Youtube

January 11, 2022

တော်လှန်ရေးလူငယ်များ ရိက္ခာအတွက် မွေးမြူရေးလုပ်၊ လက်နက်ဝယ်ရေး ကူညီရန် တောင်းဆို

မြေပြင်မှာ ရိက္ခာအတွက် ကြက်နဲ့ ဆိတ် မွေးမြူရေးအပြင် အွန်လိုင်းပဒေသာပင် ခေါင်းစဉ်အောက်ကနေ ဝင်ငွေရှာပြီး တော်လှန်ရေးအတွက် လိုအပ်တဲ့ လက်နက်တွေ ဝယ်ယူဖို့အတွက် ပြည်သူတွေ ဝိုင်းဝန်းကူညီအားပေးကြဖို့ ပြည်သူ့ကာကွယ်ရေးတပ်ဖွဲ့ဝင် လူငယ်တွေက တောင်းဆိုလိုက်ပါတယ်။

နွေဦးကြက်ခြံနဲ့ ဆိတ်မွေးမြူရေးလုပ်ငန်းတွေကို တော်လှန်ရေးရဲဘော်တွေရဲ့ ရိက္ခာအတွက် မွေးမြူရေးလုပ်ငန်းတွေ ဆောင်ရွက်နေပြီး youtube, website, application တွေနဲ့ ဝင်ငွေရှာဖွေရာမှာ အောင်မြင်နေတယ်လို လွတ်မြောက်နယ်မြေတနေရာက တော်လှန်ရေးလူငယ်တွေက ပြောပါတယ်။ 

ပြီးခဲ့တဲ့လက ကျပ်ငွေ ၃၈ သိန်းအထိ ရရှိခဲ့ပြီး ဒေါ်လာသောင်းနဲ့ချီပြီး ဝင်ငွေရရှိဖို့ ကြိုးစားနေတယ်လို့ ဆိုပါတယ်။

တော်လှန်ရေးလူငယ်တဦးက “ပြီးခဲ့တဲ့ လကစပြီး ၃၈ သိန်း ရတယ်၊ ဒီလဆို ဒေါ်လာ ၁ သောင်းအထိ မှန်းထားတယ်။ အဲဒီကရတဲ့ ငွေကြေးတွေအားလုံးကို ရဲဘော်တွေအတွက် လက်နက်ဝယ်ယူနိုင်ဖို့ အသုံးချသွားမှာပါ။ ကျနော်တို့ youtube channel ကလည်း ၂ ခု ဖြစ်သွားပြီ။ website ရှိတယ်၊ application ကလည်း မကြာခင် ထွက်တော့မယ်။ အဲ့ဒါတွေ အားလုံးပေါင်းရင် အနည်းဆုံး ဒေါ်လာ ၁ သောင်း ပျမ်းမျှရမယ်လို့ မှန်းထားတာပါ။ ဒါမို့ ကြုံကြိုက်ခဲ့ရင် ကျနော်တို့ ဖေ့ဘွတ်ခ်ပေ့ချ်ကို  like လုပ်ပေးပြီး ဝင်ကြည့်ပေးပါ။ ကူညီနိုင်သမျှ ကူညီပေးပါဦး တော်လှန်ရေးဟာလည်း တဖြည်းဖြည်းနဲ့ အရှိန်ရလာပါပြီ။ အောင်ပွဲကလည်း မဝေးတော့ပါဘူး။ ပြည်သူအားလုံး အားတင်ထားကြပါ” လို့ ပြောပါတယ်။

အွန်လိုင်းပဒေသာပင်အောက်က ဝင်ငွေရှာဖွေရေးတွေကို လူငယ်တွေ လုပ်ဆောင်နေကြတဲ့အပြင် တော်လှန်ရေး ရဲဘော်တွေအတွက် ရိက္ခာနဲ့ နောက်တန်းရဲဘော်တွေအတွက် အားလပ်ချိန် အလုပ်အကိုင် အခွင့်အလမ်း ရစေဖို့၊ တော်လှန်ရေးပြီးတဲ့အခါ ဒေသအတွက် ကောင်းမွန်တဲ့ လုပ်ငန်းတစ်ခု ကျန်ရှိနေခဲ့ဖို့ ရည်ရွယ်ပြီး ပြီးခဲ့တဲ့ ၂၀၂၁ နိုဝင်ဘာလကတည်းက စတင် အကောင်အထည် ဖော်ခဲ့တာပါ။ 

ဒီဇင်ဘာလကစတင်ပြီး ကြက်မွေးမြူရေးအတွက် စတင်ခဲ့ရာ အခုချိန်မှာ ဆိတ်ကိုပါ မွေးမြူနေပြီလို့ သိရပါတယ်။

“အခက်အခဲတွေကတော့ အများကြီးပါပဲ။ နေရာအခက်အခဲ၊ ခွင့်ပြုချက်ရဖို့ လုပ်ခဲ့ရတာတွေ၊ ဒေသခံတွေရဲ့ ယုံကြည်မှုရဖို့ ကြိုးစားခဲ့ရတာတွေနဲ့ ကြက်မွေးမြူရေး အတွေ့အကြုံ မရှိတာတွေ၊ ဆောက်လုပ်ရေးနဲ့ပက်သက်တဲ့ အခက်အခဲတွေ အများကြီးပါပဲ။ ဒါပေမဲ့ ကျနော်တို့ ရဲဘော်တွေရဲ့ စည်းလုံးညီညွတ်မှုနဲ့ အားလုံးကို ဖြတ်ကျော်နိုင်ခဲ့ပြီး အခုဆို ကိုယ်မျှော်မှန်းထားတဲ့အတိုင်း နွေဦးကြက်ခြံလေးဟာ အဆင်ပြေပြေရှိနေပါပြီ" လို့ ဆိုပါတယ်။

