TNLA

January 11, 2022

ရှမ်းပြည်နယ်တွင် တိုင်းရင်းသားလက်နက်ကိုင်အချင်းချင်း တိုက်ပွဲကြောင့် ဒေသခံများ ထပ်မံ တိမ်းရှောင်

ရှမ်းပြည်နယ်က တိုင်းရင်းသားလက်နက်ကိုင်အဖွဲ့တွေဖြစ်တဲ့ TNLA၊ SSPP ပူးပေါင်းတပ်တွေနဲ့   RCSS တပ်တို့ ရှမ်းပြည်မြောက်ပိုင်း ကျောက်မဲခရိုင်နဲ့ တောင်ပိုင်း လွိုင်လင်ခရိုင်ထဲမှာ တိုက်ပွဲတွေ ဖြစ်ပွားနေတာကြောင့်  ရွာသား‌တွေ ထပ်မံထွက်ပြေးတိမ်းရှောင်နေကြရပါတယ်။ 

ကျောက်မဲခရိုင် သီပေါမြို့နယ် နမ့်ဆိမ်အုပ်စုနဲ့ ဆွန်အွဲ့အုပ်စုထဲမှာ ဒီလ ၈ ရက်နေ့ကစ တိုက်ပွဲဖြစ်နေပြီး ဒီနေ့ထိ  ပစ်ခတ်သံတွေကြားနေရကြောင်း၊ ကျေးရွာပေါင်း ၈ ရွာက ရွာသား ၃၀၀ ကျော် သီပေါမြို့ ဘော်ကြိုဘုရားကျောင်းမှာ လာရောက်ခိုလှုံနေကြတယ်လို့ စစ်ဘေးရှောင်ကူညီသူတစ်ဦးက ဒီဗွီဘီကို ပြောပါတယ်။

“သူတို့နေတဲ့ ရွာအနီးတဝိုက်မှာ တိုက်ပွဲတွေဖြစ်နေလို့ သီပေါကိုရောက်လာတာ ၈ ရက်နေ့ကတည်းက၊ တိုက်ပွဲက အခုလည်းဖြစ်နေတယ်။ ဘော်ကြိုဘုရားကနေ အသံတွေကြားပါတယ်ခင်ဗျ။ သီပေါအနောက်ဘက်တောင်တန်းတွေ ဘက်ကနေလာတာ။ အဲဒီအနီးနားတဝိုက် နောင်အန်း၊ ကုန်းညု၊ နားမွန်း၊ မန့်ဆိုင်း၊ တင်းလုံ၊ နမ့်ဆိမ်၊ ပုံဖန်း၊ ဆွန်အွဲ့က ရွာသားတွေ ထွက်ပြေးလာတယ်။ ဒီဘော်ကြိုဘုရားမှာတော့ ၃၃၀ ကျော်ရှိပါတယ်။ ကနေ့မနက် အိမ်ခြေ ၂၀ က မိသားစုဝင်တွေထပ်ရောက်တယ်၊ နောက်ထပ်ရောက်လာမှာလည်းရှိတယ်။ သူတို့မရောက်သေး တော့ ဘယ်ရွာက လူဦးရေဘယ်လောက်ဆိုတာတော့ မသိရသေးဘူးခင်ဗျ။”  

ဒါ့အပြင် သီပေါသာသနာ ၂၅၀၀ ကျောင်းတိုက်မှာလည်း မြေပြန့်ကနေ နမ့်ဆိမ်မှာ အလုပ်လာလုပ်တဲ့ လမ်းလုပ်သား ၂၀ ကျော်ရှိကြောင်း၊ စစ်ဘေးရှောင်တွေအတွက် နယ်စည်းမခြားနဲ့ အခြား ပရဟိတအဖွဲ့တွေ၊ အလှူရှင်တွေက စားနပ်ရိက္ခာ အသုံးအဆောင်တွေ  လာရောက်ကူညီနေပြီး ဆောင်းတွင်းဖြစ်တာကြောင့် အနွေးထည်နဲ့ စောင်တွေ လိုအပ်နေ သေးတယ်လို့ ဆိုပါတယ်။

