Fever Clinic ဆေးခန်း

A d v e r t i s e m e n t With Us

January 8, 2021

မုံရွာမြို့ Fever Clinic ဆေးခန်းကို ရက်တိုးမြင့်ဖွင့်လှစ်

စစ်ကိုင်းတိုင်းဒေသကြီး လူငယ်ရေးရာကော်မတီရုံးစိုက်ရာ လူငယ်စင်တာမှာ ဖွင့်လှစ်ထားတဲ့ မုံရွာမြို့ရဲ့ Fever Clinic ဆေးခန်းကို အခုရက်ပိုင်းအတွင်း အနံ့ပျောက်လို့ လာရောက်ပြသူတွေ များလာလို့   ဆေးခန်းဖွင့်ရက်ကို တိုးမြှင့်ဖွင့်လှစ်ထားပါတယ်။ "ဟုတ်ကဲ့ Fever Clinicဆေးခန်းကို အခုရက်ပိုင်းအတွင်း အနံ့ပျောက်လူနာတွေများလို့ ဆေးခန်းဖွင်ရက်ကို တစ်ပတ် ၅ ဖွင့်တာကနေ ၆ အထိ တိုးမြှင့်ဖွင်လှစ်လိုက်ရတာပါ”လို့ စစ်ကိုင်းတိုင်း လူငယ်ရေးရာကော်မတီ ဦးဟိန်းမင်းထက်က ပြောပါတယ်။ Fever Clinic ဆေးခန်းကို ဒုတိယအကြိမ်အဖြစ် စက်တင်ဘာလ ၂၁ ရက်နေ့က ပြန်လည် ဖွင့်လှစ်ခဲ့ပြီး ဇန်နဝါရီ ၆ ရက်အထိ လာရောက်ပြသသူ ၃၄၄ ဦးရှိကာ အဲဒီထဲက ပိုးတွေ့လူနာ ၁၀ ဦးအထိ ရှိတယ်လို့လည်း စစ်ကိုင်းတိုင်းဒေသကြီးလူငယ်ရေးရာကော်မတီရဲ့ စာရင်းတွေအရ သိရပါတယ်။ "Fever Clinic ဆေးခန်းမှာ အဓိကရင်ဆိုင်နေရတဲ့ အခက်အခဲကတော့ ကိုဗစ်ရောဂါရှိမရှိ စစ်ဆေးပေးတဲ့နေရာလို့ ထင်နေကြတယ်။ အဓိကကတော့ ကားသမားတွေရယ်၊ ကိုယ့်ကိုယ်ကိုယ် သံသယရှိလို့လာကြတယ်။ သူတို့က ကျနော်တို့ကို ကိုဗစ်ရောဂါရှိမရှိစစ်ဆေးပေးပို့၊ ခရီးသွားချင်သူဆို ကိုဗစ်ရောဂါပိုးမရှိကြောင်း ထောက်ခံစာရေးပေးဖို့ အတင်အကြပ်ခိုင်းတာတွေနဲ့ လည်း ကြုံရတယ်”လို့ ဦးဟိန်းမင်းထက်က ပြောပါတယ်။ အဲဒီ Fever Clinic ဆေးခန်းကို မုံရွာမြို့ ဒေါနခြံရပ်ကွက် လူငယ်စင်တာမှာ ဖွင့်လှစ်ထားတာ ဖြစ်ပြီး တနင်္ဂနွေနေ့တစ်ရက်တည်းဆေးခန်းပိတ်မှာဖြစ်ကာ ကျန်နေ့တွေမှာ မနက် ၉ နာရီက နေ့လယ် ၁၁ နာရီအချိန်ထိ ဖွင့်လှစ်ကုသပေးနေပါတယ်။ ကိုဗစ်ပထမလှိုင်းကာလအတွင်း Fever Clinic ဆေးခန်းကို မေလ ၁ ရက်နေ့က စတင်ဖွင့်လှစ်ခဲ့ပြီး ရောဂါကူးစက်မှုတွေကျဆင်းသွားတဲ့အတွက် ဇူလိုင်လ ၂ ရက်နေ့မှာ ခေတ္တခဏ ရပ်နားထားခဲ့ပါတယ်။ တစ်ကျော့ပြန်လည် ကူးစက်မှုနှုန်း မြင့်မားလာတဲ့အတွက် စက်တင်ဘာ ၂၁ ရက်နေ့က Fever Clinic ကိုပြန်လည်ဖွင့်လှစ်ခဲ့တာဖြစ်ပါတယ်။ Fever Clinic Monywa ကို စစ်ကိုင်းတိုင်းဒေသကြီးအစိုးရအဖွဲ့ရဲ့ လမ်းညွှန်မှုနဲ့အတူ ဆရာဝန်များအသင်း (မုံရွာ)၊ စစ်ကိုင်းတိုင်းဒေသကြီး လူငယ်ရေးရာကော်မတီ၊ SAVE MONYWA နဲ့ မုံရွာတက္ကသိုလ်ကျောင်းသားများ သမဂ္ဂတို့က ပူးပေါင်းပြီး ဖွင့်လှစ်ထားခြင်းဖြစ်ပါတယ်။ ဖျားတာ၊ ချောင်းဆိုးတာ၊ လည်ချောင်းနာတာ၊ အသက်ရှုကြပ်တာတွေအပြင် သာမန်ဖျားနာတာတွေအတွက် ဖွင့်လှစ်ထားတာဖြစ်ပြီး ဆေးခန်းမှာ အခမဲ့ လက်ခံကုသပေးနေတာပါ။ ဆေးခန်းပြလိုသူတွေအနေနဲ့ Hotline Number 09-660010000 သို့ ဆက်သွယ်ပြီး ကြိုတင်စာရင်းပေးသွင်းရမှာဖြစ်ကာ မပြခင်နေ့ မနက် (၈) နာရီကနေ (၁၂) နာရီနှင့် ညနေ (၄) နာရီကနေ ည (၉) နာရီထိ ကြိုတင် စာရင်းပေးနိုင်မှာလည်းဖြစ်ပါတယ်။ မုံရွာမြို့နယ်မှာ ကိုဗစ်-၁၉ အတည်ပြုလူနာ ဇန်နဝါရီ ၆ ရက်အထိ  ၁၈၂၁ ဦး အထိရှိပြီဖြစ်ပါတယ်။ သတင်း - ကျော်မင်းသန့်
2 months Ago

