CRPH

November 23, 2022

နော်ဝေပါလီမန်အမတ်များနှင့် CRPH /NUCC/ NUG ခေါင်းဆောင်များ တွေ့ဆုံဆွေးနွေး

နော်ဝေနိုင်ငံရေးပါတီများမှ ပါလီမန်အမတ်တွေနဲ့  CRPH /NUCC/ NUG ခေါင်းဆောင်တွေ နိုဝင်ဘာ ၂၂ ရက်က တွေ့ဆုံပြီး မြန်မာ့အရေးဆွေးနွေးခဲ့ကြတယ်လို့ အမျိုးသားညီညွတ်ရေးအစိုးရ (NUG)  နော်ဝေနိုင်ငံဆိုင်ရာကိုယ်စားလှယ်ရုံးက သတင်းထုတ်ပြန်ပါတယ်။

အချိန် ၂ နာရီကြာတွေ့ဆုံပွဲမှာ  ဖက်ဒရယ်ဒီမိုကရေစီနဲ့ ဖက်ဒရယ်ပဋိညာဉ်ရေးရာကိစ္စတွေ၊ စစ်ကောင်စီကျင်းပမယ့် တရားမဝင်သည့် ရွေးကောက်ပွဲကိစ္စတွေအပြင် စစ်ကောင်စီရဲ့ လူ့အခွင့်အရေးချိုးဖောက်မှု၊ ICC၊ ICJ နဲ့ နိုင်ငံတချို့မှာ စစ်ကောင်စီကို တရားစွဲဖို့ ဆောင်ရွက်နေမှု၊ အရပ်သားပြည်သူတွေအပေါ် စစ်တပ်ရဲ့တိုက်ခိုက်မှုနဲ့ မီးရှို့ဖျက်ဆီးမှုကိစ္စတွေနဲ့ ပတ်သက်တဲ့ အခြေအနေတွေကို မြန်မာကိုယ်စားလှယ်တွေက ရှင်းလင်းဆွေးနွေးခဲ့ကြပါတယ်။

ဒါ့အပြင် ပြည်တွင်းစစ်ကြောင့် အမျိုးသမီးနဲ့ ကလေးသူငယ်တွေ ထိခိုက်မှုအခြေအနေနဲ့ လိုအပ်ချက်တွေ၊ NUG ရဲ့ နိုင်ငံတကာပူးပေါင်းဆက်ဆံရေးဆိုင်ရာ ဖြစ်ပေါ်တိုးတက်မှုတွေနဲ့ ရင်ဆိုင်နေရတဲ့ အခက်အခဲတွေ၊ အိမ်နီးချင်းနိုင်ငံတွေနဲ့ ဆက်ဆံရေး၊ နိုင်ငံတကာအကူအညီတွေကို နယ်စပ်ဖြတ်ကျော် စီးဆင်းစေဖို့ အခွင့်အလမ်းတွေ ဖန်တီးပေးနိုင်ဖို့ မြန်မာဘက်က နော်ဝေအစိုးရကို အကြံပြုချက်တွေ၊ အာဆီယံဘုံသဘောတူညီအပေါ် သဘောထားနဲ့ နော်ဝေအစိုးရနဲ့ မြန်မာ့ဖက်ဒရယ်ဒီမိုကရေစီအင်အားစုတွေ ပူးပေါင်းဆောင်ရွက်နိုင်မယ့် အလားအလာတွေကိုလည်း အကျယ်တဝင့် ဆွေးနွေးခဲ့တယ်လို့ဆိုပါတယ်။

