dvb

February 2, 2023

ကော့သောင်းတွင် စစ်ကားနှင့် ပျူစောထီးခေါင်းဆောင် ပစ်ခတ်ခံရ၊ ကျွန်းစု၌ ဒေသခံများအား စစ်တပ်က ခြိမ်းခြောက်ငွေညှစ်

တနင်္သာရီတိုင်း၊ ကော့သောင်းခရိုင်၊ ဘုတ်ပြင်းမြို့နယ်၊ ဟန်ကပြုကျေးရွာအနီး အာရှလမ်းမပေါ်မှာ ဇန်နဝါရီ ၃၁ ရက် ညနေ ၅ နာရီခွဲက ဘုတ်ပြင်းမြို့မှာ လစာနဲ့ရိက္ခာထုတ်ပြီး ပြန်လာတဲ့ စစ်ကောင်စီတပ်ရင်း ၅၅၅ ယာဉ်ကို ဘုတ်ပြင်းမြို့နယ် ပြည်သူ့ကာကွယ်ရေးတပ်တွေက မိုင်း ၅ လုံးနဲ့ စောင့်ကြိုတိုက်ခိုက်ခဲ့တယ်လို့ သိရပါတယ်။

အဆိုပါတိုက်ခိုက်မှုမှာ ၁၅ မိနစ်လောက်ကြာပြီး စစ်ကောင်စီဘက်က တပ်ရင်းဗိုလ်ကြီးတဦးနဲ့ တပ်သားတဦး သေဆုံးကာ တပ်သား ၂ ဦး ထိခိုက်ဒဏ်ရာရရှိတယ်လို့ ဒေသခံ ပြည်သူ့ကာကွယ်ရေးတပ်ဖွဲ့တွေက ပြောပါတယ်။

ဒေသခံတဦးက “မနေ့က စစ်ကောင်စီကား မိုင်းဆွဲခံရတယ်။ စစ်ကောင်စီဘက်က အထိအခိုက်တော့ ရှိတယ်။ ကျနော်တို့လည်း PDF ရဲ့ လုပ်ရပ်တွေကို အားပေးတာပေါ့” လို့ ပြောပါတယ်။

အခုလို မိုင်းဆွဲတိုက်ခိုက်ရာမှာ ဒေသခံ ပြည်သူ့ကာကွယ်ရေးတပ်ဖွဲ့တွေဘက်က အထိအခိုက် မရှိဘူးလို့လည်း သိရပါတယ်။

ဘုတ်ပြင်းမြို့နယ်မှာ တိုက်ပွဲတွေ ပြင်းထန်လာနိုင်လို့ ပြည်သူတွေအနေနဲ့ စစ်ကောင်စီယာဉ်တန်းတွေနောက် ကပ်မလိုက်ဖို့နဲ့ စစ်ကောင်စီတပ်သားတွေဝင်လာရင် ဘေးလွတ်ရာနေဖို့ ပြည်သူ့ကာကွယ်ရေးတပ်ဖွဲ့တွေက သတိပေးထားပါတယ်။

တနင်္သာရီတိုင်း၊ ကော့သောင်းမြို့နယ်၊ မာရမ်းကျေးရွာမှာလည်း ဖေဖော်ဝါရီ ၁ ရက် မနက် ၆ နာရီလောက်က ပျူစောထီးအဖွဲ့ ဒုတိယခေါင်းဆောင် နေအိမ်မှာရှိနေစဥ် သွားရောက် ပစ်ခတ်ခဲ့ပြီး သေနတ် ၂ လက် သိမ်းဆည်းရမိခဲ့တယ်လို့ ကော့သောင်းမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ပါတယ်။

အသက် ၅၀ ခန့်ရှိတဲ့ ပျူစောထီးအဖွဲ့ ဒုခေါင်းဆောင်ဆိုသူ ဦးဆန်းတင်ဟာ ပစ်ခတ်ခံရတဲ့ နေရာမှာပဲ သေဆုံးသွားပြီး သူ့ထံကနေ M16 A1 အမျိုးအစား သေနတ် ၂ လက်၊ ကျည်ဆန် ၂၈ တောင့်နဲ့ ဓားမြောင် ၃ လက်ကို ပြည်သူ့ကာကွယ်ရေးတပ်ဖွဲ့ဝင်တွေက သိမ်းဆည်းရမိခဲ့ပါတယ်။

ဦးဆန်းတင်ဟာ လက်နက်ကိုင်ဆောင်ထားတဲ့ ပျူစောထီးခေါင်းဆောင်တဦး ဖြစ်ပေမဲ့ ပြည်သူ့ကာကွယ်ရေးတပ်ဖွဲ့ဝင်တွေက အလစ်အငိုက် ဝင်ရောက်တိုက်ခိုက်ခဲ့လို့ ပြန်လည်ခုခံ ပစ်ခတ်တာတော့ မရှိခဲ့ဘူးလို့ ကော့သောင်းမြို့နယ် ပြည်သူ့ကာကွယ်ရေးအဖွဲ့ တာဝန်ရှိသူတဦးက ဒီဗွီဘီကို ပြောပါတယ်။

အဲဒီနေ့ ​မနက် ၁၁ နာရီခွဲလောက်မှာတော့ ခမောက်ကြီးမြို့ဘက်ကနေ မိုင် ၃၀ လောက် ဝေးတဲ့ မာရမ်းကျေးရွာဘက်ကို စစ်ကောင်စီတပ်ဖွဲ့ဝင် အင်အား ၆၀ လောက်က စစ်ကား ၂ စီးနဲ့ ထွက်လာစဥ် ဆိပ်ဖူးကျေးရွာအနီးမှာ မိုင်းဆွဲတိုက်ခိုက်ခံရလို့ ထိခိုက်သေဆုံးမှု ရှိတယ်လို့လည်း သိရပါတယ်။

ပြီးခဲ့တဲ့ ၂၅ ရက်ကလည်း ကော့သောင်းမြို့၊ အေးရိပ်ငြိမ်ရပ်ကွက်က စစ်ကောင်စီခန့် အုပ်ချုပ်ရေးမှူးနဲ့ ဇနီးဖြစ်သူတို့ ပြည်သူ့ကာကွယ်ရေးတပ်ဖွဲ့ဝင်တွေရဲ့ ပစ်ခတ်တာခံခဲ့ရပြီး ဆေးရုံတင်ပို့ခဲ့ရပါသေးတယ်။

တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ်၊ ရေကန်တောင်ကျေးရွာအနီးရှိ သဘာ၀ ဂျင်းကုန်းမှာ ဂျင်းခရုလာကောက်တဲ့ ဒေသခံ ရေလုပ်သားတွေကို စစ်ကောင်စီ တပ်သားတွေက လက်နက်ပြ ခြိမ်းခြောက်ပြီး ဒေသခံစက်လှေ ၁ စီး ငွေကျပ် ၅ဝ,ဝဝဝ ကောက်ယူနေတယ်လို့ ဒေသခံ ရေလုပ်သားတွေဆီက သိရပါတယ်။

လက်ရှိမှာ ကျွန်းစုမြို့ ရေကန်တောင်ကျေးရွာမှာရှိတဲ့ သဘာဝ ဂျင်းကုန်းတွေမှာ အခုလာမယ့် ဖေဖော်ဝါရီ ၃ ရက်ကစပြီး ဘယ်ကျေးရွာကမဆို လာရောက်ကောက်ယူမယ့် ဒေသခံ ရေလုပ်သားတွေအနေနဲ့ လှေတစီးကို ငွေကျပ် ၅၀,၀၀၀ ပေးနိုင်မှ ကောက်ယူခွင့်ပြုမယ်လို့ စစ်ကောင်စီက ထုတ်ပြန်ထားကြောင်း ဒေသခံတဦးက ဆိုပါတယ်။

“ဂျင်းကုန်းက ၃ ရက်နေ့မှာ စပြီးကောက်ရမယ်။ အရင်တုန်းက အနီးနား ရွာတွေကနေ ဒီ ဂျင်းကုန်းမှာ လာရောက်နေကြတာပဲ။ အခု စစ်တပ်က လှေကြီး ၁ စင်း၊ လှေငယ် ၁ စင်းနဲ့ ဂျင်းကုန်းမှာ လာစောင့်နေကြတယ်။ လာကောက်မယ့် စက်လှေတွေကိုလည်း သူတို့က ငွေ ၅၀,၀၀၀ ပေးရမယ်တဲ့။ တကယ်ဆို ဒီဂျင်းကုန်းက အများပိုင်တဲ့ဂျင်းကုန်းပါ။ အရင်တည်းက ဒီရေကန်တောင်ရွာကရော အနီးနားက ရွာတွေပါ အားလုံးလာကောက်နေကြတာပဲလေ။”

ဒါ့အပြင် လာရောက်ကောက်ယူတဲ့ စက်လှေတွေကိုလည်း ကောက်ယူရရှိတဲ့ ဂျင်းခရုတွေကို တခြားဒေသတွေမှာ ရောင်းချခြင်းမပြုဘဲ ရေကန်တောင်ကျေးရွာမှာပဲ ရောင်းချရမယ်လို့‌လည်း စစ်တပ်က ထပ်မံထုတ်ပြန်ထားတာကြောင့် ဒေသခံတွေအနေနဲ့ စျေးကောင်းရတဲ့နေရာတွေ ရောင်းခွင့်မရဘဲ အခက်အခဲ ဖြစ်နေရတယ်လို့ ဒေသခံတဦးက ပြောပါတယ်။

“ဂျင်းခရုတွေကို ရေကန်တောင်ရွာမှာပဲ ရောင်းချရမယ်ဆိုတာ မဖြစ်သင့်ဘူးလေ။ အရင်တည်းက ဒီမှာလာကောက်ပြီးရင် တခြားရွာတွေ၊ မြို့တွေမှာ ပြန်ရောင်းကြတာပါ။ ခုက လာကောက်တဲ့လူတွေက ရောင်းချင်တဲ့နေရာမှာ မရောင်းရတော့ အဆင်မပြေနိုင်ဘူးလေ” လို့ ဂျင်းကောက်ယူနေသူတဦးက ဆိုပါတယ်။

အဆိုပါဂျင်းကုန်းမှာ အရင်ကတည်းက တဦးတယောက်ပိုင်မဟုတ်ဘဲ အများပိုင်ဆိုင်တဲ့ ဂျင်းကုန်းလို့ သိရပြီး ပြီးခဲ့တဲ့နှစ်ကစပြီး စစ်တပ်က လာရောက်ထိန်းချုပ်တာကြောင့် လာကောက်သူတွေ အခက်အခဲ ဖြစ်နေတယ်လို့ သိရပါတယ်။

စစ်အာဏာသိမ်းပြီးနောက်ပိုင်း အဲဒီဂျင်းကန်မှာ ခွင့်ပြုချက်မရှိဘဲ လာရောက်ကောက်ယူတဲ့ စက်လှေတွေကို စစ်တပ်က သေနတ်နဲ့ လိုက်လံပစ်ခတ်တာတွေ ရှိခဲ့တယ်လို့ သိရပါတယ်။

14 hours Ago

ပုလဲမြို့တွင် စစ်ကောင်စီတပ် မိုင်းဆွဲတိုက်ခိုက်ခံရ၊ စစ်တပ်မီးရှို့ခံရသည့် ဒေသခံများကို ပုလဲ ပအဖ ထောက်ပံ့

စစ်ကိုင်းတိုင်း၊ ပုလဲမြို့ဆေးရုံမြောက်ဘက်မှာ ဒီနေ့ ဖေဖော်ဝါရီ ၂ ရက် မနက် ၉ နာရီလောက်က စစ်ကောင်စီတပ် မိုင်းဆွဲတိုက်ခိုက်ခံရတယ်လို့ ဒေသခံတွေဆီကနေ သိရပါတယ်။

အခုလိုမိုင်းဆွဲခံရပြီး စစ်ကောင်စီဘက်က ၈ ဦး ဒဏ်ရာရရှိပြီး ၃ ဦးသေဆုံးတယ်လို့ ဒေသခံ ဒေါင်းနက် PDF ခေါင်းဆောင် ဆရာပေက ပြောပါတယ်။

“ပုလဲမြို့အရှေ့ဘက်ကို အင်အား ၁၀၀ လောက်နဲ့ ထွက်လာတာကို ဆေးရုံ မြောက်ဘက်လမ်းကြားမှာ မိုင်း ၅ လုံးဆွဲ တိုက်ခိုက်ခဲ့တာဗျ။ ကျနော်တို့ကို ဘယ်အချိန်မှာ စစ်ကြောင်းထွက်မယ်ဆိုတာ ညကတည်းက ဖရဲသီးက သတင်းပို့ထားတယ်။ အဲလိုသိလို့ မိုင်းကွင်းတွေ ကြိုခင်းထားပြီး သူတို့တက်လာတဲ့အချိန် အခုလို တိုက်ခိုက်လိုက်တာဗျ။”

အခုမိုင်းဆွဲခံရတဲ့ စစ်ကောင်စီတပ်ဟာ ပုလဲမြို့က‌နေ ဆားလင်းကြီးမြို့နယ်ဘက် စစ်ကြောင်းထိုးဖို့ စတင်ထွက်ခွာရင်း အခုလို မိုင်းဆွဲခံရတာဖြစ်တယ်လို့လည်း ဒေသခံတွေဆီကနေ သိရပါတယ်။

ပုလဲမြို့နယ်မှာ စစ်ကောင်စီတပ်သား‌တွေရဲ့‌ နေအိမ်မီးရှို့ဖျက်ဆီးခံရတဲ့ မီးဘေးသင့်ပြည်သူတွေကို ပုလဲမြို့နယ် ပြည်သူ့အုပ်ချုပ်ရေးအဖွဲ့က စားနပ်ရိက္ခာတွေနဲ့ အသုံးစရိတ်တချို့ ကူညီထောက်ပံ့ပေးခဲ့ပါတယ်။

ဇန်နဝါရီ ၃၁ ရက် ညနေပိုင်းက စစ်ကောင်စီတပ်သားတွေနဲ့ ပျူစောထီးအဖွဲ့ဝင်တွေ ပူးပေါင်းပြီး စစ်ကိုင်းတိုင်း၊ ပုလဲမြို့နယ်၊ မြေနီကုန်းရွာရှိ နေအိမ် ၁၃ လုံးကို မီးရှို့ဖျက်ဆီးခဲ့ပါတယ်။

အဆိုပါကျေးရွာ‌တွေက မီးဘေးသင့်ပြည်သူတွေအတွက် အလှူရှင်တွေ လှူဒါန်းထားတဲ့ ထောက်ပံ့ကြေး‌ အလှူငွေ ၆၅၀,၀၀၀ ကျပ်နဲ့ ဆန်အိတ် ၁၃ အိတ်ကို သွားရောက် ထောက်ပံ့ခဲ့တယ်လို့ ပုလဲမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူတယောက်က ဒီဗွီဘီကို ပြောပါတယ်။

ပုလဲမြို့နယ်မှာ စစ်ကောင်စီတပ်သားတွေရဲ့ မီးရှို့ဖျက်ဆီးမှုကြောင့် ဒေသခံနေအိမ် ၂,၂၂၈ ဝန်းကျင် မီးလောင်ဆုံးရှုံးထားပြီး စစ်ကောင်စီက ဂန့်ဂေါနယ်ကို အင်တာနက်လိုင်းတွေ ဖြတ်တောက် သတင်းအမှောင်ချထားတာ ၁ နှစ်ကျော် ကြာမြင့်နေပြီလည်း ဖြစ်ပါတယ်။

ဆက်လက်ပြီး ကူညီထောက်ပံ့ဖို့ ကျန်ရှိနေတဲ့ စစ်ဘေးရှောင်နဲ့ မီးဘေးသင့်ပြည်သူတွေ အတွက်လည်း ဆက်လက်ထောက်ပံ့နိုင်ဖို့ ကြိုးစားနေပြီး ပြည်တွင်းပြည်ပ အလှူရှင်တွေအနေနဲ့ ပုလဲမြို့နယ် ပြည်သူ့အုပ်ချုပ်ရေးအဖွဲ့ထံ ပူးပေါင်းပါဝင် လှူဒါန်း‌ကူညီပေးကြဖို့ ပုလဲမြို့နယ် ပြည်သူ့အုပ်ချုပ်ရေးအဖွဲ့က‌ မေတ္တာရပ်ခံထားပါတယ်။

15 hours Ago

မြင်းမူတွင် စစ်ကောင်စီတပ်စွဲထားသည့် နေရာ ၂ ခု တိုက်ခိုက်ခံရ

စစ်ကိုင်းတိုင်း၊ မြင်းမူမြို့မှာ စစ်ကောင်စီတပ်သား အင်အားအလုံးအရင်းနဲ့ အထိုင်ချထားတဲ့ ကျောင်းနဲ့ ရဲစခန်းကို ဖေဖော်ဝါရီ ၁ ရက် ညနေ ၅ နာရီကျော်က လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

စစ်ကောင်စီတပ်သားတွေဟာ အထက ၁ နဲ့ ရဲစခန်းအတွင်း အထိုင်ချနေထိုင်ပြီး ၆၀ မမနဲ့ ပစ်ခတ်တိုက်ခိုက်ခဲ့ကာ စစ်ကောင်စီတပ်သား ထိခိုက်ကျဆုံးမှု များနိုင်တယ်လို့ အာဏာရှင်စနစ်တိုက်ဖျက်ရေး ပြည်သူ့တပ်ဖွဲ့ (PAFD) က ထုတ်ပြန်ထားပါတယ်။

တိုက်ခိုက်မှုဟာ အာဏာသိမ်းစစ်အုပ်စုကို လုံးဝလက်မခံကြောင်း ပြည်သူတွေရဲ့ အသံတိတ်သပိတ် ပြုလုပ်မှုကို ဂုဏ်ပြုတဲ့အနေနဲ့ လုပ်ဆောင်ခဲ့တာဖြစ်ပြီး ရဲစခန်းအတွင်းရှိ လိုင်းခန်းတွေပေါ်မှာ ၆ လုံး ထိထိမိမိ ကျရောက်ပေါက်ကွဲခဲ့တယ်လို့ PAFD က ဆိုပါတယ်။

စစ်ကောင်စီတပ်သားတွေကလည်း ည ၁၂ နာရီလောက်မှာ လက်နက်ကြီး လက်နက်ငယ်တွေနဲ့ ရမ်းသန်းပစ်ခတ်တာတွေ လုပ်ခဲ့လို့ ပြည်သူ့နေအိမ်တချို့ ပျက်စီးခဲ့တယ်လို့ အာဏာရှင်စနစ်တိုက်ဖျက်ရေး ပြည်သူ့တပ်ဖွဲ့ (PAFD) ရဲ့ ထုတ်ပြန်ချက်မှာ ဖော်ပြထားပါတယ်။

တိုက်ခိုက်မှုကို People's Army To Fight Dictatorship (PAFD) နဲ့ PAFD တပ်ခွဲ DK PDF (MMU)၊ People's Knight Defence Force (PKDF) (MMU)၊ D.B.B.F (MMU) တို့ ပူးပေါင်းဆောင်ရွက်ခဲ့တာလို့ သိရပါတယ်။

15 hours Ago

အလုံမြို့နယ်တွင် လမ်းဖြတ်ကူးသည့် အဘွားအို ၁ ဦး YBS တိုက်ခံရ

ရန်ကုန်တိုင်း၊ အလုံမြို့နယ်၊ အောက်ကြည့်မြင်တိုင်လမ်းမ၊ ဆင်မင်းဈေးကားမှတ်တိုင်မှာ ဖေဖော်ဝါရီ ၂ ရက် ဒီနေ့ မွန်းလွဲ ၁၂ နာရီကျော်က  လမ်းဖြတ်ကူးတဲ့ အသက် ၈၀ အရွယ် အဘွားအိုတဦးကို YBS ၈၉ က တက်ကြိတ်ခဲ့ပြီး အဆိုပါ YBS ယာဉ်မောင်း ထွက်ပြေးသွားတယ်လို့ အနီးအနားနေသူတွေဆီက သိရပါတယ်။

ကြီးလေးကြီးလူမှုကူညီရေးအသင်းက “တိုက်မိတဲ့လူနာက အသက် ၈၀ ရှိပြီ။ တွေ့လိုက်ရတာကတော့ အဘွားက ‌ကားအောက်ထဲ ရောက်နေပြီ။ အနီးအနားကလူတွေ ပြောတာကတော့ ကားလမ်းဖြတ်ကူးတဲ့အချိန်မှာ တိုက်မိပြီး လဲကျသွားတာ။ အဲ့ဒီမှာ ကားသမားက မသိဘဲနဲ့ ဘီးကို ဆက်လှိမ့်လိုက်တဲ့အချိန်မှာ ဖြစ်သွားတာပေါ့။ လူနာကို ကား‌ပေါ်တင်ပြီး ဆေးရုံသွားတဲ့အချိန်မှာ ကားသမားက ရှိသေးတာပေါ့။ ရပ်ကွက်က လူတွေကို ထိန်းသိမ်းဖို့ပြောထားပြီး ပြန်ခဲ့တာ။ ကျနော်တို့ ဖြစ်ခဲ့တဲ့နေရာကို ပြန်ရောက်တော့ မော်တော်ပီကယ်တွေ ရောက်နေတယ်၊ အဲ့ကျမှ ယာဉ်မောင်းက ထွက်ပြေးသွားမှန်းသိတာပါ” လို့ ‌ပြောပါတယ်။

အဆိုပါယာဉ်တိုက်မှုဖြစ်ပွားခဲ့တဲ့ ကားက သာကေတနဲ့ ကြည့်မြင်တိုင် ‌ပြေးဆွဲနေတဲ့ ယာဉ်လိုင်းလို့ သိရပြီး ကြည့်မြင်တိုင်ကနေ ဆူးလေဘက် ‌ပြေးဆွဲတဲ့လမ်းမှာ ဖြစ်ပွားခဲ့တာပါ။

တိုက်မိချိန်က အဘွားအိုဟာ YBS ကားအရှေ့ကနေ လမ်းဖြတ်ကူးနေတာဖြစ်ပြီး ကားသမားက ခရီးသည်အဆင်းဘေးပေါက်ကို ကြည့်နေခဲ့ရာက ပြန်အထွက်မှာ တိုက်မိတာလို့ မျက်မြင်တွေ့သူတွေက ဆိုပါတယ်။

လက်ရှိအချိန်မှာ လူနာအဘွားအိုကို ရန်ကုန်ဆေးရုံကြီး ပို့ဆောင်ထားပြီး ကားရှေ့ဘီး ကြိတ်မိတဲ့အရှိန်နဲ့ အဘွားအိုရဲ့ ညာဘက်ပေါင်က အရိုးပေါ်တဲ့အထိ စုတ်ပြဲသွားတယ်လို့ သိရတဲ့အပြင် မိသားစုဝင်တွေနဲ့လည်း အဆက်အသွယ်ရပြီလို့ သိရပါတယ်။

ယာဉ်တိုက်မှုဖြစ်ပွားလို့ ထွက်ပြေးသွားတဲ့ ယာဉ်မောင်းကို လိုက်လံစုံစမ်းနေတယ်လို့ သိရပြီး အဆိုပါယာဥ်လိုင်းက တာဝန်ရှိသူတွေကို ဒီဖြစ်စဉ်နဲ့ပတ်သက်လို့ မေးမြန်းခဲ့ပေမဲ့ ပြန်လည်ဖြေကြားခြင်း မရှိပါဘူး။

15 hours Ago

တရက်တည်း စစ်ကောင်စီတပ်ဖွဲ့ဝင် ၂၈ ဦးသေ၊ စစ်ကိုင်းတွင် တိုက်ပွဲ ၁၁ ကြိမ်ဖြင့် အများဆုံးဖြစ်

ဖေဖော်ဝါရီ ၁ ရက် မနေ့ကတရက်တည်း ဖြစ်ပွားခဲ့တဲ့ တိုက်ပွဲတွေမှာ စစ်ကောင်စီ အကြမ်းဖက်တပ်ဖွဲ့ဝင် ၂၈ ယောက် သေဆုံးခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

အခုထုတ်ပြန်ထားတဲ့ အချက်အလက်ဟာ မြေပြင်အခြေအနေမှာ ပိုများနိုင်ပြီး တရက်တည်း ထိခိုက်ဒဏ်ရာ ရရှိတဲ့သူ အရေအတွက်ကတော့ ၁၃ ယောက်ထိ ရှိခဲ့တယ်လို့ ဆိုပါတယ်။

မြေပြင်တိုက်ပွဲတွေ ပြင်းထန်နေတဲ့ စစ်ကိုင်းတိုင်း၊ ဟုမ္မလင်းမြို့နယ်မှာတော့ အကြမ်းဖက်စစ်ကောင်စီ စစ်စခန်း ၃ ခုကို PDF တပ်ဖွဲ့တွေက ထိုးစစ်ဆင်တိုက်ခိုက်ခဲ့ကြပြီး ရွှေဘိုမြို့နယ်မှာတော့ စစ်ကောင်စီတပ်တွေကို PDF တွေက လက်နက်ကြီးနဲ့ ပစ်ခတ်တိုက်ခိုက်ခဲ့ကြတယ်လို့ သိရပါတယ်။

ဒါ့အပြင် ချင်းပြည်နယ်၊ ထန်တလန်မြို့နယ်မှာလည်း အကြမ်းဖက် စစ်ကောင်စီတပ်တွေကို ဒေသခံ CDF တပ်တွေက တိုက်ခိုက်ခဲ့ကြပြီး ဟားခါးမြို့နယ်မှာလည်း စစ်ကောင်စီတပ်တွေကို CDF က ဒရုန်းနဲ့ တိုက်ခိုက်ခဲ့ကြတယ်လို့ ဆိုပါတယ်။

မကွေးတိုင်း၊ ပခုက္ကူမြို့နယ်မှာတော့ တပ်စွဲထားတဲ့ စစ်ကောင်စီတပ်တွေကို PDF က ဝင်ရောက်တိုက်ခိုက်ခဲ့ကြပြီး ပေါက်မြို့နယ်မှာတော့ အကြမ်းဖက်စစ်ကောင်စီတပ်တွေနဲ့ PDF တပ်ဖွဲ့တွေကြား တိုက်ပွဲတွေဖြစ်ပွားခဲ့သလို မြိုင်မြို့နယ်မှာတော့ စစ်ကောင်စီတပ်တွေကို PDF တပ်တွေက ပူးပေါင်းတိုက်ခိုက်ခဲ့ကြတယ်လို့ သိရပါတယ်။

တနင်္သာရီတိုင်း၊ ဘုတ်ပြင်းမြို့နယ်မှာတော့ အကြမ်းဖက် စစ်ကောင်စီတပ်တွေကို PDF တပ်ဖွဲ့တွေက မိုင်းဆွဲတိုက်ခိုက်ခဲ့ကြတယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

NUG အစိုးရကတော့ ပြည်သူ့ခုခံတွန်းလှန်စစ်ပွဲ စတင်ခဲ့တဲ့ ၁ နှစ်အတွင်း အကြမ်းဖက် စစ်ကောင်စီဘက်က တပ်ဖွဲ့ဝင်ပေါင်း ၂၀,၁၅၀ ကျော်သေဆုံးကာ ဒဏ်ရာရသူ ၇,၀၀၀ ကျော်လောက်ရှိလာပြီး စစ်ကောင်စီ စိုးမိုးအုပ်ချုပ်နိုင်တဲ့နေရာဟာ တိုင်းပြည် နယ်မြေအကျယ်အဝန်းရဲ့ ထက်ဝက်တောင် မရှိတော့ဘူးလို့ NUG ယာယီသမ္မတ ဒူဝါလရှီးလက ပြောကြားထားပါတယ်။

ပြည်သူ့ခုခံတော်လှန်စစ် ကြေညာခြင်း တနှစ်ပြည့် အထိမ်းအမှတ်အဖြစ် အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက နိုင်ငံတော်အခြေပြမိန့်ခွန်း ပြောကြားရာမှာ ထည့်သွင်းပြောဆိုခဲ့တာဖြစ်ပြီး ၁ နှစ်တာ ကာလအတွင်း ခန့်မှန်းခြေစာရင်းအရ PDF တွေနဲ့ မဟာမိတ် တိုင်းရင်းသား လက်နက်ကိုင် သူရဲကောင်းရဲဘော်တွေ စုစုပေါင်း ၁,၅၀၀ ကျော် ကျဆုံးခဲ့တယ်လို့လည်း သူက ပြောပါတယ်။

လူထုသပိတ်တိုက်ပွဲတွေအနေနဲ့ မြေပြင်တိုက်ပွဲတွေ ပြင်းထန်နေတဲ့ စစ်ကိုင်းတိုင်းဒေသကြီးမှာ ၁၁ ကြိမ်နဲ့ အများဆုံးဖြစ်ပွားခဲ့ပြီး မန္တလေးတိုင်းဒေသကြီးမှာ ၂ ကြိမ်၊ မကွေးတိုင်းဒေသကြီးမှာ ၁ ကြိမ်စီ ဖြစ်ပွားခဲ့တယ်လို့ ထုတ်ပြန်ချက်မှာ ဖော်ပြပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက် စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်း လမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။

15 hours Ago

ထိုင်ဝမ်မင်းသမီးနှင့်အဖွဲ့ထံက ငွေညှစ်မှု သက်သေခိုင်လုံသဖြင့် ထိုင်းရဲ ၆ ဦး အဖမ်းခံရ

ပြီးခဲ့တဲ့ နှစ်သစ်ကူးကာလက ထိုင်းကို အလည်အပတ်ရောက်ရှိလာတဲ့ ထိုင်ဝမ်သရုပ်ဆောင် မင်းသမီး အန်းယူချင်း (ခ) ချာလီအဲန်းနဲ့ သူ့အပေါင်းအဖော်တွေ ထိုင်းရဲရဲ့ ငွေညှစ်မှုခံခဲ့ရတဲ့ အမှုမှာ ပါဝင်ပတ်သက်တဲ့  ရဲဝန်ထမ်း ၆ ဦးကို တာဝန်ရှိသူတွေက ဖေဖော်ဝါရီ ၂ ရက်မှာ ဖမ်းဆီးအရေးယူလိုက်ပါတယ်။

