Miss Supranational

December 9, 2019

2019 Miss Supranational အလှမယ်သရဖူ ထိုင်းအလှမယ် ပထမအကြိမ် ဆွတ်ခူး (ရုပ်သံ)

ပိုလန်နိုင်ငံမှာ ကျင်းပတဲ့ ၂၀၁၉ ခုနှစ် Miss Supranational အလှမယ်ပြိုင်ပွဲမှာ ထိုင်းနိုင်ငံ ကိုယ်စားပြုအလှမယ် အန်တိုနီရာပေါ်ဆစ်လ်ဒ်က အလှမယ်သရဖူကို ဆွတ်ခူးရရှိသွားခဲ့ပါတယ်။ ဒီပြိုင်ပွဲကိုတော့ ပြီးခဲ့တဲ့ နိုဝင်ဘာလ ၁၈ ရက်ကတည်းက စတင်ကျင်းပခဲ့တာ ဖြစ်ပြီး ခုလို သရဖူဆု ရရှိမှုဟာ ထိုင်းနိုင်ငံအတွက်တော့ ပထမဆုံးအနေနဲ့ Miss Supranational အလှမယ်ဆုကို ရရှိခြင်းလည်း ဖြစ်ပါတယ်။ ကမ္ဘာ့နိုင်ငံပေါင်း ၇၇ နိုင်ငံမှ အလှမယ်တွေ ပါဝင်ယှဉ်ပြိုင်ကြတဲ့ ဒီအလှမယ်ပြိုင်ပွဲဟာ ထိပ်တန်းအလှမယ်ပြိုင်ပွဲတခုလည်း ဖြစ်ပြီး အခုနှစ်အတွက် First Runner Up ဆုကိုတော့ နမ်မီးဘီးယားအလှမယ်၊ Second Runner Up ဆုကို အင်ဒိုနီးရှားအလှမယ်၊ Third Runner Up နဲ့ Fourth Runner Up ဆုတွေကိုတော့ ပီရူးအလှမယ်နဲ့ ဗင်နီဇွဲလားအလှမယ်တွေက အသီးသီး ရရှိသွားကြတာ ဖြစ်ပါတယ်။ အခုနှစ်ရဲ့ သရဖူဆုရှင် ထိုင်းအလှမယ်ဟာ ဒိန်းမတ်-ထိုင်း ကပြားအလှမယ်တဦး ဖြစ်ကာ စတန်းဖို့ဒ်နိုင်ငံတကာတက္ကသိုလ်မှာ ကြော်ငြာနဲ့ ပြည်သူ့ဆက်ဆံရေးဘာသာရပ် အထူးပြုနဲ့ ပညာသင်ကြားနေသူ ဖြစ်ပါတယ်။ အခုနှစ်ရဲ့ Miss Supranational 2019 အလှမယ်ပြိုင်ပွဲကိုတော့ မြန်မာနိုင်ငံ ကိုယ်စားပြုအလှမယ် အိမ့်မျက်ခြယ်က ဝင်ရောက်ယှဉ်ပြိုင်ခဲ့တာဖြစ်ပြီး ဆုရရှိခဲ့ခြင်းတော့ မရှိခဲ့ပါဘူး။ အလှမယ် Pageant ပြိုင်ပွဲတွေထဲမှာ ထင်ရှားတဲ့ ပြိုင်ပွဲတခုဖြစ်တဲ့ ဒီပြိုင်ပွဲကို မြန်မာနိုင်ငံ ကိုယ်စားပြု အလှမယ်တွေအဖြစ် ၂၀၁၃ ခုနှစ်မှာ အလှမယ် ခင်ဝင့်ဝါ၊ ၂၀၁၄ ခုနှစ်မှာ အလှမယ် ဟန်သီ၊ ၂၀၁၅ ခုနှစ်မှာ အလှမယ် L ဘောက်နူး၊ ၂၀၁၆ ခုနှစ်မှာ အလှမယ် ဆွေဇင်ထက်၊ ၂၀၁၇ ခုနှစ်မှာ အလှမယ် ရွှေမှူးဟန်နဲ့ ပြီးခဲ့တဲ့ ၂၀၁၈ ခုနှစ်မှာတော့ အလှမယ် ရွှေအိမ်စည်တို့က သွားရောက်ယှဉ်ပြိုင်ခဲ့ကြဖူးပါတယ်။
2 years Ago
Up