စတင် အကောင်အထည်ဖော်ရာမှာ အခက်အခဲတွေ ရှိခဲ့ပေမယ့် အောင်မြင်အောင် ဆောင်ရွက်နိုင်ခဲ့ပြီး တခြား လွတ်မြောက်နယ်မြေမှာလည်း အလားတူ မွေးမြူရေးတွေ လုပ်ကိုင်ချင်ရင် နည်းလမ်းတွေ မျှဝေပေးသွားမယ်လို့လည်း ဆိုပါတယ်။ 

ဒီကရတဲ့ အကျိုးအမြတ်တွေအနေနဲ့ ရောင်းချလို့ရတဲ့ ငွေကြေးကို ရဲဘော်တွေအတွက် လိုအပ်တာတွေ ဝယ်ယူဖို့ အသုံးချမှာဖြစ်ပြီး ကြက်သားနဲ့ ကြက်ဥတွေကိုတော့ စားနပ်ရိက္ခာအတွက် အသုံးပြုသွားမှာ ဖြစ်ပါတယ်။

1 week Ago

October 1, 2021

ကိုဗစ်ကာကွယ်ဆေး သတင်းမှားများကို YouTube ပိတ်မည်

ကိုဗစ်ကာကွယ်ဆေးတွေနဲ့ပတ်သက်လို့ အတည်ပြုထားပြီးသား ကာကွယ်ဆေးတွေ အကြောင်း သတင်းမှားတွေ ပါဝင်နေတဲ့ အကြောင်းအရာတွေ ရှိလာတာကြောင့် မဟုတ်မမှန် သတင်းတွေကို YouTube ချန်နယ်က ပိတ်ပင်မှာဖြစ်တယ်လို့ စက်တင်ဘာ ၂၉ ရက်က ပြောပါတယ်။ 

YouTube မှာ ခွင့်ပြုတော့မှာမဟုတ်တဲ့ အကြောင်းအရာတွေမှာဆိုရင် ဥပမာအားဖြင့် တုပ်ကွေး ကာကွယ်ဆေးဟာ မျိုးမပွားနိုင်ခြင်းကိုဖြစ်စေကြောင်းနဲ့ ဝက်သက်၊ ပါးချိတ်ရောင်နဲ့ ဂျိုက်သိုး ရောဂါတို့ကို ကာကွယ်ပေးတဲ့ MMR ထိုးဆေးဟာ Autism ဖြစ်စေနိုင်ကြောင်းစတဲ့ အကြောင်းအရာတွေကို YouTube ရဲ့ မူဝါဒတွေနဲ့အညီ တားမြစ်ပိတ်ပင်သွားမယ်လို့ ဆိုပါတယ်။ 

Alphabet Inc မှပိုင်ဆိုင်တဲ့ အွန်လိုင်းဗီဒီယိုကုမ္ပဏီဟာ ရောဘတ်အက်ဖ်ကနေဒီဂျူနီယာနဲ့ ဂျိုးဇက်မာကိုလာတို့ အပါအ၀င် ထင်ရှားတဲ့ ကာကွယ်ဆေးတိုက်ဖျက်ရေး တက်ကြွလှုပ်ရှားသူများ နဲ့ ဆက်နွှယ်နေတဲ့ လမ်းကြောင်းတွေကို ပိတ်ပင်လိုက်တယ်လို့ YouTube ပြောရေးဆိုခွင့်ရှိသူ တစ်ဦးက ပြောပါတယ်။ 

မာကိုလာရဲ့ ၀က်ဘ်ဆိုက်မှာတော့ “ငါတို့ဟာ တစ်ကမ္ဘာလုံးမှာ စည်းလုံးညီညွတ်ကြတယ်၊ ငါတို့ဟာ ကြောက်ရွံ့သွားမှာမဟုတ်၊ ငါတို့ အတူတကွ ရပ်တည်ပြီး ငါတို့လွတ်လပ်ခွင့်တွေကို ပြန်ထူထောင်ကြမယ်” လို့ စာနယ်ဇင်းရှင်းလင်းတဲ့ အီးမေးလ်တစောင် ဖော်ပြထားပါတယ်။

ကနေဒီကတော့ ကြေညာချက်ထုတ်ပြန်ထားတာမှာ ဆင်ဆာဖြတ်တောက်မှုနဲ့ လျှို့ဝှက်ထားရမှုတွေဟာ ဒီမိုကရေစီ (သို့) ပြည်သူ့ကျန်းမာရေးကို တိုးတက်စေတယ် ဆိုတဲ့ ဥပမာမျိုး ရာဇဝင်မှာ တခုမှမရှိဘူး လို့ ဖော်ပြထားပါတယ်။ 

YouTube နဲ့ ဖေ့စ်ဘွတ်ခ်၊ တွစ်တာ တို့လို တခြားနည်းပညာကုမ္ပဏီကြီးတွေကလည်း သူတို့ရဲ့ဆိုက်တွေမှာ မှားယွင်းတဲ့ ကျန်းမာရေး သတင်းအချက်အလက်တွေ ပြန့်ပွားခြင်းကို ရပ်တန့်ဖို့  လုံလောက်စွာ မလုပ်ဆောင်ခြင်းကြောင့် ဝေဖန်မှုတွေကို ခံနေရပါတယ်။ 

4 months Ago
Up