zဖေ၀င်း

September 15, 2015

လူထုအမြင်နဲ့ ခေတ်အဆက်ဆက် မဲပေးပုံ

မြန်မာနိုင်ငံမှာ ပါတီစုံရွေးကောက်ပွဲ ကျင်းပဖို့ ရက်ပေါင်း ၆၀ ကျော်ပဲ လိုပါတော့တယ်။ ဒီရွေးကောက်ပွဲဟာ ၁၉၈၈ နောက်ပိုင်း တနိုင်ငံလုံး ကျင်းပတဲ့ တတိယအကြိမ်မြောက် ရွေးကောက်ပွဲ ဖြစ်ပါတယ်။ ၁၉၉၀ ရွေးကောက်ပွဲနဲ့ ၂၀၁၂ ကြားဖြတ် ရွေးကောက်ပွဲတွေကိုတော့ လွတ်လပ်တဲ့ ရွေးကောက်ပွဲတွေအဖြစ် သတ်မှတ်ကြတာ ဖြစ်တယ်။ အခု ၂၀၁၅ ရွေးကောက်ပွဲကတော့ ဘယ်လောက်အထိ လွတ်လပ်မလဲဆိုတာ စောင့်ကြည့်ကြရမှာ ဖြစ်ပါတယ်။ လွတ်လပ်တဲ့ရွေးကောက်ပွဲအဖြစ် သတ်မှတ်ခံရတဲ့ ၁၉၉၀ ရွေးကောက်ပွဲနဲ့ ၂၀၁၅ ရွေးကောက်ပွဲကို နှိုင်းယှဉ်ကြည့်မယ်ဆိုရင် ပါဝင်ယှဉ်ပြိုင်တဲ့ ကိုယ်စားလှယ်လောင်းတွေ ၃ ဆလောက် များလာတာ တွေ့ရပါတယ်။ ၁၉၉၀ တုန်းက ပါဝင်ယှဉ်ပြိုင်တဲ့ လွှတ်တော်ကိုယ်စားလှယ်လောင်း ဦးရေ ၂၂၉၆ ဦးသာ ရှိခဲ့ပေမယ့် အခု ၂၀၁၅ မှာတော့ ၆၁၈၉ ဦးအထိ ရှိလာတာပါ။ ပါဝင်ယှဉ်ပြိုင်တဲ့ ပါတီအရေအတွက်ကတော့ အတူတူလောက်ပဲ ဖြစ်ပါတယ်။ ၁၉၉၀ တုန်းက နိုင်ငံရေးပါတီအဖွဲ့အစည်း ၉၃ ဖွဲ့ ၀င်ရောက်ယှဉ်ပြိုင်ရာမှာ ၂၇ ပါတီသာ အမတ်နေရာရခဲ့တာ ဖြစ်တယ်။ ဒီထဲမှာ အများဆုံး အမတ်နေရာရတဲ့ ၅ ပါတီကို ပြောမယ်ဆိုရင် အန်အယ်လ်ဒီ ၃၉၂ ဦး၊ အက်စ်အန်အယ်လ်ဒီ ၂၃ ဦး၊ ရခိုင်ဒီမိုကရေစီအဖွဲ့ချုပ် ၁၁ ဦး၊ တစည ၁၀ ဦးနဲ့ မွန်အမျိုးသား ဒီမိုကရေစီအဖွဲ့ ၅ ဦးဆိုပြီး တွေ့ရမှာပါ။ လွတ်လပ်မှု၊ တရားမျှတမှု မရှိဘူးလို့ အားလုံးသိကြတဲ့ ၂၀၁၀ ရွေးကောက်ပွဲမှာတော့ အန်အယ်လ်ဒီ မပါဝင်ခဲ့ပေမယ့် တိုင်းရင်းသားပါတီတွေက အမတ်နေရာ အများအပြား အနိုင်ရခဲ့တာ တွေ့ရမှာပါ။ လွတ်လပ်ပြီး တရားမျှတမှု ရှိခဲ့တဲ့ ၂၀၁၂ ကြားဖြတ် ရွေးကောက်ပွဲမှာ အန်အယ်လ်ဒီ တပါတီတည်းကသာ ပါဝင်ယှဉ်ပြိုင်တဲ့ အမတ်နေရာ ၄၄ နေရာမှာ ၄၃ နေရာအထိ အနိုင်ရခဲ့တာ ဖြစ်တယ်။ လွတ်လပ်ရေးမရမီ ၁၉၄၇ ခုနှစ် တိုင်းပြုပြည်ပြု လွှတ်တော် ရွေးကောက်ပွဲကစလို့ ၁၉၅၆ ရွေးကောက်ပွဲနဲ့ ၁၉၆၀ ရွေးကောက်ပွဲအပါ စုစုပေါင်း ၃ ကြိမ်ကို လွတ်လပ်တဲ့ ရွေးကောက်ပွဲများအဖြစ် ယေဘုယျ သတ်မှတ်ကြတာပါ။ ဒီရွေးကောက်ပွဲတွေရဲ့ မဲရပုံကို ပြန်ကြည့်ရင် ၁၉၄၇ ရွေးကောက်ပွဲမှာ ပြည်မအတွက် အမတ်နေရာ ၁၈၂ နေရာမှာ ဖဆပလက ၁၇၁ နေရာ အနိုင်ရပြီး အပြတ်အသတ် နိုင်ခဲ့တာ ဖြစ်တယ်။ အဲဒီတုန်းက ကွန်မြူနစ်အမတ် ၇ နေရာနဲ့ ကျန်တာက တသီးပုဂ္ဂလနဲ့ လူမျိုးစုအမတ်များက အနိုင်ရတာပါ။ ၁၉၅၆ ခုနှစ် ရွေးကောက်ပွဲမှာတော့ ဖဆပလက အမတ်နေရာ ၁၄၄ နေရာနဲ့ လက်ဝဲညီညွတ်ရေး တပ်ပေါင်းစုဖြစ်တဲ့ ပမညတက ၄၇ နေရာသာ အနိုင်ရခဲ့တာ တွေ့ရပါတယ်။ ရခိုင် ၆ နေရာနဲ့ တသီးပုဂ္ဂလ ၉ နေရာ အနိုင်ရခဲ့ပါတယ်။ ဖဆပလ နှစ်ခြမ်းကွဲပြီးနောက် ယှဉ်ပြိုင်ကြတဲ့ ၁၉၆၀ ရွေးကောက်ပွဲမှာတော့ သန့်ရှင်း ဖဆပလက အမတ်နေရာ ၁၅၉ နေရာနဲ့ တည်မြဲ ဖဆပလက ၄၂ နေရာသာ အနိုင်ရခဲ့ပါတယ်။ ဒီရွေးကောက်ပွဲမှာ ပမညတက အမတ်နေရာ တနေရာမှ အနိုင်မရခဲ့ဘဲ ကျန်တိုင်းရင်းသားများက ရှမ်းအမတ် ၂၃ နေရာ အပါ ၃၇ နေရာ အနိုင်ရခဲ့တာ ဖြစ်ပါတယ်။ တွေ့ရတာကတော့ လွတ်လပ်ပြီး တရားမျှတတယ်လို့ ဆိုကြတဲ့ ရွေးကောက်ပွဲတွေ အားလုံးမှာ ပါတီတခုတည်းကသာ အမတ်နေရာ အများစုကြီးကို ရလေ့ရှိတယ် ဆိုတာပါပဲ။ ဒါဟာ မြန်မာပြည်သူများရဲ့ ယေဘုယျ မဲပေးပုံလို့ ဆိုနိုင်ပါတယ်။ ပြန်ပြီး ခွဲခြားကြည့်မယ် ဆိုရင်တော့ ဖဆပလခေတ် မဲပေးပုံဟာ လွတ်လပ်ရေးတိုက်ပွဲ၊ နယ်ချဲ့ဆန့်ကျင်ရေး တိုက်ပွဲတွေရဲ့ အရှိန်နဲ့ ဖြစ်တည်လာတဲ့ မဲပေးပုံဖြစ်ပြီး ၈၈ နောက်ပိုင်း မဲပေးပုံကတော့ မဆလခေတ်နဲ့ န၀တခေတ်အပေါ် မုန်းတီးနာကြည်းမှု အခြေခံက လာတဲ့ မဲပေးပုံလို့ ဆိုရမှာပါ။ ဒီလို ခေတ်အပြောင်းအလွဲကြီးတွေမှာ လူထုချစ်တဲ့၊ ယုံကြည်လေးစားတဲ့ ခေါင်းဆောင်တွေနဲ့ ပါတီတွေ ထွက်ပေါ်လာလေ့ ရှိပါတယ်။ ဒီလို ခေါင်းဆောင်နဲ့ ပါတီတွေကို လူထုက ပြတ်ပြတ်သားသားပဲ တိုင်းပြည်အကျိုး ထမ်းရွက်ဖို့ ရွေးချယ်လိုက်ကြတာပါ။ လွတ်လပ်ရေးမတိုင်မီနဲ့ ဖဆပလခေတ်အထိ မတင်ပြတော့ဘဲ မဆလခေတ် အငွေ့အသက်များကိုတော့ အနည်းငယ် တင်ပြပါမယ်။ မဆလခေတ်မှာ ၁၉၇၄ အထိ ရွေးကောက်ပွဲတွေ မလုပ်နိုင်ခဲ့ပါဘူး။ ၁၉၇၄ ဇန်န၀ါရီမှာ ရွေးကောက်ပွဲတွေ ပြန်စခဲ့တယ်။ ပြည်သူ့လွှတ်တော်၊ ပြည်သူ့ကောင်စီ အဆင့်ဆင့်အတွက် ရွေးချယ်မဲပေးခဲ့ကြရတာပါ။ ဒီရွေးကောက်ပွဲတွေကို အာဏာသိမ်း စစ်ခေါင်းဆောင်တွေက လုပ်တာဖြစ်လို့ ရိုးဖြောင့်မှု မရှိခဲ့ပါဘူး။ စစ်ဝတ်စုံကနေ လူဝတ်လဲပြီး အရွေးခံခဲ့ကြတာပါ။ ရွေးကောက်ပွဲ ယှဉ်ပြိုင်ခွင့်ကို သူတို့ပဲ ရကြသလို၊ မနိုင် နိုင်အောင်လည်း