PRA

November 14, 2021

ရေဦးနှင့် ဘုတလင်တွင် စစ်ကောင်စီတပ်များ မိုင်းဆွဲတိုက်ခိုက်ခံရ၊ အနည်းဆုံး ၇ ဦး သေဆုံး

စစ်ကိုင်းတိုင်း ရေဦးမြို့နယ်နဲ့ ဘုတလင်မြို့နယ်တို့မှာ စစ်ကောင်စီစစ်ကြောင်းနဲ့ ယာဉ်တန်းတွေ မိုင်းဆွဲတိုက်ခိုက်ခံရပြီး ၇ ဦးထက်မနည်း သေဆုံးခဲ့ကြတယ်လို့ သိရပါတယ်။

ဒီပဲယင်းဘက်က တောနင်းလာတဲ့ အင်အား ၁၀၀ လောက်ရှိ စစ်ကောင်စီစစ်ကြောင်းကို ရေဦးမြို့၊ ညောင်လည်ကျေးရွာထိပ် မူးဘောင်တံတားမှာ နိုဝင်ဘာ ၁၄ ရက် မနက် ၉ နာရီ လောက်က ရေဦး မြို့ပြပြောက်ကျားအဖွဲ့ (YUG) နဲ့ ဝေဟင်စွန်ရဲအဖွဲ့တို့ ပူးပေါင်းပြီး မိုင်းဆွဲတိုက်ခိုက်ခဲ့ရာ စစ်သား ၅ ဦးထက်မနည်း သေဆုံးခဲ့တယ်လို့ မြို့ပြပြောက်ကျားအဖွဲ့ တာဝန်ရှိသူတစ်ဦးက ပြောပါတယ်။

“ဒီနေ့မနက် ၉ နာရီကျော်ကျော်လောက်က ဖြစ်တာ။ ဒီပဲယင်းဘက်ကို ရဟတ်ယာဉ်နဲ့ ချထားခဲ့တဲ့ စစ်တပ်က ကျနော်တို့ ရေဦးနယ်ဘက်ကို တောနင်းလာတာ ကြိုစောင့်ပြီး ပဒေသာမိုင်း ၃ လုံး ဆွဲလိုက်တာပဲ၊ ၅ ဦးကတော့ အနည်းဆုံးသေတယ်။” 

မိုင်းဆွဲတိုက်ခိုက်ပြီး ပြည်သူ့တော်လှန်ရေးအဖွဲ့အားလုံး အကျအဆုံးမရှိ ဆုတ်ခွာနိုင်ခဲ့ပေမဲ့ အကြမ်းဖက်စစ်တပ်က ညောင်လည်ကျေးရွာအတွင်းဝင်ပြီး နေအိမ်တွေကို မီးရှို့နေကြသလို လက်နက်ကြီးတွေနဲ့လည်း ပစ်ခတ်နေကြတယ်လို့ ပြောပါတယ်။

တချိန်တည်းမှာပဲ အကြမ်းဖက်စစ်တပ်က ရေဦးမြို့နယ် ရေမြက်ကျေးရွာက နေအိမ်တွေကိုလည်း ၀င်ရောက်ရှာဖွေ ဖျက်ဆီးနေတယ်လို့ သိရပါတယ်။

စစ်ကိုင်းတိုင်း ဘုတလင်မြို့နယ် မောင်းထောင်ကျေးရွာနဲ့ ကူတော်ကျေးရွာကြားမှာလည်း စစ်ကောင်စီတပ်က စစ်ကား ၂ စီးနဲ့ ဆိုင်ကယ် ၃ စီးကို ဒီနေ့ မွန်းတည့် ၁၂ နာရီလောက် ဘုတလင် ပြည်သူ့ကာကွယ်ရေးတပ်က မိုင်းဆွဲတိုက်ခိုက်ခဲ့တာကြောင့် အနည်းဆုံး ၂ ဦးလောက် သေဆုံးခဲ့တယ်လို့ သိရပါတယ်။

