ADB

December 19, 2022

အာဆီယံတွင် မြန်မာက ငွေကြေးဖောင်းပွမှု ဒုတိယအဆိုးရွားဆုံးဖြစ်ဟု ADB ထုတ်ပြန်

မြန်မာနိုင်ငံမှာ စစ်တပ်အာဏာသိမ်းပြီးနောက် ငွေကြေးဖောင်းပွမှုနှုန်းက ၂၀ ရာခိုင်နှုန်းနီးပါးအထိ မြင့်တက်လာတယ်လို့ အာရှဖွံ့ဖြိုးရေးဘဏ် (ADB) က အခု ဒီဇင်ဘာလမှ ထုတ်ပြန်တဲ့ အာရှဒေသ စီးပွားရေး အလားအလာ အစီရင်ခံစာမှာဖော်ပြပါတယ်။

အခု ၂၀၂၂ ခုနှစ် ဇန်နဝါရီလမှာ ၁၃ ဒသမ ၈ ရာခိုင်နှုန်းရှိရာက ဇွန်လမှာ ၁၉ ဒသမ ၄ အထိ မြင့်တက်ခဲ့တာဖြစ်ပြီး အာဆီယံဒေသထဲမှာတော့ မြန်မာနိုင်ငံက လာအိုပြီးရင် ဒုတိယအဆိုးရွားဆုံးဖြစ်တယ်လို့  ADB အစီရင်ခံစာအရ သိရပါတယ်။  

စစ်တပ်ကအာဏာမသိမ်းမီ ၂၀၂၀ ပြည့်နှစ်အတွင်းမှာ ငွေကြေးဖောင်းပွမှုနှုန်းက ၇ ဒသမ ၃ ရာခိုင်နှုန်းရှိခဲ့ပေမဲ့ လက်ရှိ ၂၀၂၂ ခုနှစ်မှာတော့ ဇွန်လမှာ ငွေကြေးဖောင်းပွမှုနှုန်းက ၁၉ ဒသမ ၄ ရာခိုင်နှုန်းအထိ စစ်တပ်အာဏာသိမ်းပြီး ဖြစ်ပေါ်လာတဲ့ ငွေကြေးဖောင်းပွမှုဟာ ကြောက်ခမန်းလိလိ မြင့်တက်လာတာရှိလာတာ တွေ့ရပါတယ်။

စီးပွားရေးသီအိုရီသဘောအရ ပြည်တွင်းမှာ လည်ပတ်နေတဲ့ ငွေကြေး ပမာဏနဲ့ ပြည်တွင်းက ထုတ်လုပ်တဲ့ ကုန်ထုတ်လုပ်မှု ပမာဏတို့ဟာ အချိုးညီတဲ့ အားမျှခြေအပေါ်မှာ ရှိနေဖို့ လိုပါတယ်။ ဒါပေမဲ့ လက်ရှိမှာတော့ ပြည်တွင်းမှာ လည်ပတ်နေတဲ့ ငွေကြေး ပမာဏကသာ များနေပြီး ပြည်တွင်းက ထုတ်လုပ်နိုင်တဲ့ ကုန်ထုတ်လုပ်မှု ပမာဏက နည်းနေတာကြောင့် တိုင်းပြည်မှာ ငွေကြေးဖောင်းပွမှု ရှိနေပြီလို့ သုတေသီတွေက ဆိုပါတယ်။

စီးပွားရေးသုတေသီတဦးက “တည်ငြိမ်နေတဲ့ကာလတုန်းက မြန်မာပြည်ရဲ့ ငွေကြေးဖောင်းပွမှုက ၇ နဲ့ ၈ ရာခိုင်နှုန်း လောက်ပဲ ရှိခဲ့တယ်။ အဲဒီ့ကနေ ၂၀ ရာခိုနှုန်းနီးနီးဆိုတော့ တော်တော်လေးများတာပေါ့။ သီအိုရီအရ ပြောရင်တော့ ငွေကြေးဖောင်းပွမှုနှုန်းက အနည်းဆုံး ၁၀ ရာခိုင်နှုန်း အောက်မှာသာ ရှိသင့်တယ်ပေါ့နော်။ ဖြစ်နိုင်မယ်ဆိုရင် ၅ ရာခိုင်နှုန်း အောက်သာ ထားရမယ်။ စီးပွားရေးပညာရှင်တွေရဲ့ အမြင်က ၅ ရာခိုင် နှုန်းအောက်သာ ရှိရမယ်။ တကယ်လို့ ၁၀ ရာခိုင်နှုန်းထက်ကျော် လာရင် တိုင်းပြည်မှာ စီးပွားရေးအခက်အခဲ တွေဖြစ်ပေါ်လာစေပြီး အထူးသဖြင့် ပင်စင်စားတွေ အနိမ့်ဆုံး လုပ်ခရတဲ့သူတွေနဲ့ လက်လုပ်လက်စားတွေ ဒီလူတန်းစား သုံးရပ်ကို ထိခိုက်စေတယ်။ အခုတော့ ငွေကြေးဖောင်းပွမှု နှုန်းက ၂၀ ရာခိုင်နှုန်းနီးနီးဆိုတော့ တော်တော်လေးကြောက်စရာ ကောင်းတယ်” လို့ ဒီဗွီဘီကို ပြောပါတယ်။

