မြိတ်ကျွန်းစု

February 11, 2018

မြိတ်ကျွန်းစု ဒေသခံများကို စွန့်ပစ်အုန်းခွံမှ လူသုံးပစ္စည်း ထုတ်လုပ်မှုသင်တန်း ပို့ချ(ရုပ်သံ)

တနင်္သာရီတိုင်းဒေသကြီး၊ မြိတ်ကျွန်းစုအတွင်း နေထိုင်တဲ့ ဒေသခံပြည်သူတွေကို ခရီးသွားလုပ်ငန်းနဲ့ ပတ်သက်ပြီး စွန့်ပစ်အုန်းခွံကနေ လက်မှုပညာနဲ့ အဆင့်မြင့် လူသုံးကုန်ပစ္စည်း ထုတ်လုပ်မှု သင်တန်းကို မြိတ်မြို့မှာ စတင် သင်ကြားပေးနေပါတယ်။ မြိတ်မြို့မှာ အုန်းသီးကနေ တန်ဖိုးမြင့် လက်မှုနည်းပညာ လူသုံးကုန်ပစ္စည်း ထုတ်လုပ်မှု သင်တန်းကို ဖေဖော်ဝါရီ ၈ ရက်ကစပြီး ၆ ရက်အကြာ ကန်ဖျားရပ်ကွက်၊ ကြံတောလမ်းဆုံမှာ သင်ကြားပို့ချပေးနေတာဖြစ်ပြီး မြိတ်မြို့နေ လူငယ်တွေနဲ့ ကျွန်းစုမြို့က ဒေသခံပြည်သူတွေ စုစုပေါင်း အယောက် ၃၀ ကျော်ကို သင်ကြားပေးနေတာပါ။ “မြိတ်ကျွန်းစုမှာ ခရီးသွားလုပ်ငန်းနဲ့ ပတ်သက်ပြီး တနှစ်ထက်တနှစ် ပိုပြီး များလာပါတယ်။ ဒုံးညောင်းမှာတော့ ရောင်းစရာဆိုလို့ ဘာမှမရှိဘူး။ ဒီအတွက်ကြောင့် ဒီသင်တန်းကို စိတ်ဝင်စားလို့ လာတက်တာပါ။ အင်း ဒီမှာ သင်တန်းပြီးလို့ ကိုယ်တက်ရင် ရွာပြန်ရောက်ရင် နိုင်ငံခြားသားတွေကို ပြန်ရောင်းချလို့ရတယ်။ နောက်ပြီး ရွာမှာ စိတ်ဝင်စားတဲ့ လူငယ်တွေကို ပြန်သင်ကြားပေးဖို့လည်း စိတ်ကူးထားပါတယ်။ ဒုံးညောင်မိုင်ရွာမှာဆိုလျှင် အုန်းသီးတွေ ပေါတယ်။ တလုံးကို တထောင်ရတယ်။ ဒါပေမယ့် အုန်းသီးခြောက်တွေကို အခုလိုမျိုး လက်မှု ပညာတွေကို ပြန်လည်အသုံးချတာမျိုးမရှိပါဘူး။ စွန့်ပစ်တာ များတယ်။ ဒါကြောင့် အသုံးဝင်အောင်လို့ ဒီသင်တန်းကို လာတက်တယ်’’ လို့ ကျွန်းစုမြို့နယ် ဒုံးညောင်မိုင်းကျေးရွာမှ သင်တန်းသူ မ၀င်းဝင်းလှိုင်က ပြောပါတယ်။ အုန်းသီးကနေ တန်ဖိုးမြင့် လက်မှုနည်းပညာ လူသုံးကုန်ပစ္စည်း ထုတ်လုပ်မှုသင်တန်းကို စက်မှုဝန်ကြီးဌာန မြိတ်ခရိုင် စက်မှုကြီးကြပ်ရေးနှင့် စစ်ဆေးရေး ဦးစီးဌာန၊ အသေးစားနှင့် အလတ်စားလုပ်ငန်းများ ဖွံ့ဖြိုးတိုးတက်ရေး၊ မြန်မာနိုင်ငံ အုန်းသီးစိုက်ပျိုးထုတ်လုပ် တင်ပို့ ရောင်းချသူများအသင်းနဲ့ မြိတ်ခရိုင်အတွင်းရှိ ခရီးသွားလုပ်ငန်းရှင်တွေက ပူးပေါင်းပံ့ပိုးကူညီ သင်ကြားပေးခဲ့တယ်လို့ သိရပါတယ်။ “ခရီးသွားလုပ်ငန်းတွေမှာကတော့ ဒီအုန်းလက်မှုပညာ ပစ္စည်းတွေကတော့ တော်တော်လေးကို နိုင်ငံခြားသားတွေ စိတ်ဝင်စားလာတာ တွေ့ရပါတယ်၊ အထူးသဖြင့် ဟိုတယ်နှင့် ခရီးသွားလုပ်ငန်းတွေမှာ အများကြီး အကျိုးရှိပါတယ်’’ လို့ မြန်မာနိုင်ငံ အုန်းသီးစိုက်ပျိုးထုတ်လုပ် တင်ပို့ ရောင်းချသူများအသင်းမှ အတွင်းရေးမှူး ဒေါ်စန်းစန်းဟန်က ပြောဆိုပါတယ်။ မြိတ်ကျွန်းစု ခရီးသွားလုပ်ငန်းဟာ လက်ရှိမှာ အောင်မြင်လာတဲ့ ဒေသတခုဖြစ်ပြီး ဒေသခံတွေမှာ တဦးချင်း ၀င်ငွေရရှိမှု နည်းပါးနေသေးလို့ ဒေသခံတွေဟာ ဒေသထွက်ကုန်တွေဖြစ်တဲ့ စွန့်ပစ်ပစ္စည်းတွေကို တန်ဖိုးမြှင့် ထုတ်ကုန်တွေ ဖန်တီးထုတ်လုပ် ရောင်းချနိုင်ဖို့ စီစဉ်ပေးနေတာလို့ သိရပါတယ်။ ဇော်ဇော် (မြိတ်)
4 years Ago
Up