အဆိုပါ ရဲဝန်ထမ်း ၆ ဦးမှာ ဟွေ့ခွမ်နယ်မြေရဲတပ်ဖွဲ့မှ ဒုရဲအုပ်အဆင့် ၂ ဦး၊ ရဲတပ်ကြပ်ကြီး ၁ ဦးနဲ့ ဒုရဲတပ်ကြပ် ၃ ဦးတို့ ပါဝင်ပြီး ပုဒ်မ ၁၄၉ လာဘ်စားမှုနဲ့ အမှုဖွင့်ခံရကာ ရာဇဝတ်မှုဆိုင်ရာ တရားရုံးအချုပ်ခန်းကို ပို့လိုက်ပြီလို့ ဟွေ့ခွမ်နယ်မြေရဲတပ်ဖွဲ့ အထူးစုံစမ်းစစ်ဆေးရေးမှူး ရဲမှူး ထီရဒေ့ချ် ထမ်းဆုရီက ပြောပါတယ်။

အဆိုပါ ပုဒ်မ ၁၄၉ အရ ပြစ်မှုအကြီးအသေးပေါ်မူတည်ပြီး ထောင်ဒဏ် အနည်းဆုံး ၅ နှစ်မှ နှစ် ၂၀ ထိ သို့မဟုတ် ထောင်ဒဏ်တသက် ဒါမှမဟုတ် ငွေဒဏ် ဘတ် ၁ သိန်းမှ ၄ သိန်းထိ ဒါမှမဟုတ် သေဒဏ်ထိ ကျခံရနိုင်တယ်လို့ ဆိုပါတယ်။

ငွေတောင်းခံတဲ့နေရာမှာ မူလက ရဲ ၇ ဦးရှိပေမဲ့ ၁ ဦးက နောက်ထပ်အမှုအခင်း ၁ ခု ပေါ်လာလို့ အဲဒီနေရာက ထွက်သွားတာကြောင့် သူကတော့ အမှုကနေ လွတ်သွားပါတယ်။

အဆိုပါစစ်ဆေးရေးဂိတ်မှာ ရဲဝန်ထမ်း ၁၄ ဦး တာဝန်ထမ်းဆောင်ခဲ့ပြီး လမ်းရဲ့ တဖက်တချက်မှာ ၇ ဦးစီ စောင့်ဆိုင်းခဲ့ကြောင်း၊ ၁၄ ဦးစလုံးကတော့ ဒီမတိုင်ခင် ရှေ့က တာဝန်ဝတ္တရား ပေါ့လျော့လစ်ဟင်းမှုနဲ့ ပုဒ်မ ၁၅၇ အရ ရာထူးမှရွှေ့ပြောင်းခံထားရပြီး ဖြစ်ပါတယ်။

ထိုင်ဝမ်မင်းသမီးနဲ့ အပေါင်းအဖော်တွေဆီက ဥပဒေကတားမြစ်ထားတဲ့ လျှပ်စစ်စီးကရက် တွေ့ပါလျက်၊ ပတ်စပို့ အထောက်အထား မပြည့်စုံပါလျက်နဲ့ ရဲစခန်းမှာ ခေါ်မလာဘဲ ပြန်လွှတ်လိုက်တာနဲ့ ပတ်သက်လို့ ၁၄ ဦးလုံး တာဝန်ဝတ္တရားလစ်ဟင်းမှုနဲ့ အရေးယူခံရတာ ဖြစ်ပါတယ်။

ဒီမတိုင်ခင် ရဲတပ်ဖွဲ့က အဆိုပါအမှုကို လှည့်ပတ်အချိန်ဆွဲနေခဲ့ပြီး ထိုင်းလွှတ်တော်အမတ်ဟောင်း ခွန်ချူဝစ်ကမွန်ဝိဆစ်က ရဲကို ကိုယ်တိုင်ငွေပေးခဲ့ရတယ်ဆိုတဲ့ ထိုင်ဝမ်မင်းသမီးရဲ့ သူငယ်ချင်းကို စင်ကာပူနိုင်ငံကနေ ခေါ်ယူခဲ့ကာ ယမန်နေ့က သက်သေအဖြစ် လာရောက်ရှင်းလင်းစေခဲ့ပါတယ်။

စကိုင်းလို့ခေါ်တဲ့ အဆိုပါ စင်ကာပူနိုင်ငံသားကလည်း အဲဒီညက သူတို့သူငယ်ချင်း မွေးနေ့ကအပြန် ရဲတွေနဲ့တွေ့ကြောင်း၊ ရဲတွေက သူတို့အိတ်ထဲ စစ်ဆေးရှာဖွေရာမှာ အီးစီးကရက် ၃ လိပ်တွေ့လို့ ပြဿနာစရှာတယ်လို့ ဆိုပါတယ်။

သူတို့ကတော့ အဆိုပါစီးကရက်ကို ဘန်ကောက် ညဈေးမှာ ချရောင်းနေတာတွေ့လို့ ဝယ်ခဲ့ပြီး ဥပဒေက တားမြစ်မှန်းလည်း မသိဘူးလို့ ပြောပါတယ်။

အဲဒီနောက် ပတ်စပို့မေးရာမှာ ၄ ယောက်ထဲမှာ ၁ ယောက်ပဲ ပါလာကြောင်း၊ မိတ္တူပဲရှိတယ် စာအုပ်က ဟိုတယ်မှာ ကျန်ခဲ့တယ်၊ ပြန်သွားယူရမလားလို့မေးတော့ ရဲက မလိုဘူး သွားလေရာ ပတ်စပို့မဆောင်လို့ အပြစ်ရှိတယ်လို့ ပြောပါတယ်။

အီးစီးကရက်ပါတဲ့အတွက် ၁ လိပ်ကို ဘတ် ၈,၀၀၀၊ ၃ လိပ်အတွက် ဘတ် ၂၄,၀၀၀၊ ပတ်စပို့ဆောင်မထားလို့ ၁ ဦးကို ဘတ် ၁,၀၀၀ နဲ့ ၃ ဦးအတွက် ဘတ် ၃,၀၀၀ စုစုပေါင်း ဘတ်ငွေ ၂၇,၀၀၀ ဆောင်ရမယ်၊ မဆောင်ရင် ရဲစခန်းမှာ ၃ ညအိပ်ပြီး တရားရင်ဆိုင်ရမယ်လို့ ပြောတာကြောင့် လွန်စွာစိတ်ညစ်သွားကြပြီး ငွေပေးလိုက်ရတာလို့ ထွက်ဆိုသွားပါတယ်။

ခွန်ချူဝစ်က ဟွေ့ခွမ်ရဲစခန်းရှိ ရဲဝန်ထမ်းအားလုံးပါ ဓာတ်ပုံပြပြီး အဲဒီညက ငွေတောင်းသူတွေကို လက်ညှိုးထိုးပြခိုင်းခဲ့ရာမှာ စကိုင်းကလည်း ၆ ဦးရဲ့ပုံတွေ လက်ညှိုးထိုးပြခဲ့ပါတယ်။

သူတို့သတင်းစာရှင်းပွဲပြီးတာနဲ့ ဟွေ့ခွမ်ရဲတပ်ဖွဲ့ တာဝန်ရှိသူတွေ ရောက်လာပြီး စကိုင်းကို ထပ်မံစစ်ဆေးမေးမြန်းခဲ့ပါတယ်။ အဲဒီနောက် သက်သေအထောက်အထား ခိုင်လုံတာနဲ့ ပါဝင်ပတ်သက်သူ ရဲ ၆ ဦးကို ဖမ်းလိုက်တာဖြစ်ပါတယ်။

ထိုင်ဝမ်မင်းသမီး အန်းယူချင်းကလည်း ခွန်ချူဝစ်ကို ဗီဒီယိုကော်လ်ခေါ်ကာ အမှန်တရားဘက်က ရပ်တည်ပေးတဲ့အတွက် ကျေးဇူးတင်ကြောင်း၊ ခွန်ချူဝစ်ကို ဆွေမျိုးသားချင်းလို သဘောထားပြီး လိုအပ်တဲ့အကူအညီ ပေးမယ့်အကြောင်း ပြောကြားခဲ့ပါတယ်။

ခွန်ချူဝစ်က ရဲတွေ အခုလိုငွေညှစ်ပြီး ရလာတဲ့ငွေတွေဟာ သူတို့အိပ်ကပ်ထဲ တန်းပြီးဝင်တာ မဟုတ်ဘဲ အထက်အရာရှိဆီ ပို့ပေးပြီးမှ အချိုးကျပြန်ရကြောင်း၊ နခွန်းဘန်နယ်မြေထဲမှာ လက်အောက်ခံ ရဲစခန်းပေါင်း ၈၈ ခုရှိပြီး ရဲစခန်း ၁ ခုမှာ တနေ့ကို ဒဏ်ငွေ ဘတ် ၁ သိန်း ရှာပေးရကြောင်း၊ ဒါကြောင့် နခွန်းဘန်နယ်မြေရဲတပ်ဖွဲ့ရဲ့ တလဝင်ငွေဟာ ၂၆၄ သန်းရှိတယ်၊ ဒါတောင် ဘန်ကောက် တခြားနယ်မြေတွေ မပါသေးဘူး၊ ရဲတွေဟာ ကာစီနိုရုံကနေ ငွေမရလို့ စစ်ဆေးရေးဂိတ်ချပြီး ငွေရှာနေတာလို့ သံပုံးတီးပြီး အားလုံးသိအောင် ပြောလိုက်မယ်ဆိုပြီး သတင်းစာရှင်းပွဲမှာ ပြောသွားပါတယ်။

15 hours Ago

အာဏာသိမ်း ၂ နှစ်ပြည့် ထိုင်းရောက် မြန်မာများ စစ်အာဏာရှင် ဆန့်ကျင်ဆန္ဒပြ

ထိုင်းနိုင်ငံ၊ ဘန်ကောက်မြို့မှာ ဖေဖော်ဝါရီ ၁ ရက်နေ့က စစ်တပ်အာဏာသိမ်းတာ ၂ နှစ်ပြည့်အနေနဲ့ ထိုင်းရောက် မြန်မာတွေနဲ့ ရွှေ့ပြောင်း လုပ်သားတွေ စုပေါင်းပြီး မြန်မာသံရုံးနဲ့ ကုလသမ ဂ္ဂရုံးရှေ့တို့မှာ စစ်အာဏာရှင် ဆန့်ကျင်ရေး ဆန္ဒပြခဲ့ပါတယ်။

ထောင်နဲ့ချီတဲ့ မြန်မာလုပ်သားတွေဟာ ဘန်ကောက် မြန်မာသံရုံးရှေ့မှာ လာရောက် စုဝေးခဲ့ကြပြီး၊ မနက် ၁၀ နာရီဝန်းကျင်ကနေ နေ့လယ် ၁ နာရီ အချိန်ထိ စစ်အာဏာရှင်ကို အလိုမရှိကြောင်း ကြွေးကြော်သံတွေနဲ့ ဆန္ဒပြခဲ့ကြတာပါ။

ထိုင်းရောက်မြန်မာတွေ အနေနဲ့ အာဏာသိမ်း စစ်ကောင်စီကို ဖမ်းဆီးထားတဲ့ ခေါင်းဆောင်တွေ အမြန်ဆုံး လွှတ်ပေးဖို့နဲ့ ပြည်သူလူထုဆီကနေ လက်နက်နဲ့ မတရား ရယူထားတဲ့ ပြည်သူ့အာဏာကို ပြန်လွှဲပေးဖို့ တောင်းဆိုခဲ့ကြတာပါ။

ထိုင်းနိုင်ငံ၊ ဘန်ကောက်မြို့က မြန်မာရွှေ့ပြောင်းလုပ်သား တစ်ဦးက "လက်ရှိ ထိုင်းနိုင်ငံမှာ ရောက်နေတဲ့ မြန်မာနိုင်ငံသားအားလုံးက ဒီနေ့ဖြစ်ပေါ်လာတဲ့ မြင်ကွင်းကို ကမ္ဘာအရပ်ရပ်မှာ ရှိတဲ့ အကုန်လုံးသိအောင် ပြတာပါ။ မြန်မာပြည်သူ လူထုရဲ့ ရင်ထဲမှာ ရှိတဲ့ ဆန္ဒကို ကမ္ဘာက သိပါတယ်။ ကျနော်တို့ တိုင်းပြည်ရဲ့ အချုပ်အခြာ အာဏာကို မတရား သိမ်းထားတဲ့ မဟုတ်မမှန် လုပ်နေတဲ့ စစ်တပ်ကို အမြန်ဆုံး ဖြုတ်ချပေးဖို့ တောင်းဆိုပါတယ်"လို့ ဒီဗွီဘီကို ပြောပါတယ်။

ဆန္ဒပြသူတွေကို ထိုင်းအာဏာပိုင် ရဲတွေက ပိတ်ပင်တားဆီးတာမျိုး၊ ဖမ်းဆီးတာမျိုး ပြုလုပ်တာ မတွေ့ရဘဲ လမ်းတလျှောက် ယာဉ်ကြောပိတ်ဆို့မှု မဖြစ်အောင်သာ တာဝန်ယူခဲ့ပြီး မြန်မာလုပ်သားတွေရဲ့ လုံခြုံရေးကိုလည်း အပြည့်အဝ လုပ်ဆောင်ပေးခဲ့တယ်လို့ ဆန္ဒပြ မြန်မာလုပ်သားတွေက ပြောပါတယ်။

ဘန်ကောက်မြန်မာ သံရုံးရှေ့ ဆန္ဒပြပွဲမှာ ပါဝင်ခဲ့တဲ့ မြန်မာ အမျိုးသမီးတစ်ဦးက "ကျမတို့ ယုံကြည်ချက်ကတော့ မနိုင်မချင်းကို တိုက်မယ်။ ထောက်ပံ့မှုတွေ ပေးမယ်။ ရှိသမျှ လစာ ၂ ပုံ၊ ၃ ပုံလောက်ကနေ ကျမတို့ ထောက်ပံ့မယ်။ ဒီနေ့ ဆန္ဒပြပွဲမှာဆို ဘာအဖမ်းအဆီးမှ မရှိဘူး။ ရန်ဖြစ်ပွဲတွေလည်း မရှိဘူး။ အားလုံး ညီညွှတ်ကြတယ်။ လုံခြုံရေးလည်း အပြည့်အဝ တာဝန်ယူပေးတယ်"လို့ ဒီဗွီဘီကို ပြောပါတယ်။

စစ်အာဏာသိမ်းမှုကို လက်မခံတဲ့ ပြည်ပရောက် မြန်မာတွေဟာ မိမိတို့ ရောက်ရှိရာ နိုင်ငံ အသီးသီးရဲ့ သက်ဆိုင်ရာ မြန်မာသံရုံးနဲ့ ကုလသမဂ္ဂရုံးတွေရှေ့မှာ စစ်အာဏာရှင်ကို ဆန့်ကျင်ကြောင်း ပြသခဲ့ကြပြီး၊ မြန်မာလုပ်သား အများဆုံး ရှိတဲ့ ထိုင်းနိုင်ငံမှာတော့ မြန်မာတွေ ညီညီညွှတ်ညွှတ်နဲ့ စုပေါင်း ဆန္ဒပြခဲ့ကြတာပါ။

"ဒီနေ့ဒီအချိန်ထိ ဘယ်တော့မှ လက်လျှော့မှာ မဟုတ်ပါဘူး။ ကျနော်တို့ ဒီလူတွေနဲ့ သက်သေပါပဲ။ ကျနော်တို့ ကိုယ်တိုင် ဒီလို ဆန္ဒပြတယ်ဆိုတာ စစ်အာဏာရှင် တော်လှန်ဖို့ အတွက်ပဲ မဟုတ်ဘဲ ဖမ်းဆီးထားတဲ့ ခေါင်းဆောင် အမေစုနဲ့ အကုန်လုံးကို လွှတ်ပေးဖို့ တောင်းဆိုတာ ဖြစ်တယ်။ မအလကို မကြိုက်လို့ တော်လှန်တာ ဒီလုပ်ကို ဘယ်တော့မှ လက်မလျှော့ဘူး။ နေ့ရှိညရှိသရွေ့ အာဏာရှင်ကို ဆက်လက် တော်လှန်သွားမှာ ဖြစ်ပါတယ်"လို့ ဆန္ဒပြ မြန်မာ လူငယ်တစ်ဦးက ဒီဗွီဘီကို ပြောပါတယ်။

ဆန္ဒပြပွဲမှာ ထိုင်းရောက် မြန်မာတွေနဲ့အတူ ထိုင်းနိုင်ငံက တက်ကြွ လှုပ်ရှားသူတွေလည်း ပါဝင်ဆန္ဒပြခဲ့ကြပါတယ်။ ဆန္ဒပြပွဲကို မြန်မာ့အရေး လှုပ်ရှားနေတဲ့ အဖွဲ့တွေ စုပေါင်းလုပ်ဆောင်ခဲ့ပြီး ဒေါ်အောင်ဆန်းစုကြည် အပါအဝင် ဖမ်းဆီးထားတဲ့ ခေါင်းဆောင်တွေကို အမြန်ဆုံး လွှတ်ပေးဖို့ စတဲ့ အိတ်ဖွင့် စာတစောင်ကိုလည်း ဆန္ဒပြသူတွေက ထိုင်းနိုင်ငံ၊ ကုလသမဂ္ဂရုံးကို ပေးအပ်ခဲ့ပါတယ်။

"၂ နှစ်ကာလမှာ စစ်အုပ်စုက အကြမ်းဖက် နည်းမျိုးစုံနဲ့ ပြည်သူတွေ ဒုက္ခတွေ ရောက်နေတယ်။ ၂ နှစ်ကာလအတွင်းမှာ ကျဆုံးသွားတဲ့ သူရဲကောင်းတွေလည်း အများကြီး ရှိတယ်။ ကျနော်တို့က တော်လှန်ရေးကို ဆက်လက် လုပ်သွားမှာပါ။ ၂ နှစ်သာ ပြည့်လာတယ်။ နိုင်ငံတကာက ထိထိရောက်ရောက် ဘာမှ အကူညီ မပေးနိုင်ဘူး။ ဒါကြောင့် ထိရောက်တဲ့ မက်ဆေ့ တခု ပေးနိုင်အောင် UN အပါအဝင် နိုင်ငံတကာ ကူညီပေးနိုင်အောင် ချပြတာပါ"လို့ UN ရုံးရှေ့ ဆန္ဒပြသူတစ်ဦးက ဒီဗွီဘီကို ပြောပါတယ်။

မြန်မာနိုင်ငံမှာတော့ ဖေဖော်ဝါရီ ၁ ရက်နေ့က စစ်အာဏာသိမ်းမှု ၂ နှစ်ပြည့်အနေနဲ့ တနိုင်ငံလုံးနီးပါး အသံတိတ်သပိတ် (Silent Strike) ကို ဆင်နွှဲခဲ့ကြပြီး၊ တနိုင်ငံလုံး အတိုင်းအတာနဲ့ မြို့ပေါင်း ၁၅၀ ကျော် ပါဝင်ခဲ့ကြတယ်လို့ လွတ်လပ်တဲ့ သုတေသန အဖွဲ့အစည်း Data for Myanmar က ထုတ်ပြန်ထားပါတယ်။

စစ်တပ်က ဆန္ဒပြပြည်သူတွေကို မတရား ဖမ်းဆီး၊ အကြမ်းဖက် နှိပ်စက် သတ်ဖြတ်မှုတွေ ပြုလုပ်နေပေမယ့် အာဏာသိမ်း ၂ နှစ်ပြည့်ကာလအထိ ပြည်သူတွေဟာ သွေးမအေးဘဲ စစ်အာဏာရှင်ကို နည်းမျိုးစုံနဲ့ ဆန့်ကျင် တော်လှန်နေကြပါတယ်။

(ZT)

ဓာတ်ပုံ - ကျော်ခိုင်

15 hours Ago

ချင်းရိုင်းတွင် စိတ်ကြွဆေးပြား ၃ သန်းကျော် ဖမ်းမိ

ထိုင်း-မြန်မာနယ်စပ်၊ ချင်းရိုင်းခရိုင်၊ ဝိန်းပါပေါက်မြို့နယ်ထဲမှာ ဖေဖော်ဝါရီ ၁ ရက်က စိတ်ကြွဆေးပြား ၃ သန်းကျော် ဖမ်းဆီးရမိတယ်လို့ မယ်ဆိုင်ပရက်စ်သတင်းမှာ ဖော်ပြပါတယ်။

ဒီမတိုင်ခင် ချင်းရိုင်းမြို့ရှိ မော်တော်ကားအငှားကုမ္ပဏီတခုဟာ အမျိုးသား တယောက် သူတို့ဆီက ဖော်ကျူနာအဖြူရောင်ကား တစီးကို တရက် ဘတ် ၂,၀၀၀ နှုန်းနဲ့ ငှားသွားကြောင်း၊ သူဟာ ကားရတာနဲ့ အဆောတလျင် မောင်းထွက်သွားလို့ သင်္ကာမကင်း ဖြစ်တာကြောင့် အဆိုပါကားကို လိုက်ကြည့်ပေးဖို့ ရဲစခန်းကို တိုင်ကြားထားတယ်လို့ ဆိုပါတယ်။

တာဝန်ရှိသူတွေက အဆိုပါကားကို လိုက်လံရှာဖွေရာမှာ ဝိန်းပါပေါက်မြို့နယ် ချင်းရိုင်း-ချင်းမိုင်သွား လမ်းမကြီးပေါ်က ဓာတ်ဆီဆိုင်တဆိုင်မှာ ရပ်နားထားတာ တွေ့ရတယ်လို့ တာဝန်ရှိသူတွေက ပြောပါတယ်။

ကားငှားလာသူမှာ အသက် ၂၉ နှစ်အရွယ် ထိုင်းမှတ်ပုံတင် ကိုင်ဆောင်ထားတဲ့ မုန့်တိုင်းရင်းသားတဦးဖြစ်ပြီး ဝိန်းပါပေါက်မှာ နေထိုင်ကြောင်း၊ ကားကိုစစ်ဆေးရာမှာတော့ နောက်ခန်းမှာ မြွေရေခွံအိတ်တွေထဲ ထည့်ထားတဲ့ စိတ်ကြွဆေးပြား စုစုပေါင်း ၃,၂၀၀,၀၀၀ ကို တွေ့ရတာလို့ ဆိုပါတယ်။

သူ့ကို လိုအပ်သလို အရေးယူဖို့နဲ့ ကွင်းဆက်တွေ စုံစမ်းဖော်ထုတ်ဖို့ ချင်းရိုင်းခရိုင်ရဲစခန်းမှာ ခေါ်ယူစစ်ဆေးနေပြီး အမှတ် ၅ ခရိုင်ရဲဌာနချုပ် ရဲမှူးချုပ်ကိုယ်တိုင် သတင်းစာရှင်းပွဲ လုပ်သွားမယ်လို့ မယ်ဆိုင်ပရက်စ် သတင်းမှာ ဖော်ပြထားပါတယ်။

16 hours Ago

ဖိလစ်ပိုင်က အမေရိကန်ကို စစ်အခြေစိုက်စခန်းများ တိုးချဲ့ခွင့်ပြု

အမေရိကန်ကာကွယ်ရေးဝန်ကြီး လွိုဒ်အော်စ်တင် မနီလာကို လာရောက်ဆွေးနွေးခဲ့ပြီး နောက်မှာ ဖိလစ်ပိုင်နိုင်ငံဟာ အမေရိကန်ပြည်ထောင်စုကို သူ့ရဲ့စစ်အခြေစိုက်စခန်းတွေဆီ တိုးချဲ့ဝင်ရောက်ခွင့်ပြုလိုက်ပြီဖြစ်ကြောင်း နှစ်နိုင်ငံစလုံးက ဖေဖော်ဝါရီ ၂ ရက်နေ့မှာ ပြောပါတယ်။

အငြင်းပွားတောင်တရုတ်ပင်လယ်မှာ တရုတ်နိုင်ငံရဲ့ အခိုင်အမာ နေရာယူလာမှုနဲ့ ကိုယ်ပိုင်အုပ်ချုပ်ခွင့်ရ ထိုင်ဝမ်အပေါ် တင်းမာမှုတွေကြောင့် စိုးရိမ်မှုတွေ တိုးလာနေချိန်မှာပဲ ၂၀၁၄ ခုနှစ်က တိုးမြှင့်ကာကွယ်ရေး ပူးပေါင်းဆောင်ရွက်ရေး သဘောတူညီချက် (EDCA) အောက်မှာ ဝါရှင်တန်ကို နောက်ထပ်နေရာ ၄ ခုကို ဝင်ရောက်ခွင့်ပေးမှာဖြစ်ကြောင်း နှစ်နိုင်ငံ ကာကွယ်ရေးဝန်ကြီးဌာနတွေရဲ့ ထုတ်ပြန်ချက်တွေအရ သိရပါတယ်။

EDCA သဘောတူညီချက်ဟာ ပူးတွဲလေ့ကျင့်ရေး၊ ပစ္စည်းကိရိယာတွေကို ကြိုတင်နေရာချထားခြင်းနဲ့ ပြေးလမ်းတွေ၊ လောင်စာဆီသိုလှောင်မှုနဲ့ စစ်ဘက်အိမ်ရာတွေလို အဆောက်အဦတွေ တည်ဆောက်ခြင်းတို့အတွက် ဖိလစ်ပိုင် စစ်အခြေစိုက်စခန်းတွေဆီ အမေရိကန် ဝင်ရောက်ခွင့်ကို ခွင့်ပြုထားပေမဲ့ အမြဲတမ်း တည်ရှိနေဖို့တော့ မဟုတ်ပါဘူး။

အော်စတင်နဲ့တွေ့ဆုံတဲ့ မနီလာရှိ စစ်စခန်းအပြင်ဘက်မှာ ဒါဇင်နဲ့ချီတဲ့ ဖိလစ်ပိုင် တက်ကြွလှုပ်ရှားသူတွေဟာ အမေရိကန်အလံကို မီးရှို့ပြီး ဆန္ဒပြခဲ့ကြပါတယ်။ 

သူတို့တွေဟာ ကာကွယ်ရေးသဘောတူညီချက်တွေကို ရှုတ်ချပြီး ဒီလိုလုပ်ရပ်တွေဟာ ဒေသတွင်း တင်းမာမှုတွေကိုသာ တိုးမြင့်လာစေတယ်လို့ ဆိုပါတယ်။

16 hours Ago

ဖြူးနှင့် အုတ်ဖိုတို့တွင် အုပ်ချုပ်ရေးမှူးများ ပစ်ခတ်ခံရ၊ မိုးညို၌ စစ်ကောင်စီတပ် မိုင်းဆွဲတိုက်ခိုက်

ပဲခူးတိုင်း၊ ဖြူးမြို့နယ်မှာ ဖေဖော်ဝါရီ ၁ ရက် ညနေပိုင်းက စစ်ကောင်စီခန့် အုပ်ချုပ်ရေးမှူးတယောက် ပစ်သတ်ခံရပြီး အုတ်ဖိုမြို့နယ်မှာလည်း ဇန်နဝါရီ ၁ ရက် ညက စစ်ကောင်စီခန့် အုပ်ချုပ်ရေးမှူးတယောက်ရဲ့နေအိမ် ဗုံးခွဲတိုက်ခိုက်ခံခဲ့ရတယ်လို့ ဖြူး ပ.က.ဖ နဲ့ သာယာဝတီခရိုင် တပ်ရင်း-၃၈၀၁ ကနေ သိရပါတယ်။

ဖြူးမြို့နယ်၊ မြပဲခူးကျေးရွာ စစ်ကောင်စီခန့် အုပ်ချုပ်ရေးမှူး ဦးညွန့်ဝင်းကို မနေ့ ဖေဖော်ဝါရီ ၁ ရက် ညနေပိုင်းက ကျေးပင်ပေါက်ရွာ အနောက်ဘက်လမ်းမှာ ဖြူးမြို့နယ် ပ.က.ဖ အမှန်တရား ချစ်မြတ်နိုးသူများအဖွဲ့က သေနတ်နဲ့ အသေပစ်ခတ် ရှင်းလင်းနိုင်ခဲ့တယ်လို့ ဖြူးမြို့နယ် ပ.က.ဖ တာဝန်ခံ ဗိုလ်ထိန်လင်းက ဒီဗွီဘီကို ပြောပါတယ်။

အဲဒီအုပ်ချုပ်ရေးမှူးဟာ မြပဲခူးအုပ်စု၊ ဝက်တူးရွာမှာ နေထိုင်သူဖြစ်ပြီး တော်လှန်ရေးတပ်ဖွဲ့တွေရဲ့ သတင်းတွေကို စုံစမ်းပြီး စစ်ကောင်စီထံ ပေးပို့တာတွေ၊ စစ်ကောင်စီနဲ့ပေါင်းပြီး ပြည်သူလူထုကို အနိုင်ကျင့် ဗိုလ်ကျတာတွေ၊ စစ်ကောင်စီ စစ်ကြောင်းတွေမှာ ကိုယ်တိုင်လိုက်ပါတာတွေကြောင့် နန်းထိုက်အောင်စစ်ဆင်ရေးအဖြစ် အသေပစ်ခတ် ရှင်းလင်းခဲ့တာလို့ ဆိုပါတယ်။

အုတ်ဖိုမြို့နယ်၊ ကြို့ကိုးပင်ရွာ စစ်ကောင်စီခန့် အုပ်ချုပ်ရေးမှူး တင်ဇော်မင်းရဲ့နေအိမ်ကို မနေ့ ဖေဖော်ဝါရီ ၁ ရက် ည ၉ နာရီလောက်မှာ နန်းထိုက်အောင်စစ်ဆင်ရေးအဖြစ် ဗုံးခွဲတိုက်ခိုက်ခဲ့တယ်လို့ သာယာဝတီခရိုင် တပ်ရင်း-၃၈၀၁၊ တပ်ခွဲ-၅ ရဲ့ တာဝန်ရှိသူတယောက်က ပြောပါတယ်။

“အဲဒီတိုက်ခိုက်မှုအတွင်းမှာ ထိခိုက်တဲ့ အခြေအနေတွေကိုတော့ အတိအကျ မသိရသေးဘူး။ အဲဒီအုပ်ချုပ်ရေးမှူးကတော့ စစ်ကောင်စီတပ်ကိုခေါ်ပြီး ပြည်သူတွေကို ဖမ်းဆီးခိုင်းတာတွေကြောင့် ဖမ်းဆီးခံရသူတွေရှိသလို ထွက်ပြေးတိမ်ရှောင်ရသူတွေလည်း ရှိနေတာကြောင့် သူ့ရဲ့နေအိမ်ကို ဗုံးခွဲတိုက်ခိုက်ခဲ့တာ။”

ပဲခူးတိုင်း၊ မင်းလှမြို့နယ်မှာလည်း ဇန်နဝါရီ ၂၉ ရက် ညက ပျူစောထီးခေါင်းဆောင် စစ်ကောင်စီခန့် အုပ်ချုပ်ရေးမှူးတယောက် သေနတ်နဲ့ ပစ်သတ်ခံခဲ့ရတယ်လို့ မင်းလှမြို့နယ် ပ.က.ဖ ကနေ သိရပါတယ်။