“ကူတော်ဘက်ကနေ စစ်ကားနှစ်စီးရယ်၊ အဲဒီနောက်ကနေ ဆိုက်ကယ် FZ အမျိုးစားတစ်စီး၊ ရိုရိုးဆိုက်ကယ် တစ်စီး၊ မောင်ထောင်ကျေးရွာဘက်ကို လာတာကို ကျနော်တို့ ဘုတလင်ပြည်သူ့ကာကွယ်ရေးတပ်က တပ်သားတစ်ယောက်တည်း မိုင်ဆွဲတာလုပ်ခဲ့တယ်။” 

အဆိုပါ တိုက်ပွဲဖြစ်ပွားရာအနီး မောင်ထောင်ကျေးရွာကနေ ဒေသခံတောင်သူလုပ်ငန်းက ပြန်လာတဲ့ လူငယ်နှစ်ဦးကို ပြီးခဲ့တဲ့ရက်ပိုင်းကလည်း စစ်ကောင်စီတပ်က PDF  အဖြစ် စွပ်စွဲပြိး ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။

ရေဦးမြို့နယ်နဲ့ ဘုတလင်မြို့နယ်တို့မှာ စစ်ကောင်စီတပ်ဖွဲ့ဝင်တွေ မိုင်းဆွဲတိုက်ခိုက်ခံရမှုကြောင့် သေဆုံးဒဏ်ရာရတာနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

3 weeks Ago

နဘားမီးရထားရဲစခန်း စီးနင်းခံရ၊ ပုလဲ-ဂန့်ဂေါလမ်းတွင် PRA နှင့် စစ်ကောင်စီတပ် တိုက်ပွဲဖြစ်

စစ်ကိုင်းတိုင်း အင်းတော်မြို့နယ် နဘားမီးရထားရဲစခန်း စီးနင်းခံရပြီး ပုလဲ-ဂန့်ဂေါသွား ကားလမ်းမကြီးအပေါ်မှာလည်း စစ်ကောင်စီတပ်နဲ့ ပြည်သူ့တော်လှန်ရေးတပ်မတော် (PRA) တို့ တိုက်ပွဲဖြစ်ပွားခဲ့တယ်လို့ သိရပါတယ်။

အင်းတော်မြို့နယ်၊ နဘားကျေးရွာမှာရှိတဲ့ နဘားမီးရထားရဲစခန်းကို နိုဝင်ဘာ ၁၃ ရက် ညနေ ၅ နာရီဝန်းကျင်က စီးနင်းခံလိုက်ရတယ်လို့ အဆိုပါရဲစခန်းနဲ့နီးစပ်တဲ့ အသိုင်းအဝိုင်းဆီက သိရပါတယ်။

နဘားမီးရထားရဲစခန်းကို ဒေသခံပြည်သူ့ကာကွယ်ရေး အထူးပြောက်ကျားတပ်ဖွဲ့က ဝင်ရောက်စီးနင်းခဲ့တာ ဖြစ်ပြီး ၁၂ ဗို့ သေနတ် ၁ လက်၊ ၁၂ ဗို့ ကျည်ဆန်အတောင့် ၃၀၊ ခြောက်လုံးပြူးကျည် ၁၀ တောင့်၊ G2 ကျည် ၂ ကတ်၊ ကလေးကျည် ၅ တောင့်၊ ကျည်သေတ္တာ ၁ လုံးနဲ့ လက်တော့ကွန်ပျူတာ ၁ လုံးတို့ သိမ်းဆည်းခဲ့တယ်လို့ INDAW REVOLUTION - IR အဖွဲ့ရဲ့  ပြန်ကြားရေးတာဝန်ခံက အတည်ပြုပြောပါတယ်။

“အထူးပြောက်ကျားအဖွဲ့က တိုက်ခိုက်မှုကို လက်တွေ့လေ့ကျင့်တဲ့အနေနဲ့ အင်းတော်၊ နဘားမီးရထား ရဲတပ်ဖွဲ့ရုံးကို လျှပ်တပြက်ဝင်ရောက်စီးနင်းခဲ့ပြီး စစ်ကျွန်တွေကို နှိမ်နင်းခဲ့တာ မရှိဘဲ ဓမ္မနည်းနဲ့ ပစ္စည်းတွေကို ယူခဲ့တာဖြစ်ပါတယ်။” 

