rsf

October 7, 2021

ကမ္ဘာတဝန်း ဂျာနယ်လစ်များအပေါ် ခြိမ်းခြောက်မှု ပိုဆိုးလာဟု RSF သတိပေး

ကမ္ဘာတဝန်း ဂျာနယ်လစ်တွေပေါ်  ခြိမ်းခြောက်မှုတွေဟာ လတ်တလောနှစ်တွေမှာ ပိုပြီး အမျိုးအစားစုံလာတယ်လို့ ပြင်သစ်အခြေစိုက် နယ်စည်းမခြားသတင်းထောက်များအဖွဲ့ (RSF)က သတိပေးလိုက်ပါတယ်။

မီဒီယာ လွတ်လပ်ခွင့်ကို ခုခံကာကွယ်ရာမှာ ကမ္ဘာ့အကြီးဆုံး အစိုးရမဟုတ်တဲ့ အဖွဲ့အစည်း ဖြစ်တဲ့ (RSF)ဟာ သတင်းအချက်အလက် လွတ်လပ်ခွင့်ကို ထောက်ကူအားပေးသူပါ။ အခြေခံ လူ့အခွင့်အရေးဟာ အကြောင်းကြားခံရဖို့နဲ့ သူတပါးကို ပြန်အကြောင်းကြားနိုင်ဖို့လို့ သူ့ရဲ့ အင်တာနက် စာမျက်နှာပေါ်မှာ ဖော်ပြပါတယ်။

လွတ်လပ်တဲ့အပြုအမူနဲ့ မတူခြားနားတဲ့ အမြင်တွေကို စွဲကိုင်ထားတဲ့ သတင်းထောက်တွေကို သူတို့က ကာကွယ်နေတယ်လို့ (RSF) က ပြောပါတယ်။

ဘဲလာရုစ်၊ မြန်မာ၊ အမေရိကန်နဲ့ တူရကီနိုင်ငံတွေအပါအဝင် နိုင်ငံအသီးသီးက စာနယ်ဇင်း လွတ်လပ်ခွင့်အတွက်ကိုလဲ ဆော်သြခဲ့ပါတယ်။

ကမ္ဘာတဝန်း သတင်းထောက် အယောက် ၃၀၀ ကျော်ထောင်ချခံထားရတယ်လို့လည်း  (RSF)ရဲ့ ညွှန်ချုပ်စရစ်စတော့ဖ် ဒေလွိုင်ရေက ရိုက်တာ သတင်းဌာနကို ပြောပါတယ်။

အရင်ကအာဏာရှင်ဆန်တဲ့ စစ်အစိုးရတွေဟာ စာနယ်ဇင်းလွတ်လပ်ခွင့်ကို အကြီးဆုံး ချိုးဖောက်သူတွေ ဖြစ်ခဲ့ကြတယ် ဒီနေ့မှာတော့ မာဖီးယား ဂိုဏ်းတွေ၊ အစွန်းရောက် အုပ်စုတွေနဲ့ တချို့ လှုပ်ရှားမှုတွေဟာ သတင်းထောက်တွေကို ခြိမ်းခြောက်မှု ဖြစ်လာခဲ့တယ်လို့ သူက ဆက်ပြောပါတယ်။

“နာမည်ဖော်ထုတ်ပြီး အရှက်ရစေတဲ့ ဗျူဟာက မလုံလောက် တော့ဘူး။ မီဒီယာဖော်ပြချက်ရဲ့ ဖိအားနဲ့ မလုံလောက်တော့ဘူး။ ဒါကြောင့် ကျနော်တို့ တိုက်ရိုက်ညှိုနှိုင်းတဲ့ ဗျူဟာသစ်ကို စကျင့်သုံးနေပြီ။ ကျနော်တို့ဟာ လူဆိုးတွေနဲ့ပါ အဆက်အသွယ်ရှိ လာပြီး ဆွေးနွေးလာခဲ့ရတယ်”လို့  ညွှန်ချုပ်စရစ်စတော့ဖ် ဒေလွိုင်ရေကပြောပါတယ်။

စာနယ်ဇင်းပညာသာ မရှိရင် သဘောထားတွေ ထုတ်ဖော်ပြော ဆိုချက်တွေအတွက် ဘယ်လိုလွတ်လပ်ခွင့်မှရှိမှာ မဟုတ်တော့ဘူးလို့ သူက ပြောပါတယ်။

RSF ဟာ ရိုက်တာသတင်းဌာနက သတင်းထောက် မြန်မာနိုင်ငံသား ကိုဝလုံးနဲ့ ကိုကျော်စိုးဦး၊ မာလီနိုင်ငံက ဘာသာရေးစစ်ဝါဒီတွေ ဖမ်းတာခံရတဲ့ ပြင်သစ် သတင်းထောက်နဲ့ ဘဲလာရုစ် အတိုက်အခံ ဘလော့ဂါတို့ကို ပြန်လွှတ်ပေးဖို့ လှုပ်ရှားခဲ့ဖူးပါတယ်။

မတ်လမှာတော့ ဆော်ဒီအာရေဗျ အိမ်ရှေ့စံ မင်းသားနဲ့ ခေါင်းဆောင်တွေက သတင်းထောက် ဂျမဲလ် ခက်ရှားဂျီကို သတ်ဖြတ်မှုအတွက် လူသားထုအပေါ် ကျူးလွန်တဲ့ ရာဇဝတ်မှုနဲ့ တရားရုံးမှာ လျှောက်ထား အမှုဖွင့်ခဲ့ပါတယ်။

