RCSS/SSA

September 6, 2022

စစ်မှုမထမ်း မနေရ စည်းကမ်း RCSS/SSA ဆိုင်းငံ့

ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် RCSS/SSA အနေနဲ့ စစ်မှုမထမ်းမနေရ စည်းကမ်းနဲ့ အတင်းအကျပ် စစ်သားစုဆောင်းတာကို ဆိုင်းငံ့ထားပြီး မိမိ ဆန္ဒအလျောက် စစ်မှုထမ်းလိုသူတွေသာ လက်ခံတော့မယ်လို့ ဗဟိုကော်မတီမှ လက်အောက်ခံ တပ်ရင်းတပ်ဖွဲ့တွေဆီ  ညွှန်ကြားထားပါတယ်။ 

လက်ရှိတိုင်းပြည်ထဲမှာ ကုန်ဈေးနှုန်းတက်၊ ငွေဈေးကျလို့ စီးပွားရေး ကျပ်တည်းနေချိန် တဖက်မှာ တိုင်းရင်းသားလက်နက်ကိုင်အဖွဲ့တွေကလည်း  သူ့အဖွဲ့ကိုယ့်အဖွဲ့ တပ်သားသစ်စုဆောင်းနေကြကြောင်း၊ ဒါဟာ ပြည်သူတွေကို ပိုမိုခက်ခဲစေလို့ ဝန် ပေါ့စေလိုတဲ့သဘောနဲ့ စစ်မှုမထမ်းမနေရပြဋ္ဌာန်းချက်ကို ဆိုင်းငံ့လိုက်တာလို့ RCSS/SSA ပြောရေးဆိုခွင့်ရှိသူ ဗိုလ်မှူးခမ်းစံက ဒီဗွီဘီကို ပြောပါတယ်။

“ကျနော်တို့ရှမ်းပြည်မှာ တခြားလက်နက်ကိုင်အဖွဲ့တွေလည်း တပ်သားစုဆောင်းနေတော့  ပြည်သူတွေက ကြားညှပ်နေတယ်။ ပြီးတော့ အခုက ကုန်ဈေးနှုန်း တက်တယ်၊ ငွေဈေးကျတယ်၊ စိုက်ပျိုးသီးနှံထုတ်ကုန်တွေအရောင်းမထွက်ဘူး။ အလုပ်အကိုင်ရှားပါးပြီး အခက်အခဲရှိတော့ ပြည်သူတွေက တခြားနယ်နဲ့ ထိုင်းဘက်ကို ထွက်ပြေးတာ များလာတယ်ပေါ့နော်၊  ပြည်သူပြည်သားတွေ တခြားကို စိမ့်ထွက်တာဟာ တော်လှန်ရေး ရေသောက်မြစ်ကိုလည်း ထိခိုက်စေပါတယ်။ ဒါကြောင့် ပြည်သူကိုစောင့်ရှောက်ခြင်း သက်ရောက်မှုရှိတဲ့  စစ်မှုထမ်းဥပဒေပြဋ္ဌာန်းချက်ကို ဆိုင်းငံ့ထားတာပါခင်ဗျ။” 

RCSS/SSA ရဲ့ စစ်မှုထမ်းဥပဒေထဲမှာ သျှမ်းပြည်အတွင်းရှိ အသက် ၁၈ နှစ်မှ ၄၅ နှစ်အောက် အသက်အရွယ်ရှိသူတိုင်း စစ်မှုထမ်းဆောင်ရန် တာဝန်ရှိကြောင်း၊ နည်းဥပဒေထဲမှာတော့  စစ်မှုထမ်း အမျိုးအစားရွေးချယ်ခွင့်၊ တာဝန်ထမ်းဆောင်သက်တမ်းနဲ့  ခံစားခွင့် စတဲ့ လုပ်ထုံးလုပ်နည်းတွေ ပါတယ်လို့ ဆိုပါတယ်။

အခုလို စစ်မှုမထမ်းမနေရပြဋ္ဌာန်းချက် ဆိုင်းငံ့ထားပေမယ့်လည်း စေတနာနဲ့ ကိုယ်ပိုင်ဆုံးဖြတ်ချက်နဲ့ လာရောက်စစ်မှုထမ်းရင်တော့ လက်ခံကြောင်၊ ဒီညွှန်ကြားချက်ကို စက်တင်ဘာ ၃ ရက်နေ့က ထုတ်ပြန်ထားပြီး မိမိနေထိုင်တဲ့ ရပ်ကွက် ကျေးရွာတွေထဲမှာ RCSS/SSA ရဲ့ အတင်းအကျပ် စစ်သားစုဆောင်းမှုခံနေရတယ်ဆိုရင် RCSS/SSA ရဲ့ ပြန်ကြားရေးဌာနစာမျက်နှာ Tai freedom  ဝက်ဘက်ဆိုက်နဲ့ လူမှုကွန်ရက်ကတဆင့် တိုင်ကြားနိုင်တယ်လို့  ဗိုလ်မှူးခမ်းစံက ပြောသွားပါတယ်။ 

