပါ။ အထူးသဖြင့်ရေနံ၊ သဘာဝဓာတ်ငွေ့၊ကြေးနီနဲ့ ကျောက်စိမ်းကဲ့သို့ ထုတ်ယူရတဲ့ သဘာဝသယံဇာတတွေကို ချုပ်ကိုင်ထားပါတယ်။ ကုလသမဂ္ဂ အချက်အလက်ရှာဖွေရေးမစ်ရှင်ရဲ့ ၂၀၁၉ ခုနှစ်မှာထုတ်ပြန်တဲ့ အစီရင်ခံစာအရ၊ တပ်မတော်ဟာ ကြည်းတပ်စစ်ခေါင်းဆောင် အဆက်ဆက်လက်ထက်မှာ အရပ်သားတွေထိန်းချုပ်မှု အပြင်ဘက်က စီးပွားရေးအကျိုးအမြတ်တွေနဲ့ ကန်ထရိုက်တွေကိုအထူးအခွင့်အရေးပေးပြီး လုပ်ဆောင်ဖို့ ခရိုနီကုမ္ပဏီကွန်ရက်တခုကို ထူထောင်ထားရှိကြောင်းသိရပါတယ်။ ဒေသခံကုမ္ပဏီ မှတ်တမ်းတွေက အတည်ပြုထားပြီးပွင့်လင်းတဲ့ကုမ္ပဏီတွေရဲ့ အချက်အလက်တွေအ အာဏာသိမ်းခေါင်းဆောင်တွေရဲ့ မိသားစုတွေဟာ စီးပွားကဏ္ဍအသီးသီးမှာ ပါဝင်ပတ်သက်မှု အတိုင်းအတာ များစွာရှိနေကြောင်းလည်း ပြသနေပါတယ်။ နိုင်ငံတော်စီမံအုပ်ချုပ်မှုကောင်စီလို့  ခေါ်တဲ့ စစ်အစိုးရအဖွဲ့ဝင်လေးယောက်ရဲ့ သားသမီးတွေနဲ့ သူတို့ရဲ့အိမ်ထောင်ဘက်တွေက ကုမ္ပဏီ ၂၇ ခုပိုင်ဆိုင်ထားကြောင်း ရိုက်တာက ရှာဖွေတွေ့ရှိထားပါတယ်။  အဲဒီစီးပွားရေး လုပ်ငန်းတွေကတော့ ဆောက်လုပ်ရေးမှအစ၊ ဆေးကုမ္ပဏီအလယ်၊ ဖျော်ဖြေရေးလုပ်ငန်းတွေ အဆုံး အမျိုးမျိုးရှိနေတာပါ။

ဗြိတိန်နိုင်ငံဆိုင်ရာ မြန်မာသံအမတ်ဟောင်းတဦးဖြစ်သူ လေထီးခုန်စစ်သည်တဦးဖြစ်ခဲ့တယ်လို့ ပြောတဲ့ ဦးကျော်စွာမင်းက “ဗိုလ်ချုပ်တွေဟာ သူတို့ရဲ့ကိုယ်ပိုင်အကျိုးစီးပွား၊ ပိုင်ဆိုင်မှုတွေနဲ့ ဓနဥစ္စာတွေကိုသာ ကာကွယ်နေကြောင်း အားလုံးကသိကြပါတယ်”လို့ ရိုက်တာနဲ့ တွေ့ဆုံမေးမြန်းခန်းတခုမှာဖြေကြားခဲ့ပါတယ်။ ဖေဖေါ်ဝါရီလ ၁ ရက်နေ့မှာ ဖမ်းဆီးခံရတဲ့ ဒေါ်အောင်ဆန်းစုကြည်ကို ပြန်လွှတ်ပေးဖို့တောင်းဆိုခဲ့လို့ သူ့ကိုရာထူးမှဖယ်ရှားခဲ့ပြီး သူဟာ ဗြိတိန်မှာပဲနေထိုင်နေပါတယ်။

လက်ရှိ ကာကွယ်ရေးဦးစီးချုပ်ဖြစ်သူ မင်းအောင်လှိုင်ရဲ့သားသမီးတွေကလည်းပဲ အစိုးရထံက စီးပွားရေးအထူးအခွင့်အရေးတွေကို ရရှိထားပါတယ်။ စစ်တပ်ကို ပေးပို့တဲ့ မေးခွန်းတွေကိုတော့ မင်းအောင်လှိုင်က  ပြန်လည်ဖြေကြားခြင်းမရှိခဲ့ပါဘူး။

ပုညှက်ညှက်မျက်မှန်တပ်ထားတဲ့ အသက် ၆၅ နှစ်ဝန်းကျင်မင်းအောင်လှိုင်ဟာ သူ့ရဲ့ရာထူးရာခံကို လူ့အခွင့်အရေးအဖွဲ့တွေပြောသလို တိုင်းရင်းသားကျေးရွာတွေမှာစစ်တပ်ကရမ်းကားစွာ အုပ်စုလိုက် မုဒိမ်းကျင့်သတ်ဖြတ်မှုတွေ ကျူးလွန်ထားတဲ့ဆက်တိုက် စစ်ဆင်ရေးပေါင်းများစွာက နေရရှိထားတာပါ။ စစ်တပ်ရဲ့ခေါင်းဆောင်ရာထူးခန့်အပ်ခံရပြီးနောက်မှာတော့ စစ်တပ်က တိုင်းရင်းသားလူနည်းစုတွေအပေါ် ယုတ်မာရက်စက်စွာ သတ်ဖြတ်ဖိနှိပ်မှုတွေကို ငြင်းဆိုထားပါတယ်။

အာဏာရှင်ဟောင်း စစ်ခေါင်းဆောင်သန်းရွှေက သူ့ကိုလက်သပ်မွေးထားခဲ့ပြီး ၂၀၁၁ ခုနှစ်မှာ သူ့အထက်က ရာထူးကြီးသူတွေကိုကျော်ပြီး စစ်ခေါင်းဆောင်အဖြစ်ရွေးချယ်ခံခဲ့ရတာပါ။ ၂၀၁၇ ခုနှစ်မှာ ရာပေါင်းထောင်ပေါင်းများစွာသော ရိုဟင်ဂျာတွေကို မြန်မာနိုင်ငံက မောင်းထုတ်ရာမှာ မင်းအောင်လှိုင်က ကြီးကြပ်ကွပ်ကဲခဲ့ပါတယ်။

မြန်မာနိုင်ငံအတွင်း စီးပွားရေးကွဲပြားနေမှုတွေနဲ့ပတ်သက်ပြီး ချမ်းသာသူနဲ့ဆင်းရဲသူတွေကြား ကွာဟချက်ကို ကျဉ်းမြောင်းအောင်လုပ်ဖို့လိုကြောင်း မနှစ်ကသူ့ရဲ့မိန့်ခွန်းမှာ ထည့်သွင်းပြောကြားခဲ့ပါတယ်။

အာဏာသိမ်းပြီးခါစ နှစ်ဆန်းပိုင်းမှာတော့ သူ့ရဲ့သားသမီးတွေရနေတဲ့ စီးပွားရေးအကျိုးအမြတ်တွေကို မီးမောင်းထိုးပြပြီး  အမေရိကန်ပြည်ထောင်စုက နာမည်ပျက်စာရင်းသွင်းထားခဲ့ပါတယ်။ အမေရိကန်ဘဏ္ဍာရေးဌာနရဲ့အဆိုအရ   မင်းအောင်လှိုင်ရဲ့သား အောင်ပြည့်စုံဟာ ကာလပေါက်ဈေးရဲ့ ၁ ရာခိုင်နှုန်းထက်နည်းတဲ့ဈေးနဲ့ စားသောက်ဆိုင်အသစ်တခုဖွင့်ဖို့ မြေငှားရမ်းခွင့်ရရှိထားခဲ့တယ်လို့သိရပါတယ်။ မင်းအောင်လှိုင်ရဲ့သမီး ခင်သီရိသက်မွန်ကလည်း ရိုက်တာသတင်းဌာနကမြင်ခဲ့ရတဲ့ မြန်မာ့ရင်းနှီးမြုပ်နှံမှုကော်မရှင်ရဲ့ ပေါက်ကြားလာတဲ့ မှတ်တမ်းဖိုင်တွေအရ မိုဘိုင်းဖုန်းဆက်သွယ်ရေးတာဝါတိုင်တွေကို စစ်တပ်ပိုင်ဆက်သွယ်ရေးကုမ္ပဏီသို့ ပေးသွင်းရမယ့်  စီးပွားရေးလုပ်ငန်းကို အခိုင်အမာရရှိထားကြောင်းသိရပါတယ်။ အောင်ပြည့်စုံနဲ့ ခင်သီရိသက်မွန်တို့ကတော့ ရိုက်တာရဲ့မေးခွန်းတွေကို ပြန်လည်ဖြေကြားခြင်းမရှိခဲ့ပါဘူး။ စစ်ကောင်စီ ပြောရေးဆိုခွင့်ရှိသူကလည်း အဆိုပါအကြောင်းအရာနဲ့ပတ်သက်လို့ ပြန်လည်ဖြေကြားတာ မရှိခဲ့ပါဘူး။

ကြီးထွားလာခြင်း

လေတပ်ဦးစီးချုပ်မောင်မောင်ကျော်ဟာ စစ်တပ်အကြီးအကဲမိသားစုကနေ  ၁၉၆၄ ခုနှစ် ဇူလိုင်လမှာမွေးဖွားခဲ့သူပါ။ သူ့ဖခင်ကတော့ စစ်အာဏာရှင်နေဝင်းလက်ထက်မှာ စစ်သားငယ်လေးအဖြစ်ကနေ တိုက်ရင်းခိုက်ရင်း ၁၉၇၆ ခုနှစ်မှာ ကာကွယ်ရေးဦးစီးချုပ်ဖြစ်လာခဲ့ သူကျော်ထင်ပဲ ဖြစ်ပါတယ်။

မောင်မောင်ကျော်ဟာသူ့ဖခင်အလိုအတိုင်း စစ်တပ်ထဲဝင်ခဲ့ပြီး တိုက်လေယဉ်မောင်းပိုင်းလော့အဖြစ် အမှုထမ်းခဲ့ပါတယ်လို့ သူ့မိသားစုနဲ့ရင်းနှီးသူ ဗြိတိန်သံအမတ်ဟောင်း ဦးကျော်စွာမင်းက ပြောပါတယ်။ သူဟာစစ်တပ်နောက်ခံအသိုင်းအဝိုင်းကြီးမားလို့ ရာထူးတက်လာတာလို့ ဗြိတိန်သံအမတ်ဟောင်းက ဆိုပါတယ်။

သူလေတပ်ဦးစီးချုပ်ဖြစ်လာပြီး ၂၀၁၈ ခုနှစ်မှာ ရုရှားနိုင်ငံကိုသွားရောက်ခဲ့ပြီး ဆူခွိုင်လေယာဉ်တွေကို တွဲဖက်မောင်းနှင်ခဲ့ကြောင်း ရုရှားသတင်းအေဂျင်စီတာ့စ်က ရေးသားခဲ့ပါတယ်။ မြန်မာနိုင်ငံကလေယာဉ်ခြောက်စင်းဝယ်ဖို့ စီစဉ်ထားတယ်လို့လည်း အေဂျင်စီက ဆိုပါတယ်။

မောင်မောင်ကျော်ဟာ သူ့ရဲ့သားသမီးတွေကို စစ်ခေါင်းဆောင်တွေအတွက်ထားတဲ့ ရန်ကုန်ရှိ သီးသန့်ရပ်ကွက်မှာ ကြီးပြင်းစေခဲ့ပါတယ်။ လမ်းအပေါက်အပြဲတွေ တလျှောက် ဇိမ်ခံကားတွေ မောင်းနှင်ရာ၊ ဂိတ်တံခါးတွေ သံဆူးကြိုးဝိုင်ယာတွေကာရံထားတဲ့ ခြံစည်းရိုးနဲ့ အစောင့်အရှောက်တွေရှိရာခေတ်မှီပြီးရှေးဆန်တဲ့ ခြံဝင်းတွေအတွင်းနေထိုင်တဲ့ လူကုံထံတွေရှိရာရ ရွှေတောင်ကြားအရပ်ကို သူ့ညီကိုခေါ်ပြီး ရောက်လာတတ်တယ်လို့ လေချုပ်သားဖြစ်သူ အိုင်ဗင်ထက်ရဲ့ ကျောင်းနေဖက်တွေက ပြောပါတယ်။

သူတို့နှစ်ယောက်ကို လူကုံထံတွေနေတဲ့ကျောင်းမှာထားပြီး ညနေဘက် အင်္ဂလိပ်စာအတန်းကို တက်ရောက်ကာ ပုဂ္ဂလိက-ကလပ်မှာရေကူးတယ်လို့ ကျောင်းနေဘက်တဦးက ဆိုပါတယ်။ မြန်မာပြည်ကပြီးတော့ စင်ကာပူမှာကောလိပ်သွားတက်တဲ့အခါ ခမ်းနားတဲ့ကွန်ဒိုမီနီယံမှာ နေခဲ့ကြပါတယ်။

သူဟာ စင်ကာပူမှာနေစဉ်အချိန်မောင်မောင်ကျော်ရဲ့ အစ်မကြီးဖြစ်သူ သီတာမြင့်ရဲ့ သားသမီးတွေဖြစ်တဲ့ ဝမ်းကွဲမောင်နှမ လင်းထက်၊ မွန်ရည်တို့နဲ့အတူ အချိန်ကုန်လွန်ခဲ့တာပါ။ သီတာမြင့်နဲ့ သူ့ခင်ပွန်းတို့ဟာ လေကြောင်းဆိုင်ရာပစ္စည်းတွေပေးသွင်းတဲ့ အယ်လ်တီအာ(LTR)လို့ခေါ်တဲ့ ကုမ္ပဏီကို ပိုင်ဆိုင်ထားပါတယ်။ ကုမ္ပဏီက စင်ကာပူနဲ့ မြန်မာမှာ လုပ်ငန်းတွေရှိပါတယ်။ သီတာမြင့်ကတော့ မှတ်ချက်ပေးဖို့တောင်းဆိုတာကို ပြန်လည်ဖြေကြားခြင်း မရှိခဲ့ပါဘူး။

လင်းထက်ဟာ ၂၀၁၂ ခုနှစ်မှာ အယ်လ်တီအာ(LTR) စင်ကာပူရဲ့ ဒါရိုက်တာတယောက်ဖြစ်လာခဲ့ပြီး ညီမဖြစ်သူ မွန်ရည်ဟာလည်း နောက်နှစ်အနည်းငယ်အကြာမှာ ဒါရိုက်တာတယောက် ဖြစ်လာခဲ့တယ်လို့ ကုမ္ပဏီမှတ်တမ်းတွေကဆိုပါတယ်။ ၂၀၁၄ခုနှစ်အတွင်းမှာတော့ လင်းထက်နဲ့ မိသားစုကုမ္ပဏီဟာ အမေရိကန်ထုတ်လေယာဉ်သစ်တွေကို ၁၉၆၂ ခုနှစ်ကတည်းက ဆိုရင် ပထမဆုံးမြန်မာနိုင်ငံကိုရောင်းချရာမှာ အရေးပါတဲ့ကုမ္ပဏီ ဖြစ်လာခဲ့တယ်လို့  အမေရိကန်အခြေစိုက် လေကြောင်း မဂ္ဂဇင်းတခုက ရေးထားပါတယ်။ မြန်မာ့လေကြောင်း(Myanmar Airways) နောက်ပိုင်း မြန်မာ့အမျိုးသားလေကြောင်းလိုင်း (Myanmar National Airlines) လို့ခေါ်ဆိုတဲ့လုပ်ငန်းကို ဆက်စနာတာဗိုအင်ဂျင်တပ် လေယာဉ်နှစ်စင်း ရောင်းချခဲ့ပါတယ်။ ဒီကိစ္စနဲ့ ပတ်သက်လို့ မြန်မာ့အမျိုးသားလေကြောင်းလိုင်းက မှတ်ချက်ပေးဖို့တောင်းဆိုတာကို အကြောင်းမပြန်ခဲ့ပါဘူး။