စာနယ်ဇင်းလွတ်လပ်ခွင့်အတွက်လှုပ်ရှားဆောင်ရွက်နေတဲ့   (RSF) အဖွဲ့ဟာ   ၂၀၂၁ ဒီနှစ် ငြိမ်းချမ်းရေး နိုဘယ်လ်ဆုအတွက် အမည်စာရင်းတင်သွင်းခံရတဲ့ အဖွဲ့အစည်းတခုလည်းဖြစ်ပါတယ်။  

၂၀၂၁ ခုနှစ်အတွက် နိုဘယ်ငြိမ်းချမ်းရေးဆုအတွက် အမေရိကန်ဒေါ်လာ ၁၁သိန်းကျော်နဲ့ ညီမျှတဲ့ ဆွီဒင် ခရောင်းငွေ ဆယ်သန်းရမှာ ဖြစ်ပြီး ဆုရှင်ကို အောက်တိုဘာ ၈ရက်မှာ ကြေညာမှာဖြစ်ပါတယ်။

4 months Ago

August 22, 2021

ဖမ်းဆီးခံဂျာနယ်လစ် ၂ ဦး ရှေ့နေနှင့်တွေ့ခွင့်မရ၊ အမြန်ဆုံးပြန်လွှတ်ပေးရန် RSF တောင်းဆို

ပြီးခဲ့တဲ့ရက်ပိုင်းက ဖမ်းဆီးခံလိုက်ရတဲ့ ဂျာနယ်လစ် စည်သူအောင်မြင့်နဲ့ ထက်ထက်ခိုင်တို့ဟာ လက်ရှိအချိန်ထိ ရှေ့နေနဲ့ တွေ့ခွင့်မရရှိသေးကြောင်းနဲ့ သူတို့ကို အမြန်ဆုံး ပြန်လွှတ်ပေးဖို့  ပြင်သစ်နိုင်ငံအခြေစိုက် နယ်စည်းမခြားသတင်းသမားများအဖွဲ့(RSF)က တောင်းဆိုလိုက်ပါတယ်။

VOA နဲ့ Frontier Myanmar သတင်းဌာနရဲ့ ပင်တိုင်ဆောင်းပါးရှင် ဝါရင့်သတင်းသမား ဦးစည်သူအောင်မြင့်နဲ့ BBC Media Action မှာ အလွတ်တန်းထုတ်လုပ်ရေးမှူး မထက်ထက်ခိုင်တို့ကို အကြမ်းဖက်စစ်အုပ်စုက သြဂုတ် ၁၅ ရက်နေ့က သူတို့ ပုန်းရှောင်နေကြတဲ့ ရန်ကုန်မြို့က နေအိမ်မှာ စစ်တပ်က ဖမ်းဆီးခဲ့တာဖြစ်ပါတယ်။

သူတို့ကို ဖမ်းဆီးထားပြီး တွေ့ခွင့်မပေးပဲ ထားတာဟာ လက်ခံနိုင်စရာ မရှိကြောင်းလည်း RSF  အာရှ၊ ပစိဖိတ်ဒေသဆိုင်ရာ တာဝန်ခံ ဒန်နီရယ်ဘက်စ်တတ်ဒ်က ပြောပါတယ်။

မြန်မာသတင်းသမားတွေကို စစ်တပ်အာဏာပိုင်တွေက ဆက်လက်ဖမ်းဆီးနေတဲ့ အပေါ်လည်း ပြစ်တင်ရှုတ်ချလိုက်ပြီး ချက်ခြင်းပြန်လွှတ်ပေးဖို့ လည်း တောင်းဆိုထားပါတယ်။

စစ်အာဏာသိမ်းပြီး နောက်ပိုင်း ဖမ်းဆီးခံထားရတဲ့ သတင်းမီဒီယာသမား ၅၀ လောက်ရှိလာပြီဖြစ်ပြီး ဖမ်းဆီးခံရတဲ့ သတင်းသမားတွေထဲ ထောင်ဒဏ်အပြစ်ပေး ခံရတာတွေလည်းရှိသလို ပြန်လွှတ်ပေးခဲ့တာတွေလည်း ရှိခဲ့ပါတယ်။ လတ်တလောအချိန်ထိ သတင်းသမား ၃၀ ကျော် ကိုဆက်လက်ဖမ်းဆီးထားတာကြောင့် လူ့အခွင့်အရေးတက်ကြွလှုပ်ရှားသူ တွေနဲ့ နိုင်ငံတကာ အသိုင်းအဝန်းကလည်း ပြန်လွှတ်ပေးဖို့ ဖိအားပေးတောင်းဆိုနေကြ တာပါ။

နယ်စည်းမခြား သတင်းသမားများအဖွဲ့(RSF)က ထုတ်ပြန်တဲ့ စာနယ်ဇင်းလွတ်လပ်ခွင့် အညွှန်းကိန်းမှာတော့ မြန်မာနိုင်ငံက နိုင်ငံပေါင်း ၁၈၀ မှာ အဆင့် ၁၄၀ နဲ့ ရပ်တည်နေတာ ဖြစ်ပါတယ်။

5 months Ago
Up