ပဲခူးတိုင်း၊ သာယာဝတီခရိုင်၊ မိုးညိုမြို့နယ်၊ ဆုံကုန်းကျေးရွာအုပ်စုအနီး ကားလမ်းဘေးမှာ “၂၀၂၃ ရွေးကောက်ပွဲ လုံးဝလက်မခံ စစ်အာဏာရှင်အလိုမရှိ” ချိတ်ဆွဲထားတဲ့ဗီနိုင်းကို လာဖြုတ်တဲ့ စစ်ကောင်စီတပ်ဖွဲ့ဝင်တွေကို ဇန်နဝါရီ ၃၀ ရက် မနက် ၉ နာရီလောက်မှာ မိုင်းဆွဲတိုက်ခိုက်ခဲ့တယ်လို့ ပဲခူး PDF တွေက ဒီနေ့မှာ ထုတ်ပြန်လိုက်ပါတယ်။

အဆိုပါတိုက်ခိုက်မှုကို သာယာဝတီခရိုင် PDF တပ်ရင်း-၃၈၀၂၊ တပ်ခွဲ-၄ (မိုးညိုမြို့နယ်ပြည်သူ့ကာကွယ်ရေးတပ်ဖွဲ့) က လုပ်ဆောင်ခဲ့တာလို့လည်း ဆိုပါတယ်။

မြေပြင်သတင်းရင်းမြစ်တွေအရ မိုင်းဆွဲတိုက်ခိုက်ခံရမှုကြောင့် စစ်ကောင်စီတပ်ဖွဲ့ဝင် ၂ ဦး အပြင်းအထန် ဒဏ်ရာရရှိခဲ့ပြီး သေဆုံးခြင်းရှိမရှိကိုတော့ အတည်ပြုနိုင်ခြင်း မရှိသေးသလို တော်လှန်ရေးတပ်ဖွဲ့ဝင်တွေ အထိအခိုက်မရှိ အောင်မြင်စွာ ဆုတ်ခွာနိုင်ခဲ့တယ်လို့ ပဲခူး PDF ရဲ့ ထုတ်ပြန်ချက်မှာ ဖော်ပြထားပါတယ်။

16 hours Ago

မုံရွာတွင် စစ်တပ်နှင့် ပျူစောထီးများ ပစ်ခတ်မှုကြောင့် အဘွားအို ၁ ဦး ဒဏ်ရာရ၊ ရွှေဘို တိုက်ပွဲအတွင်း PDF ၃ ဦးကျဆုံး

စစ်ကိုင်းတိုင်း၊ မုံရွာမြို့နယ်၊ တောပုရွာက စစ်ကောင်စီတပ်နဲ့ ပျူစောထီးတွေ ဖေဖော်ဝါရီ ၁ ရက် ည ၈ နာရီခွဲလောက်က လက်နက်ကြီးနဲ့ နဂါးတွင်းရွာဘက်ကို ပစ်ခတ်ခဲ့တယ်လို့ ဒေသခံတွေဆီက သိရပါတယ်။

အခုလို လက်နက်ကြီးနဲ့ပစ်ခတ်လို့ အဘွားအိုတဦး ကျည်ထိမှန်ခဲ့ပြီး ဘုန်းတော်ကြီးကျောင်း အဆောက်အဦတလုံး ပျက်စီးခဲ့တယ်လို့ ဆိုပါတယ်။

မုံရွာ အောင်ဆန်းဖို့စ် ပြည်သူ့ကာကွယ်ရေးအဖွဲ့ ခေါင်းဆောင်က‌ “မနေ့ညကပစ်လို့ ရွာကလူတွေကတော့ အကုန်ထွက်ပြေးနေကြရတယ်။ ကျည်ထိမှန်တဲ့ အဘွားကတော့ အသက် ၈၈ နှစ်ရှိပြီဗျ။ ညာဘက်ရင်အုံကို ကျည်စထိတယ်။ ဆေးကုသပေးထားတယ်။ အသက်အန္တရယ်တော့ မစိုးရိမ်ရတော့ဘူး။ အဲ့အဘွားက နဂါးတွင်းရွာ ဘုန်းကြီးကျောင်း ဘေးမှာနေတာ။ ဘုန်းကြီးကျောင်းပေါ်လည်း လက်နက်ကြီးကျပြီး အမိုးအကာ ပျက်စီးတာတွေလည်း ရှိတယ်။ ကြမ်းခင်းရယ် သမံတလင်းရယ်လည်း ပျက်စီးသွားတယ်” လို့ ‌ေပြာပါတယ်။

တောပုရွာက ပျူစောထီးတွေဟာ အခုလို နေ့တိုင်းလိုလို ပစ်ခတ်လေ့ရှိပြီး ပစ်ခတ်တဲ့ အကြောင်းရင်းဟာ ပျူစခန်းအတွင်း စားစရာမရှိတာကြောင့် ဒေသခံ အနီးအနားကျေးရွာ ဒေသခံတွေ ကြောက်လန့်အောင် ပစ်ခတ်ပြီး ရွာသားတွေ ရွာထဲမရှိမှ ပစ္စည်းနဲ့ စားနပ်ရိက္ခာတွေ အကြိမ်ကြိမ်ယူရလေ့ရှိတယ်လို့လည်း သိရပါတယ်။

စစ်ကိုင်းတိုင်း၊ ရွှေဘိုမြို့နယ်ထဲက ဘုန်းဘွဲ့ကျေးရွာမှာ ဖေဖော်ဝါရီ ၁ ရက်က စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့ဖြစ်တဲ့ Black Wolf PDF အဖွဲ့ ထိတွေ့ တိုက်ပွဲဖြစ်ပွားခဲ့ပြီး ပြည်သူ့ကာကွယ်ရေးအဖွဲ့က ရဲဘော် ၃ ဦး ကျဆုံးခဲ့တယ်လို့ တပ်ဖွဲ့ ပြန်ကြားရေးတာဝန်ခံက ပြောပါတယ်။

ကျဆုံးခဲ့တဲ့သူတွေက ပြည်သူ့ကာကွယ်ရေးတပ်ဖွဲ့က တပ်စုမှူးတဦးနဲ့ ရဲဘော် ၂ ဦးဖြစ်ပြီး လက်နက်ကြီးထိမှန်လို့ တိုက်ပွဲဖြစ်ပွားတဲ့နေရာမှာတင် ၂ ယောက်က ပွဲချင်းပြီး ကျဆုံးခဲ့သလို နောက်တယောက်ကတော့ ရရှိတဲ့ဒဏ်ရာတွေနဲ့ ကျဆုံးခဲ့တယ်လို့ ဆိုပါတယ်။

လက်ရှိမှာတော့ ပြည်သူ့ကာကွယ်ရေးတပ်ဖွဲ့အနေနဲ့ စားနပ်ရိက္ခာနဲ့ တိုက်ပွဲဖော်ဆောင်ဖို့ လက်နက်ခဲယမ်းတွေ လိုအပ်နေတယ်လို့လည်း တပ်ဖွဲ့ ပြန်ကြားရေးတာဝန်ခံက ပြောပါတယ်။

အခုနှစ်ဆန်းပိုင်းကစပြီး စစ်ကိုင်းတိုင်းထဲက ရွှေဘို၊ ခင်ဦး၊ ဒီပဲယင်းမြို့နယ်တွေမှာ စစ်ကောင်စီတပ်ဖွဲ့ဝင်တွေက စစ်ကြောင်းထိုးနေပြီး ကျေးရွာတွေကို မီးရှို့ဖျက်ဆီးနေတဲ့အတွက် ဒေသခံတွေ သောင်းနဲ့ချီပြီး ထွက်ပြေး တိမ်းရှောင်နေကြရပါတယ်။

16 hours Ago

သံအမတ်ကြီး ဦးကျော်မိုးထွန်းနှင့် NUCC တို့ ငြိမ်းချမ်းရေးနိုဘယ်ဆု အမည်စာရင်းသွင်းခံရ

နော်ဝေနိုင်ငံအခြေစိုက် ငြိမ်းချမ်းရေး သုတေသနအဖွဲ့တဖွဲ့ဖြစ်တဲ့ Peace Research Institute Oslo (PRIO) က ၂၀၂၃ ခုနှစ်အတွက် ငြိမ်းချမ်းရေးနိုဘယ်ဆုစာရင်း အမည်စာရင်းတင်သွင်းရာမှာ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းနဲ့ အမျိုးသားညီညွတ်ရေး အတိုင်ပင်ခံကောင်စီ (NUCC) တို့ ပါဝင်လာပါတယ်။

ဖေဖော်ဝါရီ ၁ ရက်က တင်သွင်းတဲ့ ဆန်ကာတင်လူပုဂ္ဂိုလ်နဲ့ အဖွဲ့အစည်း ၅ ခု စာရင်းထဲမှာတော့ သံအမတ်ကြီး ဦးကျော်မိုးထွန်း၊ NUCC တို့နဲ့အတူ အီရန်နဲ့ အာဖဂန်နစ္စတန်နိုင်ငံတွေက လူ့အခွင့်အရေး တက်ကြွလှုပ်ရှားသူ အမျိုးသမီး ၂ ယောက် ဖြစ်တဲ့ နာဂိစ်မိုဟမ်မဒီနဲ့ မာဟ်ဘူဘာဆာရာဂျ်၊ ဖိလစ်ပိုင်နဲ့ အီကွေဒေါနိုင်ငံတွေက ဌာနေတိုင်းရင်းသားအခွင့်အရေး ဆောင်ရွက်နေသူတွေဖြစ်ကြတဲ့ ဗစ်တိုးရီးယားတာအူလီကော်ပတ်ဇ်နဲ့ ယန်းကားလို့စ်ဂျင်တီရာချ် တို့ကို ပူးတွဲတင်သွင်းထားပြီး အပြည်ပြည်ဆိုင်ရာတရားရုံး (အိုင်စီဂျေ)၊ လူ့အခွင့်အရေးဆိုင်ရာ အချက်အလက်တွေ သုတေသနပြု အဖွဲ့အစည်းတခုဖြစ်တဲ့ Human Rights Data Analysis Group (HRDAG) အဖွဲ့တွေ ပါဝင်နေတာပါ။

စစ်အာဏာသိမ်းမှုကိုဆန့်ကျင်တဲ့ လက်သုံးချောင်းထောင်ပုံရိပ်နဲ့အတူ ပြည်တွင်းမှာရော၊ နိုင်ငံတကာစာမျက်နှာတွေပေါ် ထင်ရှားခဲ့တဲ့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် အသံအမတ်ကြီး ဦးကျော်မိုးထွန်းကတော့ ၂၀၂၁ ဖေဖော်ဝါရီ ၁ ရက် စစ်အာဏာသိမ်းပြီးနောက်ပိုင်း ဖေဖော်ဝါရီ ၂၆ ရက်မှာ နယူးယောက်မြို့က ကုလသမဂ္ဂအထွေထွေညီလာခံမှာ အာဏာသိမ်းစစ်ကောင်စီကို ပြတ်ပြတ်သားသား ဆန့်ကျင်ပြီး ဒေါ်အောင်ဆန်းစုကြည် ဦးဆောင်တဲ့ ပြည်သူကရွေးချယ်ထားတဲ့ အစိုးရအတွက် ကိုယ်စားပြု ပြောဆိုခဲ့သူ ပြည်သူနဲ့ တသားတည်းရပ်တည်ခဲ့သူ ဖြစ်ပါတယ်။

အာဏာသိမ်းစစ်ကောင်စီက သူ့ကို နိုင်ငံအပေါ် သစ္စာဖောက်မှုနဲ့ ရာထူးကနေ ထုတ်ပယ်ကြောင်း ကြေညာခဲ့ပါတယ်။ ဒါပေမဲ့ ကမ္ဘာ့ကုလသမဂ္ဂအနေနဲ့ စစ်ကောင်စီကို မြန်မာနိုင်ငံအစိုးရသစ်အဖြစ် အသိအမှတ်မပြုဘဲ ဦးကျော်မိုးထွန်းဟာ မြန်မာနိုင်ငံ သံအမတ်အဖြစ် ဆက်လက်ရှိနေကြောင်း သတ်မှတ်ထားတာ ဖြစ်ပါတယ်။

လတ်တလောမှာတော့ ဦးကျော်မိုးထွန်းဟာ ရွေးကောက်ပွဲအနိုင်ရ NLD အစိုးရ လွှတ်တော်ကိုယ်စားလှယ်တွေ၊ တိုင်းရင်းသားလူနည်းစု ကိုယ်စားလှယ်တွေနဲ့ ဖွဲ့စည်းထားတဲ့ အမျိုးသားညီညွတ်ရေးအစိုးရ (NUG) ကို ကိုယ်စားပြုနေပြီး မြန်မာ့ဒီမိုကရေစီအရေးအတွက် ဆက်လက်ပြီးတော့ ပါဝင်နေတာ ဖြစ်ပါတယ်။ အမျိုးသားညီညွတ်ရေးအတိုင်ပင်ခံကောင်စီ (NUCC) ကတော့ မြန်မာနိုင်ငံမှာ စစ်အာဏာရှင်စနစ် အဆုံးသတ်ပြီး ဖက်ဒရယ်နိုင်ငံ ဖြစ်လာစေဖို့ အားလုံးပါဝင်တဲ့ အဖွဲ့တဖွဲ့ဖြစ်ကြောင်း ထုတ်ပြန်ချက်မှာ ဖော်ပြထားပါတယ်။

ငြိမ်းချမ်းရေးနိုဘယ်ဆုအတွက် ရွေးချယ်ခံရသူကိုတော့ နော်ဝေနိုင်ငံအခြေစိုက် နိုဘယ်ဆုရွေးချယ်ရေးကော်မတီက နှစ်စဉ် အောက်တိုဘာလမှာ ကြေညာလေ့ရှိပြီး ဆုချီးမြှင့်ပွဲကိုတော့ ဒီဇင်ဘာ ၁၀ ရက်နေ့မှာ ကျင်းပလေ့ရှိပါတယ်။ ငြိမ်းချမ်းရေးနိုဘယ်ဆုဟာ လူသားမျိုးနွယ်အတွက် အကြီးမားဆုံးသော အကျိုးကို ဆောင်ခဲ့ကြသူတွေကို အသိအမှတ်ပြုဖို့ ရည်ရွယ်ထားတာ ဖြစ်ပါတယ်။

မြန်မာနိုင်ငံမှာစစ်အာဏာရှင်ကိုဆန့်ကျင်တော်လှန်တဲ့ နွေဦးတော်လှန်ရေးမှာ အဓိက နေရာက ပါဝင်နေတဲ့  အကြမ်းမဖက်အာဏာဖီဆန်ရေးလှုပ်ရှားမှု (CDM - Civil Disobedience Movement) ကိုလည်း  နော်ဝေနိုင်ငံအော်စလိုတက္ကသိုလ်မှ ပါမောက္ခ ၆ ဦးက  ၂၀၂၃ ခုနှစ် နိုဘယ်လ်ငြိမ်းချမ်းရေးဆုအတွက် အမည်စာရင်းတင်သွင်းထားပါတယ်။

17 hours Ago

အမေရိကန်နှင့် တောင်ကိုရီးယား ပူးတွဲ လေကြောင်းစစ်ရေးလေ့ကျင့်

အမေရိကန်နဲ့ တောင်ကိုရီးယားတို့ဟာ အမေရိကန် B-1B အကြီးစား ဗုံးကြဲလေယာဉ်တွေ၊ F-22 ကိုယ်ပျောက်တိုက်လေယာဉ်တွေနဲ့ နှစ်နိုင်ငံစလုံးက F-35 ဂျက်လေယာဉ်တွေကိုသုံးပြီး ပူးတွဲ လေကြောင်းစစ်ရေးလေ့ကျင့်မှုကို ဖေဖော်ဝါရီ ၁ ရက်က ပြုလုပ်ခဲ့ကြောင်း တောင်ကိုရီးယား ကာကွယ်ရေးဝန်ကြီးဌာနက ထုတ်ပြန်ထားပါတယ်။

ဒီတကြိမ် ပူးတွဲလေကြောင်းလေ့ကျင့်မှုဟာ မြောက်ကိုရီးယားရဲ့ နျူးကလီးယားနဲ့ ဒုံးကျည် ခြိမ်းခြောက်မှုတွေအပေါ် ခိုင်မာပြီး ယုံကြည်စိတ်ချရတဲ့ တိုးချဲ့တားဆီးမှုလုပ်ပေးတဲ့ အမေရိကန်ရဲ့ ဆန္ဒနဲ့ စွမ်းဆောင်ရည်ကို ပြသနေပါတယ်လို့ ကာကွယ်ရေးဝန်ကြီးဌာနက ထုတ်ပြန်ချက်မှာ ဖော်ပြထားပါတယ်။

အခုလိုပူးပေါင်းစစ်ရေးလေ့ကျင့်မှုဟာ လက်မခံနိုင်စရာ ကန့်သတ်ချက်ကို အဆုံးစွန်ထိ ကျော်လွန်လာပြီလို့ မြောက်ကိုရီးယား နိုင်ငံခြားရေးဝန်ကြီးဌာနက ဖေဖော်ဝါရီ ၂ ရက်မှာ တုံ့ပြန်ခဲ့ပြီး ကိုရီးယားကျွန်းဆွယ်ကို ကြီးမားတဲ့ စစ်လက်နက်တိုက်နဲ့ သိပ်ကိုအန္တရာယ်ကြီးတဲ့ စစ်ပွဲဇုန်အဖြစ် ပြောင်းလဲပစ်လိုက်မယ်လို့လည်း ခြိမ်းခြောက်ခဲ့ပါတယ်။

အမေရိကန်တပ်ဖွဲ့ဝင် ၂၈,၅၀၀ ကျော်ဟာ တောင်ကိုရီးယားနိုင်ငံမှာ အခြေစိုက်ထားတာ ဖြစ်ပြီး ငြိမ်းချမ်းရေးစာချုပ် မဟုတ်ဘဲ စစ်ရပ်ဆိုင်းခြင်းအနေနဲ့ ပြီးဆုံးသွားတဲ့ ၁၉၅၀-၁၉၅၃ ကိုရီးယားစစ်ပွဲရဲ့ အကျိုးဆက်အဖြစ် ရှိနေတာဖြစ်ပါတယ်။

18 hours Ago

ကရင်နီတော်လှန်ရေးသမီးပျိုတဦးရဲ့ ဒရမ်ရိုက်ချက်များဖြင့် Cover ပုံဖော်ထားသည့် ဖြူဖြူကျော် သိန်း၏ သီချင်း-“စစ်”(ရုပ်သံ)

“ငါအော်ကာနေမယ် ရပ်… စစ်ပွဲတို့ချုပ်ငြိမ်းလိုက်… တိုးတက်နေတဲ့ တိုင်းပြည်များကို ကျည်ဆံနဲ့တည်ဆောက်မရ… ငါအော်ကာနေမယ် ရပ်… စစ်ပွဲတို့ချုပ်ငြိမ်းလိုက်… တိုးတက်နေတဲ့ တိုင်းပြည်များကို ကျည် ဆံနဲ့ တည်ဆောက်မရ… ကျည်ဆံနဲ့ တည်ဆောက်မရ”

ဒါကို ကြားလိုက်တာနဲ့ ပရိသတ်တွေက နာမည်ကြီး တေးသံရှင်တယောက်ဖြစ်တဲ့ ဖြူဖြူကျော်သိန်း သီဆိုတဲ့ “စစ်” ဆိုတဲ့ သီချင်းထဲက တေးသွားစာသားတွေမှန်း သိကြပြီး ဖြစ်မှာပါ။ ခုတခါမှာတော့ ဒီသီချင်းကို မြေပြင်တိုက်ပွဲတွေ ပြင်းထန်နေတဲ့ ကရင်နီပြည်နယ်က တော်လှန်ရေးသမီးပျို မိန်းကလေးငယ်တယောက်ရဲ့ ဒရမ်ရိုက်ချက်တွေ တီးခတ်ပုံဖော်မှုတွေနဲ့ ရှုစားနားဆင်ကြရမှာပါ။

“စစ်” သီချင်းရဲ့ ဒရမ် Cover သီဆိုမှု ဒီရုပ်သံဗွီဒီယိုဖိုင်ကို တေးသံရှင် ဖြူဖြူကျော်သိန်းက ဖေ့စ်ဘွတ်ခ်အင်တာနက်လူမှုကွန်ရက်စာမျက်နှာပေါ်ကတဆင့် ပြန်လည်မျှဝေထားခဲ့ပြီး ခုလိုရေးသား ဖော်ပြထားခဲ့တာ တွေ့ရပါတယ်။

“တလောက online တက်ရင်း ဒီသီချင်းလေးကို မိန်းမငယ်လေးတစ်ယောက်က drum cover လေးတီးထားတာ သွားတွေ့တယ်။ အပီအပြင် mood အပြည့်နဲ့။ တီးထားတာလေးလည်း ကောင်းပါ့။ drum ချက်‌တွေ ရိုက်ချလိုက်တိုင်း ကျည်ဆန်တွေထွက်ကျလာသလို ရိုက်ထားတာ။ အော်… သူ့ကို ဒီ သီချင်းမတီးမဆိုဖို့ ဘယ်သူမှတားမယ့်သူ မရှိတော့ဘူးပဲ။ တားလည်း မတားနိုင်ကြ‌တော့ဘူးပေါ့။ ကံကောင်းလိုက်တာလို့… ဒါပေမယ့်...သူကလေ…မီးလောင်ပျက်စီး ပြာကျပြီး စစ်မြေပြင် ဖြစ်သွားတဲ့ မြန်မာပြည်ကြီးရဲ့ တစ်နေရာမှာ စစ်ဝတ်စစ်စားနဲ့  drum လေးချပြီး တီးနေရှာတာ... အော်…လွတ်လပ်ခြင်းဆိုတာ အတော်လည်း ဈေးကြီးတာပါလားလို့”

လတ်တလောမှာတော့ မြန်မာနိုင်ငံမှာ အကြမ်းဖက်စစ်အုပ်စုက ပြည်သူ့ဆန္ဒကို မျက်ကွယ်ပြုကာ မတရားအာဏာသိမ်းယူထားခဲ့တဲ့ ကာလဟာ ၂ နှစ်တာ ကြာမြင့်နေခဲ့ပြီဖြစ်ပြီး တိုင်းဒေသကြီးနဲ့ ပြည်နယ်တွေအနှံ့ စစ်အာဏာရှင်ဆန့်ကျင်တော်လှန်ရေး မြေပြင်တိုက်ပွဲတွေ၊ သပိတ်စစ်ကြောင်းတွေ၊ လူထုတော်လှန်ရေးလှုပ်ရှားမှုတွေနဲ့ မတည်ငြိမ်တဲ့ အခြေအနေတွေနဲ့ ရင်ဆိုင်နေကြရတာ ဖြစ်ပါတယ်။

“ယမ်းငွေ့ကြားထဲ အတုံးအရုံး လဲပြိုကျ… သွေးချောင်းစီးခဲ့ စစ်ရဲ့ ဆိုးမွေကြား… ပျောက်ဆုံးသွားခဲ့တဲ့ အိမ်ရာများ… ပျက်စီးသွားခဲ့တဲ့ ကလေးငယ်များ… အနာဂတ်ပျောက်ခဲ့တာ တို့ပြည်သူများပဲ… အမုန်းတရား အချင်းချင်း တုံ့နှင်းတဲ့ စစ်မက်များ… ငြိမ်းချမ်းခြင်းက စာချုပ်အထက် လက်မှတ်များသာ… စတေးခဲ့ရတာ ပြည်သူများ… စာချုပ်အနောက်ဖက်မှာ အသက်တွေပါ… ကျည်ဆံကြားက ဘဝဟာ အဓိပ္ပါယ်မဲ့ခြင်းသာ”

တော်လှန်ရေး မိန်းမငယ် Maw ReeRe ရဲ့ ကာဗာအနေနဲ့ ပြန်လည်ပုံဖော်ဖန်တီးမှုမှာတော့ တော်လှန်ရေးစစ်ဝတ်စုံနဲ့ မီးလောင်ပြင်ထဲက အပျက်အစီးတွေကြားမှာ အသက်ဝင်တဲ့ ဒရမ်ရိုက်ချက်တွေနဲ့အတူ လတ်တလော အခြေအနေတွေကို ထင်ဟပ်နေခဲ့တာကို တွေ့ရမှာပါ။

စစ်အာဏာသိမ်း ၂ နှစ်တာ ကာလတွေအတွင်း အကြမ်းဖက်စစ်ကောင်စီက နည်းလမ်းပေါင်းစုံနဲ့ ရက်စက်စွာ ညှန်းပန်းနှိပ်စက် သတ်ဖြတ်မှုကြောင့် သေဆုံးခဲ့တဲ့ ပြည်သူစုစုပေါင်း ၂,၈၉၄ ယောက်ရှိခဲ့ပြီး အရပ်သားတွေကို ပစ်မှတ်ထား တိုက်ခိုက်မှုတွေကြောင့် နေရပ်စွန့်ခွာ ထွက်ပြေးနေကြရတဲ့ စစ်ဘေးရှောင်ဦးရေ ၁ သန်းခွဲကျော် ရှိလာပြီလို့ အမျိုးသားညီညွတ်ရေးအစိုးရ (NUG) က ပြောပါတယ်။

ကရင်နီပြည်နယ်ဟာလည်း မြန်မာ့နွေဦးတော်လှန်ရေးမှာ ရှေ့တန်းကနေ စစ်အာဏာရှင်ကို ဆန့်ကျင်တော်လှန်ခဲ့တဲ့ ပြည်နယ်တခုဖြစ်နေပြီး အကြမ်းဖက်စစ်အုပ်စုက လေကြောင်းကရော မြေပြင်ကပါ ထိုးစစ်ဆင် ဖိနှိပ်မှုတွေ ခံနေရတဲ့ ပြည်နယ်တခု ဖြစ်ကာ အကြမ်းဖက် သတ်ဖြတ်ခံရမှုတွေ၊ ရွာလုံးကျွတ် မီးရှို့ဖျက်ဆီးခံရမှုတွေနဲ့ပါ ရင်ဆိုင်နေရတာ ဖြစ်ပါတယ်။

18 hours Ago

ထိုင်းနှင့်ကမ္ဘောဒီးယား လက်ဝှေ့အပါအဝင် ရိုးရာယဉ်ကျေးမှု မူပိုင်ကိစ္စ အငြင်းပွား

လတ်တလော ထိုင်းနဲ့ ကမ္ဘောဒီးယားနှစ်နိုင်ငံအကြား ရိုးရာကိုယ်ခံပညာလက်ဝှေ့ အပါအဝင် ဆင်တူတဲ့ ယဉ်ကျေးမှုရိုးရာမူပိုင်ဆိုင်ရာ အငြင်းပွါးမှုတွေ လူမှုကွန်ရက်မှာ ကျယ်ကျယ်ပြန့်ပြန့် ဖြစ်နေပါတယ်။

လာမယ့်မေလထဲ ကမ္ဘောဒီးယားနိုင်ငံက အိမ်ရှင်အဖြစ် ကျင်းပမယ့် ၃၂ ကြိမ်မြောက် ဆီးဂိမ်းစ် အားကစားပွဲတော်မှာ မွေထိုင်းဆိုတဲ့ ရိုးရာလက်ဝှေ့ထိုးပွဲအမည်ကို ကမ္ဘောဒီးယား ဆီးဂိမ်းစ်ပြိုင်ပွဲကျင်းပရေးကော်မတီက Kum Khmer ( ကွမ်းခမာ ကမ္ဘောဒီးယားရိုးရာလက်ဝှေ့) အဖြစ် အမည်ပြောင်းလဲလိုက်ရာက အငြင်းပွားမှုတွေ စတင်ခဲ့တာဖြစ်ပါတယ်။ 

ဒီကိစ္စနဲ့ ပတ်သက်ပြီး နိုင်ငံတကာမွေးထိုင်းလက်ဝှေ့သမဂ္ဂ ( IFMA ) က ဆီးဂိမ်းစ်ပြိုင်ပွဲမှာ ပါဝင်မယ့်အားကစားအမည်နာမတွေကို ပြောင်းလဲလိုပါက နိုင်ငံတကာ အိုလံပစ်အားကစားအဖွဲ့ ( IOC )ကိုတင်ပြသင့်ကြောင်း၊ မွေထိုင်းဟာ နိုင်ငံတကာမှာထင်ရှားပြီး ဆီးဂိမ်းပြိုင်ပွဲထဲမှာ ပါဝင်ယှဉ်ပြိုင်ရမယ့် စည်းကမ်းချက်တွေဟာလည်း မွေထိုင်းစည်းကမ်းချက်တွေအတိုင်းဖြစ်လို့  အမည်ပြောင်းဖို့ မသင့်လျော်ကြောင်း  ထောက်ပြခဲ့တယ်လို့ ဆိုပါတယ်။ 

ဒါပေမယ့် ကမ္ဘောဒီးယားဘက်ကတော့ လက်ဝှေ့ထိုးခြင်းဟာ ကမ္ဘောဒီးယားတို့ရဲ့ ရှေးရိုးရာ ကိုယ်ခံပညာအားကစားနည်းဖြစ်လို့ Kum Khmer (ကွမ်းခမာ) ဆိုတဲ့အမည်ကိုပဲ သုံးမယ်လို့ အ ကြောင်းပြန်ခဲ့ပါတယ်။ 

ဒါကြောင့် မွေထိုင်းလက်ဝှေ့သမဂ္ဂက ကန့်ကွက်တဲ့အနေနဲ့ အဆိုပါလက်ဝှေ့ထိုးပြိုင်ပွဲမှာ ထိုင်းနိုင်ငံက ဝင်မပြိုင်ဖို့ ဆုံးဖြတ်လိုက်သလို ကမ္ဘောဒီးယားဘက်ကလည်း လာမယ့် ၂၀၂၅ ခုနှစ် ထိုင်းနိုင်ငံက အိမ်ရှင်အဖြစ်အလှည့်ကျကျင်းပမယ့် ဆီးဂိမ်းမှာ သူတို့ဆီက လက်ဝှေ့ပြိုင်သမားတွေ စေလွှတ်မှာမဟုတ်ဘူးလို့ တုံ့ပြန်ခဲ့ပါတယ်။

