MMA

January 4, 2022

တိုင်ဆန်ဖျူရီနှင့် စိန်ခေါ်ပွဲထိုးသတ်လိုဟု MMA ဟဲဗီးဝိတ်ချန်ပီယံ အန်ဂါနူပြော

လက်ဝှေ့ဖိုက်တာ တိုင်ဆန်ဖျူရီနဲ့ စိန်ခေါ်ပွဲထိုးသတ်သွားချင်တယ်လို့ UFC ဟဲဗီးဝိတ်ချန်ပီယံ အန်ဂါ နူကပြောပါတယ်။ 

အန်ဂါနူဟာ MMA ပွဲတွေသာ ထိုးသတ်နေသူဖြစ်ပေမယ့် ကစားသမားဘဝက အနားမယူခင်မှာ လက်ဝှေ့ကြိုးဝိုင်းထဲဝင်ပြီး အဆင့်တစ်ခုပြသနိုင်ဖို့ ဆန္ဒရှိနေတာပါ။

UFC ဥက္ကဋ္ဌ ဒန်နာဝှိုက်နဲ့ စာချုပ်ချုပ်ဆိုရာမှာ လက်ဝှေ့ပွဲတွေကိုလည်းထိုး သတ်နိုင်တယ်ဆိုတဲ့ သဘောတူညီချက် ထည့်သွင်းချုပ်ဆိုမှာဖြစ်ပြီး MMA မှာတင်မဟုတ်ဘဲ လက်ဝှေ့လောကမှာလည်း သမိုင်းမှတ်တမ်းကောင်းတစ်ခု ကျန်ခဲ့ဖို့ အန်ဂါနူက မျှော်လင့်နေပါတယ်။

“ကျနော်တို့ စာချုပ်သစ်အတွက် အပြီးသတ်လုပ်ဆောင်နေတယ်။ အဲဒီစာချုပ်မှာ လက်ဝှေ့က အစိတ်အပိုင်းတစ်ခုအနေနဲ့ ပါဝင်ပါတယ်။ ဘာဖြစ်လို့လဲဆိုတော့ လက်ဝှေ့မထိုးလိုက်ရဘဲ ကျနော် အားမယူနိုင်ပါဘူး။ လက်ဝှေ့က တိုင်ဆန်ဖျူရီ၊ ဒီယွန်တေဝဲလ်ဒါတို့လို အဆင့်ရှိသလား ဆိုတာ စမ်းသပ်ချင်သေးတယ်။ MMAနဲ့ မတူတာ သိပေမယ့် ကျနော်ကလည်း ချန်ပီယံတစ်ဦးပါပဲ” လို့ ဖရန်ဆစ် အန်ဂါနူက ပြောပါတယ်။

ကင်မရွန်းသား ဖရန်ဆစ်အန်ဂါနာနူဟာ ပြီးခဲ့တဲ့နှစ်မတ်လက မီအိုဆစ်ကို အနိုင်ရပြီး UFC ဟဲဗီးဝိတ်ချန်ပီယံ ဖြစ်လာခဲ့တာပါ။ သူဟာ အခုလ ၂၂ ရက်မှာ ပြင်သစ်သားဂါနီနဲ့ ချန်ပီယံကာကွယ်ပွဲ ထိုးသတ်ရမှာ ဖြစ်ပါတယ်။

2 weeks Ago

July 31, 2021

နိုင်ငံတာဝန်ရှိသူများ ကိုယ့်အတွက်ပဲကိုယ်မစဉ်းစားကြရန် အောင်လအန်ဆန်ပြော

မြန်မာပြည်သူတွေအတွက် ဆုတောင်းပေးတဲ့အကြောင်းနဲ့ နိုင်ငံမှာတာဝန်ရှိသူတွေအနေနဲ့ ကိုယ့်အတွက်ပဲ မစဉ်းစားကြဘဲ  မြန်မာနိုင်ငံရဲ့ အနာဂတ်အတွက် စဉ်းစားပေးကြဖို့  MMA  ကစားသမား အောင်လအန်ဆန်က ပြောကြားလိုက်ပါတယ်။

ONE Championship ကမ္ဘာ့ချန်ပီယံဟောင်း MMA ကစားသမား အောင်လအန်ဆန်ဟာ ဇူလိုင် ၃၀ ရက်ညက စင်ကာပူနိုင်ငံမှာ ယှဉ်ပြိုင်ထိုးသတ်တဲ့ မစ်ဒယ်ဝိတ်တန်းပြိုင်ပွဲမှာ ပြိုင်ဘက် ဘရာဇီးလ်နိုင်ငံသား လီအန်ဒရိုကို ပထမအချီ ၃မိနစ်၄၅ စက္ကန့်မှာပဲ အလဲထိုး အနိုင်ရသွားပြီးနောက် ကြိုးဝိုင်းစင်မြင့်ပေါ်ကနေ ပြောကြားခဲ့တာပါ။ 

“ကျနော် မြန်မာနိုင်ငံမှာရှိတဲ့ပြည်သူတွေအတွက် ဆုတောင်းပေးချင်ပါတယ်။ ဒီနှစ်ဟာ ကျနော်တို့ အားလုံးအတွက် ခက်ခဲတဲ့နှစ်ပါ။ အထူးသဖြင့် ကျနော့်အတွက်လည်း အရမ်းပဲ ခက်ခဲခဲ့ပါတယ်။ မြန်မာပြည်မှာ ဖြစ်ပျက်နေတာတွေနဲ့  ကျနော် လေ့ကျင့်တဲ့ Gym ကိုသွားရတာတောင်  စိတ်ထဲမှာ တော်တော်ခက်ပါတယ်။ မြန်မာပြည်အတွက် ဆုတောင်းပေးကြပါ၊  အဲဒီမှာရှိတဲ့ ပြည်သူတွေအတွက် စဉ်းစားပြီးတော့လေ။ ခင်ဗျားတို့ဟာ အာဏာပိုင်တွေ တာဝန်ရှိသူတွေဖြစ်တယ်ဆိုရင်၊ မြန်မာပြည်ရဲ့ အနာဂတ်အတွက် စဉ်းစားပါ။ ကိုယ့်အတွက်ပဲ မစဉ်းစားပါနဲ့၊ ကျေးဇူးအများကြီးတင်ပါတယ်။” လို့ ပြောပါတယ်။

အောင်လအန်ဆန်ဟာ  စိန်ခေါ်သူ ဒီရိုက်ဒါကို ရှုံးပြီး  ၂၀၂၀ အောက်တိုဘာ ၃၀ ရက်မှာ မစ်ဒယ်ဝိတ်တန်း ကမ္ဘာ့ချန်ပီယံဆု  ၂၀၂၁ ဧပြီ  ၂၈ ရက်မှာ လိုက်ဟဲဗီးဝိတ်တန်းကမ္ဘာ့ချန်ပီယံဆုတို့ကို လက်လွှတ်ခဲ့ရပြီးနောက် ပထမဆုံး နိုင်ပွဲပြန်ရခဲ့တာပါ။ သူ့အနေနဲ့ ဘယ်ပြိုင်ဘက်ကိုမှ မကြောက်တဲ့ အကြောင်းနဲ့ မစ်ဒယ်ဝိတ်တန်းမှာ ပွဲကောင်း တစ်ပွဲ စီစဉ်ပေးဖို့လည်း ONE Championship  တာဝန်ရှိသူကို ပြောကြားခဲ့ပါတယ်။

Photo Credit- ONE Championship 

6 months Ago
More News
Up