ပိုလန်နိုင်ငံမှာ ကျင်းပတဲ့ ၂၀၂၂ ခုနှစ် Miss Supranational အလှမယ်သရဖူကို တောင်အာဖရိကအလှမယ် Lalela Mswane က ဆွတ်ခူးရရှိခဲ့ပြီး စစ်အာဏာသိမ်းမှုနဲ့ နိုင်ငံရေးမတည်ငြိမ်မှုတွေ ကြုံတွေ့နေရတဲ့ မြန်မာနိုင်ငံကတော့ သွားရောက်ယှဉ်ပြိုင်နိုင်ခြင်း မရှိခဲ့ပါဘူး။

အခုနှစ်ရဲ့ Miss Supranational အလှမယ်ပြိုင်ပွဲမှာတော့ 1^st Runner Up ဆုကို ထိုင်းအလှမယ်၊ 2^nd Runner Up ဆုကို ဗီယက်နမ်အလှမယ်၊ 3^rd Runner Upဆုကို အင်ဒိုနီးရှားအလှမယ်နဲ့ 4^th Runner Up ဆုကို ဗင်နီဇွဲလား အလှမယ်တွေက အသီးသီး ဆွတ်ခူးရရှိသွားခဲ့ကြတာ ဖြစ်ပါတယ်။

Miss Supranational အလှမယ်ပြိုင်ပွဲတွေကို ပြီးခဲ့တဲ့ ၂၀၀၉ ခုနှစ်က ပိုလန်နိုင်ငံမှာ စတင်ကျင်းပလာခဲ့တာဖြစ်ပြီး ပြီးခဲ့တဲ့ ၂၀၂၀ ပြည့်နှစ်မှာတော့ ကိုဗစ်-၁၉ ကပ်ဘေးကြောင့် မကျင်းပဖြစ်ခဲ့ပါဘူး။

ပိုလန်အခြေစိုက် Miss Supranational Beauty Pageant ပြိုင်ပွဲတွေမှာတော့ မြန်မာနိုင်ငံ ကိုယ်စားပြုအလှမယ်တွေအနေနဲ့ ၂၀၁၃ ခုနှစ်ကစတင်ကာ ဆက်တိုက်ပါဝင် ယှဉ်ပြိုင်ခဲ့ဖူးပြီး ဆုတွေလည်း ရရှိခဲ့ကြဖူးပါ တယ်။

၂၀၁၃ ခုနှစ်က မြန်မာကိုယ်စားပြုအလှမယ်အဖြစ် ခင်ဝင့်ဝါကို စေလွှတ်ခဲ့ပြီး သူဟာ နိုင်ငံတကာအလှမယ်တွေကြား Top 20 အဆင့်ထိ တက်လှမ်းနိုင်ခဲ့ကာ Miss Internet award ၊ Face of Miss Supranational by Missosology & People Choice award ၊ Most Beautiful Woman in the world by Belarus website ၊ Miss Grand Slam Popularity ၊ 3rd of Miss Grand Slam by Global Beauties စတဲ့ ဆုတွေ ရရှိခဲ့ပါတယ်။

အဲဒီနောက် ၂၀၁၄ ခုနှစ်မှာတော့ အလှမယ် ဟန်တီက သွားရောက်ယှဉ်ပြိုင်ခဲ့ပြီး Top 10 အဆင့်ထိ ရောက်ရှိခဲ့ကာ Miss Asia & Oceania winner ၊ Miss Internet award ၊ Beauty Concept by most beautiful girl Top 5 ဆုတွေ ရရှိခဲ့တာပါ။

ကချင်အလှမယ် L ဘောက်နူးကတော့ ၂၀၁၅ ခုနှစ်မှာ မြန်မာကိုယ်စားပြု အလှမယ်အဖြစ် ဝင်ရောက်ယှဉ်ပြိုင်ခဲ့ပြီး Top 20  အဆင့်ထိ ပါဝင်ခဲ့ကာ Miss Internet award ၊ Best Evening Gown winner award ၊ Best Interview Top 3 ဆုတွေ ရရှိခဲ့တာ ဖြစ်ပါတယ်။

၂၀၁၆ ခုနှစ်မှာတော့ မြန်မာအလှမယ် ဆွေဇင်ထက်က Top 10 အဆင့်ထိ ပါဝင်ခဲ့ ပြီး Miss Personality award ၊ Miss Grand Slam Top 50 by Global Beauties ဆုတွေ ရရှိထားပါတယ်။

အဲဒီနောက် ၂၀၁၇ ခုနှစ်မှာတော့ အလှမယ် ရွှေမှူးဟန်၊ ၂၀၁၈ ခုနှစ်မှာ အလှမယ် ရွှေအိမ်စည်နဲ့ ၂၀၁၉ ခုနှစ်မှာတော့ အလှမယ် အိမ့်မြတ်ချယ်တို့က အသီးသီး ဝင်ရောက် ယှဉ်ပြိုင်ခဲ့ကြတာ ဖြစ်ပါတယ်။