လင်းထက်တို့ မောင်နှမတွေဟာ လူကုံထံတွေရဲ့ကြွယ်ဝတဲ့နေထိုင်မှုပုံစံနဲ့ နေထိုင်ခဲ့ကြပါတယ်။ လင်းထက်ညီမ မွန်ရည်ရဲ့ ၂၀၁၃ ခုနှစ်က အင်စတာဂရန်ပို့စ်တခုမှာ ပြင်သစ်မှာ ညဘက်ကျင်းပတဲ့ ပါတီတခုအတွင်း တန်ဖိုးကြီးရှန်ပိန်ပုလင်းတွေထည့်ထားတဲ့ ဇလုံကြီးတခုကိုတွေ့ရပြီး သူငယ်ချင်းတွေနဲ့အတူ ပါတီပွဲကျင်းပနေတာတွေ့ရပါတယ်။ အဲဒီအချိန်ကာလပေါက်ဈေးအရ အဲဒီ ရှန်ပိန်တပုလင်းကို ယူရိုငွေ ၇၅၀ (အမေရိကန်ဒေါ်လာ ၉၀၀နီးပါး၊ မြန်မာငွေ ၁၀ သိန်းကျော် ) တန်ဖိုးရှိတယ်လို့သိရပါတယ်။

အိုင်ဗင်ထက်ရဲ့ အင်စတာဂရန်ပို့စ်တွေမှာလည်း သူနဲ့ သူ့ဝမ်းကွဲမောင်နှမတွေရဲ့ လူမှုဆက်ဆံရေးကိုပြတဲ့ ၂၀၁၈ ခုနှစ် ထိုင်းနိုင်ငံမြို့တော်ဘန်ကောက်က ပါတီတွေက အစ၊ နောက်တနှစ်မှာ စစ်တက္ကသိုလ်ရှိရာ ပြင်ဦးလွင်မြို့က ခမ်းနားလှတဲ့ ကိုလိုနီခေတ် စတိုင်ဟိုတယ်မှာ အနောက်တိုင်းဂါဝန်နဲ့ဝတ်စုံတွေဝတ်ပြီး ရှေးဟောင်းကားတွေနဲ့အတူ ရိုက်ထားတဲ့ဓာတ်ပုံတွေအဆုံး ဖေါ်ပြထားပါတယ်။

မွန်ရည်ကတော့ သူ့ရဲ့အင်စတာဂရန်ပေါ်က နေထိုင်မှုပုံစံတွေဟာ စစ်တပ်နဲ့ ပတ်သက်ဆက်နွှယ်တာလိုမျိုး တခုမှမရှိခဲ့ဘူးလို့ ရိုက်တာကိုပြောပါတယ်။

ဖြာထွက်နေသော အကိုင်းအခက်များ 

အိုင်ဗင်ထက်ဟာ ၂၀၁၂ ခုနှစ်ရန်ကုန်ကို မပြန်မီ၊ ဆောက်လုပ်ရေးပရောဂျက်စီမံခန့်ခွဲမှုပညာကို လေ့လာခဲ့ပါတယ်။ ဒီနောက် ရန်ကုန်ပြန်လာပြီး အိမ်ခြံမြေလုပ်ငန်းလုပ်ကိုင်နေတဲ့ ထိပ်တန်းသူဌေးကြီးတစ်ဦးနဲ့ တွဲဖက်လုပ်ဆောင်ခဲ့ပါတယ်။ သူ့ရဲ့ဇနီးလင်းလက်သီရိကိုတော့ ရန်ကုန်မြို့ဆင်ခြေဖုံးမှာ ဇိမ်ခံတိုက်ခန်းတွေဆောက်လုပ်တဲ့လုပ်ငန်း လုပ်ကိုင်ရင်း သိကျွမ်းရင်းနှီးခဲ့တာလို့ သူတို့ရဲ့မိတ်ဆွေတွေက ဆိုပါတယ်။ အင်တာနက်ပေါ်က အချက်အလက်တွေအရ လင်းလက်သီရိဟာအင်္ဂလန်နိုင်ငံရှိ ဘတ်တက္ကသိုလ်(Bath University) ကနေ ဗိသုကာဘွဲ့ရခဲ့တယ်လို့ သိရပါတယ်။

သူတို့နှစ်ယောက်ဟာ ဟိုတယ်တွေ၊ အခမ်းအနားဝန်ဆောင်မှုတွေနဲ့ ဗိသုကာကုမ္ပဏီတွေ တည်ထောင်ခဲ့ကြတယ်လို့ ကုမ္ပဏီမှတ်တမ်းတွေကဆိုထားပါတယ်။ အဲဒီထဲက မှတ်တမ်းတခုမှာတော့ စစ်ခေါင်းဆောင်မင်းအောင်လှိုင်ရဲ့သား အောင်ပြည့်စုံနဲ့ စီးပွားဖက်အဖြစ်တွဲဖက်ပိုင်ဆိုင်တဲ့ ကုမ္ပဏီကို ၂၀၂၀  ပြည့်နှစ် ဧပြီလထဲမှာ မှတ်ပုံတင်ခဲ့ကြောင်း ဖေါ်ပြထားပါတယ်။

တပ်မိသားစုတွေရဲ့သားသမီးတွေဟာ အချင်းချင်းကောင်းစွာချိတ်ဆက်ထားကြပြီး၊ နိုင်ငံရပ်ခြားမှာ ဘွဲ့တွေယူခဲ့ကြတယ်။ သူတို့ကချမ်းသားပြီးသားဖြစ်တာမို့ သူတို့အတွက်ဘွဲ့ပဲလိုတယ်။ နိုင်ငံခြားမှာ ဘွဲ့ယူတဲ့ အကြောင်းအရင်းကလည်း ချိတ်ဆက်မှုပိုအားကောင်းခြင်းဖြစ်တယ်လို့ အင်္ဂလန်နိုင်ငံရဲ့ အမတ်ဟောင်း ကျော်စွာမင်းက ပြောပါတယ်။

၂၀၁၇ ခုနှစ်မှာတော့ အိုင်ဗင်ထက်နဲ့ သူ့မိန်းမတို့ဟာ မီးထွန်းပွဲတော်ကို ကျင်းပခြင်းဖြင့် လူထုရှေ့မှောက်ကို ရောက်လာခဲ့ပါတယ်။ မတ်လမှာ သန်းနဲ့ချီတဲ့ မီးလုံးပေါင်းများစွာကို မီးပန်းဆိုင်းတွေအဖြစ် ပုံစံဖေါ်တဲ့ပြသပွဲမှာ ဒေသခံနိုင်ငံရေးသမားတွေလည်း တက်ရောက်ခဲ့ ပါတယ်။

၅ လ အကြာမှာတော့ စစ်တပ်က ရိုဟင်ဂျာတွေအပေါ်နှိပ်ကွပ်ဖြိုခွဲမှုတွေလုပ်ခဲ့လို့ ရာပေါင်း ထောင်ပေါင်းများစွာ အိမ်နီးချင်းဘင်္ဂလားဒေ့ရှ်နိုင်ငံဘက်သို့ ထွက်ပြေးခဲ့ကြပါတယ်။ စစ်တပ်က ရိုဟင်ဂျာတွေအပေါ်သတ်ဖြတ်၊ မုဒိမ်းကျင့်၊ နှိပ်စက်ညှဉ်းပန်းရုံအပြင် များပြားလှစွာသောအိမ်တွေကို မီးရှို့ခဲ့ကြောင်းမျက်မြင်သက်သေတွေက ဆိုထားပါတယ်။ ဒါကိုစစ်တပ်ကငြင်းဆိုထားပေမဲ့ ၊ ပထမဆုံးအတည်ပြုနိုင်တဲ့မှတ်တမ်းမှာ ရိုဟင်ဂျာအမျိုးသား ၁၀ ဦး ကို အစုလိုက်သတ်ဖြတ်ပြီ ကျင်းတူးကာ မြှုပ်နှံထားတာကိုတွေ့ရှိခဲ့တဲ့အကြောင်းကို ၂၀၁၈ ခုနှစ်အစောပိုင်းမှာ ရိုက်တာက ဖော်ထုတ်ထားပါတယ်။

ရိုဟင်ဂျာတွေဆက်လက်ပြီး ဘင်္ဂလားဒေ့ရှ်ဘက်ကိုထွက်ပြေးနေတုန်းမှာပဲ၊ ၂၀၁၇ ခုနှစ်နိုဝင်ဘာလမှာ လေတပ်ဦးစီးချုပ်မောင်မောင်ကျော်ရဲ့သား အိုင်ဗင်ထက်က သူ့ကုမ္ပဏီရဲ့ နောက်ထပ် မီးထွန်းပွဲတော်တခုကို ပုသိမ်မြို့မှာကျင်းပခဲ့ကြောင်း အခမ်းအနားကိုဖေါ်ပြထားတဲ့ ဖေ့စ်ဘွတ်စာမျက်နှာကနေ သိရပါတယ်။

၂၀၁၈ ခုနှစ်ဇန်နဝါရီလမှာ မောင်မောင်ကျော် လေတပ်ဦးစီးချုပ်အဖြစ်ခန့်အပ်ခံခဲ့ရပါတယ်။ လအနည်းငယ်အကြာမှာတော့ သူ့သားကုမ္ပဏီက နောက်ထပ်မီးထွန်းပွဲတော်တခုကို လက်ခံကျင်းပခဲ့ပါတယ်။ အဲဒါကတော့ တပ်မတော်နေ့အခမ်းအနားကျင်းပတာကို မီးပန်းဆိုင်းတွေနဲ့ အလှဆင်တာပါပဲ။ အဲဒီနှစ်ဒီဇင်ဘာလမှာပဲ လေချုပ်ရဲ့သားအိုင်ဗင်ထက်နဲ့ သူ့မိန်းမတို့ဟာ စစ်တပ်ဝင်းတခုအတွင်းရှိ ခန့်ညားထယ်ဝါလှတဲ့ခန်းမကြီးတခုမှာ လက်ထပ်ပွဲကျင်းပခဲ့ပါတယ်။ ရိုက်တာကတွေ့မြင်ခဲ့ရတဲ့ ဓာတ်ပုံတစ်ပုံမှာတော့ တပ်ချုပ်မင်းအောင်လှိုင်နဲ့ လင်မယားနှစ်ယောက်တွဲ ရိုက်ထားတာကို တွေ့ရပါတယ်။

၂၀၁၉ ခုနှစ်မှာတော့ အိုင်ဗင်ထက်ဟာ ပြည်သူ့ရှေ့ဆောင်ပါတီ (PPP) ဆိုတဲ့ နိုင်ငံရေးပါတီတခုမှာ အကြံပေးတယောက်ဖြစ်လာခဲ့ပါတယ်။ အဲဒီပါတီဟာ ဒေါ်အောင်ဆန်းစုကြည်ရဲ့ပါတက ထုတ်ပယ်ခံထားရသူတွေနဲ့ စစ်တပ်ထောက်ခံသူတွေပေါင်းပြီး ၂၀၂၀ ရွေးကောက်ပွဲမှာ ဝင်ရောက်ယှဉ်ပြိုင်ဖို့ တည်ထောင်ထားတာဖြစ်တယ်လို့ အိုင်ဗင်ထက်ရဲ့သူငယ်ချင်းတဦးကပြောပါ တယ်။ ပြည်သူ့ရှေ့ဆောင်ပါတီဝင်နှစ်ဦးကတော့ အိုင်ဗင်ထက်ရဲ့ပါတီနဲ့ပါဝင်ပတ်သက်မှုကို အတည်ပြုထားပြီး ဘယ်လိုကဏ္ဍမှာ လုပ်ဆောင်နေသလဲဆိုတာတော့ အတိအကျမသိရဘူးလို့ဆိုပါတယ်။ ပြည်သူ့ရှေ့ဆောင်ပါတီဟာ ရွေးကောက်ပွဲမှာအနိုင်မရခဲ့ပါဘူး။ အမတ်တနေရာလေးတောင် မဲ မရခဲ့ပါဘူး။

တချိန်တည်းမှာပဲ အိုင်ဗင်ထက်ရဲ့ ဇနီးလင်းလက်သီရိဟာ ကာကွယ်ရေးနဲ့လုံခြုံရေးဆိုင်ရာ အင်ဂျင်နီယာကဏ္ဍ ပူးပေါင်းဆောင်ရွက်ရေးဝန်ဆောင်မှု (Alliance Engineering Services) ကို ပူးတွဲထူထောင်ခဲ့ပြီး ကုမ္ပဏီရှယ်ရာ ၆၀ ရာခိုင်နှုန်းကို ပိုင်ဆိုင်ထားခဲ့ပါတယ်။ လင်းလက်သီရိဟာ ကုမ္ပဏီထူထောင်ပြီး လအနည်းငယ်အကြာ ၂၀၁၉ ခုနှစ်စက်တင်ဘာလမှာ ကုမ္ပဏီကနေ နုတ်ထွက်ပြီး ရှယ်ယာပိုင်ဆိုင်မှုလည်း မရှိတော့ပါဘူး။

ကုမ္ပဏီကိုတော့ ဝင်းမင်းဟိန်းဆိုသူက ဆက်လက်စီမံခန့်ခွဲနေခဲ့ကြောင်း ကုမ္ပဏီ မှတ်တမ်းတွေအပြင် ကန်ထရိုက်တာတဦးနဲ့ စီးပွားဖက်တဦးတို့ကို တွေ့ဆုံမေးမြန်းချက်အရ သိရပါတယ်။ ဝင်းမင်းဟိန်းဟာ အိုင်ဗင်ထက်နဲ့ စင်ကာပူမှာ ကျောင်းအတူတက်ခဲ့သူဖြစ်ကြောင်း သူ့ရဲ့ LinkIn Profileက ဖေါ်ပြထားပါတယ်။ သူကတော့မှတ်ချက် တစုံတရာပေးဖို့တောင်းဆိုတာကို အကြောင်းမပြန်ခဲ့ပါဘူး။

လေတပ်အတွက် ၂၀၁၉ ဘဏ္ဍာနှစ်အတွင်း နိုင်ငံခြားက စက်ကိရိယာဝယ်ယူတဲ့ အသုံးစားရိတ်က အမေရိကန်ဒေါ်လာသန်း ၃၆၀ ရှိပါတယ်။ ဒါဟာတခြားဌာနတွေထက်စာရင် အကြီးမားဆုံး အသုံးစားရိတ်ဖြစ်ပါတယ်။ ရေတပ်အသုံးစားရိတ်ရဲ့ နှစ်ဆဖြစ်ကြောင်း ရိုက်တာရဲ့ တရားဝင်အသုံးစားရိတ်သုံးသပ်မှု မှတ်တမ်းတွေက ဖေါ်ပြထားပါတယ်။ နိုင်ငံပိုင်မီဒီယာတွေက မင်းအောင်လှိုင်ဟာ လေတပ်ကိုအင်အားကြီးဖို့ ပထမဦးစားပေးအဆင့်သတ်မှတ်ထားတယ်လို့ ဖေါ်ပြထားကြပါတယ်။

