TikTok

August 27, 2020

TikTok အရာရှိချုပ် ရာထူးက နုတ်ထွက်

ဗွီဒီယိုဖိုင် အတိုလေးတွေကို အွန်လိုင်းမှာ မျှဝေတဲ့ အပလီကေးရှင်း TikTok ရဲ့ ပိုင်ရှင် ဘိုက်ဒန့်စ်ကုမ္ပဏီရဲ့ လုပ်ငန်းလည်ပတ်မှုဆိုင်ရာ အရာရှိချုပ် ကီဗင်မေယာဟာ ရာထူးက နုတ်ထွက် သွားပါတယ်။  သူ့နေရာမှာ အမေရိကန်နိုင်ငံသား မန်နေဂျာချုပ် ဗာနက်ဆာပါပက်စ်က အစားထိုးနေရာ ယူမယ်လို့ အတွင်းသိတွေကို ကိုးကားပြီး ရိုက်တာ သတင်းမှာ ဖော်ပြပါတယ်။ TikTok နဲ့ ပတ်သက်ပြီး အမေရိကန်နိုင်ငံထဲမှာ ငွေအဝင်အထွက် တားမြစ်ပိတ်ပင်ဖို့ အမေရိကန်သမ္မတက အထူးအမိန့် ထုတ်ပြန်ခဲ့တာပါ။  အဲဒီအတွက် အမေရိကန်အစိုးရကို TikTok က တရားစွဲအပြီး ရက်ပိုင်းအတွင်း မေယာက ရာထူးက နုတ်ထွက်ခဲ့ပါတယ်။  မေယာဟာ ဇွန်လ ၁ ရက်ကမှ TikTok ရဲ့ မိခင်ကုမ္ပဏီ ဘိုက်ဒန့်စ်ကို လာရောက် ပူးပေါင်းတာဖြစ်ပြီး အရင်က ဝေါလ်ဒစ္စနေးကုမ္ပဏီရဲ့ အမှုဆောင်လည်း ဖြစ်ပါတယ်။ “လတ်တလော သီတင်းပတ်တွေမှာ နိုင်ငံရေးဆိုင်ရာ ပတ်ဝန်းကျင်က သိသိသာသာ ပြောင်း ခဲ့ပါတယ်။ ကျနော် လုပ်ငန်းတွင်း ဖွဲ့စည်းတည်ဆောက်ပုံ အပြောင်းအလဲတချို့ လုပ်ဖို့လိုလို့ သိသာ တဲ့ ထင်ဟပ်ချက် တချို့ လုပ်ခဲ့ပြီးပြီ။ ကုမ္ပဏီကို စွန့်ခွာဖို့ ဆုံးဖြတ်ပြီးပြီဆိုတာ စိတ်လေးလေး နဲ့ပဲ အားလုံး သိအောင် ပြောခဲ့ချင်တယ်” လို့  မေယာက ပြောပါတယ်။  ဘိုက်ဒန့်စ်ကုမ္ပဏီ တည်ထောင်သူနဲ့ အမှုဆောင် အရာရှိချုပ် ကျန်းယီမင်ကတော့ ကုမ္ပဏီ ဟာ ကမ္ဘာတလွှားမှာ အထူးသဖြင့် အမေရိကန်နဲ့ အိန္ဒိယမှာ ကြုံနေရတဲ့ ကိစ္စရပ်တွေအတွက် အဖြေရှာဖို့ အမြန်ရွေ့လျားနေတယ် လို့ ပြောပါတယ်။  ဘိုက်ဒန့်စ်ကို  မေယာ လာပူးပေါင်းတာဟာ ကျနော်တို့ရဲ့ စိန်ခေါ်မှု အများဆုံး အချိန်အတွင်း ရောက်လာတာလို့ ကျန်းယီမင်က ပြောပါတယ်။ “ကျနော်တို့လို အမြန်ရွေ့လျားနေတဲ့ ကုမ္ပဏီတခုမှာ ခေါင်းဆောင်နေရာကို ဘယ်တော့မှ အလွယ်နဲ့ မရောက်လာဘူး၊ အခြေအနေက သူရောက်လာပြီး နောက်ပိုင်းမှာ ပိုပြီးရှုပ်ထွေးလာခဲ့ တယ်” လို့ ကျန်းက ပြောပါတယ်။
1 year Ago