ဒီသတင်းထွက်ပေါ်တဲ့နောက် နှစ်ဘက်နိုင်ငံလူမှုကွန်ရက်မှာ ရိုးရာလက်ဝှေ့အားကစားဟာ ဘယ်ခေတ်၊ ဘယ်အခါဘယ်သူလက်ထက်ကစတင်ခဲ့တယ်ဆိုတဲ့ အထောက်အထားတွေ ရှာဖွေတင်ပြလာကြပြီး ဘယ်သူကပိုပြီးရှေးကျတယ် ဘယ်သူက ဘယ်သူ့ကိုတုပတယ်ဆိုတဲ့ အငြင်းပွါးမှုတွေ ထွက်ပေါ်လာပါတယ်။  

ကမ္ဘောဒီးယားလူမှုကွန်ရက်မှာလည်း ထိုင်းဟာ ကမ္ဘောဒီးယားဆီက ရိုးရာလက်ဝှေ့အား ကစားကို တုပယူထားသလို ထိုင်းနာမည်ကြီးလက်ဝှေ့သမား ဘိုခေါဝ်ဟာလည်း ကမ္ဘောဒီးယားလူမျိုးဖြစ်ကြောင်း၊ ဒါ့အပြင် ထိုင်းနိုင်ငံက ဆင်နောက်ခံနဲ့ လက်ဝှေ့ထိုးနေတဲ့ပုံကို BOKATOR ဆိုတဲ့ ကမ္ဘောဒီးယားလက်ဝှေ့ဆိုတဲ့ စာတန်းနဲ့ပိုစတာတွေ ပျံ့နှံ့နေတယ်လို့ ဆိုပါတယ်။

ထိုင်းသတင်းထောက်က ဘိုခေါဝ်ကို မေးမြန်းရာမှာ ဘိုခေါဝ်ကတော့ သူဟာ ကမ္ဘောဒီးယားမဟုတ်၊ ကွီတိုင်းရင်းသားသာဖြစ်တယ်၊ လက်ဝှေ့ပညာကိုလည်း ထိုင်းဆရာတွေဆီကသာ လေ့ကျင့်သင်ယူခဲ့တယ်လို့ ဖြေပါတယ်။

အလားတူ ကမ္ဘောဒီးယားလက်ဝှေ့ပိုစတာနဲ့ ပတ်သက်လို့ ခူးဝေါင်းမာနုဖုန်းဆိုသူ လက်ဝှေ့ သမားက အဆိုပါပုံဟာ သူ့ပုံဖြစ်ကြောင်း၊ မနှစ်က   ထိုင်းအရှေ့မြောက်ပိုင်း ဆူရင်း ခရိုင်ဆင်စခန်းမှာ သွားရောက်ရိုက်ကူးထားတာဖြစ်ပြီး သူဟာ ထိုင်းမိဘကနေ ထိုင်းမှာ မွေးတဲ့ ထိုင်းနိုင်ငံသားစစ်စစ်ဖြစ်တယ်၊ သူနဲ့ သူ့ဓာတ်ပုံဟာ ကမ္ဘောဒီးယားနဲ့ ဘယ်လိုမှ မဆက်စပ်ဘူးလို့ ဖြေကြားခဲ့ပါတယ်။

လတ်တလော ကမ္ဘောဒီးယားလက်ဝှေ့သမားဘောင်းဘီရှေ့မှာ ထိုင်းအစိုးရဌာနဆိုင်ရာ လိုဂိုတံဆိပ် ဂဠုန်ပုံကို ထည့်သွင်းထားတာလည်း ထိုင်းလူမျိုးတွေကို ပိုမိုဒေါသထွက် စေပါတယ်။ 

မူပိုင်အငြင်းပွါးနေတာမှာ လက်ဝှေ့သာမက ခွန်လို့ခေါ်တဲ့ မျက်နှာဖုံးစွပ်အက ၊ သင်္ကြန်ရေသဘင်ပွဲ ၊ ကရဝိတ်ဖောင်ပုံစံ၊ မုံ့လုံးရေပေါ်၊ ကျက္ကရီနန်းတွင်းအမျိုးသမီးဝတ်တဘက်ရင်လွှားဝတ်စုံ၊ ဘုန်းကြီးကျောင်းစုလျစ်မွန်းချွန်ကနုတ်ပန်း စတာတွေလည်း ပါဝင်ပါတယ်။ 

ဒါ့အပြင် ကမ္ဘာကျော် အမျိုးသမီးအဆိုတော် လီဆာဟာလည်း ကမ္ဘောဒီးယားအနွယ်ဖြစ်ပြီး သူရဲ့ကျော်ကြားတဲ့  LALISA MV ထဲက ဘူရီရမ်မုခ်ဦးပုံမှာ ခမာ(ကမ္ဘောဒီးယား) လက်ရာဖြစ်တယ်လို့ ကမ္ဘောဒီးယားလူ မှုကွန်ရက်တွေမှာ ပြောလာပြန်ပါတယ်။ 

အခုလိုအငြင်းပွါးနေတာတွေနဲ့ ပတ်သက်ပြီး ထိုင်းနိုင်ငံဆိုင်ရာ အာဂျင်တီးနားအငြိမ်းစား သံမှူးဖြစ်သူနရိတ်သ်ရို့တ် ဖို့ရဘင်ကတော့  ထိုင်းနဲ့ ကမ္ဘောဒီးယားနိုင်ငံဟာ ရှေးနှစ် ပေါင်းများစွာကတည်းက နယ်နိမိတ်ထိစပ် အိမ်နီးချင်းနိုင်ငံဖြစ်သလို နှစ်နိုင်ငံပြည်သူတွေလည်း ကူးလူးဆက်ဆံနေတာကြောင့် တူညီတဲ့ ရိုးရာယဉ်ကျေးမှု၊ ဝတ်စားဆင်ယင်မှု၊  ပွဲလမ်းသဘင်၊ အားကစားနဲ့ အစားအစာတွေလည်းရှိကြောင်းပြောပါတယ်။

နယ်စပ်ပြည်သူတွေမှာလည်း  ရွှေ့ပြောင်းနေထိုင်တာ၊ လက်ထပ်ထိမ်းမြားတာကြောင့် ဆွေမျိုးရင်း ချာတွေဖြစ်သွားသလို နိုင်ငံသားခံယူတာတွေလည်းရှိကြောင်း၊ လက်ဝှေ့၊ သင်္ကြန်ရေသဘင် စတာတွေဟာ ထိုင်းနဲ့ ကမ္ဘောဒီးယားတင်မက လာအို၊ မြန်မာစတဲ့ အရှေ့တောင်အာရှ အိမ်နီးချင်းနိုင်ငံတွေမှာလည်းရှိပြီး မိမိရိုးရာကို မိမိဒေသနဲ့ လိုက်လျောညီထွေမြှင့်တင်မှုနဲ့ တီထွင်ဆန်းသစ်မှုပေါ်မှာသာကွာခြားသွားတာလို့ TOP NEWS အင်တာဗျူးမှာ ပြောပါတယ် ။ 

အိမ်နီးချင်းနိုင်ငံမသင့်မြတ်ရင် နေအိမ်လိုတခြားကို ပြောင်းရွှေ့လို့ရတဲ့အရာမဟုတ်တာကြောင့် ကိုယ်ပိုင်သူပိုင် မူပိုင်ကိစ္စအငြင်းပွါးပြီး အနုတ်လက္ခဏာဖန်တီးနေမယ့်အစား တူညီတဲ့ယဉ်ကျေးမှုပေါ်အခြေခံပြီး အတူတကွဆင်နွှဲကာ ချစ်ကြည်ရင်းနှီးမှု၊ စည်းလုံးမှုတွေသာ တည်ဆောက်သင့်တယ်လို့  TOP NEWS  ဆွေးနွေးခန်းမှာ ပြောသွားပါတယ်။

18 hours Ago

မြန်မာလူထုဘက်က ရပ်တည်မည်ဟု ပြင်သစ်အစိုးရပြော၊ ပြင်သစ်လွှတ်တော်အမတ်များနှင့် NUG တွေ့ဆုံဆွေးနွေး

မြန်မာနိုင်ငံရဲ့ ပြန်လည်ထူထောင်ရေးတိုက်ပွဲမှာ ပြင်သစ်နိုင်ငံက မြန်မာပြည်သူလူထုဘက်က ရပ်တည်နေတယ်လို့ ပြင်သစ်အစိုးရအဖွဲ့ ဥရောပနှင့် ပြင်သစ်နိုင်ငံခြားရေးဝန်ကြီးဌာန ဝန်ကြီး ကက်သရင်း ကိုလိုနာက ပြောတဲ့အကြောင်း   ရန်ကုန်ရှိ ပြင်သစ်သံရုံးက ထုတ်ပြန်လိုက်ပါတယ်။

မြန်မာပြည်သူလူထုက လွတ်လပ်စွာရွေးချယ် ရွေးကောက်တင်မြှောက်ထားခဲ့တဲ့ အစိုးရကို ရက်စက်ကြမ်းတမ်းစွာဖြုတ်ချပြီးတော့ စစ်တပ်က အာဏာသိမ်းခဲ့တာ ၂ နှစ်ကြာပြီးနောက် မြန်မာနိုင်ငံရဲ့ ဒီမိုကရေစီနဲ့ တရားဥပဒေစိုးမိုးရေး ပြန်လည်ထူထောင်ရေး တိုက်ပွဲမှာ ပြည်သူလူထုဘက်က  ရပ်တည်နေတယ်လို့ ပြင်သစ်က ပြောလိုက်တာပါ။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စစ်အုပ်စုက မတရားဖမ်းဆီးထိန်းသိမ်းထားပြီး ထပ်တိုးထောင်ဒဏ်တွေ ချမှတ်နေတဲ့အပေါ်လည်း ပြင်သစ်နိုင်ငံဟာ ပြင်းပြင်းထန်ထန် ကန့်ကွက်ရှုတ်ချထားပြီး ဒါဟာ ဒီမိုကရေစီနည်းကျ ရွေးကောက်တင်မြှောက်ထားတဲ့ အရပ်သားအစိုးရအပေါ် သိက္ခာချဖို့ ရည်ရွယ်တဲ့မတရားတဲ့ တရားစီရင်မှုတွေဖြစ်ပြီး ဒီစီရင်ချက်ဟာ ပြီးခဲ့တဲ့ ၂၀၂၀ ပြည့်နှစ် ရွေးကောက်ပွဲမှာ လွတ်လပ်စွာ ပြတ်ပြတ်သားသား ထုတ်ဖော်ခဲ့ကြတဲ့ ပြည်သူတွေရဲ့ဆန္ဒကို မထီမဲ့မြင်ပြုခြင်းရဲ့ နောက်ထပ် အရိပ်အယောင်တခု ဖြစ်တယ်လို့လည်း ပြောထားပါတယ်။

ဒါ့အပြင် ဒီမိုကရက်တစ် အတိုက်အခံတွေ အပါအဝင် အမျိုးသားဒီမိုကရေစီအဖွဲ့ချုပ်နဲ့ သမိုင်းဝင် နိုင်ငံရေးခေါင်းဆောင်တွေ ပါဝင်တဲ့ နိုင်ငံရေးဆွေးနွေးပွဲလုပ်ဖို့လည်း ပြင်သစ်နိုင်ငံရဲ့ ကတိကဝတ်ကို ထပ် လောင်း ပြောကြားထားပါတယ်။

ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်မှာ တောင်းဆိုခဲ့တဲ့အတိုင်း မြန်မာစစ်အုပ်စု လုံခြုံရေးတပ်ဖွဲ့တွေ ကျူးလွန်တဲ့ အကြမ်းဖက်မှုတွေ အဆုံးသတ်ရေး၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတ ဦးဝင်းမြင့်တို့ အပါအဝင် နိုင့်ထက်စီးနင်း ဖမ်းဆီးခံထားရသူအားလုံးကို ခြွင်းချက်မရှိ အမြန်ဆုံးပြန်လွှတ်ပေးဖို့လည်း ပြင်သစ်နိုင်ငံက ထပ်မံတောင်းဆိုထားပြီး ပြင်သစ်နိုင်ငံအနေနဲ့ အာဆီယံရဲ့ အထူးသံတမန်နဲ့ ကုလသမဂ္ဂအတွင်းရေးမှူးချုပ်ရဲ့ အထူးသံတမန်တို့ရဲ့ ကြိုးပမ်းအားထုတ်မှုတွေကိုလည်း ထောက်ခံတယ်လို့ ပြင်သစ်နိုင်ငံခြားရေးဌာနက မကြာသေးခင်က ထုတ်ပြန်ထားပါတယ်။

အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီးပါဝင်တဲ့ မြန်မာကိုယ်စားလှယ်အဖွဲ့နဲ့ ပြင်သစ်နိုင်ငံ အောက်လွှတ်တော်ကိုယ်စားလှယ်တွေဟာ ဖေဖော်ဝါရီ ၁ ရက်က ပြင်သစ်အောက်လွှတ်တော်မှာတွေ့ဆုံဆွေးနွေးခဲ့ကြပါတယ်။

ဒီတွေ့ဆုံမှုမှာတော့ NUG လူ့အခွင့်အရေးဆိုင်ရာပြည်ထောင်စုဝန်ကြီး ဦးအောင်မျိုးမင်းနဲ့အတူ လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေး ပြည်ထောင်စု၀န်ကြီး ဒေါက်တာ ၀င်းမြတ်အေး၊ နိုင်ငံခြားရေး၀န်ကြီးဌာန ပြင်သစ်နိုင်ငံဆိုင်ရာ ကိုယ်စားလှယ် ဒေါ်နန်းဆုမွန်အောင်၊ ကိုယ်စားလှယ်ရုံးအဖွဲ့၀င် မေရော်ဘင်တို့ ပါဝင်ခဲ့ကြပြီး ပြင်သစ်-မြန်မာချစ်ကြည်ရေးအဖွဲ့မှ ဥက္ကဋ္ဌ အောက်လွှတ်တော်အမတ် အလန်ဒေးဗစ်နဲ့ အောက်လွှတ်တော်ကိုယ်စားလှယ်အဖွဲ့တွေနဲ့ တွေ့ဆုံဆွေးနွေးခဲ့ကြတယ်လို့ NUG က ထုတ်ပြန်ပါတယ်။

အဆိုပါ ဆွေးနွေးပွဲမှာ စစ်အုပ်စုက ပြုလုပ်မယ့် တရားမဝင် အတုအယောင်ရွေးကောက်ပွဲကို ပြင်သစ်လွှတ်တော်၊ ပြင်သစ်အစိုးရနဲ့ နိုင်ငံတကာကပါ ကန့်ကွက်ပေးဖို့ NUG အစိုးရ ပြည်ထောင်စုလွှတ်တော်ကိုယ်စားပြုကော်မတီနဲ့ ပြင်သစ်အောက်လွှတ်တော်တို့ တရားဝင်တွေ့ဆုံချိတ်ဆက်လုပ်ဆောင်နိုင်ရေးစတာတွေကို တင်ပြခဲ့ပြီး ဆက်လက် လုပ်ဆောင်မယ့် လမ်းစဉ်တွေကို ဆွေးနွေးခဲ့ကြတယ်လို့ ဆိုပါတယ်။

ဒါ့အပြင် မြန်မာ့နွေဦးတော်လှန်ရေး တိုးတက်မှုအခြေအနေတွေ၊ အစိုးရရဲ့ လမ်းပြမြေပုံအပါအ၀င် မြန်မာလူထုရဲ့ နွေဦးတော်လှန်ရေးမှာ အရေးကြီးပါ၀င်နေမှုတွေကိုလည်း NUG ဝန်ကြီးတွေက ရှင်းလင်းပြောကြားခဲ့ကြတယ်လို့ ဆိုပါတယ်။

နိုင်ငံ့အာဏာကို တရားမဝင်လုယူထားတဲ့ အကြမ်းဖက်စစ်အုပ်စုကတော့ ပြီးခဲ့တဲ့  ဇန်နဝါရီ ၃၁ ရက်က ပြုလုပ်ခဲ့တဲ့ ကာလုံအစည်းအဝေးရဲ့ ထောက်ခံချက်နဲ့ နောက်ထပ် ၆ လ သက်တမ်းတိုးလိုက်ပြီး တရားမဝင် ရွေးကောက်ပွဲကို ကျင်းပနိုင်ဖို့ ကြိုးစားနေကြတာ ဖြစ်ပါတယ်။

18 hours Ago

တိုက်ပွဲကြောင့် ဟုမ္မလင်း-ဖောင်းပြင်လမ်း ယာယီအသုံးမပြုရန် HPDF က ပြည်သူကို အသိပေး

စစ်ကိုင်းတိုင်း၊ ခန္တီးခရိုင်၊ ဟုမ္မလင်းမြို့နယ်၊ ရွှေပြည်အေးမြို့သစ်မှာ အာဏာသိမ်းစစ်ကောင်စီတပ်နဲ့ ပြည်သူ့ကာကွယ်ရေးတပ်ပေါင်းစု (PDF) တွေအကြား ဇန်နဝါရီ ၁ ရက်က စတင်ကာ တိုက်ပွဲဖြစ်ပွားနေပြီး စစ်တပ်ဘက်က ကုန်းလမ်း၊ ရေလမ်းနဲ့ လေကြောင်းကနေ စစ်ကူလာနေကြောင့် ဟုမ္မလင်း- ဖောင်းပြင်လမ်းကြောင်းအားလုံးကို ယာယီအသုံးမပြုကြဖို့ PDF တပ်တွေက ပြည်သူကို အသိပေးလိုက်ပါတယ်။

HPDF တာဝန်ရှိသူက “မနေ့က ရွှေပြည်အေးမှာရှိတဲ့ စစ်တပ်နဲ့ ပျူပူးပေါင်းစခန်းချနေတဲ့နေရာ သုံးခုကို တပြိုင်တည်းတိုက်ပြီး ဝင်သိမ်းတာ ၉၀ ရာခိုင်နှုန်းသိမ်းလိုက်နိုင်ပြီး စစ်တပ်ဘက်က ညနေပိုင်းမှာ MI- 35 နဲ့ သုံးကြိမ် လာပြီ ပစ်ကူပေးတယ်။ အခုလည်း လေယာဉ် သုံးစီး လာဝဲနေတယ်။ ဖောင်းပြင်ဘက်ကနေလည်း ရေကြောင်းနဲ့ ကုန်းကြောင်းကို သုံးပြီး စစ်ကူလာနေတယ်လို့ ကြားရတယ်။ ဒါ့ ကြောင့် မှားယွင်းပစ်ခတ်မိမှာ စိုးရိမ်လို့ ပြည်သူတွေအနေနဲ့ ဟုမ္မလင်း- ဖောင်းပြင်လမ်းကို ခဏ အသုံးမပြုကြဖို့ သတိပေးချင်တယ်” လို့ ပြောပါတယ်။ 

ဟုမ္မလင်းမြို့နယ်မှာ စစ်ကောင်စီတပ်၊ SNA ရှမ်းနီးတပ်နဲ့ ပျုစောထီးပူးပေါင်းတပ်ဖွဲ့တွေနဲ့ ပြည်သူ့ကာကွယ်ရေးတပ်ပေါင်းစုတို့ကြား ၂၀၂၂ ခုနှစ်ကတည်းက တိုက်ပွဲတွေ မကြာခဏဖြစ်ပွားနေပါတယ်။ လက်ရှိ အချိန်ထိလည်း ဟုမ္မလင်းမြို့နယ်၊ ရွှေပြည်အေးမြို့သစ်မှာ ဆက်လက်စစ်ရေးတင်းမာမှုတွေရှိနေပါတယ်လို့ ဒေသခံတွေပြောပါတယ်။ 

“အခုချိန်ထိ နှစ်ဖက်ရင်ဆိုင်ထားတုန်းပဲ။ ပစ်ခတ်တာတော့ ငြိမ်နေတယ်။ စစ်တပ်ဘက်က စစ်ကူလာနေတယ်လို့ ကြားရတယ်။ တိုက်ပွဲက ဆက်ဖြစ်လာနိုင်တဲ့အခြေအနေရှိတယ်”လို့ ဒေသခံတစ်ဦးကပြောပါတယ်။

တိုက်ပွဲတွေအတွင်း စစ်ကောင်စီတပ်နဲ့ ပျုစောထီးပူးပေါင်းအဖွဲ့တွေကို SNA  ရှမ်းနီတပ်က စစ်ကူးပေးတယ်လို့လည်း မျက်မြင်သက်သေတွေကပြောပေမဲ့ SNA ဘက်ကိုတော့ ဆက်သွယ်မေးမြန်းနိုင်ခြင်းမရှိပါဘူး။

SNA ရှမ်းနီတပ်ကို ဟုမ္မလင်းမြို့နယ်အတွင်းက ပြည်သူလူထုတွေက ဆန့်ကျင်ကြောင်း ပြီးခဲ့တဲ့ ဇန်နဝါရီလအတွင်းက ဆန္ဒထုတ်ဖော်ကန့်ကွက်ခဲ့ပါတယ်။

18 hours Ago

ပေါင်မြို့နယ် ကြံ့ခိုင်ရေးပါတီ ကိုယ်စားလှယ်လောင်း ၁ ဦး ပစ်သတ်ခံရ

မွန်ပြည်နယ်၊ ပေါင်မြို့နယ် ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ ကိုယ်စားလှယ်လောင်းဖြစ်ခဲ့ဖူးတဲ့ ဦးကိုကိုလေးဟာ ဖေဖော်ဝါရီ ၁ ရက် ည ၆ နာရီလောက်မှာ သေနတ်နဲ့ ပစ်ခတ်ခံရတာကြောင့် သေဆုံးသွားတယ်လို့ ဒေသခံတွေနဲ့ ပါတီဝင်တွေက ဒီဗွီဘီကို ပြောပါတယ်။

ပေါင်မြို့၊ ပေါင်းရပ်ကွက်၊ ဘူတာလမ်းမှာ နေထိုင်တဲ့ ဦးကိုကိုလေးကို အမည်မသိလူငယ် နှစ်ဦးက ဆိုင်ကယ်နဲ့ လာရောက်ပြီး နေအိမ်မှာပဲ သေနတ်နဲ့ ၇ ချက် ပစ်ခတ်ခဲ့တာပါ။

သေနတ်နဲ့ ပစ်ခတ်ခံရတာကြောင့် ဦးကိုကိုလေးဟာ ရင်ဘတ်နဲ့ နောက်ကျောတွေမှာ သေနတ်ဒဏ်ရာတွေ ရရှိပြီးနောက် မော်လမြိုင်ဆေးရုံသို့ ပို့ဆောင်စဉ် လမ်းမှာပဲ သေဆုံးသွားတယ်လို့ ဆိုပါတယ်။

ဦးကိုကိုလေးဟာ စစ်တပ် အာဏာသိမ်းပြီးနောက် အပြစ်မဲ့ပြည်သူတွေကို မတရားဖမ်းဆီးစေတာ၊ ပျူစောထီးအဖွဲ့တွေကို ငွေကြေးထောက်ပံ့တာ၊ စစ်ကောင်စီ ရွေးကောက်ပွဲ ဖြစ်မြောက်ဖို့ ကြိုးပမ်းနေတာကြောင့် နန်းထိုက်အောင် စစ်ဆင်ရေးအဖြစ် ပစ်ခတ်ရှင်းလင်းလိုက်တာလို့ အထူးစစ်ဆင်ရေးတပ်ဖွဲ့ (S.O.F)က ထုတ်ပြန်ထားပါတယ်။

သေနတ်နဲ့ ပစ်ခတ်ခံခဲ့ရတဲ့ ဦးကိုကိုလေးဟာ ပေါင်မြို့နယ် ကြံ့ခိုင်ရေးပါတီ အလုပ်မှုဆောင်အဖွဲ့ဝင် တစ်ဦး ဖြစ်သလို ၂၀၂၀ အထွေထွေရွေးကောက်ပွဲမှာ ပေါင်မြို့နယ်မဲဆန္ဒနယ်အမှတ်(၂) ပြည်နယ်လွှတ်တော်ကိုယ်စားလှယ်အဖြစ် ဝင်ရောက်ယှဉ်ပြိုင်ခဲ့ပေမယ့် ရှုံးနိမ့်ခဲ့ပါတယ်။

ပြီးခဲ့တဲ့နှစ် အောက်တိုဘာလတုန်းကလည်း ပေါင်မြို့နယ်၊ ပေါင်းရပ်ကွက်နေ ပေါင်မြို့နယ် ကြံ့ခိုင်ရေးပါတီ ဥက္ကဋ္ဌ ဦးကျော်လင်းဦး နေအိမ် ဗုံးခွဲတိုက်ခိုက်ခံခဲ့ရပြီး အဲဒီတိုက်ခိုက်မှုမှာ လူထိခိုက်ဒဏ်ရာတာ မရှိပေမယ့် အဆောက်အဦးတချို့ ထိခိုက်ပျက်စီးခဲ့ပါတယ်။

19 hours Ago

မင်းသားရှရွတ်ခန်း ပါဝင်သည့် Pathaan ရုပ်ရှင် ဘောလိဝုဒ်သမိုင်းတွင် ဝင်ငွေအများဆုံးစံချိန်တင်

ဇန်နဝါရီ ၂၅ ရက်နေ့က ရုံတင်ပြသခဲ့တဲ့ ဘောလိဝုဒ် နာမည်ကြီး သရုပ်ဆောင် ရာရွတ်ခန်း ပါဝင်သရုပ်ဆောင်ထားတဲ့ Pathaan ရုပ်ရှင်ဇာတ်ကားဟာ ရုံတင်ပြီး ပထမရက်အတွင်းမှာပဲ အိန္ဒိယဘောလိဝုဒ်ရုပ်ရှင် သမိုင်းမှာ ဝင်ငွေအများဆုံးစံချိန်ကို ချိုးဖောက်နိုင်ခဲ့တယ်လို့  ရုပ်ရှင်ဇာတ်ကားထုတ်လုပ်သူတွေက ကြေညာပါတယ်။

ရုံတင်ပြီး ပထမဦးဆုံးရက်မှာပဲ အိန္ဒိယနိုင်ငံ ရူပီးငွေ ကုဋေ ၅၀ ( အမေရိကန်ဒေါ်လာ ၅ သန်း) ကျော် ရရှိခဲ့တာဖြစ်ကာ တစ်ကမ္ဘာလုံးအနေနဲ့ဆိုရင်တော့ ရူပီး ကုဋေ ၉၀ ( အမေရိကန်ဒေါ်လာ ၉ သန်းခွဲ) နီးပါး ရရှိခဲ့တယ်လို့ သိရပါတယ်။

အခုရုပ်ရှင်ကားမှာပါဝင်တဲ့ နာမည်ကြီး သရုပ်ဆောင် ရှာရွခ်ခန်းအနေနဲ့ လေးနှစ်ကျော်ကြာပြီးမှ ပရိသတ်ရှေ့ကို တကျော့ပြန် ပြန်လည်ရောက်ရှိလာတာဖြစ်ကာ အဲဒီဇာတ်ကားမှာ  အိန္ဒိယ ထိပ်တန်းနာမည်ကြီး မင်းသမီးဒီပီကားနဲ့  မင်းသားဂျွန်တို့ကလည်း ပါဝင်သရုပ်ဆောင်ထားပါတယ်။

Pathaan ရုပ်ရှင်ဟာ ရုံတင်ပြီးတစ်ပတ် မပြည့်သေးခင်မှာပဲ ရုပ်ရှင် ကုန်ကျစရိတ်ရဲ့ ၃ ဆ ဖြစ်တဲ့ ရူပီးကုဋေ ၆၀၀ ( အမေရိကန်ဒေါ်လာ ၆ ဘီလီယံကျော်) ပြန်ရခဲ့‌ပြီး blockbuster (အအောင်မြင်ဆုံးရုပ်ရှင်) ဇာတ်ကားဖြစ်ခဲ့တယ်လို့ မှတ်တမ်းတွေအရ သိရပါတယ်။

Pathaan ရုပ်ရှင်က ကိုဗစ်အလွန် အိန္ဒိယကို ဗိုင်းရပ်စ်ပိုးနဲ့ တိုက်ခိုက်ဖို ကြံစည်တာကို တန်ပြန်စစ်ဆင်တဲ့ ဇာတ်လမ်းဖြစ်ပြီး ရုပ်ရှင်ရုံ‌တွေမှာတော့ အက်ရှင် အသတ်အဖြတ်တွေ ကြမ်းလို့ ၁၂ နှစ်အောက်ကလေးငယ်တွေကို လက်မှတ်မရောင်းဖို့အတွက်လည်း ကန့်သတ်ထားပါတယ်။

ဓာတ်ပုံ - Bollywood Update News Myanmar Fun Page

19 hours Ago

ဖွဲ့စည်းပုံအခြေခံဥပဒေကို စစ်ကောင်စီက လိုရာဆွဲယူပြီး အာဏာဆက်လုထားဟု ဥပဒေပညာရှင်များ ဝေဖန်

လူထုဆန္ဒနဲ့အညီ ဖျက်သိမ်းပြီးဖြစ်တဲ့ ၂၀၀၈ ဖွဲ့စည်းပုံအခြေခံဥပဒေကို စစ်တပ်က လိုရာဆွဲပြီး နိုင်ငံတော်အာဏာကို ဆက်လက် လုယူနေတယ်လို့ ဥပဒေပညာရှင်တွေနဲ့နိုင်ငံရေးအသိုင်း အဝိုင်းက ပြောကြားလိုက်ပါတယ်။ 

အာဏာသိမ်းစစ်ကောင်စီဟာ ၂၀၀၈ ဖွဲ့စည်းပုံအခြေခံဥပဒေကိုချိုးဖောက် တရားမဝင် အာဏာသိမ်းယူခဲ့ပြီး ၂ နှစ်ပြည့်တဲ့အခါမှာလည်း အဲဒီဥပဒေအရ အမျိုးသားကာကွယ်ရေးနဲ့ လုံခြုံရေးကောင်စီကို အာဏာပြန်လည်လွှဲ‌ပြောင်းမပေးဘဲ ဥပဒေကို လိုရာဆွဲပြီး နောက်ထပ် သက်တမ်း ၆ လ ထပ်မံတိုးယူခဲ့တဲ့အပေါ်အခုလို ပြောဆိုကြတာပါ။