လုပ်ခဲ့ကြတာပါ။ စစ်အာဏာသိမ်း အစိုးရကနေ မြန်မာ့ဆိုရှယ်လစ် လမ်းစဉ်ပါတီ (မဆလ) ဆိုတာကို ဦးနေ၀င်းက ဦးဆောင် ထူထောင်ခဲ့တာပါ။ ဒါပေမယ့် ဒီကာလတွေ အတွင်းမှာပဲ မြန်မာနိုင်ငံဟာ အရှေ့တောင်အာရှမှာ အချမ်းသာဆုံးနိုင်ငံဘ၀ကနေ အဆင်းရဲဆုံးအဆင့်အထိ ကျရောက်သွားတာ ဖြစ်လို့ ပြည်သူလူထုအတွက် ဘာမှ အကျိုးမရှိခဲ့ပါဘူး။ ၈၈ ခုနှစ်မှာ ပြည်သူတွေရဲ့ ဒီမိုကရေစီ အရေးတော်ပုံ ဖြစ်ပါတယ်။ ဦးနေ၀င်းအစိုးရ ပြုတ်ကျခဲ့ပေမယ့် အရေးတော်ပုံ မအောင်ခဲ့ပါဘူး။ ၁၉၈၈ စက်တင်ဘာ ၁၈ ရက်နေ့မှာ ဗိုလ်ချုပ်ကြီး စောမောင် ဦးဆောင်တဲ့ စစ်အာဏာသိမ်းမှု ဖြစ်ခဲ့ပါတယ်။ လူထုအရေးတော်ပုံကို ရက်ရက်စက်စက် နှိမ်နင်းပြီး အာဏာကို ရယူခဲ့တာ ဖြစ်တယ်။ မဆလခေတ်နဲ့ ဒီအာဏာသိမ်းမှုအရှိန်တွေ အားလုံးက ၁၉၉၀ ရွေးကောက်ပွဲရဲ့ မဲပေးပုံကို အဆုံးအဖြတ် ဖြစ်စေတာပါ။ ဒီရွေးကောက်ပွဲက လူထုရဲ့ ဒီမိုကရေစီ လိုလားမှုကို အထင်ရှားဆုံး ပြသခဲ့တဲ့ ရွေးကောက်ပွဲ ဖြစ်ပါတယ်။ ဒါပေမယ့် လူထုပါတီထံကို အာဏာလွှဲမပေးခဲ့ပါဘူး။ ဗိုလ်ချုပ်စောမောင် ကိုယ်တိုင် အကြိမ်ကြိမ် စစ်တန်းလျားကို ပြန်မယ်ဆိုပြီး ကတိတွေ ပေးခဲ့ပေမယ့် ၉၀ ရွေးကောက်ပွဲအပြီး အာဏာလွှဲပြောင်းပေးအပ်ဖို့ န၀တက ငြင်းဆန်ခဲ့တာပါ။ ၉၀ ရွေးကောက်ပွဲဟာ အာဏာလွှဲပေးဖို့ မဟုတ်ဘဲ ဖွဲ့စည်းပုံ အခြေခံဥပဒေ ရေးဆွဲဖို့သာ ဖြစ်တယ်လို့ ဗြောင်လိမ်ညာ၊ ဗြောင်ငြင်းဆန်ခဲ့ကြတာ ဖြစ်တယ်။ နောက်ပိုင်း သူတို့ဟာ ဖွဲ့စည်းပုံ အခြေခံဥပဒေ ရေးဆွဲဖို့ အကြောင်းပြချက်နဲ့ တိုင်းပြည်ကို နှစ်ပေါင်း ၂၀ ကျော် စစ်အာဏာရှင်စနစ်နဲ့ စိုးမိုး အုပ်ချုပ်ခဲ့ကြတာ ဖြစ်တယ်။ ဒီကာလအတွင်းမှာပဲ မြန်မာနိုင်ငံဟာ ၁၉၉၀ နောက်ပိုင်း အပြောင်းအလဲတွေ ဆင်နွှဲခဲ့ကြတဲ့ တရုတ်၊ ဗီယက်နမ်၊ လာအို၊ ကမ္ဘောဒီးယား၊ အင်ဒိုနီးရှား စတဲ့ နိုင်ငံတွေရဲ့ နောက်မှာ အပြတ်အသတ် ကျန်ခဲ့တာ ဖြစ်တယ်။ စီးပွားရေး တိုးတက်မှု မရှိတဲ့အပြင် သယံဇာတတွေပါ ကုန်ခန်း၊ သစ်တောတွေ ပြုန်းတီးတဲ့အပြင် လူတွေရဲ့ အကျင့်စရိုက်တွေ အထိပါ ဆိုးကျိုးတွေ သက်ရောက်စေခဲ့တာ ဖြစ်တယ်။ ဒီအခြေအနေတွေကနေ ၂၀၁၂ ကြားဖြတ် ရွေးကောက်ပွဲ မဲပေးပုံကို ဖြစ်စေခဲ့တာပါ။ ၂၀၁၀ ရွေးကောက်ပွဲကတော့ အတိုက်အခံပါတီကို