Lockdown

October 29, 2021

ကချင်အိုင်ဒီပီစခန်းတွင် ကိုဗစ်-၁၉ ရောဂါဖြင့် ၂ ဦးသေဆုံး၊ စခန်းကို lockdown ချ

ကေအိုင်အို ထိန်းချုပ်နယ်မြေ မိုင်ဂျာယန်ဒေသမှာ ကိုဗစ်-၁၉ ရောဂါကူးစက်ပြန့်ပွားမှုဖြစ်နေပြီး  ပါကထောင်း အိုင်ဒီပီ ဒုက္ခသည် စခန်းမှာ အောက်တိုဘာ ၂၈ ရက်က ကိုဗစ်-၁၉ ရောဂါနဲ့  ၂ ဦး သေဆုံးသွားတယ်လို့ ကချင်လူမှုကယ်ဆယ်ရေးအဖွဲ့က ပြော ပါတယ်။

မိုင်ဂျာယန်ဒေသ ပါကထောင် (Pa Kahtawng) အိုင်ဒီပီ ဒုက္ခသည်စခန်းမှာ  လက်ရှိကိုဗစ်-၁၉ အတည်ပြုလူနာ  ၁၈၃ ဦးရှိနေပြီး စခန်းကို Lockdown ချထားတယ်လို့ ကချင်လူမှုရေးအဖွဲ့က ဒေါ်မေရီထောင်က ပြောပါတယ်။

“မနေ့ကကတော့ ပါကထောင်းဆိုတဲ့ အိုင်ဒီပီစခန်းကနေ ၁၈၃ ယောက် positive ထွက်တယ်။ သူတို့ကို Quarantine care center ကိုရွေ့တယ်။ အဲဆိုတော့ အခုလောလောဆယ် lockdown ချလိုက်တယ်ပေါ့နော်။ ” 

အဆိုပါ စခန်းမှာ ဇွန်လတုန်းကစပြီး ကိုဗစ်-၁၉ စတင်ဖြစ်ပွားခဲ့ရာ စခန်းကို lockdown ချကုသပေးပြီး ဇွန်၊ ဇူလိုင် နဲ့ ဩဂုတ်လ ၃ လမှာ ကုသပြီး လျော့နည်းသွားခဲ့ပေမယ့် အခု ရက်ပိုင်းကစပြီး နောက်ထပ်တခါ ကူးစက်ပြန့်ပွားလာတာလို့လည်း ပြောပါတယ်။

“ အခုက ဒီ မိုးအကုန် ဆောင်းအကူးဆိုတော့ အရမ်းလည်းအေးပြီ။ ဒီအချိန်မှာ ဖြစ်တာပေါ့။ ကျမတို့ ပြောရမယ်ဆိုရင် Outbreak ပုံစံလိုဖြစ်နေပြီပေါ့။ ၅၀၀ ကျော်ဖြစ်တဲ့အထဲမှာ ၁၈၃ ယောက် positive ဖြစ်တယ်ဆိုတော့ ဒါတောင်မှ ဒီရပ်ကွက်အလိုက်စစ်လိုက်တာပေါ့လေ။ ဆက်ပြီးတော့ စစ်မယ်ဆိုရင် positive ဘယ်လောက် ထွက်လာမဲဆိုတာ ကျမတို့ မသိသေးဘူး။ ကျမထင်တာတော့ များလာလိမ့်မယ်။ ဘာဖြစ်လို့လဲဆိုတော့ သက်ကြီးရွယ်အိုရော၊ ကလေးတွေကော နေမကောင်းဖြစ်တယ်။ ဒီတခေါက်ဖြစ်တာက ဇူလိုင်တုန်းကနဲ့မတူဘူး။ အသက်ကြီးသူဖြစ်ဆိုရင် နည်းနည်းလေးစိုးရိမ်ရတဲ့ဟာပေါ့။ ” 

ပါကထောင် အိုင်ဒီပီစခန်းမှာ လမ်းပန်းဆက်သွယ်ရေးအခက်အခဲကြောင့် လူသားချင်းစာနာထောက်ထားမှု အကူအညီ မရတာ ၃ လလောက်ရှိပြီဖြစ်ပြီး အစားအသောက်ခဲနေသလို ၊ လက်ရှိ ကိုဗစ်-၁၉ ရောဂါကြောင့် ပိုပြီး အခက်အခဲဖြစ်နေကြရပါတယ်။