ဝါရင့်တရားလွှတ်တော်ရှေ့နေကြီး ဦးကြီးမြင့် “ခြေဥ ပုဒ်မ ၄၂၅ ကို အဓိပ္ပာယ်ဖွင့်ဆိုတဲ့နေရာမှာ သူတို့ကလိမ်ဆင်တွေနဲ့ထည့်ပြီး မိတ်ကပ်လုပ်သွားတာ။ သာမန်အားဖြင့် ၆ လ တကြိမ်၊ ၆ လ တကြိမ်အထိ တိုးနိုင်တယ်ဆိုတာက မတိုးလည်း ရတယ်လို့ အဓိပ္ပာယ်ကောက်ယူလို့ရတယ်။ ကိုယ် ကြိုက်သလို လျှောက်ပြောလို့မရဘူး။ ၄၂၅ ကို ဖွင့်ဆိုတဲ့နေရာမှာ နိုင်ငံတကာ လူရိုသေ ရှင်ရိုသေ ပြည်တွင်း ပြည်ပ လေးစားလောက်တဲ့ ဖွင့်ဆိုချက်မျိုးမဟုတ်ဘဲ လိုသလို၊ ထိုင်းနိုင်ငံက ဖွဲ့စည်းပုံအတိုင်းလုပ်သွားတယ်။ မြန်မာပြည်မှာကတော့ စစ်တပ် ခိုင်းတာကို လုပ်ပေးရတဲ့ တရားဥပဒေပဲရှိတယ် ဆိုတာ ပိုထင်ရှားတာပေါ့။”  

အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က မြန်မာနိုင်ငံမှာ မြို့နယ် ၃၃၀ ရှိပေမဲ့ သက်ဆိုင်ရာ ပြည်နယ်နှင့်တိုင်းဒေသကြီး အစိုးရအဖွဲ့တွေရဲ့ တင်ပြချက်အရ ရာခိုင်နှုန်းအပြည့် တည်ငြိမ်အေးချမ်းတဲ့ မြို့နယ် ၁၉၈ မြို့နယ်ပဲရှိတယ်လို့ အမျိုးသားကာကွယ်ရေးနှင့်လုံခြုံရေးကောင်စီအစည်းအဝေးမှာ ပြောဆိုခဲ့ပါတယ်။ 

လုံခြုံရေးအလေးထားဆောင်ရွက်ရမယ့် မြို့နယ်က ၆၇ မြို့နယ်ရှိပြီး လုံခြုံရေးထိထိရောက်ရောက်  ဆောင်ရွက်ပေးဖို့လိုတဲ့ မြို့နယ်က ၆၅ မြို့နယ်ရှိတယ်လို့ဆိုပါတယ်။ 

ဒီလိုအခြေအနေမှာ ရွေးကောက်ပွဲကို အောင်မြင်အောင် ကျင်းပနိုင်ဖို့ နိုင်ငံတည်ငြိမ်ရေး ထပ်မံဆောင်ရွက်ဖို့ လိုအပ်တဲ့အပြင် သာမန်အခြေအနေမျိုးမှာ ရှိမနေတာကြောင့် ၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၂၅ အရ ၆ လ တစ်ကြိမ် အနည်းဆုံးထပ်မံတိုးပေးဖို့ စစ်ခေါင်းဆောင်က ကာလုံအစည်းအဝေးမှာ ပြောဆိုခဲ့တာပါ။

စစ်ခေါင်းဆောင်ရဲ့ တင်ပြချက်ကို ဖွဲ့စည်းပုံအခြေခံဥပဒေခုံရုံးက ဥပဒေနဲ့ ညီညွတ်မှုရှိတယ်လို့ ဆုံးဖြတ်ခဲ့တာကြောင့် စစ်ခေါင်းဆောင်ကို အမျိုးသားကာကွယ်ရေးနဲ့လုံခြုံရေးကောင်စီက နောက်ထပ် သက်တမ်း ၆ လတိုးပေးခဲ့တာလို့လည်း စစ်ကောင်စီက ဝါဒဖြန့်ထားပါတယ်။

ဥပဒေကို စစ်ကောင်စီကလိုရာဆွဲပြီး ဆောင်ရွက်ခဲ့မှုကြောင့် ဖြစ်ပေါ်လာမယ့် အကျပ်အတည်းအားလုံးဟာ နိုင်ငံရေးအရ အကျပ်အတည်းမဟုတ်တော့ဘဲ စစ်တပ်က အာဏာရယူလိုမှုကြောင့် သူ့ဘာသာဖြစ်နေတဲ့ အကျပ်အတည်းလို့ ရခိုင်ပြည်နယ် မြေပုံမြို့နယ် ပြည်သူ့လွှတ်တော်ကိုယ်စားလှယ်ဟောင်း ဦးဖေသန်းက ထောက်ပြပါတယ်။

ပြည်သူ့လွှတ်တော်ကိုယ်စားလှယ်ဟောင်း ဦးဖေသန်းက “ဖွဲ့စည်းပုံကိုယ်နှိုက်က တရားတဲ့ ဖွဲ့စည်းပုံ မဟုတ်ဘူး။ စစ်အာဏာရှင်တွေ ဆွဲခဲ့တဲ့ ဖွဲ့စည်းပုံ။ ဒီမိုကရေစီအင်အားစုတွေကိုလည်း ပါဝင်ဆွေးနွေးလို့မရအောင် သူတို့ဉာဏ်နီဉာဏ်နက်နဲ့ နှစ်ပေါင်း နှစ်ဆယ်ကျော် အချိန်ယူပြီးတော့ ဆွဲထားတဲ့ ဖွဲ့စည်းပုံထဲမှာ  အဲဒီလို မြှုပ်ကွက်တွေတော့ အများကြီး။ တကယ့် ဖွဲ့စည်းပုံအင်္ဂါရပ်နဲ့တော့ မညီဘူး။ သူတို့ သက်သက်လုပ်ကြံပြီး လိုသလို လုပ်နိုင်အောင် အကာအရံ အတားအဆီးတွေ မြှုပ်ကွက်တွေ ထည့်ထားတာ။ စစ်တပ်က တလပြီး တလ၊ တနှစ်ပြီး တနှစ် အဲဒီလိုအချိန်ဆွဲနိုင်အောင် လုပ်ခဲ့တဲ့ ဖွဲ့စည်းပုံဟာ တရားသဖြင့် ဖြစ်ရဲ့လား၊ ပြည်သူလူထုဘက်က ရပ်တည်ရဲ့လား၊ စစ်တပ်ဘက်က ရပ်တာလား။ အဲဒီလိုမေးခွန်းတွေတော့ အများကြီးထုတ်စရာ ရှိတာပေါ့။”

အာဏာသိမ်းစစ်ကောင်စီဟာ ဖွဲ့စည်းပုံအခြေခံဥပဒေခုံရုံးရဲ့ဆုံးဖြတ်ချက်နဲ့ သာမန် အခြေအနေအပေါ်မှာ နောက်ထပ်သက်တမ်း ၆ လထပ်မံတိုးသွားလိုက်တာဖြစ်ပြီး အဲဒီသက်တမ်း ပြည့်လို့မှ တိုင်းပြည်တည်ငြိမ်မှု မရှိသေးရင် နောက်ထပ် ၆ လ သက်တမ်း တိုးလို့ရတဲ့ အခြေအနေဖြစ်သွားတယ်လို့ ရခိုင့်ဦးဆောင်ပါတီ ဥက္ကဋ္ဌ ဒေါက်တာ အေးမောင်ကပြောပါတယ်။ 

“ရွေးကောက်ပွဲကို ကျင်းပမယ်ဆိုရင် တည်ငြိမ်တဲ့အနေအထားရှိမှ ကျင်းပပေးနိုင်မှာ။ မတည်ငြိမ်တဲ့ မြို့နယ်တွေရှိလို့ ထပ်ပြီး ၆ လတိုးတယ်ဆိုတဲ့အခါမှာ တိုးလိုက်တဲ့ အကြောင်းရင်းသည် မတည်ငြိမ်ပါဘူးလို့ ပြတဲ့ မြို့နယ် ၆၅ ရှိမှာလား၊ ၈၅ ရှိမှာလား၊ အဲဒီမြို့နယ်တွေကို ဖိဖိစီးစီးလုပ်ရမယ့်တာဝန် ပါလာတာပေါ့။ အဲဒီအခါမှာ သူ့ရဲ့အစိုးရအဖွဲ့ အပြောင်းအလဲနဲ့ ၊ SAC အပြောင်းအလဲရှိရင် ပိုသိနိုင်တယ်။”

၆ လ သက်တမ်းထပ်မံတိုးယူလိုက်တဲ့ အာဏာသိမ်းစစ်ခေါင်းဆောင်ကတော့ သူ ဦးဆောင်တဲ့ အစိုးရအဖွဲ့ကို ဒုတိယဝန်ကြီးချုပ် ၅ ဦးအထိ တိုးချဲ့ခန့်အပ်ပြီး ပြင်ဆင်ဖွဲ့စည်းတာ စစ်ကောင်စီရဲ့ ဗဟိုအကြံပေးအဖွဲ့ကို ပြင်ဆင်ဖွဲ့ စည်းတာနဲ့ တိုင်းဒေသကြီးနဲ့ပြည်နယ်ဝန်ကြီးချုပ်တွေကို ပြောင်းလဲခန့်အပ်တာတွေကိုလုပ်ဆောင်ခဲ့ပါ တယ်။

အာဏာသိမ်းစစ်ကောင်စီ ၂၀၀၈ ဖွဲ့စည်းပုံနဲ့အညီဆက်လက်ဆောင်ရွက်နေတယ်လို့ ပြောဆိုပေမယ့် လူထုကရွေးကောက်တင်မြှောက်ထားတဲ့ လွှတ်တော်ကိုယ်စားလှယ်တွေနဲ့ ဖွဲ့စည်းထားတဲ့ ပြည်ထောင်စုလွှတ်တော်ကိုယ်စားပြုကော်မတီ CRPH က ၂၀၀၈ ဖွဲ့စည်းပုံအခြေခံဥပဒေကို အပြီးသတ်ဖျက်သိမ်းလိုက်ပြီလို့ ၂၀၂၁ ခုနှစ် မတ်လ ၃၁ ရက်နေ့က ကြေညာခဲ့ပြီးဖြစ်ပါတယ်။

19 hours Ago

အိန္ဒုရဲစခန်းမှ ရဲတပ်သား ၁ ဦး အာဏာဖီဆန် CDM ပြုလုပ်အလင်းဝင်

ကရင်ပြည်နယ်အခြေစိုက်၊ အိန္ဒုနယ်မြေရဲစခန်းက ရဲလုပ်သက် ၆ နှစ် ရှိတဲ့ ရဲတပ်သားတယောက်ဟာ  စစ်ကောင်စီကို အာဏာဖီဆန် CDM ပြုလုပ်ပြီး   Justice soldier PDF (ကျားဖြူတပ်ခွဲ(၅) ဆီ အလင်းဝင်လာခဲ့တယ်လို့ ထုတ်ပြန်ပါတယ်။

Justice soldier PDF အဖွဲ့ကတော့ ဒီအကြောင်းနဲ့ ပတ်သက်ပြီး ဖေ့စ်ဘွတ်ခ်လူမှုကွန်ရက်ပေါ်ကတဆင့် တပ်ဖွဲ့ဝင်သစ်အဖြစ် ကြိုဆိုခဲ့ကြတဲ့ ဓာတ်ပုံတွေကို မျှဝေထားပါတယ်။

အမျိုးသားညီညွတ်ရေးအစိုးရ (NUG) က Non CDM ဝန်ထမ်းတွေနဲ့ ပတ်သက်ပြီး ကြေညာချက် ထုတ်ပြန်ထားခဲ့ပြီးနောက် အလင်းဝင်လာသူ များစွာရှိခဲ့တယ်လို့ ပြည်ထဲရေးဝန်ကြီး ဦးလွင်ကိုလတ်က ပြောထားပါတယ်။

အကြမ်းဖက်စစ်ကောင်စီရဲ့ ဒေါက်တိုက် Non CDM တွေကို CDM လုပ်ဖို့အတွက် နှိုးဆော်ထားပြီး မလိုက်နာဘူးဆိုရင် အကြမ်းဖက်ဥပဒေနဲ့ တရားစွဲပြီး ဖမ်းဝရမ်းထုတ်မယ်လို့ NUG အစိုးရ ပြည်ထောင်စုဝန်ကြီး ဦးလွင်ကိုလတ်က ပြီးခဲ့တဲ့ စက်တင်ဘာလတုန်းက ပြောထားခဲ့တာပါ။

လက်ရှိမှာတော့ ပြည်သူလူထုကို အကြမ်းဖက် သတ်ဖြတ်နေတဲ့ စစ်ကောင်စီရဲ့ လုပ်ရပ်တွေကို မလိုလား မနှစ်မြို့ကြတဲ့ အရာရှိ၊ စစ်သည်တွေ၊ ရဲတပ်သားတွေ အပါအဝင် ပြည်သူ့ ဘက်တော်သား ဝန်ထမ်းတွေဟာ သူတို့ရဲ့ဂုဏ်သိက္ခာ၊ မျိုးဆက်တွေရဲ့ ဂုဏ်သိက္ခာကို ပြန်လည်ရယူဖို့ စစ်အာဏာရှင်ရဲ့ လက်ကိုင်တုတ်အဖြစ်က ရုန်းထွက်ပြီး ပြည်သူ့ဘက် ကူးပြောင်းရပ်တည်လာတာ တဖြည်းဖြည်း များပြားလာနေပြီး စစ်သားနဲ့ ရဲတပ်ဖွဲ့ဝင် အရေအတွက်ကတော့ သောင်းနဲ့ချီရှိနေပြီ ဖြစ်ပါတယ်။

တပ်မတော်ကို အလွဲသုံးစားပြုလုပ်နေတဲ့ လက်တဆုပ်စာ စစ်ဗိုလ်ချုပ်တစုရဲ့ လက်ကိုင်တုတ် ခါးပိုက်ဆောင်တပ်အဖြစ်မှ ရုန်းထွက်ပြီး ပြည်သူ့ရင်ခွင် အမြန်ဆုံးခိုဝင်ကြဖို့ တပ်မတော်သားတွေ၊ ရဲတပ်သားတွေကို  NUG  က တိုက်တွန်း နှိုးဆော်ထားပါတယ်။

တိုင်းရင်းသား လက်နက်ကိုင်အဖွဲ့တွေဖြစ်ကြတဲ့ ကချင်လွတ်မြောက်ရေးတပ်မတော် (ကေအိုင်အေ) နဲ့ ကရင်အမျိုးသားအစည်းအရုံး (ကေအန်ယူ) စတဲ့ အဖွဲ့အစည်းတွေကလည်း စစ်အာဏာရှင်ဆန့်ကျင်ကာ ပူးပေါင်းလိုတဲ့ ရှေ့တန်းရောက် မြန်မာ့တပ်မတော်သားတွေ၊ ရဲတပ်သားတွေကို လက်ကမ်း ကြိုဆိုနေကြပါတယ်။

20 hours Ago

ရခိုင်ဝန်ကြီးချုပ် ဒေါက်တာအောင်ကျော်မင်းနေရာ၌ ဗိုလ်မှူးကြီးထိန်လင်းကို စစ်ကောင်စီက အစားထိုးခန့်

စစ်ကောင်စီဩဇာခံ ရခိုင်ပြည်နယ်ဝန်ကြီးချုပ် ဒေါက်တာအောင်ကျော်မင်းနေရာမှာ အရင် လုံခြုံရေးနှင့် နယ်စပ်ရေးရာဝန်ကြီးအဖြစ် တာဝန်ထမ်းဆောင်ခဲ့တဲ့ ဗိုလ်မှူးကြီးထိန်လင်းကို အစားထိုး ခန့်အပ်လိုက်တယ်လို့ ရခိုင်ပြည်နယ်အစိုးရအဖွဲ့ တာဝန်ရှိသူတွေက ပြောပါတယ်။

စစ်ကောင်စီက အသစ်ထပ်ခန့်အပ်ခဲ့တဲ့ တခြားရခိုင်ပြည်နယ်ဝန်ကြီးတွေ နေရာအပြောင်းအလဲကိုတော့ မသိရသေးဘူးလို့ စစ်ကောင်စီခန့် အမည်မဖော်လိုတဲ့ တာဝန်ရှိသူတဦးက ပြောပါတယ်။

ဗိုလ်မှူးကြီးထိန်လင်းကို ရခိုင်ပြည်နယ် ဝန်ကြီးချုပ်အဖြစ် ခန့်အပ်လိုက်ကြောင်း စစ်ကောင်စီအတွင်းရေးမှူး ဒုတိယဗိုလ်ချုပ်ကြီး အောင်လင်းဒွေးက ဖေဖော်ဝါရီ ၁ ရက် နေ့စွဲနဲ့ လက်မှတ်ရေးထိုး ထုတ်ပြန်ထားပါတယ်။

ဗိုလ်မှူးကြီးထိန်လင်းဟာ အရင်က ဘူးသီးတောင်မြို့နယ်မှာ ဗျူဟာမှူးအဖြစ် တာဝန်ထမ်းဆောင်ခဲ့ဖူးပြီး ရခိုင်ပြည်နယ်လွှတ်တော်ကိုယ်စားလှယ် (လုံနယ်ဝန်ကြီး) အဖြစ် ခန့်အပ်ခြင်းခံခဲ့ရကာ အမျိုးသားလွှတ်တော်ကိုယ်စားလှယ်အဖြစ်ကနေ လက်ရှိ ရခိုင်ပြည်နယ်ဝန်ကြီးချုပ် ဖြစ်လာတာပါ။

စစ်ပွဲတွေ မကြာခဏ ပြင်းထန်ဖြစ်ပွားလေ့ရှိတဲ့ ရခိုင်ပြည်နယ်မှာ အရပ်သားဝန်ကြီးချုပ် အစား စစ်ဘက်ကလာတဲ့ အရာရှိကို ပြောင်းလဲခန့်အပ် တာဝန်ပေးလိုက်တာလည်း ဖြစ်ပါတယ်။

ရခိုင်ဝန်ကြီးချုပ်ဟောင်း ဒေါက်တာအောင်ကျော်မင်းကတော့ စစ်ကောင်စီအဖွဲ့ဝင်ဖြစ်လာပြီး အရင် စစ်ကောင်စီဝင် ဒေါ်အေးနုစိန်ကိုတော့ စစ်ကောင်စီ ဗဟိုအကြံပေးအဖွဲ့ဝင်အဖြစ် ပြောင်းလဲတာဝန်ပေးခဲ့ပါတယ်။

၂၀၂၁ ခုနှစ် ဖေဖော်ဝါရီ ၁ ရက်ကစပြီး နိုင်ငံ့အာဏာကို တရားမဝင်လုယူထားတဲ့ စစ်ကောင်စီဟာ ဇန်နဝါရီ ၃၁ ရက်က ပြုလုပ်ခဲ့တဲ့ ကာလုံအစည်းအဝေးရဲ့ ထောက်ခံချက်နဲ့ ဥပဒေလက်တလုံးခြားလုပ်ပြီး နောက်ထပ် ၆ လ သက်တမ်းတိုးလိုက်တာ ဖြစ်ပါတယ်။

20 hours Ago

အာဏာရှင်နိဂုံး

လစ်ဗျားနိုင်ငံမှာ ပြည်သူတွေကို အမိန့်အာဏာနဲ့ အုပ်ချုပ်မင်းလုပ်ခဲ့တဲ့ မူအမ္မာကဒါဖီဟာ နောက်ဆုံးနိဂုံးအဆုံးသတ်က ကမ္ဘာ့ရာဇဝင်သမိုင်းမှာ စစ်အာဏာရှင်အဖြစ် မှတ်တမ်းတင်ခြင်း ခံခဲ့ရပါတယ်။ လစ်ဗျားသမ္မတဟောင်း စစ်အာဏာရှင် မူအမ္မာကဒါဖီကို ၁၉၄၁ ခုနှစ်မှာ ကုလားအုပ်ကုန်သည် မိဘက မွေးဖွားလာသူဖြစ်တယ်။ လစ်ဗျားစစ်တပ်ထဲကို ၁၉၆၅ ခုနှစ်မှာ ဝင်ရောက်ပြီး ၁၉၆၉ ခုနှစ်မှာ လစ်ဗျားတော်လှန်ရေးကောင်စီဥက္ကဋ္ဌ တပ်မတော်စစ်ဦးစီးချုပ် ဖြစ်လာခဲ့တယ်။ သူ့ရဲ့ ကိုယ်ရံတော်တပ်ဖွဲ့ကို အမျိုးသမီးတွေနဲ့သာ ဖွဲ့စည်းထားသူဖြစ်တယ်။

၂၀၁၁ ခုနှစ်မှာ စတင်လာခဲ့တဲ့ အာရပ်နွေဦး လူထုအုံကြွမှု တော်လှန်ရေးကြီးမှာ လစ်ဗျားနိုင်ငံ ပါဝင်လာခဲ့တယ်။ စစ်အာဏာရှင် မူအမ္မာကဒါဖီကို လစ်ဗျားပြည်သူတွေက ဆန့်ကျင်တော်လှန်ခဲ့ကြတယ်။ ကဒါဖီကလည်း သူ့ကိုဆန့်ကျင်သူမှန်သမျှ ချေမှုန်းခဲ့တယ်။ နောက်ဆုံးမှာ ဆန့်ကျင်တော်လှန်ကြတဲ့ ပြည်သူတွေက လစ်ဗျားနိုင်ငံရဲ့ စစ်အာဏာရှင် မူအမ္မာကဒါဖီကို ၂၀၁၁ ခုနှစ် အောက်တိုဘာလ ၂၀ ရက်နေ့မှာ သုတ်သင်ရှင်းလင်းပစ်ခဲ့ကြတယ်။

နောက်တဦးကတော့ အီရတ်နိုင်ငံရဲ့ စစ်အာဏာရှင် ဆဒမ်ဟူစိန်ပဲ ဖြစ်ပါတယ်။ သူ့မိသားစု ဘဝဇာတ်ကြောင်းက အတော်ဆိုးလှတယ်။ သူ့မိခင်က သူ့ကို ကိုယ်ဝန်ရှိချိန်မှာ ဖျက်ချဖို့အထိ စဉ်းစားခဲ့တယ်။ ဒါပေမဲ့ မွေးဖွားခဲ့တယ်။ သူ့ရဲ့ဖခင်နဲ့ အစ်ကိုဖြစ်သူဟာ ကင်ဆာရောဂါနဲ့ သေဆုံးပြီးနောက် သူ့မိခင်က နောက်အိမ်ထောင်ပြုလိုက်တယ်။ ပထွေးဖြစ်သူရဲ့ နှိပ်စက်တာကို မခံနိုင်တော့ ဦးလေးဖြစ်သူဆီမှာနေထိုင်ရင်း ကြီးပြင်းခဲ့သူဖြစ်တယ်။

ဆဒမ်ဟူစိန်ဟာ တော်လှန်ရေး အာရပ်ဆိုရှယ်လစ် ဘားသ်ပါတီကနေ ပဉ္စမမြောက် သမ္မတအဖြစ်နဲ့ ၁၉၇၉ ခုနှစ် ဇူလိုင်လ ၁၆ ရက်နေ့ကနေ ၂၀၀၃ ခုနှစ် ဧပြီလ ၉ ရက်နေ့ထိ ပဉ္စမမြောက် သမ္မတအဖြစ် တာဝန်ထမ်းဆောင်ခဲ့တယ်။ သူ့လက်ထက်မှာ အီရန်-အီရတ်စစ်ပွဲ၊ ပင်လယ်ကွေ့စစ်ပွဲ၊ အီရတ်-ကာဒ်ပဋိပက္ခ၊ ကူဝိတ်ကျူးကျော်စစ်ပွဲတွေ ဖြစ်ပေါ်ခဲ့တယ်။ ရက်စက်ပြင်းထန်တဲ့ အာဏာရှင်ဆန်မှုကို ပြည်သူတွေက ရှုတ်ချခဲ့ကြတယ်။ နိုင်ငံရေးအရ သုတ်သင်ခြင်း၊ လူမျိုးတုံးသတ်ဖြတ်ခြင်းကို လူပေါင်း ၂ သိန်းကျော် ဆဒမ်အစိုးရက သတ်ဖြတ်ကျူးလွန်ခဲ့တယ်လို့ ခန့်မှန်းခဲ့ကြတယ်။ ကူဝိတ်စစ်ပွဲမှာလည်း လူပေါင်းသိန်းချီ သေဆုံးခဲ့တယ်လို့ မှတ်တမ်းတင်ခဲ့ကြတယ်။

အမေရိကန်ဦးဆောင်တဲ့ မဟာမိတ်အဖွဲ့တွေက ၂၀၀၃ ခုနှစ်မှာ ဆဒမ်အစိုးရကို ဖယ်ရှားဖို့ တိုက်ခိုက်ခဲ့ပါတယ်။ ဆဒမ်ရဲ့ ဘားသ်ပါတီကို ဖျက်သိမ်းပြီး ဒီမိုကရေစီကျကျ ရွေးကောက်ပွဲ ပြန်ကျင်းပခဲ့တယ်။

၂၀၀၃ ခုနှစ် ဒီဇင်ဘာ ၁၃ ရက်နေ့မှာ ဆဒမ်ကို ဖမ်းဆီးခဲ့ပြီး အီရတ်ကြားဖြတ်အစိုးရက လူအခွင့်အရေးရာဇဝတ်မှုနဲ့ စွဲချက်တင်ကာ ကြိုးမိန့်ချမှတ်ခဲ့တယ်။ ၂၀၀၆ ခုနှစ် သုံးနှစ်ကျော်အကြာ အသက် ၆၉ နှစ်အရွယ် ဆဒမ်ကို အီရတ်နိုင်ငံ ဘဂ္ဂဒတ်မြို့ ကာဒီမီးယာအရပ်မှာ ကြိုးပေးကွပ်မျက်ခဲ့တယ်။

အထက်ပါ အနှီပုဂ္ဂိုလ်ကြီးများဟာ စစ်အာဏာရှင်ပီသစွာ အမိန့်အာဏာနဲ့ လူတယောက်မှာ ရှိသင့်ရှိထိုက် ရသင့်ရထိုက်တဲ့ လူအခွင့်အရေးကို ချိုးဖောက်ခဲ့လို့ သူတို့ကိုယ်တိုင် လူဖြစ်ရက်နဲ့ လူလိုနိဂုံးမချုပ်ရဘဲ အသေဆိုးနဲ့ သမိုင်းဝင် နိဂုံးချုပ်ခဲ့ကြရတယ်။

မြန်မာနိုင်ငံမှာလည်း ၂၀၂၁ ခုနှစ်မှာ နွေဦးတော်လှန်ရေး စတင်ခဲ့ပါပြီ။ အာဏာရှင်ကို ပြည်သူလူထုက ဘက်ပေါင်းစုံကနေ ဆန့်ကျင်တော်လှန် တိုက်ခိုက်နေကြတာ ၂ နှစ်ပြည့်ပြီ ဖြစ်တယ်။ ၂ နှစ်တာကာလအတွင်း စစ်အာဏာရှင်ရဲ့ ညှဉ်းပန်းနှိပ်စက် သတ်ဖြတ်တာတွေ ရွာလုံးကျွတ် မီးရှို့ဖျက်ဆီးခံရတာတွေ အကြမ်းဖက်လုပ်ရပ်အစုံစုံကို သက်သေအထောက်အထား ခိုင်လုံစွာနဲ့ နိုင်ငံတကာ တရားရုံးတွေမှာ တရားစွဲဆို‌နေကြပါပြီ။ ပြည်ပ အင်အားကြီးနိုင်ငံတွေကလည်း မြန်မာ့အရေး စိတ်ဝင်တစား ဆွေးနွေးကာ အာရုံစိုက်လာကြပြီ။ အာဏာရှင်တွေအတွက် တဖြည်းဖြည်း မြေကျောကျဉ်းလာပြီဖြစ်တယ်။

မြန်မာနိုင်ငံမှာ စစ်အာဏာရှင်အဆက်ဆက်က ပြည်သူကို အနိုင်ကျင့်ပြီး အကြောက်တရားနဲ့ မော်မကြည့်ရဲအောင် ဖိနှိပ်အုပ်ချုပ်ခဲ့တာ အခုတော့ နိဂုံးချုပ်ဖို့ အချိန်တန်ပါပြီ။ ဗိုလ်ချုပ်မှူးကြီး သတိုးမဟာသရေစည်သူ၊ သတိုးမဟာသုဓမ္မ၊ နိုင်ငံတော်စီမံအုပ်ချုပ်ရေး‌ကောင်စီ ဥက္ကဋ္ဌ (ပန်းချီ)ခင်လှိုင်+ဒေါ်လှမူ တိုရဲ့သား ဇနီး-ဒေါ်ကြူကြူလှနဲ့ အောင်ပြည့်စုံ၊ ခင်သီရိသက်မွန် တို့ရဲ့ဖခင် မင်းအောင်လှိုင်က ၂၀၂၀ ဒီမိုကရေစီ အထွေထွေရွေးကောက်ပွဲမှာ အနိုင်ရတဲ့ ပါတီထံကနေ လွှတ်တော်မစတင်မီ တရက်အလို ၂၀၂၁ ခုနှစ် ဖေဖော်ဝါရီ ၁ ရက်နေ့ ညသန်းခေါင်ကျော်မှာ အာဏာသိမ်းခဲ့ပါတယ်။

ရွေးကောက်ပွဲမှာ သူကိုယ်တိုင်မဲပေးပြီး မှင်တို့ထားတဲ့လက်သန်းထောင်ကာ ရွေးကောက်ပွဲ အောင်မြင်ကြောင်း ပြောပြီး ရွေးကောက်ပွဲ မဲစာရင်းမှားလို့ဆိုကာ အာဏာသိမ်းလိုက်တယ်။ ပြည်သူလူထုက ဆန္ဒပြတော့ မတရားအာဏာသိမ်းတာကနေ အာဏာထိန်းတယ် ပြန်ဖြစ်သွားတယ်။ နိုင်ငံတော်စီမံအုပ်ချုပ်ရေးကောင်စီ ပြောလိုက် အိမ်စောင့်အစိုးရ ပြောလိုက်နဲ့ ဒီနေ့ဒီလိုပြောပြီး နောက်နေ့တမျိုးပြောတဲ့သူက အရူးချေးပန်းသလို သတ်ချင်သလိုသတ်၊ ဖမ်းချင်သလိုဖမ်းကာ လူထုရဲ့ အိုးအိမ်စည်းစိမ်တွေကို မီးရှို့ဖျက်ဆီး၊ ဒီလိုစစ်အာဏာရှင်မျိုးကို မတော်လှန်တဲ့သူဟာ အလိုတူအလိုပါ အာဏာရှင်တွေပဲဖြစ်တယ်။ အားလုံး အမြစ်ပါမကျန် တွန်းလှန် သုတ်သင်ပစ်ရမှာ ဖြစ်တယ်။

