Robert Pattinson

A d v e r t i s e m e n t With Us

July 28, 2020

ရုံတင်ရက် အကြိမ်ကြိမ်ရွှေ့ဆိုင်းခဲ့ရသည့် ဟောလိဝုဒ်စပိုင်ရုပ်ရှင် Tenet ရုံတင်တော့မည် (နမူနာ)

ကမ္ဘာနိုင်ငံတွေအနှံ့ ကူးစက်ပျံ့နှံ့ခဲ့တဲ့ ကိုဗစ်-၁၉ ကြောင့် ရုံတင်ရက် အကြိမ်ကြိမ် ရွှေ့ဆိုင်းခဲ့ရတဲ့ ဟောလိဝုဒ်ရုပ်ရှင် Tenet ကို လာမယ့် ဩဂုတ်လမှာ ရုံတင်ပြသတော့မှာ ဖြစ်ပါတယ်။ စပိုင်ရုပ်ရှင်ကားတကားဖြစ်တဲ့ ဒီကားကိုတော့ Memento (2000) ၊ Batman Begins (2005) ၊ Inception (2010) ၊ Dunkirk (2017) စတဲ့ ရုပ်ရှင်ကားတွေနဲ့ ထင်ရှားတဲ့ နာမည်ကြီး ရုပ်ရှင်ဒါရိုက်တာ Christopher Nolan က ကိုယ်တိုင်ဇာတ်ညွှန်းရေး ရိုက်ကူးပုံဖော်ထားခဲ့တာ ဖြစ်ပါတယ်။ Nolan ဟာ ဒီဇာတ်ညွှန်းအတွက် အချိန် ၅ နှစ်ထက်မနည်း ပြင်ဆင်ခဲ့ရပြီး သရုပ်ဆောင်တွေ ခေါ်ယူမှုကိုတော့ ပြီးခဲ့တဲ့ ၂၀၁၉ ခုနှစ်၊ မတ်လမှာ ခေါ်ယူခဲ့တာ ဖြစ်ပါတယ်။ ဒီကားထဲမှာတော့ တတိယကမ္ဘာစစ်ကာလအခြေခံ စိတ်ကူးယဉ်ဇာတ်လမ်းကို အခြေပြု ရိုက်ကူးထားခဲ့တာဖြစ်ပြီး ကမ္ဘာကြီးတခုလုံးလွတ်မြောက်နိုင်ဖို့ Tenet လို့ ခေါ်တဲ့အဖွဲ့ရဲ့ မစ်ရှင်နဲ့အတူ တိုက်ခိုက်မှုတွေ၊ စွန့်စားမှု အပစ်အခတ်ဇာတ်ဝင်ခန်းတွေနဲ့ ရှုစားကြရမှာ ဖြစ်ပါတယ်။ ဒီကားထဲမှာတော့ ဟောလိဝုဒ်လူမည်းသရုပ်ဆောင်မင်းသား John David Washington နဲ့ Twilight ရုပ်ရှင်စီးရီးစ်တွေနဲ့ နာမည်ကြီးတဲ့ သရုပ်ဆောင်မင်းသား Robert Pattinson တို့က ခေါင်းဆောင်ပါဝင်ထားကြပြီး တခြားသရုပ်ဆောင်တွေအနေနဲ့ Elizabeth Debicki ၊ Dimple Kapadia ၊ Michael Caine ၊ Kenneth Branagh တို့က လည်း ပါဝင်ထားကြတာ ဖြစ်ပါတယ်။ ကြာမြင့်ချိန် မိနစ် ၁၅၀ ရှိတဲ့ ဒီရုပ်ရှင်ကိုတော့ ဘတ်ဂျက် မေရိကန်ဒေါ်လာသန်း ၂၀၀ နဲ့ ၂၅၀ ကြား အကုန်အကျခံရိုက်ကူးထားတာ ဖြစ်ပါတယ်။ Warner Bros. Pictures ကနေ ဖြန့်ချိသွားမယ့် ဒီရုပ်ရှင်ကိုတော့ လတ်တလော ကိုဗစ်-၁၉ အခြေအနေကြောင့် ၄ ကြိမ်ထက်မနည်း ရက်ရွှေ့ဆိုင်းခဲ့ရတာဖြစ်ပြီး ခုတခါမှာတော့ ဗြိတိန်မှာ လာမယ့် ဩဂုတ်လနှောင်းပိုင်းမှာ ရုံတင်မှာဖြစ်ကာ အမေရိကန်မှာတော့ စက်တင်ဘာလဆန်းမှာ ရုံတင်ပြသသွားမယ်လို့ ကြေညာထားပါတယ်။
7 months Ago

