CDM မီးရထားဝန်ထမ်းများ

October 25, 2021

CDM သာစည်မီးရထားဝန်ထမ်းများ ပြန်လွတ်၊ တက္ကသိုလ်ကျောင်သားများ ပြန်မလွတ်သေး

ပြန်လွှတ်ပေးလိုက်တဲ့အထဲ ကွန်ပျူတာတက္ကသိုလ်ကျောင်သား အောင်ခန့်ပိုင်မိုး အပါအဝင် ကျောင်းသား ၃ ဦးကို ချန်ထားသဖြင့် ပြစ်တင်ရှုတ် ချကြောင်း မိတ္ထီလာအခြေစိုက်တက္ကသိုလ်ကျောင်းသားသမဂ္ဂများကွန်ရက်က ထုတ်ပြန်ထားပါတယ်။

မန္တလေးတိုင်း သာစည်မြို့နယ် အမှတ် (၇) ရပ်ကွက်ရှိ နဘဲရွှေထီးဘုရားဝင်းအတွင်း နေထိုင်ကြတဲ့ သာစည်မီးရထား CDM ဝန်ထမ်းတွေကို အောက်တိုဘာ ၂၂ ရက်ညက စစ်တပ်က ဖမ်းဆီးစစ်ဆေးကာ အောက်တိုဘာ ၂၃ ရက်နေ့မှာ ပြန်လွှတ်ပေးလိုက်တာဖြစ်ပြီး ကျောင်းသား ၃ ဦးမပါတဲ့အတွက် အခုလို ကြေညာချက် ထုတ်ပြန်လိုက်တာပါ။

သာစည်မြို့ခံတစ်ဦးက “ဘုရားဝင်းထဲမှာ မီးရထားဝန်ထမ်းအိမ်ထောင်စု ၅၀ လောက် နေနေတယ်။ ၂၇ ယောက်ကို စစ်တပ်က ဖမ်းဆီးစစ်ဆေးတယ်၊ နောက်ရက်မှာ ၂၄ ယောက်တော့ ပြန်လွှတ်ပေးလိုက်တယ်၊ ကျောင်းသား ၃ ယောက်ကိုတော့ အခုထိပြန်မလွှတ်သေးဘူး” လို့ ပြောပါတယ်။

သာစည်မှာ အုပ်ချုပ်ရေးမှူးများအိမ်၊ ထွေအုပ်ရုံး၊ မြန်မာ့စီးပွားရေးဘဏ်၊ စစ်ကောင်စီနဲ့ ပူးပေါင်းသူတွေရဲ့ အိမ်တွေမှာ ဗုံးပေါက်ကွဲတာတွေ ဖြစ်ခဲ့ပြီးနောက် စစ်ဆေးမှုတွေ ပိုလုပ်ဆောင်လာတာ ဖြစ်နိုင်တယ်လို့ သုံးသပ်နေကြပါတယ်။

1 month Ago

July 10, 2021

ဒီမိုကရေစီအစိုးရ မတက်မချင်း မီးရထားဝန်ထမ်းများ CDM ဆက်လုပ်သွားမည်

စားဝတ်နေရေး အပါအဝင် ဘဝရပ်တည်ဖို့ အခက်အခဲ ရှိလာပေမယ့် ဒီမိုကရေစီ အစိုးရ မတက်မချင်း အာဏာဖီဆန် CDM ဆက်လုပ်သွားမယ်လို့ မော်လမြိုင်က CDM မီးရထားဝန်ထမ်းတွေက ပြောပါတယ်။

မီးရထား ဝန်ထမ်းတွေဟာ အာဏာသိမ်း စစ်ကောင်စီကို ဆန့်ကျင်တဲ့ ဌာနဆိုင်ရာတွေထဲမှာ ကျန်းမာရေး၊ ပညာရေးဝန်ထမ်းနည်းတူ ရှေ့ဆုံးက လှုပ်ရှားခဲ့တဲ့ သူတွေ ဖြစ်ပါတယ်။

မော်လမြိုင်က မီးရထား ဝန်ထမ်းတွေဟာလည်း  ပြီးခဲ့တဲ့ ကာလတွေတုန်းက အာဏာသိမ်း စစ်ကောင်စီကို နေ့စဉ်ရက်ဆက် လမ်းပေါ်ထွက် ဆန္ဒထုတ်ဖော်ခဲ့ကြတာပါ။

အခုအခါ CDM မီရထား ဝန်ထမ်းတွေဟာ လစာမရတာ ၅ လ နီးပါး ရှိလာပြီးဖြစ်လို့ မိသားစု စားဝတ်နေရေးနဲ့ ဘဝရပ်တည်နေထိုင်ဖို့ အခက်အခဲမျိုးစုံ ရင်ဆိုင်နေတယ်လို့ မော်လမြိုင်က CDM မီးရထားဝန်ထမ်း တစ်ဦးက ပြောပါတယ်။

မော်လမြိုင်က မီးရထား ဝန်ထမ်းတွေဟာ ပြီးခဲ့တဲ့ မတ်လကုန်ထိ ပြည်သူတွေနဲ့ အလှူရှင်တွေရဲ့ ထောက်ပံ့ကူညီမှုတွေရခဲ့ကြပေမယ့် အခုအခါမှာတော့ ထောက်ပံ့ကူညီမှု မရတော့တာပါ။ 

လက်ရှိမှာတော့ CDM လုပ်ဆောင်ထားတဲ့ မော်လမြိုင်က မီးရထား ဝန်ထမ်း ၆၀ ရာခိုင်နှုန်းကို အာဏာသိမ်း စစ်ကောင်စီက တာဝန်မှ ယာယီရပ်ဆိုင်းထားပါတယ်။

တဖက်မှာလည်း  CDM မီးရထားဝန်ထမ်းတွေဟာ တာဝန်မှ ယာယီရပ်ဆိုင်းခံရပြီးနောက် နေအိမ်လိုင်းခန်းတွေကနေ ရွှေ့ပြောင်းပေးခဲ့ကြရတာပါ။

ဒါကြောင့် အရေးတော်ပုံ အောင်မြင်တဲ့အထိ CDM ဝန်ထမ်းတွေနဲ့ ပြည်သူတွေ တရပ်လုံး အာဏာသိမ်း စစ်ကောင်စီကို ဆက်လက်တော်လှန်ပေးကြဖို့ CDM မီးရထား ဝန်ထမ်းတွေက တိုက်တွန်းပါတယ်။

5 months Ago
More News
Up