ဗြိတိန်နိုင်ငံခြားရေးဝန်ကြီး

September 21, 2018

ရခိုင်အရေးကိစ္စ မြန်မာနှင့် ဗြိတိန်နိုင်ငံခြားရေးဝန်ကြီး တွေ့ဆုံဆွေးနွေး

ရခိုင်ပြည်နယ်အရေးကိစ္စနဲ့ ပတ်သက်ပြီး မြန်မာနိုင်ငံမှာ ရောက်ရှိနေတဲ့ ဗြိတိန်နိုင်ငံခြားရေး ၀န်ကြီး ဂျယ်ရီမီဟန့်နဲ့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည်တို့ မနေ့က နေပြည်တော်မှာ တွေ့ဆုံဆွေးနွေးပါတယ်။ တွေ့ဆုံစဉ်မှာ  မြန်မာ့ဒီမိုကရေစီ အသွင်ကူးပြောင်းရေး အခြေအနေ၊ နေရပ်စွန့်ခွာသူများအား ပြန်လည်လက်ခံရေးကိစ္စ၊ ရခိုင်ပြည်နယ် ဖြစ်ပေါ်တိုးတက်မှု အခြေအနေနဲ့ ကုလသမဂ္ဂမျက်နှာစာမှာ ရခိုင်ကိစ္စနဲ့ပတ်သက်လို့ ဆွေးနွေးနေမှု အခြေအနေတွေနဲ့ စပ်လျဉ်းပြီး ဆွေးနွေးဖလှယ်ခဲ့ကြတယ်လို့ နိုင်ငံခြားရေးဌာနက သတင်းထုတ်ပါတယ်။ ဗြိတိန်နိုင်ငံခြားရေးနဲ့အဖွဲ့ဟာ မနေ့မနက်က ရခိုင်ပြည်နယ်မြောက်ကို သွားရောက်ပြီး တောင်ပြိုလက်ဝဲရှိ ပြန်လည်ဝင်ရောက်လာသူတွေ လက်ခံရေးစခန်းနဲ့ မောင်တောမြို့နယ်ရှိ ရွှေဇားရွာ၊ ပန်းတောပြင်ရွာတွေကို ရဟတ်ယာဉ်နဲ့ သွားရောက်ခဲ့ပါတယ်။ ဗြိတိန်နိုင်ငံခြားရေးဝန်ကြီးဟာ စက်တင်ဘာ ၁၉ရက်ကတည်းက မြန်မာနိုင်ငံမှာ ရောက်ရှိနေတာဖြစ်ပြီး ရန်ကုန်မှာရှိတဲ့ နိုင်ငံရေးအကျဉ်းသားများ ကူညီစောင့်ရှောက်ရေး အသင်းကို သွားရောက်လေ့လာခဲ့သလို ခရီးစဉ်အတွင်း နိုင်ငံတော်သမ္မတ၊ ကာကွယ်ရေးစီးချုပ်တို့နဲ့လည်း တွေ့ဆုံဖို့ အစီအစဉ်ရှိပါတယ်။
3 years Ago

February 12, 2018

အတိုင်ပင်ခံပုဂ္ဂိုလ်နှင့်ဗြိတိန်နိုင်ငံခြားရေးဝန်ကြီး နေရပ်စွန့်ခွာသူများအရေး ဆွေးနွေး

