NRPC

August 13, 2020

ပြည်ထောင်စုသဘောတူစာချုပ် အပိုင်း(၃)တွင် ထည့်သွင်းမည့် အဓိကအချက်များ သဘောတူ

ပြည်ထောင်စုသဘောတူစာချုပ် အပိုင်း(၃)မှာ ထည့်သွင်းချုပ်ဆိုမယ့်  အဓိက အပိုင်း ၃ ပိုင်းကို အစိုးရနဲ့ တိုင်းရင်းသားအဖွဲ့အစည်းတွေအကြား JICM အကြိုညှိနှိုင်းအစည်းအဝေးမှာ  ဆွေးနွေးညှိနှိုင်းနိုင်ခဲ့ပါတယ်။ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် အကောင်အထည်ဖော်မှုဆိုင်ရာညှိနှိုင်းအစည်းအဝေး (JICM) အကြို ညှိနှိုင်းအစည်းအဝေးကို ဩဂုတ် ၁၀ ရက်ကနေ ၁၂ ရက်အထိ နေပြည်တော်ရှိ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာန (NRPC)မှာ ပြုလုပ်ခဲ့တာပါ။ အစည်းအဝေး ၃ ရက်တာအတွင်း အစိုးရနဲ့ တိုင်းရင်းသားလက်နက်ကိုင်အဖွဲ့အစည်းတွေအကြား အကျေအလည်ဆွေးနွေးမှုတွေ ပြုလုပ်ခဲ့ရပြီး နောက်ဆုံးရက်မှာ တော့ သဘောတူညီချက်အချို့ရရှိခဲ့တာဖြစ်ပါတယ်။ သဘောတူညီမှုရခဲ့တဲ့  အဓိက အချက် ၃ ချက်ကတော့  အန်စီအေ အကောင်အထည်ဖော်ရေးမူဘောင် ၁၅ ချက်ရရှိထားတာ၊ ၂၀၂၀ အလွန်မှာ ဆက်လက်ဆွေးနွေးသွားမယ့် ခေါင်းစဉ်တွေနဲ့ အဆင့်များ ခေါင်းစဉ်ကြီး ၈ ခုရရှိတာနဲ့  ပြည်ထောင်စုအခြေခံမူတွေ၊  ဖက်ဒရယ် အခြေခံမူတွေ သဘောတူညီမှု ရရှိတာဖြစ်ပါတယ်။ ပြည်ထောင်စုသဘောတူစာချုပ်အပိုင်း ၃ မှာ ထည့်သွင်းချုပ်ဆိုမယ့် အချက်တွေကို သဘောတူညီမှုရခဲ့တယ်ဆိုပေမယ့် နှစ်ဖက်အဖွဲ့အစည်းတွေအကြား ညှိနှိုင်းမှု အဆင်မပြေတာကြောင့် ချန်ခဲ့ရတဲ့ အချက်တွေလည်း ရှိတယ်လို့ညွှန်ကြားရေးမှူးချုပ် ဦးဇော်ဌေးက ပြောပါတယ်။ ဩဂုတ် ၁၃ ရက်မှာ ပြုလုပ်မယ့် JICM အစည်းအဝေးအစီအစဉ် ပြည်ထောင်စု ငြိမ်းချမ်းရေးညီလာခံ အစည်းအဝေးဆိုင်ရာကိစ္စရပ်တွေကိုလည်း ဆွေးနွေးညှိနှိုင်းနိုင်ခဲ့တယ်လို့  နှစ်ဖက်တာဝန်ရှိသူတွေက ပြောပါတယ်။ သတင်း-ဖြိုးသက်ပိုင်မြင့် ဓာတ်ပုံ- NRPC
1 year Ago

