Quarantine ဝင်

September 26, 2020

မဲဆွယ်သွားခဲ့သည့် KNDP ကိုယ်စားလှယ်လောင်း ၃ ဦးနှင့် ဘားအံဒေသခံ ၆၀ ကျော် Quarantine ဝင်

ကရင်ပြည်နယ်၊ ဘားအံမြို့နယ်အတွင်း ပါတီစည်းရုံးရေးသွားရောက်ခဲ့တဲ့ ကိုယ်စားလှယ်လောင်း ၃ ဦးနဲ့ ဒေသခံကျေးရွာသား ၆၁ ဦး ဘားအံတက္ကသိုလ် Quarantine စင်တာမှာ ဝင်ရောက်နေတယ်လို့ ကရင်အမျိုးသားဒီမိုကရက်တစ်ပါတီ ကိုယ်စားလှယ်လောင်း ဒေါ်နန်းစေအွာက ပြောပါတယ်။ စက်တင်ဘာ ၁၉ ရက်နေ့က ကရင်အမျိုးသားဒီမိုကရက်တစ်ပါတီ (KNDP) က မဲဆွယ်စည်းရုံးခဲ့တဲ့ ဘားအံမြို့နယ် ဝါးဆူးကျေးရွာကို ကော့ဒါန်းမယ်ကျေးရွာနေ ကိုဗစ်-၁၉  သံသယလူနာ လာရောက်ခဲ့တာကြောင့် အခုလို Quarantine ဝင်ရောက်တာလို့ သိရပါတယ်။ ဒေါ်နန်းစေအွာက “ကိုယ့်ပါတီက တာဝန်ခံမှု၊ တာဝန်ယူမှုအနေနဲ့ကတော့ ကျမတို့အနေနဲ့ ရွာသားတွေနဲ့ ပြန်ပြီး အတူတူဝင်ပေးတာ” လို့ ပြောပါတယ်။ ကော့ဒါန်းမယ်ကျေးရွာနေ သံသယလူနာရဲ့ ဓာတ်ခွဲနမူနာကို စက်တင်ဘာ ၂၀ ရက်နေ့ စစ်ဆေးရာမှ ရောဂါပိုးတွေ့ရှိခဲ့တာပါ။ စက်တင်ဘာ ၂၂ ရက်နေ့မှာတော့ ကိုယ်စားလှယ်လောင်း ၃ ဦးနဲ့အတူ ကော့ဒါန်းမယ်၊ ဝါးဆူး၊ ကော့လှိုက်၊ သုံးအိမ်ကျွန်း၊ ထန်းတပင်၊ ကော့ကဒစ်ကျေးရွာသား ၄၇ ဦးအပြင် စက်တင်ဘာ ၂၆ ရက်နေ့က လူနာနဲ့ထိတွေ့ခဲ့သူတွေလို့ ယူဆရတဲ့ ကျေးရွာသား ၁၄ ဦးကိုပါ ဘားအံတက္ကသိုလ် Quarantine စင်တာမှာထားရှိပြီး ကျန်းမာရေးစစ်ဆေးမှုတွေ ဆောင်ရွက်ထားပါတယ်။ စက်တင်ဘာ ၂၅ ရက်နေ့က ကိုယ်စားလှယ်လောင်းသုံးဦးရဲ့ နှာခေါင်၊ အာခေါင်း တို့ဖတ်ရယူပြီး ရန်ကုန်အမျိုးသား ကျန်းမာရေးဓာတ်ခွဲဌာနကို ပေးပို့ခဲ့ရာမှာ ရောဂါပိုးမ​​တွေ့ရှိသလို ဒေသခံကျေးရွာသားတွေရဲ့ ဓာတ်ခွဲစစ်ဆေးချက်နဲ့ပတ်သက်ပြီး မသိရှိရသေးဘူးလို့ ဆိုပါတယ်။ ဘားအံပြည်သူ့ဆေးရုံကြီးမှာ ကိုဗစ်-၁၉ ရောဂါပိုးတွေ့ရှိသူ ၅ ဦးရှိပြီး စိုးရိမ်စရာမရှိဘူးလို့ တာဝန်ရှိသူက ပြောပါတယ်။ ရဲမင်းခေါင်
1 year Ago

August 30, 2020

ဂွမြို့နယ် ထွေအုပ်ဝန်ထမ်း ၁ ဦး ကိုဗစ်ကူးစက်ခံရ၍ ဝန်ထမ်းအားလုံး ရုံး Quarantine ဝင်

