ရုပ်သံမြင်ကွင်း

September 17, 2017

ဆယ်ကျော်သက် ရေခဲသေတ္တာကြီးထဲ သေဆုံးနေ၊ မသေဆုံးမီတွေ့ရသည့် ရုပ်သံမြင်ကွင်း

အမေရိကန်နိုင်ငံ အီလီနွိုက်ပြည်နယ် ကွတ်ကောင်တီ ရို့စ်မောင့်တ်ရွာက The Crowne Plaza ဟိုတယ်မှာ မိန်းကလေးတဦး ရေခဲသေတ္တာထဲ သေဆုံးနေမှု ဖြစ်ပွားခဲ့ပါတယ်။ ဗွီဒီယိုရုပ်သံထဲမှာ အသက် ၁၉ နှစ်အရွယ် သေဆုံးသူ ဆယ်ကျော်သက် ဂျန်ကင်းစ်က စက်တင်ဘာ ၉ ရက်နေ့ မနက် ၃ နာရီ ၂၀ မိနစ်မှာ ဓာတ်လှေကားက ထွက်လာကာ ဟိုတယ်စင်္ကြတလျှောက် ခန္ဓာကိုယ်မထိန်းနိုင်ဘဲ လျှောက်သွားနေတာ တွေ့ရပါတယ်။ ရုပ်သံမှာ သူမ ရေခဲသေတ္တာထဲ ဝင်သွားတာကို မမြင်ရပေမယ့် ရုပ်သံမြင်ကွင်းက သူမပျောက်သွားတာဟာ ရေခဲသေတ္တာထဲ ဝင်သွားတာလို့ ရဲတွေက ယူဆနေကြပါတယ်။ ဂျန်ကင်းစ်ပျောက်ဆုံးသွားတာကို စက်တင်ဘာလ ၉ ရက်နေ့ နေ့လယ် ၁ နာရီမှာ ရဲတွေကို တရားဝင်အကြောင်းခဲ့တာဖြစ်ပြီး သူမကို စက်တင်ဘာလ ၁၀ ရက်နေ့ မနက်အစောကြီး ၁ နာရီမှာ ရေခဲသေတ္တာထဲ သေဆုံးနေတာကို တွေ့ရှိတယ်လို့ ဆိုပါတယ်။ စက်တင်ဘာလ ၉ ရက်နေ့ မနက် ၁ နာရီခွဲလောက်မှာ သူမက အမထံ တက်စ်မက်ဆေ့ခ်ျ ပို့ခဲ့သေးတယ်လို့ ဆိုပါတယ်။ မိန်းကလေးဂျန်ကင်းစ်က မူးပြီး သူမဘာသာ ရေခဲသေတ္တာထဲ ဝင်သွားကာ အထဲမှာ သေဆုံးသွားတယ်လို့ ရဲတွေက ပြောကြောင်း သေဆုံးသူမိန်းကလေးရဲ့မိခင်အပြောအရ သိရပါတယ်။ မိခင်ဖြစ်သူက အကယ်၍ သူမသမီးက မူးနေမယ်ဆိုရင် ရေခဲသေတ္တာတံခါးကို ဖွင့်ဖို့ ကြိုးစားမှာပဲလို့ ရဲတွေရဲ့ပြောဆိုမှုကို မေးခွန်းပြန်ထုတ်ထားပါတယ်။ “ရေခဲသေတ္တာတံခါးက ၂ ထပ် စတီးလ်တံခါးတွေလေ သူ အလွယ်တကူ ဖွင့်လို့မရပါဘူး” လို့ မိခင်ဖြစ်သူက ပြောပါတယ်။ ခန္ဓာကိုယ် ခွဲစိတ်စစ်ဆေးပြီးပေမယ့် သူမသေဆုံးတာက ရာဇဝတ်မှုကျူးလွန်ခံရလို့ သေဆုံးတာလားဆိုတာကို ခုထိ ရှင်းရှင်းလင်းလင်း မသိရသေးဘူးလို့လည်း ဆိုပါတယ်။ ဒီဖြစ်ရပ်ကို ပြန်လည်တုံ့ပြန်တဲ့အနေနဲ့ ဟိုတယ်က “ကျနော်တို့ဟိုတယ်က ကျနော်တို့ရဲ့ ဧည့်သည်တွေနဲ့ ဝန်ထမ်းတွေရဲ့ အသက်အန္တရာယ်ကင်းရှင်းရေး လုံခြုံရေးနဲ့ ကောင်းမွန်စွာနေထိုင်နိုင်ရေးက ကျနော်တို့ရဲ့ ဦးစားပေးအရာဖြစ်လို့ ဒါတွေကို အဓိက လက်ကိုင်ထားပါတယ်” လို့ အေဘီစီဆဲဗင်း ချီကာဂို သတင်းဌာနကို ပြောပါတယ်။ “ဒီသတင်းအတွက် ကျနော်တို့ အရမ်းစိတ်မကောင်း ဖြစ်ရပါတယ်။ မိန်းကလေးနဲ့ မိသားစုရဲ့ ခက်ခဲတဲ့အချိန်တွေအတွက်လည်း ကျနော်တို့က သူတို့နဲ့အတူတူပဲ ခံစားရပါတယ်။ ဒေသခံအာဏာပိုင်တွေနဲ့အတူ ဟိုတယ်ဝန်ထမ်းတွေက ဆက်ပြီးအပြည့်အဝ လုပ်ဆောင်သွားပါလိမ့်မယ်” လို့ ဟိုတယ်ရဲ့ ပြောရေးဆိုခွင့်ရှိသူက ပြောပါတယ်။
4 years Ago
Up