ငြိမ်းချမ်းရေးလုပ်ငန်းစဉ်များ ထိရောက်မှုမရှိဟုဝေဖန်ချက်  NRPC ငြင်းဆို

ငြိမ်းချမ်းရေးလုပ်ငန်းစဉ်တွေ ထိထိရောက်ရောက် အောင်မြင်အောင် ဆောင်ရွက်နိုင်ခြင်းမရှိဘူးဆိုတဲ့ ဝေဖန်မှုတွေနဲ့ပတ်သက်ပြီး NRPC ဘက်က ငြင်းဆိုလိုက်ပါတယ်။ အခုအစိုးရလက်ထက် ငြိမ်းချမ်းရေးလုပ်ငန်းစဉ်တွေကို အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာန (NRPC) က အဓိက တာဝန်ယူဆောင်ရွက်နေတာဖြစ်ပြီး ဒီလိုဆောင်ရွက်နေရာမှာ ငြိမ်းချမ်းရေးလုပ်ငန်းစဉ်တွေ ထိရောက်မှုမရှိဘူးလို့ ဝေဖန်မှုတွေပေ ပေါ်ထွက်လာပါတယ်။ ဒါတွေနဲ့ပတ်သက်လို့ ညွှန်ကြားရေးမှူးချုပ် ဦးဇော်ဌေးက  ငြင်းဆိုလိုက်ပြီး NRPC အနေနဲ့ ရွေးကောက်ပွဲအပြီး နောက်အစိုးရတက်လာချိန်မှာတောင် ငြိမ်းချမ်းရေးလုပ်ငန်းစဉ်တွေကို အသင့်ဆက်လက်ဆောင်ရွက်နိုင်အောင် ဆောင်ရွက်ပေးထားတယ်လို့ ဩဂုတ် ၁၂ ရက်က နေပြည်တော် NRPC မှာပြုလုပ်တဲ့ ညှိနှိုင်းအစည်းအဝေးအပြီး သတင်းစာရှင်းလင်းပွဲမှာ ပြောကြား ခဲ့ပါတယ်။ ၂၀၁၈ ခုနှစ်က နေပြည်တော် ရွှေစံအိမ်ဟိုတယ်မှာ ပြုလုပ်ခဲ့တဲ့ NCA နှစ်ပတ်လည် အခမ်းအနားအပြီးမှာ KNU နဲ့ RCSS အဖွဲ့တို့က ငြိမ်းချမ်းရေးလုပ်ငန်းစဉ် တရားဝင်အစည်းအဝေးတွေကနေ ခေတ္တရပ်နားတယ်ဆိုပြီး ထုတ်ပြန်ချက်တွေ ထုတ်ပြန်ခဲ့ပါတယ်။ ဒီအခြေအနေတွေကနေ အခုလို ပြည်ထောင်စုငြိမ်းချမ်းရေးညီလာခံ ပြန်လည်ကျင်းပနိုင်တဲ့အထိ NRPC အနေနဲ့ ဆောင်ရွက်ခဲ့ရတယ်လို့လည်း ဆိုပါတယ်။ ညွှန်ကြားရေးမှူးချုပ် ဦးဇော်ဌေးက “ ဒီငြိမ်းချမ်းရေးလုပ်ငန်းစဉ်  NCA လမ်းကြောင်းကြီးက ရပ်သွားပြီ။ တကယ်လည်း ရပ်သွားတယ်။ အစည်းအဝေးခေါ်လို့မရတော့ဘူး။ ဒီဟာတွေမှာ မပါဘူးလို့ Statement တွေထုတ်ပြီး ပြောရရင်တော့ သပိတ်မှောက်လိုက်ပြီ။ ဒီအနေအထားကို အစိုးရက ကြုံခဲ့ရတယ်ပေါ့နော်။ ကြုံရတဲ့အချိန်မှာ အလွတ်၊ ကြိမ်ဖန်များစွာသွားရတယ်။ သွားပြီးတော့ တိုင်းရင်းသားတွေရဲ့ လိုလားချက်က ဘာလဲ။ ပြဿနာတွေကဘယ်မှာ ဖြစ်နေလဲ။ အဲဒီပြဿနာတွေဖြေရှင်းနိုင်အောင် ဘယ်လိုလုပ်ကြမလဲဆိုတာ ကျနော်တို့ တော်တော်အချိန်ယူရတယ်။ အချိန်ယူပြီး လုပ်ရင်းလုပ်ရင်းနဲ့ NCA လမ်းကြောင်းပေါ်ကို ပြန်ရောက်လာတာ။” လို့ ပြောပါတယ်။ ဒါ့အပြင် NCA လမ်းကြောင်းပေါ်ကို ပြန်ရောက်လာဖို့အတွက် ဆောင်ရွက်ရာမှာလည်း NRPC အနေနဲ့အရင်က အမှားတချို့ကို သင်ခန်းစာယူပြီး အချိန်ယူဆောင်ရွက်ခဲ့တယ်လို့လည်း ဆိုပါတယ်။ “အချိန်တိုတိုအတွင်းမှာပေါ့နော် အရမ်းတွန်းပြီးတော့ လုပ်တဲ့အခါကျတော့ မကျေလည်မှုတွေဖြစ်တယ်။ မကျေလည်မှုတွေဖြစ်ပြီးတော့ ခုနကလို Statement ထုတ်ပြီးတော့ ထွက်တဲ့ဟာတွေဖြစ်လာတယ်ပေါ့။ အဲ့ဒီတော့ ကျနော်တို့က ဒီသဘောတူ ညီချက်တွေ လုပ်မယ်ဆိုရင် တစ်ယောက်သဘောထား တစ်ယောက်နားလည်အောင်၊ သူ့ခံစားချက် ကိုယ်မျှဝေနိုင်အောင်လို့ ဒီလိုမျိုးအချိန်ယူရတယ်” လို့ ဦးဇော်ဌေးက ပြောပါတယ်။ အချိန်အပိုင်းအခြားတစ်ခုအထိ ငြိမ်းချမ်းရေးဆွေးနွေးပွဲတွေကို အလွတ်သဘောနဲ့သာ ဆောင်ရွက်ခဲ့ရပြီး တရားဝင် အစည်းအဝေးတွေကိုတော့ အခုနှစ်ဆန်းပိုင်းကမှ ပြန်လည်စတင်နိုင်ခဲ့တာပါ။ ဒါပေမဲ့ ကြားကာလအတွင်းမှာ ကိုဗစ်-၁၉ ရောဂါ မြန်မာပြည်မှာတွေ့ရှိရတာကြောင့် ငြိမ်းချမ်းရေးဆွေးနွေးပွဲတွေ ခေတ္တရပ်တန့်ခဲ့ရပြန်ပြီး အခုလအတွင်းမှာမှ ၄ ကြိမ်မြောက် ၂၁ ရာစုပင်လုံအစည်းအဝေးကို ပြန်လည်ပြုလုပ်နိုင်မှာလည်းဖြစ်ပါတယ်။ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ကတော့  တပ်မတော်က ငြိမ်းချမ်းရေးလုပ်ငန်းစဉ်လုပ်ရတာ နှောင့်နှေးမှုမရှိအောင် ဆောင်ရွက်ပေးခဲ့ပေမယ့် NRPC က အကောင်အထည်မဖော်နိုင်ခဲ့သလို တပ်မတော်ဘက်ကဖွဲ့ပေးခဲ့တဲ့ ညှိနှိုင်းရေးအဖွဲ့ကိုလည်း ထိထိရောက်ရောက် မသုံးနိုင်ခဲ့ဘူးလို့ ရုရှား Politic မဂ္ဂဇင်းနဲ့ အင်တာဗျူးမှာ ဝေဖန်ပြောပါတယ်။ သတင်း-ဖြိုးသက်ပိုင်မြင့်(နေပြည်တော်) ဓာတ်ပုံ-NRPC
1 year Ago

