KBZ

October 9, 2021

လျှပ်စစ်မီတာခကို Mytel Pay နှင့် ဘဏ် ၅ ခုအပါအဝင် Payment ၉ မျိုးဖြင့် ပေးဆောင်နိုင်

ပြည်သူတွေအနေနဲ့ လျှပ်စစ်မီတာခကို Mytel Pay နဲ့ ပုဂ္ဂလိကဘဏ် ၅ ခု အပါအဝင် Payment ၉ မျိုးနဲ့ ပေးဆောင်နိုင်ကြောင်း ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းက ကြေညာထားပါတယ်။

အဆိုပါ ကြေညာချက်ထဲမှာတော့ ပြီးခဲ့တဲ့လတွေအလိုက် ပေးဆောင်ရမယ့် ဓာတ်အားခ ကျသင့်ငွေတွေကို နောက်ဆုံးထားပေးဆောင်ရမယ့် ရက်တွေနဲ့ အသိပေးထားခဲ့ကာ ပုဂ္ဂလိကဘဏ် ဘဏ် ၅ ခုဖြစ်တဲ့ မြန်မာအရှေ့တိုင်းဘဏ်(MOB)၊ ယူအေဘီဘဏ်(UAB)၊ သမဝါယမဘဏ်(CB)၊ ကမ္ဘောဇဘဏ်(KBZ)၊ ဧရာဝတီဘဏ်(AYA)တို့အပါအဝင် Internet Wallet Myanmar (OK$)၊ Mytel Wallet Myanmar International (MytelPay)၊ Myanmar Mobile Money (MMM)၊ Myanmar Computer Co.,Ltd တို့ကတဆင့်လည်း ပေးဆောင် နိုင်တယ်လို့ ဆိုပါတယ်။

အန်အယ်လ်ဒီအစိုးရလက်ထက်ကတော့ ကိုဗစ်-၁၉ ကပ်ဘေးကြောင့် စီးပွားရေး အခက်အခဲနဲ့ ကြုံတွေ့နေရတဲ့ ပြည်သူတွေအတွက် မီတာခတွေ လျှော့ပေးခဲ့ပြီး လက်ရှိ အမျိုးသားညီညွတ်ရေး အစိုးရ (NUG) ကလည်း အိမ်သုံးလျှပ်စစ်မီတာခတွေကို ခြွင်းချက်မရှိ အခမဲ့ ကင်းလွတ်ခွင့်ပြုကြောင်းနဲ့ ပြည်သူတွေ လျှပ်စစ်မီတာခ ပေးဆောင်ရန်မလိုဘဲ ကောက်ခံရင် နိုင်ငံတော်ပုန်ကန်မှုမြောက်ကြောင်းနဲ့ အမည်ပျက်စာရင်းသွင်းသွားမှာ ဖြစ်ကြောင်း ကြေညာချက် ထုတ်ပြန်ထားပါတယ်။

ဒါပေမဲ့ အကြမ်းဖက်အာဏာသိမ်း စစ်ခေါင်းဆောင်ကတော့ ပြည်လူလူထုတွေထံကနေ လျှပ်စစ်ဓာတ်အားခတွေ သတ်မှတ်နှုန်းထားနဲ့ သတ်မှတ်ချိန်အလိုက် ကောက်ခံရရှိရေး ဆောင်ရွက်ကြဖို့ ညွှန်ကြားထားတာ ဖြစ်ပါတယ်။

ပြည်သူတွေကတော့ ဒီအခွန်အခတွေဟာ နိုင်ငံ့ဖွံ့ဖြိုးတိုးတက်မှုအတွက်မဟုတ်ဘဲ လူထုကို အကြမ်းဖက် ပစ်သတ်မှုတွေ လုပ်ဆောင်နေတဲ့ စစ်အုပ်စုရဲ့ အသုံးစရိတ်ဖြစ်မှာမို့ လျှပ်စစ်မီတာခ မပေးသွင်းကြရေး လှုပ်ရှားမှုမှာ ပါဝင်နေကြတာ ဖြစ်ပါတယ်။