May 29, 2020

မကွေးမြို့တွင် အခမဲ့ကုသနိုင်သည့် Fever Clinic ဆေးခန်းဖွင့်လှစ်

လူထုအခြေပြု အခမဲ့ဖျားနာကုဆေးခန်း"Fever Clinic" တစ်ခုကို မကွေးမြို့ ကရုဏာရှင်များ နာရေးကူညီမှုအသင်းမှာ မေလ ၂၈ ရက်က စတင်ဖွင့်လှစ်လိုက်ပါတယ်။ မြန်မာနိုင်ငံဆရာဝန်များအသင်း မကွေးတိုင်းဒေသကြီး ဥက္ကဋ္ဌ ဖြစ်တဲ့ မကွေး ဆေးတက္ကသိုလ် ပါမောက္ခချုပ် ဒေါက်တာဌေးလှက "ကိုဗစ်-၁၉ ကာလမှာ ဖျားနာတဲ့သူတွေကို ကုသရာမှာ အဆင်ပြေနိုင်အောင် ပြင်ပမှာရှိတဲ့ ဆရာဝန်တွေ၊ စေတနာ့ဝန်ထမ်းတွေစုပေါင်းပြီး ဒီဆေးခန်းလေး ဖွင့်လှစ်ဖြစ်တာပါ။ တကယ်လို့ ကိုဗစ်-၁၉ ရောဂါပိုးရှိသူ ပါဝင်လာခဲ့ရင်လည်း ရောဂါကူးစက်မှုမရှိအောင် စနစ်တကျစီမံထားပါတယ်။ အစိုးရ ဌာနဆိုင်ရာ ဆရာဝန်တွေ ကျန်းမာရေးဝန်ထမ်းတွေကို အထောက်ကူပြုနိုင်ဖို့ ရည်ရွယ်ပြီးတော့ မြန်မာနိုင်ငံဆရာဝန်အသင်း မကွေးတိုင်းဒေသကြီးက ဦးဆောင်ဖွင့်လှစ်ပေးခဲ့တာပါ"လို့  ဒီဗွီဘီကို ပြောပါတယ်။ ဆေးခန်းကို အပတ်စဉ် တနင်္လာ၊ ကြာသပတေး၊ စနေနေ့တွေမှာ ဖွင့်လှစ်မှာဖြစ်ပြီး ဆရာဝန် တစ်ဦး၊ ဆရာမ တစ်ဦး၊ ကြက်ခြေနီ ၃ ဦးနဲ့ အရန်မီးသတ်တပ်ဖွဲ့ဝင် ၃ ဦး တာဝန်ထမ်းဆောင်ကြမှာပါ။ မိုးရာသီကာလဖြစ်တဲ့ ဇွန်၊ ဇူလိုင်လတွေမှာ အဖျားရောဂါတွေဝင်လာနိုင်တာမို့ လူနာ အရေအတွက်များလာပါက ဆေးခန်းဖွင့်ရက်နဲ့ တာဝန်ထမ်းဆောင်မှုကို တိုးမြှင့်လုပ်ဆောင်သွားမယ်လို့  မြန်မာနိုင်ငံဆရာဝန်များအသင်း၊မကွေးတိုင်းဒေသကြီး တွဲဘက်အတွင်းရေးမှူး ဒေါက်တာဖြူဖြူထွန်းက ပြောပါတယ်။ အပြင်ဆေးခန်းတွေပိတ်ထားတာကြောင့် ပြည်သူတွေကို