ချင်းပြည်နယ်၊ ထန်တလန်မြို့နယ် ရဲတပ်ဖွဲ့မှူးရုံးကို ဖေဖော်ဝါရီ ၈ ရက်က ချင်းတိုင်းရင်းသား ကာကွယ်ရေးတပ်ဖွဲ့တွေ တိုက်ခိုက်သိမ်းပိုက်ခဲ့တဲ့အတွက် ရဲတပ်ဖွဲ့ဝင်တွေ လေကြောင်းပစ်ကူနဲ့ အမြောက်ပစ်ကူယူကာ အောင်မြင်စွာထွက်ပြေးနိုင်ခဲ့ပြီး သိမ်းဆည်းခံရတဲ့ လက်နက် ၄၀ ကျော်ကလည်း ပြုပြင်ဖို့လိုအပ်တဲ့ လက်နက်ငယ်တွေဖြစ်တယ်လို့ ဒီကနေ့ထုတ် စစ်ကောင်စီ သတင်းစာတွေမှာ ဖော်ပြပါတယ်။
ဖေဖော်ဝါရီ ၈ ရက် ညပိုင်းက CNA-CDF ချင်းကာကွယ်ရေးတပ်ဖွဲ့ဝင်တွေက ထန်တလန်မြို့နယ် ရဲတပ်ဖွဲ့မှူးရုံးကို ဝင်ရောက်တိုက်ခိုက်ခဲ့ပြီး ဖေဖော်ဝါရီ ၉ ရက် မနက် ၁ နာရီလောက်မှာ ရဲစခန်းကို သိမ်းပိုက်နိုင်ခဲ့ကာ လက်နက် ၄၀ ကျော်နဲ့ ရဲအလောင်း ၄ လောင်း သိမ်းဆည်းရမိခဲ့ပြီး ကျန်ရှိတဲ့ ရဲတပ်ဖွဲ့ဝင်တွေက ကစဉ့်ကလျား ထွက်ပြေးသွားခဲ့ကြတယ်လို့ ထုတ်ပြန်ထားတာပါ။
အဲဒီလို မြို့နယ်ရဲတပ်ဖွဲ့မှူးရုံးကို လက်လွှတ်လိုက်ရပေမဲ့ စစ်ကောင်စီဘက်ကတော့ ရဲတပ်ဖွဲ့ဝင်တွေက စနစ်တကျ အောင်မြင်စွာ ဆုတ်ခွာနိုင်ခဲ့ကာ စစ်တပ်လုံခြုံရေး တပ်စခန်းကို သွားရောက်ပူးပေါင်းနိုင်ခဲ့တယ်လို့လည်း ဖော်ပြထားပါတယ်။
အခုလို မြို့နယ်ရဲတပ်ဖွဲ့မှူးရုံး တိုက်ခိုက်ခံရပြီးတဲ့နောက် စစ်ကောင်စီဘက်က လေကြောင်းတိုက်ခိုက်မှုတွေ ပြုလုပ်ပြီး အဆက်မပြတ် ဗုံးကြဲခဲ့ပါသေးတယ်။
အဆိုပါ မြို့နယ်ရဲစခန်းကို ပြန်လည်သိမ်းပိုက်နိုင်ရေးနဲ့ မြို့လုံခြုံရေးအတွက် စစ်ကူစစ်ကြောင်းတွေ ထန်တလန်မြို့သို့ ရောက်ရှိစုဖွဲ့နေပြီး စစ်ဆင်ရေးလုပ်ဖို့ စီမံဆောင်ရွက်နေတယ်လို့လည်း စစ်ကောင်စီက ထုတ်ပြန်ထားပါတယ်။
စစ်အုပ်ချုပ်ရေး ကြေညာထားတဲ့ ချင်းပြည်နယ်၊ ထန်တလန်မြို့ရှိ မြို့မ ရဲစခန်းကို ဖေဖော်ဝါရီ ၈ ရက် ည ၉ နာရီဝန်းကျင်က ချင်းအမျိုးသားတပ်မတော် CNA / CNF က ဝင်ရောက်စီးနင်းနိုင်ခဲ့ပြီး လက်နက်မျိုးစုံ ၄၀ ကျော် သိမ်းဆည်းရမိခဲ့ပါတယ်။
စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင် ၄၀ နီးပါး အခြေချတပ်စွဲထားတဲ့ ရဲစခန်းကို ချင်းအမျိုးသား တပ်မတော် (CNA/ CNF) က နှစ်နာရီကျော်ကြာ တိုက်ခိုက်ခဲ့ပြီးတဲ့နောက် အခုလို သိမ်းဆည်းရမိခဲ့တာဖြစ်ပြီး သိမ်းဆည်းရမိတဲ့ သေနတ်တွေထဲမှာ ဒရုန်းကို ပစ်ချတဲ့ အမျိုးအစားတွေလည်း ပါဝင်တယ်လို့ CNF က ဓာတ်ပုံနဲ့ တကွ ထုတ်ပြန်ထားပါတယ်။