လေတပ်အသုံးစားရိတ်ရဲ့ ကြီးမားတဲ့အစိတ်အပိုင်းတွေက လေယာဉ်အသစ်တွေဝယ်ရုံမျှမကပါဘူး၊ ရှိပြီးသားလေယာဉ်တွေကို အစိတ်အပိုင်းအသစ်တွေ အစားထိုးတပ်ဆင်တာလည်း ပါတယ်လို့ အသုံးစားရိတ်မှတ်တမ်းတွေက ဖေါ်ပြထားပါတယ်။ ရိုက်တာရဲ့ စစ်တပ်အ သုံးစားရိတ် လေ့လာဆန်းစစ်ချက်မှတ်တမ်းတွေအရ လေတပ်ရဲ့ ၂၀၂၀ ဘဏ္ဍာနှစ်အတွင်း နိုင်ငံခြားမှ ဝယ်ယူဖို့ အသုံးစားရိတ် အမေရိကန်ဒေါ်လာ ၃၇၇ သန်းရဲ့ သုံးပုံတပုံဟာ အပိုပစ္စည်းဝယ်ယူတာတွေနဲ့ ပြင်ဆင်စရိတ်တွေဖြစ်တယ်လို့ ဖေါ်ပြထားပါတယ်။ ဒါဟာလေယာဉ်အပိုပစ္စည်းတွေနဲ့ ပြုပြင်ထိန်းသိမ်းမှုတွေအပေါ် မြိုးမြိုးမြက်မြက် အမြတ်အစွန်းရစေဖို့ အကြောင်းဖန်လာတာဖြစ်ကြောင်း စစ်ပစ္စည်းပေးသွင်းသူ ကန်ထရိုက်တာတွေကပြောပါတယ်။

တခြားတိုက်လေယာဉ်တွေနဲ့အတူ ရုရှားဂျက်တိုက်လေယာဉ်တွေကိုဖေါ်ပြထားတဲ့ အင်ဂျင်နီယာကဏ္ဍ ပူးပေါင်းဆောင်ရွက်ရေးဝန်ဆောင်မှုကုမ္ပဏီရဲ့ အင်တာနက်စာမျက်နှာမှာ ကုမ္ပဏီရဲ့ ရည်မှန်းချက်ဟာ “အသစ်ပေါ်ထွက်လာမယ့် မြန်မာ့ကာကွယ်ရေး နဲ့ လုံခြုံရေးခေတ်သစ်ကဏ္ဍကိုဦးဆောင်ရန်” လို့ဖေါ်ပြထားပါတယ်။ ဒီရည်မှန်းချက်အတွက် လေယာဉ်တွေရဲ့ အရေးကြီးအစိတ်အပိုင်းတွေ ရရှိဖို့နဲ့ ပြုပြင်ထိန်းသိမ်းမှုကိုအ ထူးပြုထားခဲ့တာပါ။ ၂၀၁၉ နဲ့ ၂၀၂၁ ခုနှစ်တွေမှာ ရုရှားရဲ့လေယာဉ်ထုတ်လုပ်သူတွေက ထုတ်ကုန်ပစ္စည်းတွေကို နိုင်ငံရပ်ခြားက ဖေါက်သည်တွေကိုပြသတဲ့ မော်စကိုက MARKS INTERNATIONAL လေကြောင်းပြပွဲရဲ့ ပြသသူစာရင်းမှာ လေချုပ်မောင်မောင်ကျော်ရဲ့သား အိုင်ဗင်ထက်ရဲ့ ကုမ္ပဏီ ပါဝင်ခဲ့ပါတယ်။

ရိုက်တာက ၂၀၂၀ နိုဝင်ဘာလအတွင်းတွေ့မြင်ခဲ့တဲ့ အဆိုပါကုမ္ပဏီရဲ့ စာရွက်စာတမ်း တွေအရ ကုမ္ပဏီဟာ အစ္စရေးနိုင်ငံရဲ့ Elbit Systems ထုတ်လုပ်တဲ့ Skylark စစ်ဘက်သုံးဒရုန်းယာဉ်တွေကို ဝယ်ယူဖို့ကြိုးစားနေတယ်လို့သိရပါတယ်။ တပ်မတော်ဟာ တိုင်းရင်းသားလက်နက်ကိုင်တွေ နဲ့ တိုက်ခိုက်တဲ့စစ်ပွဲတွေမှာ ဒရုန်းယာဉ်တွေကို တိုးမြှင့်သုံးစွဲနေကြောင်း ပျက်ကျသွားတဲ့ Skylark   ဒရုန်းယာဉ်ရဲ့ဓာတ်ပုံကို ရခိုင်တိုင်းရင်းသားလက်နက်ကိုင်တွေက ၂၀၂၀ ပြည့်နှစ်အတွင်း ရိုက်ကူးဖေါ်ပြထားချက်အရသိရပါတယ်။

ရိုက်တာက အစ္စရေးကုမ္ပဏီကို မေးမြန်းတဲ့အခါမှာတော့ ၂၀၁၅ ခုနှစ်ကစပြီး မြန်မာနိုင်ငံကို သူတို့ထုတ်ကုန်တွေနဲ့ ဝန်ဆောင်မှုတွေ ပေးအပ်တာမရှိတော့ကြောင်း သူတို့မှာအဲဒီ ကုမ္ပဏီနဲ့ လုပ်ဆောင်ချက်တွေမရှိကြောင်း ဖြေကြားပါတယ်။

စင်ကာပူကမောင်နှမတွေ

စင်ကာပူဘက်ခြမ်းမှာတော့ လေချုပ်ရဲ့သား အိုင်ဗင်ထက်ရဲ့ ဝမ်းကွဲဖြစ်သူ လင်းထက်က မြန်မာ့လေကြောင်းကဏ္ဍကို ကုန်ပစ္စည်းထောက်ပံ့ပေးနေတဲ့ အရေးကြီးပုဂ္ဂိုလ်ဖြစ်လာပါတယ်။ လင်းထက်ဟာ သူတို့ကုမ္ပဏီ ( LTR) ရဲ့ပူးတွဲပိုင်ဆိုင်မှုအပြင်၊ Asian Aviation Resources  ဆိုတဲ့ တခြားစင်ကာပူကုမ္ပဏီတခုရဲ့ မြန်မာပြည်ဆိုင်ရာအကြီးအကဲလည်းဖြစ်လာပါတယ်။ အဲဒီ ကုမ္ပဏီရဲ့ အင်တာနက်စာမျက်နှာအရ၊ အဲဒီ ကုမ္ပဏီဟာ Textron Aviation ရဲ့ တရားဝင် အရောင်းကိုယ်စားလှယ်တဦးလည်း ဖြစ်ပါတယ်။

Asian Aviation Resources ကုမ္ပဏီရဲ့ အရာရှိတဦးကတော့ လင်းထက်ရဲ့ ပါဝင်ပတ်သက်မှုအပေါ် မှတ်ချက်ပေးဖို့ငြင်းဆိုခဲ့ပါတယ်။ ရိုက်တာက ဆက်သွယ်မေးမြန်းပြီးတဲ့နောက်မှာတော့ အဆိုပါကုမ္ပဏီက လင်းထက်ရဲ့အကြောင်းအရာတွေကို သူတို့အင်တာနက်စာမျက်နှာပေါ်က ပယ်ဖျက်ခဲ့ပါတယ်။

Textron Aviation ရဲ့ပြောရေးဆိုခွင့်ရှိသူ မေးနာ့ဒ်ကတော့ သူတို့ကုမ္ပဏီရဲ့ကြား ခံဆောင်ရွက်သူတွေနဲ့ တခြားပုဂ္ဂိုလ်တွေရဲ့လျှို့ဝှက်ချက်တွေကိုဖေါ်ပြမပေးနိုင်ဘူးလို့ဆိုပါတယ်။

၂၀၁၄ ခုနှစ်နဲ့ ၂၀၁၉ ခုနှစ်အကြားမှာ လင်းထက်ဟာ မြန်မာနိုင်ငံအတွက် လေယာဉ်ပျံတွေနဲ့ ရဟတ်ယာဉ်တွေကို သူ့ရဲ့မိသားစုကုမ္ပဏီကတဆင့် ပေးသွင်းခဲ့ကြောင်း မီဒီယာတွေရဲ့ ညွှန်းဆိုဖေါ်ပြမှုခံခဲ့ရပါတယ်။ ရဟတ်ယာဉ်တွေကို အရောင်းမြှင့်တင်ခဲ့သလို ၂၀၁၆ ခုနှစ်မှာ လင်းထက်က အမေရိကန်နဲ့ အီးယူတို့ရဲ့စီးပွားရေးပိတ်ဆို့ဒဏ်ခတ်မှုဟာ ပြဿနာမဟုတ်ဘူးလို့ ထောက်ပြခဲ့ပါတယ်။  “မြန်မာအစိုးရနဲ့ ပုဂ္ဂလိကကုမ္ပဏီတွေဟာ စီးပွားရေးပိတ်ဆို့ထားတဲ့ကြားက စင်္ကာပူကနေ  ဘဲလ်ရဟတ်ယာဉ်တွေကို အခက်အခဲမရှိပဲ လွယ်လွယ်ကူကူပဲ ဝယ်ယူနိုင်ခဲ့တယ်” လို့ မြန်မာတိုင်းသတင်းစာ ကိုပြောပြခဲ့ပါတယ်။ အဲဒီအချိန်တုန်းက ပိတ်ဆို့မှုတွေ ဖြေလျှော့ထားတာတောင်မှ နိုင်ငံခြားကုမ္ပဏီတွေက ပူပန်မှုရှိနေဆဲပါ။

လေကြောင်းအရာရှိ ဗေးလီရာဒ်နဲ့ ကန်ထရိုက် နှစ်ဦးအဆိုအရ လင်းထက်ဟာ စစ်သုံးပစ္စည်းတွေ ပေးသွင်းမှုမှာလည်းပဲ ပါဝင်နေခဲ့တယ်လို့သိရပါတယ်။ သူဟာမြန်မာစစ်တပ်ကို စစ်ပစ္စည်းတွေ ပေးသွင်းတဲ့ Aero Sofi နဲ့ အတူအလုပ်လုပ်ခဲ့ကြောင်း ကန်ထရိုက်တဦးနဲ့ စီးပွားဖက်တဦးတို့က ပြောထားပါတယ်။ Aero Sofi ဟာ ၂၀၂၀  ပြည့်နှစ်အတွင်း စစ်ဘက်ဆိုင်ရာ သယ်ယူပို့ဆောင်ရေးလေယာဉ် အဲဘတ်စ် စီ၂၉၅ နှစ်စီးကို ဂျော်ဒန်နိုင်ငံမှ အမေရိကန်ဒေါ်လာ ၃၈ ဒသမ ၆ သန်းနဲ့ ဝယ်ယူဖို့ကြိုးစားခဲ့ပါတယ်။ Aero Sofi ရဲ့စစ်လက်နက်ပစ္စည်းရောင်းဝယ်မှုမှာ ပါဝင်ပတ်သက်မှုကို “စုဖွဲ့ရာဇဝတ်မှုနဲ့လာဘ်စားမှုဆိုင်ရာသတင်းပေးပို့မှုစီမံချက်” က အရင်က အစီရင်ခံစာထုတ်ပြန်ထားပြီးဖြစ်ကြောင်း ပေါက်ကြားလာတဲ့ စစ်ရေးအသုံးစားရိတ် ရွက်စာတမ်းတွေကို ရိုက်တာကသုံးသပ်ထားပါတယ်။ သတင်းအေဂျင်စီကတော့ အရောင်းအဝယ် ဖြစ်သလား မဖြစ်သလားဆိုတာကို အတည်ပြုနိုင်ခြင်းမရှိခဲ့ပါဘူး။

Aero Sofi ကိုအရေးယူဖို့ တည်ဆောက်ထားတဲ့မှတ်တမ်းတွေထဲမှာ လင်းထက်ရဲ့ နာမည်မပါခဲ့ပေမဲ့၊ လူလုပ်ငန်းနဲ့ သူ့မိသားစုဟာ နီးနီးကပ်ကပ်ပါဝင်မှုရှိကြောင်း အထောက်အထားတွေ ရှိနေပါတယ်။ လင်းထက်ရဲ့  LTR ကုမ္ပဏီရဲ့ ဒုမန်နေဂျာ ဟိန်းထွဋ်ဝင်းဆိုသူဟာ အဲဒီအချိန်က Aero Sofi  ရဲ့ရှယ်ရာသုံးပုံတပုံ ပိုင်ဆိုင်တဲ့ပူးတွဲတည်ထောင်သူတဦးဖြစ်ကြောင်း ကုမ္ပဏီ မှတ်တမ်းတွေအရ သိရပါတယ်။ ဖုန်းနဲ့ဆက်သွယ်မေးမြန်းခဲ့ရာမှာတော့ သူဟာ Aero Sofi မှာ လုပ်ကိုင်ခြင်းမရှိတော့ကြောင်း ဟိန်းထွဋ်ဝင်းက ပြောခဲ့ပြီး နောက်ထပ်မေးခွန်းတွေကို ဖြေကြားဖို့ ငြင်းဆန်ခဲ့ပါတယ်။ Aero Sofi  အေရိုဆိုဖီကလည်း မှတ်ချက်ပေးဖို့တောင်းဆိုတာကို ပြန်လည်ဖြေကြားခြင်းမရှိခဲ့ပါဘူး။

လင်းထက်ရဲ့ညီမ  မွန်ရည်ကလည်းပဲ မြန်မာစစ်တပ်ကို ပစ္စည်းပေးသွင်းနေတဲ့ ကုမ္ပဏီတွေက အရာရှိတွေနဲ့ ဆက်နွှယ်မှုတွေရှိခဲ့ကြောင်း ကုမ္ပဏီမှတ်တမ်းတွေက ဖေါ်ပြထားပါတယ်။ သူဟာ Aero Sofi ရဲ့အရာရှိ သီဟမျိုးညွန့်ဆိုသူနဲ့အတူ၊ King Royal Technologies ကုမ္ပဏီရဲ့ မန်နေးဂျင်းဒါရိုက်တာနဲ့ တစိတ်တပိုင်းပိုင်ဆိုင်သူ ရဲအောင်အောင်တင်တို့နဲ့ တွဲဖက်ပြီး စင်ကာပူမှာ အရောင်းအဝယ်လုပ်ငန်းတခုကိုပိုင်ဆိုင်ထားပါတယ်။ King Royal ကတော့ အမေရိကန်အစိုးရဘဏ္ဍာရေးဌာနက ဂြိုဟ်တုဆက်သွယ်ရေးပစ္စည်းတွေ တပ်မတော်ကို ပေးသွင်းတာကြောင့် ဇူလိုင်လမှာ ပိတ်ဆို့အရေးယူခံထားရတာပါ။

Maxi Road Trading လို့ခေါ်တဲ့ အဲဒီအရောင်းအဝယ်လုပ်ငန်းဟာ လူထုအကြားသိရှိမှုမရှိခဲ့ပါဘူး။ မွန်ရည်ကလည်း ကုမ္ပဏီအကြောင်းမေးမြန်းမှုကို မဖြေကြားခဲ့ပါဘူး။ Maxi Road Trading နဲ့  Aero Sofi တို့ဟာ လုပ်ငန်းလုပ်ကိုင်မှုမရှိကြတော့ပါဘူးလို့ သီဟမျိုးညွန့်က ပြောပါတယ်။