အလွယ်တကူ ကုသပေးနိုင်အောင် Social Distancing စနစ်နဲ့ ကိုဗစ်-၁၉ ရောဂါကာကွယ်ရေး အစီအမံတွေပြုလုပ်ပြီး  ဆေးခန်းဖွင့်လှစ်ပေးထားတာပါ။ ကိုဗစ်-၁၉ သံသယလူနာတွေရှိပါက ကာကွယ်ရေးဝတ်စုံ လူနာတင်ယာဉ်တွေ စီမံထားရှိပြီး အဓိကဆေးရုံ ၃ ရုံအနက် လူနာဆန္ဒပြုတဲ့ ဆေးရုံကိုပို့ ဆောင်ပေးမှမယ်လို့ဆိုပါတယ်။ မကွေးဆေးတက္ကသိုလ်၊ ဆေးပညာဌာန ပါမောက္ခ  ဒေါက်တာသိန်းမြင့်က "ဖျားနာတဲ့ လူနာတွေအနေနဲ့ Quarantine ဝင်ရမှာစိုးရိမ်ပြီး အစိုးရဆေးရုံတွေသွားရောက် မပြသတာတွေရှိနိုင်တယ်။ လက်ရှိကာလမှာတော့ အဖျားရောဂါကို ကိုဗစ်-၁၉ သံသယနဲ့ပဲ ကြည့်မှာဖြစ်လို့ ရောဂါကာကွယ်ရေးအတွက် အစီမံတွေလုပ်ဆောင်ထားပြီး သက်ဆိုင်ရာ ဆေးရုံတွေကိုစနစ်တကျလွှဲပြောင်းနိုင်အောင် စီစဥ်ထားပါတယ်။ ကိုဗစ်-၁၉ မဟုတ်တဲ့ လူနာတွေကို ရောဂါကူးစက်မှုမရှိအောင် ဂရုတစိုက် ကုသပေးမှာပါ။ အများနဲ့စာရင် နောက်ကျတယ်ဆိုပေမဲ့  နည်းပညာပိုင်း၊ လုံခြုံရေးပိုင်းတွေ စနစ်တကျ ဆောင်ရွက်ထားပြီး သင်ကြားပေးထားတဲအတိုင်း လိုက်နာမယ်ဆိုရင် ကိုဗစ်-၁၉ လူနာအစစ်လာရင်တောင် လူနာအတွက်ရော ကုသတဲ့အဖွဲ့ အတွက်ပါ ရောဂါကူးစက်မှု လုံးဝမရှိနိုင်ပါဘူး” လို့ ပြောပါတယ်။ လက်ရှိအချိန်မှာတော့ ပြင်ပမှာရှိတဲ့ ဆရာဝန် ၉ ဦး၊ သူနာပြုဆရာမ ၆ ဦး၊ ကြက်ခြေနီ၊ မီးသတ်၊ ပရဟိတအဖွဲ့တွေကို စနစ်တကျ သင်တန်းပေးကာ အလှည့်ကျစနစ်နဲ့ တာဝန်ယူကုသပေးမှာ ဖြစ်တယ်လို့  မြန်မာနိုင်ငံဆရာဝန်များအသင်း၊ မကွေးတိုင်းဒေသကြီးကနေ သိရပါတယ်။ သတင်း-မင်းထီး
9 months Ago
Up