တဘက်သတ် ပိတ်ဆို့ ကန့်သတ်ထားတဲ့အပြင် ပါတီငယ်တွေနဲ့ တိုင်းရင်းသား ပါတီတွေအပေါ် မသမာနည်းနဲ့ အနိုင်ရယူခဲ့တာတွေ ရှိတဲ့အတွက် ထည့်သွင်းတွက်ချက်ရန် လိုတဲ့ စာရင်းထဲမှာ မပါဝင်ပါဘူး။ အခု ၂၀၁၅ ရွေးကောက်ပွဲကတော့ တမျိုး စိတ်ဝင်စားစရာ ကောင်းနေပါတယ်။ ၂၀၁၁ အစိုးရ အဖွဲ့ထဲက သက်တမ်းတခုကုန်ရင် ဆက်လက် တာဝန်မထမ်းဆောင်တော့ဘူး ဆိုတဲ့ ပုဂိ်္ဂုလ်တွေ အားလုံးဟာ အခု ရွေးကောက်ပွဲမှာ မီးကုန်ယမ်းကုန် ယှဉ်ပြိုင်ဖို့ လုပ်နေကြတယ်။ ဗိုလ်ချုပ်အချို့ကလည်း တပ်ကထွက်ပြီး ကြံ့ခိုင်ရေး အမတ်လောင်းများအဖြစ် အရွေးခံဖို့ လုပ်လာတယ်။ တနေ့ကဆိုရင် ဗိုလ်ချုပ်ဟောင်း တယောက်က သူအရွေးခံမယ့် မဲဆန္ဒနယ်မှာ သိန်း ၆၄၀ ဖိုး ကူညီထောက်ပံ့မှုတွေ လုပ်တာ တွေ့ရတယ်။ ဒါပေမယ့် ကိုယ်စားလှယ်လောင်း တယောက်ရဲ့ မဲဆွယ် ကုန်ကျစရိတ်ဟာ သိန်း ၁၀၀ ထက် မကျော်ဘဲ ဖြစ်ရမှာဖြစ်ပြီး တရားဝင် မဲဆွယ်ရက် (စက်တင်ဘာ ၈ ရက်) ကလည်း မရောက်သေးပါဘူး။ အနိုင်ရလိုစိတ်တွ အလွန်များနေတယ် ဆိုတာကို တွေ့ရတာပဲ ဖြစ်ပါတယ်။ ဘာ့ကြောင့် အနိုင်ရလိုကြတာလဲ၊ ပြည်သူလူထု အကျိုးစီးပွား အတွက်လား။ ဘယ်သူ့ အကျိုးစီးပွား၊ ဘယ်အုပ်စု ရပ်တည်ရေး အတွက်လဲ ဆိုတာတွေကို လူထုကတော့ သုံးသပ်ကြမှာ ဖြစ်ပါတယ်။ ခြုံပြောရရင်တော့ ၂၀၁၁ ခုနှစ်မှာ တက်လာတဲ့ အစိုးရဟာ လူထုအကျိုးစီးပွားကို ဘယ်လောက် အောင်မြင်အောင် ဆောင်ရွက်ခဲ့သလဲ။ အာဏာရှင် အငွေ့အသက်တွေကို ဘယ်လောက် ကုန်စင်အောင် တိုက်ဖျက်နိုင်ခဲ့သလဲ။ ခရိုနီ အကျိုးစီးပွား၊ ဦးပိုင် အကျိုးစီးပွားတွေကို ဘယ်လောက် ကာကွယ်ခဲ့သလဲ။ ဒီအချက်အလက်တွေကို လူထုအတွက်ကတော့ ကိန်းဂဏန်းတွေ၊ စာရင်းဇယားတွေနဲ့ ဖော်ပြစရာ မလိုဘဲ အလိုလို သိနေပြီးသား ကိစ္စတွေ ဖြစ်ပါတယ်။ ဒီကိစ္စတွေမှာ လက်ရှိ အစိုးရရဲ့ ရမှတ်တွေက အလွန်နိမ့်နေပါတယ်။ ၆၂ ခုနှစ်ကစလို့ ရှိလာတဲ့ နိုင်ငံရေး ဖြစ်စဉ်ကြီး တခုလုံးအပေါ် လူထုရဲ့ ခြုံငုံပြီး မြင်တဲ့အမြင်က ရှိပြီးသားပါ။ ဒါကြောင့် ၂၀၁၅ ဟာလည်း ယခင် ခေတ်အဆက်ဆက်က လွတ်လပ်တရားမျှတတဲ့ ရွေးကောက်ပွဲများလို လူထုကို ကိုယ်စားပြုတဲ့ ပါတီကိုသာ ပုံအောပြီး မဲပေးကြမှာပဲ ဖြစ်ပါတယ်။ Zဖေ၀င်း (မှတ်ချက်-ပြည်သူ့အရေးဂျာနယ်၊ အတွဲ - ၁၊ အမှတ် - ၅၀၊ ဆရာ Zဖေ၀င်း ဆောင်းပါးကို ပြန်လည်ဖော်ပြသည်။)