ဇူလိုင်လအတွင်းမှာတော့ Maxi Road Tradingက စင်ကာပူရဲ့ ကုမ္ပဏီမှတ်ပုံတင်ရုံးကို စောစောပိုင်း လအနည်းငယ်ကတည်းက လုပ်ငန်းရပ်ဆိုင်းထားပြီဖြစ်ကြောင်း အကြောင်းကြားခဲ့ပါတယ်။

King Royal ကလည်းမေးခွန်းတွေကို ပြန်လည်ဖြေကြားမှုမရှိခဲ့ပါဘူး။ ရဲအောင်အောင်တင်ကလည်း မှတ်ချက်ပေးဖို့ပျက်ကွက်ခဲ့ပါတယ်။

တက်စ်ထရွန်အနေနဲ့ လွန်ခဲ့တဲ့နှစ် ၃၀ အတွင်းမြန်မာနိုင်ငံကို စုစုပေါင်းလေယာဉ် ၅ စီး တိုက်ရိုက်ရောင်းချခဲ့ပြီး အာဏာမသိမ်းမီကတည်းက  လေယာဉ်အစိတ်အပိုင်းတွေ တိုက်ရိုက်ရောင်းချတာကို ရပ်ဆိုင်းထားပြီးဖြစ်ကြောင်း ပြောရေးဆိုခွင့်ရှိသူ မေးနာ့ဒ်က ပြောပါတယ်။

အမှောင်ကျသွားခြင်း

အာဏာသိမ်းပြီးကတည်းက  စစ်အစိုးရခေါင်းဆောင်တွေရဲ့ မိသားစုတွဟာ သူတို့ရဲ့အင်တာနက်ပေါ်က ပုဂ္ဂိုလ်ရေးအချက်အလက်တွေကို ဖုံးကွယ်ထားဖို့ကြိုးစားခဲ့ကြတာပါ။ အိုင်ဗင်ထက်မိန်းမ ထူထောင်ထားတဲ့ အင်ဂျင်နီယာကဏ္ဍ ပူးပေါင်းဆောင်ရွက်ရး ဝန်ဆောင်မှုကုမ္ပဏီရဲ့ အင်တာနက်စာမျက်နှာမှာတော့ “ပြင်ဆင်နေဆဲဖြစ်သည်”ဆိုတဲ့ စာနဲ့ အစားထိုးထားတာ တွေ့ရပါတယ်။

မောင်မောင်ကျော်ရဲ့မိသားစုဟာ သိပ်မကျော်ကြားပေမဲ့ သူဦးဆောင်တဲ့လေတပ်ကတော့ စစ်အစိုးရရဲ့ အာဏာအုတ်မြစ်ချတဲ့အလုပ်မှာ အရေးပါတဲ့အခန်းကဏ္ဍက ရှိနေပါတယ်။ တိုင်းရင်းသားလက်နက်ကိုင်အဖွဲ့တွေဟာ ဗမာအများစုပါဝင်တဲ့နိုင်ငံကနေ လွတ်လပ်ရေးရဖို့ ဆယ်စုနှစ်များစွာတိုက်ပွဲဝင်နေကြတာပါ။ ဒေါ်အောင်ဆန်းစုကြည်ဦးဆောင်တဲ့အစိုးရက ဒါကို သင့်မြတ်စေဖို့ ကြားဝင်စေ့စပ်ဖို့ ကြိုးစားခဲ့ပါသေးတယ်။ ဒါပေမဲ့ ချုပ်ငြိမ်းလုဆဲပဋိပက္ခတွေဟာ အာဏာသိမ်းမှုစကတည်းက ပုံစံအသစ်နဲ့ပြန်ပေါ်လာခဲ့ပါတယ်။ တချို့တိုင်းရင်းသားလက်နက်ကိုင်တွေက အရပ်သားဆန္ဒပြသူတွေကို သူတို့ဆီမှာ လက်ခံခဲ့တဲ့အလျှောက်၊ စစ်တပ်ကိုတိုက်ခိုက်ခြင်းဟာ အားလုံးရဲ့ဘုံသဘောဆောင်တဲ့ လုပ်ငန်းအဖြစ်တွေ့ရှိခဲ့ပါတယ်။

ကရင်ပြည်နယ်မှာဆိုရင်၊ တိုင်းပြည်ရဲ့ လက်နက်ကိုင်အုပ်စုတခုဖြစ်တဲ ကရင်အမျိုးသားအစည်းအရုံး (KNU) ဟာ အခုအချိန်မှာ စစ်အစိုးရဆန့်ကျင်ရေးဆန္ဒပြသူတွေနဲ့ တသားတည်းဖြစ်ကြောင်း ဖေါ်ထုတ်ပြသခဲ့ပါတယ်။ ကယ်ဆယ်ရေးအဖွဲ့တခုဖြစ်တဲ့ ဖရီးဘားမားရိန်းဂျားရဲ့အဆိုအရ၊ မတ်လကုန်ပိုင်းမှာ တိုက်လေယာဉ်တွေနဲ့ တိုက်ခိုက်မှုကြောင့် ၅ နှစ်အရွယ် ယောကျ်ားလေးတယောက်အပါအဝင် လူများစွာသေကျေခဲ့ကြောင်းသိရပါတယ်။ အဲဒီတိုက်ခိုက်မှုမှာပဲ ၁၂ နှစ်အရွယ်အမျိုးသမီးကလေးတဦးဟာ မျက်နှာမှာ ဗုံးစတွေ ထိမှန်ခံခဲ့ရပေမဲ့ အသက်မသေခဲ့ပါဘူး။ ထောင်ပေါင်းများစွာသော ပြည်သူတွေဟာ တောနက်ထဲ ထွက်ပြေးကြရပြီး တချို့ထိုင်းနယ်စပ်မှာ ခိုလှုံနေကြရပါတယ်။ ရက်သတ္တပတ်အနည်းငယ်အကြာမှာတော့ လင်းထက်၊ မွန်ရည်နဲ့ တခြားသုံးယောက်တို့ ပြင်သစ်စားသောက်ဆိုင်တခုရဲ့ဘားမှာ ညစာစားနေတဲ့ဓာတ်ပုံကို တွေ့ရမှာပါ။ ဧပြီ ၁၅ ရက်နေ့က အင်စတာဂရန်ပို့စ်မှာတော့ မွန်ရည်က အလုပ်နဲ့ဘဝကိုချိန်ညှိခြင်းဆိုတဲ့ စတစ်ကာပေါ်က အမှတ်အသားတခုကို ဖော်ပြထားတာတွေ့ရပါတယ်။

အဲဒီထဲကတယောက်ကတော့ အဲရစ်အန်းဂ်ပါ၊ သူဟာ ဘဲလ်ရဟတ်ယာဉ်တွေရဲ့ဒေသဆိုင်ရာ အရောင်းမန်နေဂျာဖြစ်ပါတယ်။ အဲဒီမှာ လင်းထက်တို့မိသားစုနဲ့ ဘာလုပ်နေသလဲဆိုတဲ့ ရိုက်တာကမေးမြန်းတဲ့မေးခွန်းကိုတော့သူက ဖြေကြားမှုမပြုခဲ့ပါဘူး။

တချိန်တည်းမှာပဲ  မေ ၁၇ ရက်မှာ  လေတပ်ဦးစီးချုပ်မောင်မောင်ကျော်ရဲ့သား အိုင်ဗင်ထက်ကို စစ်အစိုးရခေါင်းဆောင်တွေနဲ့အတူ အမေရိကန်ပြည်ထောင်စုက ဒဏ်ခတ်ပိတ်ဆို့တဲ့စာရင်းထဲ ထည့်သွင်းလိုက်ပါတယ်။ အမေရိကန်အစိုးရဘဏ္ဍာရေးဌာန ပြောရေးဆိုခွင့်ရှိသူက အိုင်ဗင်ထက်ရဲ့အကြောင်းကို မှတ်ချက်ပေးဖို့ငြင်းဆိုခဲ့ပါတယ်။ ဒါပေမဲ့ဗိုလ်ချုပ်တွေရဲ့ သားသမီးတွေဟာ နာမည်ပျက်စာရင်းထဲပါပြီးဖြစ်ကြောင်းပြောပါတယ်။ သူတို့ရဲ့ပိုင်ဆိုင်မှုတွေအပေါ် သို့မဟုတ် စစ်အစိုးရကို အကျိုးဖြစ်စေမယ့် ငွေလွှဲပြောင်းတာတွေ လုပ်ပေးတဲ့အပေါ်၊ ဒါ့အပြင်မိသားစုဝင်တွေအနေနဲ့ ဆိုးသွမ်းတဲ့အာဏာသိမ်းမှု အပေါ်တာဝန်ရှိတဲ့ ခေါင်းဆောင်တွေနဲ့ ဆက်စပ်ပတ်သက်မှုအပေါ် အမေရိကန်အစိုးရက ဒဏ်ခတ်ပိတ်ဆို့တာ ဖြစ်ပါတယ်။

မြန်မာပြည်တွင်းမှာတော့ အိုင်ဗင်ထက်ဟာ အာဏာသိမ်းမှုကို ဆန့်ကျင်ဆန္ဒပြသူတွေရဲ့ ဆိုရှယ်မီဒီယာပစ်မှတ်တခုဖြစ်နေပါပြီ။ မြန်မာစစ်ဗိုလ်ချုပ်တွေရဲ့ မိသားစုဝင်တွေကို ဖေါ်ထုတ်ပြီး အရှက်မဲ့တဲ့လုပ်ဆောင်ချက်တွေကို ရှုတ်ချတဲ့စည်းရုံးလှုံ့ဆော်မှုတွေကို အာဏာသိမ်းဆန့်ကျင်သူတွေက လုပ်ဆောင်နေပါပြီ။ သူတို့ရဲ့မိတ်ဆွေတွေကိုလည်း တပ်မိသားစုအသိုင်းအဝိုင်းကို ရှောင်ကျဉ်ကြဖို့ တောင်းဆို ဆော်ဩနေကြပါပြီ။

အိုင်ဗင်ထက်ရဲ့ဖုံးကွယ်ထားတဲ့ ဖေ့ဘွတ်ခ်ပရိုဖိုင်းပုံက အမှတ်တံဆိပ်မှာတော့ သူဟာ အနိုင်ကျင့်သူတွေရဲ့စည်းရုံးလှုံ့ဆော်မှုသားကောင်ဖြစ်နေပါပြီလို့  ဖေါ်ပြထားပါတယ်။

REF- ရိုက်တာစုံစမ်းဖေါ်ထုတ်မှုများ

ဘာသာပြန်ဆိုသူ = အေးမင်း(တာမွေ) 

(REUTERS သတင်းဌာနမှာ ဖော်ပြထားတဲ့ " How family of a Myanmar junta leader are trying to cash in" စုံစမ်းဖော်ထုတ် သတင်းဆောင်းပါကို ဘာသာပြန်ဖော်ပြခြင်းဖြစ်သည်။)

3 hours Ago

တာချီလိတ် မြေယာပြဿနာပစ်ခတ်မှု တရားခံအားဖမ်းဆီးရမိ

ရှမ်းပြည်အရှေ့ပိုင်း တာချီလိတ်မြို့ ဝိန်းကျောက်ရပ်ကွက် အားခါဈေးလမ်းမှာ စက်တင်ဘာ ၁၆ ရက်နေ့က ပစ်ခတ်မှုဖြစ်ပွားပြီး လူ ၂ ဦး သေဆုံး၊ ၁ ဦး ဒဏ်ရာရခဲ့မှုမှာ ပစ်ခတ်သူကို ဖမ်းဆီး ရမိပြီဖြစ်ပါတယ်။ 

ပစ်ခတ်မှုကျူးလွန်သူမှာ အသက် ၃၀ ကျော်ရွယ်ရှိ စိုင်းမိုင်းဆိုသူ အမျိုးသားတစ်ဦးဖြစ်ပြီး တာချီလိတ်မှအထွက် မတ်ယန်းဂိတ်မှာ ဖမ်းမိခဲ့တာလို့ ဝိန်းကျောက်ရပ်ကွက် အုပ်ချုပ်ရေးမှူး ဦးစိုင်းအောင်သိန်းက ဒီဗွီဘီကို ပြောပါတယ်။ 

“ပစ်ခတ်မှုကျူးလွန်တဲ့ စိုင်းမိုင်း နဲ့ သူ့တပည့်တစ်ယောက်ကို တာဝန်ရှိသူတွေက မနေ့ညနေ ၃ နာရီခွဲလောက်မှာ ဖမ်းမိပါတယ်ခင်ဗျ။ တာချီလိတ်ကနေ ကျိုင်းတုံဘက်ကိုသွားတဲ့ မတ်ယန်း ဂိတ်မှာ ဖမ်းမိသွားတာပါ။”

စိုင်းမိုင်းမှာ ဝိန်းကျောက်ရပ်ကွက်မှ အကျယ် ၂ ဧကရှိ မြေတစ်ကွက်ကို ဒေါ်ညိုမာဆိုသူအား ရောင်းချပေးခဲ့ပြီး ဝယ်သူက ငွေချေခဲ့ပြီးဖြစ်ပေမယ့် မြေကွက်တိုင်းတာခွဲဝေမှုမှာ ပြဿနာဖြ စ်နေ တာကြာပြီလို့ ဆိုပါတယ်။ 

ဝယ်ထားတဲ့မြေကွက်မှာ ပိုင်ရှင်သစ်က အလုပ်သမားတွေနဲ့ မြေယာပြုပြင်စဉ် မနေ့ မွန်းလွဲပိုင်းက စိုင်းမိုင်းရောက်လာပြီး  စကားများခဲ့ကြောင်း၊ စိုင်းမိုင်းက သေနတ်နဲ့ ရမ်းသမ်းပစ်ခတ်နေရာ အနီးတဝိုက်မှာ အလုပ်လုပ်နေတဲ့ အလုပ်သမားတွေကို ထိမှန်သွားတာလို့ ဆိုပါတယ်။ 

သေနတ်ထိမှန်သေဆုံးတဲ့ အလုပ်သမားတွေမှာ ကိုသားငယ် နဲ့ ကိုမဲကြီးတို့ဖြစ်ပြီး ဒဏ်ရာရ သူမှာ ကိုသန့်စင်ဆိုသူ ဖြစ်ကြောင်း၊  ပစ်ခတ်မှုကျူးလွန်သူမှာ ပြဿနာကို ခေါင်းအေးအေးနဲ့ မဖြေရှင်းဘဲ ကမူးရှုးထိုး ရမ်းသမ်းပစ်ခတ်ခဲ့တာကြောင့် မူးယစ်ဆေးဝါးသုံးစွဲထားခြင်းရှိမရှ်၊ စိတ်ပိုင်း ဆိုင်ရာပြဿနာရှိမရှိ တာဝန်ရှိသူတွေက ဆက်လက်စစ်ဆေးနေတယ်လို့ ဝိန်းကျောက်အုပ်ချုပ်ရေးမှူးက ပြောသွားပါတယ်။ 

3 hours Ago

ဟေတီပြည်ထဲရေးဝန်ကြီး တရားရေးဝန်ကြီးအဖြစ် ပူးတွဲတာဝန်ယူ

ဟေတီသမ္မတ Moise ကို လုပ်ကြံသူလို့ သံသယရှိတဲ့ ဟေတီဝန်ကြီးချုပ် ဟင်နရီက စက်တင်ဘာ ၁၆ ရက်မှာ ပြည်ထဲရေးဝန်ကြီး Liszt Quitel ကို တရားရေးဝန်ကြီးအဖြစ် ရာထူးပူးတွဲ ခန့်အပ်ခဲ့ပါတယ်။ 