အလားတူ ရှမ်းပြည်တောင်ပိုင်း လွိုင်လင်ခရိုင် မိုင်းကိုင်မြို့နယ်ထဲမှာလည်း အရင်ပတ်ကတည်းက ဒီနေ့ထိ တိုက်ပွဲဖြစ်လို့ ရွာသားပေါင်း ၃၀၀၀ ကျော် ထွက်ပြေးတိမ်းရှောင်နေရကြောင်း၊ စစ်ဘေး‌ရှောင်တွေဟာ မိုင်းကိုင်မြို့နယ်ကိုကျော်ပြီး လဲချားမြို့နယ်ထိ လာရောက်ခိုလှုံနေရရတယ်လို့ စစ်ဘေးရှောင်ကူညီသူတစ်ဦးက ဒီဗွီဘီကို ပြောပါတယ်။ 

“ကျမတို့ ဒီကနေ့ နောင်ပန်ကျေးရွာ ဟိုလွိုင်ကျောင်းတိုက်မှာ ရောက်နေတဲ့ မိုင်းကိုင်က စစ်ဘေးရှောင် ၅၁ ဦးကို သွားကူခဲ့ပါတယ်ရှင့်။ သူတို့ ၉ ရက်နေ့က ရောက်လာတာ၊ အဲဒီနေ့က ရောက်လာတဲ့ နောက်တစ်သုတ်က နောင်ပန်ရွာ သစ်ထုတ်တဲ့ဂိုဒေါင်မှာပါ။ ဝင်းကအကျယ်ကြီးဆိုတော့ အဲဒီမှာ အိမ်ထောင်စု ၂၆ စုနဲ့ လူပေါင်း ၁၆၀ ရောက်နေပါတယ်။ သူတို့ အဓိကလိုအပ်တာကတော့ စားနပ်ရိက္ခာပေါ့။”

 တိုက်ပွဲဖြစ်နေတဲ့ မိုင်းကိုင်မြို့နယ်ထဲမှာတော့ ဒီကနေ့ထိ စစ်ဘေးရှောင် အိမ်ထောင်စုဝင် ၅၇၇ စု လူဦးရေ ၂၇၀၀ ကျော်တို့ဟာ ဘုန်းကြီးကျောင်းအပါအဝင် စစ်ရှောင်စခန်း  ၁၂ ခုမှာ ခိုလှုံနေရတယ်လို့ အကူအညီပေးနေတဲ့ သံဃာ့ဩဝါဒခံ နာရေးကူညီမှုအသင်း မိုင်းကိုင်မြို့က သူတို့လူမှုကွန်ရက်စာမျက်နှာမှာ ဖော်ပြထားပါတယ်။ 

တအာင်းအမျိုးသား လွတ်မြောက်ရေးတပ်မတော် (TNLA)၊ ရှမ်းပြည်တိုးတက်ရေးပါတီ  (SSPP) ရှမ်းတပ်တို့ တပ်ပေါင်းစုနဲ့ ရှမ်းပြည်ပြန်လည်ထူထောင်ရေးကောင်စီ (RCSS)  ရှမ်းတပ်တို့ကြား နယ်မြေစိုးမှုပြဿနာကြောင့် တိုက်ပွဲဖြစ်နေကြတာပါ။

ဒီကိစ္စနဲ့ပတ်သက်လို့ TNLA ဘက်ကတော့ RCSS ဟာ ရှမ်းပြည်မြောက်ပိုင်း တအာင်းဒေသကို ကျူးကျော်လာလို့ SSPP နဲ့ပူးပေါင်းပြီး ၂၀၂၁ နှစ်ကုန်ပိုင်းမှာ RCSS ကို အကုန်တိုက်ထုတ်နိုင်ခဲ့တယ်လို့  ၁၀၊ ၀၁၊ ၂၀၂၂ နေ့စွဲနဲ့ ထုတ်ပြန်ထားပါတယ်။ 

RCSS ဘက်ကတော့ သူတို့တပ်ဖွဲ့ဝင်တွေဟာ ရှမ်းပြည်မြောက်ပိုင်းရော တောင်ပိုင်းမှာပါ ယခင်ကတည်းက ရှိနေခဲ့ပြီး ရှမ်းပြည်တပ်မတော်ဖြစ်တဲ့အတွက် ရှမ်းပြည်နေရာတိုင်းမှာ လှုပ်ရှားနေတာလို့  ဒီဗွီဘီကို ပြောခဲ့ဖူးပါတယ်။