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဗြိတိန်နိုင်ငံခြားရေးဝန်ကြီး ဘောရစ် ဂျွန်ဆန်တို့ နေရပ်စွန်သူတွေ ပြည်လည်လက်ခံရေး ဆွေးနွေးခဲ့ကြပါတယ်။ မနေ့က နေပြည်တော်ရှိ နိုင်ငံခြား ရေးဝန်ကြီးဌာနမှာ တွေ့ဆုံဆွေးနွေးခဲ့ကြတာဖြစ်ပြီး နေရပ်စွန့်ခွာသူတွေကို ပြန်လည်လက်ခံရေး စီစဉ်ဆောင်ရွက်ထားရှိမှုအပါအ၀င် ရခိုင်ပြည်နယ်ရဲ့ နောက်ဆုံးဖြစ်ပေါ် တိုးတက်မှုအခြေအနေတွေကို ဆွေးနွေးခဲ့ကြတယ်လို့ အတိုင်ပင်ခံရုံးက သတင်းထုတ်ပြန်ပါတယ်။ ဗြိတိန်နိုင်ငံခြားရေးဝန်ကြီးနဲ့အဖွဲ့ဟာ မွန်းလွဲပိုင်းမှာ စစ်တွေကို သွားရောက်ခဲ့ပြီးနောက် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စု ၀န်ကြီး ဒေါက်တာဝင်းမြတ်အေး၊ ပြည်နယ်ဝန်ကြီးချုပ် ဦးညီပုတို့နဲ့အတူ ရခိုင်ပြည်နယ်မြောက်ပိုင်းရှိ အစ္စလာမ် ဘာသာဝင်တွေနေထိုင်တဲ့ မောင်တောမြို့နယ် ပန်းတောပြင်ကျေးရွာကို သွားရောက်ခဲ့ပြီး ကျေးရွာသားတွေနဲ့ တွေ့ဆုံကာ မီးလောင်မှုဖြစ်စဉ်၊ အစိုးရက ပံ့ပိုးကူညီပေးမှု အခြေနေတွေကို  တွေ့ဆုံ မေးမြန်းခဲ့တယ်လို့ ထုတ်ပြန်ချက်မှာ ဖော်ပြပါတယ်။ ဒါ့အပြင် ကျေးရွာအတွင်း နေအိမ်တွေ ပြန်လည်တည်ဆောက်ပေးနေမှုကို လှည့်လည်ကြည့်ရှုခဲ့တယ်၊ ဘင်္ဂလားဒေ့ရ်ှဘက်မှ ကုန်းလမ်းကနေ ပြန်လည်ဝင်ရောက်လာမယ့် သူတွေကို ယာယီ လက်ခံမယ့် တောင်ပြိုလက်ဝဲ ယာယီလက်ခံရေး စခန်းကို သွားရောက်ခဲ့ကြတယ်လို့ ဆိုပါတယ်။ စခန်းတာဝန်ရှိသူတွေက နေရပ်စွန့်ခွာသူတွေ ပြန်လည်လက်ခံရေးနဲ့ ပြန်လည်နေရာချထားရေးအတွက် မြန်မာ-ဘင်္ဂလားဒေ့ရှ် နှစ်နိုင်ငံ သဘောတူညီချက်နဲ့ မြန်မာဘက်မှ ဇန်န၀ါရီ ၂၃ ရက်ကစတင်ပြီး ကုန်းလမ်းမှ ပြန်လည် ၀င်ရောက် လာမယ့်သူတွေအတွက် တောင်ပြိုလက်ဝဲ၊ ရေလမ်းမှ ပြန်လည်ဝင်ရောက် လာမယ့်သူတွေအတွက် ငါးခူရ၊ စိစစ်အတည်ပြုပြီးသူတွေအား ခေတ္တတည်းခိုနေထိုင်ဖို့ လှဖိုးခေါင်ကြားစခန်း စတဲ့ ယာယီလက်ခံရေး စခန်းတွေ ဖွင့်လှစ်ထားမှု အခြေအနေတွေ ရှင်းလင်းခဲ့ကြပါတယ်။ ဗြိတိန်နိုင်ငံခြားရေးဝန်ကြီးနဲ့အဖွဲ့ဟာ ညနေပိုင်းမှာ တောင်ပြိုလက်ဝဲမြို့မှ စစ်တွေမြို့ကို ပြန်လည်ရောက်ရှိကြပြီး အထူး လေယာဉ်နဲ့ နေပြည်တော်ကို ပြန်လည်ထွက်ခွာသွားတယ်လို့ သိရပါတယ်။
4 years Ago
More News
Up