စစ်ကိုင်းတိုင်း၊ ဟုမ္မလင်းမြို့နယ် အောင်ချမ်းသာကျွေးရွာမှာရှိတဲ့ မိုင်တဲလ်တာဝါတိုင် စက်တင်ဘာ ၁၇ ရက်က မိုင်းခွဲဖျက်ဆီးခဲ့တယ်လို့ အထက်ချင်းတွင်းဒေသ ပြောက်ကျားအဖွဲ့က ပြောပါတယ်။

ဟုမ္မလင်းမြို့နယ်မှာ စက်တင်ဘာ ၁၆ ရက်နေ့ကလည်း ငိုးပင်းကျေးရွာ မိုင်တဲလ်တာဝါတိုင်ကို အထက်ချင်းပြောက်ကျားဖွဲ့က ဖျက်ဆီးခဲ့ပြီး အခုဒုတိယအကြိမ် ထပ်မံပျက်စီးခဲ့ပါတယ်။

စစ်ကိုင်းတိုင်း မုံရွာမြို့နယ် ဇီးကျွန်းကျေးရွာအုပ်စု၊ ကိုင်းတောရွာက စစ်ကောင်စီ သတင်းပေးတစ်ဦးကို Monywa Heroes Group နှင့် Monywa Satan အဖွဲ့က သုတ်သင်ရှင်းလင်းခဲ့တယ်လို့ အဲဒီအဖွဲ့က စက်တင်ဘာ ၁၇ ရက်မှာ ထုတ်ပြန်ပါတယ်။

ကိုင်းတောရွာနေ စစ်ကောင်စီသတင်းပေး ကိုဇင်ကို စက်တင်ဘာ ၁၆ ရက်က သုတ်သင်ရှင်းလင်းခဲ့တာလို့ ဆိုပါတယ်။

Monywa Heroes Group အနေနဲ့ စက်တင်ဘာ ၉ ရက်က အာဏာသိမ်းစစ်ကောင်စီ သတင်းပေးပို့နေသူတွေအနေနဲ့‌ သူတို့ရဲ့လုပ်ရပ်ကို ရပ်တန်းက ရပ်ဖို့ သတိပေးထားတာ ဖြစ်ပါတယ်။

မွန်ပြည်နယ်မှာ စက်တင်ဘာ ၁၇ ရက်နေ့ တစ်ရက်တည်း စစ်တပ်ပိုင်  Mytel တာဝါတိုင် ၂  တိုင် ဗုံးခွဲဖျက်ဆီးခံခဲ့ရတယ်လို့ ဒေသခံတွေက  ဒီဗွီဘီကို ပြောပါတယ်။

ဘီးလင်းမြို့နယ်၊ ကော့ကဒွတ်ကျေးရွာက Mytel တာဝါတိုင်ကို စက်တင်ဘာ ၁၇ ရက် ည ၈ နာရီလောက်က  အမည်မသိ လူတစုက ဗုံးခွဲဖျက်ဆီးခဲ့တာ ဖြစ်ပါတယ်။

ဒါ့အပြင် ရေးမြို့နယ်၊ ကျောက်မိချောင်းတောင်ပိုင်းကျေးရွာအနီးက Mytel တာဝါတိုင်ကိုလည်း မနေ့ ည ၇ နာရီလောက်မှာ  ရေးမြို့နယ်ပြည်သူ့ကာကွယ်ရေးတပ်ဖွဲ့က ဗုံးခွဲဖျက်ဆီးခဲ့ပါတယ်။

ဗုံးခွဲဖျက်ဆီးခံရတဲ့ Mytel တာဝါတိုင် ၂ တိုင်လုံး ပြိုကျပျက်စီးတာ မရှိပေမယ့် မီးစက်နဲ့ ဆက်သွယ်ရေးစက်ပစ္စည်းတွေ ထိခိုက်ပျက်စီးသွားခဲ့ပါတယ်။

Mytel တာဝါတိုင်တွေကို အာဏာသိမ်းစစ်ကောင်စီက လုံခြုံရေးချထားတဲ့ကြားက ဗုံးခွဲဖျက်ဆီး ခံလိုက်ရတာ ဖြစ်ပါတယ်။

မွန်ပြည်နယ်မှာတော့ ပြီးခဲ့တဲ့ စက်တင်ဘာ ၁၁ ရက်နေ့က ကျိုက်ထိုမြို့နယ် အင်္ဂဘိုကျေးရွာက Mytel တာဝါတိုင် ဗုံးခွဲဖောက်ဖျက်ဆီးခံရပါတယ်။ ဒါကြောင့် မွန်ပြည်နယ်အတွင်းမှာ စစ်တပ်အာဏာသိမ်းပြီးနောက် ဗုံးခွဲဖျက်ဆီးခံရတဲ့  Mytel တာဝါတိုင် ၃ တိုင် ရှိသွားပြီ ဖြစ်ပါတယ်။