1 week Ago

January 5, 2022

နမ့်ခမ်းတွင် တိုက်ပွဲဖြစ်၊ ရပ်ကွက်ထဲလက်နက်ကြီးကျသဖြင့် ပြည်သူ ၆ ဦး ဒဏ်ရာရ

ရှမ်းပြည်မြောက်ပိုင်း မူဆယ်ခရိုင် နမ့်ခမ်းမြို့ထဲကို ဒီကနေ့မနက် TNLA တအာင်းတပ်ဖွဲ့ ဝင်တွေ ဝင်ရောက်လာပြီးတဲ့နောက် စကစလက်အောက်ခံတပ်က လိုက်လံပစ်ခတ်ပြီး တိုက်ပွဲဖြစ်ပွားခဲ့ပါတယ်။ 

စစ်တပ်က ပစ်လိုက်တဲ့ လက်နက်ကျည်ဟာ ကောင်းနောင်ဇန့်ရပ်ကွက် ပန်လုံစုစည်းရွာထဲကို ကျပြီး မိသားစုဝင် ၆ ဦး ထိခိုက်ဒဏ်ရာရသွားပါတယ်။ 

TNLA တပ်ဖွဲ့ဝင်နှစ်ယောက် မနေ့က ဈေးထဲမှာ ပစ်သတ်ခံရပြီးတဲ့နောက် ဒီနေ့မနက် စစ်ကောင်စီတပ်တွေ စစ်ကြောင်းနှစ်ကြောင်းခွဲပြီး နမ့်ခမ်းမြို့အရှေ့ဘက် ကောင်းနောင်ဇန့် ရပ်ကွက်နဲ့ ဝိန်းဆာရပ်ကွက်ထဲ ဝင်ရောက်လာတယ်လို့ နမ့်ခမ်းဒေသခံက ဒီဗွီဘီကို ပြောပါတယ်။  

ဒီနောက် TNLA တပ်တွေ ပြန်ထွက်သွားပြီး မြို့တောင်ဘက်မှာရှိတဲ့ စစ်ကောင်စီတပ်က စခန်းသစ်ဘက်ကနေ လက်နက်ကြီးနဲ့ ပစ်လို့ ရွာသားတွေထိခိုက်ပြီး မြို့ပြင်ဘက်မှာ တိုက်ပွဲဆက်ဖြစ်နေတာလို့ ဆိုပါတယ်။

“TNLA က ဘာဖြစ်လို့ ဝင်လာလဲတော့ မသိဘူးဗျ။ မနေ့က သူတို့လူ ပစ်သတ်ခံရတာ မကျေနပ်လို့ အင်အားလာပြတာလား မသိဘူး။ သူတို့ဝင်လာတာ အေးဆေးပါပဲ၊ သေနတ်ကိုယ်စီနဲ့ တန်းစီပြီး လာတယ်၊ မြို့အဝင်ထွက်က လူတွေကို နည်းနည်းပါးပါးမေးတယ်၊ ဒါလောက်ပဲ။ သူတို့ပြန်သွားပြီး စကစတပ်ဘက်က စခန်းသစ်ကနေလက်နက်ကြီးနဲ့ အရင်ထုတယ်။ မနက် ၁၀ နာရီလောက်။ ပန်လုံရွာကလူတွေ ထိခိုက်သွားတာ အရင်ဆုံးလက်နက်ကြီးတဲ့ပစ်တဲ့ဟာပါ၊ နောက်တော့ ပစ်သံ တဖြည်းဖြည်းစိပ်လာတယ်၊ စက်သေနတ်နဲ့ ဆွဲပစ်သံပါကြားတယ်။ စကစတပ်ဘက်က ကောင်းနောင်ဇန့်ရပ်ကွက်ထဲဝင်လာပြီး  TNLA နောက်ကို လိုက်ပစ်တာလို့ပြောတယ်။ သူတို့ဆုတ်ခွာသွားတဲ့ လမ်းတလျှောက် ကောင်းပိန်း၊ ဟိုနား၊ ကောင်းတပ်၊ မန့်ခမ်း အဲဒီရွာတွေ ဘက်မှာ တိုက်ပွဲဆက်ဖြစ်တယ်၊  ညနေ ၃ နာရီလောက်မှာ ပစ်ခတ်သံတွေ ငြိမ်သွားပါတယ်ခင်ဗျ” လို့ နမ့်ခမ်းဒေသခံက ပြောပါတယ်။   

