DVB သတင်းထောက်

May 14, 2021

DVB သတင်းထောက်အပါအဝင် ဖမ်းဆီးခံထားရသူအားလုံးကို ချက်ချင်းလွှတ်ရန် အေအိုင်အဖွဲ့ တောင်းဆို

ပြည်မြို့ အခြေစိုက် DVB သတင်းထောက် ကိုမင်းညိုအပေါ် ချမှတ်ထားတဲ့ ထောင်ဒဏ် ၃ နှစ်ပြစ်ဒဏ်ကို ပယ်ဖျက်ပေးဖို့ နိုင်ငံတကာလွတ်ငြိမ်းချမ်းသာခွင့်အဖွဲ့ (အေအိုင်)က မေလ ၁၂ ရက် နေ့စွဲနဲ့ ကြေညာချက်ထုတ်ပြန်တောင်းဆိုပါတယ်။

ကိုမင်းညိုအပါအဝင် ဖမ်းဆီးထိန်းသိမ်းခံထားရတဲ့ သတင်းထောက်တွေ၊ တက်ကြွလှုပ်ရှားသူတွေ၊ လူ့အခွင့်ရေးကာကွယ်သူတွေနဲ့ စစ်အာဏာသိမ်းမှုကို ငြိမ်းချမ်းစွာဆန့်ကျင် ဆန္ဒပြလို့ ထောင်ချခံနေရသူအားလုံးကို ချက်ချင်းပြန်လွှတ်ပေးဖို့လည်း တောင်းဆိုပါတယ်။

ကိုမင်းညိုကို ထောင်ဒဏ် ၃ နှစ်ချမှတ်လိုက်တာဟာ မြန်မာနိုင်ငံမှာ ဂျာနယ်လစ်တွေ ထိတ်လန့်စရာဆိုးရွားတဲ့အခြေအနေနဲ့ ရင်ဆိုင်နေရတယ်ဆိုတာကိုပြသလိုက်တာပဲဖြစ်တယ်၊  မြန်မာပြည်မှာ သတင်းသမားတွေဟာ သူတို့ရဲ့အသက်နဲ့ လွတ်လပ်ခွင့်တွေကိုစွန့်ပြီး စစ်တပ်ရဲ့ မတရားဖိနှိပ်မှုတွေကိုဖော်ထုတ်နေတာဖြစ်တယ်၊  စစ်အာဏာပိုင်တွေဟာ သူတို့ကျူးလွန်တဲ့ ရာဇဝတ်မှုတွေကို ဖော်ထုတ်ဖို့ကြိုးစားသူတွေကို ရက်ရက်စက်စက်နှိပ်ကွပ်ဖို့ စိတ်ပိုင်းဖြတ်ထားသူတွေဖြစ်တယ်လို့     အေအိုင်အဖွဲ့ရဲ့  အရှေ့တောင်အာရှနဲ့ အရှေ့အာရှဒေသဆိုင်ရာ ဒါရိုက်တာ Emerlynne Gil က ပြောပါတယ်။  

မြန်မာပြည်မှာ ဖေဖော်ဝါရီ ၁ ရက်နေ့ စစ်အာဏာသိမ်းပြီးကတည်းက  သတင်းသမားတွေ အတော်များများ တရားလက်လွတ်ထိန်းသိမ်းခံ၊ ခြိမ်းခြောက်ခံ၊ ဖမ်းဆီးခံ၊ ပစ်ခတ်ခံခဲ့ရတယ်။  မြန်မာနိုင်ငံမှာ သတင်းအလုပ်ဟာ တရားမဝင်တဲ့ရာဇဝတ်မှုဖြစ်နေခဲ့ပြီး ပြည်ပမှာ စတင်ထူထောင်ခဲ့တဲ့ ဒီဗွီဘီသတင်းဌာနဟာလည်း နောက်တကြိမ် လျှို့ဝှက်မြေအောက် သတင်းဌာနအဖြစ် တွန်းပို့ခံခဲ့ရတယ်လို့ လည်း အေအိုင်အဖွဲ့က ပြောပါတယ်။     

ပြည်မြို့အခြေစိုက် DVB သတင်းထောက် ကိုမင်းညိုကို စစ်အုပ်စုက  ထောင်ဒဏ် ၃ နှစ်ချမှတ်လိုက်တာနဲ့ ပတ်သက်ပြီး ကန့်ကွက်ရှုတ်ချကြောင်း မြန်မာပြည်တွင်းက ဂျာနယ်လစ်ကွန်ရက်တွေကလည်း စုပေါင်းကြေညာထားပါတယ်။ 