ဟေတီရဲ့ နိုင်ငံရေးအကျပ်အတည်း ပြင်းထန်နေချိန်မှာ ဝန်ကြီးချုပ် ဟင်နရီက တရားရေး ဝန်ကြီး Rockfeller Vincent နေရာမှာ  ပြည်ထဲရေးဝန်ကြီးဌာနကိုရော တရားရေးဝန်ကြီးဌာနကိုပါ ၂ ခုစလုံး တာဝန်ယူမယ့် Quitel ကို အစားထိုးလိုက်တာလို့ ဟေတီရဲ့တရားဝင်ပြန်တမ်းမှာ ဖော်ပြထားပါတယ်။

 သမ္မတ Jovenel Moise အသတ်ခံရမှုရဲ့နောက်ကွယ်မှ အဓိကသံသယရှိသူတွေထဲက တစ်ဦးဖြစ်တယ်လို့ စုံစမ်းစစ်ဆေးသူတွေပြောတဲ့ တရားရေးဝန်ကြီးဌာန အရာရှိဟောင်းနဲ့ ဝန်ကြီးချုပ်ဟင်နရီ ဆက်စပ်ပတ်သက်မှု ရှိတယ်ဆိုတဲ့ အထောက်အထားသစ် ပေါ်ထွက်လာပြီး တပတ်လောက်အကြာမှာ  ခုလိုရာထူးခန့်အပ်မှု ဖြစ်လာတာပါ။

 ဖုန်းမှတ်တမ်းတွေအရ သူတို့ ၂ ဦးဟာ သမ္မတ မွိုက်စ် လုပ်ကြံခံရမယ့် ဇူလိုင် ၇ ရက် မနက် ၄ နာရီလောက်မှာ  ဖုန်းဆက်သွယ်မှု ၂ ကြိမ် ရှိခဲ့ပြီး နာရီပိုင်းလောက်အကြာမှာတော့ လက်နက် အပြည့်အစုံ တပ်ဆင်ထားတဲ့ လုပ်ကြံသတ်ဖြတ်သူတွေဟာ သမ္မတ မွိုက်စ်ရဲ့ ကိုယ်ပိုင်နေအိမ်ကို ဝင်ရောက်စီးနင်းခဲ့တယ်လို့ အစိုးရရှေ့နေတွေ ပြောပါတယ်။ 

၀န်ကြီးချုပ် အေရီယယ် ဟင်နရီကတော့ ဒီလူသတ်မှုမှာ ပါဝင်ပတ်သက်မှုမရှိဘူးလို့ ငြင်းဆိုထားပေမဲ့ သူဟာ ဖုန်းခေါ်ဆိုမှုတွေကို တိုက်ရိုက်ဖြေကြားခြင်း မရှိခဲ့ပါဘူး။ 

စက်တင်ဘာ ၁၄ ရက်မှာတော့ သူ့ကို သံသယရှိသူအဖြစ်စွဲချက်တင်ဖို့ ကြိုးပမ်းနေတဲ့ ဟေတီအစိုးရ ရှေ့နေချုပ်ကို ရာထူးနေရာ အစားထိုးလိုက်ပြီး နိုင်ငံကနေ ထွက်ခွာခွင့်ကိုလည်း တားမြစ်ခဲ့ပါတယ်။ 

နိုင်ငံရေးအကျပ်အတည်းကြားမှာ ပြီးခဲ့တဲ့ ၂ နှစ်က ဥပဒေပြု ရွေးကောက်ပွဲတွေနဲ့ မြူနီစီပယ်ရွေးကောက်ပွဲတွေ ကျင်းပဖို့ ပျက်ကွက်ခဲ့ပြီးနောက် တိုင်းပြည်မှာ ရွေးကောက်ခံ အရာရှိတွေက လက်တစ်ဆုပ်စာလောက်ပဲရှိတာပါ။

 သမ္မတ မွိုက်စ်ဟာ အမိန့်အာဏာနဲ့ အုပ်ချုပ်ခဲ့တာဖြစ်ပေမဲ့ လက်ရှိအခြေအနေမှာ အစိုးရတစ်ခုအတွက် ဖွဲ့စည်းပုံအခြေခံဥပဒေဘောင် မရှိပါဘူး။ 

ဒါကြောင့် Henry ဟာ အုပ်ချုပ်နိုင်ဖို့ ကျယ်ကျယ်ပြန့်ပြန့် သဘောတူညီချက်တရပ် လိုအပ်ပါတယ်။ 

စက်တင်ဘာ ၁၁ ရက်မှာတော့  ဝန်ကြီးချုပ်ဟင်နရီ ဟာ လာမယ့်နှစ်ရွေးကောက်ပွဲတွေနဲ့ ဖွဲ့စည်းပုံအခြေခံဥပဒေအသစ် ဆန္ဒခံယူပွဲကို ဦးဆောင်ဖို့ ရည်မှန်းထားပြီး အသွင်ကူးပြောင်းရေး အစိုးရတစ်ရပ်အတွက် ဟေတီရဲ့အဓိကနိုင်ငံရေးအင်အားစုတွေကြားက သဘောတူညီချက်တရပ်ကို ကြေညာခဲ့ပါတယ်။ 

3 hours Ago

မြစ်ကြီးနားမြို့ နောင်နန်းတိုက်နယ် အုပ်ချုပ်ရေးမှူး ပစ်သတ်ခံရ

ကချင်ပြည်နယ် မြစ်ကြီးနားမြို့ နောင်နန်းတိုက်နယ် အုပ်ချုပ်ရေးမှူး စက်တင်ဘာ ၁၇ ရက်နေ့ မနက်ပိုင်းက သေနတ်နဲ့ ပစ်သတ်ခံရတဲ့အတွက် သေဆုံးသွားခဲ့ပါတယ်။

နောင်နန်းတိုက်နယ် အုပ်ချုပ်ရေးမှူးတစ်ဦးဖြစ်တဲ့ ဦးလှမြင့်ဟာ မနက် ၆ နာရီလောက်က သားဖြစ်သူနဲ့အတူ ဆိုင်ကယ် မောင်းနှင်နေစဉ် အမည်မသိ သေနတ်သမား နှစ်ဦးက ပစ်ခတ်ခဲ့တာလို့ ဒေသခံတွေက ပြောပါတယ်။ 

နောင်နန်းဒေသခံတဦးက “ဆိုင်ကယ်နဲ့ ၂ ယောက်က လာပစ်သွားတာ၊ ဦးလှမြင့်တို့ အသားအဖ ၂ ယောက် ဆိုင်ကယ်စီးပြီးပြန်အလာ သူတို့ အိမ်နားမှာပဲ လာပစ်သွားတာ၊ အုပ်ချုပ်ရေးမှူးက သေတယ်။ သူ့သားက လက်ကို  ထိသွားတယ်” လို့ ပြောပါတယ်။

သေနတ်ပစ်သတ်ခံရသူ အုပ်ချုပ်ရေးမှူး ဦးလှမြင့်ကို နာရေးကူညီမှုအသင်း ကားနဲ့ သယ်ဆောင်သွားပြီး လက်ကို သေနတ်မှန်ခဲ့တဲ့သားဖြစ်သူမှာလည်း အသက်အန္တရာယ်မစိုးရိမ်ရဘဲ ဆေးကုသမှုခံယူနေတယ်လို့ သိရပါတယ်။

နောင်နန်းကျေးရွာအုပ်စု အုပ်ချုပ်ရေးမှူးရုံးဟာ မေ ၂၃ ရက်နေ့ကလည်း မီးရှို့ ဖျက်ဆီးခံလိုက်တယ်လို့ သိရပါတယ်။

3 hours Ago

အင်းလျားလမ်းနှင့် ပြည်လမ်းထောင့်ရှိ ယာဥ်ထိန်းရုံး ဗုံးပေါက်ကွဲ

ရန်ကုန်မြို့ ကမာရွတ်မြို့နယ်၊ အင်းလျား နဲ့ ပြည့်လမ်းထောင့်ရှိ ယာဥ်ထိန်းရုံးမှာ ဒီနေ့ မနက် ၆ နာရီလောက်က ဗုံးပေါက်ကွဲခဲ့ပါတယ်။ 

ဗုံးပေါက်ကွဲမူကြောင့် ယာဥ်ထိန်းရုံး အနည်းငယ်ပျက်စီးသွားခဲ့ပြီး ထိခိုက်ဒဏ်ရာရရှိသူ မရှိဘူးလို့ ကိုယ်တိုင်တွေ့မြင်သူတစ်ဦးက ပြောပါတယ်။

ဗုံးကွဲတဲ့နေရာနဲ့ မလှမ်းမကမ်းမှာ ရဲတွေ စစ်သားတွေရှိပေမယ့် သူတို့ကို မထိလိုက်ဘဲ ဗုံးပေါက်ပြီးတော့ စစ်ကောင်စီလုံခြုံရေးတွေအများကြီးထပ်ရောက်လာတယ်လို့ ဆိုပါတယ်။

ဗုံးပေါက်ကွဲတဲ့နေရာကနေ ကားတစ်မှတ်တိုင်အကျော်မှာတော့ အာဏာသိမ်း စစ်ခေါင်းဆောင် မင်းအောင်လိူင်ရဲ့သားဖြစ်သူ ဖွင့်လှစ်ထားတဲ့ ကန်သာယာဆေးရုံးရှိပြီး အဲဒီဘက်မှာ လုံခြုံရေးယူနေထားတဲ့ စစ်သားအများပြားရှိနေတယ်လို့ သိရပါတယ်။

4 hours Ago

ဝက်လက်မြို့တွင် မိုင်တဲလ်တာဝါတိုင် ၂ ခု ပထမဆုံးဖောက်ခွဲ ဖျက်ဆီးခံရ

စစ်ကိုင်းတိုင်း ဝက်လက်မြို့နယ်က ရွာတစ်ရွာနားမှာရှိတဲ့ မိုင်တဲလ်တာဝါတိုင် ၂ ခုကို စက်တင်ဘာ ၁၆ ရက် ည ၁၂ နာရီလောက်က  တပြိုင်နက်ထဲ ဖောက်ခွဲဖျက်ဆီးလိုက်တယ်လို့ ဖောင်းဒိုင်းဖောင်းဒိုင်းအဖွဲ့က ထုတ်ပြန်ကြေညာထားပါတယ်။

“ဖောက်ခွဲတာ ဟုတ်ပါတယ်။ စစ်ကောင်စီရဲ့ထောက်တိုင်တွေကို ဒါပထမဆုံးစပြီး ဖောက်ခွဲ ဖျက်ဆီးတာပဲ။ ရွာအမည်တွေတော့ ထည့်မရေးပါနဲ့ဗျာ ‌ဒေသခံတွေ နာမှာ စိုးလို့ပါ” လို့‌ ဖောင်းဒိုင်း အဖွဲ့က ပြောပါတယ်။

ဝက်လက်မြို့နယ်အတွင်းက ဖောင်းဒိုင်းဖေါင်းဒိုင်းအဖွဲ့ဟာ စက်တင်ဘာ ၁၁ ရက်ကလည်း ပျူစောထီးအဖွဲ့ဝင်တစ်ဦးကို ရှင်းလင်းသုတ်သင်ခဲ့တာဖြစ်ပါတယ်။

4 hours Ago

တီးတိန်မြို့နယ် ခိုင်ကမ်းရဲစခန်းကို PDF ၃ ဖွဲ့ ပူးပေါင်းတိုက်ခိုက်၊ ရဲ ၅ ဦး သေဆုံး

ချင်းပြည်နယ် တီးတိန်မြို့နယ်က ခိုင်ကမ်းနယ်မြေရဲစခန်း ၉ မိုင်ဂိတ်ကို စက်တင်ဘာ ၁၇ ရက်မနက်ပိုင်းက PDF သုံးဖွဲ့ပူးပေါင်းတိုက်ခိုင်ရာ ရဲ ၅ ယောက်လောက် သေဆုံးခဲ့ပြီး အများ အပြား ဒဏ်ရာရသွားတယ်လို့ PDF-Zoland က ထုတ်ပြန်ထားပါတယ်။

ခိုင်ကမ်းမြို့နယ်မြေရဲစခန်း ၉ မိုင်ဂိတ်ကို ဒီနေ့မနက် ၅ နာရီလောက်က PDF-Zoland၊ Civil Defense Mititia၊ CDF-KKG (ကလေး၊ ကပေါ်၊ ဂန့်ဂေါ) တို့ ပူးပေါင်းပြီး တိုက်ခိုက်ခဲ့တာပါ။ 

အကြမ်းဖက်စစ်ကောင်စီဘက်က လက်နက်ကြီး၊ လက်နက်ငယ်တွေနဲ့ ပြန်လည်ပစ်ခတ်ခဲ့ ပေမယ့် ပြည်သူ့ကာကွယ်ရေးမဟာမိတ်တပ်ဖွဲ့ဘက်က အထိခိုက်အကျဆုံး မရှိဘူးလို့ ဖော်ပြ ထားပါတယ်။

အဲဒီတိုက်ပွဲကြောင့် အကြမ်းဖက်စစ်ကောင်စီရဲ့ ရဲတပ်ဖွဲ့က ကလေးမြို့ကနေ ဂန့်ဂေါမြို့ ဘက်ကိုတက်မယ့် ခရီးသည်တင်ယာဉ်နဲ့ ကုန်တင်ကားတွေကို ပိတ်ဆို့ထားတယ်လို့ ဒေသခံတွေဆီ က သိရပါတယ်။

 ခိုင်ကမ်းနယ်မြေရဲစခန်း ၉ မိုင်ဂိတ် တိုက်ခိုက်ခံရမှုကြောင့် ရဲ ၅ ယောက်လောက် သေဆုံးပြီး အများအပြား ဒဏ်ရာရရှိခဲ့တယ်ဆိုတာနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

4 hours Ago

ပေါက်မြို့နယ်တွင် မိုင်းထောင်နေစဉ် ပေါက်ကွဲမှုကြောင့် ပျူစောထီး ၂ ဦး သေဆုံး

မကွေးတိုင်းဒေသကြီး ပေါက်မြို့နယ်မှာ စက်တင်ဘာလ ၁၆ ရက်နေ့မနက်ပိုင်းက ပင်ထောင်ရွာမှာ မိုင်းပေါက်ကွဲမှုကြောင့် ပျူစောထီး ၂ ယောက် သေဆုံးခဲ့တယ်လို့ ဒေသခံတွေဆီကနေ သိရပါတယ်။

ပင်ထောင်ကျေးရွာမှာ မနေ့က မနက် ၁၀ နာရီလောက်က ပျူစောထီးအဖွဲ့ဝင်တွေဖြစ်တဲ့ ဦးထွဋ်မောင်နဲ့ ဦးတင်ဝင်းတို့ဟာ မိုင်းထောင်ရင်းနဲ့ မတော်တစ်ဆ ပေါက်ကွဲခဲ့တာကြောင့် အပြင်းအထန်ဒဏ်ရာရပြီး ၁ နာရီလောက်အကြာမှာ သေဆုံးသွားတာလို့ ဒေသခံတစ်ယောက်က DVB ကို ပြောပါတယ်။

ကိုင်းလယ်ရွာ‌က ပျူစောထီးခေါင်းဆောင် မောင်ဦး ဦးဆောင်ပြီးတော့ အကြမ်းဖက် စစ်အုပ်စုတွေနဲ့ ပူးပေါင်းက အခုလပိုင်းအတွင်း ပင်ထောင်၊ သစ်ချိုကုန်း၊ ရွာသစ်နဲ့ ဒီးဒုတ်ကွင်း ကျေးရွာတွေမှာ မိုင်းဖောက်ခွဲရေးသင်တန်းတွေ ပေးနေတယ်လို့ ဆိုပါတယ်။