August 10, 2020

ငြိမ်းချမ်းရေးလုပ်ငန်းစဉ် အားလုံး လက်ခံနိုင်သည့်အခင်းအကျင်းပေါ်လာရေး ဆွေးနွေးကြရန် တိုက်တွန်း

ငြိမ်းချမ်းရေးလုပ်ငန်းစဉ် ရှေ့ဆက်နိုင်ဖို့ အားလုံးလက်ခံနိုင်တဲ့ အခင်းအကျင်းမျိုး ပေါ်ထွက်လာစေအောင် ဆွေးနွေးညှိနှိုင်းကြဖို့ NRPC ဒုဥက္ကဋ္ဌက တိုက်တွန်းလိုက်ပါတယ်။
၂၀၂၀ အလွန် အဆင့်လိုက် ရှေ့လုပ်ငန်းစဉ်တွေကို အဆင့်လိုက်အကောင်အထည်ဖော်မှုအတွက် ဆွေးနွေးမယ့် ခေါင်းစဉ်ကြီး ၈ ခုကို ပြီးခဲ့တဲ့ အစည်းအဝေးတွေမှာ သဘောတူထားပြီး ဩဂုတ်လ ၁၀ ရက်က နေပြည်တော် NRPC မှာ ပြုလုပ်တဲ့ JICM အကြိုညှိနှိုင်းအစည်းအဝေးအတွင်း အသေးစိတ်ခေါင်းစဉ်တွေကို အစိုးရနဲ့ တိုင်းရင်းသားအဖွဲ့အစည်းတွေအကြား ဆက်လက်ညှိနှိုင်းကြမှာပါ။ ငြိမ်းချမ်းရေး လုပ်ငန်းစဉ် ရှေ့ဆက်နိုင်ဖို့အတွက် အပြန်အလှန်နားလည်မှုနဲ့ အားလုံး လက်ခံနိုင်တဲ့ အခင်းအကျင်းတွေ ပေါ်ထွက်လာအောင် ဆွေးနွေးကြဖို့ NRPC ဒုဥက္ကဋ္ဌ ဦးထွန်းထွန်းဦးက တိုက်တွန်းခဲ့ပါတယ်။ JICM အစည်းအဝေးတွေကို အခုနှစ် ဇန်နဝါရီလအတွင်းက ၈ ကြိမ်မြောက်အဖြစ် ကျင်းပခဲ့ပြီး အခုလ ၁၃ ရက်နေ့မှာတော့ ၉ ကြိမ်မြောက်အစည်းအဝေးကို ပြုလုပ်မှာပါ။ ၈ ကြိမ်မြောက် JICM အစည်းအဝေးအတွင်းမှာ အစိုးရနဲ့ တိုင်းရင်းသားအဖွဲ့အစည်းတွေအကြား ဆုံးဖြတ်ချက်တချို့ ချမှတ်နိုင်ခဲ့ပြီး အဲဒီဆုံးဖြတ်ချက်တွေကို အကောင်အထည်ဖော်နိုင်ဖို့ နှစ်ဖက်ညှိနှိုင်းရေးအဖွဲ့တွေက ဆက်လက်ဆွေးနွေးနေကြတာပါ။ အခုပြုလုပ်တဲ့ JICM အကြိုညှိနှိုင်းအစည်းအဝေးကိုတော့ ဩဂုတ် ၁၀ ရက်နဲ့ ၁၁ ရက်တို့ ပြုလုပ်မှာဖြစ်ပြီး ဒီအစည်းအဝေး ကရရှိလာတဲ့ ရလဒ်တွေကို ဩဂုတ် ၁၃ မှာ ပြုလုပ်မယ့် JICM အစည်းအဝေးမှာ အတည်ပြုချက်ရယူမှာလည်း ဖြစ်ပါတယ်။ ဖြိုးသက်ပိုင်မြင့်(နေပြည်တော်)
1 year Ago
More News
Up