2 months Ago

August 9, 2021

KPay နှင့်ဘဏ်အကောင့်အချို့ပိတ်ခံရပြီးနောက် KBZ ဘဏ်အဆင့်သတ်မှတ်ချက်ကျဆင်း

မြန်မာပြည်တွင်း အကူအညီလိုအပ်နေတဲ့ပြည်သူတွေအတွက် အလှူခံပေးသူတွေရဲ့KPay အကောင့်နဲ့ KBZ ဘဏ်အကောင့်တချို့ကိုKBZ ဘဏ်က  ထိန်းချုပ်ပိတ်ထားလိုက်ပြီးတဲ့ နောက်မှာ Google PlayStore နဲ့ iOS Appstore တွေမှာ KBZ Pay ရဲ့ rating တွေဟာ ရက်ပိုင်းအတွင်းမှာ သိသိသာသာ ကျဆင်းသွားပါတယ်။ 

အရင်က Rating 4 အထက်မှာရှိခဲ့တဲ့ KPay ဟာ Google Playstore မှာ Rating 1.1 ပဲ ရှိတော့သလို iOS Appstore မှာတော့ Rating 3 ရှိနေပါသေးတယ်။ 

အခုလို Rating လျော့ကျတာဟာ အထွေအထူး သိသိသာသာဘဏ်ကို မထိခိုက်ပေမဲ့ အဲဒီလို လျော့ကျတဲ့ Negative Review တွေဟာ အသုံးပြုသူတွေရဲ့ အသံတွေကို ကိုယ်စားပြုတဲ့သဘော ဖြစ်ပါတယ်။

ပြီးခဲ့တဲ့ ရက်ပိုင်းအတွင်းမှာ စစ်ဘေးရှောင်တွေ၊ CDM တွေနဲ့  ပရဟိတလုပ်ငန်းတွေကို လှူဒါန်းနေတဲ့ KPay၊ Wave Money ၊ KBZ ဘဏ်အသုံးပြုသူတချို့ရဲ့ အကောင့်တွေ ပိတ်ခံလိုက်ရတာ ဖြစ်ပါတယ်။ ကျပ်သိန်းထောင်ချီရှိနေတဲ့ ဘဏ်အကောင့်တချို့လည်း အပိတ်ခံခဲ့ရတယ်လို့ ဆိုပါတယ်။ 

ဒီလို အကောင့်တွေ အပိတ်ခံရပြီးတဲ့နောက်မှာ ဒီမိုကရေစီအရေးလှုပ်ရှားသူတွေ၊ ဘဏ်အသုံးပြုသူတွေဟာ KBZ Pay ကို Rating ကျစေဖို့ Appstore တွေမှာ ကြယ်ပွင့်တစ်ပွင့်ပဲ ပေးတာ၊ KBZ ဘဏ်ကို စစ်ကောင်စီက ထိန်းချုပ်ထားကြောင်း၊ မယုံကြည်ရကြောင်း မှတ်ချက်ရေးတာတွေ လုပ်လာကြတာကို တွေ့ရပါတယ်။ 

အခုလက်ရှိ Google Playstore က KBZ Pay ရဲ့ အောက်မှာ မှတ်ချက်ရေးသားသူပေါင်း လေးသောင်းကျော်ရှိနေပါတယ်။  KBZ ဘဏ်ဟာ ပြည်တွင်း ဘဏ်လုပ်ငန်းဈေးကွက်မှာ ဈေးကွက် ဝေစု ၄၀ ရာခိုင်နှုန်းကျော်ရရှိထားတဲ့ ပုဂ္ဂလိကဘဏ်တစ်ခုလည်းဖြစ်ပါတယ်။

4 months Ago
Up