ပေါက်မြို့နယ်ထဲမှာ အကြမ်းဖက်စစ်ကောင်စီရဲ့ လက်ပါးစေ ဒလန်တွေဖြစ်တဲ့ ပျူစောထီး အဖွဲ့ဝင်တွေ မိုင်းပေါက်ကွဲပြီး သေဆုံးတာဟာ လက်ရှိအချိန်ထိ ၆ ယောက်ရှိပြီလို့ ဒေသခံတွေ ဆီကနေ သိရပါတယ်။

4 hours Ago

မဟာအောင်မြေမြို့နယ်က အသစ်ပြန်ဆောက်နေသည့် ရပ်ကွက်အုပ်ချုပ်ရေးမှူးရုံး ဗုံးဖြင့်ပစ်ခံရ

မန္တလေးမြို့ မဟာအောင်မြေမြို့နယ် သံလျက်မော် အနောက်ရပ်ကွက်မှာ အသစ်ပြန်ဆောက် နေတဲ့ ရပ်ကွက်အုပ်ချုပ်ရေးမှူးရုံး စက်တင်ဘာ ၁၆ ရက် ညနေပိုင်းက ဗုံးနဲ့ ပစ်ခံရတယ်လို့ ရပ်ကွက်နေသူတဦးက ပြောပါတယ်။

သံလျက်မော် အနောက်ရပ်ကွက် အုပ်ချုပ်ရေးမှူးရုံးဟာ မေလ ၁ ရက် ညပိုင်းက မီးလောင်ခဲ့တာကြောင့် အခုအခါ ပြန်လည်ဆောက်လုပ်နေတာဖြစ်ပြီး ဗုံးပေါက်ကွဲမှုကြောင့် လူအထိအခိုက်မရှိဘူးလို့ ဆိုပါတယ်။

အသစ်ပြန်ဆောက်နေတဲ့ ရပ်ကွက်အုပ်ချုပ်ရေးမှူးရုံးကို ဘယ်အဖွဲ့က ဗုံးဖောက်ခွဲတယ်ဆိုတာတော့ မသိရသေးပါဘူး။

ရပ်ကွက်အုပ်ချုပ်ရေးမှူးရုံး အသစ်ဆောက်တာနဲ့ ပတ်သက်လို့ ရပ်တန့်ပေးဖို့ GZP ပြည်သူ့ကာကွယ်ရေးအဖွဲ့က သတိပေးထုတ်ပြန်ထားပါတယ်။

4 hours Ago

မုံးကိုးနှင့်ပန်ဆိုင်းတွင် စစ်ကောင်စီတပ်များ အင်အားဖြည့်၊ တိုက်ပွဲဖြစ်မည်ကို ဒေသခံများစိုးရိမ်

မြန်မာ-တရုတ်နယ်စပ် ကြူကုတ်(ပန်ဆိုင်း)မြို့နဲ့ မုံးကိုးဘက်ကို စစ်ကောင်စီတပ်တွေ စက်တင်ဘာ ၁၆ ရက်ညနေပိုင်းမှာ အင်အားဖြည့်တင်းလာနေတာကြောင့် တိုက်ပွဲပြင်းထန်လာမှာကို ပြည်သူတွေ စိုးရိမ်နေကြတယ်လို့ သိရပါတယ်။

 ဒေသခံတဦးက “ကြူကုတ် (ပန်ဆိုင်း) ဘောလုံးကွင်းမှာ စစ်ကားတွေ နားနေကြတယ်။ တင့်ကားတော့ စစ်တပ်ထဲမှာ။ စစ်ကားအစီး ၃၀ ကျော်။ ခု နောက်ထပ် Vego နဲ့ ၆ စီး။ Vego ထဲက စစ်သားတွေက အရက် အရမ်းမူးနေကြတယ်” လို့  ပြောပါတယ်။  

စစ်ကြောင်းမရောက်ခင် စက်တင်ဘာ ၁၆ ရက် မနက် ၁၀ နာရီလောက်ကတည်းက ကြူကုတ် (ပန်ဆိုင်း) မြို့ဘက်လျှပ်စစ်မီးတွေ ဖြတ်တောက်ထားတယ်လို့ ဒေသခံက ပြောပါတယ်။

ကြူကုတ် (ပန်ဆိုင်း) မြို့ကနေ စစ်ကောက်စီတပ်တွေ ထွက်လာတာနဲ့ တိုက်ပွဲ ပြင်းထန်လာနိုင်ကြောင်း၊ စစ်ကောင်စီတပ်နဲ့ ကိုးကန့် MNDAA တို့ နှစ်ဘက် တိုက်ပွဲပြင်းထန်လာမှာကို စိုးရိမ်နေကြတယ်လို့ ကြူကုတ် (ပန်ဆိုင်း) အနီးကရွာမှာ နေထိုင်သူတဦးက ပြောပါတယ်။

မျက်မြင်တွေ့သူ နမ့်တောင်းဒေသခံက “စစ်ကား ၂၀ ကျော်၊ ခြေကျင် ၂၀၀ ကျော် နဲ့ တင့်ကား နှစ်စီးပါတယ်။ ညနေ ၄ နာရီက စဖြတ်လာတယ်။ တစ်သုတ်ပြီး တစ်သုတ် မိုးမချုပ်မီ သွားလိုက်ကြတယ်” လို့  ပြောပါတယ်။

စက်တင်ဘာလ ၁၆ ရက်က စစ်ကြောင်းမှာတော့ စစ်ကောင်စီတပ်ဖွဲ့ဝင် ၁၀၀ ကျော်လောက်နဲ့အတူ ဒေသခံ တာမိုးညဲပြည်သူ့စစ်၊ မြို့မပြည်သူ့စစ်၊ ပန်ဆေးပြည်သူ့စစ်၊ ကျင်းစန်းကျော့ပြည်သူ့စစ်အဖွဲ့တွေ ပါကြောင်းလည်း သိရပါတယ်။

မူဆယ် ဒေသခံတဦးက  “မနေ့ည ၁၀၅ မိုင်မှာ လာနားတဲ့သူတွေ မူဆယ် ဗိုလ်တဲကုန်းနဲ့ စုပေါင်းရုံးဘက် လာနားပြီး ဒီညနေ ၃ နာရီခွဲလောက်က ၁၀၅ မိုင်ဘက် ချက်ချင်း ပြန်လှည့်သွားပြီ။ တင့်ကား နှစ်စီးပါတယ်။ မနေ့က ၁၀၅ မိုင်မှာ ဝင်တဲ့ စစ်ကားက ၄၄ စီး” လို့ ပြောပါတယ်။ 

မုံးကိုးအနီးက နော့ဂူရွာမှာလည်း အင်အား ၅၀ လောက် ရွာထဲမှာ စခန်းချနေတာကြောင့် တိုက်ပွ်ဖြစ်လာမှာစိုးရိမ်ပြီး တိမ်းရှောင်ဖို့ပြင်ဆင်နေတဲ့ ရွာခံတွေအား တိမ်းရှောင်တဲ့လူတွေကို ပစ်မယ်ဆိုပြီး ခြိမ်းခြောက်နေတယ်လို့ အမည်မဖော်လိုသူ ဒေသခံတစ်ဦးက ပြောပါတယ်။ 

၁၀၅ မိုင် အကျော်နားက နမ့်ဟွယ်ရွာမှာလည်း စစ်ကောင်စီတပ်ဖွဲ့က နေအိမ်တချို့ကို မွှေနှောက်စစ်ဆေးသွားတယ်လို့ ဒေသခံတစ်ဦးက ပြောပါတယ်။  

ဇူလိုင် ၃ ရက်ကနေ စက်တင်ဘာ လဆန်းပိုင်းအထိ ကြူကုတ် (ပန်ဆိုင်း) နဲ့ မုံးကိုး၊ ဖောင်းဆိုင်တို့ဘက်မှာ စစ်ကောင်စီနဲ့ MNDAA တို့အကြား တိုက်ပွဲ ပြင်းထန်ခဲ့ပြီး စစ်ကောင်စီ ဘက်က အကျအဆုံးများတယ်လို့ ဒေသခံတွေက ပြောပါတယ်။

တိုက်ပွဲကြောင့် လက်နက်ကြီး ကျည်ထိမှန် သေဆုံးတဲ့ အရပ်သား ပြည်သူ ၆ ဦးရှိပြီး ဒေသခံပြည်သူ ၂၀၀၀ ကျော် ထွက်ပြေးတိမ်းရှောင်နေကြရတယ်လို့ ဆိုပါတယ်။

5 hours Ago

ရေးမြို့ PDF က စစ်ကောင်စီ ဆက်သွယ်ရေးလိုင်းတခုအား ဖြတ်တောက်ဖျက်ဆီး

မွန်ပြည်နယ် ရေးမြို့နယ် ပြည်သူ့ကာကွယ်ရေးတပ်ဖွဲ့ PDF မှ စစ်ကောင်စီရဲ့ ဆက်သွယ်ရေး လိုင်းအား စက်တင်ဘာလ ၁၅ ရက်နေ့က ဖြတ်တောက်ဖျက်ဆီးခဲ့တယ်လို့ ရေးမြို့ ပြည်သူ့ကာကွယ်ရေးတပ်ဖွဲ့ပြန်ကြားရေးအဖွဲ့က ထုတ်ပြန်လိုက်ပါတယ်။

ရေးမြို့ PDF က အခုလို စစ်ကောင်စီရဲ့ ဆက်သွယ်ရေး ပိုက်လိုင်းတခုကို ပြီးခဲ့တဲ့ ရက်တွေကလည်း တစ်ကြိမ် ဖျက်ဆီးထားခဲ့သလို အခု ထပ်မံပြီး စစ်ကောင်စီရဲ့ စစ်ဘက်သုံး ဆက်သွယ်ရေးလိုင်းတခုကို တစ်စိမ်ဒေသတခုအနေနဲ့ ဖြတ်တောက်ခဲ့တာလို့ စက်တင်ဘာ ၁၆ ရက်နေ့ ထုတ်ပြန်ချက်မှာ ဖော်ပြထားပါတယ်။

စစ်ကောင်စီတပ်ဖွဲ့ဝင်တွေက အင်အားသုံးပြီး မြို့တွင်းနေရာအနှံ့ လှည်ကင်း ဝပ်ကင်း စတာတွေ လုပ်ဆောင်လာခဲ့သလို PDF တွေ ခိုအောင်းတဲ့နေရာတွေကို လိုက်လံရှာဖွေနေပေမဲ့ PDF နဲ့ ထိပ်တိုက်တွေ့ဆုံတာ ဒီနေ့အထိ မရှိသေးပါဘူးလို့ ဆိုပါတယ်။

ရေးမြို့ PDF ကတော့ မြို့တွင်း ပြောက်ကျားတိုက်ခိုက်ရေးကိုသာ ကျင့်သုံးပြီး ရဲစခန်းတွေကိုပါ ဗုံးခွဲတိုက်ခိုက်ထားခဲ့သလို  ရဲတပ်သား ၁ ဦးကို သုတ်သင်ရှင်းလင်းခဲ့တယ်လို့ ထုတ်ဖော်ပြောဆိုထားပါတယ်။

6 hours Ago

ထိပ်တန်းကစားသမားများ အတွဲအဖက်မိရန် အချိန်လိုသေးကြောင်း ပီအက်စ်ဂျီနည်းပြပြော

ပီအက်စ်ဂျီအသင်းမှာ ထိပ်တန်းကစားသမားတွေရှိပေမဲ့ အတွဲအဖက်မိဖို့အတွက် အချိန်ယူရဦးမယ်လို့ နည်းပြပိုချက်တီနိုက ပြောပါတယ်။ 

ပီအက်စ်ဂျီအသင်းဟာ ဘယ်လ်ဂျီယံကလပ် ဘရုဂေးနဲ့ ချန်ပီယံလိဂ်ပွဲစဉ်မှာ မက်ဆီ၊ နေမာ၊ အမ်ဘာပေ တို့ရဲ့ MNM တိုက်စစ်အတွက်ကို ပွဲထွက်စေခဲ့ပေမဲ့ သူတို့ ၃ ဦးလုံးဂိုးမသွင်းနိုင်ခဲ့သလို အသင်းကလည်း ၁ ဂိုးစီ သရေရလဒ်သာရခဲ့တာပါ။

ဘရုဂေးနဲ့ သရေကျတဲ့ပွဲဟာ တိုက်စစ်မှူး ၃ ယောက် အတွဲအဖက်မမိတာက အဓိကပြဿနာမဟုတ်ခဲ့ပေမဲ့ အောင်မြင်မှုတွေရယူဖို့ အတွက်ဆိုရင်တော့ နားလည်မူရှိရှိတွဲဖက် ကစားနိုင်ဖို့ လိုတယ်လို့ ပိုချက်တီနိုက ပြောပါတယ်။ 

ထိပ်တန်းကစားသမားတွေရှိတာလည်း မှန်ပေမဲ့ တိုက်စစ်ရော ခံစစ်မှာပါ အတွဲအဖက်မိမိကစားနိုင်ဖို့ အချိန်လိုအပ်တယ်လို့ နည်းပြပိုချက်တီနိုက မှတ်ချက်ပေးခဲ့တာဖြစ်ပါတယ်။ 

6 hours Ago

ထိုင်းတွင်တရက်တည်း ကိုဗစ်-၁၉ ကူးစက်ခံရသူ ၁၄,၀၀၀ ကျော်၊ အကျဉ်းထောင်များမှ ၈၀၀ နီးပါး ပါဝင်

ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ ထိုင်းနိုင်ငံမှာ တရက်တည်း ရောဂါကူးစက်မှုအသစ် ၁၄,၅၅၅ ယောက်ရှိခဲ့ပြီး နိုင်ငံတဝန်း အကျဉ်းထောင်တွေက အယောက် ၇၉၀ ပါဝင်တယ်လို့ ထိုင်းပြည်သူ့ကျန်းမာရေးဝန်ကြီးဌာနက ထုတ်ပြန်ပါတယ်။

ပြီးခဲ့တဲ့ ၂၄ နာရီအတွင်း သေဆုံးသူအသစ်ကတော့ ၁၇၁ ယောက်ရှိခဲ့ပြီး ရောဂါ ပြန်လည်ပျောက်ကင်းလာတဲ့အတွက် ဆေးရုံက ဆင်းခွင့်ရသူအရေအတွက်ကတော့ ၁၃,၆၉၁ ယောက် ရှိနေခဲ့တာပါ။

လက်ရှိအချိန်ထိ ထိုင်းနိုင်ငံတဝန်း ကိုဗစ်-၁၉ ရောဂါကူးစက်ခံရသူ စုစုပေါင်းက တော့ ၁ ဒသမ ၄ သန်းကျော်ရှိလာခဲ့ပြီး သေဆုံးသူ စုစုပေါင်း ၁၅,၀၀၀ ကျော်ရှိလာခဲ့ပြီ ဖြစ်ပါတယ်။

အာဆီယံနိုင်ငံတွေထဲမှာတော့ ကိုဗစ်-၁၉ သန်းချီကူးစက်ခံ အင်ဒိုနီးရှား၊ ဖိလစ်ပိုင် မလေးရှားနိုင်ငံတွေပြီးရင် ထိုင်းနိုင်ငံကတော့ ကူးစက်မှုအမြင့်ဆုံးအမှတ်စဉ် ၄ နေရာမှာ ရှိနေပါတယ်။

