5 Million Challenge

August 21, 2021

တော်လှန်ရေးအတွက် Raffle Ticket အရောင်းကမ်ပိန်း ဂျပန်တွင် အရှိန်မြှင့်

အမျိုးသားညီညွတ်ရေးအစိုးရ (NUG)  ကာကွယ်ရေးဝန်ကြီးဌာနရဲ့ 5MillionChallenge ယုံကြည်ရာခြေတလှမ်း တော်လှန်ရေးအတွက် ငါးသန်း လှူဒါန်းမှု Raffle Ticket   အရောင်းကမ်ပိန်း ဂျပန်နိုင်ငံမှာလည်း အရှိန်မြှင့်ဆောင်ရွက်နေကြပါတယ်။

ဂျပန်နိုင်ငံမှ ရောင်းခွင့်ရ Fundraiser ရန်ပုံငွေရှာအဖွဲ့တွေအနေနဲ့ အွန်လိုင်းသာမက မြန်မာအများစုနေထိုင်ရာ မြို့တွေမှာလည်း ကံစမ်းမဲလက်မှတ်တွေ ကူညီရောင်းချနေတာ တွေ့ရပါတယ်။

MNSOမှ ကိုမျိုးကြီးကတော့ သူတို့အဖွဲ့ကို ထောက်ပံ့တပ်စုအဖြစ် သတ်မှတ်ဆောင်ရွက်နေပြီး လောလောဆယ် လက်မှတ်အစောင် ၆၀၀၀ နီးပါးလောက် ရောင်းချနေရပြီး အဝေးရောက်မြန်မာတွေအတွက် အကြမ်းဖက်စစ်ကောင်စီကို အမြန်ဖြုတ်ချပြီး အမိမြေပြန်နိုင်ဖို့ အိမ်အပြန်လက်မှတ်လို့ သုံးနှုန်းရှင်းပြသွားပါတယ်။

Try together at Japan အဖွဲ့မှ မမို့ ကတော့ မြန်မာနိုင်ငံတွင်းမှ ဝယ်ယူလိုသူတွေ အခက်အခဲရှိနေလို့ ပြည်တွင်းကဝယ်ယူလှူဒါန်းမှုတွေကို ဂျပန်ကနေ ကူညီပေးတာတွေလည်း အများအပြားရှိနေတယ်လို့ ဆိုပါတယ်။

“ကျမတို့က ပြည်ပရောက်နေလို့ ကိုယ်တိုင်မပါဝင်နိုင်ဘူး။ ဒါကြောင့် ကိုယ်တတ်နိုင်တဲ့ဘက်က အမြဲပါဝင်ဖြစ်ပါတယ်၊ မြန်မာပြည်သူများအားတင်းထားကြပါ အရေးတော်ပုံမကြာမီ အောင်ရမည်” လို့ ဝယ်ယူလှူဒါန်းနေသူတဦးဖြစ်တဲ့ မသဲညှာဦးက ပြောပါတယ်။ 

ဂျပန်နိုင်ငံမှာ မြန်မာနိုင်ငံသား ၃၀၀၀ ကျော်နေထိုင်ကြပြီး လှူဒါန်းသူတိုင်းအတွက် မိမိတို့ လှူဒါန်းမှုနဲ့  ညီမျှတဲ့ တုံကင် နံပါတ်တွေနဲ့  5 Million Challenge Campaign ဒီဇိုင်းပါ digital certificate တွေကို Fundraiser တွေက တိုက်ရိုက်ပေးအပ်သွားမှာဖြစ်ပြီး  ဩဂုတ်လ ၂၈ ရက် အထိ ဝယ်ယူလှူဒါန်းနိုင်တယ်လို့လည်းသိရပါတယ်။ 

တော်လှန်ရေးအတွက် Raffle Ticket  ဝယ်ယူတဲ့ ပြည်သူတွေကို NUG အစိုးရက  Grand Prize ဆုတွေတုံ့ပြန်ပေးအပ်သွားဖို့ရှိပြီး  ဆုတွေထဲမှာ ၈၈ ကျောင်းသားခေါင်းဆောင် မင်းကိုနိုင်ရဲ့လက်ရာ “နွေဦး” လို့ အမည်ပေးထားတဲ့ ပန်းချီကား တချပ်လည်း ပါဝင်ပါတယ်။

ဒီကနေ့ ဩဂုတ် ၂၁ ညနေ ၆ နာရီလောက်အထိ နိုင်ငံပေါင်း ၂၀ ကျော်ကနေ  Raffle Ticket လက်မှတ်ပေါင်း ၃၆၅၆၀၀ ကျော်  ဝယ်ယူအားပေးထားကြတဲ့အထဲမှာ စင်ကာပူနိုင်ငံက ၇၅၈၉၇ စောင်နဲ့ ထိပ်ဆုံးမှာရှိနေပါတယ်။ ဒုတိယအများဆုံးကတော့  မြန်မာပြည်တွင်းကနေ လက်မှတ်ပေါင်း ၆၂၀၆၃  စောင်ဝယ်ယူအားပေးထားပြီး ဂျပန်ကတော့ လက်မှတ်ပေါင်း  ၁၉၈၄၁ စောင် အားပေးထားပါတယ်။

3 months Ago

တော်လှန်ရေးအတွက် Raffle Ticket ဝယ်ယူသူများကို ပေးအပ်မည့် ဆုများတွင် မင်းကိုနိုင်၏ “နွေ ဦး” ပန်းချီကားပါဝင်