NUG အစိုးရက ခုခံတွန်းလှန်စစ်ပွဲစတင်ကြေညာတဲ့ စက်တင်ဘာ ၇ ရက်ကစပြီး မြန်မာ တနိုင်ငံလုံးက Mytel ဆက်သွယ်ရေးတာဝါတိုင်ပေါင်း  ၂ဝဝဝ ကျော်ရှိတဲ့ အနက် ဒေသဆိုင်ရာ PDF တွေက  Mytel တိုင်ပေါင်း ၈၀ လောက်ကို ဖျက်ဆီးထားပါတယ်။ 

Mytel ဆက်သွယ်ရေးတာဝါတိုင်တွေဖျက်ဆီးခံရတဲ့အတွက် လူပေါင်း ၇ သိန်းလောက် အင်တာနက် မရကြတော့ဘူးလို့ Mytel ကုမ္ပဏီပြောရေးဆိုခွင့်ရှိသူက ပြည်ပမီဒီယာတစ်ခုကို ပြောကြား ထားပါတယ်။ 

မွန်ပြည်နယ်၊ ရေးမြို့နယ်၊ ကျောက်မိချောင်းတောင်ပိုင်းကျေးရွာအနီးရှိ စစ်တပ်ပိုင် Mytel တာဝါ တိုင်နဲ့ ဆက်သွယ်ရေး Cabinet တွေကို  စက်တင်ဘာ ၁၇ ရက် မနေ့ည ၇ နာရီလောက်က ဗုံးခွဲဖျက်ဆီးခဲ့တယ်လို့   YPDF ရေးပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။ 

လက်ရှိ Mytel ဖုန်းလိုင်းတွေ အနီးဝန်းကျင်တဝိုက် ပြတ်တောက်သွားတယ်လို့ ဒေသခံတွေက ပြောပါတယ်။ 

ရေးမြို့ပြည်သူ့ကာကွယ်ရေးတပ် YPDF က စစ်တပ်ပိုင် ဆက်သွယ်ရေးပိုင်လိုင်းနဲ့  မြေအောက် ဆက်သွယ်ရေးကြိုးတွေကိုလည်း ပြီးခဲ့တဲ့ရက်တွေက ဖျက်ဆီးထားခဲ့သလို အခု Mytel တာဝါတိုင်ရဲ့ Cabinet တွေကို ထပ်မံဖျက်ဆီးခဲ့တာပါ။ 

NUG အစိုးရက ခုခံတွန်းလှန်စစ်ပွဲ စတင်ကြေညာတဲ့ စက်တင်ဘာ ၇ ရက်ကစပြီး မြန်မာ တနိုင်ငံလုံးက Mytel ဆက်သွယ်ရေးတာဝါတိုင်ပေါင်း ၂ဝဝဝ ကျော်ရှိတဲ့အနက် ဒေသဆိုင်ရာ PDF တွေက  Mytel တိုင်ပေါင်း ၈၀ လောက်ကို ဖျက်ဆီးထားပါတယ်။ 

Mytel ဆက်သွယ်ရေးတာဝါတိုင်တွေဖျက်ဆီးခံရတဲ့အတွက် လူပေါင်း ၇ သိန်းလောက် အင်တာနက် မရကြတော့ဘူးလို့ Mytel ကုမ္ပဏီပြောရေးဆိုခွင့်ရှိသူက ပြည်ပမီဒီယာတစ်ခုကို ပြောကြားထားပါတယ်။

စစ်ကိုင်းတိုင်း၊ ခင်ဦးမြို့နယ်၊ ဒန်းကုန်းကျေးရွာအနီးက Mytel တာဝါတိုင်ကို စက်တင်ဘာ ၁၅ ရက်ညဦးပိုင်းက မိုင်းခွဲဖျက်ဆီးသွားတယ်လို့ ဒေသခံရွာသားတွေဆီက သိရပါတယ်။

Mytel တာဝါတိုင်ကို ည ၉ နာရီခန့်က မိုင်းခွဲဖျက်ဆီးသွားတာလို့ ဒေသခံတစ်ဦးက ပြောပါတယ်။

တာဝါတိုင်ကို ဘယ်အဖွဲ့က မိုင်းခွဲဖျက်ဆီးတယ်ဆိုတာ မသိရသေးဘဲ ခင်ဦးမြို့နယ်မှာ Mytel တာဝါတိုင် ၉ တိုင်မြောက် ဖျက်ဆီးခံရတာလည်း ဖြစ်ပါတယ်။

နိုင်ငံတဝန်းမှာတော့ Mytel တာဝါတိုင်တွေ ဖျက်ဆီးခံရတာ ၈၀ ကျော် ရှိပြီလို့ သိရပါတယ်။