ပြည်မြို့မှာ ကျောင်းသားတွေရဲ့ ဆန္ဒပြပွဲ သတင်းယူနေတဲ့ DVB သတင်းထောက်ကိုမင်းညိုကို ရဲနဲ့စစ်တပ်က ရိုက်နှက်ဖမ်းဆီးထားပြီး   မေလ ၁၂ ရက်နေ့မှာ အကြမ်းဖက်စစ်ကောင်စီရဲ့ အကျဉ်းထောင်တွင်းတရားရုံးကနေ ထောင်ဒဏ် ၃ နှစ် အမိန့်ချမှတ်ခဲ့တာပါ။

ကိုမင်းညိုဟာ ပုဒ်မ ၅၀၅(က)နဲ့ တရားစွဲခံခဲ့ရတာဖြစ်ပြီး အာဏာသိမ်း ကာလမှာ စစ်ကောင်စီတရားရုံးက  ပထမဆုံးထောင်ဒဏ်ချတာကို ခံလိုက်ရတဲ့ သတင်းထောက်ဖြစ်ပါတယ်။

2 days Ago

May 13, 2021

DVB သတင်းထောက်ကိုမင်းညိုကိုထောင် ၃ နှစ်ချသည့်အပေါ် သတင်းစာဆရာများ ကန့်ကွက် ရှုတ်ချ

ပြည်မြို့အခြေစိုက် DVB သတင်းထောက် ကိုမင်းညိုကို စစ်အုပ်စုက ထောင် ၃ နှစ်ချလိုက်တာနဲ့ပတ်သက်ပြီး  သတင်းစာဆရာတွေက အပြင်းအထန်ကန့်ကွက်ရှုတ်ချ လိုက်ပါတယ်။

ပြည်မြို့မှာ ကျောင်းသားတွေရဲ့ ဆန္ဒပြပွဲ သတင်းယူနေတဲ့ DVB သတင်းထောက်ကိုမင်းညိုကို ရဲနဲ့စစ်တပ်က ရိုက်နှက်ဖမ်းဆီးထားပြီး   မေလ ၁၂ ရက်နေ့မှာ အကြမ်းဖက်စစ်ကောင်စီရဲ့ အကျဉ်းထောင်တွင်းတရားရုံးကနေ ထောင်ဒဏ် ၃ နှစ် အမိန့်ချမှတ်ခဲ့တာပါ။

ကိုမင်းညိုဟာ ပုဒ်မ ၅၀၅(က)နဲ့ တရားစွဲခံခဲ့ရတာဖြစ်ပြီး အာဏာသိမ်း ကာလမှာ စစ်ကောင်စီတရားရုံးက  ပထမဆုံးထောင်ဒဏ်ချတာကို ခံလိုက်ရတဲ့ သတင်းထောက်ဖြစ်ပါတယ်။

ကိုမင်းညိုဟာ ပြည်သူတွေသတင်းမှန်သိဖို့ကြိုးစားခဲ့တာဖြစ်ပြီး ရာဇဝတ်မှုကျူးလွန်တာမဟုတ်တဲ့အတွက် ပြန်လည်လွတ်မြောက်ဖို့ အစွမ်းကုန်ကြိုးစားမယ်လို့ DVB သတင်းဌာန အယ်ဒီတာချုပ် ဦးအေးချမ်းနိုင်က ပြောပါတယ်။

“ကိုမင်းညိုကို ထောင်သုံးနှစ်ချလိုက်တာဟာ သတင်းမီဒီယာလောကတစ်ခုလုံးကို တိုက်ခိုက်လိုက်တာပါပဲ။ သူဟာ လွတ်လပ်တဲ့သတင်းမီဒီယာလုပ်ငန်းအတွက် လုပ်ကိုင်နေတာပါ။ ရာဇဝတ်မှုကျူး လွန်တာမဟုတ်ပါဘူး။ ကိုမင်းညိုထောင်ကျသွားပေမယ့် သူယုံကြည်တဲ့ လွတ်လပ်တဲ့သတင်းမီဒီယာလုပ်ငန်းကို ကျနော်တို့ DVB က ဆက်လုပ်သွားမှာဖြစ်ပါတယ်။ ကိုမင်းညိုလွတ်မြောက်ဖို့အတွက်လည်း အစွမ်းကုန်ကြိုးစားသွားမှာဖြစ်ပါတယ်”။ 

အာဏာသိမ်းစစ်ကောင်စီက လွတ်လပ်စွာရပ်တည်တဲ့ သတင်းဌာနတွေကို လိုင်စင်သိမ်းတာ၊ သတင်းသမားတွေကို ဖမ်းဆီးပြီး တရားစွဲဆိုထားတာတွေဟာ မှန်ကန်သင့်တော်တဲ့ လုပ်ရပ်တွေမဟုတ်ဘူးလို့ဆိုကြပါတယ်။ 