တော်လှန်ရေးအတွက် Raffle Ticket  ဝယ်ယူတဲ့ ပြည်သူတွေကို တုံ့ပြန်ပေးအပ်သွားမယ့် ဆုတွေထဲမှာ ၈၈ ကျောင်းသားခေါင်းဆောင် မင်းကိုနိုင်ရဲ့ လက်ရာ ပန်းချီကား တချပ်လည်း ပါဝင်ပါတယ်။

ဒီပန်းချီကားကိုတော့ “နွေဦး” လို့ အမည်ပေးထားပြီး မင်းကိုနိုင်ရဲ့ လက်မှတ်နဲ့အတူ Grand Prize တွေထဲက တခုအဖြစ် ပေးအပ်သွားမယ်လို့ ဆိုပါတယ်။

“ဒီရန်ပုံငွေပွဲမှာ ပူးပေါင်းပါ၀င်ပေးကြသူများ၊ အလှူရှင်များအားလုံးဟာလည်း လုပ်နိုင်ကြတာထက်ပိုပြီး ကြိုးစား​နေကြတာပါ။ ထို့အတူပဲ ကိုမင်းကိုနိုင်က သူ့နှလုံးသားနဲ့ ခံစားရေးဆွဲထားတဲ့ “နွေဦး”ပန်းချီကားလေးကို သူ ပါဝင်အားစိုက်ထားတဲ့ လုပ်အားအဖြစ် ဒီရန်ပုံငွေပွဲမှာ တုံ့ပြန်လက်ဆောင်ပေးမှာပါ။ ကိုမင်းကိုနိုင်က ဒီပန်းချီကားလေးရရှိမယ့်သူကို သူနဲ့ ရေစက်ဆုံတဲ့သူပါလို့ ဆိုထားတာကြောင့် ကိုမင်းကိုနိုင်နဲ့ ​ရေစက်ဆုံဖို့ ဒီပန်းချီကား​လေး ရနိုင်မယ့်အခွင့်အရေးကို ကြိုးစားရ​အောင် 5 Million Challenge ရဲ့ Raffle Ticket ဝယ်ယူပြီး တုံ့ပြန်လက်ဆောင် Grand Prize လေးကို ကံစမ်းနိုင်ပါပြီ”

“ယုံကြည်ရာ ခြေတစ်လှမ်း၊ တော်လှန်ရေးအတွက် ငါးသန်း”လို့ အမည်ပေးထားတဲ့ ဒီ Challenge Campaign မှာ အမေရိကန်ဒေါ်လာ ၅ သန်းကို သြဂုတ်လအတွင်း ပြည့်မီအောင် ကမ္ဘာအနှံ့မှာ ရှိတဲ့ CRPH - OFP Fundraisers တွေက အလှူငွေ ကောက်ခံပေးသွားမှာဖြစ်ကာ ရရှိလာတဲ့ အလှူငွေတွေကို အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ဦးစီးပြီး မြန်မာနိုင်ငံအနှံ့အပြားမှာရှိတဲ့ နွေဦးတော်လှန်ရေးမှာ တထောင့်တနေရာက ပါဝင်နေကြတဲ့ ပြည်သူနဲ့ လူငယ်တွေရဲ့ စားဝတ်နေရေးနဲ့ တခြားသော လိုအပ်ချက်တွေကို ကူညီထောက်ပံ့နိုင်ဖို့ ပြန်လည် ခွဲဝေပေးအပ်သွားမယ်လို့ ဆိုပါတယ်။

ဒီ Challenge Campaign ဟာ အောင်လံလွှင့်ချီနွေဦးထီနဲ့ လုံးဝသက်ဆိုင်ခြင်းမရှိဘဲ ဒီအစီအစဉ်မှာ ပါဝင်လှူဒါန်းကြမယ့် ပြည်သူတွေကို ပြန်လည်တုံ့ပြန်တဲ့အနေနဲ့လည်း Raffle Ticket တွေကို သြဂုတ် လကုန်ပိုင်းကာလမှာ မဲနှိုက်ပေးပြီး တော်လှန်ရေး အမှတ်တရ ပန်းချီကားနဲ့ တခြားပစ္စည်းလေးတွေကို မဲဖောက်ပေးသွားမယ်လို့ ဆိုပါတယ်။

Raffle Ticket တစ်စောင်ကို အခြေခံအားဖြင့် အမေရိကန် ဒေါ်လာ ၁၀ ဒေါ်လာ သတ်မှတ်ထားပြီး Ticket နှုန်းထားတွေဟာ မိမိတို့နေထိုင်ရာနိုင်ငံအလိုက် အသုံးပြုတဲ့ ငွေကြေးနဲ့ ငွေကြေးလဲလှယ်နှုန်းပေါ်မူတည်ပြီး အပြောင်းအလဲ ရှိနိုင်ပါတယ်။

စစ်ကောင်စီရဲ့ မတရားဖိနှိပ်မှုအောက်မှာ နေထိုင်နေရသည့်တိုင်အောင် အုပ်တချပ် သဲတပွင့် ပါဝင်လှူဒါန်းလိုသူ မြန်မာနိုင်ငံထဲက ပြည်သူတွေအတွက် Raffle Ticket ကို တော့ အထူးစျေးနှုန်း မြန်မာငွေတသောင်းကျပ် သတ်မှတ်ပေးထားတာ ဖြစ်ပါတယ်။

ဒီကနေ့ ဩဂုတ်လ ၂၁ ညနေ ၅ နာရီလောက်အထိ နိုင်ငံပေါင်း ၂၀ ကျော်ကနေ  Raffle Ticket လက်မှတ်ပေါင်း ၃၆၅၆၀၀ ကျော်  ဝယ်ယူအားပေးထားကြပါတယ်။

3 months Ago
Up