PPE ဝတ်စုံ

September 6, 2021

ထိုင်းတွင် ပလပ်စတစ်အမှိုက်ဖြင့် PPE ဝတ်စုံချုပ်လုပ်

ထိုင်းနိုင်ငံမှာ ပလတ်စတစ်အမှိုက်တွေကို တကိုယ်ရေကာကွယ်ရေး PPE ဝတ်စုံအဖြစ် တန်ဖိုးမြှင့် ပြောင်းလဲ အသုံးပြု နေပါတယ်။

ထိုင်းနိုင်ငံ ရယွန်မြို့အတွင်း အထည်ချုပ်စက်ရုံတစ်ရုံမှာ ပလတ်စတစ်ပုလင်း သန်းချီကနေ ထုတ်ထားတဲ့ ချည်မျှင်တွေကို သုံးပြီး ရေစိုခံအထည်စချုပ်လုပ် နေတာပါ။

အဲဒီ အထည်စတွေကို သုံးပြီး ကိုရိုနာဗိုင်းရပ်စ် ကူးစက်ခံ သေဆုံးသူတွေကို မီးသင်္ဂြိုဟ်ဖို့ ဗုဒ္ဓဘာသာ ဘုန်းတော်ကြီးကျောင်းတွေနဲ့ ဆေးရုံတွေမှာ သုံးတဲ့ တကိုယ်ရေကာကွယ်ရေး PPE ဝတ်စုံတွေ ချုပ်လုပ်နေပါတယ်။

ဒါဟာ PPE ဝတ်စုံ ရှားပါးလာနေပြီး ပလတ်စတစ်အမှိုက် ပေါများတဲ့ ထိုင်းနိုင်ငံ အတွက် ဒီဝတ်စုံဟာ အထောက်အကူ ပြုနေပါတယ်။

ဒီPPE ဝတ်စုံဟာ ဖုန်မှုန့်တွေ မဝင်နိုင်အောင်ဟန့်တားနိုင်ပြီး ဗိုင်းရပ်စ်နဲ့ မထိတွေ့အောင် ကာကွယ်ပေးတယ်လို့ ထိုင်းတက်ဖ်ဖှေတာ ချည်မျှင်ကုမ္ပဏီရဲ့ အရောင်းနဲ့ ဈေးကွက်မြှင့်တင်ရေးဌာန အကြီးအကဲ အာနုဖတ် ချွန်ပူမင်က ပြောပါတယ်။

ဒီကုမ္ပဏီဟာ ကမ္ဘာတဝန်းက နိုင်ငံတကာမှာ လူသိများတဲ့ အထည်အမှတ် တံဆိပ် အမျိုးမျိုးအတွက် ပလတ်စတစ်ပုလင်းတွေကို တာရှည်ခံ အထည်စတွေ ဖြစ်အောင် တန်ဖိုးမြှင့် ပြောင်းလဲ ထုတ်လုပ်နေတာ ကြာပါပြီ။

ဆရာဝန်တွေကို ပံ့ပိုးရာမှာ ကူညီဖို့ မနှစ်က ဇွန်လက စပြီး ပလတ်စတစ် ပုလင်းတွေကနေ PPE အတွက် အထည်စတွေ စထုတ်ခဲ့ပါတယ်။

ခုချိန်ထိ ပလတ်စတစ် ပုလင်း ၁၈ သန်းကနေ ပိတ်စ ကိုက် ၃ သန်း ထုတ်သုံးပြီးပြီလို့ အာနုဖတ်က ပြောခဲ့ပါတယ်။

ထိုင်းနိုင်ငံမှာ ကိုဗစ်-၁၉ ကပ်ရောဂါ စတင်ကူးစက်ချိန်ကနေ ခုထိ စုစုပေါင်း ကူးစက်ခံ ဦးရေ ၁ ဒသမ ၃ သန်း ကျော်ခဲ့ပြီး ကူးစက်ခံ သေဆုံးသူဦးရေ ၁၃၀၀၀ ကျော်နေပြီလို့ ကမ္ဘာ့စစ်တမ်းတွေကို ပြုစုထုတ်ပြန်ရာ Worldometer အင်တာနက်စာမျက်နှာက ဖော်ပြထားပါတယ်။

2 months Ago

July 29, 2021

မိုးမိတ်တွင် ပရဟိတအသင်းများအတွက် PPE ဝတ်စုံ လိုအပ်နေ

ရှမ်းပြည်နယ်မြောက်ပိုင်း မိုးမိတ်မြို့မှာ ဇူလိုင် ၂၉ ရက်နေ့ထိ ကိုဗစ်-၁၉ အတည်ပြုလူနာ ၆၁ ဦး ထိရှိလာပြီး လူနာတွေကို ကူညီပေးနေတဲ့ ပရဟိတအသင်းတွေအတွက် PPE ဝတ်စုံ လိုအပ်နေတယ်လို့ မိုးမိတ်ကိုဗစ်-၁၉ ကွပ်ကဲရေးရုံးကနေ သိရပါတယ်။

မိုးမိတ်မြို့မှာ ကိုဗစ်-၁၉ ရောဂါကြောင့် သေဆုံးသူ ၃ ဦးသာရှိပြီး ပြည်သူကနေ ပြည်သူကို ကူညီနေရကာ အခက်ခဲများကို ပြေလည်အောင်ကြိုးစား ဆောင်ရွက်နေရပေမယ့် PPE ဝတ်စုံတွေတော့ အခက်အခဲ ရှိနေတယ်လို့ ဆိုပါတယ်။

မိုးမိတ်မြို့မှာ ကွာရန်တင်းစင်တာ ယောကျ်ားလေးသီးသန့်၊ မိန်းကလေးသီးသန့် အဆောင်ခွဲထားပြီး ခရီးဝေးက ပြန်လာသူတွေအတွက် သီးသန့်အဆောင်ထားရှိထားတယ်လို့ သိရပါတယ်။

CDM ကျန်းမာရေးဝန်ထမ်းတွေရှိတာကြောင့် ဝန်ထမ်းတွေလိုအပ်နေပေမယ့် ရှိတဲ့သူနဲ့ အဆင်ပြေအောင်ဆောင်ရွက်နေပြီး ကွာရန်တင်းစင်တာမှာတော့ ကွာရန်တင်းဝင်ရမယ့်သူက ကိုယ့်စရိတ်နဲ့ကိုယ် နေရတယ်လို့ သိရပါတယ်။

မိုးမိတ်မြို့မှာ ဇူလိုင် ၂၉ ရက်နေ့ထိ ကိုဗစ်-၁၉ အတည်ပြုလူနာ ၆၁ ဦးထိရှိလာပြီး ၃ ဦး သေဆုံး၊ ၇ ဦး ဆေးရုံကနေ ဆင်းခွင့်ရပြီလို့ သိရပါတယ်။

3 months Ago
More News
Up