Save the Children

July 30, 2021

မြန်မာကလေးသူငယ်များ ပညာရေးနှင့် ကျန်းမာရေးစောင့်ရှောက်မှုအခြေအနေ ပိုမိုဆိုးဝါးလာ

မြန်မာနိုင်ငံမှာ မတရားစစ်အာဏာသိမ်းကာလ ၆ လကြာမြင့်လာချိန်မှာ နိုင်ငံတဝန်း ကိုဗစ်-၁၉ ကူးစက်မှုနဲ့အတူ  ကလေးသူငယ်တွေရဲ့ ပညာရေး၊ ကျန်းမာရေး စောင့်ရှောက်ပေးနိုင်မှု အခြေအနေတွေဟာ ပိုမိုဆိုးဝါးလာနေတယ်လို့ Save the Children အဖွဲ့က သတိပေးထားပါတယ်။

       မြန်မာနိုင်ငံမှာ ကိုဗစ်-၁၉ ရောဂါကူးစက်ခံရမှုနဲ့ သေဆုံးတဲ့ ကိန်းဂဏန်းအချက် အလက်တွေကို တိတိကျကျ မသိရသေးပဲနဲ့တောင် အကြမ်းဖက်စစ်ကောင်စီရဲ့ နေ့စဉ် ထုတ်ပြန်ချက်တွေအရ  ပိုးတွေ့နှုန်းဟာ ၃၇ ရာခိုင်နှုန်းကျော်နဲ့ ကမ္ဘာနိုင်ငံတွေထဲ အမြင့် ဆုံးအခြေအနေမှာ ရှိနေခဲ့တာ ဖြစ်တယ်လို့ ဆိုပါတယ်။

ဒါ့အပြင် ကလေးသူငယ်တွေများစွာရဲ့ အုပ်ထိန်းသူတွေလည်း ကိုဗစ်-၁၉  ရောဂါ ကူးစက်ခံရပြီး သေဆုံးမှုတွေကြောင့် ဆုံးရှုံးနေကြရတယ်လို့ ဆိုပါတယ်။

ကမ္ဘာတဝန်းမှာတော့ ကလေးသူငယ်ဦးရေ ၁ သန်းကျော်ဟာ ကိုဗစ်-၁၉ ရောဂါကြောင့် မိဘတဉီး ဆုံးရှုံးခဲ့ရပြီး စုစုပေါင်းဦးရေ ၁ သန်းခွဲကတော့ မိဘတဦး၊ ဒါမှမဟုတ် သူတို့ကို ပြုစုစောင့်ရှောက်တဲ့ အဘိုးအဘွားတဦး၊ ဆွေမျိုးသားချင်းတဦး ဆုံးရှုံးခဲ့ကြရတယ်လို့ ဒီလထဲမှာ ထုတ်ဝေတဲ့ The Lancet ဆေးပညာဂျာနယ်မှာ ဖော်ပြပါတယ်။

မြန်မာနိုင်ငံမှာတော့ ပြီးခဲ့တဲ့ ဖေဖော်ဝါရီ ၁ ရက် စစ်အာဏာသိမ်းမှုနောက်ပိုင်း ကျန်းမာရေးစနစ်ဟာ သိသိသာသာ ပြိုလဲသွားခဲ့ပြီဖြစ်ကာ နိုင်ငံတွင်း အကြမ်းဖက်မှုတွေ၊ ဆင်းရဲမွဲတေမှုနဲ့ ရောဂါတွေကြောင့် ကာကွယ်ဆေးတွေလည်း ကျယ်ကျယ်ပြန့်ပြန့် မရရှိနိုင်သေးပါဘူး။

မိသားစုဝင်တိုင်းဟာ ကိုဗစ်-၁၉ ကူးစက်ခံရမှုကြောင့် ခွဲခွာကြရတာ၊ ဆေးဝါးကုသမှု၊ အရေးပေါ် အောက်ဆီဂျင်နဲ့ တခြားသော ဆေးဘက်ဆိုင်ရာ ထောက်ပံ့ကူညီမှုတွေ ရရှိနိုင်ဖို့ ရုန်းကန်နေကြရပြီး ဈေးကွက်ထဲမှာလည်း မထိန်းချုပ်နိုင်တဲ့ထိ ဆေးဝါးဈေးနှုန်းတွေ ထိုးတက်နေတာ ဖြစ်ပါတယ်။

ဒါ့အပြင် ကုလသမဂ္ဂရဲ့ ထုတ်ပြန်ချက်အရ မြန်မာနိုင်ငံမှာ စစ်အာဏာသိမ်းပြီးချိန် ကတည်းက ကလေးသူငယ် ၇၅ ယောက် သတ်ဖြတ်ခံခဲ့ရပြီး အမှန်တကယ်တမ်းမှာ ဒီပမာဏထက်လည်း ပိုနေနိုင်တယ်လို့ ဆိုပါတယ်။