ဦးနေဝင်း လက်ထက်မှာလည်း စစ်အာဏာရှင် အမြစ်မဖြတ်နိုင်ဘူး၊ ဦးသန်းရွှေ လက်ထက်မှာလည်း အာဏာရှင်တည်ရှိနေတယ်၊ ဦးသိန်းစိန် လက်ထက်မှာလည်း လိမ်နည်းမျိုးစုံနဲ့ ပြည်သူကို လှည့်ဖျားခဲ့တယ်။ အဲ့ဒီကာလတွေမှာတောင် အမြစ်မဖြတ်နိုင်တာ အခုလည်း အဲ့လိုနဲ့ ပြည်သူတွေ လက်လျှော့ကြလိမ့်မယ်လို့ အာဏာရှင်နဲ့ လက်ပါးစေ နောက်လိုက်တွေက ယူဆပြောဆိုကြတယ်။ နေဝင်းခေတ်နဲ့ သန်းရွှေခေတ် မတူခဲ့ဘူး။ သိန်းစိန်ခေတ်နဲ့ အရပ်သားအစိုးရ‌ခေတ် မတူတော့ဘူး။ အခု ခေတ်စနစ်မှာ အဲ့ဒီလိုမဟုတ်တော့ဘူး။ နှစ်ပေါင်း ၆၀ ကျော် အကြောက်တရားကို ၅ နှစ်နဲ့ ပြည်သူလူထုကို ညွှန်ပြပေးပြီး လူဆိုတာ လူလိုနေထိုင်ရမှ လူဖြစ်တယ်ဆိုတာ သိမြင်ခဲ့ကြပြီ။ ဂလိုဘယ်လိုက်ဇေးရှင်း (Globalization) ကမ္ဘာအနှံ့ဖြစ်စဉ်တွေနဲ့ မြန်မာပြည်သူတွေ ရင်ဘောင်တန်းနိုင်အောင် ကြိုးစားနေကြပြီ။ ဒီနေ့ကမ္ဘာကြီးမှာ ဘာတွေဖြစ်နေလဲ။ စစ်ရေး၊ စီးပွားရေး၊ နည်းပညာ၊ လူငယ်တွေ သိမြင်၊ တွေးတောနိုင်ကြပြီ။ နိုင်ငံတကာနဲ့ယှဉ်ရင် ပညာရေး၊ ကျန်းမာရေး၊ အားကစား ကဏ္ဍအစုံ ဘာကြောင့် မြန်မာဟာ နောက်ကျရတာလဲ ဆိုတာ လူငယ်တွေ သိရှိနားလည်လာတဲ့‌နောက် စစ်အာဏာရှင်ကို မကြောက်မရွံ့ အသေရဲရဲ၊ အနေရဲရဲနဲ့ ရင်ဆိုင်တော်လှန်တိုက်ထုတ်နေကြပြီ။ မနိုင်စရာမရှိဘူး၊ အာဏာရှင်ဘက်မှာ ပြည်သူမရှိတော့ဘူး၊ အာဏာရှင် စစ်အုပ်စုအတွက် ရွေးစရာလမ်းလည်း မရှိတော့ဘူး၊ လမ်းဆုံးနေပြီ၊ နောက်နောင်မှာလည်း ဘယ်လိုအာဏာရှင်မျိုးကိုမှ လက်ခံကြမှာ မဟုတ်တော့ဘူး၊ အာဏာရှင်ရှိနေသရွေ့ တော်လှန်ရေးဟာ ရှိနေမှာဖြစ်တယ်။

ယနေ့ မြန်မာ့နွေဦးတော်လှန်ရေးဟာ အရှိန်အဟုန်ကောင်းကောင်းနဲ့ တိုက်ပွဲဝင်နေကြတာ စစ်အာဏာရှင်တွေအတွက် နေမြင့်လေ အရူးရင့်လေ အခြေဆိုက်နေပြီဖြစ်တယ်။ ၂ နှစ်ပြည့်ချိန်မှာ တော်လှန်ရေးတိုက်ပွဲတွေ ပိုပြင်းထန်လာတယ်။ ဆန္ဒပြပွဲတွေ ပြည်တွင်း/ပြည်ပမှာ ခပ်စိပ်စိပ် ပြန်ဖြစ်လာတယ်။ အကြမ်းဖက်စစ်တပ်မှာလည်း ရင်ဆိုင်တိုက်ပွဲတွေမှာ အထိအခိုက် အကျအဆုံးများပြီး ခြေကုန်လက်ပန်းကျကာ စစ်ပန်းနေပြီ။ တော်လှန်ရေးအင်အားစုတွေက တနေ့ထက်တနေ့ ပိုမိုအားကောင်းလာတယ်။ “အာဏာရှင်နိဂုံး-၂၀၂၃” ဆိုတဲ့အတိုင်း အာဏာရူးသူတို့ရဲ့နိဂုံး အဆုံးသတ်မယ့်နှစ်၊ ပြည်သူတွေ အောင်ပွဲခံမယ့်နှစ် ဖြစ်စေဖို့ တိုက်ပွဲဝင်ရင်း... ။

ပေကြီး

20 hours Ago

စစ်တပ်ပစ်ခတ်မှုကြောင့် တံတားဦးရွာက ကလေး ၁ ဦး သေဆုံး၊ အင်းတော်တွင် အမျိုးသမီး ၁ ဦး ဖမ်းဆီးခံရ

စစ်ကိုင်းမြို့နယ်၊ တံတားဦးရွာမှာ ဒီကနေ့ ဖေဖော်ဝါရီ ၂ ရက် မနက် ၁၁ နာရီလောက်က စစ်ကောင်စီတပ်တွေ ပစ်ခတ်မှုကြောင့် ကလေးငယ် ၂ ဦး ကျည်ထိမှန်ပြီး ၅ နှစ်အရွယ် ကလေးငယ်တဦး သေဆုံးသွားတယ်လို့ ဒေသခံတွေက ပြောပါတယ်။

ညောင်ပင်ဝန်းကျေးရွာကနေ တံတားဦးရွာဘက်ကို စစ်ကြောင်းထိုးလာတဲ့ စစ်တပ်က ကျေးရွာထဲ ဝင်ရောက်ပစ်ခတ်လို့ အခုလို သေဆုံးရတာဖြစ်တယ်လို့ ဆိုပါတယ်။

“သူတို့က ကျေးရွာထဲက ရပ်ကျေး ပ.အ.ဖ အိမ်ကို ဝင်ဖမ်းတာ။ လူမတွေ့လို့ဆိုပြီး ရွာထဲကို သေနတ်တွေနဲ့ နင်းကန်ပစ်တာရှင့်။ အဲဒီလိုပစ်လို့ အပြင်မှာ ကျူရှင်သင်နေတဲ့အိမ်က ၅ နှစ်အရွယ် ကလေးမလေး ကျည်ထိမှန်ပြီး နေရာတင် ပွဲချင်းပြီး သေဆုံးသွားတယ်။ ကျည်က ခန္ဓာကိုယ် နောက်ကျောကနေ ဖောက်မှန်ပြီး သေတာ။ နောက်ထပ် ကလေးငယ်တဦးလည်း ကျည်ထိမှန်ထားတယ်။ အ‌ခြအနေကတော့ အတော်ဆိုးတယ်” လို့ ဒေသခံအမျိုးသမီးတဦးက ပြောပါတယ်။

အင်အား ၄၀ ကျော်နဲ့ စစ်ကြောင်းထိုးလာတဲ့ စစ်တပ်ဟာ လက်ရှိအချိန်မှာ တံတားဦးရွာကနေ ညောင်ပင်ဝန်းကျေးရွာကို ပြန်ဝင်သွားတယ်လို့ ဒေသခံတွေက ပြောပါတယ်။

စစ်ကိုင်းတိုင်း၊ အင်းတော်မြို့မှာ အလှပြင်ဆိုင်ဖွင့်ထားတဲ့ မနွယ်နွယ်ကိုအား PDF နဲ့ ဆက်သွယ်ဖူးတယ်ဆိုပြီး ဇန်နဝါရီ ၂၉ ရက်နေ့မှာ စစ်ကောင်စီတပ်က ဖမ်းဆီးသွားပြီး ဒီနေ့အထိ အဆက်အသွယ်မရတာကြောင့် မိသားစုတွေ စိုးရိမ်နေကြတယ်လို့ ဒေသခံတွေက ပြောပါတယ်။

“ဟိုးအရင်ကတော့ PDF နဲ့ဆက်သွယ်တာ ရှိခဲ့ဖူးတယ်။ အခု အလှပြင်ဆိုင်ဖွင့်ပြီး အေးဆေး စီးပွားရေးလုပ်ငန်း လုပ်နေတာ တနှစ်ကျော်ပြီ။ အဲ့ဒါကို PDF နဲ့ ဆက်သွယ်တယ်ဆိုပြီး အလှကုန်ပစ္စည်း ဝယ်နေတုန်း ဖမ်းသွားတာ၊ ခုချိန်ထိ ဘယ်နေရာမှာ ဖမ်းထားတယ်ဆိုတာ အဆက်အသွယ် မရသေးဘူး” လို့ မိသားစုနဲ့ နီးစပ်သူတဦးက ပြောပါတယ်။

ပြီးခဲ့တဲ့ ဒီဇင်ဘာလအတွင်းကလည်း အင်းတော်မြို့မဈေးမှာ ဈေးရောင်းချနေသူ အမျိုးသမီး လေးဦးကို PDF နဲ့ ဆက်သွယ်ထောက်ပံ့တယ်ဆိုပြီး စစ်ကောင်စီတပ်က ဖမ်းဆီးခဲ့ပါသေးတယ်။

20 hours Ago

ပခုက္ကူတိုက်ပွဲတွင် စစ်တပ်က ထိခိုက်သေဆုံးသူများပြား၊ PDF ၂ ဦးဒဏ်ရာရ၊ ကမ္မထွေအုပ်ရုံး မိုင်းခွဲခံရ

မကွေးတိုင်း၊ ပခုက္ကူခရိုင်၊ ကမ္မမြို့ အထွေထွေအုပ်ချုပ်ရေး ဦးစီးဌာနရုံးကို ဖေဖော်ဝါရီ ၁ ရက် မနက်က မိုင်းခွဲတိုက်ခိုက်ခဲ့ပြီး အဆောက်အဦတချို့ ထိခိုက်ပျက်စီးခဲ့တယ်လို့ ပခုက္ကူ-PDF ကနေ သိရပါတယ်။

“ကမ္မမြို့ အထွေထွေအုပ်ချုပ်ရေးဦးစီဌာနရုံးကို ဖေဖော်ဝါရီ ၁ ရက်နေ့ မနက် ၉ နာရီခွဲလောက်မှာ ကျနော်တို့ ရဲဘော်တွေက စစ်အာဏာသိမ်း ၂ နှစ်ပြည့် အထိမ်းအမှတ် အဖြစ် မိုင်းအကြီးတလုံးနဲ့ ဖောက်ခွဲတိုက်ခိုက်ခဲ့တာ” လို့ PPDF ရဲ့ ပြန်ကြားရေးတာဝန်ခံ အတီးက ပြောပါတယ်။

အဲဒီထွေအုပ်ရုံးဟာ လုံခြုံရေးအရ လုပ်ငန်းလည်ပတ်နိုင်ခြင်း မရှိတော့လို့ ပြီးခဲ့တဲ့ တနှစ်ကျော်လောက်ကတည်းက ပိတ်ထားတဲ့အတွက် လူထိခိုက်မှုမရှိဘဲ အဆောက်အအုံတချို့ ထိခိုက်ပျက်စီးခဲ့တယ်လို့ ဆိုပါတယ်။

ပခုက္ကူမြို့နယ်၊ ဘုန်းကန်ရွာမှာ ဇန်နဝါရီ ၃၁ ရက် ညနေက စစ်ကောင်စီတပ်သားတွေနဲ့ ဒေသကာကွယ်ရေးပူးပေါင်းတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က သေဆုံးဒဏ်ရာရရှိသူ များပြားကာ PDF ရဲဘော် ၂ ယောက် ဒဏ်ရာရရှိခဲ့တယ်လို့ ချောက်မြို့နယ် ပြောက်ကျားတပ်ဖွဲ့- CGF ကနေ သိရပါတယ်။

ပခုက္ကူမြို့နယ် ဘုန်းကန်ကျေးရွာမှာ တပ်စွဲထားတဲ့ စစ်ကောင်စီတပ်သား ၁၀ ယောက်ခန့်နဲ့ ပျူစောထီးတွေကို ဇန်နဝါရီ ၃၁ ရက် ညနေ ၄ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက သွားရောက်တိုက်ခိုက်ခဲ့လို့ စစ်ကောင်စီတပ်သား အများအပြား သေဆုံးခဲ့တယ်လို့ ချောက်မြို့နယ် ပြောက်ကျားတပ်ဖွဲ့ CGF ရဲ့ ပြန်ကြားရေးတာဝန်ခံ ဗိုလ်ဘကွန်းက ဒီဗွီဘီကို ပြောပါတယ်။

“ကျနော်တို့ ပူးပေါင်းတပ်ဖွဲ့တွေ တိုက်ခိုက်ဖို့ သွားတဲ့အချိန်မှာ သူတို့ဘက်က သတင်းကြိုရသွားလို့ စက်လတ်တွေ ၄၀ မမ တွေနဲ့ စပစ်တာဗျ။ နှစ်ဖက်အပြန်အလှန် ထိတွေ့တိုက်ပွဲ တနာရီကျော်လောက် ဖြစ်ပွားခဲ့ပြီး သူတို့ဘက်က ထိခိုက်သေဆုံးသူ များတယ်။ ကျနော်တို့ ရဲဘော် ၂ ယောက် ၄၀ မမ ကျည်စထိမှန်ပြီး ဒဏ်ရာနည်းနည်း ရရှိခဲ့တယ်။”

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ပခုက္ကူမြို့နယ်ထဲမှာ စစ်ကောင်စီရဲ့ အတုယောင် ရွေးကောက်ပွဲအတွက် စစ်အုပ်စုနဲ့ အပေါင်းအပါတွေ၊ ရပ်ကျေးအုပ်ချုပ်ရေးမှူးတွေက လူဦးရေစာရင်း ကောက်ခံနေတာတွေ တွေ့ရှိရပြီး ချက်ချင်းရပ်တန့်ဖို့နဲ့ ဆက်လက်လုပ်ဆောင်နေပါက ပြင်းပြင်းထန်ထန် တိုက်ခိုက်သွားမယ်လို့ PPDF ပြန်ကြားရေးတာဝန်ခံက ပြောပါတယ်။

20 hours Ago

ရွှေပြည်အေးမြို့သစ်နှင့် အရာတော် သစ်ကျင်းကြီးကျေးရွာစခန်းတို့ကို PDF တပ်များ တိုက်ခိုက်

စစ်ကိုင်းတိုင်း၊ ဟုမ္မလင်းမြို့နယ်၊ ရွှေပြည်အေးမြို့သစ်ကို PDF မဟာမိတ် ပူးပေါင်းတပ်တွေက ဖေဖော်ဝါရီ ၁ ရက်‌နေ့မှာ ဝင်ရောက်စီးနင်းတိုက်ခိုက်ခဲ့တယ်‌လို့ ဟုမ္မလင်း PDF ကာကွယ်‌‌ရေးအဖွဲ့ဝင်‌တဦးက‌ ပြောပါတယ်‌။

“မ‌နေ့မနက်‌ ၉ နာရီကစပြီး‌ ရွှေပြည်‌‌အေးမြို့သစ်‌ကို ဝင်‌တိုက်‌တယ်‌။ ည‌နေ ၃ နာရီမှ တိုက်‌ပွဲကပြီးတယ်‌။ စစ်‌‌ကောင်‌စီဘက်‌က ရဟတ်‌ယာဉ်‌နဲ့လာပစ်‌လို့‌ နောက်‌ပြန်‌ဆုတ်‌ခဲ့ရတယ်‌။ ‌ရွှေပြည်‌‌အေးမှာရှိတဲ့ ‌ထွေအုပ်ရုံး၊ ‌ဆေးရုံတွေ အကုန်‌သိမ်းပိုက်‌နိုင်‌ခဲ့တယ်‌။”

ရွှေပြည်အေးမြို့သစ်ကို ခန္တီးခရိုင် အမှတ်-၁ တပ်ရင်း-ဟုမ္မလင်း၊ HPDF၊ HPDF-124၊ HPDF မိုးကြိုး စတဲ့ မဟာမိတ်တပ်ပေါင်းစုက စီးနင်းသိမ်းပိုက်ခဲ့ပြီး စစ်ကောင်စီက ရဟတ်ယာဉ်နဲ့ သုံးကြိမ် လာရောက်ပစ်ခတ်ခဲ့ပေမဲ့ မဟာမိတ်တပ်ပေါင်းစုက အထိအခိုက် အကျအဆုံး မရှိဘဲ လက်ရှိအချိန်ထိ ရွှေပြည်အေးမြို့ကို အောင်မြင်စွာ သိမ်းပိုက်ထားဆဲဖြစ်‌တယ်‌လို့ ခန္တီးခရိုင် အမှတ်-၁ တပ်ရင်း-ဟုမ္မလင်းက ထုတ်‌ပြန်‌ပါတယ်။

စစ်ကိုင်းတိုင်း၊ အရာတော်မြို့မှာ တပ်စွဲထားတဲ့ သစ်ကျင်းကြီးကျေးရွာက စစ်ကောင်စီစခန်းကို ဒေသခံ တော်လှန်ရေးအင်အားစုတွေက ဖေဖော်ဝါရီ ၁ ရက် နေ့လယ် ၁ နာရီလောက်မှာ ဒရုန်းနဲ့ တိုက်ခိုက်ခဲ့တယ်လို့ ဒေသခံ ပြည်သူ့ကာကွယ်ရေးအဖွဲ့တွေဆီကနေ သိရပါတယ်။

သစ်ကျင်းကြီးကျေးရွာက စစ်ကောင်စီတပ်တွေဟာ အနီးပတ်ဝန်းကျင်က ကျေးရွာတွေကို စစ်ကြောင်းထိုးပြီး ဒေသခံပြည်သူတွေကို အနိုင်ကျင့် ဖမ်းဆီးနှိပ်စက်တာတွေ အကြိမ်ကြိမ် ပြုလုပ်နေတာကြောင့် အခုလိုတိုက်ခိုက်ရတာလို့ ဒေသခံကာကွယ်ရေးအဖွဲ့ ခေါင်းဆောင်တွေက ပြောပါတယ်။

“အဲဒီရွာက ပျူရွာဖြစ်နေတာကြာပြီဗျ။ အခုဟာက ဒရုန်း ၂ စီးနဲ့ မိုင်း ၄ စီးချ တိုက်ခိုက်ခဲ့တာ။ စခ ၂ ကောင် သေတယ်။ ၂ ကောင် ဒဏ်ရာရတယ်လို့ အတွင်းဖရဲသီးဆီက သိထားရတယ်။ ဖြည့်စွက်အနေနဲ့တော့ အာဏာရှင်ဘက်ကနေ ရပ်တည်မနေဘဲ ပြည်သူတွေဘက်ကို အမြန်ဆုံး ပူးပေါင်းပါလို့ပဲ ပြောချင်တယ်” လို့ အရာတော်ပြည်သူ့ကာကွယ်ရေးအဖွဲ့ Danger Force LPDF အဖွဲ့ခေါင်းဆောင် မောင်းလေးက ပြောပါတယ်။

အခုတိုက်ခိုက်တာကို- MRTF တပ်ဖွဲ့၊ မုံရွာခရိုင်တပ်ရင်းအမှတ်-၂၁တပ်ရင်း - တပ်ခွဲ-၂ (NDRF တပ်ဖွဲ့)၊ သပြေညိုပြောက်ကျားတပ်ဖွဲ့၊ Danger Force LDF တပ်ဖွဲ့နဲ့ မိုင်းမင်းသား တပ်ဖွဲ့တို့ ပူးပေါင်းတိုက်ခိုက်ခဲ့တာလို့ သိရပါတယ်။

စစ်ကိုင်းတိုင်း၊ စစ်ကိုင်းမြို့နဲ့ ညောင်ပင်ဝန်းကျေးရွာကြားမှာ ဖေဖော်ဝါရီ ၂ ရက် မနက် ၆ နာရီဝန်းကျင်က စစ်ကောင်စီတပ်ဖွဲ့ဝင်တွေ လိုက်ပါလာတဲ့ ကားတစီးကို မိုင်းဖောက်ခွဲ တိုက်ခိုက်ရာမှာ စစ်သား ၄ ဦး သေဆုံးခဲ့တယ်လို့ ဒေသကာကွယ်ရေးတပ်ဖွဲ့က ပြောပါတယ်။

စစ်ကိုင်းမြို့ကနေ ညောင်ပင်ဝန်းကျေးရွာဘက် မောင်းနှင်လာတဲ့ စစ်ကောင်စီတပ်ဖွဲ့ဝင် အင်အား ၁၅ ဦးလောက်ပါ အံစာတုံးအမျိုးအစားကားကို မိုင်း ၃ လုံးနဲ့ ဖောက်ခွဲတိုက်ခိုက်ခဲ့တာလို့ ဆိုပါတယ်။

“သူတို့က အံဇာတုံးကားနဲ့ ပုံမှားရိုက်ပြီး ခိုးကြောင်ခိုးဝှက် မောင်းလာတာ။ ဒီက သတင်းရပြီးသားမို့ စောင့်ကြိုတိုက်ခိုက်တာ။ ကားပေါ်က သူတို့တပ်သား ၄ ဦးသေတယ်၊ ၃ ဦး ဒဏ်ရာရသွားတယ်လို့ သိထားတယ်။ ကျနော်တို့က သေချာပြီဆိုမှ မစ်ရှင်ကို ဖော်ဆောင်ခဲ့တာပါ” လို့ မြေအောက်လျှပ်စီးပြောက်ကျားတပ်ဖွဲ့ တာဝန်ရှိသူက ပြောပါတယ်။

အဲ့ဒီတိုက်ခိုက်မှုကို မြေအောက်လျှပ်စီးပြောက်ကျားတပ်ဖွဲ့နဲ့ Dragon GZ အဖွဲ့တို့ ပူးပေါင်းလုပ်ဆောင်ခဲ့တယ်လို့ ဆိုပါတယ်။

ဖေဖော်ဝါရီ ၁ ရက်နေ့ကလည်း စစ်ကိုင်းမြို့ကနေ ထွက်ခွာလာတဲ့ တပ်မ ၃၃ မှ Honda Fit ကားတစီးကို စစ်ကိုင်းမြို့နယ်အတွင်းရှိ အုံးတောလမ်းပိုင်းနဲ့ ဆားတောင်လမ်းပိုင်းကြားမှာ ဒေသကာကွယ်ရေးအဖွဲ့က မိုင်းဆွဲတိုက်ခိုက်ရာမှာ နှစ်ပွင့်အဆင့် ဗိုလ်ကြီး ၁ ဦးနဲ့ စစ်သား ၄ ဦး သေဆုံးခဲ့တယ်လို့ သိရပါတယ်။

21 hours Ago

ဗြိတိန်တွင် အစိုးရဝန်ထမ်း ၁ သိန်းခန့် ဆန္ဒပြ

ဗြိတိန်နိုင်ငံမှာ စက်မှုလုပ်သားတွေ၊ မီးရထားဝန်ထမ်းတွေ၊ ဆရာတွေ အပါအဝင် အစိုးရဝန်ထမ်း အယောက် ၁ သိန်းလောက် ဖေဖော်ဝါရီ ၁ ရက်က သပိတ်မှောက်ခဲ့ကြပါတယ်။

ဒါဟာ ဗြိတိန်မှာ မျိုးဆက်တခုအတွင်း အကြီးမားဆုံး ညှိနှိုင်းသပိတ်မှောက်မှုဖြစ်ပြီး ကျယ်ကျယ်ပြန့်ပြန့် အနှောင့်အယှက် ဖြစ်ခဲ့ပါတယ်။

လူထုနဲ့ ကူးသန်းရောင်းဝယ်ရေးဝန်ဆောင်မှုများ သမဂ္ဂ အထွေထွေအတွင်းရေးမှူး မာ့ခ် ဆာဝေ့ါတ်ကာက သပိတ်မှောက်လူဦးရေဟာ လူနေမှုစရိတ် အကျပ်အတည်းကို ကိုင်တွယ်ဖြေရှင်းဖို့ အရေးတကြီးလုပ်ဆောင်ဖို့ လိုအပ်ကြောင်း ပြနေတယ်လို့ ပြောခဲ့ပါတယ်။

“အရင်ကထက် ပိုကြိုးစားရပေမယ့် ဒီနှစ်ကုန်မှာ ခင်ဗျား အရင်ကထက် ပိုဆင်းရဲဖို့ မထိုက်တန်ပါဘူး။”

ဆယ်စုနှစ်လေးစုအတွင်း အမြင့်ဆုံးအဆင့်ဖြစ်တဲ့ ငွေကြေးဖောင်းပွမှု ၁၀ ရာခိုင်နှုန်းကျော်နဲ့ လည်ပတ်နေတဲ့ ဗြိတိန်နိုင်ငံဟာ မကြာသေးမီလတွေအတွင်း ကျန်းမာရေးနဲ့ သယ်ယူပို့ဆောင်ရေးလုပ်သားတွေ၊ Amazon ဂိုဒေါင်ဝန်ထမ်းတွေနဲ့ Royal Mail စာတိုက်ဝန်ထမ်းတွေ အပါအဝင် အစိုးရဝန်ထမ်းတွေ ဆန္ဒပြနေကြတာပါ။

21 hours Ago

ကရင်နီဒေသတွင် စစ်အာဏာသိမ်း ၂ နှစ်အတွင်း ပြည်သူ ၄၀၀ သေဆုံး၊ နေအိမ် ၁၃၀၀ ကျော်ပျက်စီး

စစ်တပ်အာဏာသိမ်း ၂ နှစ်အတွင်း ကရင်နီပြည်မှာ  ဒေသခံ ၄၃၀ ဦး သေဆုံးခဲ့ရပြီး နေအိမ် ၁၃၀၀ ကျော်ပျက်စီးဆုံးရှုံးသွားခဲ့တယ်လို့ တိုးတက်သောကရင်နီပြည်သူ့အင်အားစု (PKPF) က ဖေဖော်ဝါရီ ၁ ရက်မှာ ထုတ်ပြန်ပါတယ်။

ရှမ်းပြည်နယ်တောင်ပိုင်း မိုးဗြဲ၊ ဖယ်ခုံနဲ့ ကယားပြည်နယ်အတွင်းက  စစ်အာဏာသိမ်းနှစ်နှစ်အတွင်း စစ်ကောင်စီတပ်သားတွေ ဖမ်းဆီးသတ်ဖြတ်တာကြောင့် သေဆုံးခဲ့ရတဲ့ ဒေသခံ ၃၀၂ ဦးရှိပြီး စစ်ဘေးရှောင်ရင်း သေဆုံးရသူ  ၁၂၈ ဦး ရှိခဲ့တာလို့ ထုတ်ပြန်ထားပါတယ်။

နှစ်နှစ်တာကာလအတွင်း လေကြောင်းကနေ တိုက်ခိုက်ခံရမှု အကြိမ်ပေါင်း ၁၉၀ ရှိခဲ့ပြီး ဘာသာရေးအဆောက်အဦ  ၂၈ လုံးပျက်စီးခဲ့ရကြောင်း ထုတ်ပြန်ထားပါတယ်။ မရားဖမ်းဆီးခံထားရသူ ၂၇၉ ဦးရှိကြောင်းလည်း ထုတ်ပြန်ထားပါတယ်။

အာဏာသိမ်း နှစ်နှစ်အတွင်း ကရင်နီပြည်မှာ တိုက်ပွဲပေါင်း ၅၆၂ ကြိမ်ဖြစ်ပွားခဲ့ပြီး စစ်ကောင်စီဘက်က  ၁၅၈၁ ဦး သေဆုံးကာ စစ်ကောင်စီရဲ့ ယာဉ် ၅၈ စီး ပျက်စီးသွားခံ့သလို ပြည်သူကာကွယ်ရေးတပ်နဲ့ လက်နက်ကိုင်တပ်ဖွဲ့ဝင်တွေဘက်က ၂၁၉ ဦး ကျဆုံးသွားခဲ့ကြောင်း ဖော်ပြပါတယ်။

အာဏာသိမ်း နှစ်နှစ်တာကာလအတွင်း ကရင်နီပြည်မှာ စစ်ဘေးဒုက္ခသည် ၂ သိန်းဝန်းကျင်ရှိနေပြီး အဲဒီစစ်ဘေးဒုက္ခသည်တွေဟာ တိုက်ပွဲတွေကြောင့် မကြာခဏထပ်မံ နေရာရွှေ့ပြောင်း စစ်ဘေးရှောင်နေရတယ်လို့ ကရင်နီ လူ့အခွင့်အရေးအဖွဲ့တွေက ပြောပါတယ်။

21 hours Ago

အမေရိကန်သမ္မတနှင့် တွေ့ဆုံဆွေးနွေးရန် အစီအစဉ်မရှိဟု ရုရှားပြော

ယူကရိန်းနိုင်ငံဆီ အမေရိကန်ပြည်ထောင်စုက စစ်ရေးအကူအညီတွေ မကြာခင်ပေးမယ့် အစီအစဉ်ထဲမှာ ပါလာမယ်လို့ အစီရင်ခံထားတဲ့ တာဝေးပစ်ဒုံးကျည်တွေဟာ ပဋိပက္ခကို အရှိန်တိုးစေနိုင်ပေမဲ့ သူ့လမ်းကြောင်းကို ပြောင်းလဲမှာမဟုတ်ဘူးလို့ ရုရှားသမ္မတနန်းတော် ကရင်မလင်က ဖေဖော်ဝါရီ ၁ ရက်မှာ ပြောလိုက်ပါတယ်။

ရုရှားသမ္မတ ဗလာဒီမာပူတင်ဟာ အမေရိကန်သမ္မတ ဂျိုးဘိုင်ဒင်နဲ့ တွေ့ဆုံဆွေးနွေးဖို့ အစီအစဉ် မရှိဘူးလို့လည်း ကရင်မလင်ပြောခွင့်ရ ဒီမီထရီ ပက်စကော့ဗ်က သတင်းထောက်တွေကို ပြောပါတယ်။

အမေရိကန်ဒေါ်လာ ၂ ဒသမ ၂ ဘီလီယံ တန်ဖိုးရှိတဲ့ အမေရိကန် စစ်ဘက်ဆိုင်ရာ အကူအညီတွေထဲမှာ တာဝေးပစ်ဒုံးကျည်တွေ ပထမဆုံးအကြိမ် ပါလာမယ်လို့ မျှော်လင့်ရတဲ့အကြောင်း အဲဒီကိစ္စနဲ့ပတ်သက်တဲ့ အမေရိကန်အရာရှိနှစ်ဦးက အင်္ဂါနေ့မှာ ရိုက်တာသတင်းဌာနကို ပြောပါတယ်။