ညနေ ၆ နာရီဝန်းကျင်မှာတော့ အင်းတော်မြို့ကနေ အကြမ်းဖက်စစ်တပ် လက်အောက်ခံ တပ်သားတွေ ရောက်ရှိလာပြီး သေနတ်တွေ ပစ်ဖောက်ကာ စစ်ဆေးမှုတွေ ပြုလုပ်နေတယ်လို့ ဒေသခံတွေဆီက သိရပါတယ်။

နဘားမီးရထားရဲစခန်း စီးနင်းခံရမှုနဲ့ပတ်သက်ပြီး အသေးစိတ်သိရှိနိုင်ဖို့ အင်းတော်မြို့နယ်၊ မြို့မရဲစခန်းကို ဆက်သွယ်မေးမြန်းခဲ့ရာ “အဲဒီကိစ္စ ပြောလို့မရပါဘူး” လို့ တာဝန်ကျရဲက ဖြေပါတယ်။

ပုလဲ-ဂန့်ဂေါသွား ကားလမ်းမကြီးအပေါ်မှာလည်း ပြည်သူ့တော်လှန်ရေးတပ်မတော် (PRA) နဲ့ စစ်ကောင်စီတပ်တို့ နိုဝင်ဘာ ၁၃ ရက် နေ့လယ် ၁ နာရီခွဲအချိန်လောက် တိုက်ပွဲဖြစ်ပွားခဲ့တယ်လို့ သိရပါတယ်။

PRA တပ်ရင်း-၂ နဲ့ ပုလဲမြို့က မဟာမိတ် Pale PDF-Headquarters ပူးပေါင်းတပ်နဲ့ စစ်ကောင်စီတပ်တို့ တိုက်ပွဲဖြစ်ခဲ့တာလို့ ပြည်သူ့တော်လှန်ရေး PRA ခေါင်းဆောင် ဗိုလ်ဂျပန်ကြီးက ပြောပါတယ်။

“မျက်နှာချင်းဆိုင် သူပစ်၊ ကိုယ်ပစ် တိုက်ခဲ့တာ။ တိုက်ပွဲအချိန်က မိနစ် ၄၀ လောက် ကြာမယ်ဗျ။ ကျနော်တို့က နယ်မြေကျွမ်းကျင်မှု အသာစီးနဲ့တိုက်တာဆိုတော့ အထိအခိုက် အကျအဆုံး မရှိခဲ့ဘူး။ စစ်ကောင်စီဘက်ကတော့ ၂၁ ယောက်ထက်မနည်း သေသလို အထိအခိုက်လည်း များတယ်” လို့ ပြောပါတယ်။

PRA အဖွဲ့ဟာ ပြီးခဲ့တဲ့ နိုဝင်ဘာ ၆ ရက်‌ကလည်း မကွေးတိုင်း၊ ကျောမြို့နယ်အတွင်းရှိ (ကပစ) လက်နက်ထုတ်စက်ရုံမှာ တာဝန်ထမ်းဆောင်နေတဲ့ ဗိုလ်မှူးအဆင့်ရှိသူ ၁ ဦးနဲ့ တပ်သား ၁ ကို နေ့လယ် ၁ နာရီအချိန်လောက် ပုလဲ-ဂန့်ဂေါသွား ကားလမ်းမ တနေရာက ဖမ်းဆီးခေါ်ဆောင်ခဲ့တယ်လို့ ထုတ်ပြန်ထားပါတယ်။

3 weeks Ago

October 10, 2021

မိုင်းအလုံး ၅၀၀ စီမံကိန်းဖြင့် စစ်အုပ်စုကို ပစ်မှတ်ထားတိုက်ခိုက်မည်ဟု PRA ကြေညာ

မိုင်းအလုံး ၅၀၀ စီမံကိန်းအဖြစ်  ရဲစခန်းတွေ၊ စစ်တပ်တွေ၊ စစ်ကောင်စီရုံးစိုက်ရာ နေရာတွေကို ပစ်မှတ်ထားပြီး အောက်တိုဘာ ၁၀ ရက် ဒီကနေ့  စတင်တိုက်ခိုက်မယ်လို့ ပြည်သူ့တော်လှန်ရေး တပ်မတော် People Revolution Army (PRA) က ကြေညာပါတယ်။