အဲဒီလိုတိုက်ခိုက်ခံခဲ့ရပြီးတဲ့နောက် ဖေဖော်ဝါရီလ ၉ ရက်နေ့ ဒီကနေ့ မနက်ပိုင်းမှာတော့ ထန်တလန်မြို့မ ရဲစခန်းနဲ့ တဝိုက်ကို စစ်ကောင်စီက တိုက်လေယာဉ်တွေ အသုံးပြုပြီး လေကြောင်းကနေ တိုက်ခိုက်နေတယ်လို့ CNF ပြန်ကြားရေး တာဝန်ရှိသူက ပြောပါတယ်။
“သူတို့ဘက်က အကျအဆုံး လေးယောက်လောက် တွေ့တယ်။ ကျန်တဲ့ဟာတွေကတော့ တိမ်းရှောင်ကြတယ်လို့ သိရတယ်။ ကျနော်တို့ဘက်က တယောက်ကျတယ်။ တယောက် ဒဏ်ရာရတယ်။ ဒီမနက်မှာတော့ လေကြောင်းတိုက်ခိုက်မှုတွေ လုပ်နေပါတယ်။”
လက်ရှိမှာ စစ်ကောင်စီက တိုက်လေယာဉ်၅ စီး နဲ့ ဗုံးကြဲတိုက်ခိုက်နေတယ် ချင်းအမျိုးသားတပ်မတော် CNA/ CNF ရဲ့ ပြန်ကြားရေး တာဝန်ခံက ဆလိုင်းထက်နီက ပြောပါတယ်၊
“မနေ့ညက ထန်တလန်မြို့ပေါ်ရဲ့ စစ်ကောင်စီအင်အား ၄၀ ကျော်ရှိတဲ့ မြို့မရဲစခန်းတခုကို ကျနော်တို့ မနေ့ည ၉ နာရီလောက်ကတည်းက ဝင်သိမ်းနိုင်ဖို့ကြိုးစားတယ် မနက်ခင်း ၁နာရီမှာတော့ ကျနော်တို့ အပြီးအစီး ဝင်ပြီးတော့ စီးနိုင်ခဲ့တယ်ပေါ့ လက်နက်က အလက်ပေါင်း ၄၀ ခန့်သိမ်းဆည်းနိုင်ခဲ့တယ်ပေါ့ အဲဒီလက်နက် ၄၀ ကိုကြည့်ပြီး ကျနော်တို့ခန့်မှန်းထားတဲ့အတိုင်း သူတို့ အင်အား ၄၀ ရှိတယ် သူတို့ဘက်က အလောင်း ၄ လောင်းတွေ့တယ်” လို့ ပြောပါတယ်၊
စစ်ကောင်စီနဲ့ အပြန်အလှန်တိုက်ခိုက်မှုကြောင့် CNF ဘက်က ရဲဘော် တဦး ကျဆုံးပြီး တစ်ဦးဒဏ်ရာ ရရှိခဲ့တဲ့အကြောင်း ဆလိုင်းထက်နီက “ ကျန်တဲ့စစ်ခွေးတွေကတော့ နောက်ဆုတ်သွားတယ် လွတ်သွားတယ်ပေါ့ ကျနော်တို့ ဘက်ကတော့ တစ်ယောက်ကျတယ်၊ တယောက်ဒဏ်ရာရတယ်။အဲဒီအကျိုးဆက်အားဖြင့် အခုထိတော့ တိုက်လေယာဉ် ဖိုက်တာတွေ ၅ စီးနဲ့ ဗုံးလာကြဲနေတာတွေတော့ရှိတာပေါ့နော် ဒါပေမဲ့ အထိအခိုက်တော့ မရှိဘူးပေါ့” လို့ ဆက်ပြောပါတယ်။
မြန်မာနိုင်ငံတွင်းက လက်နက်ကိုင်ခုခံမှု အားကောင်းတဲ့ မြို့နယ် ၃၇ မြို့နယ်ကို စစ်အာဏာသိမ်း နှစ်နှစ်ပြည့် ဖေဖော်ဝါရီ ၂ ရက်နေ့မှာ စစ်ကောင်စီက စစ်အုပ်ချုပ်ရေး ကြေညာခဲ့တဲ့အထဲမှာ ချင်းပြည်နယ်ထဲက ထန်တလန်မြို့လည်း ပါဝင်ခဲ့ပါတယ်။