ကချင်လူမှုရေးအဖွဲ့က ဒေါ်မေရီထောင်က “ အခုလောလောဆယ် နံပါတ် တစ်ဦးစားပေးကတော့ positive ဖြစ်တဲ့ လူနာတွေ ရယ်၊ အိုင်ဒီပီစခန်းမှာရှိတဲ့ အိုင်ဒီပီအားလုံးအတွက် အစားသောက်လိုအပ်တာရှိတယ်။ ပြီရင် ဆေးဝါးပေါ့။ ပြီးရင် အသက်ကြီးတဲ့လူနဲ့ ကလေးတွေအတွက် အဟာရဖြစ်စေမယ့်ဟာတွေလိုအပ်တယ်။ ”လို့ပြောပါတယ်။

အလားတူပဲ ပါကထောင်းအိုင်ဒီပီစခန်းနဲ့ ဘေးပတ်ဝန်ကျင်က ရွာတွေလည်း ကိုဗစ်-၁၉ ရောဂါ ကူးစက်နေကြောင်းလည်း ပြောပါတယ်။

ဒါ့အပြင် တရုတ်နယ်စပ်မှာလည်း နယ်စပ်ဂိတ်တွေအကုန်ပိတ်ထားတဲ့အတွက် အစားသောက် ဝယ်ယူဖို့ ခက်ခဲသလို ဈေးလည်း အဆမတန်ကြီးမြင့်နေတတယ်လို့လည်းပြောပါတယ်။

ဒီလိုအလားတူပဲ ကေအိုင်အေ ထိန်းချုပ်နယ်မြေ အင်ဂျင်းယန်မြို့နယ် အင်ဂွမ်းလကျေးရွာမှာလည်း ကိုဗစ်ကူးစက်မှုတွေ မြင့်တက်နေပြီး အဆိုပါ ကျေးရွာရှိ အထက်တန်းကျောင်းမှာလည်း ကျောင်းသား ၈၀၀ ကျော်ထဲက ၄၅၀ ခန့်တွင် ကိုဗစ်ပိုးတွေ့ရှိတဲ့အနေအထားမှာရှိနေပါတယ်။ 

1 month Ago

July 30, 2021

တရုတ်-မြန်မာနယ်စပ် ဝမ်တိန်မြို့ကို Lockdown ဖြေလျှော့ပြီး Stay at Home သတ်မှတ်

တရုတ် - မြန်မာနယ်စပ် ရွှေလီမြို့နယ် ဝမ်တိန်မြို့ကို ဇူလိုင်လ ၂၉ ရက်နေ့ကစပြီး Lockdown ဖြေလျှော့ကာ Stay at Home အဖြစ် သတ်မှတ်လိုက်တယ်လို့ ဝမ်တိန် ကိုဗစ်-၁၉ ကူးစက်ရောဂါ ကွယ်တားဆီးရေးဌာနက အသိပေးကြေညာလိုက်ပါတယ်။

ဝမ်တိန် ရန်ကွမ်းရွှေ့အန်း ဧရိယာနဲ့ ၇.၀၈ မှာ ကွာရန်တင်းဝင်နေတဲ့ သူတွေ Stay at Home အဖြစ် ဆက်လက်နေထိုင်ရမယ်လို့ ဖော်ပြထားပါတယ်။

Stay at Home ကာလအတွင်း မည်သူမှ ဝမ်တိန်မြို့မှ ထွက်ခွာခွင့်မပြုကြောင်း၊ အရေးပေါ်ကိစ္စကြောင့် ထွက်ရမယ်ဆိုပါက ၄၈ နာရီ အတွင်း စစ်ဆေးထားတဲ့ ပိုးကင်းစင်ကြောင်း လက်မှတ်၊ မှတ်ပုံတင်၊ စာရွက်စာတမ်း မိတ္တူတွေနဲ့ ကိုယ်သွားမယ့်နေရာစတဲ့ အကြောင်းပြချက် ခိုင်ခိုင်လုံလုံ သက်ဆိုင်ရာကို တင်ပြရမှာဖြစ်ပြီး ကိုဗစ်ကပ်ရောဂါ ကာကွယ် ထိန်းချုပ်ရေးဌာနက စိစစ်အတည်ပြုချက်ရမှ ထွက်ခွာခွင့်ပြုမယ်လို့ ပါရှိပါတယ်။