ရှမ်းပြည်နယ်ထဲမှာ တိုင်းရင်းသားလက်နက်ကိုင်အဖွဲ့တွေများပြီး ထိန်းချုပ်နေရာ အငြင်းပွားနေတဲ့ နေရာတွေဆိုရင် နှစ်ဘက်လုံးကို မျှပြီး စစ်မှုထမ်းပေးနေရတယ်လို့ ဒေသခံတွေက ပြောပါတယ်။

အချို့အိမ်မှာ သားနှစ်ယောက်ပါက အကြီးကို တဖွဲ့၊ အငယ်ကို တဖွဲ့ ပို့ပေးရပြီး လက်နက်ကိုင်ချင်းမတည့်လို့ တိုက်ပွဲဖြစ်တဲ့အခါ ညီအကိုအရင်းချင်း ပြန်တိုက်နေရတာလည်း ရှိတယ်လို့ ဆိုပါတယ်။ 

၂၀၀၈ ဥပဒေနဲ့ ကိုယ်ပိုင်အုပ်ချုပ်ခွင့်ရသွားတဲ့ တိုင်းရင်းသားလက်နက်ကိုင်အဖွဲ့ နယ်မြေထဲမှာလည်း မည်သည့်လူမျိုးမဆို အဆိုပါလက်နက်ကိုင်အဖွဲ့ထဲ စစ်မှုမထမ်း မနေရ အတင်းအကျပ် စစ်သားစုဆောင်းခံနေရတယ်လို့ ဒေသခံတွေက ပြောပါတယ်။

3 months Ago

September 1, 2022

RCSS/SSA နှင့် စစ်ကောင်စီ ငြိမ်းချမ်းရေးဖော်ဆောင်မှုကော်မတီ ဆွေးနွေး

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ရဲ့ ဖိတ်ခေါ်ချက်နဲ့ နေပြည်တော်ကို ဒုတိယအကြိမ် ရောက်ရှိနေတဲ့ ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) ဥက္ကဋ္ဌနဲ့ အဖွဲ့ဝင်တွေဟာ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ဗဟိုကော်မတီ (NSPNC) နဲ့ ဩဂုတ် ၃၀ ရက်မှ ဒီကနေ့ထိ ၃ ရက်တာ တွေ့ဆုံဆွေးနွေးနေပါတယ်။

RCSS/SSA ဘက်က ဥက္ကဋ္ဌ ဗိုလ်ချုပ်ကြီးရွက်စစ်၊ အတွင်းရေးမှူး-၁ စဝ်စိုင်းငင်းနဲ့ ဗဟိုကော်မတီဝင် စဝ်ဆောင်းဟန်တို့ ဦးဆောင်ပြီး NSPNC ဘက်က ဒုတိယဗိုလ်ချုပ်ကြီး ရာပြည့်၊ ဒုတိယဗိုလ်ချုပ်ကြီး မိုးမြင့်ထွန်း၊ ဒုတိယဗိုလ်ချုပ်ကြီး မင်းနောင်တို့ ဦးဆောင် ဆွေးနွေးနေကြတာပါ။

ဆွေးနွေးပွဲမှာ အဓိကအားဖြင့် ဖက်ဒရယ်တည်ဆောက်ရေး၊ ငြိမ်းချမ်းရေးနဲ့ နိုင်ငံရေး ဆွေးနွေးပွဲ၊ လက်ရှိ နိုင်ငံရေးအကျပ်အတည်းကို ဖြေရှင်းရေး၊ ပါတီစုံဒီမိုကရေစီစနစ်၊ စစ်ဘေးရှောင်ပြည်သူတွေကို ကူညီရေးနဲ့ ဒေသဖွံ့ဖြိုးရေးကိစ္စတွေ ဆွေးနွေးနေတယ်လို့ RCSS/SSA ပြောရေးဆိုခွင့်ရှိသူ ဗိုလ်မှူးခမ်းစံက ဒီဗွီဘီကို ပြောပါတယ်။