အရင်စစ်အစိုးရဖြစ်တဲ့ နဝတ၊နအဖ ခေတ်မှာ လိုငွေတွေအတွက် ငွေစက္ကူရိုက်နှိပ် ထုတ်ဝေပြီး ဖြေရှင်းခဲ့သလို လက်ရှိ စစ်ကောင်စီကလည်း လိုငွေအတွက် ငွေစက္ကူရိုက်နှိပ်တဲ့ နည်းလမ်းနဲ့သာ ဖြေရှင်းမှာဖြစ်လို့ ပြည်တွင်းငွေကြေးဖောင်းပွမှုက စိုးရိမ်စရာ ရှိနေပါတယ်။

စီးပွားရေးမူဝါဒရေးရာသုတေသီတဦးကတော့ “အန်အယ်လ်ဒီ လက်ထက်မှာလည်း လိုငွေ ပြခဲ့တာပဲ။ ကိုဗစ်ဖြစ်တော့ ကျန်းမာရေးအတွက် အသုံးစရိတ်က သုံးရမှာပဲလေ။ ဒါပေမဲ့ ဒီမိုကရေစီအစိုးရဖြစ်တော့ ကျနော်တို့က ငွေစက္ကူတွေ ရိုက်မထုတ်ဖို့ ပြောကြတော့ မထုတ်ခဲ့ကြဘူး။ ဘယ်ကရလဲဆိုတော့ အစိုးရရဲ့ ငွေတိုက်စာချုပ်တွေ ထုတ်ရောင်းပြီး ဖြေရှင်းကြတယ်။ အဲ့တုန်းကတော့ ရောင်းလို့ရတယ်။ စီးပွားရေးက ပုံမှန်လည်ပတ်နေတာ ဆိုတော့ ပြည်သူကလည်း ဝယ်တယ်၊ ဘဏ်တွေကလည်း ဝယ်ကြတယ်။ ဒါပေမဲ့ အခုဟာ ခေတ်က ပြောင်းလဲသွားပြီ။ သူတို့ထုတ်ရောင်းလည်း ပြည်သူတွေက မဝယ်ကြသလို ဘဏ်ကလည်း ဝယ်မှာ မဟုတ်ဘူး။ ငွေတိုက်စာချုပ်တွေကို သူတို့ထုတ်ရောင်းဖို့အတွက် ကြေညာတာ နှစ်ခါ သုံးခါ လောက်ရှိတယ်နော်၊ ကျနော် တွေ့တာ။ ဒါပေမဲ့ မရောင်းရဘူးလို့ ကျနော်တော့ ထင်တာပဲ။ ဒီတော့ မရောင်းရရင် သူတို့မှာ ဖြေရှင်းနိုင်တဲ့ နည်းလမ်းက ငွေစက္ကူရိုက်နှိပ်ထုတ်ဝေတဲ့ နည်းလမ်းပဲ ရှိတော့တယ်။ ဒီတော့ ငွေကြေးဖောင်းပွမှုပြဿနာက ပိုဆိုးမယ့်သဘောပဲ ရှိတယ်” လို့ ဒီဗွီဘီကို ပြောပါတယ်။

ကမ္ဘာ့ဘဏ်က ၂၀၂၂ ခုနှစ်အတွင်းမှာ ထုတ်ပြန်ခဲ့တဲ့ မြန်မာ့စီးပွားရေးစောင့်ကြည့်အစီရင်ခံစာအရ မြန်မာနိုင်ငံမှာ ပျမ်းမျှ ငွေကြေးဖောင်းပွမှုနှုန်းက အမျိုးသားဒီမိုကရေစီအဖွဲ့ချုပ်( အန်အယ်လ်ဒီ)လက်ထက် ပြီးခဲ့တဲ့ ၂၀၁၇ ခုနှစ်မှ ၂၀၁၉ ခုနှစ်ကာလ အတွင်းမှာ ငွေကြေးဖောင်းပွမှုနှုန်းက ၆ ဒသမ ၄ ရာခိုင်နှုန်း ရှိခဲ့ပါတယ်။

ဒါပေမဲ့ ကိုဗစ်မတိုင်မီကာလ ၂၀၂၀ ပြည့်နှစ်ကတော့ ပြည်တွင်းမှာ ဓာတ်အားခနဲ့ စားသောက်ကုန်ဈေးနှုန်းတွေ ကျဆင်းလာတဲ့အတွက် မြန်မာနိုင်ငံရဲ့ငွေကြေးဖောင်းပွမှုနှုန်းက ၅ ဒသမ ၂ ရာခိုင်နှုန်းအထိ ကျဆင်းခဲ့တာ တွေ့ရပါတယ်။

2 months Ago

March 16, 2022

ကိုဗစ်-၁၉ ကြောင့် အာဆီယံဒေသတွင်း အလုပ်အကိုင် ၉ သန်းကျော် ဆုံးရှုံးဟု ADB ခန့်မှန်း