6 years Ago

August 20, 2015

ရေဘေး၊ ရွေးကောက်ပွဲနဲ့ နိုင်ငံရေး တည်ငြိမ်မှု

တနေ့က DVB ဒီဘိတ်မှာ မြန်မာနိုင်ငံတစ်လွှား ရေကြီး ရေလျှံနေတဲ့အတွက် နိုဝင်ဘာ ၈ ရက်မှာ ကျင်းပဖို့ရှိတဲ့ ရွေးကောက်ပွဲ ရက်ရွှေ့သင့် မရွှေ့သင့် ငြင်းခုံဆွေးနွေးသွားကြတာ တွေ့ရတယ်။ အခု မြန်မာနိုင်ငံမှာ ရေကြီးမှုကြောင့် ဒုက္ခရောက်နေတဲ့ ပြည်သူ အတော်များများရှိတာ အမှန်ပဲဖြစ်သလို ရွေးကောက်ပွဲ ကျင်းပဖို့ ရက်ကလည်း နီးကပ် နေတာဖြစ်ပါတယ်။ မြန်မာနိုင်ငံတလွှား တိုင်းနဲ့ပြည်နယ် ဒေသကြီး ၁၁ နေရာလောက်မှာ ရေကြီးမှုကြောင့် ရေဘေးသင့် ပြည်သူ ၁.၆ သန်းခန့် ရှိနေပြီး ရေမြုပ်ဧက ၁၄ သိန်းကျော်ရှိကြောင်း သိရပါတယ်။ နောက်ဆုံး သတင်းများအရ အိမ်ထောင်စုပေါင်း ၃ သိန်း ၃ သောင်းလောက် ရေဘေးလွတ်ရာကို ရွှေ့ပြောင်း ပေးခဲ့ရပြီး မျိုးစပါး လိုအပ်ချက်က တင်းပေါင်း ၁၇၂,၈၇၇ တင်းလောက် ရှိတယ်လို့ ခန့်မှန်းကြတယ်။ အခုချိန်ထိတော့ မျိုးစပါး စုဆောင်းမှု လိုအပ်ချက်ရဲ့ ၃ ပုံ ၁ ပုံလောက်ပဲ ရှိတယ်လို့ ဆိုပါတယ်။ ဒီနှစ် ရေဘေးမှာ ထူးထူးခြားခြား တွေ့ရတာကတော့ လူငယ်တွေ၊ တက္ကသိုလ် ကျောင်းသားတွေ၊ အရပ်ဘက် အဖွဲ့အစည်းတွေ၊ သတင်းစာ ဂျာနယ်တွေ၊ အလှူရှင် အသင်းအဖွဲ့တွေ၊ တစ်ဦးချင်း စေတနာရှင်တွေ၊ ဘဏ်နဲ့ လုပ်ငန်းရှင်တွေ၊ ဒေါ်ခင်ကြည် ဖောင်ဒေးရှင်းလို ပရဟိတ အဖွဲ့တွေ စသဖြင့် အသင်းအဖွဲ့ပေါင်းများစွာ၊ လူပေါင်းများစွာရဲ့ ရေဘေး ကူညီကယ်ဆယ်ရေးတွေကို တွေ့ရတာဖြစ်ပါတယ်။ မြန်မာလူမျိုးများရဲ့ တဦးနဲ့တဦး ဒုက္ခရောက်သူကို ကူညီ ရိုင်းပင်းလိုစိတ်၊ လူသားချင်းစာနာစိတ်၊ မေတ္တာစိတ်၊ ဂရုဏာစိတ်တွေကို စိတ်လှုပ်ရှားဖွယ်ရာ တွေ့မြင်ရတာပဲ ဖြစ်ပါတယ်။ ထိုင်းနိုင်ငံ၊ တရုတ်ပြည်၊ ဥရောပသမဂ္ဂ၊ အမေရိကန်၊ ကုလသမဂ္ဂ စတဲ့ အဖွဲ့အစည်းများရဲ့ ကူညီမှုတွေကိုလည်း အားရဖွယ်ရာ တွေ့ရပါတယ်။ ထူးထူးခြားခြား အလှူရှင်တွေထဲမှာ ထိုင်းဘုရင့် သမီးတော်က ဘတ်ငွေ သန်း ၅၀၀ ဖိုး ရှိတဲ့ ဆန်၊ အ၀တ်အထည်၊ စားစရာ၊ ဆေးဝါး စတာတွေ ကားနဲ့ ၁၀ စီးတိုက်လောက် လှူတာတွေ့ရတယ်။ မြန်မာနိုင်ငံ ကယ်ဆယ်ရေးနဲ့ ပြန်လည် နေရာချထားရေး ၀န်ကြီးဌာန ကလည်း ကျပ်ငွေ ၅.