Lockdown ချ

January 4, 2021

ရဲ ၁ ဦးနှင့်အချုပ်သား ၁၆ ဦး ကိုဗစ်ပိုးတွေ့သဖြင့် ဟင်္သာတနယ်မြေရဲစခန်းကို lockdown ချ

ဧရာဝတီတိုင်း၊ ဟင်္သာတမြို့နယ် နယ်မြေရဲစခန်းမှာ ရဲတပ်ဖွဲ့ဝင် ၁ ဦးနဲ့ အချုပ်သား ၁၆ ဦးမှာ ဇန်နဝါရီ ၃ ရက်နေ့ ညပိုင်းက ရောဂါပိုးတွေ့ရှိခဲ့တယ်လို့ ရဲတပ်ဖွဲ့က သိရပါတယ်။ ​ရောဂါပိုးစတင်တွေ့ရှိခဲ့တဲ့ အချုပ်သားဟာ တလုတ္ထော်နယ်မြေရဲစခန်းက ရာဇသတ်ကြီးပုဒ်မ ၃၂၆ နဲ့ အဖမ်းခံထားရသူဖြစ်ပြီး ဒီဇင်ဘာလ ၂၄ ရက်နေ့က ဟင်္သာတနယ်မြေရဲစခန်းကို ရောက်လာတာလို့ ဟင်္သာတမြို့နယ်ရဲတပ်ဖွဲ့ မှူး ရဲမှူး ခင်မောင်ကြည်က DVB ကို ပြောပါတယ်။ “သူက ၂၄ ရက်နေ့က စရောက်တာ၊ ဖျားပြီး အနံ့ပျောက်လို့ စစ်ဆေးတာ ပိုးတွေ့တာ၊ အချုပ်သား ၁၆ ဦးနဲ့ ရဲတပ်ဖွဲ့ဝင် ၁ ဦးမှာ ပိုးတွေ့ထားပါတယ်။ သူတို့ကိုတော့ ဆေးကုသတာတွေ လုပ်ပေးနေပြီ” လို့ပြောပါတယ်။ ဟင်္သာတနယ်မြေရဲစခန်းမှာ အချုပ်ကျနေတဲ့ အချုပ်သား ၂၁ ဦးရှိတဲ့အထဲ ရောဂါပိုးရှိ၊ မရှိ စစ်ဆေးချိန်မှာ စုစုပေါင်း ၁၆ ဦးထဲမှာ ရောဂါပိုး တွေ့ရှိခဲ့ပြီး ကျန်တဲ့ ၅ ယောက်မှာ ပိုးတွေ့တာမျိုး မရှိဘူးလို့ ဆိုပါတယ်။ ဘိုကလေးမြို့မရဲစခန်းမှာလည်း အချုပ်သား ၂၈ ဦးထိ ရောဂါပိုးတွေ့ရှိခဲ့လို့ ပိုးတွေ့တဲ့ အချုပ်သားတွေကို ဆေးကုသပေးနေပြီး အချုပ်ခန်းအသစ် တည်ဆောက်နေရတယ်လို့ ရဲတပ်ဖွဲ့က သိရပါတယ်။ ဧရာဝတီတိုင်းပြည်သူ့ကျန်းမာရေးဦးစီးဌာနရုံးမှာ ဒီဇင်ဘာလ ၃၀ ရက်နေ့က ပြုလုပ်တဲ့ သတင်းစာရှင်းလင်းပွဲမှာတော့ တိုင်းအတွင်းက အကျဉ်းထောင်နဲ့ အချုပ်ခန်းတွေမှာ စုစုပေါင်း ၁၃၇ ဦး ကိုဗစ်ရောဂါပိုး တွေ့ရှိထားတယ်လို့ ဒုတိုင်းဦးစီးမှူး ဒေါက်တာသီဟအောင်က ပြောဆိုပါတယ်။ သတင်း - မင်းထက်မုန်း(ပုသိမ်)
3 months Ago

December 13, 2020

ကိုဗစ်-၁၉ ကူးစက်နှုန်း မြင့်လာသဖြင့် လုံးခင်းကျေးရွာအုပ်စုကို Lockdown ချ

ကိုဗစ်-၁၉ အတည်ပြုလူနာ ၁၃၀ အထိရှိလာပြီး ကူးစက်မှုနှုန်းမြင့်တက်နေတဲ့ ကချင်ပြည်နယ် ဖားကန့်မြို့နယ် လုံးခင်းကျေးရွာအုပ်စုကို ဒီနေ့ကစပြီး Lockdown  ချလိုက်တယ်လို့ မြို့နယ် ကိုဗစ်-၁၉ ကာကွယ်ထိန်းချုပ်ရေးနဲ့ အရေးပေါ်တုံ့ပြန်မှုကော်မတီက သိရပါတယ်။ ကိုဗစ်-၁၉ ရောဂါ ကူးစက်ခံရမှုမြင့်တက်နေတဲ့ လုံးခင်းကျေးရွာအုပ်စု ရပ်ကွက်နဲ့ ကျေးရွာအချို့က နေရာတွေကို အသွားအလာကန့်သတ်သွားမှာ ဖြစ်ပါတယ်။ လုံးခင်းကျေးရွာအုပ်စုဟာ နိုဝင်ဘာ ၂၂ ရက်နေ့ကနေ ဒီဇင်ဘာ ၁၂ ရက်နေ့အထိ သုံးပတ်အတွင်း ကိုဗစ်-၁၉ ကူးစက်ခံရသူ ၁၃၀ ထိရှိနေပြီး ဖားကန့်မြို့နယ်မှာ ကူးစက်ခံရသူ အများဆုံး ကျေးရွာလည်း  ဖြစ်ပါတယ်။ အသွားအလာကန့်သတ်ပြီး လော့ဒေါင်းချထားတဲ့နေရာတွေကို မြို့နယ် ကိုဗစ်-၁၉ ကော်မတီနဲ့ ရဲတပ်ဖွဲ့ ရဲတပ်ရင်း၊ ကျန်းမာရေးဝန်ထမ်း၊ မီးသတ်တပ်ဖွဲ့၊ ကြက်ခြေနီ၊ စေတနာ့ဝန်ထမ်းတွေ အပါအဝင် အရပ်ဘက်လူမှုအဖွဲ့အစည်းတွေနဲ့ ပူးပေါင်းဆောင်ရွက်သွားမယ်လို့လည်း ဆိုပါတယ်။ ဖားကန့်မြို့နယ်အတွင်းမှာ စက်တင်ဘာလကစပြီး ကိုဗစ်-၁၉ ကူးစက်ခံခဲ့ရတာ ဖြစ်ပါတယ်။ မြို့နယ်အတွင်းမှာ ကိုဗစ်-၁၉ ကူး စက်ခံရသူပေါင်း ဒီဇင်ဘာ ၁၂ ရက်နေ့အထိ ၂၅၉ ဦးရှိသွားပြီလို့ ကော်မတီက ထုတ်ပြန်ထားပါတယ်။ သတင်း - ဇော်မိုးထက် (ဖားကန့်)
4 months Ago
More News
Up