ကိုဗစ်-၁၉ ရိုက်ခတ်မှုကြောင့် အရှေ့တောင်အာရှ ဒေသတွင်း ဟိုတယ်နဲ့ ခရီးသွားလုပ်ငန်းကဏ္ဍတွေမှာ အပါအဝင် အလုပ်အကိုင် ၉ ဒသမ ၃ သန်း ဆုံးရှုံးခဲ့ရတယ်လို့ အာရှဖွံ့ဖြိုးရေးဘဏ် (ADB) က ထုတ်ပြန်ပါတယ်။

ဒီအကျိုးဆက်က ပြီးခဲ့တဲ့ နှစ်မှာ လူဉီးရေ ၄ ဒသမ ၇ သန်းကို အလွန်အမင်း ဆင်းရဲမွဲတေမှုဆီ တွန်းပို့ခဲ့ပြီး တရက်မှာ အမေရိကန်ဒေါ်လာ ၁ ဒသမ ၉ အောက်မှာသာ နေထိုင်ကြရတယ်လို့ ဆိုပါတယ်။ ဒါ့အပြင် အမျိုးသမီးတွေ၊ လူငယ်တွေ၊ ကျွမ်းကျင်လုပ်သား မဟုတ်သူတွေကို ခေါ်ယူအသုံးပြုလေ့ရှိတဲ့ လက်လီနဲ့ ပုံမှန်မဟုတ်တဲ့ လုပ်ငန်းကဏ္ဍတွေမှာလည်း သွားလာလှုပ်ရှားမှု အကန့်အသတ်တွေကြောင့် မညီမျှမှုတွေ ကျယ်ကျယ်ပြန့်ပြန့်ဖြစ်လာနေပြီး အဆိုးဝါးဆုံး ရိုက်ခတ်မှုတွေ ဖြစ်ခဲ့တယ်လို့ ADB ရဲ့ အစီရင်ခံစာမှာ ဖော်ပြပါတယ်။

“ဆင်းရဲနွမ်းပါးမှုနဲ့ အလုပ်လက်မဲ့ဖြစ်မှုတွေအပေါ် ဒီကပ်ဘေးရဲ့ သက်ရောက်မှုက လာမယ့် အနာဂတ်မှာ တက်ကြွလှုပ်ရှားမှုမရှိတဲ့ လုပ်သားတွေကို ကျွမ်းကျင်မှု နည်းပါးလာစေပြီး မညီမျှမှုဟာ နောက်ထပ် မျိုးဆက်တွေ ဆီ ဆက်လက်ပြီးတော့ ကူးပြောင်းသွားစေနိုင်တယ်”

အရှေ့တောင်အာရှဒေသတွင်း လူဦးရေရဲ့ ၆၀ ရာခိုင်နှုန်းနီးပါးဟာ ကိုဗစ်-၁၉ ကာကွယ်ဆေး ထိုးနှံခဲ့ပြီးဖြစ်ကာ အများကြား ရွေ့လျားသွားလာမှုတွေ ကောင်းမွန်လာတာမို့ လတ်တလောမှာတော့ ပိုပြီးတော့ အခြေအနေကောင်းလာနိုင်ပြီး စုစုပေါင်း ပြည်တွင်းထုတ်ကုန် (ဂျီဒီပီ) တန်ဖိုးဟာ အခုနှစ်ထဲမှာ ၅ ဒသမ ၁ ရာခိုင်နှုန်းထိ တိုးတက်လာနိုင်ဖို့ မျှော်မှန်းထားတယ်လို့လည်း အစီရင်ခံစာထဲမှာ ဖော်ပြပါတယ်။

အသေးစားလုပ်ငန်းတွေကို ဒစ်ဂျစ်တယ်စနစ်နဲ့ တပ်ဆင်လည်ပတ်တာတွေ၊ ရွှေ့ပြောင်းအလုပ်သမားတွေအတွက် ကျွမ်းကျင်မှုသင်တန်းတွေ ပေးတာတွေကသာ သူတို့အတွက် New Normal လုပ်ငန်းခွင်မှာ နောက်ကျကျန်မနေစေဖို့အတွက် သေချာစေမှာဖြစ်တယ်လို့လည်း ADB က ပြောပါတယ်။

ဒါ့အပြင် ကျန်းမာရေးအသုံးစရိတ်ကို ပြီးခဲ့တဲ့ ၂၀၂၁ ခုနှစ်မှာ ဂျီဒီပီရဲ့ ၃ ရာခိုင်နှုန်း သုံးစွဲရာကနေ လက်ရှိမှာ ၅ ရာခိုင်နှုန်းထိ တိုးမြှင့်သုံးစွဲလာတာက ရောဂါကူးစက်ပြန့်ပွားမှု စောင့်ကြည့်ခြင်းကိုလည်း တိုးတက်လာစေပြီး တိုးတက်မှု ၁ ဒသမ ၅ ရာခိုင်နှုန်း ပေါင်းထည့်နိုင်မှာ ဖြစ်တယ်လို့လည်း ဆိုပါတယ်။

11 months Ago
More News
Up