ဝမ်တိန်ကို ဝင်ရောက်မယ့်သူတွေလည်း အလားတူအထောက်အထားတွေ ပြရမှာဖြစ်ပြီး စီးပွားရေးလုပ်ငန်းရှင်တွေအနေနဲ့ လုပ်ငန်းလိုင်စင်၊ အိမ်ပိုင်အထောက်အထား၊ အိမ်ထောင်စု စာရင်း၊ အိမ်ငှားဖြစ်ပါက အငှားစာချုပ် စတဲ့ အထောက်အထား တစ်မျိုးမျိုးနဲ့ ၇၂ နာရီအတွင်း ပိုး စစ်ထားတဲ့ ပိုးကင်းစင်ကြောင်း ဆေးလက်မှတ်၊ သွားရောက်ရတဲ့အကြောင်းအရင်း တင်ပြရမှာပါ။

ဝမ်တိန်ဒေသမှ ရွှေလီမြို့နယ်နဲ့ အခြား မြို့တွေကို ကုန်မျိုးစုံ တင်ပို့၊ တင်သွင်းမယ်ဆိုရင် ဟိုင်းဝေးလမ်းမကြီး ဖြစ်တဲ့ ဟယ့်ရှန်း ဂိတ်ကနေသာ ယာဉ် အစားထိုးမောင်းနှင် စနစ်နဲ့ ဝင်၊ ထွက်ဖို့၊ ကိုဗစ် ကာကွယ်ရေးဆိုင်ရာ ကျန်းမာရေးပစ္စည်းတွေကို သတ်မှတ်ထားတဲ့ စည်းကမ်းနဲ့ အညီ တင်သွင်းဖို့ ပါရှိပါတယ်။

ဒါ့အပြင် ဝမ်တိန်မှာ လက်ရှိ နေထိုင်သူတွေအပါအဝင် ပြင်ပမှ ရောက်ရှိလာသူအားလုံး ဧည့်စာရင်းတိုင်ရမှာဖြစ်ပြီး ဧည့်စာရင်းမတိုင်ထားတဲ့သူဆီမှာ ပိုးတွေ့ပြီး ကူးစက်စေပါက ဥပဒေနဲ့အညီ အရေးယူသွားမယ်လို့ ဖော်ပြထားပါတယ်။

ဆေးဆိုင်တွေမှာ အဖျားကျဆေး၊ အပူကျဆေး၊ ပိုးသတ်ဆေးလိုမျိုး၊ ချောင်းဆိုးပျောက်ဆေးနဲ့ ပတ်သက်တဲ့ ဆေးမျိုး လုံးဝ ရောင်းချခွင့်မပြုကြောင်း၊ ကိုဗ်စ-၁၉ ရောဂါလက္ခဏာ ဖြစ်လာပါက သက်ဆိုင်ရာကို သတင်းပို့ပြီး ဆေးစစ်ရမယ်လို့ ဆိုပါတယ်။

ဝမ်တိန်ကို ဇူလိုင်လ ၈ ရက်ညက လော့ဒေါင်းချခဲ့တာဖြစ်ပြီး ကျင်းစန်းကျော့ -  ဝမ်တိန် နှစ်နိုင်ငံ ကုန်သွယ်ရာဂိတ်ကိုတော့ ဇူလိုင်လ ၈ ရက်နေ့ နေ့လည်ခန့်က ကပ်ရောဂါ အခြေအနေကြောင့် တရုတ်ကဘက်က ရက်အကန့်အသတ် မရှိပိတ်ထားခဲ့ပေမယ့် ဇူလိုင်လ ၂၃ ရက်ကစ ဝမ်တိန်ဘက်က ကုန်တင်ပြီး၊ အခွန်ဆောင်ပြီး မြန်မာကုန်တင်ကားတွေကို တစ်ပတ် သုံးကြိမ်၊ တစ်ကြိမ်ကို အစီး ၂၀ ဝန်းကျင် ထွက်ခွင့်ပြုပေးနေတာ ဖြစ်ပါတယ်။

တရုတ် သတင်းတွေအရ ဇူလိုင်လ ၂၉  ည ၂၄ နာရီထိ ရွှေလီ၊ ဂျယ်ဂေါင် အပါအဝင် ထပ်တိုးလူနာမရှိကြောင်း၊ လက်ရှိ ယူနန်ပြည်နယ်အတွင်း ကုသမှုခံယူနေတဲ့ ပိုးတွေ့ လူနာ ၃၆၆ ဦးရှိပြီး ပြည်တွင်း ကူးစက်မှု ၆၃ ဦး၊ ပြည်ပ ကူးစက်မှု ၃၀၃ ဦး ရှိကာ သေဆုံးသူ မရှိကြောင်း သိရပါတယ်။

Pra Jaw

4 months Ago
More News
Up