မြိတ်ရိုးရာဒေသ လက်လုပ်မုန့်များနှင့် စားသောက်ဖွယ်ရာ

September 12, 2017

မြိတ်ရိုးရာဒေသ လက်လုပ်မုန့်များနှင့် စားသောက်ဖွယ်ရာ မုန့်ဈေးတန်း မြို့လယ်၌ ရောင်းချရန်စီစဉ်

တနင်္သာရီတိုင်းဒေသကြီး မြိတ်မြို့၌ အထင်ကရနေရာတခုဖြစ်တဲ့ မြစ်ငယ်ရပ်ကွက်ရှိ ကန်ကြီး ရေကန်ဘောင်အနီးမှာ မြိတ်ရိုးရာဒေသ လက်လုပ်မုန့်တွေ၊ ဒေသထွက် အစားအသောက်တွေနဲ့ အခြား စားသောက်ဖွယ်ရာ မုန့်ဈေးတန်း ခုကို ရောင်းချဖွင့်လှစ်နိုင်ရေး ပြုလုပ်ပေးသွားမယ်လို့ တနင်္သာရီအစိုးရရဲ့ စီမံကိန်းနှင့် ဘဏ္ဍာရေးဝန်ကြီး ဦးဖြိုးဝင်းထွန်းက ပြောပါတယ်။ မြိတ်မြို့မှာ ရှေးအရင်က မြိတ်ရိုးရာ ဒေသလက်လုပ်မုန့် အမျိုးပေါင်း ၁၀၀ ကျော်ရှိရာ လက်ရှိမှာ လုပ်ကိုင်သူတွေ နည်းပါးလာတဲ့အတွက် အမျိုးပေါင်း ၂၀ ကျော်သာကျန်ပြီး မြိတ်ရိုးရာ ဒေသထွက် လက်လုပ်မုန့်တွေကို လုပ်ကိုင်သူနည်းပါးလာပြီး လေ့လာသင်ယူသူ မရှိတဲ့အတွက် တဖြည်းဖြည်း ပျောက်ကွယ်သွားပြီးဖြစ်ကြောင်း ရိုးရာမုန့် လုပ်ကိုင်ရောင်းချသူတွေထံမှ သိရပါတယ်။ စီမံကိန်းနှင့် ဘဏ္ဍာရေးဝန်ကြီး ဦးဖြိုးဝင်းထွန်းက “မြိတ်ရိုးရာမုန့်တွေကို ပြန်လည်ဖော်ထုတ် နိုင်ရေးနဲ့ လက်ရှိ ကျန်ရှိနေသေးတဲ့ လက်ကျန် ရိုးရာလက်လုပ်မုန့်တွေကို ဆက်လက် ပျောက်ကွယ်သွားတာ မရှိစေဖို့ ရည်ရွယ်ပြီး တစုတစည်းတည်းနဲ့ ရောင်းချဝယ်ယူ စားသောက်နိုင်ဖို့အတွက် မုန့်ဈေးတန်းတခုကို အကောင်အထည်ဖော်ပေးတာဖြစ်တယ်”လို့ ပြောပါတယ်။ လက်ရှိ မြိတ်ရိုးရာ ရှေးဟောင်းမုန့်နှစ်မျိုးကို မြစ်ငယ်ဈေးမှာ လက်လုပ်မုန့် ရောင်းချနေသူ ဒေါ်ကြည်က “မြိတ်ရိုးရာ ဒေသလက်လုပ်မုန့်တွေက ကုန်ကြမ်းတွေ ပေါသလောက် တချို့က လုပ်ရတာလွယ်သလို တချို့က အချိန်ကြာပြီး လုပ်ရခက်တဲ့ မုန့်တွေလည်း ရှိပါတယ်။ လုပ်ကိုင်သူ နည်းပါးတာရယ်၊ သားသမီးတွေက လေ့လာသင်ယူမှု မရှိတာရယ်ကြောင့် ပျောက်ကွယ်သွားတာ ဖြစ်ပါတယ်။ ပျောက်ကွယ်နေတဲ့ ရိုးရာဒေသလက်လုပ်မုန့် ၂၀ ကျော်ထဲက တချို့ဆိုရင် မုန့်အမည်တောင် ပျောက်နေတာ ရှိသေးတယ်။ အဒေါ်ကတော့ အမျိုးပေါင်း ၂၀ ထဲက တချို့ မှတ်မိသလောက်ကတော့ ရှမ်းကတောင်ကြိုက်မုန့်၊ မုန့်ခေါင်းဖြီး၊ ထုံးမုန့်၊ ပျော့မုန့်၊ ကိုယ့်ရွှေကိုင်းမုန့်၊ မုန့်ကြာရိုး၊ ဆူးလုဖင်ထုပ်မုန့်နဲ့ မုန့်ကြက်ခြေတွေလောက်ပဲ မှတ်မိတော့တယ်”လို့ ရှင်းပြပါတယ်။ မြိတ်ရိုးရာ နာမည်ကြီး အစားအသောက် တခုဖြစ်တဲ့ မြိတ်ကတ်ကြေးကိုက်ဟာလည်း မြိတ်ဒေသသို့ ရောက်ရှိလာသော ဧည့်သည်တွေ အလွန်ကြိုက်နှစ်သက်တဲ့ အစားအသောက်တခု ဖြစ်ပါတယ်။ “မြိတ်ရိုးရာ လက်လုပ်မုန့် ဈေးတန်းကို မြိတ်ဒေသရှိ ရိုးရာမုန့်လုပ်ကိုင်သူတွေက စနစ်တကျ ရောင်းချနိုင်ရေး ပြင်ဆင်ပေးသွားမှာဖြစ်ပြီး လာမယ့် ခရီးသွားရာသီမှာလည်း မြိတ်မြို့ကို အလည်အပတ် ရောက်ရှိလာမယ့် ပြည်တွင်းပြည်ပ ဧည့်သည်တွေ လာရောက်လည်ပတ် စားသောက်နိုင်ဖို့အထိ ရည်ရွယ်ထားတယ်”လို့ ဦးဖြိုးဝင်းထွန်းက ပြောပါတယ်။ သတင်း - ဇော်ဇော် (မြိတ်)
4 years Ago
Up