သေဆုံးခဲ့တဲ့ ကလေးသူငယ်တွေရဲ့ သုံးပုံတပုံကတော့ အသက် ၁၆ နှစ်အောက် အရွယ်တွေဖြစ်ကြပြီး အငယ်ဆုံးကတော့ အသက် ၁၈ လ အရွယ် မိန်းကလေးငယ်ဖြစ်တယ် လို့ ဆိုပါတယ်။

       လတ်တလောမှာတော့ ကိုဗစ်-၁၉ ကူးစက်ပျံ့နှံ့မှုတွေ ရှိနေတယ်လို့ သတင်းတွေ ထွက်နေတဲ့ ရန်ကုန်အင်းစိန်အကျဉ်းထောင်ထဲမှာ ဖမ်းဆီးထိန်းသိမ်းခံထားရတဲ့ ကလေးသူငယ်ဦးရေ အနည်းဆုံး ၁၀၄ ယောက် ရှိနေတယ်လို့ ဆိုပါတယ်။

ဒါ့အပြင် နိုင်ငံရဲ့ စီးပွားရေးအခြေအနေတွေဟာလည်း ပိုမိုဆိုးဝါးလာနေပြီး ကမ္ဘာ့ဘဏ်ကတော့ အခုနှစ်ထဲမှာ မြန်မာပြည်တွင်း အသားတင်ထုတ်လုပ်မှု ပမာဏ ဂျီဒီပီဟာ ၁၈ ရာခိုင်နှုန်းထိ ကျဆင်းလာနိုင်ကြောင်း ခန့်မှန်းထားပြီး အပြည်ပြည်ဆိုင်ရာ အလုပ် သမားအဖွဲ့(အိုင်အယ်လ်အို)ကတော့ အခုနှစ်စကတည်းက လူဦးရေ ၂ ဒသမ ၂ သန်းဟာ အလုပ်လက်မဲ့တွေ ဖြစ်ခဲ့ကြရတယ်လို့ ဆိုပါတယ်။

4 months Ago

April 2, 2021

စစ်တပ်၏ အကြမ်းဖက်ပစ်ခတ်မှုကြောင့် ကျဆုံးကလေးငယ် ၄၃ ဦးရှိဟု Save the Children အဖွဲ့ ထုတ်ပြန်

စစ်အာဏာသိမ်းမှု ၂ လကြာ မြန်မာ့နွေဦးတော်လှန်ရေးကာလအတွင်း စစ်တပ် နဲ့ရဲ လက်နက်ကိုင်အင်အားစုတွေရဲ့ အကြမ်းဖက်ဖြိုခွင်းမှုတွေကြောင့် ကျဆုံးခဲ့ရတဲ့ ကလေးငယ် ၄၃ ယောက်ထိ ရှိလာခဲ့တယ်လို့ Save the Children အဖွဲ့က ထုတ်ပြန်ပါတယ်။

ကလေးတွေ အသက်ဆုံးရှုံးရမှုဟာ ပြီးခဲ့တဲ့ ၁၂ ရက်တာအတွင်း နှစ်ဆမြင့် တက်ခဲ့ပြီး ဒါဟာ လက်နက်ကိုင်အင်အားစုတွေက ကလေးငယ်တွေရဲ့ အသက်ကို လုံးဝ လေးစားမှုမရှိကြောင်း ပြသနေတာဖြစ်တယ်လို့ ဆိုပါတယ်။

အသက်ဆုံးရှုံးရတဲ့ ကလေးတွေထဲ အငယ်ဆုံးက ၇ နှစ်အရွယ်သာရှိသေးတဲ့ မိန်း ကလေးငယ်ဖြစ်ကာ အသက် ၁၆ နှစ်အောက် ကလေးငယ်စုစုပေါင်း ၁၅ ယောက်နဲ့ အ သက် ၉ နှစ်အရွယ်၊ ၁၁ အရွယ် ကလေးတွေလည်း ပါဝင်တယ်လို့ Save the Children က ပြောပါတယ်။

ကျဆုံးကလေးငယ်တွေထဲက အသက် ၁၃ နှစ်အရွယ် လူငယ်လေးတယောက်က တော့ လက်နက်ကိုင်အင်အားစုတွေရဲ့ အဝေးကို ရှောင်တိမ်းထွက်ပြေးဖို့  ကြိုးစားနေချိန်မှာ ဦးခေါင်းကိုကျည်ဆံနဲ့ ပစ်ခတ်ခံရကာ အသက်ဆုံးရှုံးခဲ့ရပြီး မန္တလေးမှ အသက် ၁၄ နှစ်အရွယ် လူငယ်လေးတယောက်ဟာလည်း နေအိမ်ထဲရှိနေချိန်မှာ ကျည်ဆန်ထိမှန် အ သက်ဆုံးရှုံးခဲ့ရတယ်လို့ ဆိုပါတယ်။

