ရိုးမဘဏ်

February 22, 2018

ရိုးမဘဏ် မိုင်းပေါက်ကွဲမှုကြောင့် ၀န်ထမ်း ၂ ဦး သေဆုံး၊ ၂၂ ဦး ဒဏ်ရာရ

ရှမ်းပြည်နယ်မြောက်ပိုင်း လားရှိုးမြို့ရှိ  ရိုးမဘဏ်ခွဲ ၁ ရဲ့ လမ်းဘေးရေမြောင်းမှာ မနေ့ညနေပိုင်းက ဒေသန္တရ မိုင်းတလုံးပေါက်ကွဲမှုကြောင့် ၂ ဦး သေဆုံးပြီး ၂၂ ဦး ဒဏ်ရာရှိခဲ့တယ်လို့ သိရပါတယ်။ ပေါက်ကွဲမှုကြောင့် ရိုးမဘဏ်ဝန်ထမ်း မစန္ဒာထွန်း (၄၈နှစ်) နဲ့ မမော်မော် (၃၉နှစ်) တို့ ၂ ဦးသေဆုံးခဲ့ပြီး ဘဏ်ဝန်ထမ်းတွေအပါဝင် အမျိုးသား ၉ ဦး၊ အမျိုးသမီး ၁၃ ဦး ထိခိုက်ဒဏ်ရာရရှိခဲ့တယ်လို့ တပ်မတော်က သတင်းထုတ်ပြန်ပါတယ်။ ရိုးမဘဏ် အဆောက်အဦ အတွင်းပိုင်းနေရာတွေမှာလည်း ပျက်စီးဆုံးရှုံးမှု များခဲ့သလို အနီးပတ်ဝန်းကျင်ရှိ အဆောက်အဦတွေ ပျက်စီး ဆုံးရှုံးမှုတွေ ဖြစ်ခဲ့ပါတယ်။ ပေါက်ကွဲမှုဖြစ်ပွားခဲ့တဲ့ နေရာကို နယ်မြေခံ စစ်မြေပြင်အင်ဂျင်နီယာတပ်မှ မိုင်းရှင်းလင်းရေးအဖွဲ့တွေ၊ တိုင်းစစ်ဌာနချုပ်မှ နယ်လှည့် ဆေးကုသရေးအဖွဲ့၊ မြန်မာနိုင်ငံ ရဲတပ်ဖွဲ့ဝင်တွေနဲ့ မြို့နယ်ကြက်ခြေနီအဖွဲ့ဝင်တွေက သွားရောက်ခဲ့ပြီး မိုင်းရှင်းလင်းရေးလုပ်ငန်းနဲ့ ဆေးဝါးကုသပေးမှုတွေ လုပ်ပေးခဲ့တယ်လို့ ဆိုပါတယ်။ ဒါ့အပြင် CCTV မှတ်တမ်းတွေကိုလည်း စစ်ဆေးခဲ့သလို အနီးပတ်ဝန်းကျင်တ၀ိုက် ပျက်စီးဆုံးရှုံးမှု စစ်ဆေးခဲ့ကြပါတယ်။ ဒဏ်ရာရရှိသူတွေကို အရှေ့မြောက်တိုင်းစစ်ဌာနချုပ် တိုင်းမှူး ဗိုလ်မှူးချုပ် ခင်လှိုင်နဲ့အဖွဲ့က သွားရောက်ကြည့်ရှုပြီး တပ်မတော်ဆေးရုံးမှ လူနာတင်ယာဉ်တွေနဲ့ လားရှိုးမြို့ရှိ ပြည်သူ့ဆေးရုံကို ပို့ဆောင်ကုသပေးထားတယ်လို့ သတင်းမှာ ဖော်ပြထားပါတယ်။ အခုလို ၀န်ထမ်း ၂ ဦး ကွယ်လွန်ခဲ့တာနဲ့ ပတ်သက်ပြီး ရိုးမဘဏ်က “ပေါက်ကွဲမှုကြောင့် ရိုးမဘဏ်၏ လုပ်ဖော်ကိုင်ဖက်များဖြစ်သော လားရှိုး (၁) ဘဏ်ခွဲမှ ရိုးမဘဏ် ၀န်ထမ်းနှစ်ဦး ကွယ်လွန်သွားကြောင်း စိတ်မကောင်းစွာဖြင့် အသိပေးအပ်ပါသည်။ ယင်းဆုံးရှုံးမှုအတွက် ရိုးမဘဏ်အနေဖြင့် များစွာ စိတ်မကောင်းဝမ်းနည်းဖြစ်ရပါသည်။” လို့ သတင်းထုတ်ပြန်ထားပါတယ်။ ကွယ်လွန်သူ ၀န်ထမ်းနှစ်ဦး ဆုံးရှုံးမှုကို ၀မ်းနည်းကြေကွဲသောအားဖြင့် လားရှိုးမြို့ရှိ ရိုးမဘဏ်ခွဲ နှစ်ခုစလုံးကို ဖေဖော်ဝါရီ ၂၂ ရက်နေ့မှစတင်၍ ယာယီပိတ်ထားမှာဖြစ်ပြီး လားရှိုးမြို့ရှိ ဘဏ်ခွဲတွေ ပြန်လည်ဖွင့်လှစ်မယ့်ရက်ကို  ပြန်လည်အသိပေးအကြောင်းကြားမယ်လို့ ဖော်ပြထားပါတယ်။ အခုလို ပေါက်ကွဲမှုနဲ့ ပတ်သက်လို့ ဘယ်လက်နက်ကိုင်အဖွဲ့က လုပ်တယ်ဆိုတာတော့ မသိရသေးပါဘူး။  
4 years Ago