ကောင်းနောင်ဇန့်ရပ်ကွက်နေပြည်သူတစ်ဦးကလည်း လက်နက်ကြီး ကျတဲ့အိမ်ဟာ ကောင်းနောင်ဇန့်ရပ်ကွက်အစွန် ပန်လုံစုစည်းရွာသစ်ထဲမှာရှိပြီး ရွာသား ၆ ယောက် ထိမှန်သွားကြောင်း၊ ရပ်ကွက်ထဲမှာ ပစ်ခတ်ကြပြီး ရွာသား ၃ ယောက်ကို စကစတပ်ဘက်က ဖမ်းသွားတယ်လို့ ဆိုပါတယ်။ 

“လက်နက်ကြီးကျည်ကျတာက ကချင်မိသားစုအိမ်ပါ၊ သူတို့အိမ်လည်း ပျက်စီးသွားတယ်။  ၆ ယောက်ထိမှန်ဒဏ်ရာရတယ်၊ မိသားစုဝင်တွေလည်း ပါပါတယ်။ လူအိုရော၊ လူကြီးရော၊ လူငယ်ရော၊ ကလေးရောပါတယ်၊ အခု ဆေးရုံမှာ။ စကစတပ်ဖွဲ့ဝင်တွေ မြို့ထဲကနေ နောင်ဇန့်ရွာဘက်တက်လာပြီး နောင်ဇန့်ကုန်းမှာ ပစ်ခတ်ကြတယ်။ လမ်းထိပ်က အိမ်ခြံစည်းရိုးတွေမှာ အကာအကွယ်ယူပြီးပစ်တယ်၊ အိမ်တစ်အိမ်ရှေ့မှာ စကစတပ်ဘက်က ၂ ယောက် သေနတ်မှန်ပြီး ကျသွားလို့ အိမ်ထဲမှာရှိတဲ့လူ ၃ ယောက်ကို ဖမ်းသွားတယ်။”

နှစ်ဘက်တိုက်ပွဲအတွင်း လမ်းပေါ်၊ အိမ်ဝင်းထဲနဲ့ စိုက်ခင်းထဲမှာပါ လက်နက်ကျည်တွေ ကျရောက်ကြောင်း၊ နမ့်ခမ်းပြည်သူတွေကတော့ TNLA ဝင်လာတဲ့ မနက်ခင်းကတည်းက အိမ်တံခါးပိတ်၊ ဆိုင်ပိတ်ဈေးပိတ်ပြီး အပြင်မထွက်ရဲတော့ဘူးလို့ ဆိုပါတယ်။ 

TNLA တပ်ဖွဲ့ဝင်တွေဟာ ပြီးခဲ့တဲ့လက နမ့်ခမ်းမြို့မဈေးကြီးထဲမှာ ဆက်ကြေးတွေ သိန်းနဲ့ချီ တိုးပြီးကောက်လို့ ဈေးသူဈေးသားတွေက ၅ ရက်တာ ဈေးပိတ်ပြီးဆန္ဒပြခဲ့ကြပါတယ်။

ဒါပေမဲ့ TNLA ဘက်က အခွန်မလျှော့ပေးဘဲ မနေ့တနေ့က နောက်ထပ်လာကောက်ပြီး မနေ့ကတော့ အမည်မသိသေနတ်သမားတွေရဲ့ ပစ်သတ်တာကို ခံခဲ့ရတာပါ။ 

သေဆုံးသူတွေဟာ TNLA ဆက်ကြေးကောက်သမားလို့ ဒေသခံတွေ ပြောကြပေမယ့် သူတို့အဖွဲ့ဝင်ဟုတ်၊ မဟုတ်ကိုတော့ အဖွဲ့အစည်းရဲ့ အတည်ပြုပြောကြားချက်ကို ဆက်သွယ်မေးမြန်းလို့ မရသေးပါဘူး။

2 weeks Ago
More News
Up