Quad လေးနိုင်ငံ

September 27, 2021

နိုင်ငံရေးအကျဉ်းသားအားလုံး ပြန်လွှတ်ပေးရန် အင်အားကြီး ၄ နိုင်ငံ တောင်းဆို

မြန်မာနိုင်ငံအတွင်းမှာ အကြမ်းဖက်မှုတွေ အဆုံးသတ်ဖို့နဲ့ ဖမ်းဆီးခံ နိုင်ငံရေးအကျဉ်းသားတွေ အားလုံးကို အမြန်ဆုံး ပြန်လွှတ်ပေးဖို့ အင်ဒို-ပစိဖိတ်ဒေသ ကမ္ဘာ့အင်အားကြီးနိုင်ငံ ၄ နိုင်ငံရဲ့ ခေါင်းဆောင်တွေက တောင်းဆိုလိုက်ပါတယ်။ 

အမေရိကန်၊ ဩစတြေးလျ၊ အိန္ဒိယနဲ့ ဂျပန်  ၄ နိုင်ငံ ပူးပေါင်းထားတဲ့ Quad အဖွဲ့ရဲ့ ခေါင်းဆောင်တွေက စက်တင်ဘာ ၂၄ ရက်နေ့စွဲနဲ့ ပူးတွဲကြေညာချက် ထုတ်ပြန်တောင်းဆိုလိုက်တာ ဖြစ်ပါတယ်။

လေးပွင့်ဆိုင် Quad အဖွဲ့ခေါင်းဆောင်တွေက “မြန်မာနိုင်ငံအတွင်းမှာ အကြမ်းဖက်မှုတွေ အဆုံးသတ်ဖို့၊ နိုင်ငံခြားသားတွေ အပါအဝင် နိုင်ငံရေးအကျဉ်းသားအားလုံးကို ပြန်လွှတ်ပေးဖို့၊ အပြုသဘောဆောင်တဲ့တွေ့ဆုံဆွေးနွေးမှုအတွက် ထိတွေ့ဆောင်ရွက်ကြဖို့နဲ့ ဒီမိုကရေစီကို ဆောလျဉ်စွာ ပြန်လည်ဖော်ဆောင်ကြဖို့  မိမိတို့ ဆက်လက်တောင်းဆိုပါတယ်”လို့ ထုတ်ပြန်ချက်မှာ ပြောထားပါတယ်။

ဒါ့အပြင် အာဆီယံ ဘုံသဘောတူညီချက် ၅ ချက်ကိုလည်း အမြန်ဆုံး အကောင်အထည်ဖော် လုပ်ဆောင်ဖို့ ထပ်မံတိုက်တွန်းတောင်းဆိုလိုက်ပါတယ်။

စစ်တပ်က နိုင်ငံတော်အာဏာကို တရားမဝင်စသိမ်းတဲ့ ဖေဖော်ဝါရီ ၁ ရက်ကနေ  စက်တင်ဘာာ ၂၅ ရက်အထိ နိုင်ငံတဝန်း ဖမ်းဆီးချုပ်နှောင်ခြင်းခံထားရသူ စုစုပေါင်း ၆,၈၀၃ ဦးရှိပြီး ဒီအထဲက ၂၉၃ ဦးမှာ ထောင်ဒဏ်ချမှတ်ခံထားရတယ်လို့  နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ မှတ်တမ်းအရ သိရပါတယ်။

3 weeks Ago

September 25, 2021

ကိုဗစ်ကာကွယ်ဆေး၊ နည်းပညာကိစ္စ Quad လေးနိုင်ငံ ပူးပေါင်းဆောင်ရွက်မည်

အမေရိကန်ပြည်ထောင်စု၊ ဂျပန်၊ အိန္ဒိယနဲ့ သြစတြေးလျက ခေါင်းဆောင်တွေဟာ စက်တင်ဘာ ၂၄ ရက်နေ့မှာ ထိပ်သီးအစည်းအဝေးခေါ်ယူပြီး ကိုဗစ်ကာကွယ်ဆေး၊ အခြေခံအဆောက်အအုံနဲ့ နည်းပညာကိစ္စတွေမှာ ပူးပေါင်းဆောင်ရွက်ကြဖို့ ကတိပြုလိုက်ကြပါတယ်။

သြစတြေးလျဝန်ကြီးချုပ် စကော့မောရစ်ဆင်က ကုန်သွယ်ရေးတံခါးဖွင့်ထားမယ့် အင်ဒို ပစိတ်ဖိတ်ဒေသ ဖြစ်ပေါ်ရေး အရေးကြီးတဲ့အကြောင်း အလေးပေးပြောခဲ့ပြီး အိန္ဒိယ ဝန်ကြီးချုပ် နရိန်ဒရာမိုဒီက ဒေသတွင်း ငြိမ်းချမ်းရေးအတွက် အလေးပေးပြောကြားခဲ့ပါတယ်။ 

မောရစ်ဆင်က ဒေသတွင်းမှာ တရုတ်ရဲ့ သြဇာကြီးထွားလာတာနဲ့ ပတ်သက်လာလို့ ဆွေးနွေးရာမှာတော့ အကြပ်ကိုင်မှုတွေမရှိဖို့ လိုတယ်လို့ ပြောသွားပါတယ်။

Quad လို့ အတိုကောက်ခေါ်တဲ့ ဒီအဖွဲ့ဟာ အာရှဒေသမှာ ကိုဗစ်ကာကွယ်ဆေး အလုံးပေါင်း ဘီလီယံနဲ့ချီ ထောက်ပံ့ဖို့ အစီအစဉ်ကိုလည်း ကြေညာဖို့ ရှိပါတယ်။ 

တရုတ်အစိုးရတော့ Quad အဖွဲ့ကြောင့် ဒေသတွင်းမှာ လက်နက်အင်အား ပြိုင်ဆိုင်မှုတွေ ပြင်းထန်လာလိမ့်မယ်လို့ သတိပေးနေပါတယ်။

3 weeks Ago
Up