“အဓိကဆွေးနွေးနေတာကတော့ အချက် ၆ ချက် ရှိပါတယ်ခင်ဗျ။ လုပ်ငန်းဖော်ဆောင်မယ့် အဆင့်တွေ အသေးစိတ် ဆွေးနွေးနေတယ်။ စစ်ဘေးရှောင်ပြည်သူတွေ ကူညီရေးကတော့ အသေးစိတ် မဆွေးနွေးသေးဘူး။ ဒေသဖွံ့ဖြိုးရေးကတော့ အရင်တုန်းက ကျိုင်းတုံမှာ အပစ်ခတ်ရပ်စဲရေး သဘောတူညီချက် ရထားတဲ့ထဲက မိန်းထော်၊ မိန်းထ အပါအဝင် ဒေသဖွံ့ဖြိုးရေးတွေ ပါပါတယ်။”

NSPNC နဲ့ ခုတကြိမ်ဆွေးနွေးပွဲ ပထမနေ့ ဩဂုတ် ၃၀ ရက်မှာ RCSS/SSA ဘက်က ဥက္ကဋ္ဌ ဗိုလ်ချုပ်ကြီး ရွက်စစ်က “ငြိမ်းချမ်းရေးဆိုတာ အလွယ်တကူတည်ဆောက်လို့ မရနိုင်ကြောင်း၊ အဓိကမှာ ယုံကြည်မှုဖြစ်ပြီး ယုံကြည်မှုမရှိရင် စည်းလုံးမှုမရှိ၊ မစည်းလုံးက ငြိမ်းချမ်းရေး အောင်မြင်မှာမဟုတ်၊ ငြိမ်းချမ်းရေး အောင်မြင်ဖို့ အဖွဲ့အစည်းတိုင်း ပါဝင်မှသာ ရေရှည်ခိုင်မာတဲ့ ငြိမ်းချမ်းရေး တည်ဆောက်နိုင်မယ်” လို့ ပြောခဲ့ပါတယ်။

ဒါ့အပြင် “နိုင်ငံရေးပြဿနာရှိနေရင် တိုင်းပြည်မတည်ငြိမ်၊ တိုင်းပြည်မတည်ငြိမ်က ပြဿနာ အမျိုးမျိုး ကြုံတွေ့ပြီး ပြည်သူတွေ စားဝတ်နေရေး ထိခိုက်ကြောင်း၊ ပြည်သူ့စားဝတ်နေရေး ပြဿနာက နိုင်ငံရေးကို ပြန်ထိခိုက်ပြီး အဘက်ဘက်ကျဆင်းကြောင်း၊ ဒါကြောင့် နိုင်ငံနဲ့ ပြည်သူအကျိုးကို ရှေးရှုပြီး နိုင်ငံရေးပြဿနာကို ဆွေးနွေးတဲ့နည်းနဲ့ ဖြေရှင်းဖို့၊ လက်နက်နဲ့ ဖြေရှင်းခဲ့တာ နှစ်ပေါင်း ၇၀ ကြာလည်း မအောင်မြင်တာ သက်သေပဲ” လို့ ပြောခဲ့ပါတယ်။

ဒုတိယနေ့ဆွေးနွေးပွဲမှာ NSPNC ဘက်က ပြည်ထောင်စုသဘောတူစာချုပ် အစိတ်အပိုင်း ၁/၂/၃ ပါ သဘောတူညီချက်တွေကို ၂၀၀၈ ဖွဲ့စည်းပုံအခြေခံဥပဒေထဲက အချက်တွေနဲ့ ကိုက်ညီမှုရှိမရှိ လေ့လာစိစစ်ချက်တွေနဲ့ ပတ်သက်ပြီး ရှင်းလင်းခဲ့တယ်လို့ ဆိုပါတယ်။

ဒီကနေ့ တတိယနေ့ ဆွေးနွေးချက်တွေနဲ့ ပတ်သက်လို့တော့ မသိရသေးဘူးလို့ ဆိုပါတယ်။

တိုင်းရင်းသားလက်နက်ကိုင်အဖွဲ့တွေနဲ့ ငြိမ်းချမ်းရေး တွေ့ဆုံဆွေးနွေးဖို့ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ဒီနှစ်ဆန်းပိုင်းက ကမ်းလှမ်းခဲ့ပြီး ပထမအကြိမ် တွေ့ဆုံမှုမှာ RCSS/SSA ရှမ်း၊ UWSA ဝ၊ PNO ပအိုဝ်း၊ MNDAA မိုင်းလား၊ KNU/KNLA ကရင်၊ DKBA ကရင်၊ NMSP မွန်၊ LDU လားဟူ၊ SSPP/SSA ရှမ်းနဲ့ ALP ရခိုင် စတဲ့ လက်နက်ကိုင်အဖွဲ့ ကိုယ်စားလှယ်တွေ ဆွေးနွေးခဲ့ပြီး ဖြစ်ပါတယ်။

3 months Ago
More News
Up