ကိုမင်းညိုကိုထောင်သုံးနှစ်ချလိုက်တဲ့ ဖြစ်ရပ်ကိုကြည့်ရင် မြန်မာသတင်းသမားတွေအတွက် ခက်ခဲကြမ်းတမ်းတာတွေပိုများလာမယ်လို့ သတင်းသမားတွေကလည်း  ခန့်မှန်းကြပါတယ်။

Myanmar Journalism Institute အမှုဆောင်ဒါရိုက်တာ ဦးသီဟစောက “ ကန့်ကွက်စရာပဲရှိတယ်။ သတင်းသမားဆိုတာ ရာဇဝတ်သားမဟုတ်ဘူး။ သတင်းသမားတော်တော်များများစွဲခံထားရတယ်။ သတင်းတိုက်တွေလိုင်စင်အပိတ်ခံထားရတယ်။ ဒါတွေက မကောင်းဘူး။ သတင်းလောက ဇီးရိုးခြေအနေအထိတော့မရောက်နိုင်ဘူး။ သတင်းလောက ကွယ်ပျောက်မသွားနိုင်ဘူး။ ဒါပေမဲ့ သတင်းသမားတွေအတွက်ကတော့ ခက်ခဲကြမ်းတမ်းတာတွေရှိလာမယ်” လို့ ပြောပါတယ်။ 

စစ်ကောင်စီက ပြည်သူတွေနဲ့ သတင်းသမားတွေကို ပုဒ်မတပ်တရားစွဲနေတာဟာ ရန်လိုအနိုင်ကျင့်နေတာဖြစ်တယ်လို့ သတင်းစာဆရာတစ်ယောက်ကပြောပါတယ်။

ပြည်သူတွေရဲ့သတင်းသိပိုင်ခွင့်ကို ပိတ်ဆို့တာ၊ သတင်းသမားတွေကို ရိုက်နှက်ဖမ်းဆီးတရားစွဲနေတာတွေဟာ ကျော်မကောင်းကြားမကောင်းကိစ္စရပ်တွေဖြစ်တယ်လို့ သတင်းစာဆရာ ဦးကျော်မင်းဆွေက  သုံးသပ်ပါတယ်။

“စစ်ဆေးမေးမြန်းမရှိဖမ်းလို့ရတဲ့ ပုဒ်မကိုသုံးတာပေါ့နော်။ ရန်လိုတဲ့သဘောပါတာပေါ့။ အစိုးရနာမည်ခံထား ပြီးပြီဆိုရင် ပြည်သူကိုပဲဖြစ်ဖြစ် မီဒီယာကိုပဲဖြစ်ဖြစ် ရန်လိုတဲ့သဘောက မကောင်းဘူး။ အမြင်ကပ်လို့ရှိရင်စွဲ တာပေါ့နော်။ အမြင်ကပ် ပုဒ်မတွေဖြစ်နေတယ်။ သတင်းသိခွင့်ရှိတဲ့ ပြည်သူတွေရဲ့ နားမျက်စိကိုပိတ်ပင်တဲ့ ပုဒ်မတွေဖြစ်တယ်။ ပြည်သူတစ်ဦးချင်းစီရဲ့ အခွင့်အလမ်းနဲ့ရပိုင်ခွင့်ကို ဒီပုဒ်မက ပိတ်ပင်တားဆီးရာရောက်တယ်”။

စစ်အာဏာသိမ်းပြီး ၃ လကျော်ကာလအတွင်း  DVB အပါအဝင် သတင်းဌာနတွေရဲ့ သတင်းမီဒီယာလုပ်ငန်းလိုင်စင်တွေကို စစ်ကောင်စီက ဆက်တိုက်ရပ်ဆိုင်းခဲ့ပါတယ်။ သတင်းသမား ၈၀ ကျော်ကို ဖမ်းဆီးခဲ့ပြီး အဲ့ဒီအထဲက သတင်းသမား ၄၀ ကျော်ကို ပုဒ်မတပ်တရားစွဲဖမ်းချုပ်ထားပါတယ်။

နယ်မြို့တွေမှာလည်း သတင်းထောက်တွေကို ရိုက်နှက်တာ သေနတ်နဲ့ပစ်ခတ်ဖမ်းဆီးတာတွေကိုပါပြုလုပ်ခဲ့တဲ့အတွက် မြန်မာ့သတင်းလွတ်လပ်ခွင့်ဟာ အဆိုးရွားဆုံး အခြေအနေကိုတစ်ခုကို  ရောက်နေပါတယ်။

3 days Ago
More News
Up