မြိတ်မြို့ သစ်ယာဝကျောင်းထိုင်ဆရာတော်ရုပ်အလောင်းကို ပြန်လည်ဖော်ယူစစ်ဆေး

December 17, 2017

မြိတ်မြို့ သစ်ယာဝကျောင်းထိုင်ဆရာတော်ရုပ်အလောင်းကို ပြန်လည်ဖော်ယူစစ်ဆေး

  မြိတ်မြို့နယ် သစ်ယာဝကျောင်းထိုင်ဆရာတော် ပျံလွန်တော်မူတာဟာ သွေးရိုးသားရိုး ဖြစ်စဉ် မဟုတ်ဘဲ သံသယဖြစ်ပွားဖွယ် တွေ့ရှိတဲ့အတွက် ရုပ်အလောင်းကို ပြန်လည်ဖော်ယူ စစ်ဆေးနေတယ်လို့ မြို့မရဲစခန်းမှူးက ပြောပါတယ်။ နိုဝင်ဘာ ၁၃ ရက်က ပျံလွန်တော်မူခဲ့တဲ့ သစ်ယာဝကျောင်းထိုင်ဆရာတော်ရဲ့ ဖြစ်စဉ်ကို ဒကာ/ဒကာမတွေက သံသယဖြစ်နေတဲ့အတွက် မြိတ်မြို့မရဲစခန်းသို့လာရောက်ပြီး ဒီဇင်ဘာ ၃ ရက်နေ့က အမှုဖွင့်တိုင်ကြားခဲ့တာကြောင့် ဒီဇင်ဘာ ၁၆ ရက်နေ့မှာ မြို့နယ်ရဲမှူး ဦးဆောင်တဲ့အဖွဲ့က သစ်ယာဝကျေးရွာမှာဂူသွင်းထားတဲ့ ဆရာတော်ရုပ်အလောင်းကို ပြန်လည် ဖော်ယူစစ်ဆေးနေတာပါ။ မြို့မရဲစခန်းမှူး ဒုရဲမှူးချိုလွင်က “ဒကာ၊ ဒကာမတွေက ဆရာတော်ပျံလွန်တော်မူတဲ့ဖြစ် စဉ်အပေါ်မှာ သံသယဖြစ်နေတယ်။ ကျနော်တို့ လက်ရှိအနေထားမှာ အပြင်ပန်း စစ်ဆေးချက် အရ သေစေနိုင်လောက်တဲ့ ဒဏ်ရာတွေ မတွေ့ရဘူး။ အတွင်းကလီစာစစ်ဆေးချက်ကိုတော့ သက်ဆိုင်ရာဆရာဝန်တွေ ဆက်လက် စစ်ဆေးနေတယ်။ တွေ့ရှိချက်တွေနဲ့ ပတ်သက်ပြီး အတည်မပြုနိုင်သေးဘူး။ ကျေးရွာသားတွေကို ဖြစ်စဉ်နဲ့ပတ်သက်ပြီး စစ်ဆေးမေးမြန်းတာတွေတော့ လုပ်ထားတယ်”လို့ ပြောပါတယ်။ သစ်ယာဝဆရာတော် ဘဒ္ဒန္တဇ၀န သက်တော် ၆၂ နှစ် ၀ါတော် ၄၂ နှစ် (တနင်္သာရီတိုင်း သံဃနယကအဖွဲ့ မူလဒွါရ အတွင်းရေးမှူး)မှာ မြိတ်မြို့ တရုတ်တန်းရပ်ကွက်၊ ဓမ္မရက္ခိတ ကျောင်းမှာ ပျံလွန်တော်မူခဲ့တာဖြစ်ပြီး အခင်းဖြစ်ပွားစဉ်က သံသယဖြစ်ဖွယ်တွေ ရှိခဲ့တယ်လို့ ဒကာ၊ ဒကာမတွေက ဆိုပါတယ်။ သစ်ယာဝကျေးရွာနေ ဦးထွန်းထွန်းက “ဆရာတော်က နိုဝင်ဘာ ၃ ရက်နေ့မှာ မြိတ်မြို့ကို ကြွသွားတယ်။ ရွာမှာရှိတဲ့ စေတီတော်အတွက် တံခွန်တိုင်၊ မုဒ်ပေါက်နဲ့ ဇရပ်တည်ဆောက်ဖို့အတွက် ဆောက်လုပ်ရေး ပစ္စည်းတွေ သွားဝယ်တယ်။ အလုပ်သမားတွေ သွားရောက်ငှားရမ်းတာပါ။ ရွာကနေအဲဒီအတွက် အလှူငွေသိန်း ၆၀ ကို ဆရာတော်နဲ့အတူ ထည့်ပေးလိုက်တယ်။ နိုဝင်ဘာ ၁၃ ရက်နေ့ မှာတော့ ဆရာတော်ပျံလွန်တော်မူတယ်ဆိုပြီး သတင်းကြားလို့ လိုက်သွားတာ ကျနော်တို့ သံသယတွေ ဖြစ်ခဲ့တယ်။ ဆရာတော်ရဲ့ ၀မ်းဗိုက်၊ ရင်ဘတ်မှာ အရေလှန်နေတာ၊ ညိုမဲနေတာ တွေ့ရတယ်။ နားထင်မှာ အပေါက်လေးတစ်ပေါက်တွေ့တယ်။ ဒကာ/ဒကာမ တွေက ဆရာတော် ရုပ်အလောင်းကို ရွာကိုပြန်သယ်မယ်ဆိုပြီး ဆန္ဒတွေစောနေတာကြောင့် ရွာမှာ ၉ ရက်တိတိ ဈာပနအခမ်းအနားလုပ်ခဲ့တယ်။ ရွာက ဒကာ/ဒကာမတွေလည်း သံသယအများကြီးဖြစ်နေတာကြောင့်ရဲစခန်းမှာ တိုင်ချက်ဖွင့်ပြီး ရုပ်အလောင်းကို ပြန်စစ်ဆေးစေတာ” လို့ ပြောပါတယ်။ အခင်းဖြစ်ပွားတဲ့အချိန်မှာ ဆရာတော်ထံမှာရှိတဲ့ ငွေသိန်း ၆၀ လည်းပျောက်ဆုံးနေခဲ့သလို ကိုယ်နဲ့မကွာ ထိန်းသိမ်းထားတဲ့သော့တွဲမှာလည်း ပျောက်ဆုံးနေခဲ့ပြီး ဆရာတော်ကို သင်္ကန်း မရှိတဲ့ အနေထားနဲ့ပျံလွန်တော်မူနေခဲ့တာလို့ ဒကာ၊ ဒကာမတွေက ပြောပါတယ်။ ရင်ခွဲစစ်ဆေးချက်ရလဒ်တွေကို ဒီဇင်ဘာ ၁၇ ရက်အထိ မသိရှိရသေးသလို သစ်ယာဝကျေးရွာမှ ဒကာ၊ ဒကာမ တွေကလည်း အမှုမှန်ပေါ်ပေါက်ရေး မျှော်လင့်နေပါတယ်။ သတင်း - မြတ်ထွဋ် (မြိတ်)
3 years Ago
Up