၇ ဘီလီယံဖိုးရှိတဲ့ အစားအစာ၊ ဆေးဝါး၊ ကယ်ဆယ်ရေး ပစ္စည်းများ ပေးအပ်ခဲ့တယ်လို့ ကြေညာသွားတာ တွေ့ရပါတယ်။ ဒီလို အားတက်ဖွယ်ရာ ကူညီပံ့ပိုးမှု သတင်းတွေ ကြားရပေမယ့် တကယ့် မြေပြင်မှာတော့ အကူအညီ မရသေးတဲ့ ကျေးရွာတွေ ရှိနေသေးကြောင်း သတင်းတွေ တချို့နေရာတွေမှာတော့ အလှူရှင်တွေ များနေတာတွေ စတဲ့ သတင်းတွေလည်း ကြားသိနေရတာ ဖြစ်ပါတယ်။ ဒါကြောင့် ကပ်ဘေးဆိုင်ရာ စီမံခန့်ခွဲမှုတွေကို စနစ်တကျ ကော်မတီတွေ ဖွဲ့ပြီး လုပ်ဖို့ အကြံပြုချက်များလည်း ကြားသိ နေရတာဖြစ်ပါတယ်။ နောက်တခုက နိုင်ငံတကာက လှူဒါန်းတဲ့ ပစ္စည်းတွေကိုလည်း တကယ့် ဒုက္ခရောက်နေတဲ့ ပြည်သူတွေဆီ အလေအလွင့်မရှိ ရောက်ရှိသွားအောင် ဘယ်လို စီမံမလဲ ဆိုတာတွေလည်း ပြောဆိုနေကြတာ တွေ့ရပါတယ်။ ဒီလို ပြောဆိုလာကြတာက နာဂစ်မုန်တိုင်းတုန်းကလည်း ဒီလို အတွေ့အကြုံတွေ ရှိထားကြတာဖြစ်လို့ ပြောနေကြရတာ ဖြစ်တယ်။ အဲဒီတုန်းက နိုင်ငံတကာက ကူညီကြတဲ့ ထောင်နဲ့ချီတဲ့ shelta box ဆိုတဲ့ ယာယီတဲငယ်တွေ ဘယ်ကို ရောက်ကုန်သလဲ၊ အခုလိုအချိန်မှာ ပြန်ပြီး ထုတ်သုံးလို့ရတာပဲလို့ ပြောနေကြတာဖြစ်တယ်။ ကယ်ဆယ်ရေးနဲ့ ပြန်လည် ထူထောင်ရေးအတွက် အချိန်ဘယ်လောက် လိုမလဲ။ အခု ရွေးကောက်ပွဲ အတွက် ကျန်တဲ့ အချိန်က ရက်ပေါင်း ၈၀ ကျော်ကျော် ရှိနေပါတယ်။ လာမယ့် နှစ်လအတွင်းမှာ အခြေအနေကို တည်ငြိမ်အောင် ထိန်းသိမ်းနိုင်မလား၊ ပြန်လည်ထူထောင်ရေး လုပ်ငန်းတွေကို ဘယ်လောက်ထိ အစပျိုးနိုင်မလဲ။ ငွေအား၊ ပစ္စည်းအား၊ လူအင်အား ဘယ်လောက်အထိ ထောက်ပံ့ပေးအပ် ကူညီနိုင်မလဲ။ နောက် တစ်ချက်ကတော့ အထက်အောက် သက်ဆိုင်ရာ ပုဂ္ဂိုလ်များရဲ့ ကူညီဆောင်ရွက်လိုစိတ် ဘယ်လောက် ရှိသလဲဆိုတာတွေက အဲဒီ ဒေသတွေ အချိန် တိုတိုအတွင်း ပြန်လည် နာလန်ထူနိုင်၊ မထူနိုင် ဆိုတာကို အဆုံးအဖြတ်ပေးမှာ ဖြစ်ပါတယ်။ ဟားခါးလို မြို့မျိုးကတော့ အချိန် နှစ်နဲ့ချီပြီး ထူထောင်မှ ရနိုင်မှာဖြစ်တယ်။ ရေကြီးနေကျ အတွေ့အကြုံ သိပ်မရှိတဲ့ ပွင့်ဖြူလို နေရာနဲ့ ရေကြီးတဲ့ အတွေ့အကြုံ နှစ်စဉ်လောက် ရှိခဲ့တဲ့ ကလေးလို နေရာမျိုး၊ ကောလင်းလို နေရာမျိုးရဲ့ ပြန်လည် ထူထောင်ဖို့ လိုအပ်မယ့် အချိန်ချင်း တူနိုင်မှာ မဟုတ်ပါဘူး။ နောက်ထပ် ဒီလို ရေကြီးမှုတွေ နှစ်လအတွင်း ရှိမလာဘူးလို့ ယူဆပြီး