ကမ္ဘာတဝန်းမှာတော့ လက်ရှိအချိန်ထိ ရောဂါကူးစက်ခံရသူပေါင်း ၂၂၇ ဒသမ ၈ သန်းကျော်၊ သေဆုံးသူ ၄ ဒသမ ၆၈ သန်းကျော်နဲ့ ရောဂါပြန်လည်ပျောက်ကင်းသက်သာ လာသူပေါင်း ၂၀၄ ဒသမ ၄၄ သန်းကျော် ရှိနေတာ ဖြစ်ပါတယ်။

6 hours Ago

မန်စီးတီးအသင်းခေါင်းဆောင်တာဝန်အတွက် မဲပေးမှုတွင် ဒီဘရိုင်း စတုတ္ထနေရာကျဆင်း

မန်စီးတီအသင်းခေါင်းဆောင်တာဝန်အတွက် ကစားသမားတွေက မဲပေးရွေးချယ်ရာမှာ ကွင်းလယ်လူ ဒီဘရိုင်းက စတုတ္ထနေရာ ရောက်သွားခဲ့ပါတယ်။ 

မန်စီးတီးနည်းပြဂွါဒီယိုလာဟာ ၂၀၁၉ ခုနှစ်က ဗင်းဆင့်ကွန်ပနီ ထွက်ခွာသွားပြီးနောက် အသင်းခေါင်းဆောင်ရာထူးကို ကစားသမားတွေရဲ့ မဲပေးမူနဲ့ နှစ်စဉ်ပြန်လည်ရွေးချယ်ခဲ့တာလို့ Telegraph သတင်းမှာ ဖော်ပြပါတယ်။ 

ပထမအသင်းခေါင်းဆောင်အနေနဲ့ ကွင်းလယ်လူ ဖာနန်ဒင်ညိုက ဆက်ရှိခဲ့ပြီး ဒုတိယအသင်းခေါင်းဆောင်အနေနဲ့ ဂွမ်ဒိုဂန်၊ တတိယအသင်းခေါင်းဆောင်အနေနဲ့ ရူဘင်ဒိုင်ယက်ဇ်တို့ ရွေးချယ်ခံခဲ့ရတာပါ။ 

ဒီဘရိုင်းဟာ ချဲလ်ဆီးနဲ့ ကစားခဲ့တဲ့ ချန်ပီယံဗိုလ်လုပွဲမှာ အသင်းခေါင်းဆောင်အဖြစ် နောက်ဆုံးအကြိမ် တာဝန်ယူခဲ့တာပါ။ 

မန်စီးတီးအသင်းဟာ လိုက်ပ်ဇစ်နဲ့ ချန်ပီယံလိဂ်ပွဲမှာ ဒီဘရိုင်းက ပွဲထွက်စာရင်းမှာ ပါဝင်ခဲ့ပေမဲ့ ရူဘင်ဒိုင်ယက်ဇ်က အသင်းခေါင်းဆောင်လက်ပတ်ဝတ်ဆင်ပြီး ကစားသွားခဲ့ပါတယ်။ 

6 hours Ago

စစ်တပ်ဖမ်းဆီးသတ်ဖြတ်ခံရသည့် PDF ငွေကိုင်အမျိုးသမီးအပါအဝင် ကျဆုံးပြည်သူ ၁၁၀၀ ကျော် ရှိလာ

မြန်မာနိုင်ငံမှာ မတရားအာဏာသိမ်းကာလ ၇ လခွဲကျော်အကြာ အကြမ်းဖက်စစ် တပ် ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူအယောက် ၁၁၀၀ ကျော် ရှိလာပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ စက်တင်ဘာ ၁၆ ရက်အထိ အေအေပီပီက ကောက်ယူမှတ်တမ်း ပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ပြည်သူ ၈၂၂၃ ယောက် ဖမ်းဆီးခံခဲ့ရကာ ၆၅၇၂ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၂၇၆ ယောက်ကတော့ ထောင်ဒဏ် ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၂၆ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

အမှုဖွင့်ခံထားရပြီး ဖမ်းဝရမ်းထုတ်ခံထားရတဲ့အတွက် တိမ်းရှောင်နေသူ အရေအတွက်ကတော့ ၁၉၈၄ ယောက်ရှိနေပြီး သူတို့ထဲက မျက်ကွယ်သေဒဏ်ချမှတ်ခံထားရသူ ၃၉ ယောက် အပါအဝင် ၁၁၈ ယောက်ဟာ မျက်ကွယ်ပြစ်ဒဏ်ချမှတ်ခံထားရကာ  သေ ဒဏ်ချမှတ်ခံထားရသူ စုစုပေါင်း ၆၅ ယောက် ရှိခဲ့ပြီဖြစ်ပါတယ်။

စစ်ကိုင်းတိုင်းဒေသကြီး၊ ရွှေဘိုမြို့မှာ စစ်သားတွေ ဖမ်းဆီးညှဉ်းပန်းနှိပ်စက်ခဲ့တာကြောင့် ဒဏ်ရာအပြင်းအထန်ရရှိခဲ့သူ ကိုဇင်မင်းဦးဟာ စက်တင်ဘာ ၁၅ ရက်ည ၁၁ နာရီမှာ ကျဆုံးသွားခဲ့ကြောင်း သိရှိရပါတယ်။ 

စက်တင်ဘာ ၂ ရက်နေ့၊ ည ၈ နာရီ လောက်မှာ ရွှေဘိုစက်မှုဇုန်ကပြန်လာတဲ့ ကိုဇင်မင်းဦးအပါအဝင် ဒေသခံ ၅ ယောက်ကို စစ်သားတွေက ဖမ်းဆီးခဲ့ပြီး ရိုက်နှက်ညှဉ်းပန်းနှိပ်စက်ခဲ့ကြတာလို့ ဆိုပါတယ်။ 

ရိုက်နှက်ခံခဲ့ရတဲ့ ဒေသခံ ၅ ယောက်ထဲမှာ ဒဏ်ရာအပြင်းအထန်ရရှိခဲ့သူတွေဖြစ်ကြတဲ့ ကိုဇင်မင်းဦး၊ ကိုနိုင်မျိုးနဲ့ ကိုဥက္ကာတို့ ၃ ယောက်ကို ညတွင်းချင်းဆေးရုံပို့ဆောင်ခဲ့ပေမယ့် ကို နိုင်မျိုးကတော့ ရိုက်နှက်ခံခဲ့ရတဲ့ ဒဏ်ရာတွေနဲ့ စက်တင်ဘာ ၃ ရက်မှာ ကျဆုံးသွားခဲ့တယ်လို့  သိရှိရပါတယ်။

စက်တင်ဘာ ၁၄ ရက်နေ့ ညအချိန်က မကွေးတိုင်းဒေသကြီး၊ ပေါက်မြို့နယ်၊ တောင်ဘက်ကျေးရွာထဲကို အရပ်ဝတ်တွေ ဝတ်ဆင်ထားတဲ့ အကြမ်းဖက်စစ်အုပ်စု တပ် ဖွဲ့ဝင် ၁၀ ယောက်က သေနတ်ပစ်ဖောက် ဝင်ရောက်လာခဲ့ပြီး ပြည်သူ့ကာကွယ်ရေး ပြောက်ကျားအဖွဲ့ငွေကိုင်ဖြစ်သူ အသက် ၄၂ နှစ်အရွယ် ဒေါ်စန္ဒာဝင်းကို ငွေကျပ်သိန်း ၁၈၀ နဲ့အတူ ဖမ်းဆီးခေါ်ဆောင်သွားခဲ့ပြီးနောက် ပစ်သတ်ခဲ့တယ်လို့ သိရပါတယ်။ 

ဒေါ်စန္ဒာဝင်းဟာ ဖမ်းဆီးထိန်းသိမ်းခေါ်ဆောင်ခံရပြီးချင်း အနီးကပ်ပစ်ခတ်ခံခဲ့ရတာကြောင့် နောက်စေ့ကို ကျည်ဆန်ထိမှန် ဦးခေါင်းပွင့်ထွက်ပြီး သေဆုံးရတာလို့ သိရပါတယ်။

အေအေပီပီအနေနဲ့ လက်ရှိအခြေအနေတွေကို နေ့စဉ်စောင့်ကြည့်မှတ်တမ်းတင်နေကာ စစ်အာဏာသိမ်းမှုနဲ့ပတ်သက်ပြီး ဖမ်းဆီး၊ တရားစွဲဆို၊ ပြစ်ဒဏ်ချမှတ်ခံ ထားရသူတွေ စာရင်းကို နေ့စဉ်ထုတ်ပြန်သွားမယ်လို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ် ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အ သီးသီးက ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာကို သိရှိပါက အေအေပီပီ အီးမေးလ်၊ ဖေ့စ်ဘွတ်ခ်နဲ့ တွစ်တာတို့ကတဆင့် ဆက်သွယ်အကြောင်းကြားဖို့ အသိပေးထားပါတယ်။

6 hours Ago

ကန့်ဘလူ PDF က စစ်ကားသုံးစီးကို မိုင်းခွဲ

စစ်ကိုင်းတိုင်း ကန့်ဘလူမြို့နယ်၊ ရွှေဘို-မြစ်ကြီးနာလမ်းတနေရာမှာ စက်တင်ဘာ ၁၆ ရက် ညနေ ၃ နာရီလောက်က ကန့်ဘလူက ထွက်လာတဲ့ စစ်ယာဉ်တန်း သုံးစီးကို မိုင်းခွဲတိုက်ခိုက်ခဲ့ တယ်လို့ ကန့်ဘလူ PDF က ထုတ်ပြန်ကြေညာပါတယ်။

ဒီတိုက်ခိုက်မှုကြောင့် စစ်ကား သုံးစီးလုံး အထိနာခဲ့ပြီး ထိခိုက်ဒဏ်ရာ ရရှိမှုအခြေအနေတော့ အတိအကျမသိရသေးပါဘူးလို့ ဆိုပါတယ်။

ကန့်ဘလူ PDF အနေနဲ့ ပြည်သူ့သွေးကြွေးအတွက် နေ့စဉ် လှုပ်ရှားနေတာဖြစ်ပြီး  စစ်ကောင်စီရဲ့ အကျိုးစီးပွားကို အထောက်အကူပြုနေတဲ့ မိုင်တဲလ်တာဝါတိုင်တွေကိုလည်း ဆက်လက်တိုက်ခိုက် ဖျက်ဆီး‌နေတာ ဖြစ်ပါတယ်။

စက်တင်ဘာ ၁၅ ရက် ညပိုင်းကလည်း စပါးနံ့သာရွာမှာရှိတဲ့ မိုင်တဲလ်တာဝါတိုင်ကို ဖျက်ဆီးခဲ့တယ်လို့ သိရပါတယ်။

6 hours Ago

ဖက်ဆစ်စစ်တပ်ကို တော်လှန်ရန် စစ်သင်တန်းတက်နေသည့် PDF လူငယ်များ အပိုင်း (၂)

စစ်အာဏာသိမ်းမှုကို ဆန့်ကျင်တဲ့ ငြိမ်းချမ်းစွာဆန္ဒထုတ်ဖော်ပွဲတွေကို အကြမ်းဖက်စစ်ကောင်စီက ရက်စက်စွာပစ်ခတ် ဖြိုခွင်းခဲ့ပြီးနောက် လူငယ်အများအပြား စစ်အာဏာရှင်ကို အမြစ်ပြတ် ချေမှုန်းဖို့ လက်နက်ကိုင်တော်လှန်ရေးလမ်းစဉ်ကို ရွေးချယ်ခဲ့ကြပါတယ်။

အမျိုးသားညီညွတ်ရေးအစိုးရ (NUG) က ပြည်သူ့ကာကွယ်ရေးတပ်ဖွဲ့ ( PDF ) ဖွဲ့ပြီးတဲ့နောက် လူငယ်အများအပြားက လက်နက်ကိုင်တိုက်ပွဲဝင်ရေးအတွက် စစ်သင်တန်းတက်ရောက်ဖို့ လွတ်မြောက်နယ်မြေကို  ရောက်ရှိလာခဲ့ကြတာပါ။

တောထဲတောင်ထဲမှာ ဒုက္ခမျိုးစုံကို သည်းခံကာ စစ်အာဏာရှင်တော်လှန်ရေးအတွက် စစ်သင်တန်းတက်ရောက်နေတဲ့ ပြည်သူ့ကာကွယ်ရေးတပ်ဖွဲ့ (PDF) ၀င်လူငယ်တွေအကြောင်းကို ပြည်သူများသိရှိစေဖို့ တင်ပြလိုက်ရပါတယ်။

စစ်သင်တန်းမှာ PDF လူငယ်တွေဟာ စစ်အာဏာရှင်ကို တိုက်ခိုက်ဖို့ အသက်ကိုပင်စွန့်ထားသူတွေ ဖြစ်တာကြောင့် မိမိတို့ရဲ့ မျက်နှာတွေကို ဖုံးကွယ်ဖို့ (မျက်နှာအုပ်ပေးရန်) မလိုသလို ခွင့်ပြုကြောင်း၊  ပြည်သူများအနေနဲ့လည်း ပြည်သူ့ကာကွယ်ရေးတပ်ဖွဲ့ (PDF) တွေကို နည်းမျိုးစုံနဲ့ ကူညီထောက်ပံ့နိုင်ကြောင်း သိရပါတယ်။

Photo -  MPA

6 hours Ago

ကန်ပက်လက်နှင့်ဆောမြို့ နယ်စပ်တိုက်ပွဲတွင် စစ်ကောင်စီဘက်က ၇ ဦးသေဆုံး

ချင်းပြည်နယ် ကန်ပက်လက်နဲ့ မကွေးတိုင်း ဆောမြို့နယ်အစပ်မှာ စက်တင်ဘာလ ၁၆ ရက်နေ့က ကန်ပက်လက် CDF နဲ့ စစ်ကောင်စီတပ်တွေတိုက်ပွဲ ဖြစ်ပွားပြီး စစ်ကောင်စီဘက်က ၇ ယောက်သေဆုံးကာ အများအပြား ဒဏ်ရာရသွားတယ်လို့ CDF ကထုတ်ပြန်ပါတယ်။

ချင်ပြည်နယ် ကျင်ဒွေးမြို့ကို အင်အားဖြည့်ဖို့လာတဲ့ လောင်းရှည် ကပစ က စစ်ကောင်စီတပ်သားတွေကို ကန်ပက်လက် CDF က ဆောမြို့နယ်နဲ့ ကန်ပက်လက် နယ်စပ်မှာ ကြားဖြတ်တိုက်ခိုက်ရာ စစ်ကောင်စီဘက်က ၇ ယောက်သေဆုံးပြီးတော့ အများအပြား ဒဏ်ရာရရှိကာ ဆုတ်ခွာသွားတယ်လို့ ဆိုပါတယ်။

စစ်ကောင်စီဘက်ဘက်က လက်နက်ကြီးတွေနဲ့ ပြန်လည်ပစ်ခတ်ခဲ့ပေမယ့်လည်း ကန်ပက်လက် CDF ဘက်က အထိခိုက်အကျဆုံးမရှိဘူးလို့ ဖော်ပြထားပါတယ်။