ရခိုင်ပြည်နယ်၊ ဂွမြို့နယ် အထွေထွေအုပ်ချုပ်ရေးက ဝန်ထမ်းတယောက် ကိုဗစ်-၁၉ ကူးစက်ခံရပြီးနောက် ထွေအုပ်တရုံးလုံးဟာ ရုံးမှာပဲ အသွားအလာ ကန့်သတ်နေထိုင်ပြီး အလုပ်တွေ ဆက်လုပ်နေကြပါတယ်။ ဝန်ထမ်းအမျိုးသမီးဟာ INGO ဝန်ထမ်းအမျိုးသမီး လူနာအမှတ် ၄၁၃ နဲ့ ထိတွေ့ဆက်စပ်ခဲ့ပြီးနောက် သြဂုတ် ၂၈ ရက်ညပိုင်းမှာ ကျန်းမာရေးဌာနထုတ်ပြန်ချက်အရ လူနာအမှတ် ၆၃၄ ဖြစ်လာခဲ့ပါတယ်။ ဂွမြို့နယ် အုပ်ချုပ်ရေးမှူး ဦးသန်းဝင်းက “ကျနော်တို့ရုံးဝန်ထမ်းတွေအားလုံးကို အဲဒီနေ့ညကပဲ အိမ်မပြန်ခိုင်းဘဲ ရုံးမှာပဲ Quarantine ဝင်ခိုင်းလိုက်ပါတယ်။ အားလုံး ၂၄ ယောက်ပါ။ ၂ ယောက်ကတော့ သံတွဲမှာ Quarantine ဝင်နေပါတယ်။ ရုံးမှာလည်း ရုံးအလုပ်တွေ ဆက်လုပ်နေပါတယ်” လို့ ပြောပါတယ်။ သူကိုယ်တိုင်လည်း Quarantine ဝင်နေရသလို Quarantine ဝင်နေသူတယောက်စီအတွက် အစိုးရအဖွဲ့က တရက်ကို ကျပ် ၃၀၀၀ နှုန်းထောက်ပံ့ထားပြီး ရုံးမှာပဲ ချက်ပြုတ်စားသောက်ကြတယ်လို့ သူက ပြောပါတယ်။ ရုံးအလုပ်တွေ လုပ်ရာမှာလည်း ခပ်ခွာခွာနေတာ၊ နှာခေါင်းစည်းနဲ့ လက်အိတ်ဝတ်ဆင်တာတွေလုပ်ထားတယ်လို့ ဆိုပါတယ်။  ထွေအုပ်ဝန်ထမ်း လူနာအမျိုးသမီးဟာ INGO ဝန်ထမ်းအမျိုးသမီးနဲ့ ထိတွေ့ခဲ့ပြီး‌နောက် အတည်ပြုလူနာအဖြစ် မသိရခင်ကာလမှာ ရုံးကိုလည်း ပုံမှန်တက်နေခဲ့တာဖြစ်ပါတယ်။ ဦးသန်းဝင်းက “ဝန်ထမ်းတွေရဲ့ မိသားစုတွေကတော့ Home Quarantine ထားပါတယ်။ ဝန်ထမ်းတွေကိုတော့ ဒီနေ့ပဲ ဓာတ်ခွဲနမူနာယူဖို့ လုပ်နေပါတယ်။ ကျနော်ကတော့ ၂ ကြိမ် စစ်ပြီးပါပြီ။ ပိုးမတွေ့ပါဘူး” လို့ ပြောပါတယ်။ ထွေအုပ်ဝန်ထမ်း လူနာအမျိုးသမီးကို ဂွမြို့နယ်ဆေးရုံမှာ ကုသပေးနေပြီး ကျန်းမာရေးကောင်းသလို ဒီနေ့အထိ ဖျားနာတာမရှိဘူးလို့လည်း ပြောပါတယ်။ သူနဲ့တအိမ်တည်း အတူနေသူကိုလည်း သီးခြားလူနာဆောင်မှာ ထားတယ်လို့ ဂွမြို့နယ် ပြည်သူ့ကျန်းမာရေးဦးစီးဌာနက ဆိုပါတယ်။ INGO ဝန်ထမ်းအမျိုးသမီး လူနာအမှတ် ၄၁၃ ဟာ သံတွဲမြို့ကို သြဂုတ် ၁၁ ရက်နေ့မှာ အဖော် ၃ ယောက်နဲ့အတူ ရောက်လာခဲ့ပြီး မြို့နယ်အထွေထွေအုပ်ချုပ်ရေးအပါအဝင် ဌာနဆိုင်ရာ ၃ ခုနဲ့ အစည်းအဝေးပြုလုပ်ခဲ့တာကြောင့် သံတွဲမြို့နယ်အုပ်ချုပ်ရေးမှူးနဲ့ ထွေအုပ်ဝန်ထမ်း ၃ ယောက် အပါအဝင် သံတွဲမြို့က လူ ၃၀ ကျော်လောက်ကိုလည်း ရောဂါစစ်ဆေးခဲ့ပါတယ်။
1 year Ago
Up