June 3, 2020

ရိုက်လက်စ နာမည်ကြီး လင်းနို့လူသားရုပ်ရှင် The Bat Man ရိုက်ကူးရေး ဇူလိုင်လ ပြန်စမည်

ကိုဗစ်-၁၉ ကပ်ရောဂါကြောင့် ရပ်နားထားခဲ့ရတဲ့ နာမည်ကြီး လင်းနို့လူသားရုပ်ရှင် The Bat Man အပါအဝင် ဗြိတိန်နိုင်ငံမှာ ရိုက်ကွင်းတည်ထားခဲ့တဲ့ တခြားရုပ်ရှင်ကားတွေရဲ့ ရိုက်ကူးရေး လုပ်ငန်းတွေကို မကြာခင်မှာ စတင်နိုင်တော့မှာ ဖြစ်တယ်လို့ သိရပါတယ်။ ဒါဟာ ဗြိတိန်အစိုးရရဲ့ လော့ခ်ဒေါင်းကာလ ဖြေလျှော့မှုအပြီးမှာ ထွက်လာတဲ့ သတင်းတပုဒ် ဖြစ်ပြီး ဘေးကင်းစိတ်ချရတဲ့ ညွှန်ကြားချက်တိုင်းတာမှုတွေနဲ့အတူ ရိုက်ကူးခွင့်ပြုသွားမှာ ဖြစ်တယ်လို့ ကြော်ငြာထားတာပါ။ ကိုဗစ်-၁၉ ကြောင့် ကမ္ဘာတလွှား ရုပ်ရှင်ထုတ်လုပ်ရေး၊ ရိုက်ကူးရေးလုပ်ငန်းတွေကို ရိုက်ခတ်ခဲ့ပြီး လန်ဒန်မှာ ရိုက်ကူးနေတဲ့ The Bat Man ရုပ်ရှင်ကတော့ ရိုက်နေဆဲတန်းလန်း အခြေအနေနဲ့ ရပ်နားထားခဲ့ရတာ ဖြစ်ပါတယ်။ နာမည်ကြီး ဂါးဒီးယန်းသတင်းတပုဒ်မှာတော့ The Bat Man အပါအဝင် ဗြိတိန်မှာ ရိုက်ကွင်း တည်ထားတဲ့ Fantastic Beasts ရုပ်ရှင်ကားတွေကို ဇူလိုင်လထဲမှာ ဗြိတိန်ရုပ်ရှင်လုပ်ငန်းကော်မရှင်ရဲ့ ချမှတ်ထားတဲ့ လူမှုအလှမ်းခွာမှုနဲ့ ဘေးကင်းစိတ်ချရတဲ့ လေ့ကျင့်မှုတွေ၊ ခန္ဓာကိုယ်အပူချိန် တိုင်းတာတာမျိုးတွေ စတဲ့ စည်းမျဉ်းစည်းကမ်းတွေနဲ့အတူ ဇူလိုင်လထဲမှာ ခွင့်ပြုသွားဖို့ ရှိနေတယ်လို့ ဆိုပါတယ်။ နာမည်ကျော် ဒီစီကောမစ်အခြေခံ အမေရိကန် စူပါဟီးရိုးရုပ်ရှင်ကားတကားဖြစ်တဲ့ The Bat Man ရုပ်ရှင်ကိုတော့  Dawn of the Planet of the Apes(2014) နဲ့ War for the Planet of the Apes(2017) ရုပ်ရှင်တွေနဲ့ နာမည်ကြီးတဲ့ အမေရိကန်ရုပ်ရှင်ဒါရိုက်တာ Matt Reeves က ရိုက်ကူးနေတာဖြစ်ပြီး အဓိကဇာတ်ကောင် လင်းနို့လူသားအဖြစ် သရုပ်ဆောင်မင်းသား Robert Pattinson နဲ့ Catwoman အဖြစ် မင်းသမီး Zoe Kravitz တို့က ပါဝင်ထားကြပါတယ်။
9 months Ago
Up