YBS

July 16, 2021

YBS ဘတ်စ်ကားလိုင်း ၁၁ လိုင်း ၉ ရက် ရပ်နား

ရန်ကုန်မြို့တွင်း ပြေးဆွဲနေတဲ့ YBS ယာဉ်လိုင်း ၁၁ လိုင်းကို  ကိုဗစ်-၁၉ ကပ် ရောဂါ ကူးစက်ပျံ့နှံ့မှု အန္တရာယ်ကြောင့် ဇူလိုင် ၁၇ ရက်က စတင်ကာ ၉ ရက်ကြာ ရပ်နားထားမယ်လို့ သိရပါတယ်။

ရပ်နားထားမယ့် ယာဉ်လိုင်းတွေထဲမှာတော့ လူထုမိတ်ဆွေအကျိုးပြုယာဉ်လိုင်းက ပြေးဆွဲပေးနေတဲ့  ၃၂၊ ၇၈၊ ၉၃၊ ၉၄ နဲ့ ၉၇ တို့ပါဝင်ပြီး Omni Focus ကနေ ပြေးဆွဲပေးနေတဲ့  ၂၀၊ ၅၆၊ ၈၂၊ ၈၃၊ ၉၈ နဲ့ ၉၉ ယာဉ်လိုင်းတွေ ပါဝင်ပါတယ်။

လတ်တလော ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ မြန်မာနိုင်ငံမှာ တရက်အတွင်း ကိုဗစ်-၁၉ ရောဂါကူးစက်မှုအသစ် ၄,၁၈၈ ယောက်၊ သေဆုံးသူ ၁၆၅ ယောက် ရှိခဲ့ပြီး ရောဂါကူးစက်ခံရသူ အတည်ပြုလူနာ စုစု ပေါင်း ၂၁၂,၅၄၅ ယောက်ထိ ရှိလာပြီလို့ စစ်ကောင်စီ ကျန်းမာရေးနဲ့ အားကစားဝန်ကြီးဌာနက ဇူလိုင် ၁၅ ရက်ညမှာ ထုတ်ပြန်ထားပါတယ်။

ဒါ့အပြင် နေ့စဉ်ရက်ဆက်ဆိုသလို ရောဂါကူးစက်ခံရပြီး သေဆုံးရတာတွေ၊ လိုအပ်တဲ့ အောက်ဆီဂျင် မလုံလောက်တဲ့ ပြဿနာတွေ၊ ဆေးရုံနဲ့ ဆေးကုသရေးစင်တာတွေ လိုအပ်ချက်တွေလည်း မြင့်တက်နေတာ ဖြစ်ပါတယ်။

လတ်တလောမှာတော့ အကြမ်းဖက်စစ်ကောင်စီက ရောဂါကူးစက်မှုတွေ မြင့် တက်နေတာကြောင့် နိုင်ငံတဝန်း စာသင်ကျောင်းတွေ ပိတ်ထားဖို့ ကြေညာထားတဲ့အပြင် ပိုးတွေ့နှုန်းများတဲ့ မြို့နယ်တွေကိုလည်း Stay At Home မြို့နယ်တွေအဖြစ် ကန့်သတ်ထားပြီး ကိုဗစ်-၁၉ ရောဂါကူးစက်မှုကို ထိရောက်စွာ ကာကွယ်ထိန်းချုပ်ကုသနိုင်ဖို့ အတွက် အများပြည်သူ အလုပ်ပိတ်ရက်ကို ဇူလိုင် ၁၇ ရက်ကနေ  ၂၅ ရက်နေ့အထိ တဆက်တည်းပိတ်ရက်အဖြစ်  ကြေညာထားပါတယ်။

PHOTO- Omni Focus

2 months Ago

February 27, 2021

လှည်းတန်းတွင် ကားပိတ်နေ၍ ရပ်ထားသည့် YBS ယာဥ်မောင်း ၂ ဦးကို ရဲက ဖမ်းဆီး

လှည်းတန်းမှာ ကားပိတ်လို့ ရပ်ထားတဲ့ YBS ယာဥ်မောင်းနှစ်ယောက်ကို လမ်းပိတ်အောင်လုပ်တယ်ဆိုပြီး ရဲက ဖမ်းဆီးလိုက်တယ်လို့ သိရပါတယ်။

လှည်းတန်းလမ်းမ​ပေါ်မှာ မနက် ၉ နာရီလောက်က လုံခြုံရေးတပ်ဖွဲ့ဝင်တွေက ဆန္ဒပြပြည်သူတွေကို အင်အားသုံးဖြိုခွင်းချိန် YBS ၃၈ နဲ့  ၆၀ ကားပေါ်က ယာဥ်မောင်းနှစ်ယောက်ကို လမ်းပိတ်ဆို့တယ်ဆိုကာ ရဲကလက်ထိတ်ခတ်ပြီး ဖမ်းခေါ်သွားတာလို့ မျက်မြင်တွေက ပြောပါတယ်။

ကားလေးတွေက ရှေ့မှာပိတ်နေလို့ ရပ်ထားတာဖြစ်ကြောင်း ယာဥ်ထိန်းရဲတချို့က လာရောက်ဖျန်ဖြေပေးခဲ့ပေမယ့် မရခဲ့ဘူးလို့ ဆိုပါတယ်။

ဆန္ဒပြသူတွေကို အသလွတ်ပိတ်ပြီး ကာထားပေးတာဆိုပြီး ရဲအရာရှိကယောက်က ပြောဆိုခဲ့တယ်လို့ ဆိုပါတယ်။

ကားရှေ့က သေနတ်နဲ့ချိန်ပြီး တံခါးဖွင့်ခိုင်းတာမရလို့ ခရီးသည်အပေါက်ကနေ ဝင်ပြီးဖမ်းခေါ်သွားကြောင်း မျက်မြင်တွေ့ခဲ့သူက ပြောပါတယ်။

လှည်းတန်းလမ်းပေါ် ဒီမနက်ကစပြီး ဆန္ဒပြသူတွေကို ရဲက အင်းအားသုံး ပစ်ခတ်ဖမ်းဆီးမှုအတွင်း သတင်းထောက် ၂ ယောက်အပါအဝင် လူ ၅ ယောက်နဲ့အထက် ဖမ်းဆီးသွားတယ်လို့ ရပ်ကွက်နေပြည်သူတွေက ပြောပါတယ်။

7 months Ago
More News
Up