September 9, 2015

တရုတ် စက်မှုလက်မှုနှင့် ကုန်သွယ်ရေးဘဏ်ခွဲ မြန်မာနိုင်ငံတွင် ဖွင့်လှစ်

မြန်မာနိုင်ငံမှာ ပထမဆုံးဘဏ်ခွဲအဖြစ် တရုတ်နိုင်ငံ စက်မှုလက်မှုနှင့် ကုန်သွယ်ရေးဘဏ် (အိုင်စီဘီစီ) ကို ရန်ကုန်မြို့မှာ စက်တင်ဘာလ ၈ ရက်နေ့က ဖွင့်လှစ်ခဲ့တယ်လို့ ဆင်ဟွာသတင်းတပုဒ်မှာ ဖော်ပြပါတယ်။ ခုလိုပူးပေါင်းမှုဟာ တရုတ်နိုင်ငံ စက်မှုလက်မှုနှင့် ကုန်သွယ်ရေးဘဏ် (အိုင်စီဘီစီ) အနေနဲ့ မှတ်တိုင်တခုဖြစ်သလို တရုတ်-မြန်မာ စီးပွားရေးပူးပေါင်းဆောင်ရွက်မှုမှာ အရေးပါတဲ့ ကဏ္ဍအနေနဲ့ ကိုယ်စားပြုနေတယ်လို့ အဲဒီဘဏ်ရဲ့ဥက္ကဋ္ဌ ရီဆွေ့မန်း (Yi Huiman) က ဖွင့်ပွဲအခမ်းအနားမှာ ပြောပါတယ်။ တရုတ်နိုင်ငံ စက်မှုလက်မှုနှင့် ကုန်သွယ်ရေးဘဏ် (အိုင်စီဘီစီ) ဟာ ၂၀၁၄ ခုနှစ်  အောက်တိုဘာလတုန်းက မြန်မာအစိုးရ ဖွင့်လှစ်ခွင့်ပြုခဲ့တဲ့ နိုင်ငံခြားဘဏ်ခွဲ ၉ ခုထဲမှ တခုအပါအ၀င်ဖြစ်ပြီး အာဆီယံနိုင်ငံ ၁၀ နိုင်ငံထဲက နိုင်ငံ ၇ ခုမှာ ဖွင့်လှစ်ခဲ့ပြီးဖြစ်တယ်လို့ သတင်းမှာ ဖော်ပြပါတယ်။ အဲဒီဘဏ်အနေနဲ့ မြန်မာပြည်တွင်း ပုဂ္ဂလိကဘဏ်တခုဖြစ်တဲ့ ရိုးမဘဏ်နဲ့လည်း တရုတ်-မြန်မာ ၂ နိုင်ငံကြား ကုန်သွယ်မှုနဲ့ ဘဏ်လုပ်ငန်းဆိုင်ရာ ကိစ္စတွေမှာ ပူးပေါင်းဆောင်ရွက်မှုတွေလုပ်ဖို့ သဘောတူညီထားတယ်လို့ ဆိုပါတယ်။ နိုင်ငံခြားရင်းနှီးမြှုပ်နှံမှု ကုမ္ပဏီတွေနဲ့ ပြည်တွင်းကုမ္ပဏီတွေကို ချေးငွေပေးနိုင်ဖို့နဲ့ ဘဏ်လုပ်ငန်းဆိုင်ရာ ကိစ္စတွေမှာ ပူးပေါင်းဆောင်ရွက်နိုင်ဖို့ ခွင့်ပြုချက်လိုင်စင် ရရှိထားတာဖြစ်တယ်လို့ သတင်းမှာ ဖော်ပြပါတယ်။
6 years Ago
Up