WikiLeaks

April 21, 2022

ဝီကီလိခ်စ်တည်ထောင်သူကို အမေရိကန်သို့ လွှဲပြောင်းပေးရန် ဗြိတိန်တရားရုံး အမိန့်ထုတ်

ဝီကီလိခ်စ်တည်ထောင်သူ ဂျူလီယံ အာဆန်ကို သူလျှိုမှု စွဲချက်တွေကို ရင်ဆိုင်နိုင်ရေး အမေရိကန်နိုင်ငံဆီကို လွှဲပေးဖို့ ဗြိတိန်နိုင်ငံ ဝက်စ်မင်စတာ ခရိုင်တရားရုံးက ဧပြီ ၂၀ ရက်မှာ တရားဝင် အမိန့်ထုတ်ပြန်လိုက်ပါတယ်။

အာဆန်ရဲ့ ရှေ့နေတွေက တရားရုံးဆုံးဖြတ်ချက်ကို ၁၄ ရက်အတွင်း အယူခံဝင်နိုင်တာကြောင့် တရားခံလွှဲပြောင်းရေးကိစ္စကို အတည်ပြုမလားဆိုတာ ဆုံးဖြတ်ဖို့ ဗြိတိန်ပြည်ထဲရေးဝန်ကြီး ပရစ်တီး ပတေးအပေါ် မူတည်နေပါတယ်။

အာဆန်ကို အမေရိကန်ဆီ လွှဲအပ်ရေး အထက်တရားရုံးရဲ့ ဆုံးဖြတ်ချက်ကို အယူခံဝင်ရေး ခွင့်မပြုဖို့ ဗြိတိန်တရားရုံးချုပ်က အရင်လက ငြင်းခဲ့ပါတယ်။

လွန်ခဲ့တဲ့ ဆယ်စုနှစ်တွေတုန်းက အာဖဂန်နစ္စတန်၊ အီရတ်စစ်ပွဲတွေနဲ့ ပတ်သက်တဲ့ ရာနဲ့ချီတဲ့ စစ်ဘက်ဆိုင်ရာ စာရွက်စာတမ်းတွေကို WikiLeaks က ထုတ်ပြန်ခဲ့ပြီးတဲ့နောက် နိုင်ငံတော်ကာကွယ်ရေးဆိုင်ရာ အချက်အလက်တွေကို ထုတ်ဖော်ခဲ့တယ်ဆိုတဲ့ စွပ်စွဲချက်နဲ့ အသက် ၅၀ အရွယ် အာဆန်ကို အမေရိကန်အစိုးရက အလိုရှိနေတာပါ။

ပေါက်ကြားခဲ့တဲ့ အချက်အလက်တွေထဲမှာ ၂၀၀၇ ခုနှစ်က ဘဂ္ဂဒက်မြို့ လမ်းမတွေပေါ်မှာ အမေရိကန်စစ်တပ်က ရိုက်တာသတင်းထောက်တွေနဲ့ ကလေးတွေကို ပစ်သတ်ခဲ့တဲ့ Apache ရဟတ်ယာဉ်ကနေ ရိုက်ကူးထားတဲ့ ဗွီဒီယိုမှတ်တမ်းလည်း ပါပါတယ်။

8 months Ago

June 26, 2021

စာနယ်ဇင်းလွတ်လပ်ခွင့် ပြန်ဖော်ဆောင်လိုလျှင် WikiLeaks ပိုင်ရှင်ကို လွှတ်ပေးရမည်ဟု ကိုယ်စားလှယ်ပြော

သမ္မတဂျိုးဘိုင်ဒန်ဟာ အမေရိကန်ပြည်ထောင်စုကို စာနယ်ဇင်းလွတ်လပ်ခွင့်အတွက် မီးပြတိုက်တဆောင် ပြန်ဖြစ်စေချင်ရင် WikiLeaks တည်ထောင်သူ Julian Assange ကို ပြန်လွှတ်ပေးရမယ်လို့ Assange နဲ့ စေ့စပ်ထားသူအမျိုးသမီးက ရိုက်တာသတင်းဌာနကို ပြောပါတယ်။  

ဝါရှင်တန်အစိုးရဟာ လျှို့ဝှက်အမေရိကန်စစ်ရေးမှတ်တမ်းတွေနဲ့ သံတမန်ရေး ကြေးနန်းတွေကို အလုံးအရင်းလိုက် ဖော်ထုတ်ဖွင့်ချခဲ့တာကြောင့် အသက်အန္တရာယ်တွေဖြစ်စေမှုနဲ့စွပ်စွဲထားပြီး အကြီးကျယ်ဆုံး လျှို့ဝှက်သတင်း အချက်အလက်ပေါက်ကြားမှုမှာ တာဝန်အရှိဆုံးဖြစ်တဲ့ ပြည်ပြေး Assange ကို အမေရိကန်ပြည်ထောင်စုဆီ ပြန်လည်လွှဲပြောင်းပေးစေချင်နေတာပါ။