ရုရှားက သိမ်းပိုက်ထားတဲ့ ခရိုင်းမီးယားကျွန်းဆွယ် အပါအဝင် သူ့ပိုင်နက်အားလုံးကို အင်အားနဲ့ ပြန်သိမ်းယူဖို့ စီစဉ်ထားတယ်လို့ ပြောထားတဲ့ ယူကရိန်းအစိုးရဟာ ဒီဒုံးကျည်တွေနဲ့ ရုရှားက ထိန်းချုပ်ထားတဲ့ နယ်မြေအတွင်း ပိုနက်နက်ရှိုင်းရှိုင်း ဝင်ရောက်တိုက်ခိုက်နိုင်စေမှာပါ။

ပူတင်ဟာ ပြီးခဲ့တဲ့နှစ် ဖေဖော်ဝါရီလမှာ ယူကရိန်းဆီ သောင်းနဲ့ချီတဲ့ ရုရှားတပ်တွေကို စေလွှတ်ခဲ့ပါတယ်။

ရုရှားရဲ့ ကိုယ်ပိုင်လုံခြုံရေးကို ကာကွယ်ဖို့နဲ့ ရုရှားအစိုးရကို ထိန်းချုပ်နိုင်ရေး၊ ရုရှားအားနည်းလာအောင် အနောက်နိုင်ငံတွေရဲ့ ကြိုးပမ်းမှုကြားကနေ ရပ်တည်နိုင်ရေး အတွက် စစ်ဆင်ရေးလုပ်ဖို့ လိုအပ်တယ်လို့လည်း ရုရှားက ပြောပါတယ်။

ယူကရိန်းနဲ့ အနောက်နိုင်ငံတွေက ရုရှားဟာ သူ့ရဲ့ နယ်မြေချဲ့ထွင်ဖို့ ရည်ရွယ်ပြီး တရားမဝင်စစ် ဆင်နွှဲနေတယ်လို့ စွပ်စွဲထားပါတယ်။

ရုရှားဟာ အမေရိကန်နဲ့ ရုရှားကြား နောက်ဆုံးလက်ကျန် နျူးကလီးယား သဘောတူစာချုပ်ကို ထိန်းသိမ်းထားချင်တယ်လို့ ရုရှားသမ္မတနန်းတော် ပြောခွင့်ရ ပဲ့စ်ကို့ဗ်က ပြောပါတယ်။

ရုရှားဟာ သူ့ပိုင်နက်နယ်မြေအတွင်း စစ်ဆေးခွင့်မပြုဘဲ ငြင်းဆန်ပြီး New START စာချုပ်ကို ချိုးဖောက်တယ်လို့ အမေရိကန်က အင်္ဂါနေ့က စွပ်စွဲခဲ့ပါတယ်။

21 hours Ago

ရနောင်း လ.ဝ.ကတွင် ထိန်းသိမ်းခံနေရသည့် မြန်မာနိုင်ငံသား ၆၀၀ ကျော် နေရပ်ပြန်ခွင့်ရ (ရုပ်သံ)

ထိုင်းနိုင်ငံမှာ ထောင်ချထားခံရတဲ့ မြန်မာနိုင်ငံသား ၆၀၀ ကျော်ဟာ လွတ်ရက်စေ့ ပြီးဖြစ်ပေမဲ့ မြန်မာနိုင်ငံ ပြန်ခွင့်မရဘဲ ရနောင်း လ.ဝ.က ထိန်းသိမ်းရေးစခန်းမှာ  လပေါင်းများစွာ ဆင်းရဲကျပ်တည်းစွာ နေခဲ့ရကာ ဒီနေ့ ဖေဖော်ဝါရီ   ၂ ရက်မှာတော့ မြန်မာဘက်က အားလုံးကို ပြန်ခေါ်သွားပြီလို့ ထိုင်းအခြေစိုက် သတင်းတွေမှာ ဖော်ပြပါတယ်။

မြန်မာအလုပ်သမား စုစုပေါင်း ၆၇၀ လောက်ကို သင်္ဘောတစီးလျှင် လူ ၂၀၀ လောက်နှုန်းနဲ့ တသုတ်ပြီးတသုတ် သယ်ယူမှာဖြစ်ပြီး ရန်ကုန်နဲ့ တခြားရပ်ဝေးမှာ နေထိုင်သူတွေအတွက် ကော့သောင်းကနေတဆင့် စစ်သင်္ဘောအကြီးတစီးနဲ့ ဆက်လက်ပို့ဆောင်သွားမယ်လို့ ဆိုပါတယ်။

နီးတဲ့လူတွေအတွက်တော့ ကားစီစဉ်ပေးထားပြီး မြန်မာဘက်ကိုရောက်ရင် နေရေးထိုင်ရေးနဲ့ ဆေးစစ်ဖို့တွေပါ စီစဉ်ထားတယ်လို့ ထိုင်းနိုင်ငံကို အရင်ရောက်ရှိလာတဲ့ မြန်မာရေတပ်အရာရှိက ရှင်းပြတယ်လို့  နေရပ်ပြန်မယ့် အလုပ်သမားတယောက်က ပြောပါတယ်။

ဒီနောက် တနင်္သာရီရေတပ်စခခန်းဌာနချုပ်က ဗိုလ်မှူးချုပ်သိန်းထူး ဦးဆောင်တဲ့အဖွဲ့က ရောက်လာပြီး ထိုင်းဘက်က ရနောင်းအုပ်ချုပ်ရေးမှူးထံကနေတဆင့် လွှဲပြောင်းတဲ့ အစီအစဉ် ပြုလုပ်ခဲ့ကာ မြန်မာအလုပ်သမားတွေ နောင်မှာ  တရားမဝင်လမ်းကနေ မလာဖို့၊ ပွဲစားတွေကို မယုံကြဖို့နဲ့ ထိုင်းအစိုးရကိုလည်း  ကျေးဇူးတင်ကြောင်းတွေ ပြောပြခဲ့တယ်လို့ ဆိုပါတယ်။

အဖမ်းခံထားရတဲ့ မြန်မာအလုပ်သမားတွေက လွတ်ရက်စေ့ပေမဲ့ ပြည်တော်ပြန်ခွင့်မရဘဲ၊ ရနောင်းအချုပ်မှာ ၆ လ ကာလအထိ နေနေရတာကြောင့် ပြီးခဲ့တဲ့ ဇန်နဝါရီ ၂၉ ရက်နဲ့ ၃၀ ရက်တွေမှာ နေရပ်ပြန်ပို့ပေးဖို့ ဆန္ဒပြ တောင်းဆိုခဲ့ကြတာကြောင့် အခုလို ထိုင်းအစိုးရက မြန်မာစစ်ကောင်စီနဲ့ ညှိနှိုင်းပြီး နေရပ်ပြန်ခွင့်ရတာ ဖြစ်ပါတယ်။

21 hours Ago

၁၂ နိုင်ငံပါသည့် ညွန့်ပေါင်းအဖွဲ့ထံမှ တင့်ကားအစီးရေ ၁၄၀ ခန့် ယူကရိန်း ရရှိမည်

ယူကရိန်းဟာ နိုင်ငံပေါင်း ၁၂ နိုင်ငံပါတဲ့ ညွန့်ပေါင်းအဖွဲ့ဆီက ပထမအကြိမ် ပေးပို့မှုအတွင်း တင့်ကားအစီးရေ ၁၂၀ ကနေ ၁၄၀ အထိ လက်ခံရရှိမယ်လို့ နိုင်ငံခြားရေးဝန်ကြီး ဒမစ်ထရို ခူလေဘာက ဇန်နဝါရီ ၃၁ ရက်မှာ ပြောပါတယ်။

ရုရှားအစိုးရဟာ ယူကရိန်းအရှေ့ပိုင်းမှာ အတိုးချ ထိုးစစ်ဆင်ဖို့ အကြီးအကျယ် ပိုအားထုတ်လာနေတဲ့အတွက် ရုရှားရဲ့ အင်ပြည့်အားပြည့် ကျူးကျော်စစ်ကို ခုခံကာကွယ်နိုင်ရေး ပင်မတိုက်ပွဲဝင် တင့်ကားတွေကို ထောက်ပံ့ပေးဖို့ အခုလအတွင်း အနောက်အုပ်စုက ကတိပြုခဲ့ပါတယ်။

စစ်ပွဲရဲ့ အတိမ်းအစောင်းမခံဘဲ အရေးကြီးတဲ့ အချိန်ကာလလို့ ယူကရိန်းအရာရှိတွေက ပြောထားပြီး နောက်ထပ် နိုင်ငံတွေက တင့်ကားတွေထောက်ပံ့ဖို့ ယူကရိန်းအစိုးရက နောက်ကွယ်ကနေ လုပ်နေတယ်လို့ နိုင်ငံခြားရေးဝန်ကြီးက ပြောပါတယ်။

“တင့်ကား ညွန့်ပေါင်းအဖွဲ့ဝင်အဖြစ် နိုင်ငံတွေ ပိုတိုးချဲ့ဖို့ လုပ်နေသလို ကတိကဝတ် ပြုထားပြီးသား နိုင်ငံတွေဆီက အလှူတွေ ပိုတိုးရရှိရေး နှစ်ခုစလုံးကို ဆက်လုပ်နေပါတယ်” လို့လည်း သူက ပြောပါတယ်။

ယူကရိန်းအစိုးရဟာ နိုင်ငံတောင်ပိုင်းနဲ့ အရှေ့ဘက်မှာ ရုရှားသိမ်းယူထားတဲ့ နယ်မြေ အများအပြားကို ပြန်သိမ်းဖို့ ကြီးကြီးမားမား တန်ပြန်ထိုးစစ်တရပ်စဖို့ စီစဉ်ထားပါတယ်။

ယူကရိန်းနိုင်ငံဆီကို အနောက်နိုင်ငံတွေရဲ့ စစ်ရေးအကူအညီတွေ မရောက်လာမချင်း အဲဒီအစီအစဉ်တွေကို ရပ်ဆိုင်းထားဖို့ အမေရိကန်က ယူကရိန်းအစိုးရကို ပြောထားပါတယ်။ ယူကရိန်းကလည်း လာမယ့် သီတင်းပတ်တွေ လတွေအတွင်း ရုရှားက အကြီးအကျယ် ထိုးစစ်ဆင်လာမှာကို စိုးရိမ်နေပါတယ်။

21 hours Ago

နျူးကလီးယားမပြန့်ပွားရေးစနစ်အား ထိခိုက်စေသည့် လုပ်ရပ်များကို ဆန့်ကျင်ဟု တရုတ်ပြော

နိုင်ငံတကာ နျူးကလီးယား မပြန့်ပွားရေးစနစ်ကို ထိခိုက်စေတဲ့ လုပ်ရပ်တွေကို ဆန့်ကျင်တယ်လို့ တရုတ်နိုင်ငံခြားရေးဝန်ကြီးဌာနက ဖေဖော်ဝါရီ ၁ ရက်မှာ ပြောလိုက်ပါတယ်။

သြစတြေးလျနဲ့ ဗြိတိန်ကာကွယ်ရေးဝန်ကြီးတွေဟာ ကုန်သွယ်ရေး၊ လုံခြုံရေးနဲ့ ဩစတြေးလျနိုင်ငံအတွက် နျူးကလီးယားစွမ်းအင်သုံး ရေငုပ်သင်္ဘော နည်းပညာတွေ ပံ့ပိုးပေးမယ့် အစီအစဉ်ကို ဆွေးနွေးဖို့ စီစဉ်ထားချိန်မှာ ခုလိုပြောလိုက်တာပါ။

ဗြိတိန်အစိုးရဟာ အင်ဒို-ပစိဖိတ်ဒေသအတွင်း သူ့သြဇာကိုတည်ဆောက်ဖို့ ကြိုးပမ်းနေလို့  သြစတြေးလျ နိုင်ငံခြားရေးဝန်ကြီးနဲ့ ကာကွယ်ရေးဝန်ကြီးတွေဟာ ကုန်သွယ်ရေးနဲ့ လုံခြုံရေးဆိုင်ရာ နှစ်နိုင်ငံ ထိပ်သီးဆွေးနွေးပွဲအတွက် အခုသီတင်းပတ်အတွင်း ဗြိတိန်ဆီ နှစ်ရက်ကြာ သွားရောက်ဆွေးနွေးကြမှာပါ။

ဒီဆွေးနွေးပွဲမှာ အင်ဒို-ပစိဖိတ် လုံခြုံရေး၊ ယူကရိန်းအတွက် ဆက်လက်ပံ့ပိုးကူညီမှု၊ အမေရိကန်၊ ဗြိတိန်နဲ့ သြစတြေးလျတို့ကြား သဘောတူညီချက်အရ သမားရိုးကျ လက်နက်တပ်ဆင်ထားတဲ့ နျူးကလီးယားစွမ်းအင်သုံး ရေငုပ်သင်္ဘောတွေအတွက် နည်းပညာ ပံ့ပိုးပေးမယ့် သဘောတူညီချက်တို့ကို ဆွေးနွေးကြမှာပါ။

သြစတြေးလျဟာ သူ့ရဲ့ နျူးကလီးယားစွမ်းအင်သုံး ရေငုပ်သင်္ဘောအုပ်စုသစ်အတွက် ဒီဇိုင်းကို ၂၀၂၃ ခုနှစ် အစောပိုင်းမှာ ကြေညာဖို့ရှိပါတယ်။

ပြီးခဲ့တဲ့နှစ်က တရုတ်နဲ့ ဆော်လမွန်ကျွန်းစုတို့ကြား လုံခြုံရေးသဘောတူစာချုပ် အပါအဝင် တရုတ်နိုင်ငံရဲ့ သြဇာလွှမ်းမိုးမှု ကြီးထွားလာချိန်မှာ ဗြိတိန်နဲ့ သြစတြေးလျ နှစ်နိုင်ငံစလုံးက ပစိဖိတ်ဒေသတွင်း ဆက်ဆံရေးကို မြှင့်တင်ဖို့ ကြိုးပမ်းနေကြပါတယ်။

21 hours Ago

CDM ဆင်များနှင့် ဆင်ဦးစီးများအတွက် “တော်လှန်တပ်သား မိုမိုလေးများ” ကမ်ပိန်းပြုလုပ်

အလောင်းတော်ကဿပက CDM ဆင်တွေနဲ့ ဆင်ဦးစီးတွေ အပါအဝင် တခြားဒေသမှာရှိတဲ့ CDM ဆင်တွေနဲ့ ဆင်ဦးစီးတွေအတွက် ရည်ရွယ်ပြီး ရန်ပုံငွေရရှိအောင်လို့ “တော်လှန်တပ်သား မိုမိုလေးများ - Elephants in Revolution” ကမ်ပိန်းကို ပြုလုပ်နေပြီလို့ ပွဲစီစဉ်သူက ပြောပါတယ်။

၂၀၂၁ ခုနှစ် စစ်အာဏာသိမ်းတဲ့အချိန်ကနေ ဒီနေ့အချိန်ထိ အကြမ်းမဖက် အာဏာဖီဆန်ရေး လှုပ်ရှားမှုမှာ ပြည်သူ့ဝန်ထမ်းတွေနဲ့အတူ ပါဝင်ခဲ့ကြတဲ့ ပြည်သူ့ဆင်လေးတွေဟာ ကာလရှည်ကြာလာတာနဲ့အတူ ဆင်ဝန်ထမ်းတွေနဲ့ ဆင်လေးတွေရဲ့ စားဝတ်နေရေး ကျန်းမာရေးစောင့်ရှောက်မှုတွေကလည်း ခက်ခဲလာလို့ အခုလို ရည်ရွယ်ပြုလုပ်တာလို့ ဆိုပါတယ်။

အခုကမ်ပိန်းမှာ ကံစမ်းမဲလက်မှတ်တွေကို ရောင်းချသွားမှာဖြစ်ပြီး ကမ်ပိန်းကနေရရှိတဲ့ ရန်ပုံငွေတွေကို NUG သယံဇာတနဲ့ သဘာဝပတ်ဝန်းကျင်ထိန်းသိမ်းရေး ဝန်ကြီးဌာနမှ ဆင်ဝန်ထမ်း CDM တွေနဲ့ CDM ဆင်ကလေးများ ထိန်းသိမ်းစောင့်ရှောက်ရေးအတွက် အသုံးပြုသွားမယ်လို့လည်း သိရပါတယ်။

ကံစမ်းမဲလက်မှတ်တစောင်ကို မြန်မာငွေ ၁၅,၀၀၀ နဲ့ ကံစမ်းနိုင်ပြီး ရွှေထည် ငွေထည်နဲ့ ပန်ချီကား အနုပညာပစ္စည်းတွေကို မဲဖောက်ပေးသွားမှာဖြစ်ကာ လက်မှတ်အစောင်ရေ ၃,၀၀၀ ရောင်းချနိုင်ဖို့ မျှော်မှန်းထားတယ်လို့လည်း တာဝန်ရှိသူက ပြောပါတယ်။

စစ်တပ်အာဏာသိမ်းပြီးတဲ့နောက် အလောင်းတော်ကဿပ အမျိုးသားဥယျာဉ်မှာရှိတဲ့ ဆင်ဦးစီးနဲ့ ဆင်တွေအားလုံး CDM ပြုလုပ်ခဲ့တာဖြစ်ပြီး လက်ရှိအချိန်မှာ ဆင်တွေအားလုံးကို ဘေးကင်းတဲ့ လွတ်မြောက်နယ်မြေတွေမှာ ထိန်းသိမ်း စောင့်ရှောက်ထားတယ်လို့လည်း ဆင်ဦးစီးတယောက်က ပြောပါတယ်။

အလောင်းတော်ကဿပနယ်မြေမှာ CDM ဆင် ၃၆ ကောင်နဲ့ CDM ဆင်ဦးစီး အပါအဝင် အိမ်ထောင်စု ၃၂ စု လူဦးရေ ၁၁၇ ဦးရှိတယ်လို့လည်း သိရပါတယ်။

21 hours Ago

တရုတ်က စစ်အင်အား အခိုင်အမာတည်ဆောက်နေပြီး ဒေသတွင်း အာဏာရရေး ကြိုးပမ်းနေဟု နေတိုးအကြီးအကဲ သတိပေး

မြောက်အတ္တလန္တိတ် စစ်ရေးမဟာမိတ်အဖွဲ့ (နေတိုး) ရဲ့ အတွင်းရေးမှူးချုပ် ယန်းစ်စတော့တန်ဘာ့ဂ်က တရုတ်ဟာ သူ့စစ်တပ်ကို အခိုင်အမာတည်ဆောက်နေပြီး ဒေသတွင်း သူ့အာဏာကို အခိုင်အမာရယူဖို့ ကြိုးပမ်းနေတယ်လို့ ဖေဖော်ဝါရီ ၁ ရက်မှာ သတိပေးလိုက်ပါတယ်။

လုံခြုံရေးအခြေအနေ ပိုတင်းမာလာချိန်မှာ ဂျပန်အစိုးရနဲ့ ဆက်ဆံရေးတိုးမြှင့်ဖို့ ဂျပန်နိုင်ငံဆီ သွားရောက်လည်ပတ်ချိန်မှာ ခုလိုပြောလိုက်တာပါ။

တရုတ်ပြည်မကြီးအစိုးရဟာ ပွင့်လင်းမြင်သာမှုမရှိဘဲ နျူးကလီးယားလက်နက်တွေ အပါအဝင် သူ့ရဲ့စစ်အင်အားကို အခိုင်အမာ တည်ဆောက်နေတယ်၊ တောင်တရုတ်ပင်လယ်ကို ထိန်းချုပ်ဖို့နဲ့ ထိုင်ဝမ်ကို ခြိမ်းခြောက်ဖို့ ကြိုးပမ်းနေတယ်လို့ တိုကျိုမြို့တော်က ခဲအိအို တက္ကသိုလ်က မိန့်ခွန်းနဲ့ ဆွေးနွေးမှုအခမ်းအနားမှာ စတော့တန်ဘာ့ဂ်က ပြောပါတယ်။

တရုတ်နိုင်ငံဟာ ရန်သူမဟုတ်ဘဲ ဘုံအကျိုးစီးပွားအတွက် ဖြစ်နိုင်ခြေရှိတဲ့ နယ်ပယ်တွေမှာ နေတိုးအဖွဲ့ဝင်နိုင်ငံတွေနဲ့ ထိတွေ့ဆက်ဆံသွားမယ်လို့လည်း သူကဆိုပါတယ်။

“တချိန်တည်းမှာပဲ ကျနော်တို့ဟာ ကျနော်တို့ရဲ့လုံခြုံရေး၊ ကျနော်တို့ရဲ့ တန်ဖိုးတွေနဲ့ အကျိုးစီးပွားအပေါ် တရုတ်နိုင်ငံရဲ့ စိန်ခေါ်မှုတွေကို ထုတ်ဖော်မပြရင် ကျနော်တို့ တာဝန်ပေါ့လျော့ရာ ကျလိမ့်မယ်” လို့ စတော့တန်ဘာ့ဂ်က ပြောပါတယ်။

စတော့တန်ဘာ့ဂ်နဲ့ ဂျပန်ဝန်ကြီးချုပ် ဖူမိယိုကီရှီဒတို့ဟာ ရုရှားရှဲ့ ယူကရိန်းကိုကျူးကျော်မှု၊  တရုတ်နဲ့ ရုရှား စစ်ရေးပူးပေါင်းဆောင်ရွက်မှုတွေ တိုးမြင့်လာတာတွေဟာ ဒုတိယကမ္ဘာစစ်နောက်ပိုင်း တင်းမာမှုအရှိဆုံး လုံခြုံရေးပတ်ဝန်းကျင်ကို ဖန်တီးပေးခဲ့တယ်လို့ ပြောရင်း ဆက်ဆံရေးအားဖြည့်ဖို့ ကတိပြုခဲ့ကြပါတယ်။

တရုတ်ပြည်မကြီးအစိုးရက စစ်ရေးစွမ်းရည်နဲ့ပတ်သက်ပြီး နေတိုးအတွင်းရေးမှူးချုပ် ယန်းစ် စတော့တန်ဘာ့ဂ်ရဲ့ ပြောဆိုချက်အပေါ် ချဲ့ထွင်ပြောနေတာသာဖြစ်တယ်လို့ ဖေဖော်ဝါရီ ၁ ရက်က တုံ့ပြန်ရင်း ပယ်ချလိုက်ပါတယ်။

နေတိုးအဖွဲ့အကြီးအကဲက တရုတ်နိုင်ငံဟာ ရန်သူမဟုတ်ဘူးလို့ ပြောပေမဲ့ ကိုယ့်ကိုယ်ကိုယ် ယုံကြည်လွန်းတဲ့ အပြုအမူကို ပြသပြီး ထိုင်ဝမ်ကို ခြိမ်းခြောက်ရင်း နေတိုးအဖွဲ့ဝင် နိုင်ငံတွေဆီအထိ ရောက်နိုင်တဲ့ စစ်ဘက်ဆိုင်ရာ စွမ်းရည်တွေကို ဖော်ဆောင်ပေးရင်း ပိုပိုပြီး အာဏာရှင်ဆန်လာနေတယ်လို့ ပြောပါတယ်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်က နေတိုးရဲ့ ဒေသတွင်း မိတ်ဘက်တွေနဲ့ ကာကွယ်ရေးဆိုင်ရာ ဆက်ဆံမှုတွေ အားကောင်းလာတာနဲ့ “စစ်အေးတိုက်ပွဲ စိတ်ဓာတ်” တို့ကို အာရှ-ပစိဖိတ်ဒေသမှာ မကြိုဆိုဘူးလို့လည်း ပြောပါတယ်။

“တရုတ်နိုင်ငံဟာ ကမ္ဘာနဲ့ ဒေသတွင်း ငြိမ်းချမ်းရေးနဲ့ တည်ငြိမ်ရေးတို့ကို အမြဲတမ်း ခုခံကာကွယ်နေတာပါ။ နေတိုးအနေနဲ့ ဥရောပလုံခြုံရေးကို ထိန်းသိမ်းရာမှာ ဘယ်လိုအခန်းကဏ္ဍက ပါဝင်နေတယ်ဆိုတာကို အလေးအနက် စဉ်းစားသင့်ပါတယ်” လို့ ဘေဂျင်းမြို့တော်မှာပြုလုပ်တဲ့ သတင်းစာရှင်းလင်းပွဲမှာ မောနင်က ပြောပါတယ်။

အာရှမှာ မဟာမိတ်တွေတိုးချဲ့ဖို့ နေတိုးရဲ့ ကြိုးပမ်းမှုကို တရုတ်နိုင်ငံက ဝေဖန်ခဲ့ပါတယ်။

ယူကရိန်းကို ကျူးကျော်တိုက်ခိုက်တာကို အထူးစစ်ဆင်ရေးလို့ခေါ်တဲ့ ရုရှားက နေတိုးရဲ့ တိုးချဲ့မှုကို သူ့လုံခြုံရေးအပေါ် ခြိမ်းခြောက်မှုအဖြစ် ထပ်ခါတလဲလဲ ရှုတ်ချခဲ့ဖူးပါတယ်။

22 hours Ago

အိန္ဒိယနှင်းလျှောစီးအပန်းဖြေစခန်းတွင် နှင်းထုကြီးပြိုကျပြီး ၂ ဦးသေဆုံး

အိန္ဒိယနိုင်ငံ ကက်ရှ်မီးယားဒေသ ဂါးလ်မာ့ဂ်မြို့ရဲ့ နာမည်ကျော် နှင်းလျှောစီး အပန်းဖြေစခန်းမှာ ဖေဖော်ဝါရီ ၁ ရက်က နှင်းပြိုကျမှု ဖြစ်ပွားပြီးနောက် နိုင်ငံခြားသား နှင်းလျှောစီးသူ ၂ ဦး သေဆုံးပြီး  ၂၀ နီးပါးကို ကယ်ဆယ်နိုင်ခဲ့ကြောင်း ရဲတပ်ဖွဲ့က ပြောပါတယ်။

နှင်းလျှောစီးသူတွေအားလုံးဟာ နိုင်ငံခြားသားတွေ ဖြစ်ကြပေမဲ့ ရဲတွေကတော့ သူတို့ ဘယ်နိုင်ငံသားတွေဖြစ်တယ်ဆိုတာ လူသိရှင်ကြား ထုတ်ပြန်ခြင်း မရှိသေးပါဘူး။

အာဏာပိုင်တွေဟာ တခြားနိုင်ငံခြားသား ၁၉ ဦးကို ကယ်တင်နိုင်ခဲ့ကြောင်းနဲ့ သေဆုံးခဲ့တဲ့ နှင်းလျှောစီးသူ ၂ ဦးရဲ့ ရုပ်အလောင်းတွေကို ဆေးရုံပို့ဆောင်ထားကြောင်း ဒေသဆိုင်ရာ ရဲတပ်ဖွဲ့က တွစ်တာမှာ ပြောပါတယ်။

ပေ ၂၀ လောက်မြင့်တဲ့ နှင်းထုကြီးတခုက သူတို့အပေါ်ကနေ ပြုတ်ကျလာတာဖြစ်ပြီး ဘေးကြုံလိုက်သူ ၇ ယောက်လောက်ထဲမှာ ၂ ယောက်က သေဆုံးသွားတာလို့ အမည်မသိ မျက်မြင်သက်သေတယောက်က ပြောပါတယ်။

ကက်ရှ်မီးယားတောင်ကုန်းတွေမှာ နှင်းမိုးတွေ ထူထူထဲထဲ ရွာချပြီးတာ ရက်ပိုင်းအကြာလောက်မှာပဲ ဂါးလ်မာ့ဂ်မြို့ရဲ့ အက်ဖှာဝက်ထ် နှင်းလျှောစီးဧရိယာမှာ နှင်းထုပြိုကျမှုကြောင့် နှင်းလျှောစီးသူတွေကို ထိခိုက်မိတာဖြစ်ကြောင်း ဒေသခံရဲအရာရှိ တဦးက ပြောပါတယ်။

22 hours Ago

အင်းတော် အသံတိတ်သပိတ်လှုပ်ရှားမှုကို ဓာတ်ပုံရိုက်သူတဦး အဖမ်းခံရ၊ ရေဦးတွင် စစ်တပ် လက်နက်ကြီးကြောင့် ၁ ဦးသေဆုံး

စစ်ကိုင်းတိုင်း၊ ကသာခရိုင်၊ အင်းတော်မြို့ အောင်ချမ်းသာရပ်ကွက်က အမျိုးသား ၁ ဦး ဖေဖော်ဝါရီ ၁ ရက် မနက်က မြို့ထဲမှာ Silent Strike အသံတိတ်သပိတ်ကို ဖုန်းနဲ့ ဓာတ်ပုံရိုက်နေချိန် စစ်ကောင်စီတပ်က ဖမ်းဆီးသွားတယ်လို့ Indaw Revolution-IR အဖွဲ့က ထုတ်ပြန်ပါတယ်။

“ဓာတ်ပုံရိုက်နေတုန်း ကင်းလှည့်နေတဲ့ ရဲကားနဲ့တွေ့ပြီး ​အသက် ၄၀ ကျော်အရွယ် အောင်ချမ်းသာရပ်ကွက်က ဦးလှအောင် အဖမ်းခံရတာ။ ဓာတ်ပုံလေးရိုက်တာတောင် ကြောက်ချေးပန်းနေမှတော့ စစ်ကောင်စီတပ်တွေဟာ အရမ်းကို ကြောက်စိတ်တွေဝင်ပြီး လုံးဝတပ်ပျက်နေပါပြီ။ ပြည်သူများ စစ်အာဏာရှင်အမြစ်ပြတ်အောင် ဒီထက်ပိုပြီး ကြိုးစားပေးကြပါဦးလို့ မေတ္တာရပ်ခံချင်ပါတယ်ဗျ” လို့ အင်းတော် PDF တပ်ဖွဲ့ဝင်တဦးက ဒီဗွီဘီကို ပြောပါတယ်။

ဖမ်းဆီးရမိသူကို စစ်ဆေးရာ ပြည်သူတွေနဲ့ ဝန်ထမ်းတွေကို ထိတ်လန့်ကြောက်ရွံ့စေဖို့ ရည်ရွယ်ပြီး လူမှုကွန်ရက်ပေါ်တင်ဖို့ စစ်ဆေးသိရှိရလို့ တရားဥပဒေနဲ့ အမှုဖွင့် အ‌ရေးယူ ဆောင်ရွက်နေကြောင်း စစ်ကောင်စီလက်အောက်ခံ အွန်လိုင်းမီဒီယာ Fifty Two Telegram မှာ ရေးသားထားပါတယ်။