နော်ဝေနိုင်ငံရေးပါတီတွေဘက်ကလည်း မြန်မာနိုင်ငံမှာ ဒီမိုကရေစီဆိတ်သုဉ်းသွားစေဖို့ စစ်ကောင်စီက အကြမ်းဖက်ကြိုးပမ်းနေတာဟာ မြန်မာပြည်သူတွေကိုသာမက ငြိမ်းချမ်းမှု၊ တရားမျှတမှုနဲ့ လွတ်လပ်မှုကို မြတ်နိုးတဲ့ ကမ္ဘာ့လူသားတရပ်လုံးကိုပါ စော်ကားတာဖြစ်ကြောင်း၊ မြန်မာ့အရေးဟာ ယူကရိန်း၊ အာဖဂနစ္စတန်နဲ့ အီရန် အရေးလို့ ကမ္ဘာကြီးက မျက်ကွယ်ပြုမထားသင့်တဲ့ အရေး ဖြစ်ကြောင်း၊ ဒါကြောင့် မြန်မာနိုင်ငံမှာ စစ်အာဏာရှင်စနစ် ပျက်သုဉ်းပြီး၊ ဖက်ဒရယ်ဒီမိုကရေစီ နိုင်ငံရေးစနစ် ပေါ်ပေါက်လာတယ်အထိ အားပေးကူညီမယ်လို့ ဆွေးနွေးခဲ့ကြပါတယ်။

အစည်းအဝေးကို နော်ဝေနိုင်ငံရေးပါတီတွေဖြစ်တဲ့ Liberal ပါတီ၊ Green ပါတီနဲ့  Socialist Left ပါတီတို့က အမတ်တွေ၊ တခြားပါတီတွေက ကိုယ်စားလှယ်တွေနဲ့ အကြံပေးအရာရှိတွေ တက်ရောက်ခဲ့ကြပါတယ်။

မြန်မာဘက်ကတော့ အမျိုးသားညီညွတ်ရေးအစိုးရဝန်ကြီးတွေဖြစ်တဲ့ ဦးအောင်မျိုးမင်း ဒေါက်တာဝင်းမြတ်အေး၊ နော်စူစန်နာလှလှစိုး၊ ဒေါက်တာဆာဆာနဲ့ ဒုဝန်ကြီး ဦးမိုးဇော်ဦး၊ ပြည်ထောင်စုလွှတ်တော်ကိုယ်စားပြုကော်မီတီ (CRPH) ဥက္ကဋ္ဌ  ဦးအောင်ကြည်ညွန့်၊ အမျိုးသားညီညွတ်ရေးအတိုင်ပင်ခံကောင်စီ(NUCC)မှ ဦးမောင်မောင်နဲ့ ဦးတိုးကျော်လှိုင်၊ အော်စလိုတက္ကသိုလ်မှ ပါမောက္ခ Kristian Stokke၊ NUG နော်ဝေနိုင်ငံဆိုင်ရာကိုယ်စားလှယ် ဦးမောင်မောင်မြင့်နဲ့ ကိုယ်စားလှယ်ရုံးအဖွဲ့မှူး ဒေါ်ဝတ်မှုန်ဝင်းတို့တက်ရောက်တယ်လို့ NUG ကကြေညာပါတယ်။

လာမယ့် ဖေဖော်ဝါရီလမှာ လက်တွေ့ကျတဲ့ အစီအစဉ်တွေကို ဆက်လက်ဆွေးနွေးနိုင်ဖို့ ပိုမိုကျယ်ပြန့်တဲ့ တွေ့ဆုံဆွေးနွေးပွဲ ထပ်မံကျင်းပဖို့ ရှိနေတယ်လို့ NUG ကိုယ်စားလှယ်ရုံး သတင်းထုတ်ပြန်ချက်အရ သိရပါတယ်။

1 week Ago

October 24, 2022

အကြမ်းဖက်စစ်တပ်၏ ရာဇဝတ်မှုများ အမြန်အရေးယူနိုင်ရေး ကုလအပါအဝင် ကမ္ဘာ့ခေါင်း ဆောင်များ ပူးပေါင်းလုပ်ရန် CRPH တိုက်တွန်း

