အကြမ်းဖက်မှုနဲ့ အားပေးလှုံ့ဆော်မှု မူဝါဒစံနှုန်းတွေကို ဖောက်ဖျက်ပြီး အာဏာသိမ်းစစ်ကောင်စီရဲ့ သတင်းအာဘော်တွေကို ဖော်ပြနေတဲ့ မြန်မာ့အသံနဲ့ ရုပ်မြင်သံကြား MRTV နဲ့ MRTV Live စာမျက်နှာတို့ကို ဒီနေ့ ဖေ့စ်ဘွတ်ခ် ဆိုရှယ်မီဒီယာပလက်ဖောင်းကနေ ဖယ်ရှားလိုက်ပါတယ်။
ဒါနဲ့ပတ်သက်လို့ “ကမ္ဘာတဝန်းလုံးဆိုင်ရာ မူဝါဒတွေနဲ့အညီ Facebook မှာ တားမြစ်ထားတဲ့ အကြမ်းဖက်မှုနဲ့ အားပေးလှုံ့ဆော်မှု မူဝါဒအပါအဝင် လူမူစံနှုန်းတွေကို ထပ်ကာထပ်ကာ ဖောက်ဖျက်မှုတို့ကြောင့် MRTV နဲ့ MRTV Live စာမျက်နှာတွေကို Facebook ကနေ ဖယ်ရှားလိုက်ပါတယ်” လို့ ဖေ့စ်ဘွတ်ခ် ကုမ္ပဏီရဲ့ အာရှပစိဖိတ်ဒေသ ဖွံ့ဖြိုးဆဲနိုင်ငံများ၏ ပြည်သူ့ရေးရာ မူဝါဒဆိုင်ရာ ဒါရိုက်တာ Rafael Frankel (ရာဖယ်လ် ဖရန်ကယ်လ်)က ထုတ်ပြန်ပြောကြားပါတယ်။
ဖေဖော်ဝါရီ ၂၁ ရက်နေ့တုန်းကလည်း တပ်မတော်ရဲ့ သတင်းတွေကို အစဉ်တစိုက် ထုတ်ပြန်နေတဲ့ တပ်မတော် သတင်းမှန်ပြန်ကြားရေး ဖေ့စ်ဘွတ်ခ်စာမျက်နှာကို “အကြမ်းဖက်မှု လှုံ့ဆော်ခြင်းနဲ့ ထိခိုက်မှုဖြစ်အောင် စုစည်းကြံစည်ခြင်း မူဝါဒတွေကို ထပ်ကာထပ်ကာ ဖောက်ဖျက်မှုတို့ကြောင့်” ဖေ့စ်ဘွတ်ခ်ကနေ ဖယ်ရှားခဲ့ပါသေးတယ်။
စစ်အာဏာသိမ်းပြီးနောက်ပိုင်း မြန်မာနိုင်ငံမှာ ဖေ့စ်ဘွတ်ခ်ကို ပို့ဆောင်ရေးနဲ့ ဆက်သွယ်ရေးဝန်ကြီးဌာန ညွှန်ကြားချက်နဲ့ ဖေဖော်ဝါရီ ၄ ရက်နေ့ကတည်းက ပိတ်ပင်ထားခဲ့ပေမယ့် တပ်မတော်သတင်းမှန်နဲ့ MRTV စာမျက်နှာတွေကို ဆက်လက်သုံးစွဲခဲ့တဲ့အပြင် တိုက်ရိုက်ထုတ်လွှင့်မှုတွေလည်း ပြုလုပ်ခဲ့ပါတယ်။
စစ်တပ်က အာဏာသိမ်းပြီးနောက်ပိုင်း သတင်းတွေ ပုံမှန်မတင်နိုင်တော့ဘဲ သတင်းမှားဖြစ်တယ်ဆိုတဲ့ ပို့စ်တွေကိုပဲ တင်နေခဲ့တာပါ။
မြန်မာနိုင်ငံမှာ ဖေဖော်ဝါရီ ၁ ရက်နေ့ကစလို့ စစ်အာဏာသိမ်းပြီးနောက် အာဏာသိမ်းစစ်ကောင်စီရဲ့ သတင်းအာဘော်များကို အဓိကထုတ်ပြန်နေတဲ့ တပ်မတော် သတင်းမှန်ပြန်ကြားရေးအဖွဲ့ ဖေ့စ်ဘွတ်စာမျက်နှာကို ဖေဖော်ဝါရီလ ၂၁ ရက်နေ့မှာ ဖေ့စ်ဘွတ်ခ်က ဖယ်ရှားလိုက်ပါတယ်။