 Assange ရဲ့ လုပ်ရပ်ကြောင့် နာမည်တွေနဲ့တကွ စာရင်းပေါက်ကြားခဲ့ရတဲ့ အေးဂျင့်တွေရဲ့ ဘဝတွေ ခြိမ်းခြောက်ခံနေရတာအတွက် ယူအက်စ် အစိုးရရှေ့နေတွေနဲ့ အနောက်တိုင်း လုံခြုံရေးအရာရှိတွေက Assange ကို အဆင်အခြင်မဲ့တဲ့ နိုင်ငံတော်ရန်သူအဖြစ် သဘောထားနေကြတာပါ။ 

Assange ဟာ ပထမတော့ လန်ဒန်မှာရှိတဲ့ အက်ကွေဒေါသံရုံးထဲမှာ ၇ နှစ် နေထိုင်ခဲ့ပါတယ်။  

Assange ဟာ အခု ဗြိတိန်နိုင်ငံမှာ ထောင်ဒဏ် ၉ နှစ်ကျခံနေရပြီး အမေရိကန်ဆီ ပြန်ပို့လိုက်ရင် သူ အသက်ရှင်နိုင်တော့မှာမဟုတ်ဘူးလို့ Assange နဲ့ စေ့စပ်ထားတဲ့ Stella Moris နဲ့ ဗြိတိသျှတရားသူကြီးတို့က သတိပေးပြောကြားထားပါတယ်။ 

ဗြိတိန်တရားသူကြီး Vanessa Baraitser က ဒီအမှုနဲ့ပတ်သက်ပြီး  ၂၀၁၉ တုန်းက Assange ကို အမေရိကန် ပြန်ပို့ဖို့ အမေရိကန်ရဲ့တောင်းဆိုမှုကို လက်ခံခဲ့ပေမဲ့ Assange ရဲ့ စိတ်ပိုင်းဆိုင်ရာ ကျန်းမာရေးအရ ပြန်ပို့ခံရရင် သူ့ကိုယ်သူသတ်သေမယ့် အန္တရာယ်ရှိနေတာကြောင့် အမေရိကန်ရဲ့ တောင်းဆိုချက်ကို ငြင်းပယ်လိုက်တယ်လို့ ဇန်နဝါရီလက ပြောပါတယ်။ 

အမေရိကန် တရားရေးဌာနကလည်း Assange ကို  လျှို့ဝှက်ကြံစည်မှု စွဲချက်ကို ရင်ဆိုင်ဖို့ နိုင်ငံဆီ ပြန်လည်လွှဲပြောင်းပေးစေဖို့ ဆက်လုပ်သွားဖို့ စီစဉ်ထားတယ်လို့ ဆိုပါတယ်။ 

Assange ကို လုံခြုံရေးမြင့်တဲ့ Belmarsh အကျဉ်းထောင်မှာထားရှိပြီး တရုတ်နဲ့ ဆော်ဒီအာရေးဗီးယားတို့မှာ ဂျာနယ်လစ်တွေကို ပြုမူဆက်ဆံပုံမျိုး ဆက်ဆံတယ်လို့  Stella Moris က ပြောပါတယ်။ 

ဒီအမှုကို ဘိုင်ဒန်အစိုးရအောက်မှာ ကွဲပြားခြားနားတဲ့ အမြင်တွေနဲ့ သုံးသပ်ပေးဖို့ မျှော်လင့်နေပြီး သူ့ရဲ့ရှေ့နေအဖွဲ့ကတော့ အမေရိကန်အရာရှိတွေနဲ့ ဆွေးနွေးခဲ့တာ ရှိ မရှိကိုတော့ ပြောပြဖို့ Stella Moris က ငြင်းဆန်ထားပါတယ်။ 

သူနဲ့ Assange ရဲ့ မွေးထားတဲ့ သားလေး ၂ ယောက်ကို ပြီးခဲ့တဲ့ တနင်္ဂနွေနေ့က Belmarsh ထောင်ကို ခေါ်လာခဲ့ပြီး တနှစ်ကျော်အတွင်း ပထမဆုံး ထိတွေ့ခွင့်ပေးခဲ့တယ်လို့လည်း ပြောပါတယ်။

1 year Ago
Up