ကုလသမဂ္ဂလုံခြုံရေးကောင်စီအပါအဝင် ကမ္ဘာ့ခေါင်းဆောင်တွေအနေနဲ့ မြန်မာပြည်သူတွေရဲ့ အသက်နဲ့ အခြေခံလူ့အခွင့်အရေးတွေကို ကာကွယ်ပေးဖို့၊ ရာဇဝတ်မှုကျူးလွန်သူတွေကို အမြန်ဆုံး အရေးယူနိုင်ရေးအတွက် ပူးပေါင်းဆောင်ရွက်ပေးကြဖို့ ပြည်ထောင်စုလွှတ်တော်ကိုယ်စားပြုကော်မတီ (CRPH) က တောင်းဆိုလိုက်ပါတယ်။ 

“KIO အထိမ်းအမှတ်နေ့” တေးဂီတ ဖျော်ဖြေပွဲကို အကြမ်းဖက်စစ်ကောင်စီက လေကြောင်းနဲ့ တိုက်ခိုက်ခဲ့မှုနဲ့ ပတ်သက်ပြီးတော့ သဘောထားထုတ်ပြန်ချက်မှာ ခုလိုဖော်ပြလိုက်တာဖြစ်ပြီး အဆိုပါ ဖြစ်ရပ်အတွင်း သေဆုံးခဲ့ရသူတွေ၊ မိသားစုဝင်တွေ၊ ကချင်တိုင်းရင်းသား ပြည်သူတွေနဲ့အတူ ထပ်တူဝမ်းနည်းကြေကွဲရကြောင်း၊ အဲဒီလို အရပ်သားပြည်သူတွေအပေါ် အကြမ်းဖက်စစ်ကောင်စီက စနစ်တကျ ပစ်မှတ်ထား တိုက်ခိုက်ခဲ့မှုတွေအပေါ်လည်း ပြင်းပြင်းထန်ထန် ကန့်ကွက်ရှုတ်ချလိုက်ပါတယ်။

အောက်တိုဘာ ၂၃ ရက် မနေ့က ည ၈ နာရီခွဲအချိန်က ကချင်ပြည်နယ်၊ ဖားကန့်မြို့မှာ ကျင်းပနေတဲ့ “KIO အထိမ်းအမှတ်နေ့” တေးဂီတ ဖျော်ဖြေပွဲကို အကြမ်းဖက် စစ်တပ်က တိုက်ခိုက်ရေးလေယာဉ် ၃ စီးကို အသုံးပြုကာ လေကြောင်းနဲ့ ရည်ရွယ်ချက်ရှိရှိ တိုက်ခိုက်ခဲ့တာကြောင့် နာမည်ကျော် အဆိုတော်၊ အနုပညာရှင်တွေအပါအဝင် ကချင်တိုင်းရင်းသားပြည်သူအယောက် ၅၀ ထက်မနည်း သေဆုံးခဲ့ကာ ထိခိုက်ဒဏ် ရာရရှိခဲ့သူ အများအပြားရှိခဲ့တယ်လို့ ဆိုပါတယ်။

လူသတ်ခေါင်းဆောင် မင်းအောင်လှိုင် ဦးဆောင်တဲ့ အကြမ်းဖက်စစ်တပ်ဟာ ဒီမိုကရေစီအ‌ရေးလှုပ်ရှားသူတွေ၊ လူ့အခွင့်အရေးလှုပ်ရှားသူတွေ၊  အကြမ်းဖက်စစ်တပ်ကို ဆန့်ကျင်သူတွေနဲ့ တိုင်းရင်းသားအင်အားစု တွေအပေါ် ခြိမ်းခြောက်အကျပ်ကိုင်ပြီး သတ်ဖြတ် တိုက်ခိုက်နေတဲ့အပြင် အရပ်သားပစ်မှတ်တွေကို ရည်ရွယ်ချက်ရှိရှိ တိုက်ခိုက်နေတယ်ဆိုတာကို ဒီဖြစ်ရပ်တွေက သက်သေခံနေတယ်လို့ ထုတ်ပြန်ချက်မှာ ဖော်ပြပါတယ်။