“ကမ္ဘာတဝန်းလုံးဆိုင်ရာ မူဝါဒနဲ့အညီ ဖေ့စ်ဘွတ်ခ် လူမှုစံနှုန်းမှာ တားမြစ်ထားတဲ့ အကြမ်းဖက်မှု လှုံ့ဆော်ခြင်းနဲ့ ထိခိုက်မှုဖြစ်အောင် စုစည်းကြံစည်ခြင်း မူဝါဒတွေကို ထပ်ကာထပ်ကာ ဖောက်ဖျက်မှုတို့ကြောင့် တပ်မတော် သတင်းမှန်ပြန်ကြားရေး စာမျက်နှာကို ဖေ့စ်ဘွတ်ခ်ကနေဖယ်ရှားလိုက်ပါတယ်” လို့ ဖေ့စ်ဘွတ်ခ်ကုမ္ပဏီ ပြောရေးဆိုခွင့်ရှိသူဦးက ပြောဆိုဖြေကြားထားပါတယ်။
အရင်ကလည်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ရဲ့ ဖေ့စ်ဘွတ်ခ်စာမျက်နှာအပါအဝင် တပ်မတော်နဲ့ဆက်စပ်တဲ့ ဖေ့စ်ဘွတ်ပေ့ချ်၊ ဂရုနဲ့ ပါစင်နယ်အကောင့်တွေကိုလည်း ဖေ့စ်ဘွတ်ခ်ကနေ ဖယ်ရှားခဲ့ဖူးပါတယ်။
ဖေ့စ်ဘွတ်ခ်ရဲ့ မူဝါဒအရ စာမျက်နှာတစ်ခုဟာ သတ်မှတ်ထားတဲ့ သတိပေးမှုအကြိမ် အရေအတွက် ကျော်လွန်သွားရင် အသုံးပြုမရနိုင်သလို စစ်တပ်အာဏာသိမ်းပြီး နောက်ပိုင်းမှာလည်း တပ်မတော်သတင်းမှန်ပြန်ကြားရေး စာမျက်နှာဟာ မူဝါဒတွေကို ထပ်ကာထပ်ကာ ချိုးဖောက်ခဲ့တယ်လို့လည်း စုံစမ်းသိရပါတယ်။
လက်ရှိမြန်မာနိုင်ငံမှာလည်း ပို့ဆောင်ရေးနဲ့ ဆက်သွယ်ရေးဝန်ကြီးဌာနက ညွှန်ကြားချက်နဲ့ ဖေ့စ်ဘွတ်ခ်ကို အခုထိ တားဆီးပိတ်ပင်ထားပေမယ့် သုံးစွဲသူတွေက နည်းပညာအသုံးပြု သုံးစွဲနေကြသလို အာဏာသိမ်းစစ်ကောင်စီရဲ့ တပ်မတော်သတင်းမှန်ပြန်ကြားရေး စာမျက်နှာကနေ သတင်းတွေအပြင် တိုက်ရိုက်ထုတ်လွှင့်မှုတွေလည်း ပြုလုပ်ခဲ့ပါတယ်။
လက်ရှိ တစ်နေ့ကို ညပိုင်း အင်တာနက် ၈ နာရီ ဖြတ်တောက်နေတဲ့ မြန်မာနိုင်ငံမှာ ဖေ့စ်ဘွတ်ခ်အပြင် တခြားဆိုရှယ်မီဒီယာတွေဖြစ်တဲ့ တွစ်တာ၊ အင်စတာဂရမ်၊ ယူကျု့ပလက်ဖောင်းတွေလည်း ပိတ်ပင်ခံထားရပါတယ်။
ဒါ့အပြင် မြန်မာအာဏာသိမ်းစစ်ကောင်စီတွေက သတင်းမီဒီယာတွေရဲ့ ဝက်ဆိုဒ်တွေ အပါအဝင် ဝက်ဆိုဒ်အများအပြားကိုလည်း ကန့်သတ်ပိတ်ပင်ဖို့ ပြည်တွင်းအင်တာနက်ကုမ္ပဏီတွေကို ညွှန်ကြားထားသလို တပ်မတော်သတင်းမှန်ပြန်ကြားရေးနဲ့ ဆက်နွှယ်တဲ့ dsInfo.org ဝက်ဆိုဒ်အပါအဝင် ဆိုဒ်အတော်များများဟာလည်း ဟက်ကာအုပ်စုတွေရဲ့ ဆိုက်ဘာတိုက်ခိုက်မှုကို ခံခဲ့ရပါတယ်။
