ကချင်ပြည်နယ်၊ မြစ်ကြီးနားမြို့၊ အောင်နန်းရပ်ကွက်ရှိ မီးရထားဝင်းအတွင်း နေအိမ်လိုင်းခန်းတွေမှာ နေထိုင်တဲ့ CDM ဝန်ထမ်းတွေကို စစ်ကောင်စီက နေအိမ်လိုင်းခန်းတွေကနေ တစ်ပတ်အတွင်း ပြောင်းရွှေ့ခိုင်းထားတဲ့အတွက် အခက်အခဲဖြစ်နေကြပါတယ်။
CDM မီးရထားဝန်ထမ်းတွေကို နေအိမ်လိုင်းခန်းတွေကနေ ဖယ်ရှားပေးဖို့ ဇန်နဝါရီ ၁၄ ရက် နေ့စွဲနဲ့ နို့တစ်စာ ထုတ်ပြန်ခဲ့ပြီး တစ်ပတ်အတွင်း ပြောင်းရွှေ့ခိုင်းခဲ့တာလို့ မီးရထားဝန်ထမ်းတွေထံက သိရပါတယ်။
“တချို့ CDM ဝန်ထမ်းတွေကလည်း တခြားဒေသတွေကို အစောကြီးကတည်းက ပြောင်းကုန်တာတွေရှိတယ်။ တချို့တွေကလည်း ဒီလိုင်းခန်းထဲမှာပဲ နေကြတယ်။ အားလုံးကတော့ စီးပွားရေးအဆင်မပြေကြဘူး။ တစ်ပတ်အတွင်း ပြောင်းခိုင်းတာ မပြောင်းပေးနိုင်ရင် ဘာဖြစ်မလဲ ဆိုတာတော့ မသိရသေးဘူး”လို့ မီးရထားဝန်ထမ်းတစ်ဦးက ပြောပါတယ်။
တစ်ပတ်အတွင်း ပြောင်းရွှေ့ခိုင်းခဲ့တဲ့အတွက် တခြားနေရာတွေကို ပြောင်းရွှေ့နေထိုင်ကြတဲ့ ဝန်ထမ်းတွေလည်းရှိကာ ပြောင်းရွှေ့နေထိုင်ဖို့ အဆင်မပြေကြတဲ့ဝန်ထမ်းတွေလည်း ရှိနေပါတယ်။
မြစ်ကြီးနားဘူတာမှာ CDM ပြုလုပ်ထားတဲ့အတွက် ဝန်ထမ်းအဖြစ်က ထုတ်ပယ်ခံထားရတဲ့ မီးရထားဝန်ထမ်း အယောက် ၁၀၀ လောက်ရှိပါတယ်။
မန္တလေးတိုင်း၊ ပြည်ကြီးတံခွန်မြို့နယ်၊ တံခွန်တိုင်ရပ်ကွက်၊ မီးရထားဘူတာအနီးမှာနေထိုင်ကြတဲ့ မီးရထားဝန်ထမ်းမိသားစု ၁၀၀ ကျော်ကို ဒီဇင်ဘာ ၂၂ ရက်နေ့ နောက်ဆုံးထားပြီး မီးရထားအိမ်ရာကနေ ထွက်ခွာဖို့ စစ်ကောင်စီက သတိပေးစာထုတ်ပြန် နှင်ထုတ်နေပါတယ်။
၁၉၅၅ အစိုးရအိမ်ဥပစာ နှင်ထုတ်ခြင်းအက်ဥပဒေ ပုဒ်မ ၃ အရ အကြောင်းကြားစာရောက်တဲ့ ရက်ကနေ နှစ်ပတ်အတွင်း အစိုးရအိမ်ဥပစာကနေ ထွက်ခွာဖို့ သတိပေးခဲ့တာ ဖြစ်ပါတယ်။
သတ်မှတ်ထားတဲ့ရက်အတိုင်း မထွက်ခွာပါက အတင်းအကျပ်ဖယ်ရှားမယ်လို့ မန္တလေးတိုင်း မြန်မာ့မီးရထား တိုင်းတာဝန်ခံလက်မှတ်နဲ့ ခြိမ်းခြောက်ခဲ့တာလည်း ဖြစ်ပါတယ်။
စစ်ကောင်စီရဲ့ အနိုင်ကျင့် နှင်ထုတ်မှုအတွက် မီးရထားဝန်ထမ်းတွေက အမျိုးသားညီညွတ်ရေးအစိုးရ NUG ဆီကို အကူအညီတောင်းခံစာ ပေးပို့ထားတယ်လို့ မီးရထားဝန်ထမ်းတစ်ဦးက ပြောပါတယ်။
မီးရထားအိမ်ရာမှာ နေထိုင်တဲ့ မိသားစု ၁၀၀ ကျော်ထဲမှာ သက်ကြီးရွယ်အိုတွေနဲ့ ကလေးငယ်အများအပြား ပါဝင်နေတာကြောင့် အချိန်တိုအတွင်း နေရာဖယ်ပေးဖို့နဲ့ တခြားနေရာမှာ နေထိုင်ဖို့ အခက်အခဲရှိနေတယ်လို့ ဆိုပါတယ်။
စစ်တပ်က အာဏာသိမ်းပြီးနောက်မှာ နိုင်ငံတဝန်းက မီးရထားဝန်ထမ်းအများစုဟာ အာဏာဖီဆန်ရေးလှုပ်ရှားမှု CDM ဝင်ခဲ့တာကြောင့် စစ်ကောင်စီရဲ့ အငြိုးထားဖိအားပေးတာကို ခံနေရတာပါ။