ကန်ပက်လက်မြို့နယ်ထဲမှာ မနေ့က စက်တင်ဘာလ ၁၅ ရက်နေ့မှာလည်း CDF တပ်ဖွဲ့နဲ့ အကြမ်းဖက်စစ်ကောင်စီတပ်တွေ တိုက်ပွဲဖြစ်ပွားခဲ့ပြီးတော့ စစ်ကောင်စီဘက်က ၄ ယောက်သေဆုံးကာ အများအပြား ဒဏ်ရာရရှိခဲ့တယ်လို့ သိရပါတယ်။

မိဘပြည်သူတွေအနေနဲ့လည်း အတည်မပြု မထုတ်ပြန်ရသေးတဲ့ တိုက်ပွဲသတင်းနဲ့ တိုက်ပွဲ ဖြစ်ပွားတဲ့ နေရာတွေကို လူမှုကွန်ရက်စာမျက်နှာပေါ်တွေမှာ ရေးသားဖြန့်ဝေတာတွေမပြုလုပ်ကြဖို့ အလေးနက်တိုက်တွန်းထားပါတယ်။

ချင်းပြည်နယ် ကန်ပက်လက်နဲ့ မကွေးတိုင်းဆောမြို့နယ်အစပ်မှာ ဖြစ်ပွားခဲ့တဲ့တိုက်ပွဲအတွင်း စစ်ကောင်စီတပ်သားတွေ သေဆုံးဒဏ်ရာရရှိခဲ့တာနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

7 hours Ago

တောင်တွင်းကြီးက စစ်​ကောင်စီတပ်စွဲထားသည့်နေရာတွင် ဗုံး ၂ လုံး​ပေါက်ကွဲ

မကွေးတိုင်း၊ တောင်တွင်းကြီးမြို့ မြောက်ဘက်အထွက် အသောကဘုန်းကြီးကျောင်းအနီး တောင်တွင်းကြီး-မြို့သစ် ကားလမ်းကိုပိတ်ပြီး တပ်စွဲထားတဲ့ အကြမ်းဖက်စစ်ကောင်စီတပ် စစ်ဆေးရေးဂိတ်မှာ စက်တင်ဘာ ၁၆ ရက်နေ့ညက ဗုံး ၂ လုံးပေါက်ကွဲခဲ့တယ်လို့ ဒေသခံတွေဆီက သိရပါတယ်။

ဒေသခံတဦးက “စစ်ကောင်စီတပ်သားတွေ ထိခိုက်ဒဏ်ရာရမယ့်ပုံပဲဗျ။ ပထမအကြိမ် ဗုံးကွဲတဲ့အသံကြားပြီး သိပ်မကြာဘူး လူနာတင်ကားတွေရောက်လာပြီး ထိတဲ့ကောင်တွေကိုတင်သွားတယ်။ ဆေးရုံပို့တယ်နဲ့တူတယ်။ နောက်တလုံးကွဲတော့လည်း ထိမှာပါပဲ” လို့ ပြောပါတယ်။

အဆိုပါစစ်ကောင်စီ တပ်စွဲထားတဲ့ စစ်ဆေးရေးဂိတ်မှာ စက်တင်ဘာ ၁၆ ရက်နေ့ည ၁၁ နာရီဝန်းကျင်နဲ့ ၁၂ နာရီဝန်းကျင်တွေမှာ ဗုံး ၂ လုံးရှေ့ဆင့်နောက်ဆင့်ပေါက်ကွဲခဲ့တာပါ။

ဗိဿနိုးနယ်မြေပြည်သူ့ကာကွယ်ရေးတပ်မတော်၊ ပြန်ကြားရေးတာဝန်ခံ ဗိုလ်ထန်ထွဋ်က “ဟုတ်ပါတယ်။ ကျုပ်တို့ရဲ့ ဗိဿနိုးပြည်သူ့ကာကွယ်ရေးတပ်မတော်သားတွေက ဗုံးခွဲတိုက်ခိုက်လိုက်တာပါ။ အသေးစိတ်ကို နောက်မှထုတ်ပြန်လိမ့်မယ်။ စစ်ကောင်စီရဲ့ နလပိန်းတုန်းကောင်တွေကလေ ပြည်သူကိုနှိပ်စက်ရတာ သာယာနေတဲ့ပုံပေါ်နေတယ်။ ဘာမှမဆိုင်တဲ့ ပြည်သူတွေကို နှိပ်စက်နေတာတွေ ရပ်တန်းကရပ်တော့လို့ ထပ်ပြီးသတိပေးလိုက်တယ်'' လို့ ပြောပါတယ်။

အကြမ်းဖက်စစ်ကောင်စီဟာ နယ်မြေရှင်းလင်းရေးအကြောင်းပြပြီး မကွေးတိုင်းအတွင်းက တောင်တွင်းကြီးမြို့နယ်တခုတည်းကို စက်တင်ဘာ ၁၄ ရက်နေ့က အင်တာနက်ဖြတ်တောက်ထားပြီး ဒေသခံကျေးရွာနေ ပြည်သူအချို့ကိုလည်း အကြောင်းမဲ့ ဖမ်းဆီးခေါ်ဆောင်နှိပ်စက်တာ ခံနေရတယ်လို့ ဒေသခံတွေဆီက သိရပါတယ်။

8 hours Ago

ဆောမြို့နယ်တိုက်ပွဲတွင် စစ်တပ်က ၁၀ ဦးထက်မနည်းဒဏ်ရာရ၊ မြို့သစ်ပြည်သူထောင်ချီ တိမ်းရှောင်နေရ

မကွေးတိုင်းဒေသကြီး ဆောမြို့နယ်မှာ စက်တင်ဘာလ ၁၆ ရကနေ့ မွန်းလွဲပိုင်းက ဆော PDF နဲ့ အကြမ်းဖက်စစ်ကောင်စီတပ်တွေ တိုက်ပွဲဖြစ်ပွားရာ စစ်သား ၁၀ ယောက်ထက်မနည်း  ဒဏ်ရာရသွားတယ်လို့ ဆော PDF ကထုတ်ပြန်ပါတယ်။

ဆော-ကံကြီး လမ်းပိုင်းမှာ မွန်းလွဲ ၃ နာရီခွဲလောက်က လမ်းဘေးဝဲယာကို ပစ်ခတ်ပြီးတော့ တက်လာတဲ့ စစ်ကောင်စီတပ် အင်အား ၁၀၀ လောက်ပါတဲ့ စစ်ကြောင်းကို ဆော PDF အထူးပြောက်ကျား မိုင်းတပ်ဖွဲ့က မိုင်းခွဲတိုက်ခိုက်ရာမှာ စစ်ကောင်စီဘက်က ၁၀ ယောက်ထက်မနည်း ဒဏ်ရာရသွားတယ်လို့ဆိုပါတယ်။

မြေပြင်တိုက်ပွဲ အခြေနေအရ သေဆုံးတဲ့ စာရင်းကို အတိကျ အတည်မပြုနိုင်သေးဘဲ စစ်ကောင်စီတပ်တွေက လက်နက်ကြီးတွေနဲ့ ပစ်ခတ်ပေမယ့် ဆော PDF တပ်ဖွဲ့ဘက်က အထိခိုက်အကျဆုံး မရှိဘဲ ဆုတ်ခွာနိုင်ခဲ့တယ်လို့ ဖော်ပြထားပါတယ်။

ဆောပြည်သူ့ကာကွယ်ရေးတပ်ဖွဲ့က ဖြတ်သန်းသွားလာတာတွေမပြုလုပ်ကြဖို့ ကြေညာထားတဲ့ လမ်းပိုင်းတွေမှာ တိုက်ပွဲတွေ ပြင်းထန်လာနိုင်ပြီး မိုင်းပေါက်ကွဲတာတွေရှိနိုင်တာကြောင့် ပြည်သူတွေအနေနဲ့ သတိပြုဆင်ခြင်ကြဖို့ သတိပေးထားပါတယ်။

မကွေးတိုင်းဒေသကြီး မြို့သစ်မြို့နယ် မကျည်းကုန်းကြီးကျေးရွာမှာလည်း စက်တင်ဘာလ ၁၆ ရက်နေ့ မနက်ပိုင်းက အကြမ်းစစ်အုပ်စုတွေ ဝင်ရောက်မွှေနှောက်တာကြောင့် အိမ်ခြေ ၈၀၀ လောက်က ပြည်သူ ၃၀၀၀ နီးပါး ဘေးလွတ်ရာ တိမ်းရှောင်နေရတယ်လို့ ဒေသခံတွေဆီကနေ သိရပါတယ်။

မကျည်းကုန်းကြီးကျေးရွာမှာ စက်တင်ဘာ ၁၆ ရက် မနက် ၁၁ နာရီလောက်မှာ ဒလန်တွေက PDF အဖွဲ့တွေ ရှိတယ်ဆိုပြီး သတင်းပေးတဲ့အတွက် အကြမ်းဖက်စစ်ကောင်စီအဖွဲ့ဝင် ၃၀ လောက် ဆိုင်ကယ် ၁၆ စီးနဲ့ ဝင်ရောက်မွှေနှောက်ခဲ့ကြတာလို့ ရွာသားတစ်ယောက်က ပြောပါတယ်။

အကြမ်းဖက်စစ်အုပ်စုတွေဟာ NLD ပါတီဝန်းရံတဲ့ ပြည်သူတွေနဲ့ CDM ဝန်ထမ်းတွေရဲ့ နေအိမ်တွေကို ဝင်မွှေသလို့ ဘုန်းကြီးကျောင်းကိုလည်း ဝင်မွှေသွားကြပြီးတော့ မွန်းလွဲ ၂ နာရီလောက် ပြန်သွားတယ်လို့ သိရပေမယ့် ရွာကို ဒရုန်းတွေနဲ့ ကင်းထောက်နေတယ်လို့ သိရတာကြောင့် မပြန်ရဲကြသေးဘူးလို့ ဆိုပါတယ်။

မြို့သစ်မြို့မှာ ပြီးခဲ့တဲ့ စက်တင်ဘာလ ၈ ရက်နေ့ကလည်း အကြမ်းဖက်စစ်အုပ်စုတွေဟာ ဒေသခံပြည်သူ ၇ ယောက်ကို ဖမ်းဆီးသွားတယ်လို့ သိရပါတယ်။

8 hours Ago

စလင်းမြို့နယ်တွင် CDM ကျောင်းဆရာမ ၁ ဦး ဖမ်းဆီးခံရ

မကွေးတိုင်း၊ စလင်းမြို့က အာဏာဖီဆန် CDM မှာပါဝင်တဲ့ ကျောင်းဆရာမ ၁ ဦးကို အကြမ်းဖက်စစ်ကောင်စီတပ်တွေဟာ စက်တင်ဘာ ၁၆ ရက်နေ့ ညနေ ၄ ခွဲဝန်းကျင်လောက်က ဆရာမနေထိုင်ရာ ပွင့်ဖြူမြို့၊ အရှေ့ပိုင်းရပ်ကွက်၊ ကံ့ကော်လမ်းနေအိမ်မှာ လာရောက်ဖမ်းဆီးသွားတယ်လို့ သိရပါတယ်။

မိသားစုနဲ့နီးစပ်သူတဦးက “သူက အသက်လည်းကြီးနေပြီဆိုတော့ စိတ်တော့ပူတာပေါ့။ ဘယ်ခေါ်သွားလည်းတော့ မသိဘူး။ စလင်းရဲစခန်းကိုတော့ မေးကြည့်ရမှာပေါ့” လို့ ပြောပါတယ်။

အာဏာဖီဆန် CDM မှာပါဝင်လို့ အကြမ်းဖက်စစ်ကောင်စီတပ်ရဲ့ ဖမ်းဆီးခံရသူမှာ ဆရာမဒေါ်ဝေဝေ ဖြစ်ပြီး စလင်းမြို့နယ်၊ ငသိုင်းချောင်းကျေးရွာ၊ အခြေခံပညာအထက်တန်းကျောင်းက ပညာရေးဝန်ထမ်းတဦးဖြစ်ကြောင်းနဲ့ သက်ပြည့်ပင်စင်ယူဖို့ နှစ်အနည်းငယ်သာလိုတော့ကြောင်း မိသားစုနဲ့နီးစပ်သူတွေဆီက သိရပါတယ်။

ဒီဗွီဘီက ဆရာမဒေါ်ဝေဝေ ဖမ်းဆီးခံရတာနဲ့ပတ်သက်လို့ စလင်းမြို့မရဲစခန်းကို ဆက်သွယ်ခဲ့ပေမယ့် ဖုန်းလက်ခံဖြေကြားခဲ့ခြင်းမရှိပါဘူး။

8 hours Ago

ကိုဗစ်-၁၉ ကူးစက်ခံရသူပေါင်း ၄၄၀,၀၀၀ ကျော်ရှိလာ

မြန်မာနိုင်ငံမှာ တရက်တည်း ကိုဗစ်-၁၉ အတည်ပြုလူနာသစ် ၁,၇၉၀ ယောက်နဲ့ စု စုပေါင်း ကူးစက်ခံရသူ ၄၄၀,၀၀၀ ကျော်လာခဲ့ပြီလို့ အကြမ်းဖက်စစ်ကောင်စီ ကျန်းမာရေးဝန်ကြီးဌာနက စက်တင်ဘာ ၁၆ ရက်ညပိုင်းမှာ ထုတ်ပြန်ပါတယ်။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု တိကျတဲ့ ပမာဏအတိုင်းအဆကိုတော့ မသိနိုင်သေးပါဘူး။

ဝန်ကြီးဌာန ထုတ်ပြန်ချက်ထဲမှာတော့ ပြီးခဲ့တဲ့ ၂၄ နာရီအတွင်း ဓာတ်ခွဲနမူနာ ၂၀,၄၇၀ ခုကို စစ်ဆေးခဲ့ရာမှာ ရောဂါကူးစက်မှုအသစ် ၁,၇၉၀ ယောက် တွေ့ရှိခဲ့တာမို့ ပိုးတွေ့နှုန်း ၈ ဒသမ ၇၄ ရာခိုင်နှုန်းကျော် ရှိနေပါတယ်။

ရောဂါပြန်လည်ပျောက်ကင်းသက်သာလာလို့ ဆေးရုံက ဆင်းခွင့်ရသူအရေအ တွက်ကတော့ ၂,၆၇၂  ယောက်ရှိနေပြီး သေဆုံးသူအသစ်ကတော့ ၈၅ ယောက်ရှိနေတယ်လို့ ဆိုပါတယ်။

လက်ရှိအချိန်ထိ မြန်မာနိုင်ငံမှာ ကိုဗစ်-၁၉ ကြောင့် သေဆုံးသူ စုစုပေါင်း ၁၆,၈၆၉ ယောက်နဲ့ ရောဂါကူးစက်ခံရသူ စုစုပေါင်း ၄၄၀၇၄၁ ယောက် ရှိခဲ့ပြီ ဖြစ်ပါတယ်။

လတ်တလော ရောဂါကူးစက်မှုတွေ မြင့်တက်နေတာကြောင့် နိုင်ငံတဝန်း စာသင် ကျောင်းတွေ ပိတ်ထားသလို ရောဂါကိုထိန်းချုပ်နိုင်ဖို့ အများပြည်သူရုံးပိတ်ရက်အဖြစ် အခုစက်တင်ဘာလကုန်အထိ တိုးမြှင့်သတ်မှတ်ကြောင်း စစ်ကောင်စီက ကြေညာထားပါတယ်။  ဒါ့အပြင် ရောဂါ ကူးစက်မှုများတဲ့ နိုင်ငံတဝန်း မြို့နယ်ပေါင်း ၁၂၀ ကျော်ကို လည်း Stay At Home အမိန့်ထုတ်ပြန်ထားပါတယ်။

8 hours Ago
More News
Up