စစ်ကိုင်းတိုင်း၊ ဒီပဲယင်းမြို့နယ်ရှိ စာသင်ကျောင်းကို လေကြောင်းနဲ့ တိုက်ခိုက်ခဲ့မှု နောက်ပိုင်းမှာ ချင်းပြည်နယ်၊ ကရင်ပြည်နယ်၊ ရခိုင်ပြည်နယ်၊ စစ်ကိုင်းတိုင်းနဲ့ ကချင်ပြည်နယ်တွေမှာလည်း အကြမ်းဖက် စစ်ကောင်စီက လေကြောင်း အင်အားသုံးပြီးတော့ တိုက်ခိုက်မှုတွေ ဆက်တိုက်ပြုလုပ်ခဲ့တဲ့နည်းတူ စစ်ကိုင်းတိုင်းနဲ့ မကွေးတိုင်းတွေမှာ ပြည်သူတွေရဲ့ နေအိမ်တွေကို မီးရှို့တာ၊ ကျေးရွာနေ ပြည်သူတွေကို မဟုတ်မမှန် စွပ်စွဲဖမ်းဆီးတာ၊ လူမဆန်စွာ သတ်ဖြတ်တာမျိုးတွေလို စစ်ရာဇဝတ်မှုတွေနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေကို ဆက်တိုက် ကျူးလွန်လုပ်ဆောင်လာနေခဲ့တာပါ။။

နိုင်ငံတကာအသိုက်အဝန်းအနေနဲ့ မြန်မာပြည်သူတွေအပေါ် အကာအကွယ်ပေးဖို့ တာဝန် ပျက်ကွက်မှုနဲ့ နိုင်ငံတကာ ရာဇဝတ်မှုတွေ ကျူးလွန်နေတဲ့ အကြမ်းဖက် လူသတ်စစ်တပ်အပေါ် အရေးယူဖို့ ပျက်ကွက်နေမှုတွေကြောင့် စစ်အာဏာရှင်စနစ် ချုပ်ငြိမ်းရေးနဲ့ ဒီမိုကရေစီအရေး ကြိုးပမ်းနေကြတဲ့ မြန်မာပြည်သူတွေဟာ ရက်စက်တဲ့ အကြမ်းဖက်တိုက်ခိုက် သတ်ဖြတ်မှုတွေကို နေ့စဉ်ကြုံတွေ့ရင်ဆိုင်နေရတယ်လို့လည်း ထုတ်ပြန်ချက်ထဲမှာ ဖော်ပြပါတယ်။ 

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ချက်အရ မြန်မာနိုင်ငံမှာ အာဏာသိမ်း ၁ နှစ်ခွဲကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေ ကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၃၈၀ နီးပါးနဲ့ ဖမ်းဆီးထိန်းသိမ်းခံရသူပေါင်း ၁၆၀၀၀ နီးပါးထိရှိခဲ့တယ်လို့ ဆိုပါတယ်။

မြန်မာနိုင်ငံတဝန်းမှာတော့ အမျိုးသမီးနဲ့ ကလေးငယ်တွေ အပါအဝင် နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ ဒသမ ၄ သန်းကျော် ရှိလာခဲ့ပြီဖြစ်ကာ အဲဒီအထဲကမှ လူဦးရေ ၁ သန်းကျော်ဟာ ၂၀၂၁ခုနှစ် ဖေဖော်ဝါရီလ အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့မလုံခြုံမှုတွေကြောင့် နေရပ်စွန့်ခွာထွက်ပြေးကြရသူတွေ ဖြစ်တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က နောက်ဆုံးထုတ်ပြန်ထားပါတယ်။

1 month Ago
More News
Up