August 3, 2020

TikTok ကို မိုက်ခရိုဆော့ဖ်ထံ ရောင်းချရေး ၄၅ ရက် အချိန်ပေးမည်

တရုတ်ပိုင် ဘိုက်ဒန့်စ်ကုမ္ပဏီ TikTok အပလီကေးရှင်းကို အမေရိကန်ရဲ့ မိုက်ခရိုဆော့ဖ်ကော်ပိုရေးရှင်းဆီ ရောင်းဖို့ ၄၅ ရက် အချိန်ပေးမယ်လို့ အမေရိကန်သမ္မတ ဒေါ်နယ်ထရမ့်က သဘောတူထားတယ်လို့ သိရပါတယ်။ TikTok အပလီကေးရှင်းဟာ သုံးစွဲသူတွေရဲ့ ကိုယ်ရေးအချက်အလက်တွေကို ကိုင်တွယ် သုံးစွဲပုံကြောင့် အမေရိကန်အတွက် ဘေးရှိတယ်လို့ အမေရိကန် အရာရှိတွေက ပြောပါတယ်။  တကယ်လို့ TikTok အား မိုက်ခရိုဆော့ဖ်ဆီကို မရောင်းဘဲ ပယ်ချခဲ့ပါက အမေရိကန်နိုင်ငံထဲမှာ TikTok မသုံးဖို့ တားမြစ်ပိတ်ပင်ရေး စီစဉ်နေတယ်လို့ ထရမ့်က ဇူလိုင် ၃၁ ရက်မှာ ပြောခဲ့ပါတယ်။ ဒါပေမဲ့ ဘိုက်ဒန့်စ်ဆီက TikTok ကို ဝယ်ဖို့ ညှိနှိုင်းမှုတွေ ဆက်လုပ်ပြီး စက်တင်ဘာ ၁၅ ရက်မှာ သဘောတူညီချက်ရဖို့ ရည်မှန်းထားတယ်လို့ မိုက်ခရိုဆော့ဖ်ရဲ့ အမှုဆောင်အရာရှိချုပ် စတ်ယာ နာဒယ်လာနဲ့ ထရမ့်ကြား ဆွေးနွေးမှုအပြီးမှာ ကြေညာချက် ထုတ်ပြန်ပါတယ်။ ဒါပေမဲ့ ထရမ့် စိတ်ပြောင်းမလား ဆိုတာတော့ ရှင်းရှင်းလင်းလင်း မရှိသေးပါဘူး။ နိုဝင်ဘာမှာ ကျင်းပမယ့် အမေရိကန် သမ္မတ ရွေးကောက်ပွဲအကြိုကာလမှာ TikTok ကို တားမြစ်ပိတ်ပင်လိုက်ပါက လူငယ် သုံးစွဲသူတွေ အများအပြားကို စိတ်ပျက်အောင် လုပ်သလို ဖြစ်နိုင်တဲ့အပြင် တရားရေး စိန်ခေါ်မှုလှိုင်းတွေကို ချဲ့ကားသလိုလည်း ဖြစ်နိုင်တယ်လို့ ရိုက်တာ သတင်းမှာ ဖော်ပြထားပါတယ်။ ထင်ရှားတဲ့ ရီပတ်ဗလစ်ကင် ပါတီဝင်အမတ်တွေ အတော်များများကလည်း TikTok ကို မိုက်ခရိုဆော့ဖ်ဆီ ရောင်းရေး ကျောထောက်နောက်ခံပေးဖို့ ထရမ့်ကို တိုက်တွန်းတဲ့ ကြေညာချက်ကို ထုတ်ပြန်ထားပါတယ်။
1 year Ago
Up