စစ်ကိုင်းတိုင်း၊ ရေဦးမြို့နယ်၊ မူးသာကုန်းကျေးရွာအတွင်းကို စစ်ကောင်စီတပ်က ဖေဖော်ဝါရီ ၁ ရက် နေ့လယ်ပိုင်းက လက်နက်ကြီးနဲ့ပစ်ခတ်ခဲ့တာကြောင့် ကျေးရွာတွင်း အိမ်တလုံးပေါ် ကျရောက်ပေါက်ကွဲပြီး မိသားစု ၃ ဦး ထိခိုက်ဒဏ်ရာရပြီး ၁ ဦး သေဆုံးတယ်လို့ ဒေသခံတွေက ပြောပါတယ်။

“ဟုတ်ကဲ့၊ ရွာထဲကို စစ်ကောင်စီက လက်နက်ကြီးပစ်ခတ်လို့ အိမ်‌ပေါ်ကျ ပေါက်ကွဲပြီး လူသေတဲ့ အဲသတင်းက မှန်ပါတယ်ဗျ။ လက်နက်ကြီးက ရေဦးမြို့၊ တိုင်းရင်းဆေးရုံကနေ ပစ်ခတ်တာဗျ။ အဲဒီလို ပစ်ခတ်လို့ မူးသားကုန်းရွာထဲကျပြီး ပေါက်ကွဲလို့ ပြည်သူ ၄ ဦး ကျည်ထိမှန်ခဲ့တယ်ဗျ။ အဲဒီထဲက ဒဏ်ရာရသူတဦးကတော့ ဆုံးသွားတယ်။ သေဆုံးသူက အမျိုးသမီးပါဗျ။ အသက်က ၂၀ အရွယ်လောက်ရှိမယ်ဗျ။ နောက်ပြီးတော့ ရွာထဲက ကျွဲ ၂ ကောင်လည်း ကျည်ထိမှန်တယ်” လို့‌ ရေဦးမြို့နယ်ပြည်သူကာကွယ်ရေးအဖွဲ့ဝင်တဦးက ပြောပါတယ်။

စစ်ကောင်စီတပ်က ညအချိန်မှာ လက်နက်ကြီးနဲ့ ပိုမိုရမ်းသန်းပစ်ခတ်လေ့ရှိပြီး ရေဦးမြို့အနီးက ကျေးရွာတွေနဲ့ ခင်ဦးနယ်အတွင်းက ကျေးရွာတွေမှာ ကျရောက်ပေါက်ကွဲတာတွေ ရှိတယ်လို့ ဒေသခံတွေက ပြောပါတယ်။

22 hours Ago

ရုရှားနှင့် ဘယ်လာရုစ် ပူးတွဲ လေကြောင်း စစ်ရေးလေ့ကျင့်

ဘယ်လာရုစ်နိုင်ငံ အနောက်ပိုင်းမှာ ရုရှားနဲ့ ဘယ်လာရုစ် ပူးတွဲလေကြောင်း စစ်ရေးလေ့ကျင့်နေတဲ့ နောက်ဆုံးအဆင့်ရုပ်သံတွေကို ဘယ်လာရုစ် ကာကွယ်ရေးဝန်ကြီးဌာနနဲ့ သူ့ရဲ့ တရားဝင်သတင်းဌာနဖြစ်တဲ့ ဗိုအန်တီဗီတို့က ဇန်နဝါရီ ၃၁ ရက်မှာ ထုတ်လွှင့်လိုက်ပါတယ်။

စစ်ရေးစွမ်းရည်ပြပွဲကို စောင့်ကြည့်ခဲ့တဲ့ ဘယ်လာရုစ် နိုင်ငံတော်လုံခြုံရေးကောင်စီ အတွင်းရေးမှူး အလက်ဇန်းဒါး ဗိုလ်ဖှိုဗစ်ချ်က “ဒီစစ်ရေးလေ့ကျင့်မှုဟာ သဘာဝအရ ကာကွယ်ဖို့ပါ။ အိမ်နီးချင်းပိုင်နက်မှာ ကျနော်တို့ လေ့လာစောင့်ကြည့်နေတာတွေနဲ့ မတူဘဲ ဘယ်သူ့ကိုမှ ခြိမ်းခြောက်မနေဘူး” လို့ ပြောပါတယ်။

ဘယ်လာရုစ်အနောက်ပိုင်း ဘရပ်စ်ဒေသထဲက ရုဇာနီ လေ့ကျင့်ရေးကွင်းမှာ စစ်တပ်က လေကြောင်း စစ်ရေးလေ့ကျင့်ခဲ့ပြီး ရန်သူရဲ့ လေကြောင်းရန်ကာကွယ်ရေးစနစ်တွေကို နှိမ်နင်းတာ၊ ကွပ်ကဲထိန်းချုပ်ရေးနဲ့ စစ်လက်နက်ကိရိယာတွေ စစ်သည်တွေကို စုစည်းတာတွေကိုပါ လေ့ကျင့်ခဲ့တယ်လို့ အစီရင်ခံစာတွေက ဆိုပါတယ်။

လေယာဉ်တွေနဲ့ ဗုံးကြဲလေယာဉ်တွေကို တိုက်ခိုက်ရာမှာ လေကြောင်းအထောက်အပံ့ ပေးပုံကိုလည်း တိုက်လေယာဉ်တွေက အသွင်ယူ လေ့ကျင့်ခဲ့ပါတယ်။

ဘယ်လာရုစ်ဟာ ဇန်နဝါရီ ၁၆ ရက်ကစတဲ့ ၂ ပတ်ကြာ လေတပ်စစ်ရေးလေ့ကျင့်မှုကို ထိုးစစ်ဖြစ်နိုင်ချေအတွက် ပြင်ဆင်ဖို့ ကာကွယ်ရေးသဘာဝအဖြစ် လေ့ကျင့်တာလို့ အခိုင်အမာ ပြောနေတာပါ။

ဒါပေမဲ့ ယူကရိန်းပဋိပက္ခမှာ ပူးပေါင်းဖို့ ရုရှားက ဘယ်လာရုစ်အစိုးရကို တွန်းအားပေးနေလို့ စိုးရိမ်မှုကြီးထွားနေချိန်မှာ ခုလို လေ့ကျင့်တာ ဖြစ်နေပါတယ်။

ရုရှားသမ္မတနန်းတော်ကတော့ ယူကရိန်းက အထူးစစ်ဆင်ရေးမှာ ပိုတက်ကြွတဲ့ အခန်းကဏ္ဍမှာ ပါဝင်ရေး ဘယ်လာရုစ်ကို ဖိအားပေးနေတယ်ဆိုတဲ့အချက်ကို ငြင်းပါတယ်။

ရုရှားနဲ့ ဘယ်လာရုစ်တို့ဟာ ဒေသဆိုင်ရာတပ်ဖွဲ့တွေ စုစည်းကွပ်ကဲမှုအတွက် တပတ်ကြာ ဝန်ထမ်းလေ့ကျင့်ရေးသင်တန်းကို စတင်ခဲ့တယ်လို့ ဘယ်လာရုစ် ကာကွယ်ရေးဝန်ကြီးဌာနက ဇန်နဝါရီ ၃၁ ရက်မှာ ပြောပါတယ်။

ဒီလေ့ကျင့်မှုဟာ စက်တင်ဘာလ ရုရှားနိုင်ငံမှာကျင်းပမယ့် နှစ်နိုင်ငံ ပူးတွဲစစ်ရေးလေ့ကျင့်မှု အတွက် ကြိုတင်ပြင်ဆင်မှု တစိတ်တပိုင်းဖြစ်တယ်လို့ ဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

22 hours Ago

ရေစကြို ပခန်းငယ်ရဲကင်းစခန်းနှင့် မင်းတုန်းမြို့နယ်က ဂိတ်စခန်းတခု တိုက်ခိုက်ခံရ

မကွေးတိုင်း ရေစကြိုမြို့နယ် ပခန်းငယ်ရဲကင်းစခန်းကို ဖေဖော်ဝါရီ ၁ ရက်နေ့ မနက်ပိုင်းက ဒရုန်းနဲ့ ဗုံးကြဲတိုက်ခိုက်ခဲ့ပြီး စစ်ကောင်စီဘက်က ထိခိုက်ဒဏ်ရာရသူရှိနိုင်တယ်လို့ ရေစကြိုမြို့နယ် ပ.က.ဖ ကနေ သိရပါတယ်။

ရေစကြိုမြို့နယ် ပခန်းငယ်ရဲကင်းစခန်းကို မနေ့က မနက် ၆ နာရီလောက်မှာ စစ်အာဏာသိမ်း ၂ နှစ်ပြည့်ကို လက်တုံ့ပြန်တဲ့အနေနဲ့ ဒရုန်းနဲ့ အီနာဂါဗုံးသီး ၂ လုံးဖြတ်ချတိုက်ခိုက်ခဲ့တယ်လို့ ရေစကြိုမြို့နယ် ပ.က.ဖ ခေါင်းဆောင် ရဲဘော်ဝေကြီးက ဒီဗွီဘီကိုပြောပါတယ်။

“အဲဒီရဲစခန်းမှာ စစ်(...)တွေ အများကြီးတပ်စွဲထားတာဗျ။ အီနာဂါဗုံးသီး ၂ လုံးဖြုတ်ချတဲ့ အချိန်မှာ တလုံးကတော့ကျတယ်ဗျ။ နောက်တလုံးချတဲ့အချိန်မှာ ချချပြီးချင်း Drone Gun နဲ့ ဆွဲယူသွားတာကြောင့် ဒရုန်းတစင်းအပါဝင် အပိုပစ္စည်း တန်ဖိုး သိန်း ၈၀ လောက် နစ်နာဆုံးရှုံးပြီး ကျနော်တို့ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့တယ်။”

တိုက်ခိုက်မှုအတွင်းမှာ စစ်ကောင်စီဘက်က ထိခိုက်ဒဏ်ရာရသူရှိနိုင်ပြီး ဒရုန်းကိုတော့ သူတို့ဘက်က Drone Gun နဲ့ ပစ်ချလိုက်လို့ ပြန်ယူလို့ မရခဲ့ဘူးလို့ ဆိုပါတယ်။

အဲဒီ ပခန်းငယ်ရဲကင်းစခန်းကို ၂၀၂၁ ခုနှစ် နိုဝင်ဘာ ၁၃ ရက်နေ့မှာ ဒေသကာကွယ်ရေးပူးပေါင်းတပ်ဖွဲ့တွေက တိုက်ခိုက်သိမ်းပိုက်ပြီး မီးရှို့ဖျက်ဆီးခဲ့သလို ၂၀၂၂ ခုနှစ် ဧပြီ ၂၈ ရက်နေ့မှာလည်း ဒေသကာကွယ်ရေးပူးပေါင်းတပ်ဖွဲ့တွေက ဝင်ရောက်စီးနင်း တိုက်ခိုက်ခဲ့လို့ စစ်ကောင်စီဘက်က ၁၄ ယောက်သေဆုံးပြီး ၃ ယောက်ဒဏ်ရာရရှိခဲ့တယ်လို့ သိရပါတယ်။

မကွေးတိုင်း မင်းတုန်းမြို့နယ်မှာ စစ်ကောင်စီရဲ့ စစ်ဆေးရေးဂိတ်စခန်းတခုကို ဇန်နဝါရီလ ၃၁ ရက်နေ့ ည ၁၁ နာရီခွဲလောက်မှာ စစ်အာဏာသိမ်း ၂ နှစ်ပြည့် အထိမ်းအမှတ်အနေနဲ့ ဝင်ရောက်တိုက်ခိုက်ခဲ့ပြီး စစ်ကောင်စီဘက်က ၂ ယောက်ထက်မနည်းဒဏ်ရာရရှိခဲတယ်လို Swallow-PDF ရဲ့ ခေါင်းဆောင် ဗိုလ်ပျံလွှားက ဒီဗွီဘီကို ပြောပါတယ်။

“ကျနော်တို့ ပထမသွားတုန်းကတော့ စစ်အာဏာသိမ်း ၂ နှစ်ပြည့် အသံတိတ်သပိတ်မှာ လမ်းပိုင်းဆိုင်ရာ ကြီးကြပ်ဖို့ သွားခဲ့ပေမယ့် သတင်းတွေပေါက်သွားလို့ စစ်(...)တွေတပ်စွဲထားတဲ့ ပြောင်းရွာနားက စစ်ဆေးရေးဂိတ်ကို လက်ပစ်ဗုံး ၃ လုံးအပါဝင် လက်နက်ငယ်တွေနဲ့ ပစ်ခတ်တိုက်ခိုက်ခဲ့တာ။” 

အဲဒီစစ်ကောင်စီရဲ့ စစ်ဆေးရေးဂိတ်ဟာ တိုင်းရင်းသားတွေနဲ့ ပြည်သူတွေကို မတရားဖမ်းဆီးတာနဲ့ ငွေညှစ်တာတွေ ပြုလုပ်ကာ နည်းမျိုးစုံဒုက္ခပေးနေတာကြောင့် ဝင်ရောက်တိုက်ခိုက်ခဲ့တာဖြစ်ပြီး ပြည်သူ့ကာကွယ်ရေး ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ဗိုလ်ပျံလွှားက ပြောပါတယ်။

Sallow-PDF အနေနဲ့ လက်နက်ခဲယမ်းတွေ စုဆောင်းနေပြီး စစ်အာဏာရှင်အမြစ်ပြတ်တဲ့အထိ တိုက်ပွဲဝင်သွားမှာဖြစ်လို့ မိဘပြည်သူတွေအနေနဲ့ တတ်နိုင်တဲ့နေရာကနေ ပူးပေါင်းပါဝင်ကူညီပေးကြဖို့ကိုလည်း တောင်းဆိုထားပါတယ်။

တိုက်ခိုက်မှုဖြစ်စဉ်တွေမှာ ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေး သလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

23 hours Ago

ဒူးဒဏ်ရာပြန်ရခဲ့သည့် ကွင်းလယ်လူ ပေါ့ဘာ ပွဲထွက်ခွင့်ရရန် အချိန်ယူရဦးမည်

ဂျူဗင်တပ်နဲ့ ပြင်သစ်ကွင်းလယ်ကစားသမား ပေါ့ဘာဟာ ဒူးဒဏ်ရာ သက်သာလာခဲ့ပေမဲ့ ဒဏ်ရာပြန်ရခဲ့လို့ ပွဲထွက်ကစားဖို့ အချိန်စောင့်ဆိုင်းရဦးမယ်လို့ သိရပါတယ်။

ပေါ့ဘာဟာ အခုနှစ်ရာသီအစကတည်းက ယူနိုက်တက်ကနေ အလွတ်ပြောင်းရွှေ့ကြေးနဲ့ အသင်းဟောင်း ဂျူဗင်တပ်အသင်းဆီ ပြန်လည်ပြောင်းရွှေ့လာခဲ့သူဖြစ်ပြီး ဒူးဒဏ်ရာ ခွဲစိတ်ကုသခဲ့ရလို့ ရာသီဝက်ကာလရောက်တဲ့အထိ တပွဲမှ ပါဝင်ကစားခွင့် မရရှိသေးတာပါ။

ပြီးခဲ့တဲ့တပတ်က အသင်းနဲ့အတူ လေ့ကျင့်ခန်းပြန်ဆင်းခဲ့ပေမဲ့ သူ့ရဲ့ဒူးဒဏ်ရာက အရှင်းမပျောက်သေးဘဲ နာကျင်မှုဝေဒနာ ခံစားခဲ့ရတာပါ။

ဒီအခြေအနေကြောင့် ပေါ့ဘာအနေနဲ့ မနက်ဖြန်မှာကစားမယ့် လာဇီယိုနဲ့ ကိုပါအီတာလီယာ ပွဲစဉ်ကို ထပ်ပြီးလွဲချော်ဦးမှာ ဖြစ်ပါတယ်။

23 hours Ago

စည်းမျဉ်းသစ်ကြောင့် နောက်ခံလူ ဒိုဟာတီကို စပါးအသင်း စာချုပ်ဖျက်သိမ်းပေးခဲ့ရ

ကစားသမား အငှားချမှုနဲ့ပတ်သက်ပြီး ဖီဖာရဲ့ စည်းမျဉ်းအသစ်အရ စပါးအသင်းဟာ နောက်ခံလူ ဒိုဟာတီကို စာချုပ်ဖျက်သိမ်းပေးခဲ့ရပါတယ်။

ဖီဖာရဲ့စည်းမျဉ်းသစ်အရ အသင်းတသင်းဟာ တရာသီအတွင်းမှာ အငှားချတဲ့ ကစားသမား အရေအတွက် ၈ ဦးထက် မပိုရဘူးလို့ ပါရှိပါတယ်။

စပါးအသင်းဟာ ဒိုဟာတီကိုလည်း အက်သလက်တီကိုအသင်းဆီကို အငှားချထားဖို့ စီစဉ်ခဲ့ပေမဲ့ အငှားချတဲ့ကစားသမား ၈ ဦး ကျော်လွန်သွားတဲ့အတွက် စာချုပ်ဖျက်သိမ်းခဲ့ရတာပါ။

စပါးအသင်းဟာ ဟယ်ရီဝင့်ခ်၊ အန်ဒွန်ဘီလီ၊ ဘရိုင်ယန်ဂီလ်၊ ရက်ဂူလွန်၊ လိုဆယ်ဆို အစရှိတဲ့ ကစားသမားတွေ အပါအဝင် စုစုပေါင်း ၈ ဦးအထိ အငှားချထားခဲ့တာပါ။

စပါးအသင်းနဲ့ ဒိုဟာတီတို့ရဲ့ စာချုပ်သက်တမ်းကလည်း ၆ လသာ ကျန်ရှိတော့တာလို့ သိရပါတယ်။

နောက်ခံလူ ဒိုဟာတီကတော့ အက်သလက်တီကိုအသင်းဘက်က ကမ်းလှမ်းလာချိန်မှာ အခွင့်အရေးကောင်းတခုကို လက်လွှတ်နိုင်စွမ်းမရှိခဲ့ကြောင်း တီကိုနဲ့ စာချုပ်ချုပ်အပြီးမှာ ပြောသွားပါတယ်။

23 hours Ago

“ပျံလွှားအောင် မြို့ပြစစ်ဆင်ရေး”တွင် ကျဆုံးခဲ့သည့် ရဲဘော်တဦးကို NUG က "အသက်စွန့်သူရဲကောင်းတံဆိပ်" ချီးမြှင့်

ပြီးခဲ့တဲ့ ၂၀၂၁ ခုနှစ်တုန်းက “ပျံလွှားအောင် မြို့ပြစစ်ဆင်ရေး” မှာ ကျဆုံးခဲ့တဲ့ ရဲဘော်တယောက်ကို အမျိုးသားညီညွတ်ရေးအစိုးရ (NUG) က "အသက်စွန့်သူရဲကောင်းတံဆိပ်" ချီးမြှင့်လိုက်ပါတယ်။

အထူးစစ်ဆင်ရေးတပ်ဖွဲ့ - S.O.F တပ်ဖွဲ့ဝင် ကိုယ်ပိုင်အမှတ် SA - 033 ရဲဘော်ငဆက်ဟာ တောင်ပိုင်းစစ်ဒေသကွပ်ကဲရေးရဲ့ “ပျံလွှားအောင် မြို့ပြစစ်ဆင်ရေး” တာဝန်ထမ်းဆောင်ရင်း ပြီးခဲ့တဲ့ ၂၀၂၁ ခုနှစ်၊ နိုဝင်ဘာ ၁၆ ရက်ည ၈ နာရီလောက်မှာ ရန်ကုန်ုမြို့၊ သင်္ဃန်းကျွန်းမြို့နယ်၊ ကြီးပွားရေးရပ်ကွက်ထဲမှာ ရန်သူစစ်ကောင်စီတပ်ကို ခုခံရင်ဆိုင်တိုက်ခိုက်ရင်း တိုင်းပြည်နဲ့ ပြည်သူလူထုအတွက် မြင့်မြတ်စွာ အသက်ပေးလှူခဲ့တာ ဖြစ်ပါတယ်။

ရဲဘော်ငဆက်ဟာ တပ်စုမှူးတယောက်ဖြစ်ပြီး တပ်ဖွဲ့ကနေ ပေးအပ်တဲ့ တာဝန်တွေကို သက်စွန့်ကြိုးပမ်း ကြိုးစားဆောင်ရွက်ခဲ့တဲ့အတွက် NUG အစိုးရ၊ ပြည်ထဲရေးနှင့်လူဝင်မှု​ကြီးကြပ်ရေးဝန်ကြီးဌာနကနေ ဒီဆုတံဆိပ်ကို ပေးအပ်ခဲ့တာလို့ ထုတ်ပြန်ပါတယ်။

ရန်ကုန်တိုင်း၊ ပဲခူးတိုင်းနဲ့ ဧရာဝတီတိုင်း တိုင်း ၃ တိုင်းကို ပေါင်းပြီး ဟံသာဝတီခရိုင်လို့ သတ်မှတ်ကာ  ပျံလွှားအောင်စစ်ဆင်ရေးဆိုပြီး ပြည်သူ့ကာကွယ်ရေးတပ်တွေက ကြေညာတိုက်ခိုက်ခဲ့ကြတာ ဖြစ်ပါတယ်။ 

ကျဆုံးရဲဘော် ငဆက်အတွက် တပ်ဖွဲ့မှူးက အမှတ်တရ ကဗျာတစ်ပုဒ် ရေးစပ်ဂုဏ်ပြုထားပါ တယ်။

ကျဆုံးရဲဘော် ငဆက်အတွက် အမှတ်တရ

 "သူရဲကောင်းကဗျာ"

 ကြယ်ကြွေတိုင်း ဝမ်းနည်းပေမဲ့

 ကြယ်တွေမြေမခဘူးဆိုတာသိရမယ်၊

 အရှိန်အဟုန်နဲ့ ဝဲပျံရင်း

 အလင်းနဲ့ပြင်းအားကို မြင်လိုက်ရတယ်မလား၊

 တစ်စင်းကြွေဆင်းသွားတိုင်း

 ကောင်းကင်မှာ တစ်ဆိုင်းလုံးပြန်လင်းလက်မယ်၊

 သူရဲကောင်းတစ်ယောက်ကျဆုံးသွားတိုင်း

 သန်းငါးဆယ်သော သူရဲကောင်းတွေရှိတယ် . . . ။

 #အောင်စံရှား

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

24 hours Ago

သည်းခြေအိတ် ခွဲထုတ်ခဲ့ရတဲ့ စပါးနည်းပြကွန်တီ မန်စီးတီးပွဲကို လွဲချော်မည်

စပါးအသင်းနည်းပြကွန်တီဟာ သည်းခြေအိတ်ရောင်ရမ်းတာ စစ်ဆေးတွေ့ရှိပြီးနောက် ခွဲစိတ် ဖယ်ရှားခဲ့ရပြီး ပြန်လည်သက်သာလာပြီလို့သိရပါတယ်။

ကနဦးမှာ ဗိုက်နာတာကနေတဆင့် အရေးပေါ် ဆေးကုသခဲ့ရပြီးနောက် ယောင်ယမ်းနေတဲ့ သည်းခြေအိတ်ကို ခွဲထုတ်ခဲ့ရတာဖြစ်ပြီး  ပြန်လည်ကောင်းမွန်လာဖို့ တသင်းစလုံးက ဆန္ဒပြုကြောင်း စပါးအသင်းကလည်း တရားဝင် သတင်းထုတ်ပြန်ခဲ့ပါတယ်။

စပါးနည်းပြကွန်တီကတော့ ခွဲစိတ်မူလုပ်နေစဉ်မှာ ဆုတောင်းပေးခဲ့ကြတဲ့သူတွေအားလုံးကို ကျေးဇူးတင်ရှိပြီး လက်ရှိအချိန်မှာ ပြန်လည်သက်သာနေပြီဖြစ်ကြောင်း၊ ပုံမှန် အတိုင်းပြန်ဖြစ်ဖို့ လုပ်ဆောင်ရမှာဖြစ်ပြီး အသင်းသားတွေနဲ့ ပြန်ဆုံဖို့ မစောင့်နိုင်တော့ကြောင်း အင်စတာဂရမ်ကနေ အသိပေးခဲ့ပါတယ်။

စပါးအသင်းဟာ ဒီတစ်ပတ်တနင်္ဂနွေနေ့မှာ မန်စီးတီးအသင်းကို အိမ်ကွင်းမှာ လက်ခံကစားရမှာဖြစ်ပြီး နည်းပြချုပ် ကွန်တီကိုင်တွယ်ဖို့မရှိတာကြောင့် လက်ထောက်နည်းပြ စတယ်လီနီက တာဝန်ယူကိုင်တွယ်သွားဖို့ရှိပါတယ်။

24 hours Ago

အသက် ၅၆ နှစ်ရှိ ဂျပန်တိုက်စစ်မှူး မီယူယာ ပေါ်တူဂီဒုတိယတန်းကလပ်ဆီ ပြောင်းရွှေ့

အသက် ၅၆ နှစ်ရှိပြီဖြစ်တဲ့ ဂျပန်တိုက်စစ်မှူး မီယူယာဟာ ပေါ်တူဂီဒုတိယတန်းကလပ် အိုလေဗီရန်စီ အသင်းဆီ ပြောင်းရွှေ့ကစားမှာဖြစ်ပါတယ်။

ဂျေလိဂ်ကလပ် ယိုကိုဟားမားအသင်းကနေ အငှားစာချုပ်နဲ့ ပြောင်းရွှေ့ခဲ့တာပါ။ ကမ္ဘာ့အသက်အကြီးဆုံးဘောလုံးသမားအဖြစ် စံချိန်တင်ထားတဲ့ ကာဇူယိုရှီ မီယူယာဟာ မနှစ်က ဂျပန်စတုတ္ထတန်းကလပ် ဆူဇူကာပွိုင့်ဂတ်တာစ် အသင်းမှာ အငှားထွက်ကစားခဲ့ပြီး စုစုပေါင်း ၁၈ ပွဲမှာ ၂ ဂိုးသွင်းခဲ့ပါတယ်။

တခါမှမကစားဖူးသေးတဲ့ လိဂ်ပြိုင်ပွဲအသစ်ဖြစ်ပေမယ့်  အကောင်းဆုံးခြေစွမ်းထုတ်ပြနိုင်အောင် ကြိုးပမ်းသွားမယ်လို့ စာချုပ်ချုပ်ဆိုအပြီးမှာ မီယူယာကပြောပါတယ်။

သူဟာ ၁၉၈၆ ခုနှစ်ကတည်းက ဘရာဇီးကလပ်ဆန်းတို့စ်အသင်းမှာ ကစားသမားဘ၀ စတင်ခဲ့ပြီး အီတလီ၊ ခရိုအေးရှားနဲ့ သြစတြေးလျနိုင်ငံတွေကလိဂ်ပြိုင်ပွဲတွေမှာလည်း သွားရောက်ကစားခဲ့ ပါသေးတယ်။

ဂျပန်လက်ရွေးစင်ဟောင်းဖြစ်ပြီး စုစုပေါင်း ၈၉ ပွဲမှာ ၅၅ ဂိုးသွင်းခဲ့ပါတယ်။ အသက် ၆၀ အထိ ဘောလုံးဆက်ကစားဖို့ ရည်မှန်းထားကြောင်း မီယူယာက ပြောထားပါတယ်။

1 day Ago

စစ်တပ် အကြမ်းဖက်ပစ်ခတ်သတ်ဖြတ်မှုကြောင့် ကျဆုံးပြည်သူ ၂၉၅၀ ခန့်ရှိလာ

မြန်မာနိုင်ငံမှာ အာဏာသိမ်း ၂ နှစ်တာအကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂၉၅၀ နီးပါးနဲ့ ဖမ်းဆီးထိန်းသိမ်းခံရသူပေါင်း ၁၇,၅၉၈ ယောက်ထိရှိလာခဲ့ပြီဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ထားပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၃ ခုနှစ်၊ ဖေဖော်ဝါရီ ၁ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။

နွေဦးတော်လှန်ရေးကာလအတွင်း ဒီနေ့အထိ ၁၃,၇၈၇ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၂,၂၉၉ ယောက်ကတော့ ထောင်ဒဏ် ချမှတ်ခံထားရပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေအတွက်ကတော့ ၁၀၁ ယောက် ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၄၃ ယောက် ရှိလာခဲ့ပြီဖြစ်ပါတယ်။

လတ်တလောအချိန်ထိ အာမခံနဲ့ လွတ်မြောက်သူ ၂၄ ယောက်ရှိပြီး ပြန်လည်လွတ်မြောက်လာသူဦးရေကတော့ ၃,၇၈၇ ယောက် ရှိခဲ့တယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၂၇ ရက်က စစ်ကိုင်းတိုင်း၊ ကောလင်းမြို့နယ်၊ ကုက္ကိုကုန်းကျေးရွာကို အကြမ်းဖက်စစ်အုပ်စုက  တိုက်ခိုက်ရေး ရဟတ်ယာဉ် ၂ စီးနဲ့ ပစ်ခတ်ခဲ့တာကြောင့် ဒေသခံ အမျိုးသမီးတယောက်ဖြစ်တဲ့ မ ခိုင်ဇင်နွယ်မှာ  ဦးခေါင်းကို ကျည်ထိမှန်ပြီး နေရာတင် သေဆုံးသွားခဲ့တယ်လို့ အေအေပီပီက ပြောပါတယ်။

ဒါ့အပြင် ဇန်နဝါရီ ၃၀ ရက်ည ၈ နာရီလောက်ကလည်း စစ်ကိုင်းတိုင်း၊ အရာတော်မြို့နယ်၊ ငွေတွင်းကျေးရွာမှာ ရွာခံ ပျူစောထီးနဲ့ စစ်သားတွေက ဒေသခံရွာသား ၃ ယောက်ဖြစ်ကြတဲ့ ကိုဇော်နိုင်၊ ကိုကျော်မင်းစိုးနဲ့ ကိုရှစ်ဗို့တို့ကို မေးမြန်းဖို့ ရှိတယ်ဆိုကာ ဖမ်းဆီးခဲ့ပြီး နောက်တရက် ဇန်နဝါရီ ၃၁ ရက်မှာ ကိုကျော်မင်းစိုးရဲ့ ရုပ်အလောင်းကို မိသားစုဝင်တွေကို လာရောက် ယူဆောင်ခိုင်းခဲ့တယ်လို့ သိရပါတယ်။ လတ်တလောမှာတော့ ကျန်ဒေသခံ ၂ ယောက်ရဲ့ အခြေအနေကို သိရှိရခြင်း မရှိသေးဘူးလို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

1 day Ago
More News
Up