တွက်ချက်မယ်ဆိုရင် နေရာ အတော်များများဟာ ပြန်လည်ပြီး ပုံမှန်နီးပါး အဆင့်ကို ရောက်နိုင်မလားဆိုတာ တွက်ချက်ဖို့ လိုတာဖြစ်ပါတယ်။ ရွေးကောက်ပွဲ မတိုင်မီ တလလောက် အလိုမှာ ရေကြီးရေလျှံ ဒေသများရဲ့ ရာခိုင်နှုန်း ဘယ်လောက်ဟာ ပုံမှန် မဲဆန္ဒပေးနိုင်တဲ့ အဆင့်အထိ ရောက်မယ် ဆိုတာကို တွက်ချက်နိုင်ရင် နေရာဒေသ အားလုံးမှာ ရွေးကောက်ပွဲကို ကျင်းပမလား။ အချို့ဒေသ အနည်းငယ်ကို ချန်လှပ်ပြီး ကျင်းပမလားဆိုတာကို ဆုံးဖြတ်နိုင်မယ်လို့ ယူဆရပါတယ်။ ဒီလို အလျင်အမြန် နာလန်ထူလာဖို့ ဆိုတာက နိုင်ငံတကာ လှူဒါန်းမှုများ အလေအလွင့်မရှိ၊ ဒုက္ခရောက်နေတဲ့ ပြည်သူတွေဆီ ရောက်ရှိရေးက အလွန် အရေးကြီးတာ ဖြစ်ပါတယ်။ ကယ်ဆယ်ရေး ပစ္စည်းတွေကို ဂိုထောင်ထဲကို ဘယ်လောက် ထည့်လိုက်တယ်၊ ဘယ်လောက်ထုတ်ပြီး ဘယ်ဒေသ၊ ဘယ်ရွာကို ပို့တယ် ဆိုတာတွေက အစ ပွင့်လင်းမြင်သာမှု ရှိဖို့လိုတာပါ။ အခု နေ့စဉ် သတင်းစာတွေမှာ တွေ့မြင်နေရတဲ့ သစ်မှောင်ခို တန်ချိန် ဘယ်လောက် ဖမ်းမိတယ်တို့ ဆိုတာတွေ ရှိပါတယ်။ မှတ်မိသလောက် ပြောရရင် ဖမ်းမိ သစ်ဟာ တန်ချိန် ၅ သောင်း အထက်မှာ ရှိပြီး၊ အကောက်ခွန်မဲ့ ပစ္စည်းတန်ဖိုး စုစုပေါင်းဟာ ကျပ်ငွေ ဘီလီယံ ၃၀ နီးပါး ရှိတာ ဖြစ်ပါတယ်။ ဖမ်းမိသစ်တွေကို သးစ်တောဌာနကို လွှဲပေးတာ ဖြစ်တယ်။ သစ်တောဌာနက ဘယ်လို ဆက်လက် စီမံခန့်ခွဲတယ် ဆိုတာကတော့ ရှင်းရှင်းလင်းလင်း မသိရပါဘူး။ အလားတူပဲ အကောက်ခွန်မဲ့ ဖမ်းမိပစ္စည်းများကို ဘယ်လို စီမံတယ်။ ရတဲ့ ဘဏ္ဍာငွေတွေဟာ နိုင်ငံတော်ကို ဘယ်လို ၀င်တယ် ဆိုတာ မသိကြရပါဘူး။ ဒီလို ကိစ္စတွေနဲ့ ပတ်သက်လို့ ဒီတလော ရန်ကုန် နိုင်ငံရေး သိပ္ပံကျောင်း (YSPS)မှာ လာရောက် ပို့ချတဲ့ အကူးအပြောင်း သီအိုရီဆရာ လယ်ရီဒိုင်းမွန်းရဲ့ လက်ချာထဲမှာ တချက်တွှေတာ ရှိပါတယ်။ သူကတော့ နိုင်ငံတော် လုပ်ငန်းများနဲ့ ပတ်သက်ရင် အလျားလိုက် တာဝန်ခံမှု၊ ဒေါင်လိုက် တာဝန်ခံမှုတွေ ရှိဖို့လိုတာကို ပြောတာပါ။ အစိုးရတွေမှာ အလျားလိုက် တာဝန်ခံမှုအတွက် အင်စတီကျူးရှင်း အတော်များများ ဖွဲ့ကြရပါတယ်။ ဒီ အင်စတီကျူးရှင်းတွေ လုပ်ငန်းလုပ်ရာမှာ ထိရောက်မှုရှိစေဖို့ လိုအပ်ချက် အတော်များများ ရှိတဲ့အထဲမှာ တချက်ကတော့ စစ်ဆေးသူများကို ပြန်လည်စစ်ဆေးနိုင်တဲ့ (check on the checkers) ဆိုတာ ပါဝင်ပါတယ်။ ဒါကို (resiprocal oversight) အပြန်အလှန် ကြီးကြပ်နိုင်ခြင်းလို့ ခေါ်ပါတယ်။ ကိစ္စ အတော်များများမှာ ဒီလို ပြန်လှန်စစ်ဆေးနိုင်မှုတွေ လိုအပ်နေတာ ဖြစ်ပါတယ်။ ရွေးကောက်ပွဲများကို သတ်မှတ်ရက်အတိုင်း ကျင်းပနိုင်၊ မကျင်းပနိုင် ဆိုတာက သဘာဝ ဘေးဒဏ် တခုတည်း မဟုတ်ပါဘူး၊ နိုင်ငံရေးတည်ငြိမ်မှု ရှိဖို့လည်းလိုတာ ဖြစ်ပါတယ်။ အခုတလော ဖြစ်ပွားခဲ့တဲ့ ကြံ့ခိုင်ရေးပါတီတွင်း ခေါင်းဆောင်မှု အပြောင်းအလဲ ဖြစ်သွားတဲ့ ကိစ္စမှာ လုံခြုံရေးအင်အားများ သုံးစွဲခဲ့မှု၊ မျက်ကွယ်မှာ အုပ်စုနဲ့ ကိုင်တွယ်ဖြေရှင်းသွားမှုတွေကြောင့် နိုင်ငံတကာကပါ စိုးရိမ်မှု ရှိလာတဲ့ အနေအထား ဖြစ်လာပါတယ်။ ဒီကိစ္စဟာ ဘယ်လောက်အထိ ဆက်လက် သက်ရောက်သွားမလဲ ဆိုတာကလည်း စောင့်ကြည့်သွားရမယ့် သဘောဖြစ်တယ်။ မကြာခင်(၁၈ ရက်နေ့)ဆိုရင် လွှတ်တော်က ပြန်လည် စတင်တော့မှာပါ။ ဒီလို အာဏာရ ပါတီတွင်း ခေါင်းဆောင် ပြောင်းလဲမှုဟာ လွှတ်တော်တွင်းမှာ ဘယ်လောက် ဂယက်ရိုက်မလဲ။ ရိုးရိုး သာမန်ပါတီဝင်အဖြစ် ရောက်သွားသူဟာ သာမန်အဆင့် မဟုတ်ဘဲ ပြည်သူ့လွှတ်တော် ဥက္ကဋ္ဌ ဖြစ်နေတဲ့အတွက် ဒီလို ဂယက်တွေကို ထည့်သွင်း တွက်ချက်ရတာ ဖြစ်တယ်။ လက်ရှိ အစိုးရရဲ့ သက်တမ်း ကုန်ဆုံးခါနီး၊ နောက် သက်တမ်းတခုအတွက် ရွေးကောက်ပွဲ ကျင်းပခါနီးမှာ သဘာဝဘေးဒဏ်တွေနဲ့ ကိစ္စတွေ များလာတာဖြစ်ပြီး၊ ကြိတ်ပြီး ဖြစ်လာတဲ့ ပြဿနာတွေကလည်း ပွင့်အန်လာတာ ဖြစ်တယ်။ ဒီပြဿနာများကို တည်ငြိမ်အောင် ဖြေရှင်းနိုင်သည့် တိုင်အောင် လွတ်လပ်ပြီး တရားမျှတမှုရှိမှသာ ရွေးကောက်ပွဲက အောင်မြင်မှာ ဖြစ်တယ်။ ဒီလို အောင်မြင်ပြီး နောက် ရွေးကောက်ခံအမတ်များကို ပြန်လည်ပယ်ဖျက်နိုင်တဲ့ ရွေးကောက်ပွဲ စည်းမျဉ်းများနဲ့ စိစစ်ခံရဦးမှာ ဖြစ်ပါတယ်။ ဒီနေရာမှာလည်း မတရားပယ်ဖျက်ခံရတာတွေ ရှိနိုင်သေးတာပါပဲ။ ဒါကြောင့် ရွေးကောက်ပွဲ ကျင်းပပြီး၊ အစိုးရသစ်တရပ် ဖွဲ့နိုင်ဖို့အတွက် အားလုံးရဲ့ ရှေ့မှာ လုပ်ငန်းစဉ်တွေ အများအပြား၊ အခက်အခဲ အများအပြားက စောင့်ကြိုနေတာပဲ ဖြစ်ပါတယ်။ Z.ဖေ၀င်း မှတ်ချက်။ ပြည်သူ့အရေးဂျာနယ်၊ အတွဲ-၁၊ အမှတ်-၄၇ ဆရာZ.ဖေ၀င်းဆောင်းပါးကို ဖော်ပြပါသည်။
6 years Ago
Up