PRA တပ်ရဲ့ ပြောရေးဆိုခွင့်ရှိသူ ဗိုလ်ဂျပန်ကြီးက “ကျနော်တို့ကတော့ မိုင်းကို ပိုပြီးအားကိုးရတယ်။ နောက်ပြီး စစ်ကောင်စီဘက်ကလည်း ထိုးစစ်တွေ အင်အားအလုံးအရင်းနဲ့ ထိုးစစ်တာတွေလည်း ရှိတယ်ဗျ။ ဒါကြောင့် ဒီစီမံကိန်းကို အမြန်ဆုံး အကောင်ထည်ဖော်ရတာပါ။ ကျနော်တို့ကတော့ ဒီမိုင်းတွေကို နင်းမိုင်းတွေ၊ ဆွဲမိုင်းတွေ၊ တိုက်မိုင်းတွေအဖြစ် အသုံးပြုသွားမယ်ဗျ။ နည်းပညာတွေကတော့ မြင့်လာတယ်။ မိုင်းထိန်းချုပ်ဖို့ ရီမု မိုင်းပါ ကျနော်တို့လုပ်တာ အောင်မြင်တယ်ဗျ။ နောက် ဒုံးပျံယာဉ် တိုက်ခိုက်တဲ့ နည်းပညာပါ အောင်မြင်တယ်ဗျ။ ဒုံးနဲ့လုပ်တဲ့ မိုင်းတွေကတော့ ရဲစခန်းတွေ၊ စစ်ကောင်စီ ရုံးစိုက်ရာ နေရာတွေကို အဓိကတိုက်ခိုက်သွားမယ်။” လို့ အတည်ပြု ပြောပါတယ်။

ပြည်သူလူထုတွေအနေနဲ့  ရဲစခန်းတွေ၊ စစ်ကောင်စီရုံးစိုက်ရာနေရာတွေအနီးမသွားကြဖို့နဲ့   အဓိကတော့   မုံရွာ၊ ပုလဲ၊ ဂန့်ဂေါလမ်းမကြီးကို  မသွားကြဖို့လည်း People Revolution Army (PRA) က သတိပေးထားပါတယ်။ 

စစ်ကောင်စီတပ်နဲ့ ဒေသခံတော်လှန်ရေးတပ်ဖွဲ့တွေအကြား အခု အောက်တိုဘာလမှာလည်း နှစ်ဘက် တိုက်ပွဲတွေ အပြင်းအထန်ဆက်လက်ဖြစ်ပွားနေပါတယ်။

မြန်မာနိုင်ငံဒေသတချို့မှာ အောက်တိုဘာ ၈ ရက်က စစ်အုပ်စုရဲ့ ပစ်မှတ် ၂၉ ခုကို ဒေသခံ PDF တပ်တွေနဲ့ တိုင်းရင်းသားတပ်တွေက  တိုက်ခိုက်ခဲ့ပြီး စစ်ကောင်စီဘက်က ၅၀ နီးပါး သေဆုံးသွားတယ်လို့ NUG ထုတ်ပြန်တဲ့  ပြည်သူ့ခုခံစစ် အချက်အလက်တွေအရ သိရပါတယ်။

စစ်ကောင်စီတပ်တွေကလည်း ကချင်ပြည်နယ်၊ ချင်းပြည်နယ်၊ ကယားပြည်နယ်၊ စစ်ကိုင်းတိုင်းနဲ့ မကွေးတိုင်းအတွင်း ကျေးရွာတွေမှာ ဝင်ရောက်ပြီး  နေအိမ်တွေကိုမီးရှို့ဖျက်ဆီး ၊ ရွာသားတွေကို ဖမ်းဆီး သတ်ဖြတ်မှုတွေ နေ့စဉ်လုပ်ဆောင်နေတဲ့အတွက်  ဒေသခံပြည်သူတွေ စစ်ဘေးရှောင် ဦးရေကလည်း နေ့စဉ်တိုးပွားနေပါတယ်။

2 months Ago
More News
Up