CDM ရဲဝန်ထမ်း

November 26, 2022

ကြံခင်းမြို့နယ်က CDM ရဲဝန်ထမ်းညီအစ်နှစ်ဦး၏ နေအိမ်ကို စစ်ကောင်စီ ချိပ်ပိတ်

ဧရာဝတီတိုင်း ကြံခင်းမြို့နယ်မှာ စစ်အာဏာရှင် ဆန့်ကျင်ရေးပြုလုပ်ခဲ့တဲ့ ညီအကိုရဲဝန်ထမ်းနှစ်ဦးရဲ့ နေအိမ်ကို နိုဝင်ဘာ ၂၅ ရက် နေ့လယ်မှာ စစ်ကောင်စီက ချိပ်ပိတ်ခဲ့တယ်လို့ ဒေသခံတွေက ပြောပါတယ်။

စစ်ကောင်စီကို ဆန့်ကျင်ဆန္ဒပြခဲ့တဲ့ ရဲတပ်သား သူရိန်လင်း နဲ့ ဒုတပ်ကြပ် တာရာလင်းတို့ရဲ့ ဖခင်ဖြစ်သူ ဦးသန့်စင်နေထိုင်ရာ တလိုင်းကွင်းကျေးရွာက နေအိမ်ကို စစ်ကောင်စီတပ်ဖွဲ့ဝင်တွေက လာရောက်ချိပ်ပိတ်သွားတာလို့ ဒေသခံတဦးက ပြောပါတယ်။

"ရဲလေးတွေနေတဲ့ အိမ်ကိုလာချိပ်ပိတ်သွားတာ။ စစ်အာဏာရှင်ဆန့်ကျင်ရေးစာတွေ ရေးလို့ဆိုပြီး ထောင်ထဲမှာ။ သူတို့ရဲ့ အဖေ ဦးသန့်စင်လည်းမရှိဘူး၊ အိမ်က ပိတ်ထားတာကြာပြီ။ အဲဒါကို PDFနဲ့ ဆက်သွယ်ပါတယ်ဆိုပြီး  စစ်တပ်၊ ရဲ၊ ထွေအုပ်နဲ့ အုပ်ချုပ်ရေးမှူးအဖွဲ့က လာချိပ်ပိတ်သွားတာ။” 

လူမှုကွန်ရက်မှာ  စစ်အာဏာရှင်ဆန့်ကျင်ရေး  စာရေးသားတယ်ဆိုပြီး ရဲတပ်သား သူရိန်လင်းနဲ့ ရဲဒုတပ်ကြပ် တာရာလင်းတို့ကို  ၂၀၂၁ ခုနှစ် ဖေဖော်ဝါရီ ၃ ရက်က ဖမ်းဆီးခဲ့သလို ဖခင် ဦးသန့်စင်ဟာလည်း  ရပ်ရွာဆူပူအောင် ပြုလုပ်တယ်အကြောင်းပြပြီး ၂၀၂၁ခုနှစ် မတ်လမှာ စစ်ကောင်စီက ဖမ်းဝရမ်းထုတ်ခဲ့တဲ့အတွက် ရှောင်တိမ်းနေရပါတယ်။

ရဲတပ်သား သူရိန်လင်းနဲ့ ရဲဒုတပ်ကြပ် တာရာလင်းတို့ဟာ လူမှုကွန်ရက်မှာ  စစ်အာဏာရှင်ဆန့်ကျင်ရေး  စာရေးသားတယ်ဆိုတဲ့ အကြောင်းပြချက်နဲ့ ပုသိမ်ထောင်မှာ ထောင်ဒဏ် ၃ နှစ်စီ ချမှတ်ခံထားရပါတယ်။

2 weeks Ago

February 21, 2022

စစ်အာဏာသိမ်းမှုဆန့်ကျင်ခဲ့သည့် ရဲညီအစ်ကို ၂ ဦး ထောင်ဒဏ် ၃ နှစ်ထပ်ချခံရ

ဧရာဝတီတိုင်း၊ ကြံခင်းမြို့နယ်က စစ်အာဏာသိမ်းမှုကို ပထမဆုံး ဆန့်ကျင်ခဲ့တဲ့ ရဲညီအစ်ကို ၂ ဦးကို စစ်ကောင်စီတရားရုံးက ထောင်ဒဏ် ၃ နှစ် ထပ်မံချမှတ်လိုက်ပါတယ်။

ရဲစည်းကမ်းထိန်းသိမ်းရေးဥပဒေနဲ့ အရေးယူကာ ထောင် ၁ နှစ်ချမှတ်ထားပြီး လွတ်ရက်စေ့ခါနီးမှ ပုဒ်မ ၅၀၅ (က) နဲ့  တရားစွဲပြီး ထောင်ဒဏ် ၃ နှစ်ထပ်မံချမှတ်လိုက်တာလို့ မိသားစုဝင်တွေက ပြောပါတယ်။

“လွတ်ရက်သိပ်မလိုတော့ဘူး၊ အဲ့တာကို ထောင်ဒဏ် ၃ နှစ် ထပ်ချလိုက်တာ။ ပုသိမ်ထောင်မှာရှိတဲ့ ထောင်အရာရှိ ၃ ပွင့်နဲ့သူက တရားစွဲတာ၊ မတရားသဖြင့်လုပ်တာကို မတရားသူကြီးက အမိန့်ချတာလို့ပဲ ပြောချင်တယ်” လို့ ဖခင်ဖြစ်သူ ဦးသန့်စင်က ပြောပါတယ်။ 

ရဲညီအစ်ကို နှစ်ဦးကို ထောင်မချခင် ၃ လလောက်ကလည်း ပုသိမ်အကျဉ်းထောင်ထဲမှာ ၃ လလုံး တိုက်ပိတ်ထားခဲ့တယ်လို့ ဆိုပါတယ်။ 

စစ်အာဏာသိမ်းမှု ဆန့်ကျင်ခဲ့တဲ့ ရဲတပ်သား သူရိန်လင်းနဲ့ ရဲဒုတပ်ကြပ် တာရာလင်းတို ညီအစ်ကို နှစ်ဦးကို  စစ်ကောင်စီတပ်သားတွေက ဖေဖော်ဝါရီ ၃ ရက်က စတင်ဖမ်းဆီးခဲ့ပြီး ခုအချိန်အထိ မိသားစုဝင်တွေက တွေ့ခွင့်မရခဲ့ဘူးလို့ မိသားစုဝင်တွေက ပြောပါတယ်။

ရဲညီအစ်ကို ၂ ဦးရဲ့ ဖခင်ဖြစ်သူ ဦးသန့်စင်ကိုလည်း စစ်ကောင်စီတပ်သားတွေက လိုက်လံဖမ်းဆီးနေတာကြောင့် ထွက်ပြေးတိမ်းရှောင်နေရပါတယ်။

10 months Ago
More News
Up