အာဏာသိမ်းမှုနောက်ပိုင်း အကြမ်းဖက်မှုတွေကြောင့် ရုပ်ပိုင်းဆိုင်ရာ ထိခိုက် ဒဏ်ရာ ရရှိခဲ့ကြတဲ့ ကလေးသူငယ် အရေအတွက်ကို မသိရှိရသေးပေမယ့် သိသာထင် ရှားသော ပမာဏ ဖြစ်ဖွယ်ရှိပြီး သတင်းတွေအရ ထိခိုက်ဒဏ်ရာရရှိတဲ့ ကလေးသူငယ် တွေထဲ မျက်လုံးကို ရာဘာကျည်ဆန်နဲ့ အပစ်ခံရတဲ့ အသက် ၁ နှစ်အရွယ် ကလေးငယ်ယောက်လည်း ပါဝင်နေတယ်လို့ ဆိုပါတယ်။

ကလေးသူငယ်တွေကို အန္တရာယ်ကျရောက်မှုကနေ အကာအကွယ်ပေးဖို့ ထပ်ခါ တလဲလဲ တောင်းဆိုမှုတွေပြုလုပ်နေပေမယ့် ကလေးတွေဟာ အသက်သေစေနိုင်လောက်တဲ့ ပစ်ခတ်မှုတွေရဲ့ ပစ်မှတ်တွေမှာ ဆက်လက်ရှိနေတာကို ထိတ်လန့်တုန်လှုပ်မိကြောင်း၊ အထူးသဖြင့် အဆိုပါကလေးငယ်တွေအတွက် အန္တရာယ် မကျရောက်သင့်တဲ့ နေရာဖြစ်တဲ့ နေအိမ်မှာ ရှိနေချိန်မှာတောင် ပစ်ခတ်ခံရတာဟာ ထိတ်လန့်ကြောက်ရွံ့ ဖွယ်ဖြစ်တယ်လို့လည်း ထုတ်ပြန်ချက်ထဲမှာ ဖော်ပြပါတယ်။

ဒါ့အပြင် ဆက်လက်ဖြစ်ပေါ်နေတဲ့ အကြမ်းဖက်မှုတွေကြောင့် ရရှိခံစားရတဲ့ ကြောက်ရွံ့ထိတ်လန့်မှုတွေ၊ စိတ်ဖိစီးမှုနဲ့ ၀မ်းနည်းမှုတွေဟာ မြန်မာနိုင်ငံက သန်းပေါင်း များစွာသော ကလေးသူငယ်တွေရဲ့ စိတ်ကျန်းမာရေးအပေါ် ဆိုးကျိုးသက်ရောက်စေတယ်လို့ Save the Children က ဆိုပါတယ်။

          Save the Children အနေနဲ့ ဆန္ဒပြသူတွေအပေါ် သေစေနိုင်လောက်တဲ့ တိုက်ခိုက်မှုတွေ ပြုလုပ်နေတာကို ချက်ချင်းရပ်တန့်ဖို့ လက်နက်ကိုင်အင်အားစုတွေကို ထပ်မံ တောင်းဆိုလိုက်ပါတယ်။

ဘယ်လိုအကျပ်အတည်း ကာလတွေမှာမဆို ကလေးသူငယ်တွေဟာ အပြစ်ကင်းမဲ့တဲ့ သားကောင်တွေ ဖြစ်နေရပြီး မြန်မာနိုင်ငံရှိ ကလေးသူငယ်တွေကို ကာကွယ်နိုင်မယ့် တခုတည်းသော နည်းလမ်းကတော့ သေစေနိုင်လောက်တဲ့ အကြမ်းဖက်မှုတွေအားလုံးကို လုံးဝ ရပ်တန့်လိုက်ဖို့ပဲ ဖြစ်တယ်လို့ ပြောပါတယ်။

      နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ)ရဲ့ စာရင်း ပြုစုမှုအရ မြန်မာနိုင်ငံမှာ စစ်အာဏာသိမ်းမှု ၂ လအကြာ အကြမ်းဖက်ဖြိုခွင်းမှုတွေကြောင့် နွေဦးတော်လှန် ရေးကာလအတွင်း ကျဆုံးပြည်သူပေါင်း ၅၃၆ ယောက်ထိ ရှိလာခဲ့ပြီ လို့ ထုတ်ပြန်ထားပါတယ်။

8 months Ago
More News
Up